https://www.sunstar.com.ph/ |
- Nagbikil sa yuta, 2 gitigbas
- Pagbakuna sa OFWs gilusad
- 'Way bakuna, way ayuda' gipaklaro
- Babaye gipusil sa ka-video call
| Posted: 19 Aug 2021 04:11 AM PDT ANAA na sa luwas nga kahimtang ang duha ka mga lalaki human gipanigbas sa ilang nakabikil nga silingan alas 2 sa hapon niadtong Sabado, Agosto 14, dito sa Barangay Communal, Buhangin District, Davao City. Si Police Major Jerome De Guzman, ang hepe sa Mandug Police Station, nag-ila sa mga suspek nga sila Alberto, Bernabe, Oscar, (magsuon) ug ang usa ka Moises, 57-anyos. Sa inisyal nga imbestigasyon sa Mandug Police nasayran nga naukay ang daan nga bikil sa magsilingan dihang nagkita sila sa ilang nataran. Away sa yuta ang anggulo sa hitabo nga maoy hinungdan sa pagtigbas sa duha ka biktima nga sila Egmideo ug laing usa ka Bernabe. Human sa hitabo, daling nasikop ang mga suspek samtang ang mga biktima gilayong gidala sa Southern Philippines Medical Center alang sa medikasyon.  This posting includes an audio/video/photo media file: Download Now |
| Posted: 19 Aug 2021 04:10 AM PDT ARON nga mas mahimong luwas batok Covid-19 ang mga overseas Filipino workers (OFW) sa ilang pag-uli sa Pilipinas labi na sa Davao City, ang Marino Partylist mihimo og usa ka vaccination drive sugod niadtong Miyerkules sa Matina Town Square (MTS), McArthur Highway, Matina, Davao City. Una niini, mihangyo ang mga OFW sa lokal nga kagamhanan sa Davao City nga unta mahatagan sila og prayoridad sa pagbakuna labi na nga puhon sa ilang pagbalik sa abroad, mangita na gyod og proof of vaccination ang mga employers. Target karon sa maong vaccination drive nga mabakunahan ang mokabat sa kapin kun kulang 5,000 ka mga OFW nga taga Davao City. Moderna vaccines ang gihatag sa mga OFW sa unang adlaw sa bakuna, apan magdepende na sa sunod nga mga adlaw og unsa nga bakuna ang available. Anaa sa 500 ka mga sea-based ug land-based OFW ang makabenepisyo sa OFW vaccination kada adlaw hangtud Septyembre 2, 2021. (Jeepy P. Compio)  This posting includes an audio/video/photo media file: Download Now |
| 'Way bakuna, way ayuda' gipaklaro Posted: 19 Aug 2021 04:07 AM PDT GITIN-AW karon sa Department of Social Welfare and Development (DSWD)-Davao Region nga walay kamatuoran ang mga nanggawas nga impormasyon nga di na kadawat og ayuda ang mga miyembro sa 4Ps kung wala nakapabakuna. Kini ang gihatagan og katin-awan sa maong ahensiya diin subay sa ilang gipagula nga pamahayag sa ilang official Facebook page. Una niini, migula ang report nga makaltasan ang dawatong pinansiyal nga ayuda sa mga Pantawid Pamilyang Pilipino Program (4Ps) beneficiary kung wala pa sila makapabakuna kontra Covid-19. "Ang tanang basehan sa ilahang pagka-benepisyaryo mao ang mga nahisulat ug nasabutan diha sa ilahang mga conditionalities sa pagsulod nila sa programa," suma sa advisory sa DSWD-Davao. Dugang pagpaklaro sa ahensiya nga walay apil ang ginahimong A5 vaccination rollout sa mga benepisyaryo diin madawat nila ang ilang ayuda bisan og wala pa makapabakuna. Apan gidasig sa ahensiya ang matag beneficiary nga i-avail ang pagbakuna subay sab sa kampanya sa nasyonal nga gobyerno nga makab-ot ang herd immunity. "Proteksyon sab kini labi na sa atong mga minahal sa kinabuhi nga labing bantayanan ang estado sa panglawas, sama sa atong gagmay nga bata, mga katigulangan, ug ang mga masakiton," panapos sa DSWD-Davao. (Jeepy P. Compio)  This posting includes an audio/video/photo media file: Download Now |
| Babaye gipusil sa ka-video call Posted: 19 Aug 2021 03:19 AM PDT KIDAPAWAN CITY -- Grabe ang kahimtang sa usa ka babaye nga giingong gipusil sa iyang ka-video call alas 9:00 sa gabii, Miyerkules, Agosto 18. Giila ang biktima nga si Chona Casicnan Janea, 42, biyuda ug molupyo sa Barangay Poblacion, Makilala, North Cotabato. Sa taho gikan sa Makilala Municipal Police Station, nasayran nga dunay ka-video call sa iyang cellphone ang biktima didto sa iyang balay. Milabay ang pipila ka gutlo, mitawag sa cellphone sa biktima ang iyang ka-video call ug buot makigkita. Sa dihang migawas ang biktima sa pultahan sa iyang balay, gisugat kini sa duha ka wala mailhing tawo ug gipusil gamit ang kalibre .45 nga pistola tumong sa ulo ug dughan. Daling gitabang ang biktima sa iyang pamilya ug gidala sa balay tambalanan ug giingong 50/50 ang kahimtang niini. Samtang mga suspek daling misibat paingon sa direksiyon sa Kidapawan City. Padayon pang gisubay sa kapulisan ang maong hitabo aron nga matumbok ang mga suspek ug madakpan. (Edgar E. Fuerzas)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment