https://www.sunstar.com.ph/

---

• Border control points ibalik
• 10 porsyento lang makasulod sa simbahan; apan Cebu City 30 porsyento ang gitugot
• Labella: buhi ug maayo ko; mi-post sa iyang FB page
• Mag-uuma nag-amok napatay sa pulis
• CCPO nanghakot og mga award
• Annette, asawa ni kanhi gobernador Lito O, namatay
• Editoryal: Ayaw lagi'g kompyansa
• Nalzaro: MECQ na pod ta
• Mongaya: Puno ang hospitals
• Lonzon: Medalya
• Daclan: Jane de Leon molupad na!
• Mga nasunogan gihatagan ni Radaza og hinabang
• Pilipinas mitala og 8K bag-ong kaso sa Covid-19
• IED nakaplagan sa pulis, sundawo
• Super Blowout: 'Presensiya nakahatag og paglaum'
• Pacquiao mipasaka og kaso
• Vallena: Malipayon sa sikad
• Migallen: Westbrook haom kaha sa Lakers?
• Pacquiao gibisita ni Klay Thompson
• Ika-2 gold nanuktok na

Border control points ibalik Posted: 31 Jul 2021 08:03 AM PDT Ang kapulisan sa mga Dakbayan sa Sugbo ug Mandaue magbutang og mga border control point sugod karong adlawa, Agusto 1, 2021 nunot sa pagpatuman sa modified enhanced community quarantine (MECQ) sa tibuok Sugbo sulod sa 15 ka mga adlaw. Managlahi hinuon ang ilang border control kay ang Cebu City Police Office (CCPO) magbutang og lima ka permanenteng border control samtang ang sa Mandaue City Police Office (MCPO) mobile. Matod ni Police Lieutenant Colonel Wilbert Parilla, deputy city director for operations sa CCPO, nga ang mga dapit nga gipangbutangan og border control points mao ang South Road Properties (SRP) habig sa may Il Corso ug Barangay Bulacao sa south samtgang sa Talamban duol sa Tintay, dalan Panagdait sa Barangay Kasambagan ug sa North Reclamation Area duol sa Cebu Ports Authority (CPA) sa north. WAY Q PASS Pasabot ni Parilla nga ang mga pulis nga gipangbutang sa border control di mangitag quarantine pass ug dili usab mopugong sa mga tawo nga mosulod sa siyudad sa Sugbo sanglit ang ilang ipatuman mao ra ang estriktong health protocol. Parahon ang tanang mga sakyanan aron masusi kon natuman ba ang health standard sa mga sakay ug wa usab mopasakay og mga menor de edad. Hinuon, gidugang ni Parilla nga magpaabot pa sila sa guidelines gikan sa local nga kagamhanan ug sa National Inter-Agency Task Force (NIATF) kon unsa pa ang ilang buhaton. "Dili naman ta maka check og kanang pareho sa una nga kinsay dunay mga quarantine pass. So far ang atoa is more on implementation lang sa health protocol pero depende pa ni og unsay instruction sa LGU ug sa IATF," matod ni Parilla. Awhag niya sa mga nanarbaho sa siyudad nga dalhon lang nila kanunay ang ilang mga certificate of employment (COE) ilabi na niadtong nanarbaho sa gabii. Matag gabii, ang kapulisan sa dakbayan nagpatuman sa lapad nga checkpoints sama sa ilang gihimo sa Biyernes diin daghan ang nangadakpan nga mga tawo tungod sa kalapasan sa curfew. Aduna hinuoy gipang badlong lang ug gipapauli sama sa mga habal-habal driver nga naabtan sa mga pulis nga nag-estambay sa mga eskina sa kabarangayan nga di na masulod sa mga pampubliko nga mga sakyanan. Apan aduna gyuy wala motuo hinungdan nga gipang dala sa mga holding area sa Prevention, Restoration, Order, Beautification and Enhancement (Probe) apan wa pa silay figure kon pila ang gidaghanon sa nasikop. Ang kadtong nadakpan papilion kon mobayad ba sila og P500 o mohatag og community service. Giklaro hinuon ni Parilla nga magpadayon pa nga maka gawas sa ilang balay ang mga nag trabaho, lakip na ang mga authorized persons outside residence (APOR) ug kadtong nagtrabaho sa essential nga mga buhatan. DAKOP DAKOP Samtang ang MCPO mopakatap og daghang mga pulis alang sa ilang random motor stop operations, random checkpoints ug mobile quarantine border control. Si Police Lieutenant Colonel Mercy Villaro, information officer sa MCPO, nisulti sa Superbalita Cebu, nga ilang palig-unon ang checkpoint operations aron pagseguro sa pagtuman sa minimum health protocol. Tanan nilang mga operasyon ipahigayon nga random aron di makabantay ang mga malapason, matod ni Villaro. Sa paghimo niini, matod ni Villaro nga ang MCPO di na mogamit og mga tolda sa ilang pag-establisar og border control checkpoints. Inay, matod ni Villaro, nga mobile ang ilang control point aron makabalhin balhin sila og border depende sa kabaga sa trapiko sa dapit. Matod niya nga ang operasyon itumong labina sa public utility vehicles (PUVs) aron masusi kon ang mga pasahero nakatuman ba sa mga health protocol. Matod ni Villaro nga ang mga pulis mosusi sa pagtuman sa mga sakyanan sa minimum health protocols pinaagi sa pagpara. Gipaabot nga ang mga pasahero mosul-ob sa husto sa ilang face masks ug face shields ug moobserbar sa social distancing. Kinahanglan usab nga sundon ang tukmang kapasidad sa matag sakyanan. Makigtambayayong sila sa Traffic Enforcement Agency of Mandaue (TEAM). Ang Team enforcers mahimong moisyu og citation tickets sa mga molapas sa protocol. Gitataw ni Villaro nga wa pa sila makadawat og mando sa ilang kadagkuan kon ang mga pasahero pangitaan ba og COE, quarantine pass o vaccination card. Hinuon, ang tanang local government units (LGU) nisaad nga magpadayon ang mga pagpamakuna. Ang mga magpabakuna magpakita lang sa ilang appointment o vaccination card niadtong naka first dose na. Ning pagsuwat, ang ilang gipaabot mao lang ang pagtuman sa publiko sa mga minimum health protocol, mga ordinansa ug executive orders, dugang ni Villaro. Gawas sa checkpoints, si Villaro niingon nga ang MCPO mopatuman gihapon sa "Oplan Pahimangno" operations. Matod niya nga ang ilang gihangyo ang mga barangay officials sa pagpakigtambayayong kanila sa pagpatuman sa mga health protocol sa sudlunon nga bahin sa mga barangay. Ilang badlungon kadtong molapas, apan kon di mopatuo, ilang dakpon. MIAPELAR Ang Cebu City Government miapelar sa NIATF aron ibalik ang classfication sa siyudad ngadto sa modified general community quarantine (MGCQ). Si Acting Mayor Michael Rama nipirma ug nipadala sa letter of appeal nga gi-address ngadto sa IATF. Sa iyang suwat, si Rama niingon nga ang Siyudad naghimo nag mga lakang aron mapugngan ang pagsaka sa mga kaso sa Covid-19. (KFD, JJL) This posting includes an audio/video/photo media file: Download Now

