Thursday, December 2, 2021

https://www.sunstar.com.ph/

https://www.sunstar.com.ph/

Mandaue City may igong bakuna sa paglugway sa vaccination drive

Posted: 02 Dec 2021 06:31 AM PST

DUNAY igong doses sa bakuna ang dakbayan sa Mandaue alang sa national vaccination drive nga gilugwayan hangtod karong adlawa, Disyembre 3, 2021.

Ang vaccination czar sa dakbayan nga si Subangdaku Barangay Captain Ernie Manatad niasoy sa SunStar Cebu nga dunay igong doses sa Pfizer ug Sinovac nga magamit.

Matod ni Manatad, mo-request sila og dugang vaccines gikan sa Department of Health (DOH) 7 sa dugang bakuna.

Sumala ni Manatad, ang Mandaue City nitala og 25, 640 vaccination diin 113.89 percent nga mas taas sa quota sa National Vaccination Operations Center. / IRT

This posting includes an audio/video/photo media file: Download Now

Pasko, Bag-ong Tuig sa siyudad sa Sugbo

Posted: 02 Dec 2021 06:30 AM PST

ANG Cebu City Government niluwat na og mga direktiba para magsilbing tamdanan sa mga dagkong kalihukan sama sa Pasko ug Enero 2022.

Ang Misa de Gallo ug New Year midnight masses gitugotan sa City Hall apan sama sa naandan, ipatuman ang physical distancing ug ubang minimum health standard aron malikayan ang pagkatap sa Covid-19.

Wala usab gidili ni Rama ang pagpahigayon sa political activities and campaign inig sugod na sa kampanya sa national ug local nga nalatid sa Commission on Elections (Comelec) apan kinahanglan silang moduso sa ilang Pandemic Related Contingency Plan and Action Plan (PRCAP) ngadto sa Cebu City Emergency Operations Center para sa approval.

Mahimo na usab makapahigayon og limited face-to-face classes ang mga tunghaan nga gitugotan ilawom sa alert level 1,2,3 apan 50% capacity ra sa venue sa mga indoor apan kinahanglan nga bakunado ang magtutudlo, non-teaching personnel ug mga estudyante human niluwat og joint memorandum circular ang Commission on Higher Education (Ched) ug Department of Health (DOH) para sa inanay nga pag-abli sa klase sa kolehiyo.

Ang contact sports gitugot na usab ni Rama sa iyang bag-ong direktiba apan kadto rang mga bakunado ang gitugotan nga makaduwa, nagpuyo sa parehong barangay ug uban pang provision.

Ang street traders o vendors gitugotan nga makatinda apan kadtong mga lugar nga gilatid sa Garbo Asenso Sumbanan Alyansa (GASA) ilawom sa Office of the Mayor.

Sa samang direktiba, si Rama nitugot na sa pag-abli sa tanang establishment apan 50% ra ang gitugot sa mga indoor apan kadto rang pulos bakunado o 70% capacity sa outdoor.

Taliwa sa daghang kausaban, ipabilin gihapon ang pagsul-ob sa face mask, physical distancing ug ubang protocol batok sa pagkatap sa virus.

Samtang, ang Christmas parties gitugotan apan monitoron sa kapulisan aron matuman ang 50 percent nga capacity sa mga manambong nga pulos bakunado na.

Lakip sa subayon sa kapulisan adunay usa lang ka lugar mamahimong makatinda sa mga pabuto sa Disyembre 15, 2021 sa dili pa ang Misa de Gallo kon nakakuha na sila sa mga rekisitos gikan sa Police Regional Office (PRO) 7.

Samtang, mipagawas og kamandoan si Police General Dionardo Carlos, hepe sa kapulisan sa nasud nga mamahimo ra nga maka-Christmas break ang mga pulis atol sa Pasko ug Bag-ong Tig aron makauban nila ang ilang mga minahal sa kinabuhi.

Dinhi sa siyudad sa Sugbo, matod ni Parilla, nga ilang bahinon sa makatulo ang kapin sa usa ka libo ka mga personnel sa Cebu City Police Office (CCPO).

Adunay mo-break sa Pasko ug lain usab sa Bag-ong Tuig ug Three Kings sa Enero aron dili maapektohan ang ilang anti criminality operations ilabi na nga holiday season.(PAC / AYB)

This posting includes an audio/video/photo media file: Download Now

1 patay, 1 angol sa pagpamusil

Posted: 02 Dec 2021 06:28 AM PST

NAHUBOG ang suspek una gipusil-patay ang biktima sa Barangay Buhisan, siyudad sa Sugbo niadtong Miyerkules sa gabii, Disyembre 1.

Namatay diha-diha ang usa ka Filmar Rubi, 39, ug angol ang usa ka Socrates Cayacap, 40, pulos molupyo sa Sityo Kalumboyan sa Barangay Buhisan.

Ang suspek mao si Jimuel Flores, 21, taga Barangay Lorega San Miguel, siyudad sa Sugbo.

Matod ni Police Staff Sergeant Jeray Villahermosa sa Labangon Police Station, imbestigador sa kaso, nga si Rubi dunay igo sa bala sa pusil sa wala nga bahin sa iyang liog ug wala nga bahin sa iyang hawak.

