https://www.sunstar.com.ph/

---

• Negative RT-PCR, antigen test di na kinahanglan sa Cebu Province
• Liquor ban sa Moalboal gilibkas
• Chan mo-finalize pa sa lineup sa iyang partido
• Comelec andam na
• Simulation exercise sa kapulisan sa Cebu City sa eleksiyon malampuson
• 4 ka persons of interest sa pagpatay kang Fernandez mikooperar, gitangtang sa lista
• 3 nangamatay, 1 angol sa mga pagpamusil
• Konsehal sa lungsod sa Aloguinsan gipusposan, patay
• Durano, Davide mag-tandem; officials mingtapon sa One Cebu
• Super Suroy: Tara na sa Adira!
• TNT milangkat sa korona sa Gin Kings
• LA Lakers adunay gustong pamatud-an
• Curry namasin ni Wiggins
• Editoryal: Gusto kang ma normal?
• Talk to Papa Joe: Basin rason ra
• Rabacal: Digong dili modayon pagdagan?
• Nalzaro: Ang kakabus maoy ibida

Negative RT-PCR, antigen test di na kinahanglan sa Cebu Province Posted: 30 Sep 2021 10:51 PM PDT DILI na kinahanglang mupresenta og negative RT-PCR test o rapid antigen test result ang tanang pasahero nga mopauli sa Probinsya sa Sugbo. Kini subay sa bag-ong memorandum nga giluwatan ni Cebu Governor Gwendolyn Garcia sa Oktubre 1, 2021. Hinuon, kinahanglan gihapon mokuha og medical certificate nga gi-isyu sa doktor sa di pa mapupos ang 24-oras pagpamatuod nga wala kini makasinati sa simtomas sa covid-19. "They shall present a medical certificate certifying that they do not exhibit symptoms of Covid-19 disease at the point of origin. The medical certificate should be issued 24 hours immediately before arrival in Cebu," saysay sa memorandum sa Oktubre 1. Niadtong Septiyembre 27, una na usab nga miluwat og samang kamandoan si Garcia alang sa mga biyahedor gikan sa Leyte nga moadto sa Lungsod sa Pilar, Isla sa Camotes, sa Lalawigan sa Sugbo. (ANV) This posting includes an audio/video/photo media file: Download Now

Liquor ban sa Moalboal gilibkas Posted: 30 Sep 2021 10:40 PM PDT TAGSA lang ka botelya sa ilimnong makahubog matag tawo ang gitugot nga mapalit sa mga tindahan og establisimento sa lungsod sa Moalboal subay sa pag libkas na niini sa liquor ban. Kini maoy bag-ong kamandoan nga giluwatan ni Moalboal Mayor Paz Rozgoni sa Oktubre 1, 2021. Subay sa lagda sa mayor, dili pwede ang pag share sa baso ug botelya sa ilimnon sa mga manginom. "...for any instance where consumption of liquor is involved, there shall be no sharing of glass and/or bottle. Each person must use his or her own drinking glass at all times," saysay sa Executive Order 33. Kon man gani dunay plano nga mag tapok, gikinahanglan nga striktong motuman sa physical distancing. Dili usab pwede mag share og utensils sama sa kutsara ug tinidor ingon man plato. "...the guidelines include sessions in business establishments as well as sessions during intimate and special occasions involving friends, family members inside their homes and all other possible venues," subay sa kamandoan. Ang masakpan nga molapas sa maong kamandoan pamultahon og moabot sa P20,000-P50,000 o mabilanggo sulod sa unom ngadto sa usa ka tuig. Gitahasan usab ni Rozgoni ang tanang sakop sa kapulisan sa lungsod sa striktong pag monitor ug pagpatuman niini. (ANV) This posting includes an audio/video/photo media file: Download Now

Chan mo-finalize pa sa lineup sa iyang partido Posted: 30 Sep 2021 07:21 AM PDT UNANG adlaw karon, Oktubre 1, sa pag-file sa certificate of candidacy (COC) apan, si Lapu-Lapu City Mayor Junard Chan nagkanayon nga wala pa siya makapinalisar sa iyang line-up lakip sa running mate sa pagka bise mayor. Si Chan nidason nga posible sa katapusang adlaw, Oktubre 8, o usa ka adlaw sa dili pa ang COC, Oktubre 7, siya mo-file sa iyang subli nga pagpili sa pagka-mayor. Matod ni Chan, daghang personalidad sa pulitika ang ganahan mopasilong kaniya sa piniliay sa Mayo 2022. Lakip sa wala gibutyag ni Chan mao ang modagan sa pagka kongresista sa dakbayan ubos sa iyang habig. Samtang, padayon ang iyang pakigpulong sa mga lider sa kabarangayan kung kinsa ang angayan molangkob sa iyang lineup. Gihulagway ni Chan nga maayo ang dagan sa ilang grupo sa karon. Gumikan kay anaa man karon sa pandemiya, hayan sila ra nga mga kandidato ang mosang-at sa ilang COC sa buhatan sa Commission on Election (Comelec), sukwahi sa miaging mga filing sa COC nga mahimong magdala og mga dumadapig ug banda atol sa ilang pag-file sa COC sa politiko. Sa habig sa mga Radaza nga karibal sa politika ni Chan, pabilin usab nga tanghaga kinsa ang lineup nga molangkob ni Kongresista Paz Radaza nga giingong mobalik pagpapili pagka mayor sa dakbayan. Lakip sa pangutana nga wala pa matubag mao nga kinsa ang mohulip nga kongresista ni Radaza kun ugaling modagan kini pagbalik pagka mayor sa dakbayan. Wala pa usab silay petsa kanus-a mosang-at sa ilang COCs sa Comelec.(GCM) This posting includes an audio/video/photo media file: Download Now

