Tuesday, May 31, 2022

https://www.sunstar.com.ph/

https://www.sunstar.com.ph/

Laing napulo nipasaka og kaso batok sa networking company sa Lapu-Lapu

Posted: 31 May 2022 07:38 PM PDT

NAKADAWAT og dugang reklamo ang National Bureau of Investigation (NBI) Mandaue usa ka semana human nila gironda ang usa ka giingon'g networking company nga namaligya og wellness and beauty products sa dakbayan sa Lapu-Lapu.Si Atty. Renan Oliva, pangulo sa NBI-Central Visayas, mibutyag nga human nila gironda ang JStore Innovation Worldwide niadtong miagi'ng Miyerkules, Mayo 25, 2022, human sila nakadawat og reklamo nga ang mao'ng establisemento nalambigit sa pyramiding scheme, adunay laing sobra sa napulo nga mitumaw sa ilang buhatan sa Mandaue aron mopasaka og kaso batok sa mao'ng establisemento."Nag file og complaints tong mga nadugang nga reklamante, some are from Mandaue, others from Lapu-Lapu and Cebu City. Mao lang gihapon ang ilang reklamo," matod ni Oliva.Dugang ni Oliva nga dili moubos sa napulo ka mga biktima ang nadugang nga mipasaka ug reklamo batok sa maong tindahan."So nag-abot-abot, we got their complaints, we requested them to submit proof nga naka-invest gyud sila," si Oliva nagkanayon.Nagpaabot na lang ang NBI Mandaue sa arraignment sa kaso nga ilang gipasaka batok sa mao'ng kompanya nga nahimutang sa Barangay Pajo, dakbayan sa Lapu-Lapu.Ang mga reklamante nagkanayon nga mibubo sila og P10 mil nga puhonan sa kompanya bugti sa mga produkto sama sa kape, liniments, balms, juice drinks, food supplements, sabon ug cosmetics nga ilang ibaligya.Pero ang nakadasig nila, matud pa sa mga reklamante, ang gitanyag sa kompanya nga modoble ang ilang kwarta sulod sa usa ka gatos ka adlaw bisan kon dili mahurot og baligya ang mga produkto.Matud sa mga reklamante nga daw sama sa hangin ang ilang mga saad sanglit wala gyud nabalik ang ilang puhonan."Dili na tinuod daku ra kaayo og rate of interest, daghan na kaayo ug mga past cases lain-lain like organico, love gift daghan na kaayo," dugang ni Oliva.Awhag niini nga kon duna man gani motanyag ug negosyo nga sama niini mas maayo nga susihon gyud daan."Ang basic niana kon naay moengganyo ninyo go to the proper government agencies like the Securities and Exchange Commission you can go to their office to seek help," panapos ni Oliva. (BBT, TPT)

Bata ‘mangawat unta’,napaig sa sunog sa Asturias

Posted: 31 May 2022 06:34 AM PDT

Napaig ang 9, anyos nga batang babaye human sa pag-ulbo sa sunog alas 5:50 sa buntag Martes, Mayo 31, 2022 sa Sitio Sangi, Barangay Sta. Lucia, lungsud sa Asturias.Ang biktima mao si Shelby (di tinuod nga ngan), taga Sitio Guinabasan, Barangay Tubigagmanok sa nahisgutang lungsod. Ang tinuod nga ngan sa biktima gipugngan ning mantalaan aron protektahan ang iyang mga igsuong menor de edad.Gituohan nga ang 9-anyos mangawat unta, apan naratol hinungdan nga na-trap sud sa tindahan. Tulo ka mga establisemento ang nangaugdaw nga gilangkuban sa Palawan Express, Sophies Bakeshoppe, ug Smileys store.Ang sunog mibilig danyos nga P270,000.Si Police Staff Sgt. Ervin Jugarap, imbestigator sa Asturias Police Station nga nahinabi sa Superbalita Cebu, nagkanayon nga giisa sa BFP-Asturias ang sunog sa first alarm.Napawong ang sunog alas 6:40 sa buntag, diin ang BFP- Asturias, kapulisan ug mga residente sa lugar nagtinabangay pagpawong sa kayo.Matud pa ni Jugarap nga dihang ilang nadawat ang impormasiyon, wa sila maglangay uban sa BFP-Asturias, dali silang ningresponde.Apan sa ilang pag-abot, dako na kaayo ang kayo ug paspas nga nikatap sa tulo ka mga establisemento.Nasuta nga dunay usa ka bata ang gisuwayan sa pagsalbar sa mga silingan kay na trap sulod sa Smileys Store.Sa pagsusi nila uban sa BFP-Asturias, napaig na ang bata.Positibo kining giila sa iyang maguwang nga 15 anyos ingon man sa mga silingan nga nisuway sa pagsalbar.Sumala pa ni Jugarap nga si Shelby sayo nga nilakaw gikan sa ilang balay.

