https://www.sunstar.com.ph/

---

• Guard naunay sa armas
• Cebu City moestrikto
• 2 patay sa lumba pulos way lisensiya, motor way rehistro
• Duterte mohimo sa iyang kataposang Sona karon
• Nganong daghang patay sa Cebu City?
• Mga kaalyado ni Chan sa konseho gihukasan og komitiba
• Lapu-Lapu council mas mipabor sa barangay kapitan sa Caubian island
• Pagbaligya, palit og baboy mas gihigpitan
• Australian national nadakin-as, patay
• Kapin sa 100 ka baboy gipamatay tungod sa ASF
• Basil: “Bini” gilangkuban og mga probinsiyana
• Editoryal: Sakit sa ting-uwan napagan
• Barrita: Unsay gikabalak-an ni Rama?
• Nadela: E-bike ug edukasyon ni Maribel
• Talk to Papa Joe: Gustong mabalik
• APO tree planting activity sa Asturias
• Panawagan sa publiko
• Mga sikat mibisita ni Pacquiao
• Jumpshot ni Santos miagak sa Beermen
• Pakyas apan gidayeg
• Yulo miabante sa vault apan..
• Laing Pinay boxer sud sa round-of-16

Guard naunay sa armas Posted: 25 Jul 2021 05:46 PM PDT Guwardiya nga nitubag sa sugo sa lawas, naunay sa iyang service firearm sulod sa usa ka pansayan sa Barangay Poblacion, lungsod sa Argao, alas 6:00 gabii, niadtong Dominggo, Hulyo 25. Si Lester Caballero Ocana, 20, minyo, ug taga Barangay Poblacion, lungsod sa Argao, samdan sa iyang tuong batiis. Matod ni Major Rodgene Fudotan, hepe sa Argao Police Station, niasoy sa Superbalita Cebu nga human sa guwardiya sa pagtubag sa sugo sa lawas, iyang gisul-ob og balik ang pantalon apan ang armas nga diha sa holsters natagak ug nibuto. Naigo ang batiis niini. Dugang ni Fudotan, luwas ra ang kahimtang sa guwardiya. (Guam Logroño) This posting includes an audio/video/photo media file: Download Now

Cebu City moestrikto Posted: 25 Jul 2021 06:56 AM PDT MOBALIK sa pagpatuman sa mas estrikto nga health protocol ang dakbayan sa Sugbo tungod sa nagkataas nga mga kaso sa coronavirus disease 2019 (Covid-19) sa dakbayan sa Sugbo. Kini ang nauyonan sa tigom nga gitambongan ni Acting Mayor Michael Rama tali sa Cebu City Emergency Operations Center (EOC) sa pagpangulo ni Konsehal Joel Garganera ug Inter-Agency Task Force (IATF)-Visayas Chief Implementer retired Gen. Melquiades Feliciano kagahapon sa hapon, Hulyo 25. Ang tigom naaghat human ang Department of Health (DOH) Central Visayas nitaho niadtong Sabado, Hulyo 24, bahin sa napuno nga 308 ka mga bag-ong kaso sa Covid-19. Ang aktibong kaso sa Covid-19 sa dakbayan nibalik na usab og lapas sa dos mil o niabot na og 2,009 ka aktibong kaso sa pagkakaron. Ang kinatibuk-ang kaso sa dakbayan sujad sa pandemiya niabot na og 28,425 diin 25,512 niini nangaayo na ug 903 ang nangamatay, base sa talaan sa DOH 7. Si Acting Mayor Rama gipaabot nga mopagawas og executive order sa paghimo og opisyal sa kamandoan subay sa mga tanyag atol sa naasoy nga tigom. Lakip sa nahisgotan mao ang pagbalik sa liquor ban ug pagpasayo sa curfew hour aron masumpo ang pagtakboy sa virus, sugyot ni Feliciano. Ang pagsibog sa pagsugod sa curfew hour sa alas 10:00 sa gabii gikan sa alas 11:00 sa gabii, hangtod sa alas 5:00 sa buntag. Si Feliciano nagkanayon ng nakahisgot kaniya ang mga barangay kapitan kalabot sa kalapasan sa health protocol sa gabii. "This one hour has a big difference to reduce the unneccesary activities," matod ni Feliciano. Did-an na usab ang non-essential activities sama sa parties ug salosalo sud sa panimalay. Sa mga haya, matod ni Feliciano, mas maayo nga di molapas sa napulo ka tawo ang magtukaw. "Makakatulong 'yan to control the spread," dason niya. Laing nasabotan sa mga opisyal mao ang koordinasyon sa mga EOC sa tri-cities sa Cebu, Mandaue ug Lapu-Lapu. Ang programa sa pagpamakuna nga mapadali. Nasabutan atol sa tigom sa pagpataas sa bed capacity sa Cebu City Quarantine Center (CCQC) ngadto sa 250. This posting includes an audio/video/photo media file: Download Now