Comelec andam na Posted: 30 Sep 2021 07:21 AM PDT ANDAM na ang Commission on Elections (Comelec) sa unang adlaw, Oktubre 1, sa pag-file og certificate of candidacy (COC) hangtod sa Oktubre 8. Gipahibalo ni Atty. Lionel Castillano, elections supervisor sa Probinsya sa Sugbo, nga nakigsabot na sila sa awtoridad ug security personnel sa pagseguro nga luwas ug hapsay ang filing sa COCs. "As of this time, we see no need for PNP (Philippine National Police) personnel," matod ni Castillano. Nalakip sa top elective positions sa probinsiya sa Sugbo mao ang pagka gobernador, bise gobernador, kongresista ug board members nga mo-file sa ilang COC sa Comelec sa Kapitolyo. Tungod sa nagpadayong hulga sa pandemiya, gisubli ni Castillano nga duha lang ka mga tawo ang makasulod sa opisina atol sa filing sa COC. "We should practice the minimum health protocols we ask you this time do not bring your supporters because kami modawat lang sa mga kandidato nga mo-file og duha kabuok nga mo-accompany nila," matod ni Castillano. Mipasidaan ang Comelec alang sa mga dumadapig nga dili puwede ang pagtapok ug kinahanglan nga mosubay gihapon sa mga health protocol sa paglikay sa pagtakod sa Covid-19. (ANV) This posting includes an audio/video/photo media file: Download Now

Simulation exercise sa kapulisan sa Cebu City sa eleksiyon malampuson Posted: 30 Sep 2021 07:19 AM PDT MALAMPUSON ang simulation exercise sa gawas sa buhatan sa Commission on Election (Comelec) sa Siyudad sa Sugbo human matubag ang tanang posibling mahitabo atol sa usa ka semana nga filing sa certificate of candidacy (COC). Ang simulation gihimo sa pagseguro ang kahapsay ug kalinaw atol sa usa ka semana nga filing sa COC sa mga magpapili sa sunod tuig nga eleksyon sa siyudad. Mga sakop sa Civil Disturbance Management (CDM) sa Cebu City Police Ofice (CCPO) uban sa Cebu City Disaster Risk Reduction and Management Office, Bureau of Fire Protection ug ang Central Command ang ningsalmot sa simulation exercise. Ang scenario ilang gipugngan ang grupo sa mga dumadapig sa nagkalainlaing partido nga gustong mosulod sa buhatan sa Comelec aron ilang abibahan ang ilang gilabanan nga kandidato. Lakip sa ilang gipraktisan kung unsaon pagtubag kung adunay hulga sa pagpamomba sama sa Kapitolyo, Cebu City Hall ug buhatan sa Department of Education (DepEd) ug mahitabong kalamidad sama sa linog ug bagyo lakip na ang pagpamusil sa riding-in-tandem sa usa ka kandidato. Matod ni Police Major Edgar Labe, ang hepe sa Waterfront Police Station, nga atol sa pag-file sa COC, dili na nila tugotan pa nga magtapok ang mga dumadapig sa usa ka kandidato sa gawas sa Comelec ug ila na kining bungkagon. "OK man, plastar man ang atong mga personnel og tarong unya sa inisyal ganina katong civil disturbance management," matod ni Labe. Si Attorney Chauncy Boholst, Cebu City North District Election Officer, natagbaw ra sa gihimong pagpangandam sa kapulisan sanglit ila na kining giplanohan sa nanglabay nga mga adlaw. Ang mga dalan nga nakapalibot sa Comelec sama sa Burgos ug Lapu-Lapu gipang butangan na og ali sugod karong adlawa ug dili na mahimong maagian sa mga sakyanan. Iyang giklaro nga ang mga tawo nga mahimong maka sulod sa ilang buhatan mao lang ang kandidato ug ang iyang escort. "Ang makasulod diri kadto ra gyung mo-file sa COC unya kung naa silay escort at most two ra gyud atong gi allow," matod ni Boholst sa Superbalita Cebu. Sulod lang sa tulo ka minuto mamahimo na nga makagawas ang kandidato human siya maka-file sa iyang COC ug sa gawas na usab ang picture taking lakip na ang pag-interview sa mga sakop sa media aron matuman ang social distancing. (AYB) This posting includes an audio/video/photo media file: Download Now