Ang napagan nga si Cayacap nga igo sa wala nga bahin sa iyang bagtak nga miresulta sa pagkalandig sa balay tambalanan.

Sa imbestigasyon sa Labangon Police Station 10 nasayran nga si Rubi, Cayacap ug ang suspek nga si Flores nag duwa og bilyard sa ilang dapit ug matud sa angol nga si Cayacap nga si Rubi nagsige og komedya kang Flores samtang sila nagduwa.

Si Flores gituohang wala ka agwanta sa pangomedya sa biktima hinungdan nga miuli sa ilang balay ug miinom og tulo ka dakong botilya sa beer ug nibalik sa dapit nga hubog na.

"Alas singko pa daw na sa hapon nahitabo ang pagkomediya sa biktima ngadto sa suspek. Gani ang asawa sa biktima giingnan nana sa iyang asawa nga paulion na apan wala gyud maminaw," matod ni Villahermosa sa interbyu sa Superbalita Cebu.

Si Flores daling misibat human sa pagpamusil.

Ang kapulisan sa Labangon nagpadayon sa ilang hot pursuit operation atol ning pagsuwat.

This posting includes an audio/video/photo media file: Download Now

Tensiyon mitumaw sa nasunogan

Posted: 02 Dec 2021 06:26 AM PST

NITUMAW ang tensyon tali sa barangay kapitan sa Mambaling ug iyang kagawad nga naggiya sa staff ni Kongresista Rodrigo "Bebot" Abellanosa ug mga mga staff sa Department of Labor and Employment (Dole) nga maghatag og trabaho sa mga nasunogan sa sityo Lawis, Disyembre 2,2021.

Ang kaguliyang niulbo dihang naglinya na ang mga tawo nga gipaubos sa profiling sa Dole ubos sa Tulong Panghanapbuhay sa Ating Disadvantaged/Displaced Workers (TUPAD) aron sila makabenepisyo sa maong programa diin sila patrabahuon nga adunay minimum nga sweldo sulod sa 10 ka adlaw dihang kalit nga niabot si Kapitan Gines Abellana.

Matod ni Anne Marie Palomo, number one councilor sa Mambaling nga gipahunong ni Abellana ang activity sa Dole sa rason nga wala kini mananghid sa iyang buhatan ug nitangtang sa tarpaulin nga iya sa Dole.

"Nabastos na hinuon, nag-away ug naglalis na lang sad mi og apil.." padayag ni Palomo.

Matod sa konsehal sa Mambaling nga kadaghan na kini gibuhat ni Abellana nga ni intervener sa kalihukan sa Dole sanglit sa miaging duha ka sunog sa ilang barangay mao gihapon ang iyang gibuhat

Sila si Palomo ug Abellana dunay panagbingkil sanglit managlahi sila og partido. Si Palomo nanumpa isip kapitan niadtong 2019 dihang gisuspenso si Abellana sa Cebu City Council og 24 ka buwan apan nagdumili pagnaog sa iyang pwesto.

Gisuwayan og tawag sa Superbalita Cebu si Abellana aron kuhaan sa iyang pamahayag apan walay nitubag sa iyang cellphone number.

This posting includes an audio/video/photo media file: Download Now

No entry sa way bakuna

Posted: 02 Dec 2021 06:25 AM PST

PAHIBALO sa dakbayan sa Sugbo.

Sugod sa Enero 1, 2022, mga bakunado na lang ang tugotan nga makasulod sa indoor ug outdoor establishments subay sa bag-ong direktiba nga giluwatan ni Mayor Michael Rama Disyembre 1.

Lakip sa direktiba nga miepekto dayon mao ang pagkunhod sa curfew hours gikan sa alas 12:00 sa tungang gabii hangtod sa alas 3:00 sa kaadlawon, inay sa unang alas 11:30 hangtod sa alas 4:00 sa buntag, alang sa mga hamtong.

Magsugod ang curfew sa mga nag-edad og 18 paubos gikan sa alas 10:00 sa gabii hangtod sa alas 4:00 sa buntag.

Samtang, gimandoan usab ang mga nag-edad og 65 anyos pataas nga magpuyo lang una sa ilang panimalay.

Matod ni Police Lieutenant Colonel Wilbert Parilla, deputy city director for operation sa Cebu City Police Office (CCPO), walay labot niini ang authorized persons outside residence (Apor) basta lang mosunod kini sa minimum health standard.

Ang indoor ug outdoor establishments nga gipasabot sa direktiba ni Rama mao ang karaoke bars, night clubs, concert halls, theatres, venue sa licensure examination, permitted venues para sa social events sama sa parties, wedding reception, in-person religious gatherings sama sa necrological service, wakes, funerals ug daghan pang uban.

Dugang ni Parilla nga hugot gihapon nga idili ang mga pag-inom sa mga publikong lugar gawas lang sa mga imnanan nga nakatuman sa lagda sa Kagamhanan sa Siyudad sa Sugbo.

Ilawom sa bag-ong direktiba, ang carolling o daygon gitugot na usab apan kadto rang mga indibiduwal nga bakunado ang mahimong makapanaygon ug way labot ang mga menor de edad.