10 porsyento lang makasulod sa simbahan; apan Cebu City 30 porsyento ang gitugot Posted: 31 Jul 2021 07:46 AM PDT Nunot sa implementasyon sa modified enhanced community quarantine (MECQ) sa tibuok isla sa Sugbo, ang Archdiocese sa Sugbo nipahibawo sa Sabado, Hulyo 31, nga sugod sa Dominggo, Agusto 1, ang mga parokya sa Sugbo makapasulod lang og 10 porsyento sa iyang kinatibuk-ang kapasidad alang sa mga relihiyusong kalihukan. Si Msgr. Renato Beltran Jr., Cebu Archdiocesan Chancellor, niingon hinuon nga mahimo kining dugangan ngadto sa maximum nga 30 porsyento kon motugot ang local government units. Samtang ang mga hangyo sa mga parokya sa Dakbayan sa Sugbo alang sa 30 porsyento nga kapasidad sa venue giuyonan sa Cebu City Emergency Operations Center. Si Fr. Glenn Guanzon, Cebu Archdiocesan Commission on Worship chair, niingon nga sa umaabot nga ordinasyon sa Lunes, Agusto 2, ang 10 porsyento nga kapasidad sa Cebu Cathedral maoy sundon. Ang kalihukan i-live streamed pinaagi sa Facebook page sa Cebu Metropolitan Cathedral ug sa Roman Catholic Archdiocese of Cebu Facebook page niadtong gustong motambong nga virtual. Samtang ang Archdiocese nitataw nga ang mga misa sa mga patay taliwa sa MECQ gilimitahan lang alang sa immediate family members. "The most important consideration, as our underlying principle in the observance of our liturgical health protocols, is our coordination and collaboration with our respective Local Government Units," matod ni Beltran. Ang Archdiocese niingon nga ang mga direktiba ihatag sa di madugay. Iyang gihangyo ang mga magtutuo sa pagpadayon sa pag-ampo taliwa ning pandemic. (WBS) This posting includes an audio/video/photo media file: Download Now

Labella: buhi ug maayo ko; mi-post sa iyang FB page Posted: 31 Jul 2021 07:44 AM PDT Buhi ug maayo ang iyang kahimtang. Mao ni ang gipahibawo ni Cebu City Mayor Edgardo Labella pinaagi sa iyang hulagway nga iyang gi-post sa iyang Facebook account sa Sabado, Hulyo 31, 2021, nga nagpakita nga siya nagkupot og isyu sa usa ka lokal nga mantalaan. Si Jaypee Labella, anak sa mayor, niingon nga ang iyang amahan makagawas sa tambalanan sunod semana. Ang hulagway gitumong aron pagtapos sa mga hungihong nga ang mayor giingong namatay. "I would like to inform everyone na (that) I'm alive and doing well," suwat sa mayor sa iyang Facebook post. Mao usab kini ang unang higayon nga si Labella ni-post og hulagway niya sukad siya naospital niadtong Hulyo 13 tungod sa pagsige og ubo, nga nakompirmar nga tungod sa pneumonia. Si Labella naa sa medical leave kay gitambagan siya nga mopuyo sa ospital alang sa pagtambal sa iyang pneumonia. Ang pagpagawas ni Labella sa tambalanan gikompirmar ni City Administrator Floro Casas Jr., ug niingon nga ang mayor gipaabot nga makagawas sa Martes, Agusto 3. Si Casas niingon nga miarang-arang na ang kahimtang ni Labella ug gani nangayo na kini sa iyang paboritong pagkaon. Dihang gipangutana sa media kon nagplano ba sila paghimog legal nga lakang batok sa mga nagpakatap nga ang mayor namatay, matod ni Casas nga posible kini. Apan siya nasayod nga angmayor mas mopalabi sa pagpakahilom. "I'm not sure lang, knowing mayor, di mana sya ganahan og gubot gud... di siya anang kiha-kiha, siya nagkanayon. Nagpasalamat usab si Labella niadtong mga tawo nga nanag-ampo ug nagsuporta kaniya. Sukad sa miaging semana, bisan si Acting Mayor Michael Rama gustong makigkita kang Labella, apan pakyas. Ang mayor giingong di mabisitahan sa ospital tungod sa kakuyaw nga mataptan sa coronavirus disease 2019 (Covid) samtang nagpaalim pa sa iyang pneumonia sa. (JJL) This posting includes an audio/video/photo media file: Download Now

Mag-uuma nag-amok napatay sa pulis Posted: 31 Jul 2021 07:43 AM PDT Mag-uuma nga nag-amok, nanglabay og bato sa mga miresponding pulis, napusilan patay alas 7:50 sa buntag sa Sabado, Hulyo 31, 2021 sa Sitio Gumamela, Barangay Daan Lungsod, lungsod sa Tuburan, Sugbo. Si Danilo Talaugon Sampalad, 43, minyo, nagpuyo sa nahisgutang lugar, namatay pipila ka oras ang milabay sa pagkadangat sa tambalanan. Si Police Staff Sgt. Mark Joseph Toring, imbestigador sa Tuburan Police Station nga nahinabi sa Superbalita Cebu, nagkanayon nga ang ilang kauban nga si Patrolman Johnny Iway Tejana maoy nakapusil kang Sampalad. Matod ni Toring nga sila nakadawat og tawag gikan sa mga barangay tanod sa nahisgutang lugar nga si Sampalad nag-amok, nanghasi ug gusto nga kulatahon ang iyang asawa nga si Judith, 41. Si Sampalad hubog nga nibalik sa ilang balay nga nagdalag kutsilyo ug gusto mosulod. Si Sampalad gialarmahan na niadtong Biyernes human nangulata sa iyang asawa gumikan sa kahubog. Apan pag-abot sa mga pulis niadtong Biyernes sa buntag, nidagan paingon sa bukid. Gumikan niini, ang asawa ilang gitambagan nga mokuha og barangay protection order (BPO). Si Sampalad nibalik sayo sa buntag sa Sabado nga hubog. Nag-wild kay dili siya makasulod sa ilang balay tungod kay gihiktag pisi sa asawa ang pultahan. Ang mga silingan nabalaka kay ang asawa naa sa sulod sa panimalay mao ilang gitawgan ang kapulisan. Pag-abot sa mga pulis, gibato sila ni Sampalad, apan way naigo kanila ug sa mga tanod. Gitambagan siya nga motahan, dili na mamato ug ibutang ang iyang gidala nga kutsilyo. Wala gihapon mipatuo, subli na usab nga namato sa mga pulis hinungdan nga gipasalbahan. Inay mahadlok, nangisog na hinuon og maayo ug nisinggit nga siya manabla, dili magpadakop nga buhi. Nakasulod si Sampalad sa ilang balay ug nisinggit ang asawa sa kahadlok. Si Tejana daling nakaduol sa balay, mi-am-am kang Sampalad aron ibutang ang kutisilyo. Si Sampalad niabli sa pultahan ug niaksyon og eskrima, nagwara-wara sa kutsilyo nga sigeg hana pagdunggab kang Tejana. "Magpatay ta ninyo, Sir. Dili ko padakop nga buhi," singgit ni Sampalad. Matod ni Toring nga si Sampalad kalit nga mibunot sa iyang giloklok nga armas, nition kang Tejana. Si Tejana nga nakakita nga nag-ungaw siya sa kakuyaw napugos sa pagpusil kang Sampalad. Naigo sa kilid sa lawas si Sampalad ug daling gidala sa tambalanan sa Tuburan, apan namatay pipila ka oras ang milabay. Narekuber sa kapulisan ang caliber .38 revolver nga paltik, usa ka bala, usa ka kabhang, 19-inch nga kutsilyo, ug upat ka mga kabhang sa 9mm nga pistola. Dugang ni Toring nga si Sampalad kanunay nga gialarma sa lugar kay managmal sa iyang asawa. This posting includes an audio/video/photo media file: Download Now

