Saturday, December 4, 2021

https://www.sunstar.com.ph/

https://www.sunstar.com.ph/

224 nasikop sa Oplan Bulabog sa kapulisan; labing daghan sa bilyaran sa Capitol Site

Posted: 04 Dec 2021 07:14 AM PST

Nasurpresa ang mga nanag inom sa sulod sa bag-o lang gibuksan nga bilyaran nga nahimutang sa M.P Yap street, barangay Capitol Site, Dakbayan sa Sugbo sa dihang kalit nga nangabot ang mga pulis gikan sa Cebu City Police Office pasado alas 12 sa Sabado sa kaadlawon, Disyembre 4, 2021, aron ipatuman ang lagda sa curfew.

Nangulo sa Oplan Bulabog ang deputy city director for operations sa CCPO nga si Police Lieutenant Colonel Wilbert Parilla uban sa mga opisyal sa Business Permit and Licensing Office (BPLO).

Matod ni Parilla nga ang lugar usa ka residential area diin ang mga namuyo mireklamo ngadto sa BPLO sa kasaba sa mga nanag inom bisan kaadlawon na.

Tungod niini nagpatabang ang BPLO sa kapulisan nga naatol usab nga mihimog dungan nga Oplan Bulabog sa mga imnanan, kon nituman ba ang mga establisemento sa kamandoan ni Cebu City Mayor Michael Rama.

Ang bilyaran ug kasamtangan nga imnanan bag-o lang nag abli sa ilang negosyo. Gani giproseso pa ang business permit niini.

Taud-taod na ang reklamo sa mga residente sa dapit nga bisan sa lawom nang gabii daghan pa ang manag inom sa sulod ug saba.

Ang buhaton sa management sa establisemento inig abot sa alas 12 sa tungang gabii kon weekends ug daghan pa ang ilang customer, sirad-an nila ang entrance gate ug tabunan kinig trapal.

Dili na kini makita sa gawas apan padayon ang panag inom sa sulod sa mga customer, matod ni Parilla.

Daghang nakitang kalapasan ang mga opisyal sa BPLO sama sa wala pagtuman sa gikasabutan nga 50 porsiento nga capacity ug wala usab mosusi kon bakunado ba ang ilang mga customer.

Gumikan sa kalapasan, giisyuhan dayon sa taga BPLO og show cause order ug patubagon sila sulod sa 72 oras.

Gidugang ni Parilla nga wala makapakita og special permit gikan sa Emergency Operations Center (EOC) ang bilyaran nga makabaligya silag ilimnon nga makahubog sa ilang customer.

"Wala sila maka pakitag special permit sa EOC, wala tanan so ila nang tubagon sa BPLO," matod ni Parilla.

Sa talaan sa CCPO, moabot ngadto sa 228 ang nangadakpan sa Oplan Bulabog sa tanang mga establisemento nga gisusi ug 224 niini nakalapas sa lagda sa curfew, 17 kanila mga menor de edad.

Dugang ni Parilla nga kinahanglan nga motuman ang mga imnanan ug mga kan-anan sa kamandoan gikan sa Kagamhanan sa Dakbayan sa Sugbo tungod kay naa pa ang Covid 19 nga dili angay nga kakompyansahan.

This posting includes an audio/video/photo media file: Download Now

5 na ang nahulog sa drainage project sa Bankal, Lapu-Lapu; contractor gibasol

Posted: 04 Dec 2021 07:10 AM PST

Usa ka traysikol ang labing ulahing biktima sa nagpadayong drainage project sa dakbayan sa Lapu-Lapu dihang nahulog sa gikawot nga bahin sa Barangay Bankal, Biyernes, Disyembre 3, 2021.

Matod ni Mario Napuli, officer-in-charge sa City Traffic and Management System Office (CTMS) nga ang tuo nga ligid sa traysikol naigo sa babag nga naglibot sa gikawot nga lugar nga niresulta nga nawad-an siya og kontrol ug nahulog sa lungag.

Sa pakighinabi sa Sunstar Cebu, si Napuli namahayag nga ang drayber nakaangkon og menor nga samad sa ulo samtang ang iyang bugtong pasahero nahiagom og gagmay nga mga bun-og sa lawas.

Dugang pa ni Napuli nga kinahanglang magbutang og dugang early warning devices ang mga kontraktor sa proyekto aron mapahibalo ang mga motorista sa nagpadayong construction sa maong lugar.

Giawhag usab sa kadagkuan sa traffic management ang mga motorista nga mogamit og alternatibong mga rota aron malikayan ang mga gikawot nga lugar.

IKALIMA NA

Sa buwag nga pakighinabi, si Bankal Barangay Captain Eduardo Cuizon niingon nga kini ang ikalima nga aksidente nga nahitabo sa barangay nga naglambigit sa drainage project.

Si Cuizon namahayag nga iyang ipatawag ang contractor tungod sa sunod-sunod nga disgrasya sa proyekto nga nagpadayon sulod sa kapin sa usa ka tuig ug mahuman unta niadtong Hulyo ning tuiga.

"Dili lang unta kwarta ang ilang gi apas, ilaha pud unta siguroon ang serguridad sa lumalabay sa karsada nga dili ma disgrasya tungod sa ilang trabaho," matod ni Cuizon.

Gisaway usab sa kapitan sa barangay ang Department of Public Works and Highways (DPWH) sa pagtugot sa kontraktor nga maka-operate bisan og nalapas na niini ang gitakdang deadline sa kontrata.

"If the DPWH is allowing contractors even if they already behind schedule, there is something wrong with it," matod ni Cuizon.

Ang groundbreaking ceremony sa P46.4 million Basal-Cagudoy-Bankal-Buaya road and drainage project gipahigayon niadtong Nobyembre sa 2020.

Pipila ka mga adlaw ang nakalabay, usa usab ka motorista ang nahulog sa gitrabahong drainage project sa Bagumbayan 2, Maribago nga iya sa Department of Public Works and Highways (DPHW).

Daghan nang mga sakyanan ug motorista ang nangahulog ning mga proyektoha, apan way aksyon nga gihimo.

This posting includes an audio/video/photo media file: Download Now

9,000 nakadawat sa booster shots sa Cebu City

Posted: 04 Dec 2021 07:05 AM PST

Gipahibawo ni Cebu City Health Department Chief, Dr. Jeffrey Ibones nga adunay kinatibuk-ang 9,000 ka booster shots ang nahatag na ngadto sa mga priority group nga A1, A2 ug A3 atol sa National Vaccination Day gikan sa Nobiyembre 29 - Disyembre 3.

Hinuon, gipahayag ni Ibones nga partial pa ang 9,000 ka booster shots count sanglit ang City Health Department nagpadayon pa sa pagkolekta sa ilang datos gikan sa ubang vaccination sites sa tibuok siyudad.

