https://www.sunstar.com.ph/

---

• Soc Fernandez naluwas sa helmet
• Basil: Grupong BINI ugBGYO adunay concert
• Pamilya sa napaso nga ginang nga namatay 'wa motugot' sa operasyon
• Acot di na person of interest sa Fernandez killing
• Grand opening na sa CCMC sa Septiyembre 18
• Managsuon gipang-salvage sa Balamban
• Lapu-Lapu dili pa andam sa dine-in sa restaurants
• Taga Pasil sa Cebu City nasikop atol sa buy-bust sa Lapu
• Hinabang sa paglubong giaprobahan ni Labella
• Ginang patay, kapuyo kritikal human balay naligiran og dakong bato
• Super Busog: Balbacua
• Beer, gatas magsagol
• Tambagi ko Noy Kulas: Nabayot
• Albor: Imperial Manila

Soc Fernandez naluwas sa helmet Posted: 03 Sep 2021 06:17 AM PDT ANG pagsul-ob og helmet samtang nagsakay o nagmaneho og motorsiklo makatabang gyud sa pagluwas sa kinabuhi. Mao kini ang napamatud-an ni kanhi Talisay City mayor ug karon Konsehal Socrates Fernandez human siya ni-survive dihang naligsan ang iyang ulo samtang nagsakay og motorsiklo sa Cebu South Coastal Road sa Barangay San Isidro sa Huwebes sa hapon, Septiyembre 2, 2021. Si Fernandez nisulti sa traffic enforcers nga siya padung sa Barangay Tabunok aron pagtambong sa alas 5:30 sa hapon nga misa dihang ang nahitabo ang aksidente. Ang driver sa truck nga si Andrelle Billones nisulti kang City of Talisay Traffic Operation and Development Authority (CT-TODA) chief Jonathan Tumulak nga nakakita siya kang Fernandez nga nagmotorsiklo pipila ka minutos sa wa pa ang aksidente. Si Billones niingon nga samtang siya nag-abante, si Fernandez kalit nga nisulod sa tuo nga habig sa iyang trak bisan sa kagamay sa gap tali kaniya ug sa babag sa dan nga gibutang kay dunay gitrabaho sa karsada, Kini niresulta sa pagkabangga ni Fernandez sa kilid sa trak sa wa pa siya mawagtangi sa panimbang ug natumba ilawom sa sakyanan. Kon wa pa ang helmet ni Fernandez, hayan nabuak ang iyang ulo. Tungod sa helmet, na-slide ra ang ligid dihang nakaligis sa ulo ni Fernandez. Daling nisusi kang Fernandez ang mga traffic enforcer, apan nitindog siya ug nisulti nga wa siya maunsa ug nipadayon siya sa pag-adto sa Tabunok aron pagtambong sa misa sa St. Joseph the Worker Parish. Si Billones nga gidala sa mga traffic enforcer sa CT-TODA gibuhian mga alas 6 pasado sa gabii, matod ni Tumulak kay wa moreklamo si Fernandez. Igo rang nisulti si Fernandez nga i-blotter lang ang hitabo. "Hibawo man ka sa kanhi mayor, diyosnon man kaayo na. Ingon ra man siya nga i-blotter lang na," matod ni Tumulak sa Superbalita Cebu. Si Billones nisulti kang Tumulak nga nakabantay na siya nga dunay motorsiklo sa kilid sa iyang trak. Iya kining gisuwayan sa paglihay dihang niabante na siya kay go signal, apan naigo gyud sa parte sa trak. Si Billones padung sa lungsod sa Balamban aron mag-deliver og gasolina. Matod ni Tumulak nga puno sa kargang gasolina ang trak ni Billones. KAINGOG ORAS NA Sa usa ka Facebook message, si Cebu Archdiocesan Commission of the Laity (COL) chairman Fe Barino niingon nga nakigsulti siya kang Fernandez sa Biyernes, Septiyembre Sept. 3. Si Fernandez nisulti kang Barino nga dihang siya natumba sa yuta, nagtuo na siyang mamatay na siya. "Immediately after his fall, matod pa niya, mura siya ug bola nga mi rebound, just in time nga wala siya maligsi sa ligid sa dakung truck," matod ni Barino said, nga niasoy sa gisulti ni Fernandez kaniya. Si Fernandez nisulti ni Barino nga duna lang siyay gamay nga mga garas sa lawas. Sa usa ka pamahayag, si Lisa, asawa ni Fernandez, nagpasalamat sa mga tawo nga nitabang sa iyang bana. Iya usab nga gipasalamatan si Talisay City Mayor Gerald Anthony "Samsam" Gullas nga daling nakapadala og emergency responders sa masusi ang kondisyon sa iyang bana human sa aksidente. (dugang taho ni REV) This posting includes an audio/video/photo media file: Download Now