Ang carolling ug Christmas party mosubay gihapon sa implementasyon sa curfew ug mosunod sa minimum public health standards nga gipatuman sa City Government.

Lakip sa kamandoan sa mayor mao ang pagdili sa pagpasulod sa tanang establisemento ma pribado o mga opisina sa gobiyerno kon walay ikapakita nga vaccination card.

"So, starting January 1, 2022, whether it is public or private nga institutions they will only cater fully vaccinated clients, so kung dili ka fully vaccinated you can no longer avail the services or transact business in the government or private institutions," matod ni Parilla.

Panawagan sa kapulisan sa mga establisemento sama sa resto-bars ug mga kan-anan nga estriktong tumanon ang bag-ong lagda nga giluwatan ni Mayor Rama sama sa pagpangayo sa vaccination cards sa ilang kustomer sa dili pa nila kini hatagan sa order niini.

Kon aduna silay masayran nga wala motuman ang mga establisamento, bahad ni Parilla nga ila kining i-report sa Kagamhanan sa dakbayan sa Sugbo alang sa pagpahamtang og tukmang silot kanila nga malapason.

Giawhag usab sa Kagamhanan sa Dakbayan nga kadtong nagpangidaron og 12 pataas nga magpabakuna na sa dili pa matapos ang 2021 aron makab-ot ang target nga 70 porsiyento nga herd immunity sa siyudad.

Ang dakbayan ubos sa Alert Level 2 status. (PAC/AYB)

This posting includes an audio/video/photo media file: Download Now

P.6M nasakmit gikan sa magbilas

Posted: 02 Dec 2021 06:24 AM PST

MAGBILAS nasikop sa anti illegal drug operations nga gihimo sa Police Drug Enforcement Group (PDEG) Visayas Special Operations Unit (SOU 7) sa Barangay Danglag, lungsod sa Consolacion, pasado ala 1 sa Huwebes sa hapon, Disyembre 2, 2021.

Si Police Major Alejandro Batobalonos, deputy regional chief sa PDEG Visayas, maoy nangulo sa buy-bust nga niresulta sa pagkasikop nila ni Don Feljun Ponce, alyas Dondon, 29, kasamtangang lumolupyo sa Barangay Lamac sa Lungsod sa Consolacion ug Randy Negapatan, 33, taga Sityo Nawanaw, Barangay Subangdako, dakbayan sa Mandaue.

Magsuon ang mga asawa sa duha nga nadakpan.

Nasakmit atol sa pagpangronda nga shabu moabot og 101 gramos ang gidaghanon nga mokantidad ngadto sa P686,800 base sa street drug price value.

Matod ni Batobalonos nga ang grupo ni Police Captain Rondina ni-monitor kang Ponce sulod sa duha ka semana.

"Base sa among pag pangutana ug sa iyang pag-angkon si Michael Caban ang iyang agawon daw nga maoy iyang kontak nga mahatagan siya og item," matod ni Batobalonos.

Gikonsiderar sa PDEG Visayas nga newly identified drug personality si Ponce.

This posting includes an audio/video/photo media file: Download Now

Durano gikombikto sa Sandiganbayan; moduso og motion for reconsideration

Posted: 02 Dec 2021 06:22 AM PST

MODUSO og motion for reconsideration ang kampo ni gubernatorial aspirant Joseph Felix Mari "Ace" Durano kalabot sa pagkombikto sa Sandiganbayan kaniya ug sa iyang mga staff sa Department of Tourism (DOT) may labot sa wall calendar project sa 2008 atol sa siya pa ang Tourism secretary.

Dunay tulo ka mga kaso nga gipasaka batok kang Durano ug sa lima pa ka mga kaubanan niini sa buhatan sa 2016 labot sa pag award sa P2.7 milyones nga kantidad sa proyekto atol sa iyang termino sa 2008 ngadto sa 2009.

Apan ang duha ka mga kaso gi dismiss sa korte.

Nahabilin nga kaso ang sa wall calendar project nga gi-subject sa uwahing promulgation sa Sandiganbayan sa Nobiyembre 26, 2021.

Kauban ni Durano nga gipangkiha mao sila si kanhi DOT undersecretary Oscar Palabyab ug kanhi opisyales sa Bids and Awards Committee (BAC) nga sila si Grave Yoro, Eduardo Jarque Jr., Evelyn Cajigal, ug Adriana Flor.

Matod sa Ombudsman nga si Durano solo nga mipirma sa MOA human ni-issue og certification nga nag-identify sa PDP Digital Inc. isip supplier sa DOT niadtong Disyembre 2, 2008 nga kinahanglan untang dunay BAC resolution nga mag-justify alang sa laing pamaagi sa procurement.

Ang Ombudsman miingon nga ang BAC miuyon sa certification ni Durano bisan kon walay nahitabong public bidding o survey aron masusi ang supplier sa wala pa sugdi ang procurement process.

Giingong si Durano nakahimo og kalapasan dihang mipirma og memorandum of agreement (MOA) tali sa PDP Digital Inc. nga nagkantidad og P2.7 million niadtong Oktubre 2008 alang sa "conceptualization and development" sa wall calendar sa DOT alang sa tuig 2009.