2 patay sa lumba pulos way lisensiya, motor way rehistro Posted: 25 Jul 2021 06:56 AM PDT Walay lisensiya sa pagmaneho ug walay rehistro ang mga motorsiklo sa duha ka batan-ong nangamatay nga naglumba sa pagpadagan sa alas 3:20 sa kaadlawon niadtong Sabado, Hulyo 24, sa national highway sa Barangay Bolinawan, Dakbayan sa Carcar. Kini maoy gibutyag ni Patrolman Jerome Patao, traffic investigator sa Carcar Police nga nahinabi sa SunStar Superbalita Cebu. Ang motorsiklo ni Jodell Domque, 17, taga Sitio Bonsai, Bolinawan, walay rehistro. Samtang, expired ang student permit ug walay rehistro sab ang motorsiklo ni Niño Crisanto, 21, ulitawo, taga Sitio Ylaya. Ang duha pulos nangamatay sa aksidente sa ilang panalumba sa motorsiklo. "Ang sulti sa among gipangutana mga nakasaksi, gikan silag bilar, unya naglumba sa pagpadagan, naggukod, kay nakainom lagi," matod ni Patao. Dugang ni Patao, ilang gisabot ang sukwahi nga pamahayag sa pamilya ug kabanay sa mga biktima bahin sa hitabo. (GPL) This posting includes an audio/video/photo media file: Download Now

Duterte mohimo sa iyang kataposang Sona karon Posted: 25 Jul 2021 06:54 AM PDT Mohimo si Presidente Rodrigo Dutertre sa iyang ikaunom ug kataposang State of the Nation Address (Sona) karong hapon. Daghang hugonhugon sa pamahayag sa presidente sama sa sektor sa pamatigayon buot masayod sa konkretong plano kon unsaon sa pagpalambo sa ekonomiya taliwa sa pandemiya sa Covid-19. Apan ang mga lokal nga politiko nga kaalyado sa presidente walay negatibong komentaryo gawas sa pagpaabot sa patapos sa iyang liderato. Apan ang beteranong Cebuano lawyer ug Liberal Party Cebu chapter spokesperson Democrito Barcenas, nagkanayon nga 'nothing' o walay mapaabot sa kataposang Sona ni Duterte. Ang Sona obligasyon nga mando sa Article 7, Section 23 1987 Constitution nga nagkayon nga "the President shall address the Congress at the opening of its regular session." (SunStar Cebu) This posting includes an audio/video/photo media file: Download Now

Nganong daghang patay sa Cebu City? Posted: 25 Jul 2021 06:54 AM PDT Gimandoan ang tanang 11 ka station commanders sa Cebu City Police Office (CCPO) sa pagpasabot kon nganong daghang sunodsunod nga patay nga nahitabo sulod sa ilang hurisdiksiyon. Sa talaan sa CCPO, 17 na ang mga kaso sa pagpamusil sa sulod ning buwana hangtod kagahapon, Hulyo 25. Naaghat ang maong kamandoan human sa pagpusil-patay sa radio blocktimer Reynante Rey Cortes duol sa estasyonan sa radyo sa Barangay Mambaling niadtong Huwebes, Hulyo 22, alas 9:00 sa buntag. Una nang mihimog adjustment sa deployment ang CCPO gikan sa adlaw ngadto sa alas 10:00 sa gabii, ngadto sa alas 2:00 sa kaadlawon tungod kasagaran mahitabo ang krimen sa maong mga oras. Human sa kamatayon ni Cortes, ang CCPO nihimo og kabag-ohan pinaagi sa pagbutang og susamang team sa adlaw. "Starting supposedly last Monday pa, ato na ning gi-adjust ang atong deployment based sa mga oras ug lugar sa previous shooting incidents which is kasagaran gabii," matod ni Police Lieutenant Colonel Wilbert Parilla sa CCPO. Kon kini magpadayon ug walay gihimong solusyon ang hepe sa police station nga nahisakop ang dapit nga nahitabo sa krimen, angayan na nga mopasabot ang hepe niini. Una nang niawhag si acting Mayor Mike Rama sa kapulisan nga sulbaron ang sunodsunod nga kimen. (AYB) This posting includes an audio/video/photo media file: Download Now

Mga kaalyado ni Chan sa konseho gihukasan og komitiba Posted: 25 Jul 2021 06:52 AM PDT Gihukasan og komitiba sa konseho sa dakbayan sa Lapu-Lapu ang mga konsehal nga kaalyado ni Lapu-Lapu City Mayor Junard 'Ahong' Chan atol sa regular session sa konseho niadtong Hulyo 22, Huwebes. Mao kini ang gibutyag ni Konsehal Flaviano 'Bobit' Hiyas dihang nahinabi ning mantalaan. Si Hiyas, kinsa kanhi majority floor leader apan gihulipan sa paglingkod ni Chan ug gibalik isip chairman sa committee on finance. Ang mga konsehal nga giingong kaalyado ni Chan nga sila si Konsehal Janvi Dela Serna, Nelson Yap ug Efren Herrera wala nay gihuptan nga komitiba. Ang kanhi committee on infrastructure ni Herrera gidumala na karon ni Konsehal Michael Dignos, bag-ong sakop sa konseho sa dakbayan isip hulip ni anhing Konsehal Marcial Ycong. Ang kanhi committee on education ni Yap, gidumala na ni Konsehal Rico Amores samtang ang kanhi committee on accreditation ni Dela Serna, gidumala na karon ni Konsehal Eduardo 'Eddie' Cuizon, presidente sa Association of Barangay Councils (ABC) sa dakbayan. Ang committee on youth pabiling gidumala ni Lyka Tampus, Sangguniang Kabataan Federation President sa dakbayan. Pabilin usab nga majority floor leader si Konsehal Alexander 'Junrey' Gestopa Jr. Ang maong kalamboan wala gikahimuot ni Chan sanglit alang kaniya usa kini ka lakang sa pagbabag unya sa daghang proyekto nga iyang giplano sa dakbayan sa umaabot nga mga adlaw. Matod ni Chan, gumikan niini napanglantawan na niya nga malangay o dili gayud maaprobar ang iyang pangayuong mga proyekto sa konseho. "Atong gikinahanglan nga mapatuman ang atong mga programa, proyekto ug plano mao ang usa ka konseho nga moabag ug dili mobabag," matod ni Chan. Nasayran nga gawas nila ni Hiyas, Amores, Dignos, Cuizon ug Gestopa, ang mga konsehal nga giingong dili usab kaalyado ni Chan mao sila si Konsehal Gregorio 'Epoy' Paquibot Jr., Queenie Malingin-Amman, Rudy Potot ug Rex Mangubat. (GCM) This posting includes an audio/video/photo media file: Download Now

