https://www.sunstar.com.ph/

---

• 'Party' gitugot ubos sa MGCQ; Frasco: kalihukan dunay pagtugot sa IATF, LGU
• Mga piniriso sa Cebu City Jail gipang-ubo
• Serna: Ayg kalimti ang ubang Cebuana candidates
• Talk to Papa Joe: Naka like
• Mga suroyanan sa Cordova, gisira una
• Rabacal: Chao Sy: Dakog tampo sa basketball, boksing
• Barrita: Puyo sa balay, lockdown forever?
• Nalzaro: Air purifiers dugang proteksiyon
• Editoryal: Yukbo kang Noy Pabling
• P6.2M shabu nasakmit gikan sa bigtime pusher
• Rotunda tukuron sa SRP aprubado na sa konseho
• Labella mibalik na'g trabaho
• Kanhi gobernador Pablo Garcia namatay
• 700 patay sa Covid sa 18 ka adlaw
• Driver nakapyansa; enforcer sa viral video gisuspenso

'Party' gitugot ubos sa MGCQ; Frasco: kalihukan dunay pagtugot sa IATF, LGU Posted: 20 Aug 2021 03:01 AM PDT ANG GIINGONG beach party sa usa ka lugar sa lungsod sa San Francisco, mga isla sa Camotes, niadtong Hulyo 10, 2021 nahitabo dihang ang tibuok Sugbo ubos pa sa modified general community quarantine (MGCQ), labing lugak sa upat ka quarantine classifications sa nasod. Mao kini ang pasiunang impormasyon nga gihatag ni Cebu Police Provincial Police Office (CPPO) chief Police Colonel Engelbert Soriano ngadto kang Police Regional Office (PRO) 7 chief Police Brigadier General Ronnie Montejo bisan kon wa pa makadawat sa kamandoan ang nahauna. Matod ni Montejo nga ubos sa MGCQ, ang party gitugtan, apan 50 porsyento lang sa kapasidad ang gitugot. "Nahitabo to siya last July. July is MGCQ pa ang Cebu Province, apil pa gani ang tri-cities, MGCQ pa ta. Sa MGCQ allowed pa ang 50 percent ang mag attend sa mga activities. Pero gihuwat nako ang iyang final nga report kabahin ato,"dugang ni Montejo. Apil sa gipaimbestigar ni Montejo mao ang organizers, nangapil ug ang local government unit (LGU) sa San Francisco. Tubag ni Frasco Si Kongresista Vincent Franco "Duke" Frasco, sa iyang tubag sa isyu, niingon nga ang kalihukan dunay permiso sa LGU nga pinirmahan mismo ni Mayor Alfredo Arquillano, Jr. Gawas sa LGU, gitugtan usab kini sa Inter-Agency Task Force (IATF) ug Probinsya sa Sugbo. Atol sa kalihukan nga ginganlan og TeamFrasco Friendship Ride/Run event, naa usab ang mga pulis, barangay officials, tanods ug health workers aron makaabag sa hingpit nga pagpatuman sa mga health protocol. "In compliance with IATF. Cebu Province, and local rules, all 667 bikers and runners were required to fill out health declaration forms and undergo temperature checks before the event, as well as wear masks during the event," matod ni Frasco. Ang dapit nga gipahigayunan sa kalihukan sa Barangay Santiago gibana-banang makasulod og 25,000 ka tawo, nga ang katunga naa sa 12,500. Apan ang nangapil sa kalihukan ubos ra kaayo itandi sa kapasidad sa dapit. "A maximum of 12,500 people are allowed for an event held at the public beach. With only 667 registered participants, plus spectators and event organizers, the event clearly fell below the maximum allowable MGCQ threshold," dugang ni Frasco. Iya usab nga gihimakak nga human sa kalihukan, dunay kalit nga pagsaka sa mga kaso sa coronavirus disease 2019 (Covid-19) sa mga isla sa Camotes base sa talaan sa DOH. "Records from the Department of Health and the LGU will show that in the 15-day period following, from July 11 to 25, there was no significant increase of positive cases. On the contrary, the 15-day period subsequent the event showed either zero new cases or single digit cases," pagtataw ni Frasco. Si Department of the Interior and Local Government Secretary Eduardo Año nimando og imbestigasyon kang Philippine National Police chief General Guillermo Eleazar sa kalihukan human siya makadawat og complaint sa wa mailhing tawo ug video niini. (AYB,REV) This posting includes an audio/video/photo media file: Download Now

Mga piniriso sa Cebu City Jail gipang-ubo Posted: 19 Aug 2021 08:55 PM PDT GIKOMPIRMAR sa warden sa Cebu City Jail nga dunay mga persons deprived of liberty (PDL) ang gipang ubo ug gipang sip-on. Matod ni Jail Superintendent Jose Abueva nga ang maong mga PDL ang gipang isolate na bisan wala pa matino kung Covid ba ang hinungdan sa ilang gipamati. Gimonitor karon ang ilang kahimtang sa panglawas pinaagi sa mga medical personnel sa Bureau of Jail Management and Penology ug gipang hatagan og tambal. "Yes, naay pipila ka PDL pero they have been segregated from the general populace, and placed for monitoring by our jail nurses and given medicine and vitamins... so far common colds and coughs ra man," matod ni Abueva. Ang kagamhanan sa siyudad sa Sugbo nakig-alayon usab sa city jail aron ma monitor ang maong mga PDL ug malikayan ang tinakdanay sa sulod sa bilangoan. (AYB) This posting includes an audio/video/photo media file: Download Now

