https://www.sunstar.com.ph/

---

• Ciar: Mga senior sa showbiz nga nabakunahan na
• Sugilanon: Ang maanyag nga buktot
• Beach party sa Camotes imbestigahon; Garcia: pamulitika
• Cebu City dunay magamit nga mortuary freezer
• Unang 3 ka andana sa CCMC magamit na
• P1.6M shabu nasakmit sa buy-bust sa Barangay Luz
• 37 anyos nga inahan gipusil-patay sa riding-in-tandem sa Consolacion
• Quadro Alas suklan na sa monster
• Migallen: Sultan potensiyal nga ma world champ: Villamor
• Ugas, ma-TKO
• Hagit ni Casimero gidawat ni Inoue?
• Mayor: Mga kaso sa Covid sa Argao mikunhod
• 2nd Season as Bosco Ciclismo Bike Challenge sa September 1-30
• 3 patay sa disgrasya sa Tanauan, Leyte
• Pasyente misugwak sa 2 ospital sa Mandaue
• Vaxx site sa Lapu modawat og walk-in
• Agosto 16 labing daghang nangamatay
• Midaghan ang mga dinakpan sa TF Puyo
• Nanguhag trabahante sa 3 ka barangays sa Carbon
• CIDG 7 labing daghan og mga nadakpan, no. 1 sa tibuok nasod
• P500M nga pundo sa Philhealth Eastern Visayas nahuman na og kwentada
• 2 gipanunggab, kritikal
• Haya-anan gihimong bodega sa mga patay
• Editoryal: Isyu sa air purifiers
• Lonzon: 506 patay sa Covid
• Diputado: Way maayo nga balita
• Talk to Papa Joe: Maorag di inahan
• Basil: Daghan ang nag-worry kang Yorme
• Balay-Balay, Tubig-Tubig: Tahas sa ginikanan
• Pacquiao moaway pa’g balik sa 2021
• Hidilyn molarga sa Malaysia aron mangandam sa World event
• Casimero vs. Donaire posible sa November
• Mga taga Talisay gitugtan og leisure biking

Ciar: Mga senior sa showbiz nga nabakunahan na Posted: 18 Aug 2021 04:33 AM PDT Pipila lang sila sa mga senior citizen sa showbiz ang nabakunahan na. Unsay epekto sa bakuna nila ug unsay ilang gibati? Nia ang ilang mga pamahayag... SUSAN ROCES, 80 anyos Bisan fully-vaccinated na apan matod ni Senador Grace Poe nga walay gawasgawas sa balay ang iyang mama ug anha ra usab kuhaan si Susan Roces sa iyang mga scene sa Ang Probinsyano sa iyang balay. / INSTAGRAM WILLIE REVILLAME, 60 Matod ni Willie Revillame nga wa na siya mamili pa og bakuna ug kuntento na siya sa Sinovac. "Kasi proteksyon natin 'to eh. Tayo'y pumayag na po na magpa-inject. Kasi siyempre nag-iingat na rin ho kami dito, kailangan protektado," ang TV host atol sa iyang programang Tutok To Win. / GMA GLORIA DIAZ, 70 Gipaambit sa anak ni Gloria Diaz nga si Isabelle Daza sa Instagram ang litrato sa vaccination sa iyang mommy nga walay kurat ug normal ra ang gibati. / INSTAGRAM CHANDA ROMERO, 67 Mapasigarbuhong gipakita sa aktres nga si Chanda Romero ang bandage sa iyang bukton human nakumpleto niya ang iyang bakuna. "After this second dose, I know I will be sleeping peacefully. Stay safe, everyone."/ INSTAGRAM CHRISTOPHER DE LEON, 64 Fully-vaccinated na si Christopher de Leon ug di matukib ang iyang kalipay nga duna na siyay proteksyon. Ang aktor ang usa sa mga unang nag-positibo sa Covid-19 sa miaging tuig. / GMA CONEY REYES, 67 Nadawat sa Kapuso actress Coney Reyes ang iyang first shot. Gipaambit sa mommy ni Pasig City Mayor Vico Sotto ang iyang litrato aron ipakita sa publiko nga way angay kahadlokan. / INSTAGRAM TONY BENNETT, 95 Bisan sa iyang edad nga 95 ug sakit nga Alzheimer nagpabakuna ang legendary singer nga si Tony Bennett. "I received the first dose of the Covid 19 vaccination and am doing fine and encourage you to do the same!" sa iyang post. / TWITTER ERIC CLAPTON, 76 Nakumpleto sa legendary guitarist Eric Clapton ang AstraZeneca vaccination. Apan nireklamo si Clapton sa side effect kay naminhod ang iyang mga kamot ug tiil. "My hands and feet were either frozen, numb or burning, and pretty much useless for two weeks, I feared I would never play again." Matod usab niya nga moboykot siya sa mga venue nga mangayog proof of vaccination sa audience. / ROLLINGSTONE.COM ARNOLD SCHWARZENEGGER, 74 "Today was a good day. I have never been happier to wait in a line. If you're eligible, join me and sign up to get your vaccine. Come with me if you want to live!" ni Arnold Schwarzenegger sa Twitter human sa iyang first dose sa vaccine. / NEWS.SKY.COM HARRISON FORD, 79 Sama ni Schwarzenegger nilinya sad ang Indiana Jones actor Harrison Ford og duha ka oras sa Covid-19 vaccine sa Torrance, California. "Thanks to the healthcare professionals and volunteers on the ground," matod sa tigpamaba ni Ford sa Variety.com. / INSTAGRAM ANTHONY HOPKINS, 83 Sa iyang pangidaron nga 83, luwas nga nakumpleto sa The Silence of the Lambs actor Anthony Hopkins ang iyang dose. "Light at the end of the tunnel (after one year of self imposed quarantine)," ni Hopkins sa iyang IG post. / JUSTJARED.COM ELTON JOHN, 74 Sa ad sa U.K.'s National Health Service, giawhag ni Elton John ang publiko nga magpabakuna na. "It didn't hurt. Not many people know that. I'm still standing! Yeah, yeah, yeah!" komedya pa sa singer. / THEGUARDIAN.COM This posting includes an audio/video/photo media file: Download Now

Sugilanon: Ang maanyag nga buktot Posted: 18 Aug 2021 04:31 AM PDT LAMBERTO G. CEBALLOS Ilaya, Cawayan, Dalaguete, Cebu NIADTONG unang panahon kanus-a ang mga Katsila pay namunoan sa Pilipinas may magtiayong Katsila nga nanganak og usa ka maanyag nga batang babaye apan buktot. Si Don Pascual ug si Donya Pacita nabalaka sa kahimtang ni Ermelinda ug gikaulaw nila ang bata sa ilang mga higala ug kasusyo sa negusyo. Busa nagsuhol silag magtiayong mag-uuma nga walay anak aron maoy momatuto ug mopadako sa bata. Sila si Candido ug si Julia nagtrabaho isip mga saop sa asiyenda ni Don Pascual. "Nagnuod ang panghimaraot ni Katrina kanato, Pascual, nga buktot ang akong ihimugso," ni Donya Pacita usa ka gabii niana dihang dinha na sila sa ilang kama aron mangatulog. Si Katrina ang unang hinigugma ni Don Pascual nga wala niya pakasli bisag mabdos na kini kay nabaniog nga kaliwat og ungo. Sa gabii human sa kasal nilang Don Pascual ug Donya Pacita miadto sa ilang balay si Katrina nga isog kaayo ug gipanghimaraot sila. "Manganak mog buktot nga babaye! Biaybiayon siya sa mga tawo! Inigdako niya, ayran siya sa mga ulitawo! Mawala lang iyang pagka buktot kon may lalake nga mahigugma kaniya sa tim-os!" Ug nianang pagka buntag nakit-an sa mga tawo ang patayng lawas ni Katrina ubos sa bung-aw nga iyang giambakan. MIDAKO si Ermelinda nga buotan. Gimatuto siya nilang Candido ug Julia nga maoy gituohan niyang ginikanan. Gipa-eskuyla siya ug giantos niya ang mga biaybiay sa iyang mga klasmeyt ug sa mga tawo hangtod nakatapos siya sa segundarya. Usa ka higayon misulti si Ermelinda sa iyang nailhang ginikanan, "Gusto ko mopadayon sa kolehiyo, Tay, Nay! Makasugakod kayha mo sa gastuhan?" "Paninguhaon namo, anak, Mangutang mi kang Don Pascual ug Donya Pacita. Maayo man sila kanato. Andam sila motabang nimo," ni Candido. "Ugma moadto ko sa ilang balay." Wala magdumili si Don Pascual sa hangyo ni Candido. "Hatagan tika og salapi alang sa galastuhan ni Ermelinda sa kolehiyo ug sa uban pa niyang panginahanglan," ni Don Pascual. "Matuman imong pulong, Don Pascual," ni Candido. SA KOLEHIYO nga gitunghaan ni Ermelinda wala kaayo niya masinati ang pagbiaybiay sa iyang mga klasmeyt, gawas sa paglikay nila nga ikasuod siya bisan sa iyang gikuptan nga kaanyag ug mga nindot nga mga sapot. Gilikayan siya sa mga lalake. Apan may usa kanila ang nakighigala kang Ermelinda, si Arturo kansang pamanit tabunon ug yano lang ang panagway. Sayag siya og nawong ug malimbationg mamulong. "Di ka lainan nga mokuyog nako dinhi sa sud ug sa gawas sa eskuylahan, Arturo?" ni Ermelinda samtang naglakaw sila paingon sa ilang klase. "Maapil ka sa pagsaway sa mga klasmeyt natong mga dalaga ngari nako." "Di man pod ko motagad nila, Linda. Ikaw ang gusto kong ikasuod," ni Arturo. Nagkasandurot ang mga pagbati nila ni Ermelinda ug Arturo hangtod nga ang ilang mga kasingkasing nabugkos sa tim-os nga gugma. Usa ka higayon niana samtang naglakaw sila si Ermelinda sa kwadranggol sa kolehiyo nasugatan nila ang duha ka lalakeng estudyante kuyog ang usa ka babayeng estudyante. "Tan-awa si Arturo, dili pilian og babaye. Bisan buktot gidaginot!" matod sa usa ka lalake. Midason ang babaye niyang kuyog, "Bitaw! Pareson man na sila. Buktot ug batig nawong! Mahimo pong Beauty and the Beast!" Ug nangatawa ang tulo ka managkauban. Kalit nga gidasmagan ni Arturo ang mabiaybiayong lalake ug gisukmag. Nasarasay kini. Milaban ang ikaduhang lalake, apan naigo sab siya sa kusog nga kumo ni Arturo ug natumba. Wa makatingog ang duha ka babaye nga nanghinan-aw lamang. Unya giduol ni Arturo si Ermelinda. Gigakos niya kini ug gihagkan sa mga ngabil. Sa kalit nawala ang pagka buktot ni Ermelinda. Nasaksihan kini sa estudyanteng babaye nga nagbiaybiay kanila. (KATAPUSAN) This posting includes an audio/video/photo media file: Download Now