CCPO nanghakot og mga award Posted: 31 Jul 2021 07:42 AM PDT Nanghakot ang Cebu City Police Office og awards atol sa pagtapos sa Police Community Relations month celebration sa Hulyo 2021. Ang CCPO maoy napili nga best city police office sa tibuok rehiyon 7, samtang si Police Lieutenant Colonel Ardioleto Cabagnot, hepe sa City Police Community Affairs Development Unit, napili nga best senior police officer. Ang City Mobile Force Company pinaagi ni Police Major Chuck Barandog napili nga best City Mobile Force Company. Matod ni Police Colonel Josefino Ligan, hepe sa kapulisan sa Siyudad sa Sugbo, nga dako kaayo nila kini nga garbo bisan kon taliwala sa pandemic, ilang napadayon ang ilang mga programa sama sa pakigsandurot sa komunidad. (AYB) This posting includes an audio/video/photo media file: Download Now

Annette, asawa ni kanhi gobernador Lito O, namatay Posted: 31 Jul 2021 07:40 AM PDT Ang asawa ni kanhi ug anhing Cebu governor Emilio "Lito" Osmeña namatay mga alas 7:48 sa buntag sa Sabado, Hulyo 31, 2021. Si Mimo, kamaguwangang anak sa magtiayon, nikompirmar sa iyang Facebook sa Sabado. "With a sad heart, I have to announce that my mom, Annette, has joined my dad. They would have been married 60 years this December. Now, they are together forever. Please everyone be safe. This Covid-19 virus is real," matod ni Mimo. Si Annette, 79, namatay wa pay duha ka mga semana sukad namatay ang kanhi gobernador niadtong Hulyo 19. Matod ni Mimo nga ang iyang inahan ug amahan pulos nangatakdan og coronavirus disease 2019 (Covid-19). Pulos sila nangaospital niadtong Hulyo 19 human sila nagpositibo sa rapid antigen test nga gipahigayon sa Hulyo 11 ug polymerase chain reaction test sa Hulyo 12. "It was up and down but at the end we suspect it was sepsis. Started looking mild lang," siya niingon. Matod niya nga wa pa sila masayod sa tinud-anay nga hinungdan sa kamatayon apan nagtuo sila nga may kalabutan kini sa komplikasyon sa Covid. "The family has not decided what to do. I think the grand children are doing the plans," sulti niya SunStar Cebu. Niadtong Huwebes, usa ka necrological service ang gipahigayon sa Kapitolyo aron pagyukbo sa kanhi gobernador. Si Cebu Governor Gwen Garcia sa iyang eulogy nihinumdom sa iyang personal nga kasinatian sa namatay nga gobernador atol sa bagyong "Ruping," nga nakaapekto sa Dakbayan sa Ormoc sa Nobiyembre 5, 1991. (WBS) This posting includes an audio/video/photo media file: Download Now

Editoryal: Ayaw lagi'g kompyansa Posted: 31 Jul 2021 07:31 AM PDT Nahitabo na ang gikahadlukan sa kadaghanan. Nabalik ang tibuok Cebu sa modified enhanced community quarantine (MECQ), ikaduha sa labing estriktong quarantine classification. Naputol ang dul-an 11 ka buwan nga modified general community quarantine (MGCQ) nga gi-enjoy sa mga Sugboanon. Grabe man gud nga nakasaka ang mga kaso sa coronavirus disease 2019 (Covid-19) sa nakalabay nga mga semana. Naay mga adlaw nga nitaak sa kapin sa 300 ka bag-ong mga kaso sa usa lang ka adlaw sa Dakbayan sa Sugbo. Kon ang usa pa ka punerarya ang basehan, mas daghan ang nangamatay sa Hulyo itandi sa pipila ka mga buwan nga nakalabay. Kulba, di ba? Kinsa ba say di makulbaan nga nasayran na man nga duna nay 32 ka kompirmadong Delta variant nga na-detect dinhi sa Sugbo. Ang duha ani nangamatay, sumala sa Department of Health (DOH) central office. Napugos ang local officials sa pagpatuman sa mga guideline sa Inter-Agency Task Force (IATF) ubos sa MECQ kay makalilisang na ang talan-awon sa mga tambalanan. Kinsa bay di mahadlok nga magtan-aw nga naglinya na ang mga ambulansya nga naghatod og mga pasyente nga gi-Covid. Kinsa bay di mabalaka nga magtan-aw nga kanunay nang nagbalikbalik og hatod ang mga kompaniya nga nanggama og oxygen ngadto sa mga ospital? Mao baya ni ang mga talan-awon sa mga nasod nga unang naigo sa Delta variant. Ang India diin kini magagikan, diin dunay mga patay nga gipanglabay na lang sa kasapaan kay wa na maato og sunog. Mao usab ni nga variant nga nagsige karon og atake sa Indonesia nga nahimo nang epicenter sa Covid sa Southeast Asia. Daghan na sab ang nangamatay sa Indonesia, apil na ang mga doktor. Karong panahuna, angay kitang mahadlok, di maratol. Kon kita mahadok, magmabinantayon na man kita. Ang pagbantay ubanan sa pagpalig-on sa depensa. Tuman sa protocol ug pabakuna. This posting includes an audio/video/photo media file: Download Now