Lapu-Lapu council mas mipabor sa barangay kapitan sa Caubian island Posted: 25 Jul 2021 06:47 AM PDT Gipaboran sa konseho sa dakbayan sa Lapu-Lapu ang motion for reconsideration nga gisang-at ni Kapitan Jackson Matbagon sa Barangay Caubian nga dili lang una ipatuman ang iyang duha ka buwan nga preventive suspension. Kini nunot sa kasong grave misconduct nga giatubang ni Matbagon sa konseho human pasakai og kaso sa kagamhanan sa dakbayan ubos ni Lapu-Lapu City Mayor Junard 'Ahong' Chan. Matod ni Konsehal Flaviano 'Bobit' Hiyas, base usab sa imbestigasyon sa konseho, giingong wala gub-a ang solar lamp sa kagamhanan sa dakbayan nga giingong gihilabtan ni Matbagon sa iyang barangay. Gawas niini, mayoriya usab sa konseho ang nibotar pabor sa gidusong motion for reconsideration ni Matbagon. Hinuon, gibutyag ni Hiyas nga sa sunod nila nga session ila nang paninglan sa tagsa-tagsa nila ka position papers ang kagamhanan ug si Matbagon. Ang maong kaso subay sa giingong pagbalhin ni Matbagon sa usa ka solar lamp nga gimontar sa kagamhanan ni Chan niadtong Marso. (GCM) This posting includes an audio/video/photo media file: Download Now

Pagbaligya, palit og baboy mas gihigpitan Posted: 25 Jul 2021 06:34 AM PDT Ormoc City - Lalake nga padulong unta maghatod sa mga order nga karneng baboy nadakpan sa kapulisan, didto sa Barangay San Pablo, Ormoc City, alas 7 sa buntag, Martes, Hulyo 20, 2021. Giila sa kapulisan ang dinakpan nga si Rodrigo Francisco, 47, taga Purok 2, San Pablo, Ormoc City. Base sa report sa kapulisan, ang suspek sakay sa iyang multicab ug padulong unta maghatud sa mga order nga karneng baboy gikan sa Purok 2 paingon sa Simangan. Dugang pa sa report, walay napakita nga meat inspection certificate ang dinakpan. SLAUGHTERHOUSE Si Dr. Joseph Cortes sa City Veterinary Office nipasabot sa publiko nga tanan nga baboy nga ihawon dapat iagi gyud sa slaughterhouse aron masusi sa meat inspectors ug maisyuhan og ante-mortem certificate. Sa dili pa dad-on sa slaughterhouse ang baboy, dapat mokuha una og certificate to transport gikan sa barangay kapitan. DILI ITABOK Giklaro usab ni Cortes nga bawal pa sa pagkakaron nga itabok sa laing barangay ang mga buhing baboy, dapat ilahos na kini sa slaughterhouse. "Pero kon karne na or pork products pwede ra siya itabok pero kung buhi, dili gyod pwede," pasabot ni Cortes. Dugang niya ang slaughterhouse modawat og baboy gikan alas 8 sa buntag hangtud alas 5 sa hapon. Ang inihaway ipahigayon sa kaadlawon ug tanan nga baboy hutdon gyod pag-ihaw o 'all-in' ug 'all-out.' LAKANG BATOK ASF Gisugilon ni Cortes nga kini ilang gibuhat aron mapugngan ang pagkatap sa African Swine Fever (ASF) nga niigo sa dakbayan niadtong Hunyo. Gatusan ka mga buhing baboy ang gipamatay hilabi na kadtong nasulod sa 500-meter radius gikan sa index case sa Salvacion. Si Mayor Richard Gomez niisyu og executive order pagpatuman og 'pork holiday' sa dakbayan sugod Hulyo 3 hantud Hulyo 17. Bisan sa paglibkas sa kamanduan, duna gihapon pipila ka kondisyon. Ang dakbayan sa Ormoc modawat og buhing baboy basta gikan lang sa lugar nga walay ASF sama sa Cebu ug Bohol ug dapat iagi kini sa pantalan ug dunay saktong papeles. Naa na sa kustodiya ang dinakpan ug gipasakaan og kasong kalapasan sa Section 51 sa Republic Act 9296, samtang na-impound ang iyang multicab sa Police Station 1. (JKDP) This posting includes an audio/video/photo media file: Download Now