4 ka persons of interest sa pagpatay kang Fernandez mikooperar, gitangtang sa lista Posted: 30 Sep 2021 07:16 AM PDT ANG Special Investigation Task Group (SITG) nga maoy nag-imbestigar sa pag ambush patay kang manlalaban Rex Fernandez nitangtang na sa listahan sa upat ka mga personalidad nga gitumbok nga persons of interest sa krimen human nga silang tanan nikooperar na sa imbestigasyon. Usa ka semana human sa kamatayon sa manlalaban, adunay gipangtumbok nga persons of interest ang SITG. Kini mao ang babayeng real estate agent nga maoy kauban ni Fernandez sulod sa iyang sakyanan, driver niini ug upat ka mga opisyal sa Bamboo Bay condominium nga ginganlan sa biktima nga maoy responsable kon adunay mahitabo kaniya. Matod ni Police Colonel Josefino Ligan, hepe sa Cebu City Police Office (CCPO) nga nakaluwat nga pinanumpaang pamahayag ang mga personalidad. Tungod niini, giwagtang na sila sa listahan sa mga suspek. Dugang ni Ligan nga mahimong makatabang sila sa pagsulbad sa kamatayon sa manlalaban pinaagi sa pagpahibawo sa mga imbestigador kon aduna silay makuha nga kasayuran. Samtang daghan na usab ang nihatag og mga impormasyon sa kapulisan sa siyudad sa Sugbo human gipublikar sa social media ang video sa nagpusil kang Fernandez. Apan ila kining gisubay pag-ayo aron masiguro nga ang gitudlo mao ang naghimo sa krimen. "Naa tay nadawat nga mga information regarding sa personality, atong gipakatap nga video, padayon ang validation ato and hinaot nga kon willing siya nga molutang, mopakita para ma assist nato ang information," matod ni Ligan. Gipasalig ni Ligan nga ang tanang mohatag og impormasyon hatagan nila og proteksyon aron di usab mabutang sa peligro ang ilang kinabuhi. Si Fernandez giatangan sa wa mailhing gunman sa Agusto 26, 2021 sa Banawa, Barangay Guadalupe, Dakbayan sa Sugbo. Angol ang iyang drayber samtang ang babayeng ahenta na missing og pipila ka mga adlaw, apan mipatiim-aw ra sa Cebu City Police Office (CCPO) aron paghatag sa iyang habig. Sa sinugdan, nagduda ang mga pulis kaniya kay gipangdala ang mahinungdanon unta nga mga ebidensya, labina ang cell phone ni Fernandez. Apan nitumaw siya sa CCPO dala ang giingong mga ebidensya. Ang upat usab ka mga tawo nagdumala sa gipuy-ang condominium ni Fernandez nga iyang gikabangi. Bisan wa pa sila moatubang sa kapulisan, ang upat nanghimakak na sa kalambigitan sa pagpatay sa human rights lawyer.(AYB) This posting includes an audio/video/photo media file: Download Now

3 nangamatay, 1 angol sa mga pagpamusil Posted: 30 Sep 2021 07:15 AM PDT TULO ka mga tawo ang nangamatay sa duha ka mga pagpamusil sa managlahing bukirang mga dapit sa dakbayan sa Sugbo sa Miyerkules sa gabii, Septiyembre 29 ug Huwebes sa kaadlawon, Septiyembre 30. Duha ang nangamatay sa unang pagpamusil sa sitio Mahayahay, Barangay Toong, bukirang dapit sa Dakbayan sa Sugbo sa alas 7:20 sa gabii sa Septiyembre 29. Ang mga biktima giila nga silang Jonald Bacarisas Gomez, 24, ug Nathaniel Gominil, 23, pulos taga sitio Poso, Barangay Buhisan. Matod ni Police Staff Sergeant Christopher Bongo, imbestigador sa Labangon police station, nga si Gomez nakaangkon og punisilan sa luyong bahin sa ulo ug abaga samtang si Gominil naigo sa ulo ug namatay diha-diha. Samtang nadala pa sa tambalanan si Gomez human maabti sa mga barangay tanod nga nagginhawa pa, apan nakalas ra usab paglabay sa pipila ka oras sa pag-atiman sa mga doktor. NAALAAN? Matod ni Bongo nga sa nakuha nila nga kasayuran, sila si Gomez ug Gominil grupo nga nangadto sa sitio Mahayahay aron manihapon ug mag-estambay. Apan kalit sila nga gipamusil sa grupo usab sa laing mga lalake nga wala nila mailhi. "Kanang mga bataa kasagaran magabii moadto na didtong dapita kay naa na silay kaila didto. Nya adto didto mag kaon-kaon, adto didto mag tambay-tambay. Unya ang estorya nga migawas igsuon adtong driver nga si Gomez naay gibirahan diri sa Buhisan. Unya pagkataod-taod naay nangita sa igsuon ni Gomez. Basin sila ang gipahimungtan ba kaha or na aan kay mao-mao man nig nawong kining biktima ug kadtong iyang igsuon," matod ni Bongo. Ang kapitan sa Barangay Toong nga si Alejandro Borres nga nahinabi sa sibyaanang dyHP, nagkanayon nga tulo ka mga motorsiklo nga adunay tag tulo ka sakay niini, nisaka sa ilang dapit nga maoy namusil sa maong mga batan-on. Natingala siya nganong nangadto ang taga Buhisan sa lugar nga unta mingaw man. NEGUSYANTE Samtang sa Huwebes sa alas 4:40 sa kaadlawon, namatay ang usa ka negusyante og karning baboy human pusila sa wala pa mailhing mamumuno sa sitio Hamtik, Barangay Babag. Ang biktima nga nakaangkon og mga samad sa abaga, kamot ug tiyan giila nga si Jorge Ibona, 40. Matod ni Police Major Francis Renz Talosig, hepe sa Mabolo Police Station, nga nagpadayon pa ang ilang gihimo nga imbestigasyon. Ang pamahayag sa asawa sa biktima nga usa ka buto sa armas ang iyang nadungog. Sa iyang paggawas, nagbuy-od na ang iyang bana dulog sa giihaw niining baboy. Nakita pa niya ang nag binugtong nga suspek nga nagdagan pahilayo nga naka bonnet sa nawong. Matod ni Talosig nga ilang susihon kon wa bay gikaaway si Ibona sa dapit. SIKYU Nakadagan pa sa sulod sa ilang balay ang usa ka security guard hinungdan nga ni-survive sa pagpamusil mga alas 7 pasado sa Miyerkules sa gabii sa sityo Origano Riverside, Lawaan 2, Dakbayan sa Talisay. (dugang taho ni REV) This posting includes an audio/video/photo media file: Download Now