Sara motambong sa 1Cebu oathtaking

Posted: 31 May 2022 06:33 AM PDT

Kompirmado nga motambong sa mass oathtaking sa One Cebu party si Vice President elect Sara Duterte-Carpio nga ipahigayon sa Hunyo 28, 2022.Kini maoy gipahibawo ni Cebu Governor Gwendolyn Garcia sa mga tigbalita kagahapon, Mayo 31, 2022."Vice President elect Sara Duterte has already confirmed that she will be attending. We have also invited President Bongbong Marcos but we have not yet received," matod ni Garcia.Matod ni Garcia nga apil sa mga dinapit sa kalihukan ang tanang mga sakop sa partidong One Cebu ingon man ang mga kongresista sa mga distrito, party-list, kadagkoan, bokal ug uban pa. Ang maong kalihokan ipahigayon sa Marco Polo hotel sa Sugbo sa 3:00 sa hapon, Hunyo 28."Those that are aligned with One Cebu and affiliated with One Cebu," dugang ni Garcia.Si Garcia, chairman sa 1Cebu, nagkanayon nga wala pa hinuoy kompirmasyon sa pagtambong ni Marcos. Ang 1Cebu pinangulohan ni Garcia pormal nga ni-endorso sa UniTeam sa Sugbo niadtong Abril 12.Atol sa adlaw sa piniliay, ang most vote-rich province nakahatag og moabot 1,055,985 votes alang kang Marcos ug 1,258,538 votes alang kang Duterte-Carpio base sa Media Transparency Server.

Kaugmaon sa Sugbo mas mohayag

Posted: 31 May 2022 06:30 AM PDT

"The future of tourism in Cebu, and the entire Philippines for that matter, is bright."Paghulagway ni Cebu Governor Gwendolyn Garcia ubos sa liderato ni Liloan Mayor Christina Garcia-Frasco isip tinudlo nga kalihim sa Department of Tourism (DOT) ubos sa administrasyon ni incoming President Ferdinand "Bongbong" Marcos Jr..Isip usa ka inahan ug gobernador sa lalawigan sa Sugbo, gipasigarbo ug dako ang kompiyansa ni Garcia sa abilidad ni Frasco nga makahatag og maayong mga programa ug kalamboan sa natad sa turismo sa nasud."I would like to say that I am tremendously proud. I know that she will be able to face up to this new challenge, as she has done many times past. She has always shown sheer determination through grit and above all, admirable passion for any responsibility that is given to her even when she was in grade school," matod ni Garcia.

Turismo sa nasud palambuon - Mayor Christina Frasco

Posted: 31 May 2022 06:24 AM PDT

Human nga gidawat ni Liloan Mayor Atty. Maria Esperanza Christina Garcia-Frasco sa tanyag ni President-elect Ferdinand "Bongbong" Marcos Jr. isip kalihim sa Department of Tourism (DOT), iyang gisaad nga moserbisyo ug moabag sa pagpalambo sa turismo sa nasud ubos sa bag-ong administrasiyon.Sa giluwatang panahom ni Frasco sa Mayo 31, 2022 nga dako kining hagit sa pagtudlo kang Marcos kaniya alang sa maong ahensiya ilabi na nga nagpadayon ang pandemya sa nasud ingon man ang milabayng kalamidad nga nibun-og sa turismo sa Sugbo ug sa nasud."In Cebu where tourism is a major driver of our economy, I have seen first hand the devastating effects of the pandemic and recent calamities, and the positive impact that effective tourism governance can have on the revival of the tourism industry," matod ni Frasco.Apan nagtuo siya nga pinaagi sa pagtinabangay ug pakig-alayon sa ubang mga sektor hangtod sa mga lokal nga kagamhanan, makab-ot niini ang tinguhang pagpalambo sa ekonomiya sa nasud.Si Frasco nga maoy kasamtangang spokesperson ni Vice President-elect Sara Duterte-Carpio, nagpasalamat usab sa kahigayonang makauban sa kawsa sa kalamboan sa nasud."I look forward to serving with her and the President-elect as they usher in a new era of unity, prosperity and hope for our country," matod ni Frasco.Iya usab gipasalamatan ang iyang pamilya ug ang mga konstituente niini sa lungsod sa Liloan sa way puas nga suporta kaniya sa iyang pagpangu sa lokal nga kagamhanan sa pipila ka katuigan.

DPWH: Pribado patabanga sa Metro Cebu Expressway

Posted: 31 May 2022 06:20 AM PDT

Adunay sugyot ang labing taas nga opisiyal sa Department of Public Works and Highways (DPWH 7) aron mapaspasan ang implementasiyon sa Metro Cebu Expressway project nga magsumpay sa dakbayan sa Naga ug dakbayan sa Danao.Si Regional Director Edgar Tabacon sa DPWH 7 nagkanayon nga kon ang orihinal nga sistema maoy subayon, maabtan pa og 17 ka tuig una pa mahuman ang segment 3 sa MCE gumikan sa langay nga pagpagawas sa pundo alang sa maong proyekto."Ang maayo gyud ipaubos siya for foreign assistance sama sa Overseas Development Assistance o ipaagi sa PPP (Public Private Partnership)," padayag ni Tabacon.Gitug-an sa pangulo sa DPWH 7 nga adunay nagpadayon nga paghimo sa preliminary detailed engineering design nga gidumala sa Japan International Cooperation Agency (JICA) alang sa segment 1 ug segment 2 nga adunay 57 kilometros, nga molagbas gikan sa Talisay City hangtod sa Danao City.Si Tabacon nagkanayon nga gitun-an karon ang paggamit sa tunneling ug viaduct technology ug dili na ang karaang estilo sa paghimo og karsada aron malikayan ang pagkagusbat sa bukid aron walay mahitabong pagdahili sa yuta.Gihulagway niya nga kon kini maoy mapatuman, modako ang gasto sa katukoran sa MCE apan momubo usab ang distansiya nga lagbason sa mga motorista."Ang original mao tong P28 billion pero kon gamitan na kadtong tunneling and viaduct technology, moabot siya og og P90 billion. Mahimo na lang nga 56 kilometers ang kanhi 73 kilometers, " butyag sa regional director.Kini gumikan kay dili na iliko-liko ang karsada ug mohaom sa porma sa bukid sanglit kon adunay bukid nga maigo, adto ipaagi ang karsada sa ilawom ug inig lapos, sumpayan kini og taytayan (viaduct) hinungdan nga momubo ang distansya sa dan.Si Tabacon nagkanayon nga bisan kon motriple ang gasto sa tunnel ug viaduct technology, itandi sa kinaraang paghimo sa karsada lagbas sa kabukiran apan sa unahan, makadaginot kini sa maintenance ug ubang galastuhan sanglit luwas kini gikan sa mga pag-irog sa yuta.