Nalzaro: MECQ na pod ta Posted: 31 Jul 2021 07:31 AM PDT Sugod karong adlawa, Agusto 1, hangtod sa Augusto 15, ubos sa modified enhanced community quarantine (MECQ) ang isla sa Sugbo, apil na ang Cebu City, Mandaue ug Lapu-Lapu. Ang MECQ maoy ikaduhang pinakataas nga quarantine status. Gipa-ubos kita sa MECQ nunot sa nagkataas nga mga kaso sa Covid 19. Miabot na gani dinhi ang gikalisangan nga Delta variant nga paspas kaayong makatakod. Aduna nay kaso sa dakbayan sa Lapu-Lapu nga 19 ka buok, unom sa Cebu City ug tulo sa Mandaue City. Mao kini ang nag-unang rason nganong gibutang kita sa MECQ gikan sa modified general community quarantine (MGCQ). Pero matod pa ni Presidential Spokesperson Harry Roque nga puwede pang maka-apilar ang local government units (LGUs) sa Inter-agency Task Force for the Management of Emerging Infectious Diseases (IATF). Pero nagtuo ko nga dili na mausab ang ilang desisyon. Pakonsuelo de bobo lang na. Estrikto ang guidelines ubos sa MECQ. Sirado ang pipila ka mga establisemento labi pa ang mga entertainment venue sama sa mga sinihan. Way concert o tapok-tapok nga tugutan. Ang restaurants bukas tuod apan 30 percent capacity lang ang makasulod. Ang mga simbahan 30 percent ra usab nga tugutan nga makatambong sa misa. Mga function room sa mga hotel limitado usab ang makasulod. Walay physical sports sama sa basketball, volleyball ug billiard. Ang tugutan nga makagawas sa balay mao ra ang mga authorized person outside residence (Apor). Ang mga batan-on, 18 anyos pa-ubos ug senior citizens, 65 pataas, gidid-an nga makagawad, gawas lang kon essential ang tuyo sama sa pag-adto sa doktor, hospital ug pagpalit og medisina. Tugutan sa mga lokal nga opisyal ang public transportation. Miagi na kita niining maong quarantine status sa miaging tuig. Conflict gihapon kini sa atong ekonomiya ug pagprotihir sa atong panglawas. Sigurado nga daghan na usab ang maapektuhan labi pa kadtong gagmay'ng negusyo ug nanginabuhi og ginagmay, labi pa kadtong mga 'no work, no pay'. Temporaryong manira ang ubang mga negosyo ug natural, way suweldo ang mga empliyado. Ambot og makahatag pa ba og ayuda ang kagamhanan sa mga maapektuhan?(bobbygnalzaro@gmail.com) This posting includes an audio/video/photo media file: Download Now

Mongaya: Puno ang hospitals Posted: 31 Jul 2021 07:28 AM PDT Ang atensyon sa Cebu media, nga ulahi na gani, naa nakatutok sa mga hospital sa Metro Cebu. Bisan pa man nga ulahi, nakita sa mga sakop sa media nga puno na kini tungod sa pagsulbong karon sa mga kaso sa Covid-19. Apan sukwahi ang taho gikan sa Department of Health (DOH). Di pa kuno puno mao nga moinsister sila nga luag pa gyud ang mga tambalanan dinhi sa atua. Hinuon sa katapusan nakong nahibaw-an kabahin sa quarantine center diha sa North Reclamation Area, naa pa gyuy mga bakante ug mild sab ang mga kaso nga tua didto. Ang problema lang kay kulang ang mga doctor ug mga nars. Unsaon man sab kining Cebu City Hall nga di man makamao mosweldo og sakto sa mga medical personnel. Mas unahon man og release ang anomalosong gipaningil sa Docast alang kuno sa basura. Apan, wa gibayad dayon sa waste facility sa Binaliw. Kining taho sa DOH 7 nga naa pay bakante sa mga hospital maoy gitamdan tawon ni Gob. Gwen Garcia. Dayon nahisgutan nga gamit kaayo karon ang mga district hospitals. Mahibong lang ko kay ang mga hulagway sa mga naglinyang mga ambulansya diri sa Chong Hua ug Vicente Sotto Memorial Medical Center (VSMMC) pulos man gikan sa lalawigan. Angay tingaleng tan-awon sa mga sakop sa Cebu media ang kahimtang karon sa district hospitals. Naa na ba kiniy mga doctor ug mga nars. Naa na bay igong mga medical supplies. Dinhi makita nato kon andam na ba gyud diay daan ang Sugbo niining 3rd wave sa Covid-19. Basi sa atong nabasahan kaniadtong flu pandemic sa 1918, mas grabi gyud ang 3rd wave. Ug karon, makapabalaka gyud ang Delta variant nga maoy nadungan sa 3rd wave karon. Kini mismong kadaghanon sa kasong Delta dinhi sa Sugbo basi kini sa mga swab test nga gibuhat pipila ka semana nga milabay. Unya mas grabi man kaha nga makatakod ang Delta variant. Alang kanako angay lang nga isipon nga kining paspas nga tinakdanay karon tungod kini sa Delta variant. Ug matod pa, kay mas grabi ang viral load, mas dali mograbi ang epekto ug kuyaw kaayo nga mamatay labina kadtong walay bakuna. Tungod niini, awhagon nako ang tanan nga magdoble sa ilang pagsunod sa mga mga health protocols. Bisan pa og kumpyansa kaayo ang atong mga opisyal labi na sa Kapitolyo ug sa DOH 7, kita na lang ang managana. Nakasuway gyud ko nga na-COVID sa miaging Mayo 2021. Dili sayon ang akong naagian bisan pa man og mild ang maong kaso. Grabi ang sakit sa lawas ug magsigi lang og hutoy. Di ko makatarong sa pagginhawa. Grabi ang kadaghan sa mga tambal. Ug sa kahadlok nga mangatakdan ang sakop sa pamilya ug negusyo, nigasto mi og swab test ug disinfection sa opisina. Mas mag-severe ang epekto niining Delta. Busa mag-amping. Ayaw sunda ang mga opisyal nga kumpyansa kaayo. (DM nako sa @anol_cebu) This posting includes an audio/video/photo media file: Download Now