Basil: Grupong BINI ugBGYO adunay concert Posted: 03 Sep 2021 05:55 AM PDT MANILA--Bisan og pandemic apan dire-diretso ang practice sa grupong Bini nga ang mga miyembro puro mga talented ug gwapang Pinay. Aduna pay beauty queens pa ug ang ilang first single nga "Born To Win" mikabat na og almost 1M ang views sa YouTube. Samtang ang male counterpart nila, ang BGYO nga parehong under sa Star Magic, mingharos sad ang single nga "The Baddest" ilabi na sa Next Big Sound Chart sa Billboard og siyempre sa Youtube. Dungan nga gisulod sa sibling group ang dalan paingon sa katumanan sa ilang mga damgo hangtud sa nahimo silang inilang P-Pop group sa Pilipinas. Nagbunga ang ilang kakugi tungod kay may concert na ang duha nga giulohan og "One Dream: The Bini X Bgyo Concert" nga makita sa tibuok kalibutan pinaagi sa KTX.PH sa Nobiyembre 6 and 7. Matan-aw sad kini sa IWantTFC ug TFC IPTV. First time siguro in history nga sa two nights concert dili ibalik ang ilang mga awit. Ang mga kanta sa first night dili nila usbon on the second night meaning, lahing performance ang ilang ipakita, lahing kanta sa second night so ma-imagine nato kung gaano ka rigid ang ilang rehearsals. Mapalit na ang ticket sa nahisgutgang concert sugod sa Agosto 31. Mapalit ang SVIP tickets worth P1,950 para mapanood ang duha ka shows og makaapil sa fan meet sa KTX.PH. Available sad ang VIP tickets sa KTX.PH, iWantTFC, at TFC IPTV for P1,490 aron matan-aw ang parehong shows. Adunay special early bird promotion para sa VIP tickets gikan sa Agosto 31 hangtud sa Septiyembre 2. Ang sayong mopalit makatan-aw sad sa duha ka shows sa espesyal nga presyong P999 lang. Sa dili pa ang joint concert sa Nobyembre, ipagawas sa BINI ug BGYO ang full-length debut albums nila nga puro original ang sud. Nagpakitang-gilas sad ang pipila ka miyembro nga mag-compose og kanta para sa albums nila. Pagkatapos ng "Born to Win," mapaabot sa fans ang ikaduhang single sa BINI karong Setyembre bago ang release ng buong debut album nila sa Oktubre. Nagpadayon naman sa pag-promote ang BGYO ang ilang kantang "The Baddest" before i-launch ang album nila sa Oktubre. Ngayon pa lang, mainit na ang pagtangkilik ng madla sa "The Baddest" tungod kay ang music video nila nga nag-trend worldwide sa YouTube at nag-number sad ang track sa iTunes Philippines. Alang sa dugang updates sa BINI og BGYO at sundan ang BINI.ph at BGYO.ph sa Facebook, Twitter, at Instagram, o mo-subscribe sa official YouTube channels nilang BINI Official at BGYO Official. This posting includes an audio/video/photo media file: Download Now

Pamilya sa napaso nga ginang nga namatay 'wa motugot' sa operasyon Posted: 03 Sep 2021 05:55 AM PDT SUSIHON sa pamilya ni Malo Galinato Pailden kon duna ba silay napirmahang waiver alang sa ikaduhang operasyon sa ginang sa Vicente Sotto Memorial Medical Center (VSMMC) kay wa sila mosugot nga ipailawom kini sa ikaduhang operasyon. Si Lemuel Galinato, manghod nga lalake ni Malo, niingon nga sumala sa ilang nahinumdoman, wa sila motugot sa ikaduhang operasyon nga gipahigayon sa Huwebes sa hapon, Septiyembre 2. Ang operahan mao ang buko-buko sa iyang maguwang nga dunay grabeng mga paso. Matod ni Lemuel nga nabalaka sila kay niadto pa lang Miyerkules naoperahan usab kini sa iyang mga paso sa kamot ug tiil. Ang banay nga Galinato nakugang na lang nga gipahibawo sa ilang iyaan nga si Melody Torrejos, kinsa nagbantay kang Malo, nga namatay ang iyang maguwang nianang kaadlawon sa Biyernes, asoy ni Lemuel. Sa gipakitang death certificate sa pamilya sa Superbalita Cebu, ang namatyan ni Malo mao ang "acute coronary syndrome, myocardial infarction" kun atake sa kasingkasing. Nakabutang usab sa death certificate nga siya "Covid-19 positive" sumala sa laboratoryo. Matod ni Lemuel nga gisakitan kaayo sila sa nahitabo ni Malo busa ilang susihon aron kon duna may manubag sa kamatayon, ila kining ireklamo. Matod niya nga maayo pa kaayo ang iyang maguwang nga gikaestorya busa nakugang sila sa kalit nga kamatayon sud sa tambalanan. Si Malo daling gilubong sa Biyernes sa hapon sa usa ka pribadong sam-ang nga giputos og maayo ang lawas ug wa ablihi ang lungon. Si Malo napaso sa pagluwas sa iyang mga anak sa sunog niadtong Agusto 23, 2021 sa Little Village, Barangay Basak, Dakbayan sa Lapu-Lapu.(REV) This posting includes an audio/video/photo media file: Download Now