Australian national nadakin-as, patay Posted: 25 Jul 2021 06:34 AM PDT Usa ka Australian national nga nitubag sa sugo sa lawas, nadakin-as sa comfort room (CR) sa usa ka pension house sa Barangay Catmondaan, lungsod sa Catmon, alas 12:50 sa kaadlawon niadtong Dominggo, Hulyo 25. Si Rene Felix Xyren, 71, ang wala nay kinabuhi dihang nabantayan sa kapuyo nga usa ka Filipina. Si Patrolman Ronmark Banticil sa Catmon Police Station nisulti sa Superbalita Cebu nga ang biktima nagkalibanga hinungdan nga nagsige og sud sa CR sumala sa kapuyo sa langyaw. Tungod sa aksidente, nakaangkog bun-og ug pangos sa lawas ang langyaw. Dugang sa kapulisan, ang kapuyo nagsige og hangyo sa biktima nga magpa-admit sa hospital kay hapit na magtunga sa bulan ang kalibanga niini apan nibalibad kini. Apan niadtong Dominggo sa kaadlawon, nabantayan sa kapuyo nga wala magginhawa si Xyren sud sa CR. Ang langyaw ipaubos sa autopsy sa kapulisan. (GPL) This posting includes an audio/video/photo media file: Download Now

Kapin sa 100 ka baboy gipamatay tungod sa ASF Posted: 25 Jul 2021 06:34 AM PDT Ormoc City - Subra sa 100 ka mga baboy ang gipamatay sa lungsod sa Kananga, Leyte aron mapugngan ang pagkatap sa African Swine Fever (ASF). Matod sa lokal nga kagamhanan sa Kananga, pipila ka mga baboy sa Sitio Sagkahan, Brgy. Poblacion, Kananga, Leyte ang naigo sa ASF. Base sa kamanduan sa Department of Agriculture, tanan nga mga baboy nga sulod sa 500-meter radius gikan sa mga baboy nga naigo sa ASF, kinahanglan pamatyon. Si Mayor Matt Torres, nag-imposar og duha ka sa semana nga pork holiday sa lungsod sugod Hulyo 14, 2021. Walay baligya nga baboy sa merkado ug gidili ang pagpagawas ug pagpasul og mga baboy sa matag barangay sa pagsanta sa ASF. Ang mga namuhi og baboy nga na-insured sa ilang binuhi nga baboy sa wala pa moigo ang ASF, dunay madawat nga ayuda sa Department of Agriculture (DA) pinaagi sa indemnification program. (JKDP) This posting includes an audio/video/photo media file: Download Now

Basil: “Bini” gilangkuban og mga probinsiyana Posted: 25 Jul 2021 06:29 AM PDT Manila – Bongga ang bag-ong Pinay all-female group nga "Bini" tungod kay daghan ang midayeg sa ilang single nga "Born To Win," Adunay uban nagtuo nga foreigners ang nikanta, bisan ako abi nako og Black Pink ang nikanta pero mga Pinay diay. Ang mga miyembro niini mao sila si: Aiah, Colet, Maloi, Gwen, Stacy, Mikha, Jhoanna ug Sheena nga dumaan sa grabeng audition. Way palakasan in fact puro mga taga-probinsiya adunay Ilocana , Cebuana, Boholana, Batanguena , Cavitena ug way taga Manila. Bongga ang launch sa grupong Bini tungod kay gowns ni Francis Libiran ang ilang mga gisul-ob og siyempre, ang "Born To Win" ang gigamit nga runway song diin aduna kiniy Latin version, EDM version ug string quartered version. Sa gipahigayong Zoom conference sa Bini para sa regional media aside sa mga na-mentioned nga versions sa song, magkakaroon sad kini ng Instrumental version, Acapella version, Bahasa, Thai, Japanese og Spanish. Bongga di ba? Going international agad ang Bini at a short period of time. Sa kasamtangan, nangharos ang "Born To Win" sa MTV Asia Channel ug yun na nga didto nasuta nga mga Pinay diay ang singers niini. Close to 1M na sad ang views niini sa YouTube ingon man sa Spotify. Karon pa lang, excited na ang Bini sa first major concert nila kauban ang brother group nilang BGYO ug tuloy-tuloy ang ilang recording para mabuo ang ilang full album. Nasayod ba kamo nga before ang official launch ng Bini, nakahimo na sila og pre-debut song usa ka revival song entitled "Da Coconut Nut." Akala nga ng fans nga magiging novelty group ang Bini pero gipakita lang nila kung unsa sila ka versatile. Siyempre Pop Group ang ilang category. Well, congratulations, ladies og nagbunga na jud ang inyong paghihirap. Mga probinsiyana sila nga puno og talento nanimpalad sa Manila ug suwerteng napili as Bini nga karon, world class na ang dating, of course ang Bini minubo sa binibini. Aron nga ma-update sa maong girl group i-check ang ilang Facebook, Twitter, Instagram, ug Tiktok o mag-subscribe na sa official YouTube channel na BINI Official. This posting includes an audio/video/photo media file: Download Now