Serna: Ayg kalimti ang ubang Cebuana candidates Posted: 19 Aug 2021 07:32 AM PDT MAHISGUTAN ta man gyud ni (mora gyud og unsa ka dinali-an, haha!), di lang gyud kay ako ug pipila ka mga Cebuanos ang nakanganga sa runway challenge video entry ni Steffi Rose Aberasturi (manok sa Cebu Province) alang sa Ms. Universe Phils. 2021. Kadaghanan nipili gyud niya mao nga na-top siya sa maong challenge. Kon si Kirsten Danielle 'Kisses' Delavin pirmeng nag-number 1 sa headshot ug introduction challenge, natagak siya ikatulong dapit sa labing uwahing challenge. Pagkakita nako sa video ni Steffi, nikomentaryo dayon ko nga "winning form, awesome concept, perfect package," samtang number 2 gihapon si Maureen Christa Wroblewitz. Nindot man sab ang sa uban pero nalabwan lang gyud sila ni Steffi sa execution, background music ug sa overall concept nga nagbida sa umaabot nga laing landmark sa Cebu. Pero ayaw mo kalimot mga Cebuanos nga duna pay laing tulo ka Cebuana ang apil sa Ms. Universe Philippines pageant: sila si Beatrice Luigi Gomez (Cebu City), Jane Darren Genobisa (Carcar City) ug Chiara Alix Lim (Mandaue City) nga angay sab paluyohan sa mga paysano nga hingaon og mais. Nakabantay mo nga ang ikaduhang ngalan sa tulo ka mga kandidata kay pang-lalaki, lahi na gyud ang panahon. Sa Sept. 25 na ang finals, ayg kalimot. Mora sab og nakadaug si Onyok Velasco sa Tokyo 2020 Olympics kay gihatagan siya sa Chooks-to-Go og usa ka tindahan sa letson manok. Gipakapinan pa gyud kinig P100,000 cash aron kuno matuman ang pangandoy sa retiradong boksidor nga naka-silver sa 1996 Atlanta Olympics nga mag-honeymoon sa Boracay, matod sa presidente sa Chooks-to-Go nga si Ronald Mascariñas. Duna pa gyuy gisaad si Sen. Bong Go nga P500,000 gikan sa Office of the President. Nahibaw-an nga wa diay ikahatag ang gisaad kaniadto sa Kongreso ngadto kang Onyok nga P2.5M. Paetschxz! Nagkasinabot na kuno ang mga kasingkasing ni Albert Martinez ug Faith da Silva (anak ni Dennis da Silva) bisan pa sa dakong gintang sa ilang pangedaron, 60 si Albert, 20 si Faith. Maayo mo diha uy! Syempre nagduda ang uban nga promo ra ni sa ilang teleserye nga Las Hermanas o gusto lang gyud si Faith og father figure kay nagtubo kini nga piniriso ang amahan. Unsay inyong hunahuna? Pasagdaan lang nato na sila uy! Ang pagpakgang sa Corona virus ug ang pagluwas sa kinabuhi sa nataptan niini ang atong atubangon. Gibaligya diay ang nadaug nga balay ni Lyca Gairanod sa The Voice Kids kanhi ug gipalit og laing balay (sa Cavite) kay di gustog mingaw nga subdivision ang iyang lola ug di sab gusto si Lyca nga magkabulagbulag ang iyang pamilya. Dalaygon ka Lyca! This posting includes an audio/video/photo media file: Download Now

Talk to Papa Joe: Naka like Posted: 19 Aug 2021 07:32 AM PDT Dear Papa Joe, Mangayo lang unta ko nimo og advice. Tawaga lang ko sa pangan nga Pabs. Duna koy kapuyo nga taguon lang nato sa ngan nga Mercy. Mga duha ka tuig na mi nga nagpuyo sa ilang balay unya naa mi uban iyang igsuon nga bag-o ra nabiyuda. Bale maguwang niya ning bayhana. Bag-o ra ni nabiyuda but duna silay anak nga usa sa iyang bana nga namatay. Kaning iyang maguwang nakabantay na ko nga naa ni pagtan-aw nako kay kapila na niya buhata nga tukason og kalit ang tualya gikan siya maligo. Unya sahay kanang kabantay siya nga mosunod ko niya og kaligo, iyang tuyuon og bilin iyang panty unya iyang ipatunol nako. Buhaton niya ni if wa akong partner. Kapatulon na kaayo ko kay gwapa ni siya kay sa akong live-in, but nahadlok ko nga masakpan mi unya magubot na hinuon. Mangutana ko nimo, Noy Kulas, kon ikaw sa akong side, unsa angay nga buhaton? Salamat. PABS Pabs, Sakto ka, angay I-avoid ang mga ing-ana. Ayaw padala ka sa tentasyon kay kon mosakay ka sa iyang mga pasumbingay, posibleng magubot mo. Wa sab ta kahibawo nga kanang iyaha pag test na nimo kon di ka ba matintal og laing babaye kay di pa mo kasado sa iyang sister. Ako pa nimo, imong pakaslan ang imong partner kay wa ta kahibawo nga nagplano na siya kay di pa mo kasado sa iyang sister. Free pa kaayo ka kinsa ang imong pilion. Once makasal namo basin moundang na siya. Kana lang ug daghang salamat. PAPA JOE (sa inyong tampo ipadala lang sa papajoesuperb@gmail.com) This posting includes an audio/video/photo media file: Download Now