Konsehal sa lungsod sa Aloguinsan gipusposan, patay Posted: 30 Sep 2021 07:08 AM PDT KONSEHAL sa Lungsod sa Aloguinsan namatay sa tambalanan sa Dakbayan sa Sugbo human gibunalan og tubo sa iyang silingan alas 8:50 sa gabii sa Miyerkules, Septiyembre 29, sa Sitio Bogo, Brgy. Kawasan. Si Guillermo Pabroa, 58, minyo, nagpuyo sa nahisgutang lugar, chairman sa committee on environment sa Konseho sa Lungsod sa Aloguinsan namatay sa Vicente Sotto Memorial Medical Center (VSMMC) sa ala 1 pasado sa Huwebes sa hapon. Nasikop si Richard Siacor, 48, minyo, way trabaho, silingan ni Pabroa. Si Police Staff Sgt. Christian Elijay, sa Aloguinsan Police Station nga nahinabi sa Superbalita Cebu, nagkanayon nga si Siacor nanghagis. Nagdala kini og G.I. pipe o tubo nga pinutol, gipusposan ang jalousy nga bintana sa balay ni Sacarias Ariola. Wala matagbaw si Siacor, iyang giguba ang peso wi-fi ni Ariola pinaagi sa pagpuspos og tubo. Gumikan sa kaguliyang, si Pabroa, nibadlong kang Siacor ug iyang gikasab-an kay nakamugnag kasamok sa ilang dapit. "Human niyag kasaba, nitalikod si Konsehal kay milakaw, pero gikalitag bunal ang ulo sa tubo nga gidala sa suspek," dugang ni Elijay. Nahagba ang konsehal gumikan sa kakusog sa pagbunal ug nawad-an og panimuot. Human makadawat sa alarma ang kapulisan, dali nilang giadto ang dapit, nasikop si Siacor. Ang konsehal nadala sa tambalanan sa Dakbayan sa Carcar, apan gumikan sa kadaot sa ulo, siya gibalhin sa VSMMC, diin siya namatay. Matod ni Elijay nga si Siacor nasuko kang Ariola kay ang iyang anak nga nadasmagan sa motorsiklo giingong wa atimana sa ospital. This posting includes an audio/video/photo media file: Download Now

Durano, Davide mag-tandem; officials mingtapon sa One Cebu Posted: 30 Sep 2021 07:05 AM PDT MAG-TANDEM sa eleksyon sa 2022 sila si kanhi Tourism scretary Ace Durano ug Bise Gobernador Hilario Davide III. Human si Durano pormal nga nipahibawo sa iyang pagdagan sa pagka gobernador batok kang Gobernador Gwendolyn Garcia, nipahibawo usab dayon si Davide nga sila ang mag-tandem. Matod ni Durano nga dugay dugay niyang gitimbang timbang ang tanan kay niretiro na unta siya sa pulitika. "It took time for me to decide kay sa tinuoray lang, ni retiro na ko sa pulitika and okay na gyud ko sa pribado nga kinabuhi kuyog sa akong pamilya. But considering the current situation of the Province tungod aning Covid, if we remain to address it the way we are currently doing so, then this pandemic would affect us for a much-prolonged time," matod ni Durano. Siya niingon nga usa sa nakaaghat kaniya pagdagan mao ang wa niya mauyoni nga lakang sa kagamhanan karon batok sa coronavirus disease (Covid-19). "Pasabot ana, mas dugay ta nga dili makakuyog ug makakita sa atong pamilya, mas dugay nga dili ta makaadto sa ubang lugar. And sadly, mas dugay ang panahon nga sige ta'g kahadlok nga mawad-an na pud ta'g minahal sa kinabuhi tungod aning Covid," dugang niya. Niadtong Septiyembre 27, pipila ka mga grupo sa Sugbo ang mipadangat og suporta sa Durano-Davide tandem sa umaabot nga national elections sa 2022. Moabot sa 120 ka mga group leader ang nagtigom alang sa ilang panawagan kang Durano ug Davide nga magpares sa pagdagan sa eleksyon. MOPARES Human nipahibawo si Durano pinaagi sa iyang press statement sa iyang pagdagan, nipahibawo sab dayon si Davide nga siya makigpares sa kanhi Tourism secretary sa administrasyon ni kanhi Presidente Gloria Macapagal-Arroyo. "Taud-taud na kong nakaila ni Ace. Maayo kaayong tawo si Ace. Matarong, sinsero, mapaubsanon, may katakos, kalma ug angayan sad gyud nga mahimong lider natong mga Sugbuanon. His track record as representative of the 5th district and tourism secretary speaks for itself," nagkanayon si Davide. Sayo pa, si Davide nipasumbingay nga mao na kini ang iyang katapusang termino. Apan si Davide niingon nga magpasubli siya tungod sa iyang nakita nga si Durano angay nga mamahimong runningmate tungod sa matang sa iyang liderato ug prayoridad nga mga programa. Si Davide, kinsa niserbisyo sa duha ka mga termino gikan sa 2013 ngadto sa 2019, nihimo sa panglawas nga iyang numero uno nga prayoridad isip iyang development agenda. Atol sa iyang duha ka mga termino isip gobernador, si Davide nigahin og dakong pahat sa budget sa mga programa ug proyekto sa panglawas, apil na ang pagpalambo sa provincial ug district hospitals ingon man sa pagkuha og dugang health workers. Si Ace una nang pormal nnga nipahibawo sa iyang pag kandidato isip gobernador atbang kang Gobernador Gwendolyn Garcia sa 2022 elections. Si Garcia nihulagway kang Ace nga "worthy opponent" sa sunod tuig nga piniliay. MIBALI Samtang nagsugod na ang filing sa certificate of candidacy (COC), nadugangan na sab ang kadagkoan sa lalawigan sa Sugbo nga nitapon na sa One Cebu Party, nga gipangulohan sa mga Garcia. Sa Septiyembre 29, opisyal nga nanumpa ang bag-ong mga miyembro sa One Cebu. Kini maoy gipahibaw sa Provincial Information Office. Ang nanumpa atubangan nila ni Cebu Governor Gwendolyn Garcia ug Cebu 7th District Rep. Peter John Calderon ug mga bokal nga sila si Christopher Baricuatro ug Jerome Librando sa lungsod sa Dumanjug aron makighiusa sa One Cebu. Nalakip sa mga mayor nga nanumpa mao sila si Efren Guntrano "Gungun" Gica (Dumanjug), Paz Rozgoni (Moalboal), Fritz Lastimoso (Alcantara), Narciso Creus (Malabuyoc), Terrence Blanco (Ronda), Dean Michael Singco (Ginatilan), Carmen Lumain (Badian), ug Verna Magallon (Alegria). Si Garcia una na nga mipahibaw nga siya magpasmodagan kini pag-usab isip Gobernador sa Probinsya, makaatbang niya mao si former Tourism Sec. Ace Durano nga mianunsyo na sa iyang pagpapili sa samang posisyon. Sa miaging semana gi-welcome usab sa One Cebu ang mga opisyal sa dakbayan sa Toledo ingon man ang magtiayong Streegan sa lungsod sa Sogod nga kanhi sakop sa partidong Bakud Alang sa Kauswagan ug Demokrasya (Bakud).(ANV, REV gikan sa PR) This posting includes an audio/video/photo media file: Download Now