Si Durano gipasakaan og usa ka count sa paglapas sa Section 3 (e) sa Republic Act No. 3019 kun Anti-Graft and Corrupt Practices Act.

Sa 57-ka pahina nga decision, ang Sandiganbayan Seventh Division nga gi-chaired ni Ma. Theresa Dolores Gomez-Estoesta, nikombikto kang Durano tungod sa giingong pagpakigkunsabo tali sa bids and awards committee sa DOT aron paboran ang PDP Digital Inc.

Matod sa Sandiganbayan nga si Durano nipakita og "manifest partiality" pinaagi sa pagbaliwa sa bidding processes sa kagamhanan sa pag-award sa PDP Digital Inc. nga dunay kontratang wa moagi og competitive bidding.

Ang hukom gipakanaug pinaagi sa online proceedings niadtong Nobiyembre 26, 2021.

"Dili sad ni issue sa overpricing or ghost project. Ang issue ra gyud ang proseso gigamit sa DOT sa pag mugna sa project," matod ni Durano.

Si Atty. Dwight Remedio, legal counsel ni Durano, nipasalig nga ilang pangitaan og legal nga remedyo ang kaso aron malimpyo ang ngan ni Durano.

Ning pagsuwat wala pa'y nadawat mga kopya sa ruling ang kampo ni Durano.

"Naghuwat pa ta sa hard copy nato sa decision since promulgation was done online and the court will send us a copy but definitely we will file a Motion for Reconsideration of the decision," matod ni Remedio sa interbyu sa Disyembre 1.

PULITIKA GYUD?

Nagtuo si Durano nga politically motivated ang maong kalamboan, apan nagtuo siya nga dili kini makapatandog sa iyang tinguha sa pag serbisyo sa lalawigan sa Sugbo.

"Ang duha sa ilang gi-file na dismiss na. Karon 2021, human ko niingon nga modagan pagkagobernador, nitumaw na pud ni nga kaso. Murag klaro naman siguro unsay pasabot ani," matod ni Durano sa iyang opisyal nga pamahayag.

"Kibaw naman ta unsa ni kay ako DOT secretary niadtong 2004 hangtud 2010. Gisugdan nila'g file ning mga kaso pag human sa 2016 nga election--- unom ka tuig human ko wala na sa DOT. Sunod kaso na pud gipasaka pag 2019 nga election,"matod ni Durano.

Matod niya nga di kini makabugnaw kaniya sa pagpadayon sa pagdagan.

"I said before that fighting the incumbent is like scaling Mt. Apo, and this is just one proof, naa kalit obstacle mogawas. Sa 20 yrs nga nag serbisyo ko sa gobiyerno ug sa katawhan, karon lang gyud intawon nga naa tay kaso nga nilansar ta pagka gobernador," dugang niya.

Bisan tuod kon wa siyay gihinganlan, apan ang iyang kaatbang sa 2022 elections nga incumbent mao si Governor Gwendolyn Garcia.

NGANO GUD?

Gitambagan ni Garcia si Durano nga atubangon niini ang desisyon sa Sandiganbayan nga nagkombikto kaniya, di lang mamasangil nga ang hukom dunay pulitikanhong motibo.

"My advice to Mr Durano: Face your cases like a man. Stop whining. And certainly stop impugning the integrity of the Ombudsman and the Sandiganbayan," matod sa pamahayag sa gobernador.

Subay niini, gi-himakak usab sa gobernador nga duna siya'y kalabotan sa kasamtangang ruling nga gi-isyu sa Sandiganbayan.

"Politically motivated? I understand the information was filed against Mr Durano sometime in 2017. And the Office of the Ombudsman filed a case against Mr Durano on March 22, 2019. I was not even governor then, on both dates. So how could it be politically motivated? By clairvoyance?," pasabot ni Garcia.

This posting includes an audio/video/photo media file: Download Now

Gi-salvage, gilubong sa katubhan napalgan

Posted: 02 Dec 2021 06:15 AM PST

USA ka wala mailhi nga lalake nga gituohang gi-salvage gilubong sa katubhan ug ang lawas napalgan alas 7:00 sa buntag sa Huwebes, Disyembre 1, 2021 sa Purok Dragon, Brgy. Managase, lungsod sa Tabogon, amihanang Sugbo.

Si Police Corporal Dan Bernard Navarro sa Tabogon Police Station nga nahinabi sa Superbalita Cebu nagkanayon nga ang lalake nakuykoyan sa duha ka mga menor edad nga nakakita sa lungag nga bag-ong gitabunan taliwa sa katubhan.

Sumala ni Navarro, ang duha ka menor de edad nitubag sa sugo sa lawas.

Nakabantay sila sa lang-og kaayo nga baho pipila ka metros gikan sa ilang nahimutang hinungdan nga ilang gisusi.

Ilang gikuykoy ang lungag ug nasurprisa sila kay nigimaw ang underwater sa usa ka tawo hinungdan nga nagdali sila sa pagbiya gipahibalo ang mga tawo.

Ang ulo giputos sa tape hinungdan nga nagtuo ang kapulisan nga gi-salvage ang biktima.