Acot di na person of interest sa Fernandez killing Posted: 03 Sep 2021 05:44 AM PDT GIWAGTANG na sa Special Investigation Task Group (SITG) isip person of interest ang babayeng real estate agent nga kauban ni manlalaban Rex Fernandez sa sulod sa sakyanan sa dihang gi-ambush sa miaging semana sa duha ka mga lalake sa dalan Duterte, Banawa, Barangay Guadalupe, Dakbayan sa Sugbo. Si Rosinda Acot daling nipatim-aw sa Cebu City Police Office (CCPO) sa dihang gikonsidera siya nga person of interest sa kamatayon ni Fernandez tungod kay wa mokooperar sa imbestigasyon sa kapulisan. Siya ang nakita sa video nga migawas sa sakyanan ni Fernandez dala ang mga personal nga butang sa manlalaban, lakip na ang cellphone niini. Matod ni Police Lieutenant Colonel Wilbert Parilla, deputy city director for operations sa CCPO, niluwat nag pinanumpaang pamahayag si Acot. Dinhi nasuta nga nagkaila sila ni Fernandez sanglit kliyente niya ang biktima human mikuha og unit sa Apple 1 condominium. Nahibaw-an na usab kon asa sila paingon nga wala lang una ipahibawo ni Parilla samtang nagpadayon pa sila sa pagkuha og mga ebedensya. "Kato si Acot is already eliminated as the person of interest considering nga nakig coordinate o naghatag na siya og statement. Reason nganong naa siya didto kuyog siya kay si Attorney is her client," matod ni Parilla. Si Acot giingong broker sa Apple 1 condominium diin ang manlalaban mikuhag unit. Human giwagtang sa listahan si Acot sa person of interest, ilang gihulip ang upat ka mga personalidad nga opisyal sa Bamboo Bay condominium nga ginganlan ni Fernandez sa iyang Facebook account nga maoy pasanginlan kon mapatay siya. (AYB) This posting includes an audio/video/photo media file: Download Now

Grand opening na sa CCMC sa Septiyembre 18 Posted: 03 Sep 2021 05:44 AM PDT ANDAM na ang bag-ong Cebu City Medical Center (CCMC) alang sa grand opening sa unang tulo ka andana nga ipahigayon sa Septiyembre 18, 2021. Kini ang gipahibawo ni CCMC hospital administrator Yvonne Cania, kinsa nihulagway nga makaatiman og 200 ka mga non-Covid patients ang tambalanan sa higayon nga makabuylo na sa operasyon human sila naka-soft opening niadtong Agosto 19. "Lahi na gyud ang CCMC karon. Naa natay heavy duty nga X-ray, CT scan ug sa pipila ka buwan ato na sab mataod atoang Magnetic Resonance Imaging (MRI)," matod ni Cania. Si Ruel Tahum, assistant department head for operation sa Department of Engineering and Public Works (DEPW), nagkanayon nga sa Septiyembre 15, mahuman na sila og trabaho sa unang tulo sa 10 ka andana nga CCMC. Ang CCMC adunay duha ka pribadong contractor nga maoy nagtrabaho sa upper ground ug second floor. Gihulagway ni Tahum nga anaa na sa 90 porsyento ang completion sa ilang trabaho sanglit finishing touches na lang ang ilang giatiman sama sa pagkumpleto sa bintana, kisame, pintal ug ubang ginagmay nga trabahuon. Ang lower ground gitrabaho sa DEPW labi na sa Covid ward nga makaatiman og 40 ka mga pasyente apan gisigurado nga dili exposed sa ubang ward sa tambalanan. Kumpleto na usab ang pag-istalar sa tubig ug electrical wiring aron mosiga ang mga suga, moandar ang mga air-conditioner ug ang mga ekipo nga gamiton sa hospital. Si City Administrator Floro Casas Jr., nagkanayon nga ang administrasyon ni Mayor Edgardo Labella maoy mopahuman sa 10 ka andana nga CCMC. Sa mosunod nga mga buwan, ipaubos na sa public bidding para mapadayon ang construction sa ikapito hangtod ika-10 nga andana gamit ang P1 bilyon nga pundo gikan sa Siyudad. Ang pagtrabaho sa CCMC gisugdan sa dihang mayor pa si Bise Mayor Michael Rama.(PAC) This posting includes an audio/video/photo media file: Download Now