Super Suroy: Tara na sa Adira! Posted: 30 Sep 2021 06:48 AM PDT TUNGOD sa pandemic dala sa Coronavirus Disease (Covid-19) daghang mga establismento ang grabeng naapektuhan, gani adunay mga negusyo ang nagsira apan adunay pipila ang nagpabilin nga mi-survive taliwala sa kalisdanan. Bisan sa maong pagsuway nanglimbasog ang usa ka suroyanan sa Dakbayan sa Ormoc nga mao ang Adira Farm nga nahimutang sa Barangay Curva nga gipanag-iya sa pamilyang Martinez-Baltonado. "Enjoy your events with breathtaking views of the surrounding greenery and the scenic Ormoc Bay," statement sa Adira Farm Facebook page. Gikan sa City Proper, mga 12 kilometros ang gilay-on niini apan dili gyod ka magmahay sa lugar tungod sa kanindot sa ambiance. Nahimutang kini sa ibabaw nga bahin sa Curva diin maklaro ang syudad sa Ormoc ug ang kadagatan. RELAXING Bugnaw ug presko sab kaayo ang hangin gumikan sa daghang puno-an sa kahoy nga nagpalibot niini. Daw susama kini sa Busay sa dakbayan sa Sugbo hilabi na kung magabie ug puno kini sa mga suga. Matod ni Tata Martinez-Baltonado, sa pagka karon catering pa ang ilang dawaton pero kung i-abli na nila kini sa publiko motanyag na sila og dine-in. Dunay coffee shop nga ginama sa container van nga up and down. Haom kaayo kon ikaw gikapoy ug gusto mag-relax. Duna sab silay native restaurant nga gipalibutan sa dekolor ug mahalon nga mga suga nga naghatag og dan-ag panahon sa kagabhi-on. Ang Adira Farm nagtanyag og facilities alang niadtong adunay mga gitakda nga kalihokan sama sa outdoor meeting, kasal, social gathering ug uban pang events. Nigamit sab si Tata og mga recycled materials sa iyang desinyo ug duna usab stage nga pwede kaayo mag concert tungod kay lig-on ug dekalidad ang mga ekipo o sound system. "Ako ra gyod nag-design ani. Wala ko nag gamit og designer, daghan pa ko plano ani puhon," matod ni Tata DUGANG ITANYAG Nagplano usab si Tata nga butangan og mga kwarto katulgan sa mga gusto mag-overnight ug magbutang usab siya og infinity pool. Ang ibabaw sab nga bahin sa farm, butangan usab og chapel. Gitamnan usab ni Tata ang palibot sa farm og mga nagkdaiyang matang sa tanom nga siguradong patok sa mga plantito ug plantita nga makadugang sa kanindot sa lugar. Sa motuo o dili, ihunghong ang iyang mga wish diha sa ilang wishing well nga nahimutang tapad sa restaurant. Sa mga nangita og forever, wish na. ABLIHAN Plano ni Tata nga sa Oktubre o Nobiyembre ning tuiga buksan sa publiko ang Adira Farm. Duna silay itanyag nga Brunch kombinasyon sa breakfast ug bunch nga magsugod sa 9:00 sa buntag hangtod na sa udto. Dinner time magsugod sa 4:00 ngadto na sa gabii. Adunay lapad nga parking area alang niadtong adunay mga pribadong sakyanan. Kung wala mo sakyanan pwede ra mag de-pasaheroan nga multicab gikan sa Ormoc City proper padung sa Curva. Naa sab habal habal nga mobiyahe pa-ingon sa Adira. Sa mga gusto mosuroy mamahimong makontak sa 09150156866 ug pangitaa si Maria Victoria Espina. (Hulagway gikan sa Adira Farm Facebook page. ) This posting includes an audio/video/photo media file: Download Now