"We still cannot determine the totality because we are still continuously encoding the data. I think we have at least around 20,000 but we are unsure because we are still encoding the data. Because on the first day, we did everything manually," matod ni Ibones.

Adunay 90 ka vaccination sites sa dakbayan sa Sugbo, apan ang booster shots ipahigayon lamang sa fixed vaccination sites tungod kay ang pop-up vaccination sites magsilbi lamang niadtong makadawat sa una o ikaduhang doses.

Gihisgutan ni Ibones nga 24 oras ang pagtrabaho sa City Health Department aron mahuman ang encoding ug nanghinaot siya ug ang iyang team nga mahuman na nila ang encoding sulod ning semanaha o sa sunod.

"I will notify if makompleto na ang encoding,' dugang ni Ibones.

Matod ni Ibones nga tan-awon sa City Health Department kon aduna pa bay igong booster shots karong Lunes tungod kay daghan na ang mga booster nga nahatag.

This posting includes an audio/video/photo media file: Download Now

Pagtukod sa San Fernando port sugdan sa Enero 2022; WTG midaug sa bidding

Posted: 04 Dec 2021 07:05 AM PST

Ang pagtukod sa San Fernando Port Project sa Brgy. Ang Poblacion, San Fernando, Cebu magsugod sunod buwan human ang Cebu Port Authority (CPA) nakapili na og kontraktor human sa tulo ka napakyas nga biddings.

Niadtong Nobiyembre 27, ang CPA nipahibawo nga nakadawat na sila og pagtugot gikan sa Cebu Port Commission nga ihatag ang kontrata sa P336.11 milyones nga proyekto ngadto sa WTG Construction and Development Corp.

Sa usa ka pahayag, si CPA General Manager Leonilo Miole niingon nga ang CPA "mopagawas sa Notice of Award, mopirma sa kontrata ug unya mag-isyu sa Notice to Proceed aron masugdan dayon ang groundwork ug construction karong Enero 2022."

Ang Department of Transportation (DOTr) nigahin og P336,114,557.47 alang sa proyekto nga naglakip sa pagguba sa daan na nga pantalan karon ug pagtukod og bag-ong pasilidad sa roro.

Upat ka mga bidder ang misumite sa mga dokumento sa bid para sa Oktubre 5, 2021 nga pag-abli sa mga bid.

Kini mao ang Vicente T. Lao Construction, WTG Construction and Development Corp., BNR Construction and Development Corp. ug ang joint venture tali sa RCDG Construction Corp., BSP & Company Inc. ug Great Swiss Metal Builders Corp.

Ang mga bid lamang sa WTG ug BNR hinuon ang gideklarar nga kwalipikado human sa pasiuna nga eksaminasyon ug evaluation sa mga bid, matod sa CPA, diin ang WTG nagsumite sa labing ubos nga kalkulado ug responsive nga presyo sa bid nga P335,014,472.15.

Gilauman nga mahuman sa Mayo 2023, ang San Fernando Port Project, nga nahimutang sa habagatan-sidlakang baybayon sa Sugbo, magsilbi sa mga barko nga mobiyahe gikan sa San Fernando paingon sa Tubigon ug Jagna sa Bohol, ngadto sa mga lungsod sa Mambajao ug Mahinog sa Camiguin ug sa katapusan ngadto sa Balingoan ug Cagayan de Oro sa Misamis Oriental.

Kini mahimong kabahin sa Central Spine Roro Route Project sa DOTr nga gitumong sa pagpalig-on sa inter-island connectivity alang sa pamatigayon ug turismo pinaagi sa roro (roll on, roll off) nga mga pasilidad.

Niadtong Hulyo, si Miole niingon nga ang ikatulong bidding alang sa San Fernando Port Project nga gipahigayon niadtong Mayo 3, 2021 nga adunay upat ka bidders napakyas human ang tanang bids napakyas sa pagtuman sa mga rekisitos sa Government Procurement Reform Act.

Ang upat ka mga bidder mao ang F. Gurrea Construction Inc., Hi-tone Construction and Development Corp., Premium Megastructures Inc. ug joint venture tali sa RCDG Construction Corp., BSP & Company Inc. ug Great Swiss Metal Builders Corp. (PR)

This posting includes an audio/video/photo media file: Download Now

45 ka toneladang basura nakuha

Posted: 04 Dec 2021 07:01 AM PST

Moabot og 45 ka toneladang basura ang nahipos sa 3800 ka mga boluntaryo alang sa 6th City Wide Cleanup Challenge sa Dakbayan sa Sugbo.

Ang 6th City Wide Cleanup Challenge gipahigayon sa Il Corso Life Malls niadtong Disyembre 4, 2021.

Ang kalihokan gihimo aron sa pagpalapad sa kasayuran kalabot sa krisis sa basura ug pagpalihok sa tanang sektor sa katilingban aron makatampo sa mga paningkamot sa pagpanglimpyo ug pagdasig sa tanang Sugbuanon- ma-indibidwal, empleyado sa gobyerno, empleyado sa korporasyon ug organisasyon sa pag-apil sa pagpanglimpyo ug pagpangita og mga solusyon sa pagdumala. basura.

Ang kalihukan gipangulohan nila ni Mayor Michael Rama ug Bise Mayor Donaldo Hontiveros uban ni DENR Region 7 Director Engr. Paquito D. Melicor, Jr.

This posting includes an audio/video/photo media file: Download Now

Editoryal: Kinsay anti poor?

Posted: 04 Dec 2021 06:42 AM PST

Nibahad si kanhi Cebu City mayor Tomas Osmeña nga iyang ipabakwi ang kontrata sa Joint Venture Agreement (JVA) nga gi sudlan tali sa Cebu City ug Megawide Construction Corp. alang sa modernisasyon sa kapin 100 ka tuig nang merkado publiko sa Carbon. Daghan kuno siya og nakitang mga hinungdan nga angay bakwion ang kontrata.

Iyang gihulagway nga ang modernisasyon sa Carbon anti poor kay kon mahuman na kuno ang modernisasyon, mga adunahan nay maghawod sa merkado.

Kinsa diay ang naghawod karon sa Carbon, di ba mga adunahan nga nakapahmus sa yanong mga manindahay diha? Kanang mga tigpatanto sa Carbon maoy nakapahimus og maayo. Nisaad ang kanhi mayor nga iyang tabangan ang mga vendor kon sila mokiha ngadto sa korte pinaagi sa paggasto. Nasayod sa ba kaha si Osmeña nga mayoriya kaayo sa vendors uyon ug na kauyon sa modernisasyon?