Lonzon: Medalya Posted: 31 Jul 2021 07:28 AM PDT Binasi sa Exodo 16:2-4, 12-15; Salmo 78; Taga-Efesos 4:17, 20-24; Juan 6:24-35 Dili matugkad ang kalipay sa tibuok nasod nga Pilipinhon sa dihang nakadaog si Hidilyn Diaz sa unang "gold medal" sa Olympics. Hapit gyod maabot og usa ka gatos ka tuig ang atong paghulat. Nahuman ilado kaayo siya ug nagdugok ang mga premyo nga gitagana alang sa makabaton sa unang oro. Daghan pod ang nakamatikod nga adunay duha ka medalya si Hidilyn. Ang usa mao ang medalya sa Olympics nga gikuptan niya sa iyang kamot. Ang ikaduha mao ang "miraculous medal" nga gisul-ob niya sa iyang liog. May nakasulti nako nga usa ka adlaw usa niya ma-isa ang kinatibuk-ang gibug-aton nga 224 kilos, si Hidilyn gisul-oban sa "miraculous medal" sa usa ka pari pinaagi sa Zoom. Gidugokan si Hidilyn tungod sa iyang nabuhat. Sa laing bahin, midangop ang maong kampeyon, nga taga-Zamboanga, sa Ginuo. Gani ang iyang mga unang nabuhian nga pulong mitapos sa "Grabe si God. Grabe si God." Gidugokan si Jesus sa ebanghelyo ug mga tawo nga nangita kaniya. Misulti si Jesus, "Amen, sa pagkatinuod sultihan ko kamo, nagapangita kamo kanako dili tungod ka nakakita kamo og timaan apan tungod kay nakakaon kamo sa pan ug nangabusog kamo." Praktikal diay ang gipangita nila kang Jesus kay nabusog man sila tungod sa pan ug isda nga iyang gipaambit sa mga tawo. Apan nataligam-an nila ang punto nga buot ipadayag ni Jesus pinaagi sa iyang milagro. Nagpadayon si Jesus, "Paghago kamo dili alang sa kalan-on nga madunot, kondili alang sa kalan-on nga magapabilin sa kinabuhing dayon nga ihatag kaninyo sa Anak sa Tawo." Si Jesus diay mao ang "timaan" nga nataligam-an sa mga tawo nga nangita lang og makapabusog kanila. Si Jesus diay ang tinuoray nga medalya. May lain pang medalya diha sa libro sa Exodo. Gipanggutom ang mga Israelita ug nagbagulbol sila. Gidungog sila sa Dios ug nagpadala siya og pan nga ang ngalan "mana". Sa tinud-anay lang ang maong pulong gipasabot "unsa ('ma') ni ('na')?" kay wala man ni nila mailhi. Tuboran sa gasa gyod ang Ginuo kon mangayo lang kita kaniya. Apan dili lamang makaon nga pan ang gikinahanglan sa tawo. Ang pagbag-o sa hunahuna ug sa kinabuhi usa ka gasa nga gikan usab sa Dios. Mao kini gihisgotan sa sulat ngadto sa mga taga-Efesos. Kon tinuoray ang atong pagkatinun-an ni Cristo, matagamtaman nato ang maong kabag-ohan. Labaw pa kini sa bisan unsang medalya nga madaog sa natad sa pagpaugnat sa kusog. Unsang klaseng medalya ang nadawit nimo sa Ginuo? This posting includes an audio/video/photo media file: Download Now

Daclan: Jane de Leon molupad na! Posted: 31 Jul 2021 07:25 AM PDT Molupad na gyud si "Darna" mao nga sa pagkakaron gihuman na ni Jane de Leon ang iyang mga eksena sa "FPJ's Ang Probinsyano." Una si Angel Locsin, unya kay dili man pwede kini nahimong Liza Soberano apan wala man sab kini madayon mao nga karon human sa duha ka tuig si Jane De Leon na gyud ang motulon sa bato ni Darna. Daghan na kaayo ang excited niini ug gusto nang makita ang Pinoy superhero nga makigkombati sa mga dautang pwersa. Ang uban usab gustong makita kon angayan ba gyud o matagaan ba og hustisya sa bag-ong Darna ang maong papel. Siguradong daghang mokomparar niini sa uban pang mga nangaging Darna, mao nga buhaton gyud sa bagong Darna ang tanan para higugmaon ug nuntan ang iyang paglupad. Human sa grabeng training nga gibuhat niini, karong Septyembre sugdan na ang taping sa "Mars Ravelo's Darna: The TV Series." Sa akong nahibaw-an nangita pa kini og maayo gyud nga direktor para sa maong TV series sa panahon karon nga daghan nang streaming sites ug mga salida nga gipakita. Manghinaot lang ta nga mahimong nindot ang gama ining atong Pinoy superhero para sundan sa kadaghanan. Alang kang Jane nga gibuhatan karon og nindot nga pag-exit sa seryeng "FPJ's Ang Probinsyano," mahimo usab untang bongga ang entrada niini para sa "Mars Ravelo's Darna: The TV Series", Ay'g Saba! * * * Sa kadaghan sa mga namalhin og estasyon gikan sa Kapamilya network, usa si Robi Domingo ang gipangutana kon unsay iyang hunahuna niini. Masulob-on kini sa mga panghitabo apan dili usab niya mabasol tungod sa sitwasyon sa network. Matod pa niini nga aduna lang silay mga nagkadaiyang rason nganong nabuhat kini. Apan girespeto niini ang desisyon sa mga kanhi Kapamilya nga nibalik sa ubang estasyon. Gani gidayeg ni Robi ang mga nagdumala sa ABS-CBN nga wala mo babag sa pagbalhin kon asa sila mo-asenso. Si Robi 13 na ka tuig sa Kapamilya network, nagsugod kini sa "Pinoy Big Brother: Teen Edition" niadtong 2008 ug nahimong talento sa Star Magic. Miangkon kini nga sakit usab para niya nga nakuhaan og prangkisa ang home network pero laban lang gihapon. Kon respeto man ang iyang gihatag sa mga Kapamilya nga ning-balhin sa mga nagpabilin nga Kapamilya, respeto ug pagsaludo ang iyang gipaabot usab ngadto kanila, Ay'g Saba! * * * Wala pay kompirmasyon kon unsa gyud ang tinuod nga relasyon nilang KC Concepcion ug Apl de Ap nga dugay nang na-link sa usag-usa. Katapusang nakit-an nga nagbakasyon ang duha sa usa ka resort sa El Nido, Palawan. Walay direktang pag-deny o pag-angkon kon labaw pa bas panaghigala ang ilang relasyon. Pero sa miaging duha ka tuig kanunay ang ilang panagkita dinhi sa Pilipinas ug sa Amerika, unsa man gyud ang tinuod KC ug Apl? Ay'g Saba! This posting includes an audio/video/photo media file: Download Now