Kompleto nga bakuna ang gikinahanglan alang sa F2F

Posted: 31 May 2022 06:18 AM PDT

Giawhag sa Department of Education (DepEd) sa dakbayan sa Sugbo ang mga ginikanan nga pabakunahan ang ilang mga anak karon nga hingpit nang ipatuman ang face-to-face classes sa Agusto 2022.Si Dr. Liberato Lauronillo, district supervisor sa DepEd Cebu City, niingon niadtong Martes, Mayo 31, nga ang mga tunghaan, sa pagkakaron, nagpahigayon lang og limitado nga in-person nga klase nga alang lamang niadtong nabakunahan nga mga estudyante.Limitado usab ang gidaghanon sa mga estudyante matag lebel sa grado nga makatambong sa pisikal nga mga klase, nga 10 ug 15 ka estudyante sa ubos ug taas nga lebel nga ang-ang, matag usa.Dugang ni Lauronillo nga gilantaw karon sa DepEd ang hingpit nga pagpatuman sa face-to-face classes sa pagsugod sa bag-ong school year karong umaabot nga Agusto.

Pulis nangawat og kable, nasikop

Posted: 31 May 2022 06:12 AM PDT

Police nga sakop sa PNP Drug Enforcement Group (PDEG 7) gipusasan human nangawat og kable sa internet sa usa ka telecom company sa Barangay Guadalupe, Dakbayan sa Sugbo sa Sabado, Mayo 28, 2022.Gitabangan sa pagdumog sa mga residente ang pulis ug kauban niini human naaktohi nga nangawat.Matod ni Police Maj. Jonathan dela Cerna, hepe sa Guadalupe Police Station, nga nanawag kanila ang mga barangay tanod nga aduna silay gi hold nga duha ka mga tawo nga nangawat og kable.Dali sila nga ningresponde ug ilang nasuta nga usa kanila sakop sa Philippine National Police nga giila nga si Police Staff Sergeant Joel Superales Soliva, 37, taga Canmano, lungsod sa Sagbayan, Bohol.Apan nadestino si Soliva sa PDEG 7 ug iyang kauban nga si Peter Lou Catulong Bantilo, alyas Ikloy, 23, taga B. Rodriguez sitio Kalubihan, Barangay Sambag 2, dakbayan sa Sugbo."Actually na alarma na naay nanawag sa station unya ang naka alarma ana ang atong barangay tanod sa Barangay Guadalupe. Nya pag abot sa area medyo daghang tawo nga naka koan ani gidumog sa mga tawo. Wala sila mag expect nga police diay ang usa ani. Nag dala ni siyag multicab nya na recover sa ilang possession and control katong nakuha nga wire didto sa area ug kadtong ilang mga gamit para putol bitaw mga gabas, metal sew ug katong 4 to 5 meters nga long sa wire nga nakuha,"matod ni dela Cerna.Mobalor ang kable nga nakuha sa mga suspek og P50,000 sanglit usa man kini ka fiber optic.Una nang nireklamo ang mga telco sa Barangay Guadalupe labot sa ilang connection sa internet gumikan sa pagpangawat sa ilang fiber wire diin minilyon ka pesos na ang nawagtang kanila.Ang telco nga maoy tag-iya sa wire mopasakag kasong pagpangawat batok sa duha samtang ang Police Regional Office 7 mopasaka usab og kasong administratiba batok kang Soliva.NASAGMUYOSi Police Brigadier General Roque Eduardo Vega, hepe sa kapulisan sa Central Visayas, human masayod sa gihimo ni Soliva, nasagmuyo niini nunot sa pagkalambigit sa pagpangawat.Tungod niini, nipagawas siya og warning sa mga pulis nga padayon nga naghimo og krimen nga moundang na aron dili kini mag-atubang og bug-at nga silot."Binalaan ko na kayo mula't umpisa ng aking liderato. Pero may ilan pa rin na ayaw makinig at patuloy na inaabuso ang katungkulan bilang isang alagad ng batas. Kung may malasakit kayo sa pamilya ninyo, itigil nyo na! Huwag ninyong antayin na batas na ang maniningil," matod ni Vega.Si Soliva nasulod sa serbisiyo sa PNP niadtong 2012 ug kasamtangan nga nagpuyo sa Barangay Bacayan, siyudad sa Sugbo.Usa sa mga opisyal sa PDEG 7 nitug-an nga gipaubos na sa imbestigasiyon si Soliva tungod kay nadungog na kini nga tiggamitan sa illegal nga drugas.Dihang siya nadakpan, high pa siya sa illegal drugs.Gihimoan na kini og investigation report nga ipadala ngadto sa Campo Crame.