Di ba kaha si Osmeña mao ang anti poor kay di man siya gustong mahamugaway ang kinabuhi sa mga kabos nga vendor, makatilaw og kaharuhay sa pag paninda sa dapit nga di na bahaan, mainitan, baho ug hugaw.

Pila na ka mga higayon nga si Osmeña nagbalikbalik sa pagka mayor sa Dakbayan sa Sugbo, apan wa siya makapalambo sa merkado publiko? Hinunoa iyang napasagdan sud sa katuigan sa iyang pangatugdanan. Karon na lang siya nagpakabana nga duna nay administrasyon sa City Hall ubos ni anhing Mayor Edgardo Labella ug Mayor Michael Rama nga nakakita nianing kahigayunan nga gipresentar sa Megawide.

Ila pang gipalutaw nga ang C2W, igsuon sa Megawide, mao nay manag-iya sa Carbon bisan kon sa JVA klaro nga ang Siyudad gihapon ang magdiktar sa abangan. Kaharuhay sa paninda ug way kausaban sa presyo ang masinati unya.

Karon, kinsa man ang anti poor, sila si Rama nga gustong molambo ang kinabuhi sa vendors ug kabos nga mamalitay o si Osmeña nga supak nga makatagamtam ang vendors sa kakaanindot sa panginabuhi sa Carbon dala sa modernisasyon.

This posting includes an audio/video/photo media file: Download Now

Mongaya: Hagit sa among henerasyon

Posted: 04 Dec 2021 06:42 AM PST

Usa kami ka henerasyon kaniadtong unang katuigan sa 1970-80. Mao kini ang katuigan nga naglisod na og sustenir ang diktaduryang Marcos sa ekonomiyang nagsalig lang sa dagkong utang.

Brayt man si anhing presidente Ferdinand Marcos, ang amahan sa nilansar karon nga si Marcos Jr. Naa untay mga propesyonal nga nagdumala sa ekonomiya nga sila si Cesar Virata. Apan mayabag gyud ang dagan kay naghari man ang mga kurakot nga barkada sa mga Marcos nga ginganlan og crony.

Ug aron mapadayon ang naghibat na nga sistema, nitugot kintahay ang Marcos og eleksyon aron makapanghambog siya nga naay demokrasya. Apan dungan niini ang mabangis nga pagpanglugpit ug paggukod sa mga tinuod nga kaatbang sa pulitika.

Gani, una nakong nasinati mao kadtong dispersal sa usa ka prayer rally nga gipangulohan nilang Fr. Rudy Romano. Gipahigayon ang maong kalihokan isip selebrasyon sa Human Rights sa Disyembre 1979.

Igo lang kaming nangadye nga nag-prosesyon gikan sa hawanan atubangan sa simbahan sa Redemptorist padulong sa Fuente Osmeña.

Gisugat kami og mga anti-riot police. Nakaligo gyud ko sa tubig sa bombero. Ilang gidakop si Fr. Romano.

Maayo kay ang abogado nga si Pepe Diokno, anhing amahan ni Chel Diokno, maoy among guest speaker sa prayer rally didto sa hawanan sa Redemptorist Church. Naabot na siya sa airport sa Mactan dihang nadawat niya ang balita sa dispersal ug pagkadakop ni Fr. Romano.

Wa na siya mosakay balik sa Manila. Dali siyang nibalik sa Syudad sa Sugbo ug nideritso sa Ramos Police Station. Niadtong tungora, kaming mga nabasa og tubig niapas ug nagpahigayon og rali atubangan sa maong estasyonan sa kapulisan.

Lawom na sa gabii diin nigawas si Diokno kuyog ni Fr. Romano. Dako kaayo ang among kalipay.

Bangis

Usa kini sa mga panghitabo kaniadtong panahon sa diktador. Apan duna pay daghang mga bangis nga panghitabo.

Wa pa ko malimot sa mga Freedom March nga gipangulohan nilang Inday Nita Cortes-Daluz. Mao kadtong higayon nga sila si Zamboanga Mayor Cesar Climaco gidakop mismo diha sa Fuente Osmeña kay nisalmot sa maong masang aksyon.

Gidakop ang mag-amahang si Dodong ug Joeyboy Holganza nga mga lider sa oposisyon dinhi sa Sugbo. Gilakip sa pagpriso nila si Nene Pimentel, ang lider sa oposisyon didto sa Mindanao. Halos tanang Pilipino nakahibawo sa pagpatay ni Ninoy Aquino.

Kay naapil na man ko sa pag-organisa sa lain-laing mga lihok protesta sa Sugbo labi na ang duha ka mga welgang bayan, apil ko nga gidakop sa mga student leaders nga nagkapundok sa Syudad sa Lapu-Lapu kaniadtong 1984.

Ug pagka Hulyo 11, 1985, gidakop sa mga sakop sa military si Fr. Rudy Romano ubang kang Levi Ybañez. Hangtod karon, wa pa gyud kita makakab-ot og hustisya.

Marcos Jr.

Ang 2022 dili lang usa ka election year diin nilansar ang Bongbong Marcos kun si Marcos Jr. Mao kini ang ika-50 ka tuig sukad nga gipahamtang ni Marcos Sr. ang balaod militar kun martial law.

Ang pagseguro nga mapildi ni Marcos Jr. sa iyang tinguha nga mobalik ang iyang pamilya sa Malakanyang mao ang labing dakong hagit karon sa among henerasyon.

Nalipay ko nga daghan nang mga batan-on nga nakaamgo sa tinuod ug wala madala sa mga bakak sa mga Marcos' loyalists ug ilang mga trolls.

Ug mao kini ang akong rason nganong moaktibo ko sa Campaign Against the Return of the Marcoses and Martial Law kun CARMMA. Gitukod kining maong grupo dihang nidagan si Marcos Jr. alang sa pagka bise presidente. Salamat nga napildi siya.

Karon, nangambisyon na gyud nga magpresidente. Atong pildihon siya pag-usab. (DM nako sa @anol_cebu)

This posting includes an audio/video/photo media file: Download Now

Vallena: Mag amping sa karsada

Posted: 04 Dec 2021 06:35 AM PST

Giksakitan ko human ko mahibaw nga usa sa lima nga namatay sa karambula sa 13 ka mga sakyanan anak sa kauban sa akong asawa sa GMA 7 nga si Paquito Boyet San Pedro Sr. Si Celoy nag hatod ra unta og butang sa kliyente kay Lalamove courier man siya, apan samtang nagsusi siya sa iyang sakyanan nga naaberiya, gidaro siya sa puwa nga dumptruck.

Bisan tuod kon way nasayod sa tukmang gikusgon sa puwa nga dumptruck, apan klaro man nga kusog ang dagan ini. Duna pay mga saksi nga nisulti sa kapulisan nga naglumba ang duha ka mga trak, apan si Tumulak di kombinsido nga ang duha wa maglumba base sa iyang nakita sa closed circuit television (CCTV) footage.