Beach party sa Camotes imbestigahon; Garcia: pamulitika Posted: 18 Aug 2021 04:06 AM PDT NIMANDO si Philippine National Police (PNP) Chief Guillermo Eleazar sa Miyerkules, Agusto 18, 2021, sa Cebu Police Provincial Office (CPPO) sa pagsusi sa beach party nga giingon gitambungan sa pipila ka mga pulitiko. Ang party giingong hayan super spreader nga kalihukan nga nakatampo sa pagsulbong sa mga kaso sa coronavirus disease 2019 (Covid-19) sa mga isla sa Camotes. Si Eleazar niluwat sa mando human ang video clip sa party, nga gikuha sa Hulyo 10, 2021, gi-upload online. Nagpakita ang video sa pipila ka mga tawo nga wa magsul-ob og mask samtang nag-party. Pakyas usab sila sa pag-obserbar sa social distancing. Si Eleazar wa mohingan sa pipila ka mga pulitiko nga nalambigit, apan usa ka complaint ang gipasaka batok kang Cebu 5th District Representative Duke Frasco, Mike Villamor ug Provincial Board Member Red Duterte "for holding and leading a social party in the evening of July 10, 2021 at the Santiago Public Beach in Barangay Santiago." Ang complaint, gipetsahan og Agosto 13, gipadala ngadto kang Department of the Interior and Local Government (DILG) Cebu Provincial Office Director Jhoaden Lucero. Ang reklamo niingon nga ang party gihimo human sa Friendship Ride/Run nga gipasiugdahan sa Team Frasco sa Hulyo 10. Si Duterte samang adlaw ni post sa social media kalabot sa Team Frasco Friendship Ride and Run sa Santiago Bay sa San Francisco, Camotes Islands. MALISYUSO, PAMULITIKA Cebu Governor Gwendolyn Garcia nitumbok nga "malicious" ug "politically motivated" ang pagpublikar sa video showing. Si Garcia, sa interview sa SunStar Cebu niingon nga "obviously malicious" ug "there is obviously a motive." "The fact that this video surfaced only now from an anonymous sender, thus raised the question. First of all, it is obviously malicious and when it becomes malicious, there is obviously a motive, and what other motive can we think of, except that as the elections draw near, for some people, everything seems to be about politics," siya nagkanayon. "It was very malicious to send that video now, trying to present a totally different impression that this was happening when Cebu Province is under GCQ with hightened restrictions," matod sa gobernador. (MVE, LMY, CTL, MVI) This posting includes an audio/video/photo media file: Download Now

Cebu City dunay magamit nga mortuary freezer Posted: 18 Aug 2021 04:06 AM PDT ANAA nay magamit nga mortuary freezer ang Cebu City Government aron pundohan sa mga minatay ilubong o ma-cremate sa Dakbayan sa Sugbo. Kini ang gipahibawo ni Konsehal Dave Tumulak sa Miyerkules, Agosto 18, 2021 human nagpahuwam ang Alin Group of Companies ni Customs broker Israel Alin aron dili na magbayad og storage fee nga P13,000 sa unang adlaw ug 8,000 sa mosunod nga mga adlaw ang mga tagtungod nga namatyan, labi na kadtong gitakboyan sa coronavirus disease 2019 (Covid)-19. Si Tumulak nipahibawo nga aduna pay laing mortuary freezer nga moabot sa Cebu City gikan sa kaulohan nga gipahuwam sab sa Department of the Interior and Local Government (DILG) pinaagi kang Secretary Eduardo Año human nakigtambayayong si Acting Mayor Michael Rama nga magahinan ang dakbayan og duha ka mortuary freezer. Matod sa konsehal nga naglawig na ang barko nga gisakyan sa duha ka mga mortuary freezer gikan sa Manila nga moagi pa sa lalawigan sa Samar. Laing usa ka mortuary freezer ang ipadala dinhi sa Sugbo gikan sa Philippine National Red Cross ubos sa pagtugot ni Senador Richard Gordon, kinsa maoy chairman. Si Tumulak nagpasalamat kang Alin kinsa maoy unang nitubag sa panginahanglan sa dakbayan sa Sugbo, diin ang iyang unit nga gipahuwam giistalar na kagahapon ug magamit na karong adlawa, Agusto 19. Nagpasalamat ang City Government ngadto sa Visayan Electric Company kinsa nilibre sa ilang kuryente ug nitaod og transformer sanglit ang freezer van nagkinahanglan og 460 volts nga kuryente. (PAC) This posting includes an audio/video/photo media file: Download Now

Unang 3 ka andana sa CCMC magamit na Posted: 18 Aug 2021 04:06 AM PDT MAHIMO nang magamit ang unang tulo sa 10 ka andana nga Cebu City Medical Center (CCMC) aron butangan sa mga pasyente nga di coronavirus disease 2019 (Covid-19). Gipahigayon sa mga opisyal sa Cebu City Government ang soft opening sa Miyerkules sa buntag, Agosto 18, 2021, sa unang tulo ka andana pinangulohan ni Acting Mayor Michael Rama sanglit nag-recover pa sa iyang panglawas si Mayor Edgardo Labella kinsa maoy nangusog para mahuman ug masiguro nga maabot ang budget sa 10 ka andana ang tambalanan. Ang unang tulo ka andana adunay 200 bed capacity kansang grand opening ipahigayon karong Septiyembre 18, 2021. Ang P1 bilyon nga gipangayo ni Labella nga gisulod sa Supplemental Budget number 1 aron maoy itukod sa ikapito hangtod ika-10 nga andana aprobado na usab sa Konseho niadtong Hulyo. Si hospital administrator Yvonne Cania nagkanayon nga ang bag-ong ospital maoy balhinan sa mga non-Covid patient nga kasamtangang nag-okupar sa karaang edipisyo uban sa mga pasyente nga nataptan sa virus nga gigamit kaniadto sa Cebu City Transportation Office (kanhi Citom) nga nahimutang atbang sa bag-ong CCMC. Ang mga bag-ong malandig sa CCMC nga adunay Covid-19 adto na ipahiluna sa edepisyo nga gibakante sa non-Covid patients aron maatiman ang mga Sugbuanon nga nataptan sa makamatay nga sakit. Gitinguha ni Cania nga maka-atiman og 100 Covid-19 patients ang ospital. Sa pagkakaron adunay kapin 50 ka pasyente nga naa sa ilang upat ka isolation area nga giatiman sa mga medical staff. Matod ni Cania nga magpabilin ang CCMC nga dangpanan sa mga kabus nga Sugbuanon nga adunay gihambin nga balatian. Ang mga ward kumpleto na sa tiles, gipintalan, duna nay suga, kuryente ug air-conditioner sa tulo ka andana apan kuwang pa sa furnitures ug fixtures. This posting includes an audio/video/photo media file: Download Now

P1.6M shabu nasakmit sa buy-bust sa Barangay Luz Posted: 18 Aug 2021 04:06 AM PDT DUHA ang nasikop sa buy-bust sa mga sakop sa City Intelligence Unit (CIU) sa Cebu City Police Office (CCPO) sa alas 7:00 sa buntag, niadtong sa Martes, Agosto 17, sa dalan Cabantan, Barangay Luz, dakbayan sa Sugbo. Nangulo sa operasyon mao ang hepe sa CIU nga si Police Lieutenant Colonel Randy Caballes. Ang mga nadakpan giila nga sila si Jemar Toyco Gepanaga, 24, kanhi nagtrabaho sa construction ug Marjon Bayon-on, 22, pulos lumolupyo sa nahisgutang dapit. Nakuha gikan kanila ang 290 gramos sa gituohang shabu nga nagkantidad og P1.9 milyunes base sa Dangerous Drug Board (DDB) value. Matod ni Caballes, gipaubos nila sa duha ka semana nga pagpaniid si Gepanaga human makadawat og impormasyon nga nalambigit siya sa pagpamaligya sa illegal nga drugas. Ang area of operation ni Gepanaga mao ang Luz ug silingang mga barangay diin makabaligya siyag tunga sa kilo sa matag duha ka semana. "Under surveillance for 2 weeks after receiving reports of his involvement in illegal activity. His area of operation is at Brgy. Luz, Mabolo and other neighboring barangays," matod ni Caballes sa Superbalita Cebu. Giingong siya niundang sa iyang kanhi trabaho sa construction kay dako og kita sa iyang pagpamaligya og shabu. Giingong gikan kang alyas Ble-Ble ang supply sa illegal nga drugas nga kasamtangang naa sa Cebu City Jail nabilanggo ug gisubay na kini karon sa kapulisan. (AYB) This posting includes an audio/video/photo media file: Download Now

37 anyos nga inahan gipusil-patay sa riding-in-tandem sa Consolacion Posted: 18 Aug 2021 04:06 AM PDT USA ka inahan gipusil-patay sa riding-in-tandem sa Barangay Pulpogan, Lungsod sa Consolacion, Cebu alas 5:45 sa hapon, niadtong Martes, Agusto 17. Si Lyka Solis Villarreal, 37, dunay kapuyo, patay human nakaangkon og samad pinusilan sa iyang ulo. Si Police Staff Sgt. Arnold Rusiana sa Consolacion Police Station nga nahinabi sa Superbalita Cebu nagkanayon nga ang mga mamumuno o naka-helmet ug nagsakay og motorsiklo. Si Villareal nigawas sa ilang panimalay kay dunay paliton sa tindahan. Ug ang gunman daling nanaug sa motorsiklo ug gipusil sa ulo ang biktima sa makadaghang higayon. Upat ka kabhang sa kalibre .45 ang nakuha sa kapulisan sa crime scene. Si Police Staff Sgt. Rusiana, nagkanayon nga drugas ang motibo sa krimen mao ilang gisubay sa imbestigasyon. Ang biktima gikatahong makaupat na nagawas sa bilanggoan gumikan sa kaso sa gidiling drugas. Katapusang nagawas niadtong Oktubre 2020 gumikan sa plea bargaining agreement. Ang iyang kapuyo usab nabilango sa Bureau of Jail Management and Penology (BJMP) Consolacion tungod sa samang kaso. (GPL) This posting includes an audio/video/photo media file: Download Now