Managsuon gipang-salvage sa Balamban Posted: 03 Sep 2021 05:39 AM PDT MANAGSUON nga missing niadtong Sabado, Agusto 28, 2021 napalgang patay sa alas 7:30 sa Miyerkules sa buntag, Septiyembre 1, 2021 sa pangpang Sitio Mauyog, Brgy. Sunog, lungsod sa Balamban. Ang magsuon gituohang gi-salvage. Si Richard Canonayon, 37, minyo, delivery boy, taga dan C. Padilla, Dakbayan sa Sugbo, baho na nga napalgan uban sa iyang igsuon nga si Richie, 39, minyo, delivery boy usab. Si Major Nolan Tagsip, hepe sa Balamban Police Station nga nahinabi sa Superbalita Cebu, nagkanayon nga ang mga asawa sa magsuon maoy ning-claim pagkagabii sa samang adlaw. Si Tagsip nagkanayon nga ang asawa ni Richard nga si Clair Jane, 31, nitug-an nga nawala ang magsuon niadtong Sabado. Ang mga biktima tig-deliver og liquefied petroleum gas (LPG) ug butane. Ning-duty ang duha sa ilang trabahoan sa Brgy. Poblacion, Dakbayan sa Talisay. Apan nakugang na lang sila kay naabtan sa Dominggo, wala na mahiuli sa ilaha sa dan C. Padilla. Gumikan niini, pagka Agusto 30, 2021, ilang gi-report sa kapulisan sa Talisay. Ilang nahibaw-an nga dunay nakit-an nga patay sa Balamban ug ilang nakunpirmar nga ang magsuong Canonayon. Matod pa ni Tagsip nga ang managsuon pulos dunay mga samad pinusilan sa ulo ug kalawasan. Ang ulo sa maguwang giputos og duct tape. Ang mga residenti sa lugar nibutyag nga Sabado sa gabii nakadungog silag sipang mga buto sa armas. Nahibulong nalang silang pag-abot sa upat ka adlaw, nanimaho ang dapit. Sa pagtan-aw nila sa pangpang nga 15 metros ang gilawmon, dunay mga lawas sa tawo. Matod ni Tagsip nga nagpadayon pa ang ilang imbestigasyon aron pagkuhag dugang background sa mga biktima. This posting includes an audio/video/photo media file: Download Now

Lapu-Lapu dili pa andam sa dine-in sa restaurants Posted: 03 Sep 2021 05:39 AM PDT GIBUTYAG ni Dr. Agnes Realiza, ang pangulo sa City Health Office (CHO) sa dakbayan sa Lapu-Lapu, nga sa iyang tan-aw dili paluwas sa pagkakaron ang pagtugot sa limited nga dine-in sa mga restaurant ug ubang kan-anan sa dakbayan ubos sa modified enhanced community quarantine (MECQ). Kini gumikan kay dili pa usab ingon ana ka ubos ang kaso sa coronavirus disease (Covid-19) sa dakbayan. Gibutyag ni Realiza nga sa milabayng tulo ka adlaw nagpabiling double-digit na lang ang kaso sa dakbayan itandi niadtong mga milabayng semana nga anaa sa triple digit. Apan gikonsiderar gihapon kini niya nga wala pa mo plateau sa pagkakaron busa dili gihapon angayang mokompiyansa. Nasayran nga sa pagkakaron adunay adlaw nga mosaka ug aduna usay adlaw nga moubos ang kaso sa Covid-19 sa dakbayan sumala ni Realiza. Sa pagkakaron, bugtong al fresco dining o paggaon sa open air pa lang ang gitugot sa dakbayan sa mga resturant ug ubang kan-anan. "Wala pa dili pa pero mag-agad man mi no sa amoang group nga kana bitawng mga consultant no unsay desisyon pero so far let's see the coming days kung moubos ba desayran na nato sa amoang Covid team kun unsa nay kabahin aning dine-in sa mga restaurants," matod ni Realiza. Gipahibawo usab ni Realiza nga nakahuman na usab sa 14 ka adlaw nga pag quarantine ang tanang closed contact sa 32 ka mga Delta variant nga kaso sa dakbayan ug wala usay nagrabehan niini o ba kaha nakalas. Wala na usay laing Delta variant nga natala ang dakbayan ning bag-ohay lang apan sa gihapon mipahinumdom sa katawhanan sa padayong pagtamod sa minimum health protocol niining panahon sa MECQ. Wala pa usay laing natala nga nagpositibo sa pagkakaron sa mga naka-close contact sa usa ka reporter nga giingong nakatambong og session sa konseho sa dakbayan niadtong Agusto 26. Apan kon ugaling aduna, hayan mobalik na usab sila pag-contact trace unya sa laing naka-contact sa magpositibo sa milabayng 14 ka adlaw isip standard operating procedure (SOP) sa kagamhanan. Nasayran nga ang ubang bahin sa Sugbo sa MECQ, sama sa dakbayan sa Sugbo. nluwat na og laing executive order (EO) nga nagtugot nga maka-dine-in na sa restaurants ang fully vaccinated nga kustomee ug ang crew usab human sa ilang bakuna. Apan magtamod gihapon sa health protocol nga katunga lang sa ilang kapasidad ang pasudlon uban sa pagsunod sa naandang protocol sa pagsul-ob og face mask ug face shield human sa pagkaon, gidili ang panagtabi atiuangan sa pagkaon lakip sa kanunay paggamit sa alcohol. (GCM) This posting includes an audio/video/photo media file: Download Now