Sumala pa ni Navarro nga nagpadayon ang ilang imbestigasyon sa kaso.

This posting includes an audio/video/photo media file: Download Now

18,785 nabakunahan sa Consolacion sa 3 ka adlaw

Posted: 02 Dec 2021 06:14 AM PST

MOABOT sa 18,785 ang nabakunahan sa lungsod sa Consolacion atol sa tulo ka adlaw nga National Vaccination Day nga gisugdan sa Nobyembre 29 hangtod sa Disyembre 1.

Ang lungsod sa Consolacion gitahasan sa Department of Health nga makab-ot ang pagpamakuna sa 18,000 ka mga indibidwal sulod sa tulo ka adlaw nga kalihokan o gibana-bana nga anaa sa 6,000 ang mabakunahan matag adlaw.

Sa unang adlaw sa pagpamakuna, nakahatag ang lungsod og 6,429 ka doses, sa Nobyembre 30 6,041 ka doses ug 6, 315 ka doses sa Disyembre 1.

Nakatampo usab ang pag-abag sa emergency response personnel sa pagpamakuna sa Barangay Pulpogan tungod sa daghan nga mga lumolupyo sa maong dapit.

Matod ni Consolacion Mayor Joannes "Joyjoy" Alegado nga padayon gihapon ang pagpamakuna sa lungsod bisan kon ila nang nakuha ang target.

Gidugang sa mayor nga ipadayon gihapon ang Bakunahan sa Kabarangayan sa Miyerkules ug ang Bakuna Nights sa ubang mga adlaw.

Gawas niini, lakip sa gipangandaman sa lungsod ang paghatag og booster shots.

Aron malikayan ang pagdagsa sa vaccination sites, giawhag ni Alegado ang publiko nga magpabakuna na ug dili maglangay sa pagduaw sa vaccination sites.

"The three day national vaccination days in Consolacion was a success because our barangay officials, barangay workers and purok leaders went out of their way to reach out to everyone. They helped mobilize our people. Also the municipal officials together with the municipal information office had intensified the campaign by going directly to the people in person conducting small group discussion. We have used social media as well. So everyone was doing their part," matod ni Alegado.

Base sa talaan sa Cebu Vaccination Statistics nga gipagawas sa Project Balik Buhay niadtong Nobyembre 30, ang lungsod aduna nay 71.59 porsyento nga nabakunahan sa first dose samtang adunay 45.29 porsyento alang sa mga fully vaccinated.

Sa pagkakaron ang lungsod adunay duha ka aktibong kaso sa Covid 19, 160 ang namatay ug 2,774 ang naulian.

This posting includes an audio/video/photo media file: Download Now

Rabacal: Ordinance 93-1 wa pa mapatuman

Posted: 02 Dec 2021 06:11 AM PST

NIADTONG Nobiyembre 16, 2021, nadawat sa Cebu City Council ang suwat gikan sa 93-1 Movement Core Group uban sa presidente sa mga Homeowners Associations (HOA) nga nagpahinumdum kang Mayor Mike Rama ug sa mga konsehal kalabot sa ilang obligasyon ngadto kanila nga mao ang mosunod:

(A.) Pagbaligya ngadto sa mga residente sa 93-1 sa mga lote nga ilang gitarukan sa ilang mga balay gikan sa P500 ngadto sa P800 only with 6% interest per annum;

(B.) Sa pag-implementar sa Deed of Donation and Acceptance nga maoy subject sa land swap deal/exchange agreement sa Cebu City ug Cebu Province.

Niadtong Enero 13, 2020, diha silay meeting uban kang Mayor Edgardo Labella diin gipasaligan sila sa mayor nga ang ilang yuta nga gipuy-an mabaligya ngadto kanila. Gawas kang Mayor Labella diha pay daghang mga opisyal sa Cebu City hall nga nahinabi sa ilang grupo diin ang tanan mipasalig nga motabang kanila.

Hinaut pang madiskutir kini sa mga konsehal atol sa ilang umaabot nga council session aron kahatagan og kahayag ang mga sakop sa 93-1 Movement labi na nga mitaliwan na sa laing kalibutan si Mayor Labella. Nasakitan sila kay tarong kaayo mopasalig ang ubang mga opisyal unya bakak diay ang resulta. Sumala nila nga "Sa demokrasya ang hari mao ang katawhan dili ang nagdumala maghari-hari. Ang pundo sa panudlanan sa kagamhanan gamiton alang sa katawhan, dili sa kaugalingong bulsa."

Ang suwat gipirmahan sa mga presidente sa core groups nga sila si Eulane S. Quiros, Emily M. Malto, Isidro B. Lodrita, Claro C. Binatiro ug 40 ka laing mga presidente.

Dunay naglainlaing pangagpas sa eulogy ni kanhi Cebu City Administrator Floro Casas, Jr. diin iyang gipahibawo nga adunay dakong mahitabo niining moabot nga mga adlaw nga ipahibawo nila uban sa pamilya ni anhing mayor Edgardo Labella. Ang pagtuo sa uban nga ako usab nga gituhoan mao nga ang pamilya ug ang mga kauban nila ni Casas mubiya sa Barug party ni Mayor Mike Rama.