Quadro Alas suklan na sa monster Posted: 18 Aug 2021 03:21 AM PDT Nadutlan na si Japanese Naoya "Monster" Inoue sa mga pasiatab ni World Boxing Organization (WBO) bantamweight champion Filipino Johnriel "Quadro Alas" Casimero batok kaniya. Sa kapungot ni Inoue, mihangyo kini sa iyang promoter nga si Top Rank CEO Bob Arum nga ihan-ay ang ilang away sa lumad nga taga Ormoc City, Leyte. Human sa split decision nga kadaugan ni Casimero batok kang Cuban Guillermo Rigondeaux niadtong Agusto 15, 2021 sa Carson, California, gihagit niini'g balik si Inoue hasta ang kababayang si Nonito "Filipino Flash" Donaire nga dayunon ang ilang unification bout. Gihulagway ni Casimero sila si Inoue ug Donaire nga parehong nahadlok nga makigbatok kaniya. "This is my plan. Three people. First, Rigondeaux finished. Second, Donaire and next, Inoue," asoy pa ni Casimero sa post-fight interview. Dungan sa iyang pagsulti sa pangalan ni Inoue, si Casimero misenyas og binastos gamit ang tungatunga sa iyang mga nga tudlo. Ang gibuhat ni Casimero tataw nga maoy 'nakapaulbo sa kaspa' ni Inoue hinungdan nga nagpanikad nang makig-away ang Japanese superstar batok kang Casimero. Taodtaod na'ng nagpakahilom si Inoue sa pagpanghagit ni Casimero apan karon lang kini mitingog. Nakatakda na untang mag-away sila si Casimero ug Inoue niadtong Abril, 2020 apan wala kini nadayon gumikan sa pagkuyanap sa Covid-19. Sulod sab sa pipila ka mga higayon mihimo og lakang ang kampo ni Casimero nga mahan-ay og balik ang away apan wala kini nahitabo ug nakadesisyon si Inoue nga makigharong na lang ni Australian Jason Moloney, kinsa iyang gi-TKO sa 7th round. Tungod niini, nakigsangka na lang sab si Casimero batok kang Duke Micah sa Ghana, kinsa iyang gipaundang sulod lang sa tulo ka rounds. Si Inoue adunay 21-0, 18KOs nga rekord samtang si Casimero naggunit og 31-4, 21KOs nga baraha. (ESL) This posting includes an audio/video/photo media file: Download Now

Migallen: Sultan potensiyal nga ma world champ: Villamor Posted: 18 Aug 2021 03:20 AM PDT Kon unsa ka boring ang away ni World Boxing Organization (WBO) bantamweight champion Johnriel Casimero batok sa runningman nga si Guillermo Rigondauex, nabawi kini sa kombati tali ni one-time world challenger Jonas Sultan ug sa Amerikanhon nga si Sharone Carter. Bisan taas ug dako man si Carter apan way kahadlok nga nakig bell-to-bell si Sultan niini ug pag-abot sa ikapito nga round wala na makaagwanta si Carter sa mga nag-aso-aso nga mga kinumo sa lumad nga taga Tampilisan, Zamboanga del Norte. Napaluhod ug wa na makabarog nga giiphan sa eight-mandatory count sa referee si Carter. Nakadayeg ko sa kaisog, kapaspas ug kaabtik sa inawayan ni Sultan (17-5, 11KOs) kansang boxing career naugmad sa nasira na nga ALA Boxing Gym gikan pa sa pagka-amateur niini. Sa niaging mga adlaw, akong na-interview si Edito Ala Villamor, ang chief trainer sa ALA Boxing kaniadto, kalabot niining Sultan kay dugaydugay man ni nilang nakuptan. Matod ni Villamor, kinsa nahimo usab nga two-time world challenger sa iyang panahon, nga matag away ni Sultan iya gyud ipakita ang impresibo niyang performance. Matod ni Villamor nga naghatag og dakong oportunidad ang maong kadaugan ni Sultan tungod kay nakapakita kini og saktong labok bisan pa man og kapin o kulang duha na ka mga tuig nga wa kini makasaka sa ring. "Makadugang kato sa iyang dakong pagsalig sa sunod niyang away," ni Villamor pa. Gitumbok sa beteranong trainer, kinsa aduna nay kaugalingon gym sa Mandaue City nga mao ang Villamor Brothers Gym, nga kon ipadayon ang kakugi ni Sultan, inubanan sa maayo nga pagkagiya sa trainer ug handler niini, dili halayo nga sa umaabot nga mga adlaw mamahimo kining world champion. Mao usab kini akong personal nga pangagpas. Mao nga pipila ka mga oras human sa iyang away, mo-interview unta ko niya pinaagi sa online ug mangutana kon unsay sunod nilang plano. Pero wala na man motubag human nga igo rang mipasalamat kanato sa dihang ato siyang gi-congratulate. Basin na-busy seguro tungod ba kaha sa selebrasyon. Sa niaging pipila na usab ka mga buwan, mipadangat kita niya og messages pero sa gihapon way tubag. Mao usab kini ang akong na eksperiyensiya ni Mark Magsayo, dili na usab manubag sa atong mga pangutana. Nabag-uhan lang ta kay kaniadto sa diri pa sila nagbasehan sa Sugbo, dali ra man kaayo ni sila motubag og mga pangutana sa local media. Karon nga atoa na sa US, can't be reached na man. (jun.migallen2@gmail.com) This posting includes an audio/video/photo media file: Download Now

Ugas, ma-TKO Posted: 18 Aug 2021 03:15 AM PDT Masugamak sa TKO nga kapildihan sa ulahing rounds si Cuban Yordenis Ugas sa pagdepensa niya sa iyang World Boxing Association (WBA) welterweight title batok kang Filipino boxing icon Manny Pacquiao karong Agusto 22, 2021 sa T-Mobile Arena sa Las Vegas, USA. Mao kini ang pagtuo sa dugay nang sparring mate sa Pambansang Kamao ng Pilipinas nga si AB Lopez. Sa panan-aw ni Lopez, wala'y ikaparang si Ugas sa kaabtik, kusog, tayming ug kalig-on ni Pacquiao, ang bugtong 8-division world champion sa kasaysayan sa boksing. "I see it playing out in later rounds with Manny stoppage, later," batbat ni Lopez nga napatik sa Spin.ph. "I just feel Ugas will be a little more on the defensive side. He's not one to come in because he knows Manny's speed. So I do feel he's gonna be more technical in the very beginning and then later on, that's when they're going to start throwing more punches." Mismong si Ugas miangkon nga grabe ka inilog si Pacquiao ning awaya apan gihangop kini niyang usa ka dakong hagit ug gusto niyang ipamatuod nga aduna siya'y abilidad nga makabuntog sa fighting senator sa Pilipinas. Gipabuhagay ni Ugas nga dili siya moaway alang sa iyang kaugalingon kon dili alang sa iyang nasod nga maoy nakahatag kaniya og dugang kadasig aron pakagingon ang tibuok kalibutan pinaagi sa paglupig ni Pacquiao. "I'm a fighter not only inside of the ring, but outside of the ring I fight for the freedom of my people," pamahayag ni Ugas sa media interview kagahapon, Agusto 18, 2021 (RP time) atol sa labing unang panagtagbo nila ni Pacquiao sa Las Vegas. "That's the most important thing to me. I hope everyone fighting for freedom in Cuba is safe and knows that I'll be fighting for them on Saturday." Si Ugas, 35, naggunit og 26-4, 12KOs nga rekord samtang si Pacquiao, 42, adunay 62-7-2, 39 Kos. (ESL) This posting includes an audio/video/photo media file: Download Now

Hagit ni Casimero gidawat ni Inoue? Posted: 18 Aug 2021 12:54 AM PDT Aduna na kahay misanong sa duha nga gihagit ni Johnriel Casimero human sa iyang split decision nga kadaugan batok sa Cuban fighter nga si Guillermo Rigondeaux niadtong Dominggo. Ang wa pay pildi nga hapon nga si Naoya Inoue, sa iyang Twitter account, mipasumbingay nga andam siyang makig-away sa Pinoy fighter nga si World Boxing Organization (WBO) champion Casimero alang sa usa ka unification bout. "Just buy the quarrel that was sold. Please organize a match," post sa kasamtang kampiyon sa WBA ug IBF title kinsa ubos na karon sa pagdumala sa Top Rank Promotions ni Bob Arum. Masabot nga nadungog ni Inoue ang gipasiatab ni Casimero atol sa post-fight interview sa iyang batok ni Rigondeaux. Sa dihang gipangutana kon unsay iyang plano sa sunod kon si Donaire o Inoue ang sunod kontra ug unsay iyang buhaton, si Casimero miisa og tulo ka kumagko ug mipadungog sa ilang laraw. "This is my plan. Three people. First, Rigondeaux finished," dayong piko sa usa niya ka kumagko. Second, Donaire," dayon dugang piko sa lain niyang tudlo. Sa dihang ang usa na lang ka tudlo ang wa mapiko, siya midayon pag-ingon "And next, Inoue." Ang 28-anyos nga Inoue (21-0, 18 KOs) nga nakadungog niini daw og sa nasuko sa style ni Casimero. Iyang gipasabot nga wa siyay rason kon nganong magpabilin siyang hilom nga gihagit ug giinsulto siya sa usa ka live broadcast. "There are people who say various things, but this is an individual remark with Casimero." Niadtong 2020, ang duha gikatakda na unta nga magsanga sa bulan sa Abril apan nakanselar kini tungod sa pandemic. Giuswag kin sa Agusto apan wala makalarga si Inoue sa US tungod sa problema sa US visa hinungdan nga nakanselar na usab. Sa dihang nasulbad na ang problema ni Inoue sa US visa, milarga gilayon kini sa US apan ang Australian nga si Jason Moloney maoy gikontra niini nga yano ra kaayo niyang gi knockout sa ikapito nga round. Tungod sa kalit nga pag-usab sa desisyon ni Inoue, ang kampo ni Casimero walay nahimo kon dili pagkuha na lang og laing kontra aron madepensaan ang iyang titulo. Ning higayona, ang Ghanan nga si Duke Micah gipaundang ra usab dayon ni Casimero sulod sa tulo ka round. (JBM) This posting includes an audio/video/photo media file: Download Now

Mayor: Mga kaso sa Covid sa Argao mikunhod Posted: 17 Aug 2021 11:16 PM PDT ARGAO Mayor Alan Sesaldo malaumon nga hingpit nang momenos ang kaso sa Covid-19 sa lungsod. Mibisita si Cebu Governor Gwendolyn Garcia sa lungsod Miyerkules, Agosto 18, 2021, aron susihon ang kahimtang sa lungsod ilabina ang Covid-19 response. Gibutyag ni Sesaldo ngadto ni Garcia nga ilang na-obserbahan nga nianam kaus-os ang gidaghanun sa kaso sa mga nataptan sa virus. Ang lungsod mitala og 24 bag-ong mga kaso sa Covid-19 niadtong Agosto 18. Ang aktibong kaso miabot na sa 171. Sumala pa ni Sesaldo misunod ang mga bus ug minibus drivers sa mando sa gobernador kalabot sa health protocols. Nanghinaot usab ang mayor nga madugangan ang suplay sa bakuna alang sa lungsod gumikan kay daghang residente ang buot mabakunahan. (MVE) This posting includes an audio/video/photo media file: Download Now