NBI satellite center sa Talisay gibuksan

Posted: 31 May 2022 06:11 AM PDT

Laing satellite center na usab sa National Bureau of Investigation (NBI) 7 ang giablihan sa Martes, Mayo 13, 2022 sa kilid sa flyover sa Barangay Tabunok, Dakbayan sa Talisay.Si NBI 7 Regional Director Atty. Renan Oliva nibutyag nga ila kining gihimo nga pamaagi aron mamahimong mas mapadali ang pagkuha sa mga Sugboanon og NBI clearance.Matud ni Oliva nga sa habagatang bahin nga mga siyudad sa probinsiya sa Sugbo, nga naglakip sa dakbayan sa Naga ug Carcar, duna nay satellite offices."We are encouraging sa mga municipalities and cities nga mag put-up og satellite office para dili na moadto sa main office or mas duol sa mga tawo kon mokuha og clearance, frontline service ni sa NBI at minimal cost mas pabor kon duol na,"matod ni Oliva.Samtang gipahibawo usab niini nga ang buhatan karon sa NBI naningkamot nga mamahimong mapadali ang pagkuha og NBI clearance kon ma hit ang record.Sa una, pito ka adlaw hangtod nga nahimong tulo, apan karon usa na lang ka adlaw ang ilang target nga makuha dayon sa naglukat."Mao na program karon sa NBI management sa Manila ug once nga ma cleared ka after ka ma hit, the next time around mokuha dili naka mahit," dugang ni OlivaHuman sa Talisay, duna na sab silay laing mga dapit nga giduaw alang sa posibleng pagbutang og laing satellite office sa Sugbo.Gawas sa dakbayan sa Talisay nga satellite center, duna usay gitino nga mga lugar sa habagatan ug amihanan sa probinsiya sa Sugbo alang sa pagbutang og laing center."Hopefully maka open ta sa Toledo, sa Consolacion ug uban pa so mao na ang atong plano karon,"dugang ni Oliva.

Editoryal: 30 days ni Duterte

Posted: 31 May 2022 06:10 AM PDT

Karong adlawa, Hunyo 1, ang una sa katapusang adlaw ni Presidente Rodrigo Roa Duterte (PRRD) isip labing taas nga opisiyal sa nasod nga mobiya na sa posisyon karong Hunyo 30, 2022 aron paghatag og dan sa bag-ong napili nga presidente nga si Ferdinand 'Bongbong' Marcos, Jr.Grabe kalanog ang akusasiyon batok kang Duterte gikan sa lokal ug langyaw nga grupo sama sa alegasiyon sa paglapas sa tawhanong katungod bahin sa prayoridad nga kampanya sa iyang administrasiyon sa paglusad og gubat batok sa gidiling druga, kurapsiyon ug pagpangutang.Apan wala kini nakapiog ni Duterte. Misamot hinuon kahugot ang suporta sa nagpakahilom nga mayoriya kon basihan ang iyang taas nga trust ug approval rating sa ulahing survey sa unang quarter sa 2022 sa tinahod nga institusyon nga PUBLiCUS Asia Inc.Nagpakita nga 67.2 percent sa 1,500 respondents nagkanayon nga "approve" o '"strongly approve" sa performance ni Duterte sa miaging 12 ka mga buwan. Mas taas kini og 2.3 percentage points kon itande sa approval rating niya nga 65 percent sa unang sa quarter sa 2021.Dugang sa survey firm, ang iyang trustworthiness gihulagway nga "high" o "very high" base sa 61.2 percent sa respondents, mas mitaas og 6.2 percentage points gikan sa iyang 55 percent trust rating sa samang panahon sa miagig tuig. Dugang pa, ang iyang disapproval rating sa unang quarter sa 2022 naa sa 5.2 percent ug ang iyang labing ubos nga trust rating naa sa 6.6 percent.Si PUBLiCUS Executive Director Aureli Sinsuat, gikutlo sa usa ka taho, nagkanayon nga si Duterte maoy unang presidente sa kasaysayan sa Pilipinas nga motapos sa iyang termino nga ang approval ug trust ratings labaw sa 50 percent.Ug ning kataposang buwan sa iyang termino, suportahan nato si Duterte alang sa malinawon ug han-ay nga pagtunol sa gahom ug iyang nasugdan sa nasod ngadto sa mosunod nga administrasiyon nga iyang kaalyado.

Barrita: Balaod batok ‘trolls’ kinahanglan

Posted: 31 May 2022 06:07 AM PDT

Sa atong nabasa sa literatura, ang trolls mao kadtong mga bilyako ug malditong mga duwende nga manghasol ug maglangay-langay sa mga biyahedor nga moagi sa mga hilit ug awaaw nga dapit. Karon ang maong termino gigamit na alang niadtong mga personalidad nga nikuyanap sa Internet ug sa social meda nga di magpaila ug lisod ilhon.Wa na sila sa hilit ug awaaw nga dapit apan anaa na sila sa matag suok sa kalasangan sa information highway nga gitawag natog Internet. Apan ang ilang trabaho sama ra sa kaniadto. Manghasol sa mga tawo nga ilang mabiktima ug moatake sa mga Internet sites nga maoy ilang target.Ang uban sa mga trolls mga computer robots na nga sayon kaayong padaghanon. Mao kana ang hinungdan nga kon moabli ka og site sa Internet, ang computer na maoy mangutana kon di ba ka usa ka robot.Tungod kay lisod ilhon, lisod ang pagtaral sa hukmanan niadtong responsable sa mga trolls. Mao usab kini ang hinungdan nga sayon silang gamiton sa mga politiko sa pagsabwag og disinformation sa panahon sa kampanya.Busa, usa ka commissioner sa Commission on Elections (Comelec) miawhag sa mosunod nga Kongreso sa pagpanday og balaod batok sa paggamit sa mga trolls sa panahon sa eleksyon.Si Comelec Commissioner George Garcia niingon nga way gahom ang Comelec sa pagmonitor sa mga trolls sa panahon sa eleksyon kay way balaod nga nag-regulate niini. Wa say balaod nga nag-regulate sa paggamit sa mga kandidato sa social media bisan man lang atol sa eleksyon, matod niya.Kon ang usa ka kandidato gidaot sa mga trolls sa social media, ang biktima mahimong modangop sa balaod batok sa cyber libel. Apan lagi kay anonymous man ang mga trolls, lisod ang pag-ila ug ang pag-prosecute kanila.Susama kini sa paggamit sa mga pre-paid SIM cards sa mga cellphones ug smartphones nga mahimong gamiton sa binuang, pangilad ug uban pang mga krimen kay di man kini rehistrado ug di dayon matumbok kon si kinsa ang migamit niini. Inigkahuman og gamit, mahimo rang ilabay dayon ug ilisan og lain.Lahi sa post-paid kay nakarehistro man ang ngan sa subscriber ug dali rang matultolan kay duna may gibutang nga billing address.Nipasar ang Kongreso og balaudnon nga nagmando sa pagrehistro sa mga pre-paid SIM cards apan gi-veto kini ni Presidente Rodrigo Duterte kay gilakip man niini ang pagrehistro sa mga social media accounts. edbarrita@gmail.com