Ang ilang paluyohan mao si mayoralty candidate Dave Tumulak pagka-mayor ug Konsehal Raymond Alvin Garcia pagka-bise mayor. Gipaabut nga si kanhi konsehal Joey Daluz maoy ilang himuong campaign manager. Siya man ang campaign manager sa Labella – Rama tandem niadtong milabay nga eleksiyon. Adunay mga tawo ni Presidente Rodrigo Duterte nga gidudahang mokoyug usab nila ni Casas.

Kon mahinayon kini, mabungkag ang administration party ug daku nag bintaha ang kaatbang. Nangutana ang uban nakong higala og wala ba tuyoa pagpalansar pagka-mayor si Tumulak kay nakita na nila nga mabungkag ang Barug? (mannyrabacal1144@gmail.com)

This posting includes an audio/video/photo media file: Download Now

Nalzaro: Toledo LGU buraska

Posted: 02 Dec 2021 06:09 AM PST

BISAN sa krisis karon, may rason nga maglipay ug magmaya ang mga regular employee sa Toledo City government kay puwerting dakoa sa ilang dawatunon nga pinaskuhan gikan sa kagamhanan. Base sa newspaper reports, gianunsiyo ni Toledo City Mayor Marjorie 'Joy' Perales nga ang 2,000 ka regular employees makadawat og duha ka buwan nga bonus base sa ilang usa ka buwan nga suweldo ug laing P30,000 Christmas bonus. So, kon nagsuweldo ang empliyado og P20,000 kada buwan, makadawat siya og suma total P70,000. Kini gawas pa sa ilang 13th month pay nga gi-released sa miaging semana.

Morag wala maigo og pandemic ang Toledo City. Kay samtang ang ubang local government units (LGUs) naglisud o na-short sa revenue collection kay daghang mga negosyo nanira kay apektado sa pandemiya, ang Toledo City buraska. Dili ba sila apektado sa pandemiya? Nakahatag ba silag ayuda sa ilang mga lumulupyo? Naka-implementar ba sila og mga proyekto ug nakahatag og mga mihuras diin nakabenepisyo tanang mga konstituwente?

Dili ako supak sa paghatag og incentives kon sila nagtrabaho ug nagserbisyo. Apan paminaw nako, morag sobra ra kaayo ning gihimo sa mga opisyal sa siyudad labi pa ania kita sa krisis. Ato lang pahinumduman si Mayor Perales nga dili na iyang personal nga kuwarta bisan kon aduna silay balaod nga gibasehan sa paggahin. Kuwarta na sa mga magbubuhis. Di lang unta niya gamiton sa pamulitika samtang nagsingabot ang eleksiyon.

POLITICAL PATRONAGE

Dinhi sa Pilipinas, usa ray kahulogan sa pulong 'political patronage. Kini nagpasabot sa paggamit sa bahandi sa gobiyerno aron ipahalipay sa mga supporter sa mga pulitiko. Normal na kini ilabi na kon nagsingabot ang eleksiyon. Karong panahona, ayuhon ang mga kalsada, mahapsay ang panerbisyo ug hatagan og dagkong bonus ang mga empliyado.

Nganong dili man mahunong ang 'padrino system'? Kay halos tanang pulitiko misagop niini. Kon ang naghupot og tag-as nga pwesto sa gobiyerno nagpraktis ini, walay rason nga ang mga rank and file dili mosunod. Hangtod sa hangtod na lang nga si Juan Dela Cruz nagpagisal sa iyang kaugalingong mantika sa amo nga tang-an nga pulitiko. (bobbygnalzaro@gmail.com)

This posting includes an audio/video/photo media file: Download Now

Editoryal: Mosumbalik atol sa eleksyon

Posted: 02 Dec 2021 06:08 AM PST

GIKINAHANGLAN nga magpabakuna na ang tanan karon pa lang kay sugod sa Enero 1, 2021, ang tanang tawo nga mosulod sa mga establisemento sa Dakbayan sa Sugbo kinahanglan nga makapakita og vaccine card. Sa ato pa, mga bakunado lang ang makasulod sa bisan asang dapit, bukas o enclosed man.

Tanang matang sa mga kalihukan itugot, apan kadto lang mga bakunado ang tugtan nga makaapil. Pananglitan sa reception sa kasal, indoor o outdoor man, kadto rang mga tawo nga hingpit nang bakunado ang makaapil. Kadtong way bakuna, di makasalmot kay ang mga establisemento nga sudlan di magpasulod tungod sa kamandoan sa kagamhanan.

Tuod, gawas aning mandatory nga swab test sa nasudnong kagamhanan alang sa mga kawani, ang mga trabahante di makasulod kon di bakunado o way test matag duha ka semana sugod sa Disyembre 4.

Busa, kinsa may di mapugos niani?

Kaning pugsanay nga pagpabakuna bisan niadtong di andam o way planong magpatusok mosumbalik ni karong eleksyon. Kining mga tawhana nga di ganahan magpabakuna tungod sa nagkadaiyang mga rason manimawos panahon sa eleksyon batok sa mga opisyal nga nagpatuman og mga polisiya nga magpugos ning mga tawhana.