TNT milangkat sa korona sa Gin Kings Posted: 30 Sep 2021 05:55 AM PDT SAYO nga nibakasyon ang Barangay Ginebra human gipukan sa TNT Tropang Giga sa quarterfinals, 84-71 sa nagpadayong duwa sa 2021 PBA Philippine Cup didto sa Don Honorio Ventura State University gym sa Bacolor, Pampanga. Ang top-seeded Tropang Giga gikan pa sa ilang 10 ka adlaw nga pagpahuway apan daw wala maapektohi ug matay-i ang ilang opensa batok sa paralisadong Gin Kings nga maoy ilang panimalos sa niaging Philippine Cup Finals. "We've been off for 10 days so we expected that we wouldn't be as sharp to start the ballgame. We discussed that we just need to keep grinding and count on our defense to stay in this game," padayag ni coach Chot Reyes. Ang kapildehan sa Ginebra maoy nakapasagmuyo sa ilang kampanya diin ilang gipilde ang Phoenix Super LPG sa playoff aron ilang maangkon ang number 8th seed human 4-7 win-lose record sa elimination. Si RR Pogoy, Troy Rosario ug Mikey Williams maoy nagkumboya sa TNT diin ilang giduslitan ang 14-2 run sa second quarter aron kontrolahon ang duwa, 35-27 kansang labaw ilang namintinar hangtod sa pagtingog sa final buzzer. Si Pogoy nirehistro og 16 puntos samtang si Rosario niamot og 15 ug 11 ang gimaneho sa ilang super rookie nga si Williams para sa kadaugan sa TNT. Ang opensa sa tulo nimugna og 17 gikan sa 22 na kinatibuk-ang puntos sa TNT sa second quarter. Ang Sugbuanon nga si Pogoy adunay nipaarak og 9 puntos sa third quarter sa pag-ataki sa TNT diin padayon silang naglabaw, 66-49. Niabot og 23 puntos ang labing dako nga labaw sa TNT, 84-61 sa fourt quarter. Ang Gin Kings niduwa nga wala si Japeth Aguilar gumikan sa iyang sprained MCL ug wala sab makaduwa si Scottie Thompson gumikan sa league's health and safety protocol ug napiangan pa ang Ginebra gumikan sa pagkapilo sa ankle ni Aljon Mariano sa second period. Gipangulohan ni Christian Standhardinger ang Ginebra pinaagi sa iyang 17 puntos ug 19 ka rebounds kinsa niduwa sulod sa 41 minutos samtang 15 puntos ang giamot ni Stanley Pringle sulod sa 36 minutos. Ang TNT maoy mokontra sa San Miguel Beermen ssa best of seven sa semifinals series. (PAC) This posting includes an audio/video/photo media file: Download Now

LA Lakers adunay gustong pamatud-an Posted: 30 Sep 2021 05:54 AM PDT GIKATAWHAN lang ni Los Angeles Lakers superstar LeBron James pagsaway nga mga tiguwang na ang ilang mga players nga maoy mokampanya para sa NBA 2021-2022 season. "Some of the memes and some of the jokes have been extremely funny," matod pa ni James. Ang 4th time NBA MVP nag-edad na og 36 anyos kinsa anaa na sa iyang ika-19 nga NBA season kuyog sa iyang mga kauban nga edaran. Ang 9 sa 14 ka mga kasamtangang players sa Lakers nag-edad og 32 anyos pataas apil na ang ilang 8 sa 11 nga bag-ong napuno ug si Anthony Davis ra ang batan-on nga nag-edad og 28. Sa kasamtangan, ang edad sa mga magduduwa sa Lakers nag-average og 31 nga maguwang og duha ka tuig sa average roster sa NBA. Inay mosud-ong sa iyang mga teammates kansang birthdays natumong sa 1980's, si LeBron nagtutok unsaon pagdevelop sa ilang skills, experience ug athleticism gikan sa ilang mga bag-ong kauban para makab-ot nila ang kampyonato. Si Russell Westbrook, Carmelo Anthony ug mga supporting cast pulos na mga beterano ug nag-uban kuyog ni James ug Davis ug sila kumpyansa nga ilang mapamatud-an nga ang edad dili babag gumikan sa ilang gihuptan ang talento. "We come out and we put the time in, we put the work in.We make our own narrative. One thing that we know (is) who we are," padayag ni James. "We've got a bunch of guys that have been in this league quite a while that understand and know what it takes to win. The business that we're in is winning, and doing it all the time," butyag sa three-time NBA champion. Ang mga magduduwa sa Lakers gilangkuban nilang Anthony, James, Davis, Dwight Howard, Trevor Ariza, Talen Horton-Tucker, Westbrook, Rajon Rondo, De Andre Jordan, Malik Monk,Wayne Ellington, Chaundee Brown, Joel Ayayi ug Kent Bazemore. Ang Lakers nakatigom sa ilang mga magduduwa niadtong Miyerkules sa training complex para sa ilang media day, tulo ka semana sa dili pa sugdan ang regular-season batok sa Golden State didto sa Staple Center. Gumikan kay tulo nalang ka magduduwa sa Lakers ang nahabilin nga maoy niduwa sa niaging season, ang ilang team dako pa og trabahuon para sa chemistry sa ilang team ug ilang kining gisugdan sa ilang biyahe didto sa Las Vegas. (PAC) This posting includes an audio/video/photo media file: Download Now