Diputado: Karma, premyo sa pagka hambogero

Posted: 31 May 2022 06:06 AM PDT

Di unta ko motuo sa giingong karma pero ang nahitabo sa usa ka board member, mora'g usa ka nindot nga ehemplo sa karma.Sa nagkaduol ang piniliay sa Mayo 9, dihay nangutana sa board members kon mag-session ba sila pagka Mayo 17.Abtik kaayo mitubag ang usa ka board member nga angay mag-session aron makita kon kinsay mihilak kay napildi. Sa Iningles pa, cocky kaayo ang maong bokal. Pwede pod nga matawag og tactless.Klaro kaayo nga sa iyang paminaw, segurado gyod nga modaog siya, kay kon naghuna-huna pa siya nga mapildi, di gyod to siya moboluntaryo og pagawas sa maong mga maidlot nga mga pulong.* * *Unsay nahitabo human sa canvassing?Napildi ang bokal nga hambogero ug napulihan sa iyang posisyon. 'Tamjun' na lang siya o taman na lang sa June (30).Abtik kaayo mipalabtik ang iyang mga kontra nga na-karma si bokal nga hambogero.* * *Niay mayora nga midagan pagka-kongresista kay gipasaligan sa gobernador nga tagaan og 50 milyones pesos nga magamit sa kampanya.Human tambagi sa iyang amahan nga hunongon na ang iyang kampanya kay segurado nga mapildi siya kay nagkadaghan ang iyang mga kontra, wala na manghatag ang gobernador sa iyang gisaad nga mga ayuda.Ug mao kini hinungdan nga wala madawat ni Mayora ang 50 milyones ka pesos alang sa kampanya.Resulta – napildi si Mayora kay gamay ra iyang undo, gikopras pa gyod ang iyang mga inangayan.* * *Samtang nagpaabot nga mahuman ang iyang termino karong Hunyo 30, giingong nagdali-dali siya og panawag sa contractors aron dalion nila og trabaho ang mga proyekto sa lungsod unya makakobra na pod siya sa iyang kobrahonon o komisyon.Apan nabantayan kini ug maoy hinungdan nga wala na mo-release og kwarta ang mga contractors kay gusto nila nga ang bag-ong mayor sa lungsod mao nay mopatigayon sa mga proyekto.Kay na-basted man, naghuna-huna na sab og laing gimik ang mayora.* * *Nakahunahuna siya nga molansad na lang pagka kapitan sa ilang barangay aron kuhaon niya ang pagka presidente sa ABC sa lungsod aron makalingkod siya sa sanggunian.Nagtuo siya nga ang iyang mga kaabag nga mga kapitan sa mayor pa siya, padayon nga mosuporta kaniya.Susko kay nahibaw-an man sa kasamtangan nga congressman ang plano sa mayora.Unsay mahitabo?Kusganon nga misulti ang congressman nga pakontrahan niya ang mayora sa iyang barangay ug andam siya mogasto sa kaatbang niini aron maseguro nga mapildi gyod ang mayora sa iyang plano nga mag kapitan.Unsay hinungdan nga init man gihapon ang politika sa maong lugar?Simple lang.Tungod sa pagka hambogero sa mayora, sinako nga kwarta, binarko nga kwarta nga ipabaha sa distrito aron maseguro ang iyang kadaogan, gawas pa sa mga personal nga batikos batok sa congressman, nakahuna-huna ang congressman nga tagaan og leksiyon ang Mayora. Mao nay premyo sa pagkahambogera.