Taga Pasil sa Cebu City nasikop atol sa buy-bust sa Lapu Posted: 03 Sep 2021 05:39 AM PDT NASIKOP sa City Intelligence Unit CIU sa Lapu-Lapu City Police Office (LCPO) ang usa ka street level individual (SLI) sa druga nga taga dakbayan sa Sugbo sa gilusad nga operasyon sa kapulisan sa Purok Balanghoy Brgy Gun-ob, dakbayan sa Lapu-Lapu, alas 9:50 sa gabii niadtong Septyembre 2. Ang dinakpan nailhang si Darhyl Lodonia Cruz alyas Dodz 23, molupyo sa dalan L Flores, Sitio Lawis, Brgy. Pasil dakbayan sa Sugbo. Nakuha gikan sa posisyon ni Cruz ang 1 ka pouch nga maoy gisudlan sa lima ka pakete sa gituohang shabu nga gibanabanang motimbang og 17.6 gramos ug mobalor og P119,680. Matod ni Police Lieutenant Noah Añana ang team leader sa operasyon ubos sa superbisyon ni Police Major Joey Bicoy nga ang dinakpan taudtaod nang gipanid-an sa kapulisan. Nilutaw ang pangalan niini sa ilang nangaging operasyon nga gisulti sa ma dinakpan. Giingong gikan usab sa bilanggoan ang contact ni Cruz kalabot sa supply sa illegal nga drugas nga iyang ihagbong sa dakbayan sa Lapu-Lapu. Subayon pa sa kapulisan kinsa kining maong mga personahe lakip na ang posibleng mga kauban usab ni Cruz sa iyang illegal nga kalihukan sa gidiling druga. (GCM) This posting includes an audio/video/photo media file: Download Now

Hinabang sa paglubong giaprobahan ni Labella Posted: 03 Sep 2021 05:39 AM PDT NIPAGAWAS si Cebu City Mayor Edgardo Labella og executive order (EO) number 139 para pormal nga paghatag og burial assistance ngadto sa mga mamatay sa coronavirus disease 2019 (Covid)-19 sugod sa Septiyembre 1, 2021 Si Konsehal Dave Tumulak, kinsa maoy nangusog para magahinan ni Labella og pundo ang mga nakalas sa virus, nagpasalamat sa mayor sanglit kini maoy panawagan labi na sa mga kabus nga pamilya. Mahimong mapahimuslan sa mga pamilya sa namatayan ang P16,000 nga package diin libre na ang lungon ug ubang serbisyo ug ang P35,000 nga cremation package. Ang City Government nigahin og P15 milyunes para sa maong programa nga gikuha gikan sa pundo sa Local Disaster Risk Reduction and Management Office ug sa Quick Response Fund ubos sa buhatan ni Ramil Ayuman. Ang gusto nga mopahimulos sa maong programa moduso lang sila og affidavit of undertaking gikan sa funeral parlor, death certificate diin makita kon asa nagpuyo ang namatay ug ang namatay adunay Covid-19 ug pirma sa doctor nga maoy nag-atiman sa pasyente sa wala pa namatay, barangay certificate, resibo gikan sa punerarya ug kontrata sa punerarya ug tagtungod. Ang Burial Office nga gipangulohan ni Andy Borres sa Cebu City maoy gimanduan nga mopatuman sa programa ug masiguro nga masunod amg mga provision sa EO. Ang buhatan ni Borres kinahanglan nga moduso sa iyang monthly report ngadto sa Office of the Mayor para sa monitoring. Dili na bag-o ang pagtabang sa City Government sanglit nihatag usab sila og tag P10,000 balor og tulo ka buwan ngadto sa health care workers sa pribadong tambalanan. Nihatag og P12 milyunes ngadto sa Department of Health (DOH) 7 ug wala pay labot sa ayuda nga gitunol ngadto sa libuan ka pamilya sa dakbayan dihang gipaubos sa enhanced community quarantine (ECQ). Samtang, si Labella nihapit og kadali sa City Hall kagahapon, Septiyebre 3, sa iyang ikaduhang adlaw sa iyang pag-leave. Si Atty. Joan Quiñanola sa City Mayor's Office, sa press conference sa Septiyembre 2, nagkanayon nga si Labella nipaubos sa personal leave. "Mayor Labella's leave is personal leave. For the details of that, we are not informed yet," matod ni Quiñanola. Sa Septiyembre 3, ang Public Information Office (PIO) ni-post sa hulagway ni Labella, kinsa nihapit sa City Hall executive building samtang nagsakay sa iyang sakyanan. Si City Administrator Floro Casas Jr. ug Chief of Staff of the Mayor's Office Mary Rose Lubino ninghangop sa mayor. Sa Memorandum No. 2021-408 pinetsahan og Septiyembre 1 nga giprimahan ni Labella, nagtudlo kang Rama siip acting mayor sulod sa lima ka adlaw. "Pursuant to the rules of succession as provided for under Republic Act. No. 7160, also known as the Local Government Code of 1991, and under relevant jurisprudence on this matter, you are hereby directed to exercise the powers and perform the duties of the mayor of the City of Cebu from Sept. 2-7, 2021 in a temporary/acting capacity," tipik sa memorandum. Sa memorandum walay saysay sa rason sa pag-leave sa mayor. Mao kini ang ikaunom nga pag-leave ni Labella ning tuiga. Ang mga unang niya kabahin kini sa kahimtang sa iyang panglawas. (PAC / JJL) This posting includes an audio/video/photo media file: Download Now