Editoryal: Sakit sa ting-uwan napagan Posted: 25 Jul 2021 06:27 AM PDT Naghinapos na ang buwan sa Hulyo. Nakabuylo na ang panahon sa ting-uwan. Ning panahona kaniadto, ang Department of Health (DOH) ug mga lokal nga kagamhanan sibaw sa pagtaho sa publiko sa ihap sa mga nasakit ug nakalas sa mga komon nga sakit nga motumaw matag ting-uwan sa nasod, labi na sa dengue gikan sa lamok nga daling makaapekto sa mga bata ug mga tawo ubos ang immune system. Ang kagamhanan nakatutok sa update sa kaso sa coronavirus disease 2019 (Covid-19) bisan sa dul-an sa duha ka tuig nga pakigbugno sa pandemiya. Tinuod nga atimanon kini apan dili usab nato hikalimtan ang mga sakit nga komon sa Pilipinas diin usa usab ka viral sama sa dengue nga makamatay, matod pa, kon itande sa Covid-19. Ang nakapait ning panahona, sama sa nahimo nga Covid-19 ang daghang pasyente sa ospital. Kumusta na ang dengue? Nakadungog ba kamo og update sa DOH ug lokal nga sanga sa panglawas? Ang tinuig nga kampanya sa DOH bahin sa pag-atiman sa panglawas panahon sa ting-uwan napagan sa pandemiya. Sumala sa DOH, ang komon nga sakit sa ting-uwan naglakip sa diarrhea, mga sakit nga water-borne o tungod sa tubig sama sa typhoid fever, cholera, leptospirosis, ug vector-borne o pagpaak sa matang sa lamok nga nagdala og malaria ug dengue. Dugang pa ang hilanat ug trangkaso (sip-on ug ubo), dala sa pag-usab-usab sa klima gikan sa init ug bugnaw, apan ang simtomas niini sama sa Covid-19. Ang gisip-on, ubo ug gihilantan ning panahon bation og tumang kabalaka tungod sa daghang taho bahin sa Covid-19. Magpa-swab dayon. Dunay nagpositibo apan daghan usab ang negatibo. Apan ang uban maglikay sa pag-adto sa doktor sa kabalaka nga nataptan og Covid-19 ug makuwarentina. Dili buot masayod sa kamatuoran. Hinuon, magkabuang sa pagtambal sa kaugalingon, maayo man usab. Maayong isipon nato kini nga sama sa komon nga sakit? This posting includes an audio/video/photo media file: Download Now

Barrita: Unsay gikabalak-an ni Rama? Posted: 25 Jul 2021 06:27 AM PDT Ginaingon nga ning kinabuhi duha ra ang angay nimong kabalak-an: kon maayo kag lawas o masakiton ka. Kon maayo kag lawas, wa kay angay nga kabalak-an. Kon masakiton ka, duha ra ang angay nimong kabalak-an: mamaayo ka o mamatay ka. Kon mamaayo ka, wa kay angay kabalak-an. Kon mamatay ka, duha ra ang angay nimong kabalak-an: malangit ka o maimpyerno ka. Kon malangit ka, wa kay angay kabalak-an. Pero kon maimpyerno ka, magkita mo sa imong mga barkada ug wa ka nay panahon nga mabalaka pa. Ang anaa sa ibabaw sinuwat ni Anonymous, ang magsusuwat nga hangtod karon wa pa mailhi. Apan unsay gikabalak-an ni Cebu City Acting Mayor Mike Rama? Si Mike Rama nabalaka sa kahimtang sa panglawas ni Cebu City Mayor Edgardo Labella. * * * Nabaniog man gud sa social media niadtong gabii sa Huwebes, Hulyo 22, 2021, nga namatay si Labella. Ang maong huhungihong daling gihimakak ni Jaypee Labella, anak sa mayor, ug ni Atty. Floro Casas Jr., ang Cebu City administrator. Sanglit on medical leave si Labella, si Rama nga bise mayor niasumer isip acting mayor. Gusto niya nga ibutyag sa pamilya ni Labella ang kahimtang sa panglawas sa mayor aron mawagtang ang mga huhungihong. Matod pa niya, "We know pretty well that the mayor is in the hospital. We know pretty well that the mayor is trying to get back in shape. We know pretty well that there is something more to that and I wish the family should speak out." * * * Matod pas katiguwangan, kadtong madungog nga namatay dugay na hinuon nga mamatay. Sama sa tawo nga tungluhon sa iyang kaaway, nga bisan kon nagtinga na ug nagdung-aw na sa lawom nga bung-aw sa kamatayon, maulian pa. Ang makapahimuot mao ang huhungihong bahin sa bantogang Amerikanhong magsusuwat ug humorist nga si Mark Twain. Samtang didto siya sa London sa usa ka speaking tour, nabaniog nga namatay na siya. Usa ka pamantalaan sa Estados Unidos nipatik sa iyang obituary. This posting includes an audio/video/photo media file: Download Now