Talk to Papa Joe: Sa wala damha

Posted: 31 May 2022 06:01 AM PDT

Dear Papa Joe,Ako diay si Sarah, taga Alcoy, 22 anyos na ang edad. Nagpadala ko aning akong suwat basin makahatag kag opinion ani kay wa ko makasabot kon problema ba ni.Akong mga ginikanan mga mag uuma lang ug tulo mi ka mga managsuon ug ako ang kamaguwangan. Naundang ko ron sa pagtungha kay lagi lisud among kahimtang. Sa wa nako damha tungod sa Facebook naka himamat ko og foreigner. 50 na siya ug sige na mi og chat niya ug mag video call.Karon interesado siya nga mo ari sa ato labi naluag na ang pagbiyahi ug gusto niyang makigminyo nako. Wa man say problema kay nakauyon man ko niya. Naglibug lang ko ug ma excited ba ko ug tinud-on ba niya. Palihug tambagi ko unsay akong buhaton.SARAHSarah,The best gyud kon huwaton nalang nimo nga moabot nang higayuna para di ka mag expect. Matod pa nimo nakauyon sad ka niya so way blema. Maybe mao na na ang tubag sa imong mga damgo ug pag ampo nga moabot ang grasya nimo.Basta ayaw lang pag expect gyud. Just be humble. Kon moabot, kilatisa ayaw padala dayon para way mahay. Kon way blema, dawata ang tanyag pero ayaw kalimot sa pagkilatis kay once mosud ka, ana lisud na igawas.PAPA JOE

Kulatahay sa Day-as, Hunyo 18

Posted: 31 May 2022 06:01 AM PDT

Kapin na lang sa duha ka mga semana ang huwaton ug makasaksi na'g balik sa personal ang mga Sugboanon og kulbahinam ug makapaukyab nga binukbokay sa mixed martial arts (MMA) event.Mahitabo kini sa pagpahigayon sa ika-41 nga edisyon sa Underground Battle (UGB) karong Hunyo 18, 2022 sa Barangay Day-as Sports Complex sa New Imus road, Cebu City.Nagkanayon si UGB Cebu promoter Master Benigno "Ekin" Caniga Jr. nga ning maong promosiyon, gikuha niya ang labing maayong fighters sa Sugbo aron iparang og mga dayo gikan sa nagkalainlaing suok sa rehiyon."Gipangpili gyud nato ang class A fighter sa Cebu para mokontra og taga laing lugar maong nindot gyud ni, binukbokay gyud ni'g sakto," matod ni Master Ekin.Sa main event, si Nino Rio "Pitbull" Saoy sa Mactan Combat Sports sa Lapu-lapu City makigbatok kang Rendel "The Destroyer" Camensi sa Dumaguete City.Si Saoy usa ka sakop sa Muay Thai national team nga naggunit og 8-4 nga rekord samtang si Camensi usa ka beteranong fighter nga adunay 17-4-1 nga rekord.Sa co-main event, ang sensational jiu-jitsu ug veteran MMA fighter gikan sa Mandaue City nga si Arnel "Ronin X" Ylanan makigharong ni Romil John"Aswang" Deita sa Roxas City.Aduna pa'y laing 10 ka mga away ang masaksihan sa promosiyon.Nidugang si Master Ekin, kinsa maoy CEO/founder sa YawYan Ardigma Cebu, nga matag buwan na ipahigayon dinhi sa Sugbo kining maong promosiyon."Lahi ni sa ubang MMA series kay kada buwan na gyud ni duwaon sa Cebu. Maghatag ni og chance sa atong local fighters nga makaaway sa abroad," batbat ni Master Ekin.Ang nag-unang 40 ka mga edisyon sa promosyon gipahigayon sa nagkalainlaing suok sa Luzon, Visayas ug Mindanao.Ang UGB usa ka international MMA promotional outfit nga nagtinguhang makadiskubre og dekalidad nga Filipino fighters nga adunay potensyal nga makakulit og dakong pangalan sa tibuok kalibutan.Alang sa dili makatan-aw og personal, mahimong motan-aw sa mga away sa promosyon sa spartacus mma.com ug puwede sab mag-download sa spartacus app.Alang sa dugang mga impormasyon, mahimong motawag sa 0943-0932444 o moduaw sa FB account ni Mary Joan Durado.

Asst. coach nga nangluwa og player silotan sa MPBL

Posted: 31 May 2022 05:59 AM PDT

Pahamtangan og grabeng silot sa Maharlika Pilipinas Basketball League (MPBL) ang assistant coach sa San Juan Knights nga si Yong Garcia human kini nasakpan nangluwa sa usa ka magduduwa sa Valenzuela nga si Lordy Casajeros atol sa ilang duwa niadtong Mayo 30, 2022 sa gabii sa Filoil Flying V Center.Nahuman na ang MPBL officials sa pagsusi sa insidente pinaagi sa video ug gilihok na niini ang proseso sa pagpahamtang og silot kang Garcia.Sa kuha sa camera, nakita si Garcia nga miluwa sa tuo nga abaga ni Casajeros sa 2nd quarter sa mainitong duwa diin gibuntog sa Valenzuela ang San Juan, 90-74.Si Casajeros naghuwat na kon unsa'y isilot sa MPBL ngadto kang Garcia.Adunay mga tinubdan nga pahamtangan og dakong multa si Casajeros ug suspensyon nga molanat og taas nga panahon.Sa iyang Facebook account, nanawagan si Casajeros sa Games and Amusement Board (GAB) nga mohimo'g lakang sa gibuhat ni Garcia.

Desiderio dugay pa makabalik

Posted: 31 May 2022 05:58 AM PDT

Gilaumang molanat og taas nga panahon una makaduwa og balik sa Philippine Basketball Association (PBA) ang Sugboanong sakop sa Blackwater Bossing nga si Paul Desiderio.Kini gumikan sa pagkaangol sa wa nga tuhod ni Desiderio niadtong Mayo 27, 2022 atol sa practice game sa Bossing batok TNT Tropang Giga sa Moro Lorenzo Sports Center sulod sa Ateneo campus.Nagkanayon si Blackwater coach Ariel Vanguardia nga sa inisyal nga medical checkup, nakasinati si Desiderio og ACL tear.Ning pagsuwat, wala pa'y pinal nga resulta MRI test sa angol ni Desiderio.