Ang iyang amahan nga si Boyet maoy unang naigo dihang ni lugar kay niapas sa iyang anak aron mag rescue. Kon akong basehan ang giestorya ni Jonathan Tumulak, unang naigo tawon si Boyet, nga nagmaneho sa ilang L300 pick up hinungdan nga siya naangol.

Ibutang ta lang nga wa maglumba, apan matod sa mga saksi nga kusog kaayo ang dagan sa puwa nga dumptruck nga nagsige og busina. Kon kini ang basehan, hayan nipalyar ang brake. Angay kining susihon kon mao ba.

Kon naguba ang ang brake niya, dunay mga hinungdan. Hayan poor maintenance o nag break down tungod kay nasobrahan sa kapasidad sa iyang mapugngan. Ang overloading ug overspeeding usa sa mga hinungdan nganong mo mal function ang brake system. Naandan ni nga mga hinungdan sa mga disgrasya. Apan kinahanglan laging susihon kon unsay nahitabo.

Kon wa pa lang tingali magpakusog ang dumptruck hayan di kadto mahitabo. Dako man gud ang kahigayunan nga kusog nga nakapadagan ang drayber, kinsa namatay usab sa aksidente.

Kon naa kita sa karsada nagmaneho sa bisan unsa nga matang sa sakyanan, ato ning isipon nga sama kini og pusil kon patakaan, mamahimo ngs makaangol o mas grabe, makapatay, di lang usa, daghan pa nga kinabuhi sama sa nahitabo niadtong Biyernes sa buntag.

Kon naa man gani kita sa karsada, atong huna-hunaon nga di lang kita ang naggamit, daghan pa. Naay drivers ug pedestrians nga road users pud sama nimo.

MAINTENANCE

Sa Pilipinas, ang maintenance sa sa sakyanan nga pampubliko sagad mantinil kaayo. Kanang gitawag og ayom-ayom, huwaton una nga dunay ma disgrasya.

Ang akong higala nga mekaniko nakadayeg kaayo sa akong gamay nga scoooter nga akong napalit nga second hand niadtong 2015 kay sukad wa kini mapalyar tungod samakina kon di tungod sa parts nga ilisanan. Matod sa akong higala nga maayo ko basta maintenance.

Kinahanglan nga magbantay sa periodic maintenance sama sa brake, change oil ug bantayan ang kilometers travelled. Di lang kay ayum ayumo lang kon unsay nabantayan nga deperensya. Kon kitang tanan nga nanag-iya og sakyanan conscious ani, dako ang kahigayunan nga malikayan ang grabeng mga disgrasya sa kadalanan.

This posting includes an audio/video/photo media file: Download Now

Nangamatay sa Covid misaylo na sa 49K

Posted: 04 Dec 2021 06:26 AM PST

Ang Department of Health (DOH) sa Sabado, Disyembre 4, 2021, mitaho nga ang nangamatay sa Covid-19 sa Pilipinas nilapas na sa 49,000-marka, nga adunay 243 ka bag-ong nangamatay.

Sa alas 4 nga case bulletin, ang DOH niingon nga ang gidaghanon sa nangamatay sa nasud anaa sa 49,230, diin ang nangamatay anaa sa 1.74 porsyento.

Bisan pa niini, ang bag-ong mga kaso sa Covid-19 nagpabilin nga ubos sa 1,000 alang sa ika-11 nga sunod-sunod nga adlaw, nga nagtala lamang sa 517 kaniadtong Sabado.

Ang positivity rate sa nasud anaa sa 1.8 porsyento gikan sa 35,238 nga mga test nga gihimo kaniadtong Disyembre 2.

Ang bag-ong mga kaso nagdugang sa kinatibuk-ang caseload sa nasud sa 2,834,294.

Mokabat usab sa 1,139 ka mga indibidwal ang naka-recover sa maong sakit, nga nagdala sa kinatibuk-ang recoveries ngadto sa 2,770,726 o 97.8 porsyento.

Nakatala usab ang DOH og 14,338 ka aktibong mga kaso o 0.5 porsyento lamang sa kinatibuk-ang kaso.

Sa aktibong mga kaso, 6,350 ka mga kaso ang mild, 3,837 ang kasarangan, 2,425 ang grabe, 815 ang kritikal ug 911 ang asymptomatic.

Alang sa rate sa paggamit sa pag-atiman sa kahimsog sa nasud, 25 porsyento sa intensive care unit bed, 25 porsyento sa isolation bed, 15 porsyento sa ward bed ug 12 porsyento sa mga ventilator ang nagamit.

Giingon usab sa DOH nga duha ka mga laboratoryo ang wala magamit sa kaniadtong Disyembre 2, samtang ang usa ka laboratoryo napakyas sa pagsumite sa datos sa Covid-19 Document Repository System.

"Pinapaalalahanan ang tanan nga dili mahimong kampante sa banta sa Covid-19," ang ahensya sa panglawas miingon.

This posting includes an audio/video/photo media file: Download Now

Dul-an 10M ka tawo nabakunahan sa national vaccination days

Posted: 04 Dec 2021 06:23 AM PST

Ang departamento sa panglawas niadtong Sabado, Disyembre 4, 2021, niingon nga dul-an sa 10 ka milyon ka mga tawo ang nabakunahan batok sa Covid-19 atol sa gilugwayan nga "Bayanihan, Bakunahan" national vaccination days gikan sa Nobiyembre 29 hangtod sa Disyembre 3, 2021.

Ang Department of Health nagkanayon nga niadtong Sabado, niabot na sa 9,937,827 ka mga indibidwal ang nabakunahan atol sa gilugwayan nga vaccination drive.

Si Health Undersecretary Maria Rosario Vergeire miingon nga ang lima ka adlaw nga "Bayanihan, Bakunahan" usa ka "dakong kalampusan" tungod kay nakab-ot niini ang quota nga makabakuna sa siyam ka milyon ka mga tawo.

Si Vergeire niingon nga sa unang tulo ka adlaw sa vaccination drive, niabot sa 8.01 milyones ka mga tawo ang nabakunahan, kulang sa usa ka milyon sa inisyal nga target.

Uban sa extension, mga 1.9 milyon ka mga indibidwal ang nadugang sa gidaghanon.

Ang kampanya orihinal nga gitakda alang sa Nobyembre 29 hangtod Disyembre 1, apan gitugot ang boluntaryo nga paglugway sa mga adlaw sa pagbakuna hangtod sa Disyembre 3.

Ang ikaduhang leg sa National Vaccination Days gitakda gikan sa Disyembre 15 hangtod 17.