2nd Season as Bosco Ciclismo Bike Challenge sa September 1-30 Posted: 17 Aug 2021 10:03 PM PDT NAGPADAYON hangtod karon ang pagpangrehistro sa Bosco Ciclismo 2021 Virtual Bike Challenge Season 2. Kini maoy gibutyag ni Aljoen Baroro, kinsa maoy usa mga nag-organisar ning maong kalihukan nga gipahaom ning nagpadayon nga pandemya. Samtang ang registration motapos sa Agusto 31, 2021, ang partisipante mahimo nang mosugod sa paglatas sa ilang napili nga rota sa Septiyembre 1, 2021. Sa elevation challenge category, ang mga mosalmot mahimong mopili sa 3,000-meter, 5,000-meter ug 10,000-meter. Samtang sa Distance Challenge, ang mga participants mahimong motadlas sa 300-kilometer distance, 500-kilometer ug 1,000-kilometer distance. Sa registration, ang Package A mokantidad og P650 diin aduna na kini finishers shirt, cycling cap ug proto stand. Samtang ang Package B adunay bayranan nga P1,150) nga may libring finishers jersey, Cycling Cap ug Proto Stand. Mga P1,400 usab ang mabayran sa Package C diin aduna na kini finishers shirt, finishers jersey, cycling cap, proto stand ug tube mask. Sa mga interesado, mahimo ra nga motext or motawag ni Aljon Baroro sa 0997 609 0046. Aron ma monitor ang mga nisalmot, kinahanglan ang screen shot sa ilang tagsatagsa nga nahuman nga rota nianang adlawa uban sa ilang Bib number, distance ug ang petsa. Mahimo nga mogamit sila sa GPS O sports watch nga maka record sa distancia nga ilang nahuman. Ang mga partisipante maka claim sa ilang mga kit diha sa FTW Athletics Cebu City Store nga anaa sa 2nd Floor ALDC Building, Mambaling, dakbayan sa Sugbo. Mahimo ra usab nga ipadala kini diha kaninyo. Walay madawat kadtong mga participants nga manikas. Kon kahinumdoman, ang first season sa Bosco Ciclismo Virtual Bike Challenge nagmalampuson diin moabot ngadto sa 224 ang mga artisipante. Ang kita sa maong kalihukan gi turn over ngadtosa Don Bosco Boys Home Liloan. Gikalipay ug gihangop ni Bro. Louie Domasian, SDB kinsa maoy nagdumala sa maong pasilidad ang pagdawat sa donasyon. Tungod sa hangyo sa kadaghanan, ang mga tigpasiugda nakahukom nga mopahigayon sa second season diin aduna nay mga bag-ong hagit sa mga participants. Ang Bosco Ciclismo gipangulohan sa founders niini nga sila si Zaldy Velano ug Michael Flores samtang si Baroro maoy nagsilbing event manager. Kini hugot nga gipaluyohan sa FTW Athletics, Scooby's Cafe, DBCAI ug Antara Residences ang Condominium. (JBM) This posting includes an audio/video/photo media file: Download Now

3 patay sa disgrasya sa Tanauan, Leyte Posted: 17 Aug 2021 09:58 PM PDT TULO ang kompirmadong patay sa nahitabong disgrasya sa kadalanan sakop sa Barangay Sto. Niño, Tanauan, Leyte alas 6 pasado sayo sa buntag, Miyerkules, Agusto 18, 2021. Duha sa namatay mga bata, samtang usa ang senior citizen. Naangol ang drayber sa sakyanan nga usa ka abugado kauban ang iyang pasahero. Giila sa kapulisan ang abugado nga si Racquel Kho, 70, private lawyer, taga Barangay Central, Arteche, Eastern Samar. Kauban sa abugado ang usa ka Achim Anthony Kho, 23, nagpuyo sa samang lugar. Ang mga biktima giila nga sila si Regine Garcia, 15; Piolo Garcia, 14; Silverio Mercado, 74; Rogelio Macapanas, 55; ug Antonio Indic, 63, pulos taga Sto. Niño. Matod sa kapulisan, nakadawat sila og tawag gikan ss Tanauan Rescue Team bahin sa insidene. Base sa ilang imbestigasyon, ang abugado nagmaneho sa iyang Toyota Fortuner gikan sa Tolosa, Leyte paingon sa Palo, Leyte. Pag abot sa lugar nga nahitaboan, nibuto ang wala nga ligid sa atubangan sa sakyanan, hinungdan nga nitipas kini sa pikas linya ug nibangga sa nakaparada nga traysikol ug nilahos sa waiting shed diin didto ang mga biktima. Dead on arrival ang duha ka Garcia ug si Mercado. Naa pa sa tambalanan ang ubang naangol. (JKDP) This posting includes an audio/video/photo media file: Download Now

Pasyente misugwak sa 2 ospital sa Mandaue Posted: 17 Aug 2021 07:48 AM PDT Duha ka ospital sa Dakbayan sa Mandaue ang okupado na tungod sa pagsaka sa kaso sa Covid-19 sa dakbayan. Niadtong Agusto 16, 2021, ang Eversley Childs Sanitarium and General Hospital nitaho nga 146 ang kapasidad sa higdaan sa ospital apan aduna lang silay gitagana nga 100 ka higdaanan sa ospital. Alang sab sa mga higdaanan sa Covid-19, gitaho sa Eversley nga aduna lang silay 93 alang Covid-19 patients apan moabot na sa 105 na ang na-admit. Sa Mandaue City Hospital nga ang tanang 25 nila ka hospital beds ang okupado na sa mga pasyente sa Covid-19. Si Dr. Pythagoras Zerna, hepe sa Eversley Childs Sanitarium ug General Hospital, niingon nga molusad sila og tele-consultation kay dili una sila modawat og outpatient kini aron maminusan ang exposure sa mga outpatient sa Covid-19 diha sa maong ospital. Kasamtangan nga dili una sila modawat og face-to-face consultation ug ang mga kawani sa out-patient department ibalhin una aron moabag sa pag-atiman sa mga pasyente sa Covid-19. Matod ni Zerna nga nanginahanglan sila og daghang medical staff aron kung adunay masakit nila nga kawani dili ra sila magkuwang sa ilang manpower. Matod niya nga nihangyo na sila sa Department of Health (DOH) nga dungagan ang ilang budget aron maka-hire og dugang empleyado o health personnel. Sa pikas bahin, si Merryl Marie Maunes, ang chief nurse sa Mandaue City Hospital miingon nga ang 25 ka higdaan sa hospital pulos na puno na sa mga pasyente sa Covid-19. Sa pagkakaron, gisuspenso usab nila ang operasyon sa ilang Out-Patient Department ug ang tele-consultation sab ang gihimo sa City Health Office ug sa mga Barangay health centers. (KFD) This posting includes an audio/video/photo media file: Download Now

Vaxx site sa Lapu modawat og walk-in Posted: 17 Aug 2021 07:47 AM PDT Gipahibawo ni Atty. James Sayson, deputy officer sa Vaccination Operation Center sa Dakbayan sa Lapu-Lapu nga gitugot na ang mga walk-in sa gilusad nga pagpamakuna sa pipila ka mga barangay sa dakbayan. Kini sukwahi sa nagpadayon nga Mobile Vaccine Clinic ug sa ubang vaccination site sa dakbayan tungod kay way target sector sa komunidad ang ilang bakunahan. Dili susama sa ubang vaccination site diin gihatagan og prayoridad ang mga senior citizens ug persons with disabilities (PWD). Apan gikinahanglan nga ang usa ka indibidwal makaparehistro nang daan pinaagi sa online registration sa kagamhanan sa dili pa moadto ang vaccination team sa ilang barangay. Ang schedule sa matag barangay makita sa i-post sa kagamhanan diha sa official Facebook page ni Lapu-Lapu City Mayor Junard Chan nga advance nga ipahibawo sa dili pa ang actual nga pagpamakuna. Gikatakda nga duawon nga mga barangay mao ang mosunod: Barangay Agus-Agosto 16, Canjulao-Agosto 17, Punta Engaño-Agosto 18, Subabasbas-Agosto 19 ug Basak-Masulog-Agosto 20. Apan kon wa makaparehistro daan sa online mahimo ra gihapon nga modiritso og parehistro on-site alang sa pagpabakuna, sumala ni Sayson. Tagdon ra usab sa vaccination team ang mga residente sa ubang barangay nga dili makahuwat sa ilang schedule ug magpabakuna na usab. Ang vaccination sa barangay gituyo aron nga mabahin ang gidaghanon sa mga tawo nga buot magpabakuna gawas sa naandan nga vaccination center sa dakbayan ug ngadto sa mobile vaccine clinic. Ang team langkuban sa vaccinator, nurses ug doctor. "Dugang ni sa mobile vaccine clinic tungod kay nakita nato nga gihangop sa barangay pero atong schedule karon three times a week Tuesday, Thursday, Saturday ra man ta," matod pa ni Sayson. Dugang pa niya nga sa mga mosunod nga buwan ila na unyang himuon ug ka-unom ka higayon ang skedyul ilabi na nga ilang gi-agad ang availability sa mga personel nga gikan sa Red Cross. (GCM) This posting includes an audio/video/photo media file: Download Now

Agosto 16 labing daghang nangamatay Posted: 17 Aug 2021 07:42 AM PDT Nakatala og labing daghan nga nangamatay gumikan sa coronavirus disease sa Dakbayan ug Lalawigan sa Sugbo gumikan sa coronavirus niadtong Lunes, Agusto 16, 2021. Base sa talaan nga gipagawas sa Department of Health (DOH) 7, niabot ngadto sa 82 ka patay, ang 33 niinin gikan sa Province of Cebu, 24 gikan sa Cebu City, 20 sa Lapu-Lapu City ug lima gikan sa Mandaue City. Ang maong mga gidaghanon sa mga nangamatay maoy labing daghan alang sa Cebu City ug Lapu-Lapu City sulod ning buwana. Samtang ikaduha sa labing taas og casualty sa probinsiya human nakatala og 43 deaths niadtong Agusto 14 ang lalawigan. Sa kinatibuk-an, niabot na og 14,948 active cases sa tibuok Central Visayas, adunay 5,161 active cases ang Cebu Province, 4,099 sa Cebu City ug kapin sa 1,000 ang Lapu-Lapu City, Mandaue City ug Bohol. Apan giklaro ni Konsehal Joel Garganera, deputy chief implementer sa Emergency Operation Center nga base sa ilang lista, 10 ra ang namatay niadtong Agusto 16 samtang ang laing 14 giingong namatay sa laing petsa og natingob lang sa paglista sa DOH 7. Base sa talaan sa DOH 7 nag-anam og kadaghan ang mga namatay sa Covid-19 ning buwang sa Agusto. Si Garganera padayon nga miawhag sa katawhan nga kon mahimo magpundo lang una sa balay ilabi na kon walay importante nga lakaw aron malikay sa virus. Apan kon anaa sa gawas gikinahanglan nga motamod sa health and safety protocol nga gipatuman sa kagamhanan. (PAC) This posting includes an audio/video/photo media file: Download Now