Bisan sa social media, nangbahad na sila nga manimawos sila panahon sa eleksyon. Di lang kay sila, bisan kadtong mga nagpabakuna nga nag-ila sa katungod o nagsimpatiya kanila di makauyon sa mga opisyal nga nagdusog mga polisiya nga magpugos sa usa ka tawo nga magpabakuna.

Kining lakang nga ipatuman ni Cebu City Mayor Michael Rama dako og kahigayunan nga mosumbalik kini kaniya atol sa eleksyon. Iya ba kaha nga nahuna-hunaan nga di karon panahon sa pagmugna og mga kaaway gikan sa mga botante tungod kay election season na baya karon.

Kini ra bang pulitika daugon ni sa numero. Di ni subtraction ug division, kon di, addition ug multiplication.

This posting includes an audio/video/photo media file: Download Now

Talk to Papa Joe: Pirme ko sayop

Posted: 02 Dec 2021 06:05 AM PST

Dear Papa Joe,

Tawga lang ko sa ngalan nga Kim. Mangayo ta kog advice bahin sa situation with my partner. May anak mi nga usa ra.

Ingon ana ba ang tawo kon wala nay love nga sa tanan nakong istorya, may sayop ko? Or di man gani mangita siya og butas para masayop ko ug bisan maski gamay ra kaayong hinungdan, ikasuko na niya nga maoy cause sa away.

Makaingon ko sa akong kaugalingon kon sayop ba diay nga murag siya may sayop ug nganong naa siyang dapita nga kahibawo man siya nga sala ang iyang giukopar nga unta adto man siya sa room sa akong anak kon naa siyay himoon para di siya matugaw. Adtong higayuna wala man ang akong anak. Nasuko siya kay wala koy huna-huna nga makita siya nya usa pa, duol pa jud sa door, lisod pagsud nya may dog pa sa door plus siya pa. Busa maglisod kog agi. Pero sa among anak lahi ra kaayo iyang tinagdan kalma siya manulti hasta pud akong anak lahi ra pud iyang tinagdan nako. Papa Joe, gusto na jud ko nga mohawa diri ilang balay. Mag-rent na lang ko kay buyag naa man koy business nga gamay ra.

KIM

Kim,

Dili kaayo klaro imong problema no, murag hilaw o may tinagu-ang hinungdan nganong naing-ana imong partner. Naa gyud nay rason nganong init iyang ulo nimo. Ang imo lang nangutana ka kon ing ana ba gyud ang tawo nga way gugma. Well, naka anak mo, so meaning naay gugma nga namugna before na nihupas kay basin dunay rason nga di sad nimo e share.

Ang scenario lang nga konsa akong pangagpas mura naman hinuon og binata ra, maglahi-lahi og puyo. Tukia usa ang cause sa problem una ka mo conclude. Mura ra kag niingon nga ing-ani kasakit diay masamad sa dagum? Depende natunok ka, gi tusok og tuyo kay kon ing-ana man gani ang matubag ra nako? Magdugo gyud.Daghang salamat.

Papa Joe

(sa inyong tampo ipadala sa papajoesuper@gmail.com)

This posting includes an audio/video/photo media file: Download Now

Super Suroy: Nanda Cafe: Kan-anan sa bukid sa Lacion

Posted: 02 Dec 2021 05:43 AM PST

Una nang napatik dinhi sa Super Suroy section ning pamantalaan ang Wooloo mountain resort nga nahimutang sa bukirang bahin sa Barangay Garing, Lungsod sa Consolacion, Lalawigan sa Sugbo.

Atong gisunod og suroy ang silingan niining kan-anan nga diha ra duol sa tugkaran sa Wooloo Resort, ang Nanda Café.

Gani, sa akong pagkaplag sa maong lugar maingon ko nga dili lang ang Barangay Busay, Dakbayan sa Sugbo ug Lungsod sa Balamban ang mga dapit nga mahimong masuroyan ilabi na niadtong gusto nga mohanggap og presko nga hangin samtang naglantaw sa kanindot sa kinaiyahan nga nagbunta-og sa urban skyline sa Sugbo.

Ang mga Sugbuanon, ilabi na niadtong nagpuyo sa amihanan, dili na kinahanglang mosagubang sa trapiko sa dakbayan sa Sugbo aron lang mosaka sa Busay o sa ubang dapit kay naa ra sa inyong duol ang Nanda Café.

Ang naasoyng lugar nahimutang sa Barangay Garing nga adunay lapad nga open-air eating area ug daghang kapili-an og pagkaon nga siguradong makatagbaw.

KAN-ANANG NAGHANDAG SA BUKID

Una nakong namatikdan sa maong lugar mao ang kalapad sa area sa Nanda Café.

Gawas nga kan-anan adunay mga amenities nga makalingaw dili lang sa mga bata lakip na ang mga hamtong.

Perfect sab ang Nanda nga human sa inyong pagpangaon maka-relax ilawom sa landong sa mga tag-as nga punoan sa kahoy.

Samtang ang mga bata dili bati-on og ka-boring nga magpunay nalang og tutok anang screen sa gadget kay adunay play area nga haom alang kanila.