Curry namasin ni Wiggins Posted: 30 Sep 2021 05:53 AM PDT NANGHINAOT ang superstar sa Golden State Warriors nga mausab ang hunahuna sa iyang teammate nga si Andrew Wiggins may labot baruganan niini sa Covid-19 vaccine. Si Curry kinsa maoy lider sa Warriors niingon nga anugon kon dili makaduwa si Wiggins sa duwa sa ilang korte sanglit siya ang starting small forward sa ilang team. "At the end of the day, it is up to him, there's no secret to that point. We obviously hope that he has all the right information and access to the right resources to ask all the questions he has on making that decision," padayag sa two-time NBA MVP. "We hope he's available. We hope it moves in the right direction. My opinion is, obviously I got it and ready to be available and following the mandates," dugang ni Curry. Si Wiggins dili gusto nga magpabakuna ug ang San Francisco apil ang New York adunay balaod nga kinahanglan bakunado ang mga atleta nga mag-practice o magduwa sa ilang mga siyudad. P775M MAWALA NI WIGGINS Kon mahitabo nga dili magpabakuna ang forward sa Warriors, katunga sa iyang sweldo ang mawala sanglit dili siya makaduwa sa ilang home games. Si Wiggins adunay $31 milyones nga sweldo sa umaabot nga season ug ang $15.5 milyones niini ang mahanaw gikan sa iyang kontrata. Apan daw wala maanugni si Wiggins sa maong kantidad nga mawala kaniya. It's my problem not yours," tubag niya sa mga tigbalita atol sa Warriors media day. "Back is definitely against the wall, but I'm just going to keep fighting for what I believe. I'm going to keep fighting for what I believe is right. What's right to one person isn't right to the other and vice versa," matod sa teammate ni Curry. Ang NBA niadtong Sabado ni-review ug ni-deny sa hangyo ni Wiggins para di siya mabakunahan. Si general manager Bob Mayers sa Warriors niingon nga ang pagpabakuna, private ug personal ug masayran ra unya sa ilang mga fans kinsa ang bakunado o wala inig abot sa ilang unang duwa sa 2021-2022 NBA season didto sa Chase Center nga maoy bag-o nilang korte. (PAC) This posting includes an audio/video/photo media file: Download Now

Editoryal: Gusto kang ma normal? Posted: 30 Sep 2021 05:27 AM PDT NING sunodsunod nga two-digit nga gidaghanon sa mga kaso sa coronavirus disease 2019 (Covid-19) sa Dakbayan sa Sugbo, padung kining tanan sa pag downgrade sa classification, gikan sa general community quarantine ngadto sa modified MGCQ. Moduso ang kapulisan sa pagpadayon sa mga quarantine control point sa mga barangay aron magpadayon ang komunidad sa hugot nga pagbantay sa mga residente sa pagsunod sa mga health protocol, sama sa kanunay nga pagsul-ob sa facemask ug panagtapok. Mao kini ang kanunay ug nagbalikbalik nga problema matag higayon nga molugak na ang quarantine. Mao usab ni ang nagbalikbalik nga sayop sa katawhan ug mga awtoridad. Kay lugak na ang quarantine classification, makalimot na nga naa diay ang Covid-19. Ang labing kuyaw ra ba kaayo kay nag-angat na ang Pasko. Di ra ba kalikayan nga dunay tago-tago nga mga party sa pribadong mga kompaniya ug bisan gani sa mga buhatan sa kagamhanan. Sa miaging tuig, mao ni ang gibasol sa ikaduhang surge sa mga kaso sa Covid, di lang sa Sugbo, kon di sa tibuok nasod. Kapoy na baya tuod kay magduha ka tuig na karong Marso sunod tuig ang pandemic. Di ba sum-ol ug kapoy na nga mogawas sa balay nga mag facemask? Di ba kapoy na nga magpanglingi kon di ka ba madakpan sa mga pulis sa gabii kay curfew na? Kinsa bay wa kapoya? Ang tanan gikapoy, labina ang mga healthcare worker ug kapulisan. Duha ra ang nakita sa mga eksperto aron di makakatap ang virus. Mosunod kanunay sa health protocol aron way takdanay. Aron mabalik na sa normal, kinahanglan magpabakuna ang tanan. Apan taliwa sa kahingawa ug kahadlok sa uban nga way igong basehanan, dugay pa tingali kaayo makab-ot ang 90 porsyento nga herd immunity. Ang pagpadali naa ra sa matag usa nato. Naa may igong bakuna, nganong di magpabakuna? Gusto kang ma normal na? Pagpatusok gud. Ayaw og tuo sa fake news. This posting includes an audio/video/photo media file: Download Now

Talk to Papa Joe: Basin rason ra Posted: 30 Sep 2021 05:24 AM PDT Dear Papa Joe, Ako diay si Rowela, 20 anyos, taga Cebu City ra. Ang akong gikalibgan karon mao ang akong ka relasyon for 6 months now. Nagka bugnaw na siya ug di siya sweet sama sa una mao nga ako siyang gipangutana kon ngano kay feel nako nga di ko niya love. Pero nitubag siya nga love ko niya deep inside, pero di lang niya i-show kay mao ra kuno gihapon masakitan ra siya sama sa iyang experience sa iyang mga ex. Mao ni akong problema ron ug angay pa ba ko nga mopadayon aning relasyona nga morag way paingnan kay ga expect ra man siya nga mahisama ra sa una. Palihug tambagi ko. ROWELA Rowela, Sama sa imong giingon nga ga expect ra nang lakiha nga wala. Mas maayo pa nga wad-on na lang nimo samtang sayo pa. Kay murag palusot ra na iyaha nag enjoy ra na sa benifits nga makuha niya nimo samtang kamo pa para kon mapul-an siya, naa na siyay rason. Kon sa trabaho pa, kon wa siya pasidunggi sa unang trabaho niya, magtinapulan siya sa sunod trabaho niya? Di ba logic lang? Undangi na. Basin makamata siya sa worth nimo kon wala na ka. Basin siya ang may problema maong gibuwagan siya sa mga uyab niya sa una. PAPA JOE (sa inyong tampo ipadala lang sa papajoesuperb@gmail.com) This posting includes an audio/video/photo media file: Download Now