Midaghan ang mga dinakpan sa TF Puyo Posted: 17 Aug 2021 07:40 AM PDT Midoble ang nadakpan sa kapulisan sa Dakbayan sa Sugbo atol sa unang adlaw sa pagpatuman sa Task Force Puyo sa Lunes, Agusto 16, 2021 nunot sa bag-ong executive order ni Acting Mayor Michael Rama. Sa talaan sa Operations Branch sa Cebu City Police Office (CCPO), sila nakadakop og 389 ka mga tawo nga nakalapas sa curfew ug health protocol. Ang 78 niini mga menor de edad nga naatlan nga naa sa gawas sa ilang balay sa pagsugod sa oras sa curfew. Sa 389 nga kinatibuk-ang nadakpan, 319 kanila nadakpan sa curfew, 91 ang way facemask ug upat ang nakalapas sa liquor ban. Matod ni Police Lieutenant Colonel Wilbert Parilla, deputy city director for operations sa CCPO, nga midaghan ang ilang nadakpan tungod kay nakatutuk na sila karon sa mga hilit nga lugar sa kabarangayan tungod kay wa na man mangabli ang mga establisemento panahon sa kagabhion. GIPAMULTA Nakig-alayon na usab ang CCPO sa mga barangay nga adunay na rescue nga mga menor de edad aron ipatawag ang mga ginikanan aron pabayron sa multa sa ilang mga anak. Kon dili sila makamulta, palimpyuhon sila sa South Road Properties alang sa community service nga silot. "Ang minor nga ma rescue nato ipatawag ang ilang mga ginikanan unya ang ginikanan ang momulta. Og dili makamulta, ang ginikanan maoy morender sa community service didto sa SRP," matod ni Parilla. Sa sulod sa holding area nga gi pahimutangan sa mga nadakpan ug na-rescue nga mga bata, hatagan silag mga facemask ug ipatuman ang social distancing. Isugyot usab ni Parilla sa Kagamhanan sa siyudad sa Sugbo nga ang madakpan sa Oplan Bulabog ilang ipaubos sa antigen test o ba kaha swab test aron mahibaw-an kon kinsay mga carrier sa virus, sa ingon, mapaubos dayon sa isolation aron dili makatakod. "Ato nang i-suggest sa EOC kon pwede ba nga i-subject for rapid test or any test ang tanang maabot diha sa atoang holding area," dugang ni Parilla. Wa pa hinuon silay nadakpan nga bikers nga igo lang nagsuroy suroy sa bukid o kaha riders nga misaka sa Transcentral Highway tungod sa pagtuo nga nakahibawo na sila nga hugot kining gidili ubos sa kamandoan sa Cebu City Hall. Dugang ni Parilla nga ila usab nga gidili ang panagtapok sa mga rider sa TCH samtang epektibo pa ang EO ni Rama hangtod sa Agusto 31. Samtang nakadakop usab silag 47 ka four wheel nga mga sakyanan tungod sa lainlaing kalapasan samtang upat ka mga motorsiklo na-impound tungod kay dili kompleto sa mga dokumento. This posting includes an audio/video/photo media file: Download Now

Nanguhag trabahante sa 3 ka barangays sa Carbon Posted: 17 Aug 2021 07:39 AM PDT Ning hapit na pagsugod sa pagtukod, ang Carbon District Modernization Project nagdali sa iyang pagpanguhag mga lumolupyo sa lokal nga komunidad nga dunay kahanas ug kasinatian aron kuhaong mga trabahante. Ang pribadong partner Cebu2 World Development Inc. (C2W) ug inahan niining kompaniya, engineering ug infrastructure innovator Megawide, nagpadayon sa pagprayoridad sa mga aplikante nga nagagikan sa tulo ka Carbon district barangays nga mao ang Sr. Santo Niño, San Roque ug Ermita, alang sa mga posisyon nga may kalabutan sa construction sa Cebu province project sites, apil na sa Carbon. Kapin sa 200 ka mga aplikante sa nagkadaiyang mga posisyon sa construction nadawat ug gihikay sa Hulyo. Isip tipik sa proseso sa pagpili, ang matag barangay leader ni-review sa mga aplikasyon sa wa pa giduso ngadto sa C2W. Ang giendurso nga mga aplikante niagi sa naandang pamaagi sa kompaniya sa pag-screen ug kinahanglang makapasar sa rekisitos nga gikinahanglan alang sa posisyon nga iyang gustong sudlan. Tipik kini sa nagpadayong pagtuman sa C2W sa pagsuporta sa lokal nga talent. Niadtong Mayo 28, 2021, ang kompaniya ug lokal nga mga opisyal ningpirma og Memorandum of Understanding (MOU) nga naghatag og prayoridad sa kwalipikadong mga kandidato nga nagpuyo sa tulo ka mga barangay aron sila makatrabaho ug dunay mga kahigayunan sa panginabuhian. Nagpadayon usab ang mga konsultasyon alang sa pagpalambo sa tinabangay nga corporate social responsibility (CSR) projects. Nalakip sa mga dapit nga gitan-aw mao ang entrepreneurship and skills training options alang sa mga residente sa barangay. "It is a privilege for us to offer employment and livelihood opportunities to our partner-communities. Cebu has a wealth of talent, and through our Resource Mapping efforts we also found that our three host barangays have a multitude of residents and small enterprises with capabilities that fit our project needs at Carbon, including the construction phase," matod ni C2W director Cristina Angan. Iya usab nga gisubli pagklaro ang tinguha sa C2W sa pagpakigtambayayong sa mga hingtungdan sa pag-umol og lokal nga talent ug mga tinubdan. "There are numerous possibilities for collaboration with Carbon's existing businesses. For example, some carinderia operators from Carbon were invited to participate in the selection process for construction site meal providers. The chosen meal operators will not just have the opportunity to sell, they will also have the chance for added training through our partnership with DTI and DOST," matod niya. (REV gikan sa PR) This posting includes an audio/video/photo media file: Download Now

CIDG 7 labing daghan og mga nadakpan, no. 1 sa tibuok nasod Posted: 17 Aug 2021 07:38 AM PDT Criminal Investigation and Detection Group Regional Field Unit 7 nag-una sa 16 ka mga rehiyon lukop nasud sa Hulyo 2021 sa labing daghang og nadakpan sa Simultaneous Anti-Criminality Law Enforcement Operation (Sacleo) human ilang nasikop ang kapin sa 100 ka mga wanted person sulod lang sa unom ka adlaw nga operation. Matod ni CIDG 7 Regional Director Ireneo Dalogdog, nakalusad sila og 136 ka police operations nga niresulta sa pagka sikop sa 130 ka wanted ug most wanted persons. Naka serve usab sila og 82 ka warrants of arrest, niini 11 ang most wanted persons sa regional, city ug municipal level nga napusasan human mag tago-tago sa taas nga panahon. Lakip sa nangadakpan ang 71 ka laing wanted persons ug 41 ka personalidad nga mga miyembro sa mga criminal gang nga naglihok sa tibuok rehiyon 7. Tungod, niini gi dayeg ni Dalogdog ang iyang mga personnel nga bisan sa nasinating pandemic, nagpadayon sa ilang kakugi nga mangita sa mga tawo nga adunay pending warrants of arrest gikan sa korte. "With that, I would like to congratulate and commend our personnel, the officers and men of CIDG-7 for the job well done and rest assured na ipagpatuloy namin ang trabaho," matod ni Dalogdog. Gikan sa Agusto 1-15, sila nakadakop na usab og walo ka most wanted persons, usa na niini amahan nga nalutsan og warrant of arrest sa kaso sa upat ka ihap nga statury rape, ang iyang biktima ang iyang anak. Nalakip siya sa top 2 most wanted person sa Police Regional Office 7 (PRO) ug Cebu City Police Office (CCPO). Ang ngalan sa akusado gipugngan lang una aron mahatagan og proteksyon ug di usab mailhan ang iyang gibiktima nga nadakpan sa barangay Guadalupe sa siyudad sa Sugbo. Gitug-an ni Dalogdog nga tulo ka tuig na nga nagtago ang akusado sa Barangay Guadalupe human masayod nga gipasakaan siyag kaso sa iyang anak. Sigun sa biktima nga sa nag edad pa siyag 8 anyos gisugdan na siyag lugos sa iyang amahan. Dugang ni Dalogdog nga daghan pa silag gihuptan nga mga warrant of arrest nga mao usab ang ilang target sa sunod nga Sacleo. (AYB) This posting includes an audio/video/photo media file: Download Now

P500M nga pundo sa Philhealth Eastern Visayas nahuman na og kwentada Posted: 17 Aug 2021 07:37 AM PDT Kapin sa P500 million nga pundo nga gihatag ngadto sa Philippine Health Insurance Corporation - Eastern Visayas, nahuman na og liquidate. Kini ang gikompirmar ni PhilHealth Eastern Visayas Acting Vice President, Dr. Rosario Suyom sa usa ka press conference. Nahimong kontrobersiyal ang PhilHealth gumikan sa P15 bilyones nga pundo nga giingon nga nawala ug gipasanginlan ang pipila ka mga opisyal nga nangawkaw. Niini, gitaral sa Senado ang kontrobersiya ug gisaad sa ahensya nga dunay himuon nga liquidation. Base sa report sa PhilHealth, dunay P505,534,202 nga pundo nga gihatag sa Eastern Visayas. Base sa gihimong liquidation, sa Marso 2021, naa na sa P411,921,710 ang na-liquidate. Gikompirmar ni Suyom nga ning buwan sa Hulyo lang nahuman na og liquidate ang kuwang nga P93,612,492. Gipasabot ni Suyom nga nadugay ang pagkumpleto sa liquidation gumikan kay dunay pag-drop sa census sa mga hospital. Daghan ang wala magpa-admit o modangop sa hospital sa kahadlok nga basin og mag positibo sa Covid-19 hinungdan nga dunay ubang claims nga wala dayun nakuha. BENIPISYO SA EPEKTO SA BAKUNA Gipahibalo usab sa PhilHealth nga duna sab sila karoy Covid-19 Vaccine Injury Compensation Package. P100,000 alang sa ma-hospital gumikan sa serious adverse effect human nabakunahan ug duna say P100,000 lump sum para niadtong mamatay o mabalda gumikan sa serious adverse effect sa bakuna. Giklaro ni Suyom nga wala gyuy bisan usa ang naka-claim niini. Pasabot niini nga dili angay mabalaka sa pagpabakuna kay wala pa'y report nga dunay nakalas ug nabalda kay nabakunahan. Lakip sa covered benefit sa PhilHealth ang swab testing sa mga accredited testing laboratory. Sa Ormoc City, ang OSPA lang ang accredited nga naa lang sa kapin usa ka libo ang mabayran. Matod ni Suyom, dili pa accredited sa PhilHealth ang saliva test sa Philippine National Red Cross gumikan kay nag agad sila sa Department of Health (DOH). Gipasabot ni Suyom nga sa pagka karon, ang RT-PCR o swab test pa lang ang giila sa DOH nga pinaka maayo nga confirmatory test busa mao ra kini nga test ang lakip sa ilang covered benefits. Sa paghimo ning balita, anaa na sa 54.49 percent ang total paid claims sa PhilHealth sa Ormoc area. (JKDP) This posting includes an audio/video/photo media file: Download Now