Mga nasunogan gihatagan ni Radaza og hinabang Posted: 31 Jul 2021 07:15 AM PDT Gitagaan og hinabang ni Kongresista Paz Radaza sa lone district sa dakbayan sa Lapu-Lapu ang 41 ka mga pamilya ug 83 ka mga indibidwal nga nabiktima sa sunog sa Sitio New Lipata, Brgy. Pusok, Dakbayan sa Lapu-Lapu niadtong Hulyo 27. Ang mga nasunogan kasamtangang gipahimutang sa kagamhanan ubos sa Marcelo Fernan Bridge sa Brgy Pusok. Mga food packs nga gilangkoban sa mga de lata ug noodles ug tubig gihatag sa kongresista nga mokantidad ang kinatibuk-an og P100,000. Giaporan usab niya og alcohol, face masks ug face shields ang mga nasunogan. Mipahimangno si Radaza sa mga Oponganon nga padayong mosunod sa minimum health protocol hilabi na ipaubos na usab sa modified enhanced community quarantine (MECQ) ang dakbayan sugod sa Agusto 1. "Naguol ko sa balita tungod kay doble ang ilang pag-antos karon labi na nga naa ta sa krisis karong panahona. Unya nawagtangan pa gyud sila og panimalay," matod ni Radaza. Ang mga pamilya gitagsaan og mga tolda matag usa. (GCM) This posting includes an audio/video/photo media file: Download Now

Pilipinas mitala og 8K bag-ong kaso sa Covid-19 Posted: 31 Jul 2021 07:08 AM PDT Ang Department of Health (DOH) sa Sabado, Hulyo 31, 2021, nitaho og kapin sa 8,000 ka bag-ong mga kaso sa ikaduhang sunodsunod nga mga adlaw ug kapin sa 100 ang nangamatay nga natala sa tulo ka nagsunod nga mga adlaw. Sa iyang case bulletin, ang DOH nitala og 8,147 ka bag-ong infections, 167 ka dugang nangamatay ug 9,117 ka bag-ong recoveries. Ang bag-ong mga kaso nidala sa kinatibuk-ang gidaghanon ngadto sa 1,588,965. Duha ka mga laboratoryo di operational ug ang usa wa makaduso sa ilang testing output ngadto sa Covid-19 Document Repository System sa Hulyo 29. Ang dugang nangamatay niinat ngadto sa 27,889. Ang case fatality rate nisaka ngadto sa 1.76 percent. Duna na karoy kinatibuk-ang 1,500,189 ka survivors sa Covid-19. Dunay nagpabiling 60,887 ka aktibong mga kaso sa nasod, niini 93.8 poryento ang mild, 2.1 porsyento ang severe, 1.5 porsyento ang moderate, 1.3 porsyento ang kritikal ug 1.3 porsyento ang asymptomatic sa Hulyo 29, 2021. (HDT sa SunStar Philippines) This posting includes an audio/video/photo media file: Download Now

IED nakaplagan sa pulis, sundawo Posted: 31 Jul 2021 07:08 AM PDT Ang kapulisan ug army personnel naka-recover og upat ka improvised explosive devices (IEDs) sa mga utlanan sa Llorente, Eastern Samar ug Basey, Samar diin ang gidudahang mga rebeldeng New People's Army (NPA) nag-operate usab, matod sa police regional command sa Biyernes, Hulyo 30, 2021. Sa usa ka impormasyon nga gipagawas sa Police Regional Office, ang mga IED nakaplagan pinaagi sa intelligence nga operasyon sa dapit. Ang mga IED nakaplagan mga alas 4 sa hapon sa Miyerkules, Hulyo 28, 2021 sa duol sa Asway river sa Barangay Burak, Llorente. (SunStar Philippines) This posting includes an audio/video/photo media file: Download Now

Super Blowout: 'Presensiya nakahatag og paglaum' Posted: 31 Jul 2021 06:57 AM PDT Bisan og nilabay na ang taas nga katuigan, tam-is gihapon balikan ang mga handurawan sa kagahapon labi na sa pagtungha sa elementarya o high school. Hinungdan nga mamugna gyud ang mga reunion aron mag-bonding ang kanhi classmates ug lab-ason ang mga kagahapon. Sama kini sa nahitabo sa batch 1990-1991 sa elementarya sa Bulacao Community School sa siyudad sa Sugbo. Niadtong Hulyo 18, 2021, nag-reunion sila og balik. Ilang gisaulog ang ilang 30th anniversary sa Palm Beach, lungsod sa Minglanilla. Matod ni Junah Babatuan-Abellanosa, batch president, isig dad-anay sila og pagkaon ug gisaw-an kini nila sa pagpangaon. Dinhi, nabati nila nga nalingaw sila ug nahupay ang ilang kasingkasing labi na karon panahon sa krisis. "Ang panagtapok ug presensiya nakahatag og paglaum sa usag-usa nga ang kinabuhi kausa ra ug ang pagpakigsandurot sa old friends sa elementary, makahatag og dako kaayo nga kalipay bisan pa man sa kalisod sa panahon," sigon ni Abellanosa. Gidugang niya ang padayon nga pagsuporta sa usag-usa maoy nakapanindot sa ilang batch. Sa reunion, aduna usab giandam nga kalingawan sama sa games, trivia, contest sa Tiktok ug kantahay. Napili nga King ug Queen of the Batch sila si Gilbert Cuevas ug Darwina Heruela. Samtang, si Jeffty Briones ug Evelyn Abellar-Raganas ang napili nga Tiktok King ug Queen. Gawas ni Abellanosa, nitabang pag-facilitate sa programa si Roy Cabonilas. Ang mga opisyal sa batch mao sila si: Abellanosa, presidente; Marites Pacaña-Tapangan, bise presidente; Jinky Edaño-Gabiana, secretary; Angel Padigos, treasurer; Ellen Contado, assistant treasurer; Allain Gempesao, auditor; ug PRO sila si Paul Locaylocay, Rener Canada, Cesar Alcantara, Charo Dacalos-Dorog, Beverly Aquino. Ang ilang advisers sila si Oliver Dingcong ug Lorrine Baylon-Villafuerte. (SCG) This posting includes an audio/video/photo media file: Download Now