Mga suroyanan sa Cordova, gisira una Posted: 19 Aug 2021 07:23 AM PDT SUKWAHI sa atong naandan nga published stories dinhi sa Super Suroy section ning pamantalaan diin atong gi-showcase ang mga tourism destinations sa nagkadaiyang dapit sa lalawigan sa Sugbo ug silingang probinsiya. Apan tungod kay gipaubos sa modified enhanced community quarantine (MECQ) ang lalawigan sa Sugbo adunay mga gipatuman nga restrictions tungod sa maong quarantine status nga gilugwayan ngadto na sa Agusto 31, kini gumikan sa nagpadayon nga Covid pandemic. Kining atong isyu karon sa Super Suroy maghatag og giya sa mga bumabasa sa mga dapit nga kasamtangan unang kanselado ang ilang operasyon tungod sa gipatuman nga quarantine status. CORDOVA Atong hisgutan ang Lungsod sa Cordova, silingang munisipalidad sa Dakbayan sa Lapu-Lapu, pulos nahimutang sa isla sa Mactan. Niadtong Agosto 10 nipagawas ang buhatan ni Cebu Governor Gwendolyn Garcia og Executive Order No. 38 diin nalakip sa 11 ka mga lungsod ug dakbayan sa Cebu Province, ang Cordova nga gipa-ubos sa "MECQ with heightened restrictions." Natala sa Section 3 sa maong EO sa probinsiya ang "Establishments Prohibited to Operate" diin apil ang outdoor tourist attractions. KANSELADO UNA Tungod sa maong kamanduan ang Covid 19 Task Force sa maong lungsod nakahukom sa temporaryong pagsira sa tulo nila ka mga inila nga suroyanan nga sagad dagsaan sa mga local ug foreign tourist. Ang maong mga destinasyon naglakip sa Bantayan Bay nga nahimutang sa Sityo Bantayan, Barangay Catarman; RoroCay Beach sa Barangay Poblacion; ug ang Bakhaw Paradise sa Barangay Buagsong. Ang Bantayan Bay naila sa iyang white sandbar nga adunay mga bakhawan ug nahimutang pipila lang ka metros gikan sa baybayon sa Cordova. Motunga ang maong sandbar kon hunas og kadtong gustong moadto sa maong lokasyon mamahimong maglakaw tungod kay mabaw ra ang tubig dagat, apan kon taob mahanaw ang maong sandbar. Samtang ang Rorocay Beach kon combined nga pangalan sa Roro port ug Boracay ang lakip nga wa una pasudli og mga beach goers. Dagsaan sab ang maong lugar sa local tourist tungod kay usa kini ka public beach, diin matagbaw ka na paglangoy-langoy nga dili kinahanglan nga mogasto og dako gawas sa P10 nga entrance fee. Gidid-an sab sa pagpanawat og guests ang Bakhaw Paradise diin sa pangalan lang daan gilibutan ang dagat og mga labong nga bakhaw og sa P20 nga entrance sulit na aron matagbaw ka adventure sa area. Ang inila nga mga food stall sa Centennial Food Park daghang mga tindahan ang wala lang unang mangabli tungod kay apektado sa maong quarantine status. "Open for take-out only but since mingaw man most opted to close nalang usa," tipik sa chat message sa Tourism office sa Cordova. ABLIHAN PUHON Ang Cordova Cebu Tourism nipahibawo nga hayan hangtod sa Agosto 31 ang maong temporaryo nga pagpasira samtang gipa-ubos pa ang lungsod sa MECQ. Busa, pa-ilob lang una kita ug likayan una nato ang pagsuroy-suroy ning panahona. MODAWAT OG CONTRIBUTOR Sa mga "certified hinuroy" mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan. Higayon na nga mapatik dinhi sa pamantalaan ug sa Superbalita Cebu website ang inyong Suroy escapade. Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665. (Editor) This posting includes an audio/video/photo media file: Download Now