Ginang patay, kapuyo kritikal human balay naligiran og dakong bato Posted: 03 Sep 2021 05:39 AM PDT PATAY ang usa ka ginang ug kritikal ang kapuyo nga natulog human naligiran og dakong bato ang ilang balay sa Purok San Vicente Ferrer, Sitio Coacohon sa Barangay Dunggoan, dakbayan sa Danao, alas 3:50 sa kaadlawon kagahapon, Septiyembre 3. Si Janet Hermoso Lato, 36, namatay human mapisat sa bato nga gibanabanang moabot sa usa ka tonelada. Naangol ang kapuyo Si Niño Lee Tulod, 32, usa ka gwardiya sa kompaniya sa soft drinks, kinsa naa sa seryusong kahimtang. Si Police Lt. Col. Maria Theresa Macatangay, hepe sa Danao Police Station nga nahinabi sa Superbalita Cebu, nagkanayon nga si Konsehal Ramon Aguilar Jr., sa nahisgutang barangay maoy nipahibalo sa insidente sa ilang buhatan sa alas 10:00 sa buntag kagahapon. Matod ni Macatangay, daling girespondihan sa ilang mga SWAT personnel, imbestigador mga rescue team. Naabtan nila ang mga biktima nga napiit sa dakong bato nga naligid niigo sa ilang panimalay. Si Daisy Lato Capule, igsuon sa biktima, nibutyag nga samtang nahinanok sila pagkatulog sa kaadlawon, kalit lang silang naligiran sa dakong bato. Patay ang ginang ug grabe ang kapuyo, nga nadali sa mga Rescue Team sa Danao City. "Sigeg uwan-uwan unya nahumokan kanang bato nga naa sa bakilid, unya kalit nga naligid ug didto maigo sa ilang panimalay sa ubos," dugang ni Macatangay. Sumala pa niini, ang dakong bato niligod gikan sa 100 ka metros ug maayong pagkabungkag sa panimalay nga gama lang sa amakan ug semento nga balikid nga dapit. Ang mga biktima wala gyud magdahom nga maligid kadtong dakong bato. "Kusog naman kaayo ang pwersa sa bato napun-an ang kabug-aton pagka-igo sa ilang panimalay napiit ang biktima," matod ni Macatangay sa Superbalita Cebu. Dugang niini, ang maong dapit layo sab human nahimutang sa bukid ug nagkinahanglan pa sila og igong ekipo pagkuha sa mga biktima.(GPL) This posting includes an audio/video/photo media file: Download Now