Pacquiao mipasaka og kaso Posted: 31 Jul 2021 06:56 AM PDT Ang kampo ni Senator Manny Pacquiao niduso og kiha didto sa korte sa California batok sa Paradigm Sports Management (PSM) gumikan sa giingong breach of contract, breach of fiduciary duty ug fraud. Ang PSM nga gipanag-iya ni Audie Attar kinsa maoy nagdumala sa career ni kanhi UFC Champion Conor McGregor natukod niadtong tuig 2019. Ang Pambansang Kamao nipirma og kontrata sa PSM gumikan sa pasalig sa Paradigm nga adunay mahitabong away batok ni McGregor niadtong Disyembre 2020 o Enero 2021 ug gisaaran si Pacquiao nga adunay walo ka endorsement nga nakalinya para kaniya. Apan wala mahitabo ang Pacquiao-McGregor sanglit obligado nga moaway ang Irishman batok ni Dustin Poirier sa UFC niadtong Enero 26 ug sa rematch niadtong Hulyo 10 diin pulos gi-knockout si McGregor. "In reality, PSM never intended to arrange a bout between Pacquiao and McGregor. PSM never secured any of the many endorsement deals it claimed were 'lined up.' And PSM never intended to advance the full USD $4 million to Pacquiao," tipik sa reklamo ni Pacquiao. Sa maong kaso, matod pa nga ang PSM adunay contractual relationship tali ni Arnold Vegafria, usa ka Pinoy kinsa nagsilbe nga boxer's manager. Ang deal sa PSM ni Vegafria nagsilbing "secret" ug niingon nga kon nahibawo pa si Pacquiao niini,dili unta mopirma og kontra ang 8th division champion. "Pacquiao's business manager and would-be boxing manager made a deal behind Pacquiao's back to profit off of him — yet another example of unscrupulous sports managers serving their own interests over the interests of their clients." tipik sa iyang reklamo. Ang legal counsel ni Pacquiao nga si Dale Kinsella niingon nga mokolekta sila og danyos sa iyang kliyente. Matod pa sa iyang lawyer, nitanyag og $4 milyones nga advance ang PSM nga hangtod karon wala pa maimpas aron lang mopirma og kontra si Pacquiao. "Pacquiao's primary motivation for signing with PSM was their purported ability to set a very lucrative 'mega-fight' between Pacquiao and PSM's star client, McGregor But McGregor's obligations to fight Poirier twice before ever getting a chance to fight Pacquiao would have made the arrangement far too risky for Pacquiao to agree to. Due to his advanced age and political career, Pacquiao's window of opportunity for scheduling lucrative bouts was closing, and he could not afford to wait to schedule a fight against McGregor after two bouts with Poirer," dugang sa ilang reklamo. (PAC) This posting includes an audio/video/photo media file: Download Now

Vallena: Malipayon sa sikad Posted: 31 Jul 2021 06:46 AM PDT Nalipay na kaayo ko nga nakakita sa giorganisar nga mga lumba sa biseklita, apil na ang virtual 100-kilometer bike endurance sa lainlaing organisers. Nakaapil gani ang akong anak nga babaye og duha ka bike endurance competitions. Ang mga kompetisyon sa biseklita makaayo sa pagdani og mga tawo nga mobiseklita. Mao gani ni ang hinungdan kon nganong sa abroad mas daghan ang manikad kay duna silay daghang mga kompetisyon, lokal ug international. Naka-attract gani og liboan ka spectators. Mas managhan pa ang magbiseklita kon ang atong mga karsada nga palapdan ug kadtong himuon pa butangan og bike lanes ug sidewalk. Importante na kaayo karon kining duha ka features sa mga karsada tungod kay kaning atong nasinati nga pandemic di pa ni mao. Kon ang atoang karsada luwas pa lang alang sa two-wheeled, pedal-powered nga sakyanan, kaning mga public transport karon di na ni mapuno kay ang ubang mga tawo mahimo ra man nga magbiseklita. Kon ako naa ra nagpuyo sa kinapusoran sa siyudad, ang akong trabahoan mga 6-7 kilometers gikan sa balay, nganong mag public transport pa man ko? Nganong di na man lang ko magbiseklita? Gawas nga makadaginot ko sa akong gasto, naghatag pa kog proteksyon sa akong kaugalingon batok sa Covid sa duha ka mga pamaagi, paglikay sa pundok sa mga tawo ug pagpalig-on sa akong immune system pinaagi sa pag-exercise. MALIPAYON Duna koy pipila ka mga higala nga bag-o lang nakasugod og bike. Makakita ko sa ilang posts. Makita nako ang improvement sa ilang behavior sa social media. Kaniadto magsige og yawyaw, but karon, magsige na og post sa ilang status sa kalingaw sa biseklita. Klaro nga di na stressful ang ilang na-feel sa kinabuhi. Kani gung mag exercise ka, ang imong utok mo-produce man og daghang dopamine, feel good nga hormones. Kon wa kay pasingot, managhan ang imong stress hormone nga serotonin. Mao na nga saputon kaayo ka. Maorag pas-an mo kanunay ang kalibutan. Nalipay ko nga naa koy mga higala nga nakapa'g og kalipay sa pagsikad. Sikad pa more! KUWANG SA PLANO Kining pagpamutang og bike lanes sa nasudnong kagamhanan wa ni planoha. Nitumaw ra ni tungod sa pandemic. Kon wa ang pandemic, wa sila makahuna-huna sa pagbutang og bike lanes mga karsada sa nasod. Makadayeg ka nga magtan-aw nga duna nay bike lanes. Apan kon imong huna-hunaon og maayo, di tanang mga karsada maayong butangan og bike lane. Mas kuyaw pa gani hinuon ni sa mga manikad. Kay magtuo ang biker nga luwas siya sulod sa bike lane. Sa umaabot nga mga karsada, hinaut gahinan sa kagamhanan og lanes alang sa magbiseklita. This posting includes an audio/video/photo media file: Download Now

Migallen: Westbrook haom kaha sa Lakers? Posted: 31 Jul 2021 06:14 AM PDT Daghang mga fans sa Los Angeles Lakers ang nakauyon ug mipakpak ning pagtapon ni Russel Westbrook ngadto sa ilang paboritong team kay tiaw mo bay madugangan og dakong puwersa ang panagpares nila ni LeBron James ug Anthony Davis. Napa-champion man gani nila ang Lakers ubos sa liderato nilang duha unsa pa kaha og tulo na sila uban sa laing inilang star player. Tinuod mahimong hulga sa ubang teams kining maong kalambuan pero sa samang higayon nagtangag kinig dakong pangutana kon haom ba sa panginahanglan sa Lakers si Westbrook. Kon atong lantawon ang stats ug achievement ni Westbrook, way kuwestiyon impresibo gyud kaayo ilabi na kay siya karon ang aktibong naghupot sa triple-double nga record sa NBA. Pero basi sa atong obserbasyon, ang gikinahanglan sa Lakers mao man ang mga outside shooters, butang nga wala sa kalidad ni Westbrook. Ang style ni Westbrook kinsa maoy 2016-17 most valuable player (MVP) awardee, way kalahian sa kang LeBron James. Dili siya hulga sa three-point area ug ang iyang shot selection maingon nato nga puwersado kaayo kay kini buhaton niya bisan atubangan sa hugot nga depensa. Mao usab kini kang James. Gawas nga ubos kaayo ang iyang porsiyento sa three-point land, dili usab siya consistent sa iyang depensa. Si Davis notorious sa iyang mga inside plays tungod sa iyang gitas-on ug hatay nga lawas. Ilawom ang iyang duwa. Kon imong dunganon og pasulod ning tulo, ang tanan unyang duwa sa Lakers pulos anaa na sa shade area - butang nga makapakyu-ot sa ilang space offensively. Kini maoy makahatag unya og kasayon sa depensa sa ilang kontra. Sa laktod nga pagkasulti, ang presensiya ni Westbrook usa lang ka redundant sa team, kana bang naghatag lang og komplikado ug wa unta kinahanglana. Ang pagkawagtang nila ni Kyle Kuzma ug Kontavious Caldwell-Pope kinsa kabahin sa binayloay bugti ni Westbrook naghatag og dakong haw-ang sa ilang outside shooting. Kining duha pulos taas og percentage sa three-point territory nga sa gikaingon na nato maoy kuwang sa Lakers. Si Westbrook edaran na sab, mahal og presyo ($43 million karong tuiga ug mousbaw pa kini sa sunod tuig) nga makaapekto sa ilang salary cap. Sa kasamtangan, lima lang ang holdovers sa team: James, Davis, Marc Gasol ug kini ilang bangko nga si Alfonzo McKinnie kinsa undrafted niadtong 2015. Kon mo-click ba ang James-Davis-Westbrook combination sa Lakers, it remains to be seen pa, kay nagpadayon pa ang ilang pagpanghashas og players aron makompleto ang ilang lineup. Di pa gyud ni nato matino kon unsa kini ka epektibo, pero ang klaro sa pagkakaron mao nga ang nakapabor og dako sa maong trade way lain kon dili si Westbrook. Maayong pagkahiluna ilabi na kay lumad siya nga taga Los Angeles. Dunay mga taho nga nagpadayon ang negusasyon karon nga mabira usab sa Lakers ang guard sa Sacramento Kings nga si Buddy Hield ug matod pa sa taho nga agresibo usab ang Kings sa tanyag sa Lakers. Kini si Hield naila usab kini nga shooter nga sama nila ni Kuzma ug Cadwell-Pope. We'll see. (jun.migallen22@gmail.com) This posting includes an audio/video/photo media file: Download Now