Rabacal: Chao Sy: Dakog tampo sa basketball, boksing Posted: 19 Aug 2021 07:23 AM PDT USA ka Cebuano nga nagpakahilom lamang apan dako og natampo sa paugnat-sa-kusog, sama sa basketball ug boxing mao si businessman Lorenzo "Chao" Sy. Siya karon ang vice chairman sa Cebu City Sports Commission (CCSC) ug Central Visayas regional director sa Association of Boxing Alliances in the Philippines (ABAP). Angay pahalipayan si Chao kay sa milabay nga kapin sa 50 ka tuig, iya nang gitukod ang usa ka inilang La Fortuna Bakery basketball team aron pag-promote sa ilang produkto. Ang iyang mga inilang player nag-apil kanila ni Joaquin Roxas, Ramon 'El Presidente' Fernandez, Manny Paner, Elmer Cabahug, Danilo Florencio, Larry Mumar, Rolando Labucay, ug uban pa. Kampiyon sila sa Don Vicente Gullas sa tulo ka tuig gikan sa 1971–1973. Sa 1974, ni-promote siyag boxing. Ang usa sa iyang mga boxer naglakip kang Frank Cedeño. Ang iyang unang boxing promotion mao ang away nila ni Rolando Navarette ug Bernabe Villacampo sa Cebu Coliseum. Usa usab siya ka fan ni 'pambansang kamao' Manny Pacquiao. Gani nag-ampo siya nga modaug si Pacman sa iyang away batok kang Yordenis Ugas nga taga Cuba. Iya usab nga gipaabot sa dakong kahinam ang pagpahibawo ni Pacquiao sa iyang kandidatura pagka-presidente human sa maong away. Sa akong pagsuwat niining akong kulom, wala pay pahibawo gikan sa Kapitolyo nga dili na ipatuman ang pagsul-ob sa air purifier sa mga drayber ug konduktor sa mga bus nga magbiyah-an sa kalungsuran sa Sugbo. Nahimo kining kontrobersiyal tungod kay mipaguwa man usab og pamahayag ang Department of Health (DOH) ug ubang kahugpongan sa mga mananambal nga wala kini epekto sa pagpugong sa hangin nga magdala og kagaw ug coronavirus. Bisan kon ang tumong ug tuyo ni Gobernador Gwendolyn Garcia mao ang pag-ayuda lamang sa mga health protocol, apan dili kalikayan nga adunay pagduda, labi na sa mga kaatbang sa pulitika, nga gigamit kini sa pagpanapi. Bug-at tinuod alang sa mga drayber ug konduktor ang presyo niining air purifier. Mas maayo unta nga ang Kapitolyo o kaha mga bus operator ang mopalit sa air purifier ug ipahuwam lang sa mga driver ug conductor. Wa bay laing solusyon nga mapatuman sa gobiyerno aron dili magpadayon sa pagpanakud ang Covid – 19? Sukad kaniadto, gipatuman na kining lockdown apan inay nga mominus, migrabe na hinuon. Nganong dili man makagawas ang nag-edad og 65 anyos pataas bisan kon kumpleto na silang nabakunahan? (mannyrabacal1144@gmail.com) This posting includes an audio/video/photo media file: Download Now

Barrita: Puyo sa balay, lockdown forever? Posted: 19 Aug 2021 07:23 AM PDT DUNAY mga faith healers nga migamit sa ilang sibya sa radyo aron sa pagtambal sa mga masakiton. Itapion lang sa tawong masakiton ang iyang tuong kamot sa radyo ug ang iyang walang kamot itapion sa bahin sa lawas nga adunay balatian. Gisunod kini sa usa ka otsenta anyos nga lalake. Gitapion dayon niya ang iyang tuong kamot sa radyo ug ang iyang walang kamot sa iyang bugan. Apan gibadlong siya sa iyang asawa sa pag-ingon, "Wa ka makadungog? Ang giingon sa faith healer mao ang pagtambal sa masakiton, di pagbanhaw sa namatay." Ang Covid-19 di madala sa mga faith healers. Mao nga modangop na lang kita sa kinaraan nga tuob ngadto sa paggamit wa pa maprobahi nga air purifiers. Wa pay tambal alang niini. Apan duna nay mga bakuna batok sa Covid-19. Labing menos duha ka mga kagamhanang lokal sa Lalawigan sa Sugbo, ang Cebu City ug Mandaue City, mipatuman og mga "stay-at-home order" apan nagpadayon ang pagsaka sa mga kaso sa Covid-19 ug sa mga nangamatay niini. Sa unang 18 ka adlaw sa buwan sa Agosto, miabot sa 700 ang nangamatay sa maong sakit sa lalawigan sa Sugbo, sumala pa sa Department of Health (DOH) 7. Miabot kini sa 45 porsyento sa 1,560 ka tawo nga namatay sa Covid ning tuiga. Sa 700 nga namatay, nag-una ang Cebu Province nga may 394, gisundan sa Cebu City nga may 166 deaths; Lapu-Lapu City, 93; ug Mandaue City, 47. Ang 1,560 nga death toll hangtod sa Agusto 18 nilabaw na sa 1,384 nga namatay sa tibuok tuig sa 2020. Sa akong tan-aw, ang pagbakuna ray makapugong sa pagkuyanap ug aron di kita magrabehan sa Covid-19. Apan nag-aginod ang pagbakuna kay kuwang man sab ang supply sa bakuna. Busa mahinungdanon ang pagsul-ob og face mask sa sulod sa mga buildings ug sa mga lugar nga dunay daghang mga tawo. Epektibo ba ang pagpuyo sa balay? Nganong nagsigi man gihapon ang pasaka sa mga kaso sa Covid-19 ug ang gidaghanon sa mga nangamatay? Angay kining usisahon aron di kita mag-lockdown hangtod sa hangtod nga moresulta sa dakong gutom. Angay tingaling sundon sa gobyerno ang gihimo sa Singapore. Ang ilang "Covid zero strategy" naglakip sa pagbakuna sa 80 porsyento sa ilang populasyon nga 5.7 ka milyon aron makuha ang herd immunity. Unya lugakan na ang mga Covid restrictions ug border controls alang sa nabakunahan na. This posting includes an audio/video/photo media file: Download Now