Super Busog: Balbacua Posted: 03 Sep 2021 04:17 AM PDT Serves 6 to 8. Mga sagol: Set A: 1 ½ nga kilo sa tiil sa baka o ikog 10 ka tasa sa tubig o igo sa gikinahanglan 2 ka kutsara sa asin ¼ tasa sa annatto oil Set B: 1 ka buok tibuok ahos, gigagmay og hiwa 2 ka buok sibuyas bombay, gihiwa 1 ka dako nga luy-a, gidukdok 4 ka kutsara sa black beans 3/4 tasa sa Filipino style tomato sauce Set C: 1 ka gamay nga lata sa pineapple chunks ½ tasa sa peanut butter 2 ka buok red bell peppers, gihiwag strips 1 bugkos sa sibuyas dahunan, gihiwa sa gitas-ong 1-inch, ibilin ang green nga bahin kay gamiton 4 ka buok finger chilies, gihiwa og diagonal 1 ka putos sa seasoning granules 4 ka kutsara sa fish sauce Unsaon: A. Limpyohi ang ikog o tiil sa baka og maayo unya ibutang sa kaldero nga dunay tubig, nga dunay kolor sa annatto ug asin. Lutoa hangtod nga mohumok, mga lima hangtod sa unom ka oras, depende sa kalidad sa baka. Girekomendar ang paggamit sa pressure cooker kay makapadali sa pagluto. Kon humok na ang baka, hauna gikan sa kaldero ug pabugnawa. Hiwaa ang panit sa baka sa gidak-on nga pang-serve. Kuhaa ang dagkong bukog kon gikinahanglan. Ayaw iyabo ang sabaw. B. Sa laing kaldero, gisala ang mga pahumot gamit ang mantika sa di pa isagol ang baka. Isagol ang sabaw sa baka sa kaldero ug itipon ang ubang mga sagol gikan sa Set B. Pabukala ug lutoa sulod sa usa ka oras ug 30 minutos. C. Idugang ang mga sagol sa Set C ngadto sa kaldero. Lutoag laing 30 minutos o hangtod ang balbacua molapot na ug humok. Idugang ang green sa sibuyas. Alang sa tubig Annatto: ¼ tasa sa annatto seeds ½ tasa sa tubig Unsaon: Ihumol ang seeds hangtod mobugnaw ang tubig. Ibagnos ang orange nga kolor gikan sa mga liso, ug mausab ang kolor. I-strain ug ilabay ang mga liso. This posting includes an audio/video/photo media file: Download Now

Beer, gatas magsagol Posted: 03 Sep 2021 04:01 AM PDT PAREHONG mosuway og bangon gikan sa pagkapandol ang San Miguiel Beermen ug Alaska Aces sa ilang panagharong sa main game karong alas 4:35 sa hapon, Septiyembre 4, 2021, sa Philippine Basketball Association (PBA) 2021 Philippine Cip sa DHVSU Gym sa Bacolor, Pampanga. Sa labing una nilang duwa gikan sa pagbalik sa aksyon sa nahunong nga komperensya tungod sa Covid-19, ang Beermen nasugamak sa makapakaging nga overtime nga kapildihan batok sa Terrafirma Dyip, 104-110, samtang ang Aces gipangkatigo sa NLEX Road Warriors, 74-84. Taliwala sa ilang kapildihan, ang Beermen nagpabilin sa tungatungang bahin sa standing dala ang 3-2 nga rekord samtang ang Aces ningdakin-as sa dapit sa ilawom bitbit ang 2-4 nga baraha. Daghang ang nakugang sa kapildihan sa Beermen batok sa Dyip gumikan dili ikalimod kon unsa ka lig-on ang ilang puwersa hilabi na nga nakig-uban na'g balik si Terrence Romeo nila ni June Mar Fajardo, Arwind Santos, Chris Ross ug CJ Perez. Hinuon, tungod sa kalawom sa ilang puwersa, gilauman nga makabawi ra dayon ang Beermen apan gituohan nga lisod na sab nga kombati ang ilang masugatan batok sa Aces. Sa unang duwa, magsangka ang Road Warriors ug Phoenix Super LPG Fuel Masters nga pulos gikan sa kadaugan. Ang Road Warriors, nga nagtinguha sa ilang ikatulong sunodsunod nga kadaugan, adunay 3-2 nga rekord samtang Fuel Masters, nga ningpukan sa Rain or Shine Elasto Painters, 78-77, sa labing ulahi nilang duwa, naghupot og 2-4 nga rekord. Sa laing bahin, laing lig-ong puwersa ang giligsan Dyip human sa makapakurat nilang kadaugan batok sa Beermen. Ang Dyip ningpakaging sa defending champion Brgy. Ginebra Gin Kings, 95-90, sa ikaduhang duwa kagahapon. Nagbangis na sab si Juami Tiongson ug gipangulohan niya ang Dyip pinaagi sa iyang 31 puntos nga gibuwakan og siyam ka three-point bombs. Sa kadaugan, ang Dyip ningsaka sa 2-4 nga rekord samtang ang Gin Kings natagak sa 2-3 nga baraha. Sa premirong duwa kagahapon, gipangmakmak sa Magnolia Ang Pambansang Manok Hotshots ang Blackwater Bossing, 94-78. Ang Hotshots ning-abante sa 4-1 nga rekord samtang ang Bossing ningus-os sa 0-5 nga baraha. (ESL) This posting includes an audio/video/photo media file: Download Now