Sumala sa National Covid-19 Vaccination Dashboard kaniadtong Disyembre 3, ang Pilipinas nakahatag na sa kinatibuk-an nga 90,640,665 ka doses sa bakuna, 52,628,592 niini para sa unang dose, 37,568,088 alang sa ikaduha nga dose ug single-dose nga bakuna ug 443,985 alang sa booster.

Giawhag usab sa health undersecretary ang local government units nga modawat og bakuna bisan wala pay rehistrasyon.

"Kung saka-sakaling pupunta na ang ating mga mga kababayan sa vaccination sites sana po payagan na natin silang mabakunahan kahit hindi sila nakapag-register because we lose the opportunity if we still send them home," matod niya.

This posting includes an audio/video/photo media file: Download Now

Super Blowout: ‘Regalo ni Kuya Kian’

Posted: 04 Dec 2021 06:17 AM PST

Ang 2019 maoy labing sakit nga tuig alang ni Josephine Pareja-Locaberte.

Kini ang tuig nga namatay ang iyang kamaguwangan nga anak, si Kian Immanuel, gumikan sa sakit.

Ang mas nakapasakit pa gyud kay namatay si Kian usa ka adlaw sa dili pa ang iyang birthday o niadtong Disyembre 27, 2019.

"Until now di gani ko makatuo nga wala na akong kamaguwangan, unya almost two years na," matod ni Josephine.

"Mo-seven years old nato padung unta. Sakit kaayos tanan mamatyan og anak. Lahi ra ang feeling kon mamatyan og igsuon, ginikanan, kaliwat. Lahi ang bation sa inahan og mamatyag anak," dugang niya.

Usa ka buwan human gilubong si Kian, namabdos si Josephine.

Niadtong Nobiyembre 26, 2020, natawo ang bata. Ginganlan kini nila og Zab Kinuel Locaberte.

Ang Zab nagpasabot og gasa o regalo samtang ang Kinuel kombinasyon nga gikuha gikan sa pangan nga Kian ug Immanuel.

Niadtong Nobiyembre 26, 2021, gisaulog ang 1st birthday ni Zab didto sa panimay sa mga ginikanan ni Josephine sa Bien Unido, Bohol.

Apan matod niya, si Zab nagpahinumdom niya kang Kian.

Iyang giisip si Zab nga regalo gikan ni Kuya Kian.

"For me, mura siya og reincarnation ni Kian. Mura og gituyo og hatag sa Ginuo si Zab kay gikuha niya si Kian. Akong gihunahuna nga giregalo ni Kian diri nako si Zabboy aron di ko magsigeg kaguol," dugang ni Josephine.

This posting includes an audio/video/photo media file: Download Now

Migallen: Alang sa natad sa sports ug sa nasod

Posted: 04 Dec 2021 06:17 AM PST

Hangtod karon wa gihapoy paglurang ang kontrobersiya nga niigo tali sa Philippine Athletics Track and Field Association (Patafa) ug sa olympian pole vaulter nga si EJ Obiena.

Kini bisan pa man og misihag na ang agianan sa kasulbaran sa maong kagubot sa dihang gibutyag na ni Ukrainian coach Vitaly Petrov nga dili tinuod ang taho nga wala siya suweldohi ni Obiena sulod sa pipila ka mga katuigan.

Ug gani gusto na niya nga ilubong sa kalimot ang isyu aron magpadayon ug dili na sila madisturbo sa ilang mga ensayo ug preparasyon alang sa sunod nga mga international competition.

Kini sukwahi sa pasangil ni Philip Juico, ang presidente sa Patafa kinsa nihimo gilayon og imbestigasyon human matod pa niya nahibaw-i ang isyu.

Apan ambot og unsa gyuy tumong ug tuyo niining Juico nga bisan pa man og gihimakak na ni Petrov ang maong pasangil mora og porsigido man gihapon siya nga iduot si Obiena ug gustong ipalutaw nga aduna kini kalapasan nga nahimo.

Bisan pa gani sa tanyag sa Philippine Sports Commission (PSC) nga maoy magpatunga o mohusay ning maong isyu, si Juico hugot nga nibalibad niini kay gusto niya nga sila lang sa Patafa ang mosulbad sa kontroberisya.

Pero unsaon man pagsulbad sa Patafa sa isyu nga sila man ang nalambigit batok ni Obiena? Dili kalikayan nga aduna gyuy bias nga mahitabo sa ilang imbestigasyon.

Balikbalik ang pagpanghimakak ug pagpasabot ni Obiena sa iyang habig nga nakakuha usab og igong suporta mismo gikan ni Petrov.

Sa iyang final statement nga gipagawas ngadto sa mga media, gipasabot ni Petrov nga hingpit gibayran ni Obiena ang iyang serbisyo isip coach sa bugtong pole vaulter sa nasod.

So unsa pa may angay imbestigahon ni Juico nga wala na may complainant?

Tinuod ug atong gisabot nga isip presidente sa usa ka national sports association (NSA) sa nasod, katungod ni Juico ang paghapsay sa pagpadagan sa asosasyon ug ang pagsusi ug paghusay sa mga motumaw nga kontrobersiya.

Apan ang pagpangita og paagi aron lang makasuporta sa di makiangayon nga pagduda maoy maghatag og lama ug makapagusbat na hinuon sa organisasyon.

Kon di makadepensa ang mga sports leaders sa mga atleta, kinsa pa man diay ang daganan ug kasandigan sa mga tawo nga nagsakripisyo aron mahatagan sa igong dungog ang atong nasod sa natad sa paugnat sa kusog.

Hinaot nga kining tanan masabtan ug masabutan ra. Kini tungod ug alang sa gugma sa sports ug sa atong nasod. (jun.migallen22@gmail.com)

This posting includes an audio/video/photo media file: Download Now

Mayweather mokampanya ni Pacquiao

Posted: 04 Dec 2021 06:17 AM PST

Posibling mobisita si retired boxing superstar Floyd Mayweather Jr. sa Pilipinas sa umaabot nga mga buwan.

Kini aron pagtabang og kampanya sa iyang higpit nga kontra sa boxing nga si Manny Pacquiao kinsa midagan pagka presidente sa nasod.

Sa interview a FightHype nga na post sa Youtube channel niini nga mosalmot siya sa celebrity basketball game uban ni Pacquiao.

"Me and Pacquiao, we're actually gonna play basketball in the Philippines. That's coming up soon. I think January," nakanayon ang wa pildi nga kanhi boxing champion. "You already know what I got," dugang niya.

Sila si Pacquiao ug Mayweather pulos mga basketball fans ug pulos nakakulit sa kasaysayan sa boksing nga adunay mga talagsaong abilidad sa maong sports.

Ang 8-division champion nakaduwa sa PBA team sa KIA sa wa pa kini magtukod sa Maharlika Pilipinas Basketball League (MPBL).