2 gipanunggab, kritikal Posted: 17 Aug 2021 07:35 AM PDT Duha ka mga tawo nadunggaban sa managlahing mga lugar sa Probinsiya sa Sugbo. Wa makatiwas sa pagtambong sa birthday party si Polgencio Sestoso, 43, minyo, human gidunggab alas 3 sa hapon sa Dominggo, Agusto 15, 2021 sa Sitio Danao, Barangay El Pardo, lungsud sa Boljoon. Si Sestoso samdan sa tiyan. Ang suspek giilang si Julito Solmerano, 56, minyo, nasikop alas 7:45 sa gabii sa Dominggo human sa hot pursuit operation sa kapulisan. Sa imbestigasyon nila ni Police Staff Sgt. Erwin Oyao sa Boljoon police, si Sestoso nitabang sa pagpreparar sa birthday party sa ilang kabanay dihang niabot si Solmerano nga hubog. Iyang gikomprontasi si Sestoso hinungdan nga nagkaguliyang ang kalihukan human gidunggab ni Solmerano ang tiyan. Nasuta nga nasuko si Solmerano dihang gibadlong ni Sestoso human nanguhag lubi nga dili iyaha. Kasong frustrated murder ang giandam sa kapulisan batok kang Solmerano. GIGABAS, GIDUNGGAB Samtang trabahante gidunggab og gunting sa iyang kauban human nagkalalis gumikan sa kahubog alas 5 sa hapon Domingo sa Brgy. Tamiao, lungsod sa Compostela. Si Bernardo Roboy, 33, minyo, taga Brgy. Maslog, Dakbayan sa Danao, samdan sa tiyan, ulo ug ubang parte sa kalawasan. Nasikop ang suspek nga giilang si Jason Prito, 18, ulitawo, taga Brgy. Guinsay, dakbayan sa Danao. (GPL) This posting includes an audio/video/photo media file: Download Now

Haya-anan gihimong bodega sa mga patay Posted: 17 Aug 2021 06:48 AM PDT Gihimo nga morgue sa Saint Bernard Funeral Home ang ilang viewing facility nga nahimutang sa Barangay Basak San Nicolas, Dakbayan sa Sugbo. Kini human nadiskobrehan ni Cebu City Councilor Dave Tumulak atol sa gipahigayon nga kinalit nga inspection nga adunay 16 ka mga minatay ang anaa sulod sa edepisyo. Adunay 10 ka patayng lawas ang gisulod sa chest type freezer samtang ang laing unom ka patayng lawas ang gilaray sa sawog ug adunay gipatong sa mortuary table. Tulo sa mga nangamatay ang gidudahan nga namatay gumikan sa coronavirus disease. Gituohan nga usa ka abandonadong building ang maong pasilidad apan giklaro ni SJ Palomar, manager sa Saint Bernard, nga gigamit nila kini sukad pa niadtong tuig 2008. Matod pa ni Palomar nga aduna silay permit sa ilang operasyon kansang edepisyo nahimutang tapad sa usa ka commercial establishment ug mosque sa N. Bacalso Avenue sa Barangay Basak San Nicolas. MINATAY NAGTAPOK Nasuta nga adunay minatay nga niadtong pang tuig 2020 ang anaa pa sa ilang kustodiya kay wala pay miangkon nga tagtungod ug wala pa usab kini malubong gumikan sa pandemic. Giasoy ni Palomar nga napundo ang mga minatay labi na kadtong gitakda nga i-cremate sanglit taas ang linya alang sa cremation ug magpaabot pa sila og 10 ka adlaw ang ilang paghuwat. Gipadayag sa manager sa St. Bernard nga ang ilang gihimo mao ang pagtabang sa mga funeral parlor nga dili maato ang gidaghanon sa ilang kliyente. Samtang ang ilang paggamit sa mga ordinary freezer adunay pagtugot sa mga kabanay sa namatay aron lang ma-preserba ang lawas. Iyang giingon nga wala manimaho ang mga patay ug ang ilang mga staff nituman sa mga protocol sama sa paggamit sa PPE labi na kon gidudahan nga namatay gumikan sa Covid-19. WAY PAGTUGOT Apan si Tumulak nagkanayon nga ang permit nga nakuha sa St. Bernard Funeral Homes alang sa viewing o haya-anan ug dili storage. Matod pa sa konsehal nga kalapasan ang nahimo sa maong punerarya. "Naa tay nakita nga murag panagsabot tali storage facility didto apan dili gyud to siya legal kay iyang permit didto is, funeral parlor (for) viewing pero walay storage (permit)," pasabot ni Tumulak. Si Tumulak niingon nga posibleng adunay sabotahe tali sa St. Bernard ug sa punerarya nga ilang kliyente sanglit giingong dako og bayad ang storage fee nga mokabat sa P13,000 sa unang adlaw ug P8,000 sa mosunod nga mga adlaw ug lain pa ang bayad sa punerarya. GIPATAWAG Sa gipatawag nga closed-door meeting ni Tumulak kagahapon mahitungod sa pagkadiskobre sa maong binuhatan, iyang giawhag ang St. Bernard ug ang ubang punerarya nga ilang kliyente sa storage nga likayan ang maong pamaagi. Alang sa opisyal makaluluoy ang hingtungdan sa namatay nga dako og mabayran ilabi na niining kalisod sa sitwasyon gumikan niining panahon sa pandemiya. Ang konsehal nagkanayon nga kadtong mga kaliwat sa namatay, ilabi na og gidudahan nga Covid-19, ang hinungdan sa pagduol sa City Health Department aron mahatagan og giya kon asa nga menteryo sa Cebu City ilubong ang ilang minatay. Sa maong paagi makalikay sa dakong bayranan sa storage sanglit aduna nay mga bakanteng luna sa mga sam-ang. Ang City Health Department gikatakdang mohimo og inspeksyon sa maong morgue aron masusi ang ilang pasilidad ingon man ang pagsuta kon aduna ba silay sanitation permit ug ubang dokumento nga gikinahanglan sa pag-operate. This posting includes an audio/video/photo media file: Download Now

Editoryal: Isyu sa air purifiers Posted: 17 Aug 2021 06:40 AM PDT Unsa ka epektibo sa gipangkwentas o wearable air purifiers? Bisan walay igong kamatuoran sa gipasiatab ang mga tighimo niini, nauso tungod sa kahadlok ug pamasin sa usab nga malikay sa coronavirus disease 2019 (Covid-19) ug ubang viral infections. Nisamot ang pagduda sa gipangbaligya nga wearable purifiers human nipagawas og pamahayag ang Department of Health (DOH) nga walay giindurso ang ahensiya nga wearable purifiers ug wala usab mohimo og pagtuon kon epetiktibo o dili ang naasoy nga kahimanan. Naaghat ang DOH sa pagluwat og pamahayag human dunay usa ka brand sa wearable air purifiers nangangkon nga ang ilang produkto rekomendado sa buhatan sa panglawas. Hinuon, walay balaud nga nagdili o kamandoan batok sa pagkwentas og air purifiers. Katungod sa makaabot sa pagpalit niini nga mobalor og labing minus P1,500 diin ang kasagaran ginama sa China. Kumon nga kasinatian, ang uban kalit nga dili na mogana o daling maguba. Walay warranty sa produkto. Busa unsay basehanan nga nagtukmod sa tagdumala sa Cebu South Bus Terminal (CSBT) sa pagmando sa mga konduktor ug drayber nga magsul-ob og air purifier? Dugang gasto kini taliwala sa kalisod nga mugna sa pandemiya. Maayo unta kon segurado ang iyang kaepektibo. Basin psychological lang ang epekto? Ug ang resulta sa mando naghinit ang supply sa wearable air purifiers tungod sa demanda. Si CSBT manager Carmen Quijano nikompirmar nga gamay lang nga buses ang nanagan sa probinsiya sa Sugbo ug kini usa sa hinungdan nga taas og linya na ang mga pasahero niadtong Lunes, Agusto 16, unang adlaw unta sa pagpatuman sa mando sa pagsul-ob og air purifier apan giuswag kini. Dili seguro estriktuhon ang pagsul-ob og air purifiers. Kon makaabot sa pagpalit, labing maayo. Dili pinuguso. Kabubut-on lang human dili kini rekomendado sa DOH. This posting includes an audio/video/photo media file: Download Now

Lonzon: 506 patay sa Covid Posted: 17 Aug 2021 06:38 AM PDT Kulba ang numero sa gidaghanon sa namatay sa Covid-19 sa Probinsiya sa Sugbo ug mga dakbayan sa Sugbo, Mandaue ug Lapu-Lapu. Nakurat ko sa dihang nakadungog sa balita nga miabot na sa 506 ang namatay sud lang sa 15 ka adlaw sulod sa Agusto 1 ngadto sa 15. Nagsige ra ba og saka ang kaso sa Covid-19 sa Sugbo, samtang daghan pa sa katawhan ang wala pay bakuna. Ug ang nangamatay wa pay bakuna batok sa Covid-19. AIR PURIFIERS Nakalimot tingali si Cebu Gobernador Gwen Garcia nga ang air purifier way gamit batok sa Covid. Gawas niini ang air purifier dili intawon kana para sa virus. Ang purpose ana paglimpyo sa hangin batok sa bacteria sa sud sa opisina ug sa balay. Ug di sab na epektibo sud sa bus ang purifier nga ibutang kon abli ang mga bintana. Maayo kay gi-cancel sa Kapitolyo ang kamandoan sa paggamit niini. ABANTE BARANGAY Nikabat sa 30 ka medical oxygen tanks ang gidonar sa Abante Barangay pinaagi sa pag-abag sa Joint Link Venture ug Rotary Club of Mandaue. Si Atty. Totol Batuhan, ang chairman ug founder sa Abante Barangay nga usa ka non-governmental organization ( NGO), mihatag usab og P100,000 nga donasyon. Atol sa interview sa Agila, namahayag si Batuhan nga grabe ang panginahanglan sa district ug provincial hospital sa Sugbo. Matod ni Batuhan, importante ang pagtinabangay karong panahona tungod sa pandemic. COVID SA BOLJOON Sa kasayuran nga akong nakuha minos ra ang natala nga Covid-19 cases sa lungsod sa Boljoon. Gipahibawo ni Boljoon Mayor Merlo Derama sa interview sa Agila ang kooperasyon sa katawhan gikinahanglan.Wa kinahanglanang mogawas sa balay kon dili importante. Ilabi na ang dunay gipamati sa lawas maayong magpuyo nalang kay di ka kompyansahan ang Covid, matud ni Derama. Nagpasalamat usab ang mayor nga wa malakip sa pagbutang sa MECQ ang ilang lungsod. (Email: efrenlonzon71@gmail.com o text sa 0923-5562777) This posting includes an audio/video/photo media file: Download Now