Nalzaro: Air purifiers dugang proteksiyon Posted: 19 Aug 2021 07:11 AM PDT DAGHAN karon ang nangutana kon makatabang ba ang air purifiers batok sa Covid 19. Kini human mimando si Gov. Gwen Garcia ngadto sa mga driver ug konduktor sa mga public utility vehicles nga magbiyahan sa lalawigan nga magbaton niini. Niadtong Lunes unta magsugod, apan gipahunong una sa gobernador kay kuwang ang supplies, matod pa ni Cebu South Bus terminal Manager Carmen Quijano. Karong Agusto 25 pa kini i-implementar. Kining air purifiers maoy mo-sala o mo-filter sa hangin labi pa kon anaa ka sa sirado nga lugar. Morag makaabog kini sa mga kagaw o virus nga nadala sa pagtuyok-tuyok sa hangin sa usa ka close nga lugar. Apan dili kini hinuon makapakgang sa pagtakboy sa kagaw nga dala sa Covid 19. Wala man gani mahadlok ang Covid aning vaccine, sa air purifier na ba kaha hinuon? Additional prevention ug protection lang. Bisan ang Department of Health (DOH) mipagawas og advisory niini nga dili kini makapakgang sa Covid infection. Apan dili usab kini makadaut sa tawo. Sa modernong kapanahunan karon, daghang pagtuon nag- ingon nga adunay benepisyo sa panglawas ang mga air purifier. Apan wala pay pruyba nga maka-abog gyud kini sa kagaw sa Covid 19. Hinuon, anaa ra kanato kon mogamit ba kita niini kay matod pa lagi sa DOH dili man usab kini makadaot. Aw, nganong dili man kini nato suwayan? Samtang mosandig kita sa medisina ug scientific nga paagi pagpakigbatok aning Covid, dili usab nato kalikayan nga usahay mosagop kita aning primitive o kinaraan nga paagi sa pagtambal sa usa ka balatian. Nganong motuo pa man ta anang barang ug bolo-bolo og mga mananambal sa Siquijor? Kanang mga pekpek o hiluanan sa Dapitan ug Dipolog City nga wala man nay scientific explanation? Suwayan lang god nato. Dili bitaw na makahilo. Ang mga driver ug konduktor dili man angay nga mabalaka kay ang mga operator maoy mopalit ug ihatag ngadto kanila. Maka-afford pod siguro ang mga operator ani. Makapalit man gani og buses nga minilyon ang kantidad, air purifiers na ba kaha hinuon. Wala may operator nga mireklamo sab. (bobbygnalzaro@gmail.com) This posting includes an audio/video/photo media file: Download Now