Sa dihang gipangutana kon mosuporta ba siya sa presidential campaign ni Pacquiao, si Mayweather daling nakatubag pinaagi sa pag-ingon "absolutely."

Ang kampo sa undefeated American boxer kinsa nahimong suod nga higala ni Pacquiao gumikan sa ilang dungan nga pagkulit og kasaysayan kansang away maoy gitawag og "fight of the century" wala pa mobutyag og kanus-a motaak sa Pilipinas ang gitawag og "money' Mayweather.

This posting includes an audio/video/photo media file: Download Now

Lakers pilde na sad

Posted: 04 Dec 2021 06:16 AM PST

Napasulod ni Luke Kennard ang iyang duha ka tres sa himatayong mga minuto aron giyahan ang Los Angeles Clippers batok sa Los Angeles Lakers, 119-115 sa National Basketball Association.

Si Kennard ang nahimong bida sa Clippers (12-11) human siya nipuntos og 17 sa second half gikan sa 19 nga maoy iyang kinatibuk-ang puntos ug niabag og laing 19 puntos ang ilang All Star nga si Paul George kansang team maoy nagkontrol sa duwa gikan sa pagsugod hangtod nahuman.

Ang Lakers(12-12) anaa sa ika-7 sa Western Conference (WC) gipangulohan ni LeBron James pinaagi sa iyang 23 puntos ug 11 rebounds kinsa mao pay pagbalik og duwa human siya gipaubos sa Covi-19 health and safety protocol sa niaging duwa sa Lakers ug natayming nga sila nidaog.

Ang laing star sa Lakers nga si Anthony Davis nipaarak og 27 puntos ug 10 rebounds samtang 20 puntos ang giamot ni Malik Monk.

Ang Clippers padayon nga niduwa nga wala ang ilang laing All Star nga si Kawhi Leonard gumikan sa knee injury nga iyang naangkon sa niaging season, padayon nga nagkapakapa ug gipanglubong sa New Orleans ug Sacramento Kings sayo niining semanaha.

Ang Clippers nga maoy ika-6 sa West niputol sa ilang tulo ka duwa nga sunodsunod nga kapildehan gumikan sa clutch threes ni Kennard ug Marcus Morris kinsa niabag og 21 puntos human iyang napasulod ang unom ka tres.

Ang team ni George maoy nagkontrolar sa duwa apan ang ilang labaw wala molapas sa 12 puntos bisan kon kini homecourt sa Lakers kansang arena mao sab ang ilang homecourt.

Sa laing mga duwa, gipaulanan sa Utah Jazz og tres ang Boston Celtics aron angkunon ang kadaugan,137-130 ug gipukot sa Brooklyn Nets ang Minnesota Timberwolves 110-105.

Gipilde sa Cleveland Cavaliers ang Washington Wizards, 116-101,gisunod sa Miami Heat ang Indiana Pacers 113-104,gipatugpa sa Philadephia 7ers ang Atlanta Hawks 98-96,gipahupas sa Houston Rockets ang magic sa Orlando 118-116, gilubong sa Pelicans ang Dallas Mavericks, 107-91.

This posting includes an audio/video/photo media file: Download Now

Ancajas-Ioka gi-oktaba

Posted: 04 Dec 2021 06:08 AM PST

Tungod kay hugot na usab ang pagpatuman sa travel retrictions, opisyal nga giuswag ang unification fight ni super flyweight champion Jerwin Ancajas batok Kazuto Ioka nga gikatakda unta nga maoy mosugat sa bag-ong tuig 2022.

Ang mga promoter napugos sa pag-uswag sa away karong Disyembre 31 didto as Ota-City General Stadium sa Tokyo human ang kinatibuk-ang nasod sa Japan niimposar og estriktong pagpasulod ngadto sa mga langyaw aron pag-alkontra niining kalit nga pagsulbong sa Omicron variant Covid-19.

Human sa tulo ka buwan nga training sa Estados Unidos, si Ancajas, ang International Boxing Federation (IBF) king, gikatakda na unta nga mobiya na gikan sa Los Angeles sa Disyembre 11.

Samtang si Ioka, ang bugtong four-division world champion ug kasamtangang naghupot sa World Boxing Organization (WBO) 115 lbs. nga bakus, sa niaging semana, pormal nga nianunsiyo sa iyang away batok ni Ancajas.

"Team Ancajas was looking forward to this historic fight against Ioka but understands there are bigger concerns than boxing in Japan and the world with the situation caused by the emergence of the latest variant," matod ni Sean Gibbons, presidente sa MP Promotions.

"We remain committed to making this fight happen as soon as possible in Japan."

Si Ancajas (33-1-2, 22 knockouts) nahimong champion sukad pa niadtong 2016 ug ka-siyam ka higayon nga nakadepensa sa titulo nga napahigayon sa lainlaing lugar sama sa United States, Macau, Brisbane (Australia), Belfast (United Kingdom), ug Mexico.

Ang mga misuway sa paglangkat sa titulo nga nalangkat ni Ancajas gikan sa Puerto Rican nga si McJoe Arroyo, mao sila si Teiru Kinoshita sa 2017 sa Ryuichi Funai sa 2019.

Gipaabot nga makasugat og usa ka malisod nga tahas si Ancajas batok ni Ioka (27-2, 15 KOs) kinsa napildi ni Donnie Nietes pinaagi sa split decision sa ilang WBO super flyweight title niadtong 2018.

This posting includes an audio/video/photo media file: Download Now

Adelaide 36ers gilihia’g pildi; Sotto wala kaduwa

Posted: 04 Dec 2021 06:03 AM PST

Gisubhan og kapildihan ang team ni Kai Sotto nga Adelaide 36ers sa pagsugod sa Australia National Basketball League nga gisugdan Biyernes (Sabado sa Pilipinas) sa RAC Arena.

Ang 36ers nga way pildi, 5-0 ug maoy nakampiyon sa preseason games niyukbo sa Perth Wildcats, 85-73.

Hinuon upat ka mga 36ers ang wa makaduwa lakip na niini ang 7-3 nga si Sotto tungod sa nagkalainlaing injury.

Ang kakulang sa iyang mga sinaligan maoy naghatag og kalisdanan sa rotation ni coach CJ Bruton.

Hinay nga nakasugod ang Wildcats apan siniguro nga nipahimulos sa kakuwang sa 36ers ug niposte kini og 13 puntos nga labaw sa fourth quarter.

Mosuway pagbawi ang 36ers karong Dominggo (Lunes sa Pilipinas) sa dihang ilang ikasangka ang Illawarra Hawks.

Wa pay kasiguroan kon makaduwa ba niining higayona si Sotto kinsa adunay gipamati sa iyang tuhod.