Diputado: Way maayo nga balita Posted: 17 Aug 2021 06:38 AM PDT Lisod pagpangita og maayong balita karong mga panahona. Hapit na lang tanang balita pulos makaguol, makahadlok o makalagot. Buyno, usa sa maayong balita ang kalit nga bunok sa ulan kagahapon. Nindot kaayo tan-awon ang mga tanom nga sama sa gibisbisan sa kalangitan, daw nag-ngisi ang mga tanom nga miabiba sa pagbunok sa ulan. Nindot unta kon gitaudtaoran pa ang bunok pero wa ra pod magdugay. Wa kaayo makasurop ang ulan tungod pod sa kainit sa yuta. Pero maayo na lang kay nakatilaw ang mga tanom og hamubo nga kalipay. * * * Nindot unta kon nalukop ang bunok sa ulan sa tibuok rehiyon, labi na gyod ang mga lugar nga dunay basakan sa humay sa Bohol ug Negros Oriental. Kon imong tan-awon ang mga basakan karon sa Bohol, nangliki na intawon ang mga kabasakan, timailhan sa kanihit sa tubig ug kainit sa panahon. Nindot unta kon mobunok ang ulan og masudlan na sab ang mga dams ug reservoir aron padayon ang atong maanindot nga abot sa mga kahumayan. Kon di kini mahitabo, hayan magnihit sab ang abot sa mga umahan og momahal na sab ang presyo sa bugas. Dugang kabug-at sa panginabuhi na sab ni. * * * Nindot ang pamaagi sa kampanya karong mga panahona. Naghitak ang Facebook sa mga gi-post sa mga politiko, ilang supporters ug bashers, apil na kadtong nagplano nga modagan sa piniliay karong sunod tuig. Masabot ra sab nga naa ang tanan sa Facebook kay lisod man ilakaw-lakaw karong mga panahona tungod sa Covid. Mao nang uso na kaayo ang livestreaming sa Facebook, bisan unsa na lang ang buhaton, FB live dayon. Total, libre man sab ang FB, kakugi lang ang puhonan. * * * Tungod kay libre ra man ang FB, patas ang dato ug pobre. Way nakalamang sa duha ka grupo kon maghisgot og pangampanya. Anha magdaog sa abilidad pagpresentar sa ilang mga posts, apil ang kalidad sa ilang cellphone. Nindot nga cellphone, nindot sab og kuha nga pics o video. Dunay maayo mogama og caption, English o binisaya, duna poy uban nga puyra gaba sab. Ang uban mokanta, ang uban sab mag-tik tok. Basta lang makita sa friends nila. Pero kadaghanan kanila mopakita nga nagserbisyo kunohay sa katawhan, mokuyog sa ilang mga kasub-anan og andam kanunay mo-smile kon dunay mosangpit. Panahon ron sa mga friendly nga mga tawo, noh. Bisan unsa nga mga kalihokan, abtik kaayo motabang. Pero seguruon nila nga dunay camera o video nga gasunod kay sayang man pod og way makakita sa ilang gibuhat. Di masayod ang katawhan nga buotan sila og kugihan motabang. Mao nay rason i-FB gyod. This posting includes an audio/video/photo media file: Download Now

Talk to Papa Joe: Maorag di inahan Posted: 17 Aug 2021 06:35 AM PDT Dear Papa joe, Angay ba ko nga motukol sa akong mama nga hawod ka maldita? Bata pa ko sige lang ko niya bunalan. Ako diay si Gina, 25 years old. Hangtod karon, sayonsayunon lang ko niya og kasaba ug ingnon nga way ayo, way ikabawos. Wala diay koy papa ug wa sad ko makaila-ila niya kon kinsa siya kay tak-um ang baba sa akong mama. Bisan gani akong mga paryente wa gyud masayud kinsa akong amahan kay wa man sad sila makakita ni Mama nga nag-uyab-uyab sa una. Karon, plano nakong mo layas sa amoa ug mokuyog sa akong uyab. Mag live in na lang mi kay sa magpuyo ko nga naa sa poder sa akong inahan. Wa na koy plano makigkita niya. Sakto ba akong buhaton? GINA Gina, Ang inahan o amahan bisan balibalihon ug di lang law-ay ang gibuhat niini, ginikanan lang gihapon nimo. Siguro maldita si Mama nimo kay naay lawom nga rason na basin maglisod siya og sulti niini. Ako ni nasulti kay basin unwanted child ka since niingon ka nga way bisan usa nga nakaila kay way uyab si Mama nimo busa way nakaila kon kinsa gyud ang imong amahan. Basin biktima si Mama nimo sa pangabuso ug ikaw ang resulta maong init iyang ulo nimo. Ang problema di masulbad og laing problema. Huna-hunaa pag-ayo. Basin sad og magmahay ka makig live in tungod lang anang rasona. PAPA JOE (sa inyong tampo ipadala lang sa papajoesuperb@gmail.com) This posting includes an audio/video/photo media file: Download Now

Basil: Daghan ang nag-worry kang Yorme Posted: 17 Aug 2021 06:22 AM PDT Manila---Sad ako sa nahitabo kang Manila City Mayor Isko Moreno tungod kay isinugod siya sa ospital gumikan sa Covid. Daghan ang nag-worry sa iyang kahimtang ug daghan ang nag-ampo nga makalingkawas siya sa iyang balatian karon tungod kay siya ang amahan sa Manila. Exposed si Yorme sa daghang tawo kay bisan og pandemic way kahadlok siya nga makig-abi-abi sa katawhan hilabi na ang iyang constituents. Nasayod ako nga fully vaccinated na si Isko (Sinovac) so dinhi mapamatud-an nga dili jud siyento por siyento nga porke't bakunado ka e di ka na taptan og Covid Sa laing bahin, nasa post production na ang pelikulang "Yorme" nga giingong political propaganda kini sa napabalitang pagdagan ni Isko pagka-pangulo pero matod pa sa mga kaubanang press nga nakatan-aw sa raw files, di naman daw ito propaganda, istorya talaga kini sa buhay niya from being a basurero, artista hangtod sa politika. Plano nilang isalmot sa Metro Manila Film Festival ang Yorme pero inkasong pulitikahon kini, may Plan B ug Plan C naman sila. GIPADAKO SA GAY COUPLE Sa dihang gibandilyo ni Simone Nadine Bornilla, kandidata sa Miss Universe Philippines, nga ang nagpadako kaniya, gay couple, daghan ang naging interesado kang Simone nga ang probinsiya sa Mindoro ang gi-representar. Doctor ug usa ka pageant organizer ang "parents" ni Simone. Pinay na Pinay ang beauty ni Simone ug stand-out siya sa Miss Universe kung siya ang modaug sa Miss Universe Philippines. Good luck, Simone! This posting includes an audio/video/photo media file: Download Now