Rabacal: Digong dili modayon pagdagan? Posted: 30 Sep 2021 05:22 AM PDT SA survey nga gihimo sa Social Weather Stations (SWS) niadtong Hunyo 23 – 26, nagpakita nga ang 60% sa katawhan dili uyon nga modagan pagka-bise presidente si Presidente Rodrigo Duterte sa piniliay sunod tuig samtang 39% uyon nga molansar siya aron mapadayon ang iyang nabuhat sa hapit unom ka tuig niyang administrasyon. Akong nakita nga usa kini ka referendum sa iyang nabaniog na kaayong kandidatura karong Mayo 9, 2022. Agig reaksiyon sa resulta sa survey, gipahibawo ni Spokesperson Harry Roque nga ang Presidente maminaw sa pulso sa katilingban. Ergo, dili na siya mopadayon sa iyang paglansar? Panahon na kini nga si Mayor Sara Duterte Carpio maoy modagan og national position. Ang problema lang kon unsay iyang lansaran, presidente o bise ba? Si Bongbong Marcos andam ug tagana nga maoy mag-presidente kon magbise kaniya si Inday Sara. Mao man tingali kini katarungan nga wala pa dawata ni Marcos ang nomination sa partido Kilusang Bagong Lipunan (KBL) nga maoy ilang standard bearer kay naghuwat pa siya nga tanyagan sa amahan o kaha sa anak nga maoy modagan pagka-presidente. Mas hapsay kon ugaling dili nalang mo-file sa iyang certificate of candidacy si Digong kay dili na kinahanglan nga mag-substitution. Mahimo nang molansar ang Marcos – Duterte tandem sa partido nga ilang mapili. Sa laing survey nga gihimo sa Pulse Asia niadtong Septiyembre 6 – 11, niminus apan nag-una gihapon si Sara Duterte sa rating nga 20%, Bongbong Marcos 15, Isko Moreno Dumagoso 15% ug Manny Pacquiao 12%. Ang kang Leni Robredo 9%, Panfilo Lacson 6% ug Bong Go 3%. Nag-una si Duterte sa Visayas ug Mindanao diin nagsunod si Pacquiao. Sa NCR ug sa Bicol nag-una si Marcos og gisundan ni Moreno. Atong makita dinhi nga miminus ang rating ni Duterte samtang misaka ang kang Pacquiao. Aniay bag-ong kaugmaran sa pulitika sa Cebu City. Ang kanhi city administrator sa Tomas Osmeña administration ug undersecretary sa Department of the Interior and Local Government (DSILG) Francisco "Bimbo" Fernandez ang gituboy sa mga sakop sa urban poor organizations nga modagan pagka-mayor sa siyudad. Naka-desider sila niini tungod kay dili kuno modagan pagka-mayor si Osmeña. Dili ikalimud nga suod sila si Fernandez ug Osmeña. Mas daku og nahimo si Bimbo sa administasyon ni Tommy itandi kang Bebot Abellanosa ug Franklyn Ong. Pilian na lang tingali kining duha og si kinsay mahimong bise. Sumala sa nagpaluyo kang Bimbo nga kon ugaling dili siya i-indosar ni Osmeña, modagan siya nga independente. Sayud ako nga likayan nga dili kini mahitabo kay makabahin man kini sa mga botante sa BO-PK. Abi kadto nako og ang administration party ra ang adunay problema nga sama niini. (mannyrabacal1144@gmail.com) This posting includes an audio/video/photo media file: Download Now

Nalzaro: Ang kakabus maoy ibida Posted: 30 Sep 2021 05:17 AM PDT BASE sa Commission on Elections (Comelec) data sa 2020, gibana-banang adunay 62 ngadto sa 63 ka milyon ka botante sa tibuok Pilipinas. Posible nga mosaka pa kini inig human sa registration of voters nga gi-extend sa Comelec hangtod sa Oktubre 31 pinasikad sa balaod nga napasar sa Kongreso. Kadaghanan sa mga botante gikan sa masa o mga kabus ug middle level income families. Pipila lamang ka percentage ang mga adunahan ug intellectual voters. Sugod karong adlawa hangtod sa Oktubre 8 ang filing sa certificate of candidacy (COC). Sa mga magpapili sa pagka-presidente, sila lamang si Senador Ping Lacson, Senador Manny Pacquiao ug Manila Mayor Isko Moreno ang mi-itsa sa ilang mga kawo sa pulitika nga nangambisyon nga mag-presidente. Nahibawo na kita sa kinabuhi nila ni Manny ug Isko nga gikan sila sa mga kabus nga banay. Nag-agi sila sa kinabuhi sa kabus ug timawa nga halos dili makakaon og tulo ka higayon sa usa ka adlaw. Susama og hayop ang ilang mga kinabuhi. Si Manny nanarbaho og paniderya ug construction sa wala pa mosulod sa boxing maong wala makakuha og insaktong edukasyon gumikan sa kakabus. Si Isko nangoykoy og basura sa wala pa ma-diskobre sa pagka artista. Mga iro ang iyang kakompetensiya sa mga pagkaon nga iyang makoykoy sa basurahan. Naningkamot ug nakakab-ot og kalampusan. Gumikan sa ilang kasinatian nga tinud-anay gyud nga kabus, mao kini ang imahin nga ilang gamiton sa ilang pagpangampaniya. Kini ug pagkabig o pagdani sa mga botante labi pa ang mga kabus nga mosuporta ug mobutar kanila. Kay sila maoy simbolo sa kakabus ug kawad-on apan naningkamot aron makab-ot ang kalampusan. Halos tanang mga pulitiko, ang imahin sa pagkakabus ang ilang ipakita ngadto sa mga botante. Aron lagi makabig nila ang simpatiya sa mga botante labi pa ang masa nga maoy labing daghan. Busa makapaabot kita nga sa pagsugod sa kampaniya, daghan sa mga kandidato nga magpa-pobre-pobre kunohay bisan dili god. Kay maayo man kana sila mo-drama. Pobrehay na ang style sa kampaniya ron. Ang ilang kakabus maoy ibida. Mao ni giingon nga sa mailad lang. (bobbygnalzaro@gmail.com) This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States