Ang anak ni kanhi PBA player Irvin Sotto kausa ra nakaduwa sa ilang preseason games.

Ning duwaa, ilang gipukan ang Cairns Taipans diin nitali si Sotto og siete puntos, lima ka rebounds ug usa ka block shot.

This posting includes an audio/video/photo media file: Download Now

Nahunong sa 18

Posted: 04 Dec 2021 06:03 AM PST

Gipanimaslan sa Golden State Warriors ang Phoenix Suns para pakgangon ang ilang 18 ka sunodsunod nga kadaugan 118-96 aron ilugon ang liderato sa National Basketball Association (NBA).

Ang Warriors (19-3) ug Suns (19-4) maoy hottest ug top two teams sa NBA kinsa nagtabla sa ilang standing (1-1) atol sa unang duha ka duwa sa ilang panag-engkwentro.

Ang superstar sa Warriors nga si Stephen Curry nahigmata sa iyang paghikatulog sa una nilang engkwentro diin siya nipaarak og 23 puntos human sa ilang engkwentro sa miaging tulo ka adlaw sa balwarte sa Suns nga igo lang siyang nipugnit og 12 puntos.

Si Coach Steve Kerr sa Warriors niangkon nga ang Suns maoy best team sa West kinsa nibuak sa ilang kaugalingong record nga 17-game winning streak.

"We know that we're trying to catch them, not vice-versa. We haven't been in the playoffs for two years. We're trying to catch them and we know they're the best team in the West until somebody knocks them off," matod ni Kerr.

Ang GSW unang nisuway og lumpag sa paghari sa Suns sa unang 18 ka duwa apan napakyas pero sa ilang ikaduhang pag-ataki sa Warriors, sila nilampos pagpilde sa Suns nga gipangulohan ni Chris Paul apan sila niduwa nga wala ang laing star nga si Devin Booker gumikan sa pagsakit sa iyang left hamstring.

Ang coach sa Phoenix nga si Monty Williams nidayeg sa performance nga gipakita sa Golden State nga maoy ilang gihimong estilo dihang ilang gipukan ang Warriors sa una nilang engkwentro.

Ang Suns nakadikit sa Warriors, 83-74 human sa dunk ni Javale McGee sa sayong bahin sa fourth quarter apan mao ra kadto ang ilang labing dikit nga score nga ilang nahimo hangtod nga napasulod ni Gary Payton II ang iyang mga tira uban sa duha ka kamot nga pansak ug perimeter jumper ug niinat ang labaw sa Warriors ngadto sa 20 puntos.

Napasulod ni Curry ang iyang unom ka tira sa tres uban sa iyang lima ka rebounds ug 5 assists apan sa nakalabay nilang match-up, tulo ra iyang napasulod sa 14 ka tira sa tres.

Niabag si Andrew Wiggins og 19 puntos ug nainat sa Warriors ngadto sa 11 ka sunodsunod nga kadaugan diha sa ilang balwarte.

Ang pilderong Suns gipangulohan ni DeAndre Ayton kinsa nihipos og 23 puntos samtang 12 puntos ug 8 assists ang giamot ni Paul.

Ang duha subling mag-engkwentro karong Disyembre 25 (26 sa Pilipinas), adlaw sa Pasko sa Amerika.

This posting includes an audio/video/photo media file: Download Now

SMB namakyaw og mga trophy

Posted: 04 Dec 2021 06:01 AM PST

Si Mark Anthony Boyo nabantog sa iyang abilidad sa big bike nga maoy usa sa labing kusog mopadagan ug nagpasiugda sa knee drag sa mga kurbadang dalan labi na sa Transcentral Highway (TCH).

Apan sa laing aspeto, wala usab magpalupig si Boyo kinsa maoy hari sa mga endurance ride dinhi sa Cebu, nahimong first finisher sa Ormoc ug ning bag-o nagpakita usab sa iyang abilidad sa 1st Tiger Motocross sa lungsod sa Consolacion, Nobiyembre 28, 2021.

Si Boyo aka SMB gumikan sa iyang daghang bus sa SMB Tourist Transport ang nakasakmit sa 4th place overall sa Elite Category nga gilangkuban sa 80 ka motocross riders apan iyang nalangkat ang 1st place sa Category B ug nahimong 2nd place sa Category A.

This posting includes an audio/video/photo media file: Download Now

Drayber sa dumptruck hayan giatake: CT-TODA

Posted: 04 Dec 2021 05:56 AM PST

Posibleng giatake sa kasingkasing ang drayber sa puwa nga dumptruck mga minutos sa wa pa niini gipangdaro ang mga sakyanan niadtong Biyernes sa alas 10 pasado sa buntag, Disyembre 3, samtang nagsubay sa N. Bacalso Avenue, Brgy. Lawaan 3, Dakbayan sa Talisay.

Mao kini ang gibutyag ni Jonathan Tumulak, pangu sa City of Talisay Traffic Operations and Development Authority (CT-TODA) human sa pagbisita sa 17 anyos nga truckboy nga kauban ni Benchin Udtohan, drayber sa puwa nga dumptruck, nga maoy gibasol sa aksidente nga nikalas og lima ka mga kinabuhi ug niangol og 10.

Si Udtohan patay nang niabot sa tambalanan tungod sa grabeng nahiaguman, apan ang iyang truckboy gamay ra og angol, apan daling nikanaug sa trak tungod sa kahadlok dihang nihunong na ang trak tunga sa karsada.

Sa Sabado sa buntag, ang truckboy niabot sa buhatan sa CT-TODA aron pagklaro sa hitabo sa wa pa ang bangga.

Ang ngan sa truckboy gipugngan ning mantalaan sa hangyo ni Tumulak.

Niasoy ang batan-on ngadto kang Tumulak nga maayo ra ang ilang panag-estorya ni Udtohan gikan sa usa ka quarry sa Barangay Lagtang, Dakbayan sa Talisay.

Apan nakabantay ang truckboy nga sa ilang pag-abot sa Mananga bridge wa na magtingog si Udtohan, kalit nga mitul-id ang duha ka mga kamot samtang nagkupot sa manubela ug nagtul-id sab ang usa ka tiil nga nagtamak sa gasolinador.

"Iyang giingnan nga 'Kuya, madisgrasya ta," kutlo ni Tumulak sa sulti sa truckboy kaniya samtang anam kakusog ang ilang dagan.

Mao na lang ang iyang kakugang dihang gipangdaro sa ilang trak ang mga sakyanan nga nag-una kanila.

Wa gisalikway ni Tumulak nga posibleng giatake sa kasingkasing si Udtohan samtang nagmaneho.