Tambagi ko Noy Kulas: Nabayot Posted: 03 Sep 2021 03:56 AM PDT Dear Noy Kulas, Itago ko sa ngalang Jimmy. Hapit na mag-senior citizen ug nahibung ko nganong naingon ani ko. Minyo ko ug duna nay mga apo. Kon wa ko magka edad wa ko maka feel nga duna koy feminine side nako. Nikalit ra ni og tunga nga feeling pagkakita nako og movie nga mga lalake nagromansa. Giganahan ko og tan-aw nila until akong na realize nga ganahan na ko og lalake, kanang batan-on ug macho. Noy, naa koy ka-chat nga pareho nako silahis ug batan-on. Okay ra siya nga duna mi relationship kay mas ganahan siya og edad nako kay stable na og hunahuna, di na magpataka og relasyon. Nakuyawan ko mahibaw-an ko sa akong pamilya. Ang akong asawa senior na kay maguwang nako og two years. Sexy gihapon kay sige og zumba. Pero mas attract ko og lalake. Tambagi ko. JIMMY Jim, Daghan nang pagtuon kon nganong dunay tawo nga sama nimo, mokalit g kausab ang sexual preference sa later stage sa kinabuhi. Nagkalainlain ang theories. But kon unsa man na, ayaw pagpadala sa bul-og sa imong gibati. Unsa kaha ka gubot ug devastated ang imong pamilya kon mahibaw-an nga duna kay karelasyon. Unya lalake pa gyud. Wa sab ko mag ingon nga mas maayo ang babaye. Both di man maayo. Nabayot ka o mawagtang ang imong gibati, ang tinuod nga isyu mao ang imong pagpagsud sa laing relasyon nga di maayo. Ayaw paanod sa bul-og sa pagbati. NOY KULAS rojval69@yahoo.com This posting includes an audio/video/photo media file: Download Now

Albor: Imperial Manila Posted: 03 Sep 2021 03:56 AM PDT TANANG buhis adto han-ok sa nasudnong panudlanan/. Pabor ang kaulohan ug iwit sa kalamboan ang Visayas ug Mindanao. Ang mga testamento nga gipagawas sa imperial Manila matang sa panaugdaog. Pun-an pa nga walay Sugboanong senador. Ipatuman gyod ang lagda sa Inter-Agency Task Force (IATF) bahin sa overseas Filipino workers (OFWs) ug returning overseas Filipinos (ROFs) bisan dili haom dinhi sa Sugbo. Si Dr. Edsel Salvana, consultant sa Department of Health (DOH), nibasol sa Sugbo sa kaluag sa protocol sa airport maong mikuyanap ang Delta variant takod sa Mindanao, apan nganong gibaliksa ECQ ang Metro Manila nga tua man sila magbasi. Si DOH Usec. Maria Rosario Vergeire nanghilabot sa ikwentas nga air purifier nga makadugang sa proteksyon sama sa tuob, inom bitamina, linaga nga luy-a, dulaw, lemonsito, asin, herbal, face mask, faces hield, social distancing ug pagpanghugas sa kamot. Ang air purifiers gisul-ob sa mga dagkong opisyal sa kaulohan. Walay balaod nga nagdili niini nga kasagaran ginama sa China. Ning ulahi kalit nga nabaliktad ang lagda sanglit, matod ni Vergeire, dili epiktibo ang halapad nga lockdown. Pinaagi sa Inter Agency Task Force (IATF) gitagaan og diskrisyon sa estado sa kwarantinas ang mga LGU nganasayod sa lakaw sa pandemya sa ilang tugkaran. Gumikan gihapon sa Imperial Manila, inay iduso ang arnis nga gipalambo dinhi sa Sugbo, mao hinooy gipalabi ang electronic games sa Philippine Olympic Commission nga gipangulohan ni Rep. Bambol Tolentino. Ipaibot sab ang higanting estatuwa ni Lapu-lapu nga gipahiluna sa Agrifina Circle, Rizal Park, Luneta (Bagumbayan) kay sambol sa ilang panan-aw ang probinsyanong bayani. Ipatangtang kadto si kanhi Sec. Adelino Sitoy sa Presidential Legislative Liaison Office bisan maoy gitahasan sa paghashas sa tanang balaudnon ug gibasol si Sitoy sa pag-veto ni Pres. Rodrigo Duterte sa Coco Levy Fund ug sa probisyon sa Tax Amnesty Act. Gilakbitan pagsaway ang katungdanan ni Sec. Michael Dino isip Presidential Assistant for the Visayas. Busa, ang pagdawat ni Duterte sa nominasyon pagdagan og bise presidente usa ka maayong kalamboan aron dili mokiat ang Imperial Manila. (csa_1156@yahoo.com / 09064648954) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States