Nadela: E-bike ug edukasyon ni Maribel Posted: 25 Jul 2021 06:22 AM PDT Aron madali, nakahukom ko nga mosakay og electric bike human makapamahaw sa merkado sa Inayawan gahapon. Sa gawas sa merkado, naglaray ang mga e-bike ug trisikad. Giduol nako ang driver nga nagmontar sa iyang e-bike. Sa iyang atbang naay usa nga nag-una sa linya, apan batan-ong babaye man ang nag-drive. Apan matod sa driver nga akong giduol, adto ko sakay sa e-bike nga gidrayban sa dalaga. Aw, mao ba? Nagtuo man gud ko nga pasahero to nga nagpaabot sa driver. Way daghang langas, niduol ko sa dalaga ug iya dayon kong gisuna kon para asa ko. Siya gyud diay ang driver. Siya si Mariel Espiritu, 18 anyos. Samtang nagbiyahe mi, wa nako palabya ang pagdayeg sa talagsaong kugi nga iyang gibuhat. Babayeng buhat apan nangako sa trabaho para sa mga lalake. "Pobre man gud mi kaayo, Sir. Unya pandemiya pa gyud. Manuroy ra og isda ang pangita sa akong amahan. Mao nga nisud ko ning maong matang sa panginabuhi. Tulo ka semana nako nga namasahero human makapangutang niining e-bike," paambit ni Mariel, ikaduha gikan sa kinamagulangan sa upat ka magsuon. Ako nga naminaw sa iyang tubag sa akong mga pangutana, nibati og talagsaon nga garbo nga ning bahina sa Sugbo may batan-on nga sama kang Mariel nga nakigbisog batok sa kawad-on. Bag-o lang gitapos ni Mariel ang Grade 12 sa Inayawan National High School. Karon nangandam na siya aron magpa-enrol sa first year college. Ug ang desisyon nga mag-drive og e-bike, tulo ka semana na ang nakalabay, naapil sa plano aron masustinihan ang iyang pagtungtung sa kolehiyo. Ang subra sa iyang idata matag adlaw, iyang tigumon alang sa pag-eskwela. "Gusto unta ko nga mag-nursing, unya mahal man," paambit ni Mariel. Mao nga ako siyang gitambagan nga mangita na lang og laing kurso nga ganahan sab niya. Ang pagka maestra maoy iyang gustong ipuli sa kursong nursing. Kana. Ako siyang gidaygan. Unya mokuha siya og entrance exams sa mga unibersidad o kolehiyo nga iya sa gobyerno aron makalikay sa dagkong bayranan. Mas bintaha pa gyud nga mahimo siya scholar, nga maoy gusto nakong ihangyo sa atong mabuot nga tigbasa, basin naa moy ideya niini alang sa maayong ugma ni Mariel ug sa iyang pamilya. Ang tanan nakong gisugyot positibo niyang giandam. Mas nasibot ko ning bahina sa among kukabildo samtang nag-drive siya sa iyang e-bike. Kana bitaw'ng maglaum ka nga maoy itubag unya man gyud ang nigawas sa iyang baba, sanglit para man sa iyang kaayohan ang akong gipaambit kaniya. Sa laktod gawas nga kugihan, buotan ug matinahuron kining dalaga nga taga Sitio Isla Verde sa Barangay Inayawan, Cebu City. Sa paghiabot nako sa akong destinasyon, nagpadayon ang among tabi. Iyaha ko nga gisuginlan nga kaniadto pa diay siya naanad niining pag-drive og e-bike. Extrador siya sa e-bike sa iyang magulang kon way klase. Mao diay nga sa akong obserbasyon, hanas ug maantigo momaneho. This posting includes an audio/video/photo media file: Download Now

Talk to Papa Joe: Gustong mabalik Posted: 25 Jul 2021 06:22 AM PDT Dear Papa Joe, Ako diay si Jimmy,30 years old. Naa koy ka live in sa una apan nagkabuwag mi tungod sa pandemiya hangtud nga nagkabuwag gyud mi kay nakabinoang siya nako though iring iring lang apan natandug gyud ako garbo. Mao na nakakita sad ko og lain diri, kay sa dugay nakong hatod hatod niya, na-develop ko kay nag part-time habalhabal man ko kay wa may klaro na akong trabaho depende sa project sa akong amo. Daghan ang gusto magbalik mi apan di na man nako kaya biyaan ang naa diri. Unsa may buhaton ko? JIMMY Jimmy, Dagko na mo. Sunda kon unsay tan-aw nimo nga sakto. Kon natandog na ang imong garbo ug di nimo mapaubos, wa gihapoy padulngan. Mag-away ra mo kay balikbalikon na ninyo ang inyong isyu. Kon nahigugma ka sa babaye nga naa diri, padayuna total moabot ra ang panahon nga makasabot ra to ang imong kanhi. Samot na nga siya man kaha ang nag-una-una. Kana lang ug daghang salamat. PAPA JOE (sa inyong tampo ipadala lang sa papajoesuperb@gmail.com) This posting includes an audio/video/photo media file: Download Now

APO tree planting activity sa Asturias Posted: 25 Jul 2021 06:19 AM PDT Ang fraternity organization nga Alpha Phi Omega (APO) Western Cebu nipasiugda og tree planting activity niadtong Hulyo 17 diin 500 ka seedlings ang gitisok sa lungsod sa Asturias, Sugbo. Ang maong kalihokan adunay tema nga "Save our tomorrows, save our rivers today" nga gipaluyohan sa kagamhanan sa lungsod sa Asturias ilabi na ni Mayor Jose Pintor inabagan sa Solid Earth Development Corporation (SEDC), Cebu Archdiocesan Commission on Environmental Concern (CACEC), Du Ek Sam (DES Marketing), APO Al Ain Directorate, Austal Philippines, ug Cabanao Surveying. Ang 500 ka seedlings gilangkuban sa 200 ka tanom nga kawayan, 150 ka lantuan ug 150 ka narra nga maoy gipangtanom. Misalmot usab ang pipila ka barangay sa Asturias, 4Ps beneficiaries, Philippine Army's 82nd Infantry Battalion, PNP DEG7 ug local units LDRRMO ingon man ang kapulisan. Mapasalamaton ang APO sa ubang stakeholders nga misuporta alang sa kalamposan sa maong kalihokan. Samtang si Phil Bert Undalok sa "Puti Itom" Bisrock band ang milingaw sa mga partisapante pinaagi sa iyang mga awit. (PR) This posting includes an audio/video/photo media file: Download Now