Amping lang sa pagdagan-dagan, kapyot sa monkey bar o pagsaka sa tree house aron di mapangos.

Tungod kay elevated ang Nanda, nagbantang ang lugar sa Dakbayan sa Sugbo.

Sa adlawan makita ang 360 degrees sa Consolacion ug motadlas pa ang imong panan-aw sa ubang bahin sa Metro Cebu.

UNSAON PAG-ADTO?

Gibana-bana nga molanat ngadto sa usa ka oras ang biyahe paingon sa maong lokasyon kon manukad sa Dakbayan sa Sugbo.

Sa kadtong adunay pribadong sakyanan mamahimong mogamit og directional app aron nga dili masaag sa inyong pagbiyahe.

Sa kadtong mag-commute adunay habal-habal diha sa North Road kun sa Poblacion sa Consolacion nga mohatod sa Barangay Garing sa gibana-bana nga P100 ang pletehan.

DUGANG INPORMASYON

Way entrance fee sa inyong pagsulod sa lugar nga pet friendly.

Bukas ang Nanda gikan sa udto ngadto na sa alas 9:00 sa gabii gikan sa Lunes ngadto na sa Biyernes, samtang sa Sabado ug Domingo bukas kini sa 7:00 sa buntag ngadto na sa 9:00 sa gabii.

Alang sa dugang pangutana, mamahimong moduaw sa ilang opisyal nga Facebook page nga Nanda Café Garing.

Makontak ang lugar sa telepono: (032) 517-8889; 0998-589-6764; 0966-520-8531.

This posting includes an audio/video/photo media file: Download Now

Casimero target ni Inoue sa 2022

Posted: 02 Dec 2021 05:28 AM PST

NAGPLANO si Japanese boxing superstar Naoya "Monster" Inoue nga mosaka na og timbang sa umaabot apan sa dili pa niya kini buhaton, gusto niyang kontrahon una si Filipino Johnriel Casimero sa usa ka world bantamweight unification bout.

Si Inoue, kinsa maoy tag-iya sa International Boxing Federation (IBF) ug World Boxing Association (WBA) bantamweight titles, nakatakdang modepensa sa iyang mga korona karong Disyembre 14, 2021 batok kang Thai fighter Aran Dipaen.

Human niini, gusto niyang isunod sa linya si Casimero sa sunod tuig. Si Casimero, kinsa gitawag og Quadro Alas", maoy naggunit sa World Boxing Organization (WBO) bantamweight belt.

Nakaeskedyul na untang magsangka sila si Inoue ug Casimero niadto pang 2020 apan wala kini nadayon gumikan sa pagkuyanap sa Covid-19.

Si Inoue, kinsa nag-edad og 18 ug adunay perpektong 21-0, 18KOs nga rekord, nagkanayon nga aduna pa siya'y taas nga pangandoy.

Kon molampos siya batok kang Dipaen ug Casimero, hayan plano niyang mosaka sa super bantamweight.

Alang kang Inoue, wala pa mogawas ang tanan niyang ikabuga ning puntoha sa iyang boxing career.

This posting includes an audio/video/photo media file: Download Now

PBA makigkumboya sa Gilas alang sa EASL

Posted: 02 Dec 2021 05:26 AM PST

NAGPLANO ang Philippine Basketball Association (PBA) nga magpadala sa labing maayong teams nga ilang maporma alang sa East Asia Super League (EASL), lakip na niini ang Gilas Pilipinas.

Gipasabot ni PBA chairman Ricky Vargas nga wala pa sila'y proseso kon unsaon ang pagpili og mga magduduwa apan apil sa ilang plano mao ang pagpahigayon og draw by lots o magpili og mga magduduwa gikan sa mopatigbabaw nga upat ka teams.

"The other one, we may even consider including the Philippine team, Gilas," batbat ni Vargas nga napatik sa www.gmanews.tv.

Sa EASL, nga sugdan sa sunod tuig, ikaharong sa PBA ang dekalidad nga mga puwersa gikan sa ubang professional leagues sa rehiyon sama sa Japan B.League.

This posting includes an audio/video/photo media file: Download Now

Ancajas-Ioka gilubog sa bag-ong kagaw

Posted: 02 Dec 2021 05:24 AM PST

WALA pa man tuod opisyal nga pamahayag gikan sa Japanese promoter apan posibleng dili madayon o mauswag sa laing petsa ang unification bout tali nila ni Filipino Jerwin Ancahas ug Japanese Kazuto Ioka nga gikatakda karong Disyembre 31, 2021 sa Tokyo, Japan.

Gikan sa iyang training camp sa Los Angeles, si Ancajas nagplano untang molarga paingon sa Japan karong Disyembre 11, 2021 apan kuli kining mahitabo tungod sa gipatumang travel ban sa Japan sa tanang mga langyaw nga mosulod sa ilang nasod.

Kini gumikan sa nadiskubrihan nga Omicron variant, bag-ong klase sa kagaw sa Covid-19.

Sa interbyu sa Daily Tribune, nagkanayon si MP Promotions head Sean Gibbons nga iyaha pang klaruhon ang tanan kabahin ning kakulian.

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...