Editoryal: Yukbo kang Noy Pabling Posted: 19 Aug 2021 07:11 AM PDT UBAN sa pagyukbo, ang Superbalita Cebu miduyog sa kasub-anan sa pamilyang Garcia tungod sa pagpanaw sa lig-ong haligi sa banay ug banggiitang Sugbuanon. Naila sa iyang kalantip og salabutan. Imahen sa matinud-anon nga Sugbuanon. Ehemplo sa lubas nga pagserbisyo sa publiko. Walay lama sa korapsiyon. Si kanhi gobernador Pablo Paras Garcia, gitawag sa mga suod kaniya nga Pabling, 95, nitaliwan sa laing kalibotan niadtong Miyerkules sa gabii, Agusto 18. Bar topnotcher niadtong 1951, 3rd placer. Kapin sa unom ka dekada sa iyang kinabuhi gigugol sa pagserbisyo sa publiko, gikan sa 1951 ngadto sa 2013, dihang niretiro sa pulitika. Unang napili nga konsehal sa lungsod sa Dumanjug, nahimong provincial board member, bise gobernador, ug kongresista nga nahimong House deputy speaker. Propisor sa abogasiya ug tinahod nga constitutionalist. Usa siya sa mga karaang lider nga nagtimon sa Sugbo nga mahimong numero uno nga lalawigan sa nasod ug nailang destinasyon sa kalibotan. Garbo nga amahan sa pamilya kansang mga anak ug apo pulos malampuson sa ilang gipilinga karera. Ang iyang kamaguwangang anak nga si Gwendolyn Garcia maoy kasamtangang gobernador sa Sugbo kinsa nakasunod sa pagtulun-an sa amahan sa pagpabalik sa Sugbo nga numero nga lalawigan sa nasod. Ang iyang asawa nga si Judge Esperanza Fiel Garcia unang nipanaw. Gawas kang Gwen, nakasunod usab sa iyang tunob sa pulitika mao sila si Pablo John Garcia, representante sa 3rd District sa Sugbo; Mayor Nelson ug Marlon nga parehong patay na; Winston nga kanhi presidente sa Pag-Ibig Fund; Deirdra; ug , Byron. Siya dunay 27 ka mga apo ug 18 ka mga apo sa tugod. Taliwala sa iyang kalamposan ug daghang pasidungog, si Noy Pablin yano og pamatasan ug mapahiusanon. Haniti sa pinulongang Binisaya. Usa sa mga nagpakabana sa pag-ugmad ug pagpalambo sa inahang dihang. Noy Pabling, among pagyukbo. Malinawong pagpahuway og balik sa sabalkan sa atong Manunubos. This posting includes an audio/video/photo media file: Download Now

P6.2M shabu nasakmit gikan sa bigtime pusher Posted: 19 Aug 2021 07:11 AM PDT NADAKPAN sa mga sakop sa Mambaling Police Station ang usa sa labing dako nga drug personality sa dakbayan sa Sugbo atol sa gilusad nga drug bust sa kapulisan. Ang nadakpan giila nga si Jeffrey Galido alyas Epoy, 31, nagpuyo sa Sitio Puntod, Barangay Mambaling, dakbayan sa Sugbo. Nakuha sa iyang posisyon ang dul-an usa ka kilo nga gituohang shabu nga mobalor og P6.2 milyunes, base sa value sa Dangerous Drugs Board (DDB). Matod ni Police Lieutenant Colonel Jannete Rafter, hepe sa Operation Branch sa Cebu City Police Office (CCPO), nga nigawas ang pangalan ni Galido sa mga nangaging mga operasyon nga siya ang tinubdan sa illegal nga drugas. Tungod niini, ang Mambaling Police Station mihimo og pagpaniid ug sa dihang naseguro nga padayon ang illegal nga negosyo niini, gilusad dayon ang buy-bust sa Sitio Pagatpat, Mambaling, alas 8:20 sa gabii niadtong Miyerkules, Agusto 18, sa pagpangulo ni Police Major Dindo Alaras. Sa gihimo nga imbestigasyon sa kapulisan nga naa sa sulod sa Cebu City Jail (CCJ) ang kontak ni Galido nga giila nga usa ka 'Ar-Ar Repuela' nga nabilanggo usab kini tungod sa kaso sa illegal nga drugas. Dugang ni Rafter nga lisud dakpon si Galido sanglit magbalhinbalhin kini og lugar nga puy-an sa probinsya ug sa dakbayan sa Sugbo. Giingong makabaligya ang suspek og tulo ka kilo matag buwan ug tungod niini, giila siya sa kapulisan nga dakong drug personality sa Central Visayas. (AYB) This posting includes an audio/video/photo media file: Download Now

Rotunda tukuron sa SRP aprubado na sa konseho Posted: 19 Aug 2021 06:21 AM PDT USA ka rotunda ang tukoron sa Department of Public Works ang Highways (DPWH) 7 sa South Road Propertes (SRP) para mas hapsay ug mapadali ang pag-agi sa mga sakyanan labi na sa moadto sa N. Bacalso Ave. sa Dakbayan sa Talisay. Si Konsehal Jerry Guardo, chairman sa committee on infrastructure sa City Council, nipasar og resolusyon ug giaprobahan kini sa kinabag-an nga walay nibabag. "The City Council during our regular session, August 18, 2021, interposes no objection, rather approved the proposal of DPWH-Regional 7 to construct a roundabout (Rotunda) at the junction of SRP along Vestil St. in Mambaling in order to ease traffic along that area and cut short of u-turn slot," matod sa post ni Guardo sa iyang Facebook page. Si DPWH 7 Regional Director Edgar Tabacon maoy nipresentar sa maong proposal ngadto sa hawanan sa konseho nga naglakip sa pedestrian lane overpass para agian sa mga tawo ug adunay upat ka lane alternative access roads sa luyo nga bahin sa SRP. Matod ni Guardo nga adunay P600 milyunes nga gibanabanang pundo nga gigahin ang DPWH para sa maong proyekto diin ang rotunda nga sama og porma sa Fuente Osmeña nga adunay upat ka lanes paingon sa north ug south sa Sugbo nga adunay entry ug exit paingon ug gikan sa Barangay Mambaling. Ang konsehal niingon nga ang pagtugot sa konseho maoy unang lakang para sa katumanan sa proyekto ubos sa administrasyon ni Presidente Rodrigo Duterte. Kini nga proposal iduso pa ngadto sa National Economic Development Authority (Neda). (PAC) This posting includes an audio/video/photo media file: Download Now