Panawagan sa publiko Posted: 25 Jul 2021 06:18 AM PDT Ang Children's Shelter of Cebu, Inc. (CSCI) nanawagan sa mga matuod nga ginikanan ug kaparyentihan sa mga menor de edad nga mokontak sa among social workers nga sila si Alenaire Claire Olimpo, Glaiza Torres, ug Crisologo Secuya, o sa among program director nga si Michelle Klaris Fe R. Cabansal sa buhatan sa CSCI sa 178-I.D Sun Valley V. Rama, Dakbayan sa Sugbo, o tawag sa (032) 254-2944. Mao kini ang pasiunang tulo ka mga bata: 1) Julie Anmarie Bentic, nag-edad og 14 anyos ug onse ka buwan. Gipanganak sa Borongan, Samar. Siya kay gihatud sa taga Our Lady of Divine Providence Home, Cansojong, dakbayan sa Talisay. Si Julie Anmarie nasulod sa Children's Shelter of Cebu niadtong Agusto 19, 2019 alang sa iyang temporaryong pagtagad ug husto nga pag-atiman sa iyang kahimtang. 2) Shahana Mae Bentic, 11 anyos ug unom ka buwan. Gipanganak sa dakbayan sa Talisay. Siya kay gihatud sa taga Our Lady of Divine Providence Home, Cansojong, siyudad sa Talisay. Si Shahana Mae nasulod sa Children's Shelter of Cebu niadtong Agusto 19, 2019 alang sa iyang temporaryong pagtagad ug hustong pag-atiman. 3) Zacarie Jade Bentic, 12 anyos ug usa ka buwan. Gipanganak sa dakbayan sa Talisay. Siya kay gihatud sa taga Our Lady of Divine Providence Home, Cansojong, siyudad sa Talisay. Si Shahana Mae nasulod sa Children's Shelter of Cebu niadtong Agusto 19, 2019 alang sa temporaryong pagtagad ug husto nga pag-atiman sa iyang kahimtang. Kon dili moadto sa CSCI aron kuhaon ang mga bata su sa usa ka buwan gikan ning pagtaho, maghatag kini og higayon sa pagproseso sa ilang papeles ngalegal nga gibiyaan sa hingpit ang mga bata. (PR) This posting includes an audio/video/photo media file: Download Now

Mga sikat mibisita ni Pacquiao Posted: 25 Jul 2021 06:15 AM PDT Gibisita si Filipino boxing legend Manny Pacquiao sa duha ka sikat nga Fil-Ams nga sila si basketball star Jordan Clarkson ug Grammy award winner Apl.de.ap sa grupong The Black Eyed Peas atol sa iyang training sa Wild Card gym sa California, USA. Ang tulo ka bantugang mga personalidad nagpahulagway diin bitbit ni apl.de.ap ang bakus sa World Boxing Association (WBA) welterweight division nga kanhi gipanag-iya sa Pambansang Kamao nga Pilipinas. Si Clarkson, kinsa usa sa mga pambato sa Utah Jazz sa National Basketball Association (NBA), nag-post sa social media og mensahe nga naghulagway kang Pacquiao, kinsa usa ka 8-division world champion. "The goat, Legendary!!!," post ni Clarkson nga napatik sa GMAnews.tv. Si Clarkson ug apl.de.ap o Allan Pineda Lindo sa tinuod nga kinabuhi, parehong adunay Pinoy nga kaliwat sa Pampanga. Ang 29 anyos nga si Clarkson natawo sa Tampa, Florida apan ang iyang inahan nagagikan sa Bacolor, Pampanga samtang si Pineda natawo ug nagdako sa Angeles City, Pampanga una kini ni-migrate sa Amerika. "Filipino pride," tweet ni Pacquiao. Si Pacquiao kasamtangang naa sa ikatulong semana sa iyang hugot nga pagbansaybansay alang sa umaabot niyang tahas diin suwayan niya pag-ilog sa World Boxing Council (WBC) ug International Boxing Federation (IBF) welterweight titles ni American Errol Spence Jr. karong Agusto 21, 2021 sa T-Mobile Arena sa Las Vegas. Gawas nila ni Clarkson ug Apl.de.ap, nibisita sab sa fighting senator ang kanhi niya kontra nga si Miguel Cotto sa Puerto Rico ug YouTube sensation Logan Paul. Sa laing bahin, gipabuhagay ni Pacquiao ang iyang kalipay nga hangtod karon, aktibo gihapon siya sa pagpakig-away. "I feel happy and amazing. After 20 years, I'm still here. I keep on fighting with the best... All the honor, glory belong to God," asoy ni Pacquiao. Si Pacquiao unang miasdang niadto pang 2001 ubos sa paggiya ni American Fall of Fame trainer Freddie Roach. Ang panagtambayayong nila ni Pacquiao ug Roach nakahakot og sunodsunod nga kalampusan nga naghatod sa Pinoy boxing icon sa tumoy sa kalampusan. (ESL) This posting includes an audio/video/photo media file: Download Now