Balay-Balay, Tubig-Tubig: Tahas sa ginikanan Posted: 17 Aug 2021 06:21 AM PDT Extended ang modified enhanced community quarantine (MECQ) Dakbayan sa Sugbo ingon man sa mga siyudad sa Mandaue ug Lapu-Lapu hangtod sa Agusto 31. Mao sad ang kasinatian sa 11 ka mga lokal nga kagamhanan sa lalawigan sa Sugbo human masayri nga gatusan ka mga kaso sa Covid-19 ang natala matag adlaw karong buwan sa Agusto. Kini maoy hinungdan nga dunay executive orders (EO) nga gipakanaog ang matag panguo sa mga dakbayan ug lungsod ingon man ang bag-ong mando gikan sa kapitolyo alang sa mga sakop nga LGUs niini. Kon sa dakbayan sa Sugbo ang hisgutan, Oplan Puyo maoy mando ni Acting Mayor Michael L. Rama nga dunay 42 ka sections nga nagpatin-aw kon unsay angay himuon sa mga molupyo sa dakbayan samtang gipaubos sa MECQ. Dakong bahin sa Oplan Puyo o ang Executive Order No. 137 mao ang pagsigurong luwas ang mga bata ug kabataan batok sa Covid-19. Subay kini sa obserbasyon nga nagkabata ang mga Sugbuanon nga nasakit sa Covid-19 subay sa datus gikan sa Cebu City Emergency Operations Center (EOC) ug sa mga pagtuon nga nagpakita nga walay gipili nga pangedaron ang Covid-19 virus labaw na sa pagtumaw sa mga bag-ong porma sa virus sama sa Delta variant. Gimandoan ang tanang residente sa Cebu City nga magpabilin sa ilang panimalay gawas kon naapil ka sa mga indibidwal nga gitugutan nga makagawas sama sa medical practitioners, mga empleyado sa gobyerno, ug mga tawo nga mangompra og "essential" o importanteng palitunon sama sa pagkaon ug tambal. Kinahanglan sab nga ipaubos sa Covid-19 testing sa dili pa i-detain o ibutang sa Operation Second Chance Center ang mga children in conflict with the law (CICL). Dakong responsibilidad ang gihatag ngadto sa mga ginikanan, mga nanguo sa matag pamilya, ug katong mga tawo nga dunay kustodiya ug parental authority sa mga menor de edad. Gimando sa Oplan Puyo nga responsibilidad sa mga ginikanan ang pagpabilin sa mga bata sulod sa panimalay. Ang mga ginikanan maoy manubag kon ang ilang mga bata makasupak sa "Stay-at-Home" order ubos sa maong executive order. Dugang responsbilidad sa mga ginikanan mao ang pag-supervise sa household lockdown. Lakip sa mga buluhatonon sa mga ginikanan mao ang pagsusi sa mga lakaw sa matag myembro sa panimalay, pagbadlong sa panagtapok gawas sa ilang panimalay, pagpabilin nga limpyo ang panimalay, ug pagpahibalo dayon sa barangay health worker (BHW) kon dunay gisuspetsaang kaso sa Covid-19 sa ilang panimalay. Sa pamahayag sa panguo sa kapolisan sa Cebu City Col. Josefino Ligan ngadto sa SunStar Cebu, anaa sa usa ka libo pesos (P1,000) ang multa sa mga molapas sa executive order. Inay nga mubayad sa multa, mahimo sab nga mag-community service ang mga nakalapas sa Oplan Puyo lakip na niini ang pagsupak sa parental-supervised household lockdown. Dili malalis nga ang tumong ug tinguha sa Oplan Puyo mao ang pagmenos sa kaso sa Covid-19 sa dakbayan ug pagpanalipod ang matag usa kanato batok sa virus labaw nga nga gatusan na ka mga biktima ang mitaliwan na tungod sa maong sakit karong buwana. Hagit karon sa Cebu City Government mao ang pagpanubag sa mga ginikanan nga masakpan nga dunay kalapasan sa mga tahas nga gipakanaog kanila. Dugang pagpatin-aw mao nga walay balaod sa atong nasod nga naghatag og silot ngadto sa mga ginikanan nga dili makabuhat sa ilang mga responsibilidad sa pagpakunhod sa Covid-19 sa ilang komunidad. Hilom ang child protection laws ug uban pang criminal laws sa Pilipinas sa maong matang. Kon duna man ganiy responsibilidad ang mga ginikanan sa danyos nga nahimo sa anak, civil liability lang ug dili multa o pagkabalhog maoy atubangon nila subay sa Family Code ug mga desisyon sa Korte Suprema. Angay pod tan-awon sa mga naghimo sa Oplan Puyo ang kamatuoran nga giatubang sa ubang pamilya sama sa mga ginikanan nga essential workers karong pandemic nga maglisod og pag-monitor. Kinahanglang hinumduman sab sa law enforcers nga gipanalipdan ang mga bata nga makalapas og curfew o quarantine violations subay sa kasamtangang balaod ug polisiya. Lakip na niini ang pagpasabot sa mga opisyal sa barangay o kapolisan ngadto bata sa pinulongan nga masabtan niini kon ngano kinahanglan siya dad-on sa barangay human sa nasayrang kalapsan; paglikay sa pagpakita og armas ug posas sa bata ug paggamit og pwersa kon wala kini gikinahanglan sa sitwasyon; ug pagpahibaw dayon ang mga ginikanan o guardian sa bata sa insidenteng gikalimbigitan sa bata. Sa panahon nga nag-abot ang mga bug-at nga palas-anon tungod sa pag-atubang sa pandemiya, hinaot nga magtinabangay kitang tanan nga mahimong gaan ang kinabuhi sa matag Sugbuanon pinaagi sa pagpatuman og makaangayon nga mga polisiya ug kooperasyon sa mga Sugbuanon. This posting includes an audio/video/photo media file: Download Now

Pacquiao moaway pa’g balik sa 2021 Posted: 17 Aug 2021 06:21 AM PDT Ning bag-uhay lang, nipabuhagay si Filipino boxing icon Manny Pacquiao nga posibleng katapusan na niyang away ang pagpakigbatok kang World Boxing Association (WBA) welterweight champion Yordenis Ugas karong Agusto 22, 2021 (RP time) sa Las Vegas apan lahi ang pamahayag sa iyang kampo. Si Sean Gibbons, presidente sa gipanag-iya ni Pacquiao nga MP Promotions, mihatag og kaseguroan nga dili pa moretiro ang Pambansang Kamao ng Pilipinas, gani posibleng moaway dayon kini'g balik sa dili pa mahuman ang tuig 2021. "The good thing is, it's not over," matod ni Gibbons sa interbyu sa "Power and Play" radio program. "You don't look past the fight, but it's definitely not over. This fight ends, this fight is over, he wins, he's looking to get right back in that ring, October, November, before he has to move on to the next phase of his career." Matod ni Gibbons nga bisan nag-edad na og 42 ang 8-division world champion, aduna gihapon kini saktong ikabuga basi sa gipakita niini sa training. "I'm amazed because... every day it's something new. The guy is an encyclopedia of boxing," paghulagway ni Gibbons kang Pacquiao. "He's preparing harder for this fight than he did for the Keith Thurman fight. I'm in awe of the guy, because the guy knows his business, he knows his body, he knows the sport." Si Ugas maoy gihulip sa orihinal nga kontra ni Pacquiao nga si American Errol Spence Jr., kinsa kalit lang miatras sa away tungod kay naangol ang mata niini. Hinuon wala kini nagpasabot nga kuwang sa preprasyon si Ugas nakatakda man unta kining moaway sa undercard sa Pacquiao-Errol kon wala pa miatras si Errol. (ESL) This posting includes an audio/video/photo media file: Download Now

Hidilyn molarga sa Malaysia aron mangandam sa World event Posted: 17 Aug 2021 06:20 AM PDT Human niya nahatag ang labing unang Olympic gold medal sa Pilipinas sa miaging Tokyo Games sa Japan, padayon si weightlifter Hidilyn Diaz sa iyang tinguha nga makahatag og dakong dungog alang sa nasod. Ang lumad nga taga Zamboanga City nangandam na sa iyang paglarga og balik paingon sa Malaysia aron mangandam og sugod alang sa World Championships nga gikatakda sa Nobiyembre 2021 sa Lima, Peru. Sa Malaysia nag-training si Diaz alang sa iyang malampusong kampanya sa Tokyo Olympics. "She is going back to Malaysia and will train again with Julius [Naranjo]," matod ni Samahang Weightlifting ng Pilipinas (SWP) president Monico Puentevella nga napatik sa www.gmanews.tv. "In September, she'll be back in Malaysia for the world championships in November in Peru because she wants to get a medal there." Mosalmot sab si Diaz sa Vietnam Southeast Asian Games ug 2022 Asian Games sa China. Apan asoy ni Puentebella nga wala pa'y pinal nga desisyon si Diaz kon mokampanya ba kini sa 2024 Paris Olympics. Giklaro ni Puentebella kon unsa'y desisyon ni Diaz, ilaha kining hatagan og saktong suporta. Kon makadesisyon si Diaz nga moretiro, gipaneguro ni Puentebella nga ilaha kining tanyagan nga mahimong headcoach sa national women's weightlifting team. "In this Paris, I am looking at four weightlifters and including Hidilyn, we have five. But if ever she retires, I will make her the national women's coach," pasabot ni Puentevella.(ESL) This posting includes an audio/video/photo media file: Download Now

Casimero vs. Donaire posible sa November Posted: 17 Aug 2021 06:15 AM PDT Tinguha sa kampo ni World Boxing Organization (WBO) bantamweight champion Filipino Johnriel Casimero nga makabawi dayon gikan sa makalaay nga away batok kang Cuban Guillermo Rigondeaux. Ang MP Promotions, nga maoy nagdumala ni Casimero, misugod na paghimo og lakang aron makaaway og balik ang lumad nga taga Ormoc City, Leyte karong Nobiyembre o Disyembre ning tuiga. Matod ni Casimero nga milihok na si MP Promotions president Sean Gibbons aron mahan-ay ang iyang gitinguha nga All-Filipino unification bout batok kang World Boxing Council (WBC) bantamweight king Nonito Donaire. "Mas maganda ito, kasi hindi siya tatakbo, susugal na siya ng suntukan. Maganda na iyan," batbat ni Casimero sa interbyu sa www.philboxing.com. Giangkon ni Casimero nga wala'y ayo ang iyang away batok Rigondeaux niadtong Agusto 15, 2021 (RP time) sa Carson, California gumikan kay nagsige ra og dagandagan ang 40 anyos niyang kontra. "Takbo ng takbo talaga, ayaw niya makipag-sabayan sa atin. Sabi niya sa interview na gusto niyang makipag-sabayan at tingnan daw sa laban, wala naman nangyari," batbat ni Casimero. Niini, gustong mobawi si Casimero pinaagi sa pagsagubang og saktong binukbokay nga away ug gusto niyang unahon si Donaire dayon si Japanese Naoya "Monster" Inoue, ang tag-iya sa World Boxing Association (WBA) ug International Boxing Federation (IBF) bantamweight titles. "This is our plan, three people. First, Rigondeaux is finished, Second Donaire and next Inoue," pagtino ni Casimero. Kon buot hunahunaon, mas una untang nahan-ay ang away ni Casimero batok kang Donaire ug Inoue apan parehong ning-atras ang Filipino Flash ug Monster sa managlahing mga rason. Wala motuo si Casimero sa mga rason nila ni Donaire ug Inoue. Alang kang Casimero, nahadlok lang sila si Donaire ug Inoue nga makigbatok kaniya. Hinuon, dako ang poruhan nga madayon ang gipangandoy nga away ni Casimero gumikan kay dili ikalimod nga giatangan kini sa boxing fans sa tibuok kalibutan. (ESL) This posting includes an audio/video/photo media file: Download Now

Mga taga Talisay gitugtan og leisure biking Posted: 17 Aug 2021 04:30 AM PDT LAHI sa Dakbayan sa Sugbo, si Talisay City Mayor Gerald Anthony "Samsam" Gullas nagtugot sa mga residente sa dakbayan sa pagbiseklita nga lingalingaw ug ehersisyo. Apan ang mga taga Talisaynon ra ang gitugtan, di ang mga taga laing dapit, labina sa mga taga Dakbayan sa Sugbo. Iyang gidid-an ang ubang mga taga laing dapit sa pagsulod nga magbiseklita kay nabalaka siyang di na masunod ang social distancing, labina sa tiilan sa Manipis road nga maoy tapukanan sa mga siklista. Ang Manipis road maoy paboritong rota sa mga mahiligon sa biseklita gikan sa nagkadaiyang mga dapit sa Sugbo, labina sa pagsugod sa pandemic. "Pero for now, we will allow leisure biking. But only Talisay City residents will be allowed to bike along our popular biking routes for the duration of the MECQ. Ang Cebu City wala na mosugot og leisure biking sa syudad, so possible kaayo nga ari na sila mang-bike sa Talisay which will cause overcrowding napud in areas of convergence nato sa Manipis route," matod ni Gullas sa iyang Facebook post. Apan kon mabantayan nila nga naay mga tapok sa mga biker nga kalapasan sa health protocol nga gitumong aron di makakatap ang kagaw sa coronavirus disease 2019 (Covid-19), mapugos siya sa pagsunod sa rekomendasyon sa kapulisan nga pagdili sa leisure biking. Ang Dakbayan sa Talisay usa sa mga dapit sa Lalawigan sa Sugbo nga ubos sa modified enhanced community quarantine hangtod sa Agusto 31, 2021. (REV) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States