Labella mibalik na'g trabaho Posted: 19 Aug 2021 06:21 AM PDT NIBALIK og trabaho si Mayor Edgardo Labella sa Huwebes, Agusto 19, 22021 human sa kapin sa usa ka buwan nga pagka-ospital ug pagpahuway. Ang mayor nipadala og suwat ngadto sa City Council aron pahibaw-on si Bise Mayor Michael Rama ug mga konsehal nga balik na siya og trabaho. Si City Administrator Floro Casas Jr. nagkanayon nga kondisyon na ang panglawas ni Labella itandi sa miaging mga semana, apan likayan lang una sa mayor ang paghimamat sa mga bisita ug adto lang una siya magtrabaho sa ilang balay. Si Casas nagkanayon nga kagahapon sa buntag, nagpatawag ang mayor og department head meeting nga gipangulohan ni Casas aron mapahibawo siya sa lakat sa City Hall sanglit kapin usa ka buwan siyang nawala. Ang mayor nagpakisayod sa Covid-19 situation sa dakbayan ug update sa nagpadayong construction sa Cebu City Medical Center (CCMC) nga maoy gipaningkamotan ni Labella nga iyang mapahuman sa unang termino apan nalangan gumikan sa pag-abot sa pandemya. Human sa meeting, si Labella niatiman sa mga appointment sa mga kawani sa City Hall ug ubang mga dokumento nga nagkinahanglan sa iyang pirma sanglit dili kini mahimong pirmahan ni Rama kay acting mayor ra ang iyang kapasidad. Gipasabot ni Casas nga daghang appointment nga sa contractual, bag-ong na-regular nga kawani ug mga job order nga nagkinahanglan sa pirma sa mayor para makadawat na sila og sweldo gumikan kay aduna sab silay pamilya nga gipakaon. (PAC) This posting includes an audio/video/photo media file: Download Now

Kanhi gobernador Pablo Garcia namatay Posted: 19 Aug 2021 06:21 AM PDT SI kanhi gobernador Pablo "Pabling" Paras Garcia namatay sa Miyerkules sa gabii, Agusto 18, 2021, pahibawo sa pamilya. Siya 95. Si Garcia, amahan ni Cebu Governor Gwendolyn Garcia ug Cebu 3rd District Representative Pablo John Garcia, inila nga abogado, nagtudlo sa abogasiya ug tinahod nga contitutionalist. Dakong bahin sa iyang kinabuhi iyang gigugol sa serbisyo publiko. Nahimo siyang gobernador sa Lalawigan sa Sugbo sulod sa tulo ka termino (1995-2004), konsehal sa lungsod sa Dumanjug (1951), Provincial Board Member (1967-1969), bise gobernador (1969-1971), kongresista nga nagrepresentar sa 3rd congressional district (1987-1995) ug kongresista nga nagrepresentar sa congressional district ug deputy speaker sa House of Representatives sa ika-14 ug ika 15 nga Congress (2007-2013). Siya bar topnotcher, third placer, sa 1951 Bar Examinations. GIKAGUOL Si Speaker Lord Allan Velasco sa Huwebes, Agusto 18, 2021, niingon nga siya ug iyang mga kauban sa House of Representatives nahasubo sa pagtaliwan sa kanhi deputy speaker. "Cebu and the entire nation lost an exceptional public servant admired for his diligence, intelligence and integrity," matod ni Velasco sa usa ka pamahayag. "He will be greatly missed by all who had the privilege of knowing him and working with him," dugang niya. Samtang si Kongresista Eduardo Gullas sa unang distrito sa Lalawigan sa Sugbo, nihulagway kang Garcia nga di lang kauban, kon di sama sa usa ka igsuon. "For me, pañero Pabling was not only a colleague and friend, he was also a brother. We have shared many moments together as lawmakers in the House of Representatives during the 9th, 14th and 15th Congresses," matod ni Gullas. (SUNSTAR PHILIPPINES) This posting includes an audio/video/photo media file: Download Now