"Kana maoy atong gitan-aw nga posibilidad. Mahibaw-an lang na nato kon ma-autopsy ang lawas," matod ni Tumulak sa interbyu sa Superbalita Cebu.

Iyang girekomendar ngadto kang Talisay City police chief Lt. Colonel Randy Caballes nga ipailawom sa autopsy ang lawas ni Udtohan aron masuta kon giatake ba sa kasingkasing atol sa aksidente.

DI BRAKE

Gisalikway usab ni Tumulak nga mechanical failure ang hinungdan sa bangga human nila masusi og maayo ang dumptruck.

Wa silay nakitang timailhan nga naguba ang brake system sa truck.

"Mi conduct sab mig inspeksyon sa sakyanan. Wa koy nakitang agas sa oil. Wa koy nakitang agas sa brake fluid," nagkanayon si Tumulak.

Matod niya nga wa mo malfunction ang brake ug wa sab mo-apply og brake si Udtohan kay way timailhan nga ilang nakita sa mga ligid ug skid mark sa karsada.

Bisan tuod kon puno kini sa anupog, apan di overloaded ang dumptruck, naa ra kini sa ilang hustong kapasidad sa kargamento.

Gawas pa, limpyo usab ang makina dihang ilang gitan-aw samtang sakto usab sa hangin ang mga ligid sa likod nga posible untang usa sa mga hinungdan sa aksidente.

Dihang ilang giadto ang quarry sa Lagtang, ang operator niini niingon nga bisan kon tulo pa lang ka semana nga nagtrabaho kanila si Udtohan, dako kini og kasinatian sa trak kay dugay na kining drayber sa trak sa minahan sa Mindanao.

Apan nasayran ni Tumulak gikan sa kaubanan nga buwag sa asawa si Udtohan.

Sa posibilidad kon wa ba kaha tuyoa niini ang pagdasmag kay naburyong tungod sa nahitabo sa iyang personal nga kinabuhi, si Tumulak wa na mokomentaryo pa.

This posting includes an audio/video/photo media file: Download Now

Osmeña way kasuko kang Fernandez

Posted: 04 Dec 2021 05:45 AM PST

Giklaro ni Cebu City Mayor Tomas Osmeña nga "no hard feelings" siya kang independent vice mayoral candidate Francisco "Bimbo" Fernandez dihang iyang gihangyo ang iyang mga supporter nga ibalhin ang ilang suporta ngadto kang Franklyn Ong, kandidato sa pagka bise mayor sa Bando Osmeña Pundok Kauswagan (BOPK).

Sa usa ka pamahayag, si Osmeña niingon nga samtang siya nagtrabaho uban ni Fernandez sulod sa daghang katuigan, siya nagtuo nga si Ong angay nga suportahan sa BOPK.

"I have nothing personal against Bimbo as a candidate. We have worked together for many years and I have nothing but the utmost respect for him. Franklyn is hardworking and has earned his place as our official candidate and we will keep our word," matod ni Osmeña.

Niadtong Biyernes, Disyembre 3, 2021, giawhag ni Osmeña ang mga dumadapig sa iyang partido nga ibalhin ang ilang suporta ngadto kang Ong ug dili kang Fernandez isip paagi nga dili mabahin ang ilang botos.

Si Osmeña niingon nga gusto niya nga paboran sa iyang mga dumadapig si Ong aron dili makadaog ang kandidato pagka bise mayor sa Partido Barug ug Cebu City Councilor Raymond Alvin Garcia sa piniliay sunod tuig.

Sa atubangan sa mga vendor sa Carbon Public Market niadtong Biyernes, si Osmeña niingon nga "major disaster" sa mga urban poor sa dakbayan kon si Garcia maoy modaog sa pagka-bise mayor sunod tuig.

Si Fernandez, sa usa ka pamahayag nga iyang gipadala sa SunStar Cebu niadtong Biyernes, niingon nga wa siya matandog kon mopabor ba si Osmeña kang Ong sanglit dili man siya sakop sa BOPK.

"I am practically running as an independent since I am the only candidate of LP for Cebu City, which does not have any political machinery here. I am not beholden to any politician nor business people. But only to the "gahum sa katawhan," dugang ni Fernandez.

Sila si Fernandez ug Osmeña dugay nang magkaalyado. Sa dihang si Osmeña nagsilbi nga mayor sa Siyudad, si Fernandez maoy iyang city administrator ug unya executive assistant.

This posting includes an audio/video/photo media file: Download Now

Ancajas-Ioka unification fight giuswag tungod sa Omicron virus

Posted: 03 Dec 2021 07:50 PM PST

TUNGOD sa hugot na usab nga pagpatuman sa travel retrictions, opisyal nga giuswag ang unification fight ni super flyweight champion Jerwin Ancajas batok Kazuto Ioka nga gikatakda unta nga maoy mosugat sa bag-ong tuig 2022.

Ang mga promoters napugos sa pag-uswag sa away karong Disyembre 31 didto as Ota-City General Stadium sa Tokyo human nga ang kinatibuk-ang nasod sa Japan miimposar og estriktong pagpasulod ngadto sa mga langyaw aron pag-alkontra niining kalit nga pagsulbong sa Omicron variant Covid-19.

Human sa tulo ka buwan nga training sa Estados Unidos, si Ancajas, ang International Boxing Federation (IBF) king, gikatakda na unta nga mobiya n gikan sa Los Angeles sa Disyembre 11.

Samtang si Ioka, ang bugtong four-division world champion ug kasamtangang naghupot sa World Boxing Organization (WBO) 115 lbs. nga bakus, sa niaging semana, pormal nga mianunsiyo sa iyang away batok ni Ancajas.

"Team Ancajas was looking forward to this historic fight against Ioka but understands there are bigger concerns than boxing in Japan and the world with the situation caused by the emergence of the latest variant," matod ni Sean Gibbons, presidente sa MP Promotions.

"We remain committed to making this fight happen as soon as possible in Japan."

Si Ancajas (33-1-2, 22 knockouts) nahimong champion sukad pa niadtong 2016 ug kasiyam ka higayon nga nakadepensa sa titulo nga napahigayon sa lainlaing lugar sama sa United States, Macau, Brisbane (Australia), Belfast (United Kingdom), ug Mexico.

Ang mga misuway sa paglangkat sa titulo nga nalangkat ni Ancajas gikan sa Puerto Rican nga si McJoe Arroyo, mao sila si Teiru Kinoshita sa 2017 sa Ryuichi Funai sa tuig 2019.

Gipaabot nga makasugat og usa ka malisod nga tahas si Ancajas batok ni Ioka (27-2, 15 KOs) kinsa napildi ni Donnie Nietes pinaagi sa split decision sa ilang WBO super flyweight title niadtong 2018. (JBM)

This posting includes an audio/video/photo media file: Download Now

at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...