Pacquiao gibisita ni Klay Thompson Posted: 31 Jul 2021 06:14 AM PDT Way hunong ang karisma ni Manny Pacquiao didto sa Hollywood nga gani nakaagni og mga NBA superstars ug celebrities. Ang Golden State Warriors star nga si Klay Thompson maoy uwahing nakabisita sa Filipino boxing superstar sa iyang training camp, tulo ka semana sa dili pa siya makigsangka ni World welterweight champion Errol Spence sa T-Mobile Arena sa Las Vegas. Ang 6-6 nga three-time NBA champion dalit nga nakahinabi sa eight-time world division champion ug dayon nagpahulagway kaniya sa Wildcard gym. Mapasalamaton si Pacquiao sa pagbisita sa 31-anyos nga Thompson kinsa giila nga usa sa pinakahinigo nga player sa NBA. Gikomediyahan ni Pacquiao si Thompson nga iya kining tudloan unsaon pagsumbag kon tudloan sab siya niini kon unsaon pag-shoot sa bola. Si Thompson kinsa wala makaduwa sa Warriors sa duha ka season tungod sa injury usa ka lumad nga taga Los Angeles, California. Siya maoy ikatulong NBA star nga nakadalikyat sa pagbisita sa training camp ni Pacquiao. Sa sayo pa, ang Fil-Am nga si Jordan Clarkson sa Utah Jazz ug Karl Anthony Town sa Minnesota Timberwolves maoy unang nakabisita sa 42-anyos nga Pacquiao. Ang kanhi world champion nga si Miguel Cotto ug ang Fil-Am rapper Allan Pineda Lindo nga naila sa apl.de.ap sa Black Eyed Peas maoy pipila lang ka mga celebrities ang mihatag og higayon nga mahimamat si Pacquiao. (JBM) This posting includes an audio/video/photo media file: Download Now

Ika-2 gold nanuktok na Posted: 31 Jul 2021 06:13 AM PDT Usa nalang ka daog, masakmit na sa Pilipinas ang ikaduhang medalya nga bolawan sa nagpadayong 2020 Tokyo Olympics sa Japan. Kini human gilampaso ni featherweight Nesthy Petecio ang iyang kontra nga si Irma Testa sa Italy pinaagi sa 4-1 split decision aron hatagan og paglaom ang Pilipinas nga kaluhaan ang gold medal nga unang nasakmit ni Hidilyn Diaz sa weightlifting. Sa unang round, pilde si Petecio sa scorecards gikan sa lima ka mga judge apan nibawi ang Pinay sa second round pinaagi sa pag-ataki sa iyang kontra nga dako ug taas itandi sa pambato sa Pinas. "Noong mga sumunod na round, lagi po akong lumalapit, pinapasok ko po talaga s'ya. Kinukuha ko po s'ya sa speed, sa lakas ko, kasi alam ko na mas malakas po ako sa kanya. Hindi po ako na-down noong sinabi na nilang lamang si Testa. Nagdasal po ako at sinabi ko na para sa akin ito, ibibigay n'yo ito, Lord," padayag ni Petecio. Klaro nga nakurat si Testa sa bag-ong taktika nga gisunod ni Petecio kinsa lumad nga taga Davao del Sur nga maoy naghatod kaniya nga maoy ikatulong Pilipino nga boksidor nga nakaabot sa olympic final, sunod nilang Anthony Villanueva niadtong 1964 sa Tokyo ug Mansueto 'Onyok" Velasco niadtong 1996 didto sa Atlanta. Si Petecio, world champion sa maong division niadtong 2019, apan 7th seed ra sa Olympics, niluhod ug nihilak human nihukom ang lima ka huwes kinsa nidesisyon pabor sa iyang kontra sa first round 10-9 apan maoy nipadaog kaniya sa nisunod nga duha ka rounds. "Sobrang saya ko po. Hindi lang po para sa akin ito, para po ito sa bayan," padayag ni Petecio kinsa nidalit sa maong away para sa iyang amahan nga gusto siyang makita nga niaway sa Olympics lakip na para sa iyang best friend ug kanhi national teamate nga si Alexcel Dargantes kinsa namatay niadtong Pebrero gumikan sa Covid-19. Gumikan sa maong kadaugan, si Petecio sigurado na nga makasakmit sa silver medal kon mapilde siya sa finals apan iyang gipadayag nga buhaton niya kutob sa iyang makaya uban sa pag-ampo sa tibuok Pilipinas nga madala niya ang bulawan nga medalya. Makontra ni Petecio ang winner tali sa Japanese nga si Irie Sera ug Great Britain nga si Karriss Artingstall kansang away gipahigayon kagabii. Dili na bag-o kang Petecio pagpukan sa mga dagko ug tag-as nga boksidor human niya gipilde ang world number 1 nga si Lin Yu-ting sa Chinese Taipei kinsa sama usab og style sa 5-foot-8 nga si Testa sa round of 16 nga maoy nakahatag kaniya og dugang kumpyansa. (PAC) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States