700 patay sa Covid sa 18 ka adlaw Posted: 19 Aug 2021 06:21 AM PDT LAIN na sab nga makalilisang nga adlaw ang niabot sa Sugbo samtang padayong namiktima ang coronavirus disease 2019 (Covid-19). Human nitabok og 500 tulo ka mga adlaw ang nakalabay, niabot na og 700 ang nangamatay sa Covid-19 sa 18 ka adlaw karong buwana sa tibuok Sugbo, matod sa labing uwahi nga talaan sa Department of Health (DOH) 7. Ang 700 nga nangamatay karong semanaha hapit mokatunga kun 45 porsyento sa 1,560 nga nangamatay sa Covid nga gitaho sa Sugbo karong tuiga. Sa nangamatay karong buwana, 56 porsyento ang iya sa Lalawigan sa Sugbo (394); gisundan sa Dakbayan sa Sugbo nga 24 porsyento (24); Lapu-Lapu City 13 porsyento (13 porsyento); ug Mandaue City 7 porsyento (47). Ang Lalawigan sa Sugbo gilangkuban sa 44 ka mga lungsod ug unom ka component cities, nilangkob sa 64 porsyento sa isla sa Sugbo. Ang Dakbayan sa Sugbo 19 porsyento; Lapu-Lapu 10 porsyento ug ang Mandaue City 7 porsyento. Ang DOH 7 nga inadlaw nga mga bulletin sa kaso nagpahibawo nga di tanang gitaho nga nangamatay sa partikular nga adlaw wa mahitabo sa samang adlaw, hayan ang uban nahitabo kapin sa usa ka semana ang milabay apan bag-o lang gitaho tungod sa validation. MILABAW NA Ang gidaghanon sa nangamatay nga 1,560 nga wa pay walo ka buwan milabaw na sa gidaghanon sa nangamatay sa 2020 nga miabot og 1,384. Apan ang case fatality rate karong tuiga minos ra sa katunga sa miaging tuig tungod sa grabeng gidaghanon sa bag-ong mga kaso nga gitaho karong tuiga. Sa 59,452 Covid-19 ka mga kaso nga gitaho karong tuiga ug 1,569 nga nangamatay, ang case fatality rate sa Sugbo karong tuiga niirog ngadto sa 2.62 porsyento gikan sa 2.38 porsyento sa miaging tulo ka mga adlaw. Ang case fatality rate sa miaging tuig niabot og 5.97 percent human ang 1,384 sa 23,172 ka mga pasyente sa Covid-19 namatay sa sakit. (CTL) This posting includes an audio/video/photo media file: Download Now

Driver nakapyansa; enforcer sa viral video gisuspenso Posted: 19 Aug 2021 05:51 AM PDT NAKAGAWAS sa bilanggoan human makapyansa pasado alas 3 sa hapon sa Huwebes, Agusto 19, 2021, ang food delivery driver nga gikalalis sa traffic enforcer sa lungsod sa Consolacion. Apan ang babayeng traffic enforcer nga nipapriso kaniya sa kasong disobedience of person in authority gisuspenso sa mayor sa lungsod sa Consolacion og 15 ka adlaw nga way sweldo sugod sa Huwebes, Agusto 19, 2021. Si manlalaban Juril Patiño maoy naninguha nga makagawas si Marcelino Sabucido, 23, pinaagi sa pagduaw sa police station ug pagtawag sa assistant prosecutor nga naghupot sa kaso. Base sa iyang Facebook Live, nagdala si Patiño og P10,000, tipik niini nga P3,000 gipyansa sa kaso samtang ang nahabilin giabag sa pamilya ni Sabucido. Gidonar kini sa usa ka mayor. Si Feliculo Leciones, pangu sa Consolacion Traffic Enforcement Service nga nahinabi sa Superbalita Cebu sa Huwebes, niingon nga si Mayor Joannes Pepito Alegado nisuspenso og 15 ka adlaw kang Maricris Vallejos, 40. Si Leciones niingon nga dunay "lapses" si Vallejos sa iyang gibuhat bisan kon nagpatuman sa balaud sa trapiko. Matod niya nga bisan bug-at ang 15 ka adlaw nga pagsuspenso, apan gikinahanglan kining ipahamtang aron makita sa publiko nga way gipalabi sa balaud ang lokal nga kagamhanan. Apan matod ni Leciones nga di angay nga hukman dayon si Vallejos kay kadto pa lang nahitabo nga duna kini gikalalis ug nag-init ang ulo. "Di sab unta dayon mo judge tang tawo. Wa ta kahibawo unsay problema sa ilaha mao na ingon siya ato," matod ni Leciones. Gawas sa pagsuspenso kang Vallejos, hayan pamultahon pa siya sa mayor human makita ni Alegado nga gipaubos sa enforcer ang iyang facemask atol sa panaglalis. Matod ni Leciones nga isip usa ka doktor, si Alegado estrikto kaayo sa pagpatuman sa mga health protocol, apil na ang kanunay nga pagsul-ob og facemask. Dihang gipangutana sa Superbalita Cebu kon pila ang multa, matod ni Leciones nga di mominos og P1,000. Nanghinaut usab siya nga magpinasayloay sila si Vallejos ug Sabucido aron di na modako pa og maayo ang problema "kay hasol kaayo nang kaso kaso." Sila si Vallejos ug Sabucido nagkalalis human giingong wa mopatuo sa pagpahunong sa mga sakyanan aron makatabok ang mga pedestrian sa atubangan sa SM Consolacion sa J. P. Rizal St., Barangay Lamac niadtong Martes, Agusto 17, 2021. Sa video, namasangil si Sabucido nga gidapatan siya ni Vallejos nga gihimakak usab sa enforcer. (REV) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States