Wright pabilin sa Fuel Masters

Posted: 31 May 2022 05:58 AM PDT

Giklaro sa Phoenix Super LPG Fuel Masters nga pabiling moduwa sa ilang kampo si Matthew Wright alang sa 2022-23 season sa Philippine Basketball Association (PBA) nga sugdan karong Hunyo 5, 2022 sa Araneta Coliseum.Mao kini ang gibutyag ni team governor Raymond Zorrilla isip reaksiyon sa mga hugonhugon nga posibleng mobalhin og laing team o sa laing liga si Wright."Matthew Wright is on the roster. He will be playing," matod ni Zorrilla nga napatik sa Spin.ph."He has a live contract and he will honor that commitment to play for us."

Caguioa di na sab moduwa

Posted: 31 May 2022 05:58 AM PDT

Mopalta na sab og usa ka komperensya si Ginebra Gin Kings guard Mark Caguioa sa 2022-23 season sa Philippine Basketball Association (PBA) nga sugdan karong Hunyo 5, 2022 sa Araneta Coliseum.Nagkanayon si Ginebra team governor Alfrancis Chua nga dili una moduwa ang kanhi MVP sa 2022 Philippine Cup gumikan kay aduna kini kinahanglang asikasuhon."Si Mark Caguioa, wala muna siya sa roster dahil he needs to fix something," batbat ni Chua nga napatik sa Spin.ph.Mao kini ang ikatulong sunodsunod nga komperensiya nga dili moduwa si Caguioa.

Opisyal sa DSWD nangulo pag-abli project sa Alegria

Posted: 31 May 2022 04:43 AM PDT

Ang Department of Social Welfare and Development (DSWD) niabli sa iyang labing dakong isolation facility sa lalawigan sa Sugbo pinaagi sa Kapit-Bisig Laban sa Kahirapan-Comprehensive and Integrated Delivery of Social Services (KALAHI-CIDSS) sa lungsod sa Alegria.Siyam ka mga barangay ang nakahukom sa pagtukod sa malahutayon ug operational facility bisan sa kaapiking pundo ug limitadong health workers.Pinaagi sa KALAHI-CIDSS program, ang DSWD nipagawas og P18.9 milyunes , lakip sa counterpart contribution sa local government sa Alegria, alang sa katukoran sa 13-room facility complete uban sa amenities, medical equipment, PPEs, ug disinfectants isip tubag sa pandemiya.Si Mayor Verna V. Magallon nipasalig nga ang mosunod nga bag-ong administrasiyon ni Mayor-elect Gilberto F. Magallon, ang LGU Alegria mopadayon sa operasiyon sa pasilidad ngadto sa usa ka infirmary ug laboratory alang sa unang medikal nga panginahanglan.Si DSWD Undersecretary Danilo G. Pamonag nangulo sa ribbon cutting ug turnover sa pasilidad ngadto sa mga lokal nga opisyal ug rural health unit sa Alegria.Sa iyang mensahe, si Pamonag nipadayag sa pagdayeg sa KALAHI-CIDSS tungod sa pagbutang og proyekto nga timailhan nga ang katawhan dunay pagsalig sa kagamhanan ug testamento sa ilang pagtinabangay pinaagi sa program sa DSWD. (PR)

GSave depositors miabot og 5.3M

Posted: 31 May 2022 04:42 AM PDT

Ang digital savings account nga GSave mitubo na ngadto sa 5.3 ka million users, uban sa usa sa lima ka mga hamtong nga Filipino nga dunay banko, karon nigamit na usab sa maong serbisyo ug ang platform padayong niabot sa populasiyon nga walay banko.Ang GSave gimugna sa inilang e-wallet platform nga GCash ug usa sa Southeast Asia's largest commercial banks, CIMB Bank.Kini ang labing unang bank account nga makaabli ug makamintinar direkta sa GCash app.Ang gidaghanon sa GSave depositors gipaabot nga motubo pa samtang ang CIMB nipasaka sa iyang interest rate ngadto sa 7% per annum alang sa bag-ong GSave account holders.Sa pagkakaron, ang depositors gihatagan og 2.6% annual interest rate, diin mas taas sa 0.10% ngadto sa 1.25% nga gitanyag sa traditional banks.Nadasig sa iyang kalamposan uban sa CIMB, ang GCash gikatakda nga molusad sa GSave Marketplace, nga motanyag sa dagahng kapilian sa banko ug savings products nga haom kanila.Mahimong kabahin sa GSave Marketplace mao ang Bank of the Philippine Islands (BPI), usa sa dako iug labing tinahid nga banko sa nasod."We want to bring financial inclusion to Filipinos nationwide. Through GSave, we hope to encourage everyone, especially the unbanked, to open a digital savings account. It can open up a whole suite of financial services like loans, insurance, and investment to help uplift their lives. They only need one ID to open a savings account in GCash, then they can start saving right away and eventually avail of other services," matod n Martha Sazon, GCash President and CEO.Ang GSave nahimugso sa pagtubag sa panginahanglan. Dul-an sa 70% sa hamtong nga populasyon sa nasod walay banko dihang gipaila ang innovative service niadtong Dsiyembre 2018.Gawas sa high interest rates, zero fees, ug quick account setup, ang GSave walay mangayo og minimum depositug maintaining balance, dili susama sa naandang banko.Kini nagtubag kon ngano nga daghan sa populasyon wala magtigom sa banko- kuwang og pundo.Pinaagi sa pagkig-uban sa GCash, ang CIMB Bank nihatag og gahom sa GCredit. Nag-uan sa iyang matang sa serbisyo nga digital lending.Sa pagkakaron, ang GCredit nakahatag na og P29 billion nga balor sa pautang sa kuwalipikadong kliyente bisan walay nga dokumento sa ilang kinitaan.Ang GCash usa sa portfolio companies ubos sa 917Ventures, bugtong gipanag-iya nga subsidiary sa Globe. Usa kini sa mga produkto sa Globe Group nga nagsuporta sa United Nations Sustainable Development Goals, labina s a UN SDG No. 9, nag-ila sa papel sa infrastructure ug innovation isip kritikal nga pagmiubra sa pagpatubo ug pagpalambo sa ekonomiya. (PR)

Sotto kuhaon sa Warriors?