Jumpshot ni Santos miagak sa Beermen Posted: 25 Jul 2021 06:03 AM PDT Napasulod ni Arwind Santos ang iyang jumpshot sa nahabiling 1.2 segundo aron agakon ang San Miguel Beermen sa makutas nga kadaugan batok sa NorthPort Batang Pier, 88-86, kagahapon sa Philippine Basketball Association (PBA) Philippine Cup sa Ynares Sports Arena sa Pasig City. Gikan sa timeout, si Beermen coach Leo Austria naghan-ay og set play nga gitagana alang sa 40 anyos nga si Santos , kinsa nakadawat og pasa gikan ni Marcio Lassiter alang sa pagmugna sa nakapadaog nga puntos. "Ako hindi ko iniisip kung ano na edad ko ngayon," batbat ni Santos. "Ang iniisip ko kung paano pa rin ako makakapag-contribute sa mga kabataan ng magagaling ngayon." Ang Beermen, nga ningsaka sa 1-1 nga rekord, gipangulohan sa bag-o nilang sakop nga si CJ Perez pinaagi sa iyang 18 puntos, nidugang og 17 puntos si Santos samtang nitunol og 16 puntos si Alex Cabagnot. Ang Batang Pier, nga ningkanaog sa 1-1 nga rekord, gipangulohan sab sa bag-o nilang pambato nga si Greg Slaughter pinaagi sa iyang 23 puntos samtang nihatag og 19 puntos si Robert Bolick. Mao kini ang labing unang duwa sa 7-footer nga si Slaughter isip usa ka batang Pier. Puntos matag usa San Miguel (88) – Perez 18, Santos 17, Cabagnot 16, Tautuaa 11, Fajardo 8, Pessumal 6, Lassiter 6, Ross 3, Gamalinda 3. NorthPort (86) – Slaughter 23, Bolick 19, Onwubere 12, Balanza 11, Malonzo 10, Taha 9, Rike 1, Ferrer 1. (ESL) This posting includes an audio/video/photo media file: Download Now

Pakyas apan gidayeg Posted: 25 Jul 2021 06:03 AM PDT Nanamilit ang pambatong paddler sa Pilipinas nga si Cris Nievarez sa Tokyo Olympics human sa iyang kapakyasan sa quarter-final round sa rowing men's singles sculls kagahapon, Hulyo 25, 2021 sa Sea Forest Waterway, Japan. Pakyas man tuod ang 21 anyos nga si Nievarez nga makalangkat og medalya apan napuno siya sa pagdayeg sa iyang gipakita sa matag upat ka mga tuig nga kompetisyon. Matod ni Philippine Rowing Association (PRA) president Patrick Gregorio nga ang nabuhat ni Nievarez milabaw sa gilauman gikan kaniya. "His performance is beyond expectations. Commendable," matod ni Gregorio sa mensahe ni GMA News Online human mahiluna si Nievarez sa ikalima nga puwesto sa quarterfinals. "Great potential for this young man." Gipasabot ni Gregorio nga ang naabot ni Nievarez maoy labing taas nga nakab-ot sa usa ka Pinoy rower ning maong pretihiyusong kompetisyon. Si Nievarez maoy ikatulo pa lang nga Pinoy rower nga naka-qualify sa Olympics sunod nila ni Ed Maerina niadtong 1998 Seoul ug 2000 Sydney. Sa quarter-finals, si Nievarez mioras og 7 ka mga minutos ug 50.74 ka mga segundos sa Heat 4 event diin sila si Oliver Zeidler sa Germany (7:12.75), Luca Verthein Ferreira sa Brazil (7:14.26) ug Mindaugas Griskonis sa Lithuania (7:16.71) mao ang nakaabante. Sa sunod niyang tahas, si Nievarez magtutok alang sa Vietnam Southeast Asian Games ug 2022 Asian Games. "At 21 years old, with better and focused training here and abroad, Cris will really improve," batbat ni Gregorio. (ESL) This posting includes an audio/video/photo media file: Download Now

Yulo miabante sa vault apan.. Posted: 25 Jul 2021 06:03 AM PDT Nakaabante sa final round ang Pinoy gymnast nga si Carlos Yulo sa vault exercise sa artistic gymnastics tournament sa Tokyo Olympics niadtong Sabado sa gabii, Hulyo 24, 2021 sa Ariake Gymnastics Centre. Apan nataktak ang 21 anyos nga si Yulo sa ubang events nga mao ang rings, parallel bars, horizontal bar, pommel horse, ug ang iyang paboritong floor exercise. Sa vault exercise, diin walo lang ang makaabante, si Yulo nahiluna sa ikaunom nga dapit nga adunay tally nga 14.712. Si Yulo, kinsa usa sa labing gilauman nga makahatag og medalya sa Pilipinas, igo lang nahiluna sa ika-44 nga dapit sa floor exercise nga nakahugno sa iyang pagbati. (ESL) This posting includes an audio/video/photo media file: Download Now

Laing Pinay boxer sud sa round-of-16 Posted: 25 Jul 2021 05:58 AM PDT Gisugdan ni Filipino flyweight Irish Magno ang iyang kampanya sa women's boxing sa Tokyo Olympics pinaagi sa dominanteng unanimous decision nga kadaugan batok kang Christine Ongare sa Kenya kagahapon, Hulyo 25, 2021 sa Kokugigan Arena, Japan. Pagsugod pa lang sa away, tataw na ang dakong bintaha sa abilidad ni Magno kumpara sa mas mubo nga Kenyan. Agresibo man tuod si Ongare apan kanunay kining masangit sa mga kumo ni Magno sa iyang matag ataki. Ang judges nihatag kang Magno og perpektong 5-0 nga kadaugan nga nagduso kaniya sa round-of-16 sunod sa laing Pinay nga si featherweight Nesthy Petecio. Makapaukyab man tuod ang iyang kadaugan apan gipaneguro ni Magno nga dili siya magpaanod sa kalampusan ug kinahanglan niyang magtutok sa sunod niyang tahas. "Focus lang tayo. Wag muna po tayong mag-aim high. Step by step muna tayo," batbat ni Magno nga napatik sa gmanews.ph. (ESL) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States