Posted: 31 May 2022 04:41 AM PDT

Kuhaon sa Golden State Warriors ang batan-ong Pinoy nga higante nga si Kai Sotto sa 2022 National Basketball Association (NBA) Rookie Draft nga gikatakda karong Hunyo 23, 2022 sa Barclays Center sa New York.Mao kini ang nibaniog nga hugonhugon nga gihisgutan sa YouTube channel nga Warriors Today by Chat Sports.Ang host sa nahisgutang YouTube channel miingon nga angay lang nga makuha sa Warriors si Sotto gumikan kay nagkinahanglan ang team og dugang haligi sa ilawom.Gawas niini, nidugang ang host nga naila ang Warriors nga maayong moumol og usa ka magduduwa aron mogawas ang tanang potensyal niini.Si Sotto, kinsa nag-20 anyos niadto lang Mayo 11, 2022 ug adunay 7'3" nga gitas-on, nakapakita na sab og potensiyal nga kaya niyang mokombati sa world basketball sa iyang pagduwa sa National Basketball League (NBL) sa Australia ubos sa kampo sa Adelaide 36ers.Ang Warriors adunay tulo ka mga higayon nga makapili sa draft, ang ika-28 sa 1st round ug ika-51 ug ika-55 nga 2nd round.Kon buot hunahunaon, mahiluna og insakto si Sotto sa Warriors gumikan kay daghang mga Pinoy sa San Francisco diin nahimutang ang homecourt sa team nga mao ang Chase Center.Usa sa mga nikomentaryo sa nahisgutang YouTube channel miingon nga makatabang gyud si Sotto sa Warriors."GSW has an eye for a good talent. The difference with the other team, GSW knows how to develop a talent and invest on that," komentaryo sa GagsFamilyVids."If Warriors drafts Kai, it will boost the center position and will support (James) Wiseman alternatively. He got moves, he has shootings and a shot blocker."Sa miaging interbyu nga gipasiugdahan sa NBA Philippines, nagkanayon ang agent ni Sotto nga si Joel Bell nga dako ang iyang pagsalig nga makuha si Sotto sa draft.Matod ni Bell nga daghang teams ang nipadayag og interes nga mokuha kang Sotto ug adunay usa ka team ang mipasalig kuhaon si Sotto, kinsa nagtinguha nga mahimong labing unang lumad nga Pinoy nga makaduwa sa NBA.

Horford labing nagpanikad sa NBA Finals

Posted: 31 May 2022 04:19 AM PDT

Kon adunay pilion nga labing nagpanikad sa umaabot nga 2021-22 National Basketball Association (NBA) Finals tali sa Golden State Warriors ug Boston Celtics, wala na seguro laing modaog kon dili ang beteranong si Al Horford sa Celtics.Si Horford, kinsa mag-36 anyos na karong Hunyo 4, 2022 (RP time), maoy labing edaran sa kampo sa Celtics.Gikan sa iyang pagkasulod sa NBA isip No. 3 overall pick sa Atlanta Hawks niadtong 2007, si Horford kanunay lang makataak sa playoffs.Sulod na sab sa 130 ka mga duwa sa playoffs ang iyang nasagubang apan sukad masukad, wala pa siya nakasulod sa NBA Finals maong grabe ang iyang kahinam nga nahitabo na kini karon."Nobody deserves it more," matod ni Boston guard Jaylen Brown.Sa kasaysayan sa NBA, walay magduduwa nga naglabaw pa ni Horford sa padaghanay og nasagubang nga mga duwa sa playoffs nga wala nakasulod sa NBA Finals."Just didn't know how to act," asoy ni Horford. "Just caught up, excited. A lot of hard work. I've been a part of a lot of great teams, a lot of great teammates, and I'm so proud of this group. ... I'm really grateful to be in this position."Ang NBA Finals sugdan karong Hunyo 3, 2022 sa korte sa Warriors nga mao ang Chase Center sa San Francisco. (AP)

PSA 7 nakalista na og 5.5M sa National ID system

Posted: 30 May 2022 08:10 PM PDT

Ang Philippine Statistics Authority (PSA 7) nakarehistro na og 5,575,236 ka mga individual sa Central Visayas human gilusad ang Philippine National Identification System niadtong Pebrero 21, 2021.Si Clare Coronado, public information officer sa PSA 7, nagkanayon nga niabot na og 1,446,431 kun 25.94% ang hingpit nga nahatagan na sa ilang ID card.Ang PIO sa PSA 7, kanhi National Statistics Authority (NSO), niawhag sa 75 porsiyento sa mga indvidual nga wala pa makadawat sa ilang national ID or Philippine Identification System (PhilSys) sa paglugway pa sa ilang pasensiya sanglit gipaubos pa kini sa pagsuta."Kadtong national ID nga wala pa maabot kay under pana sa standard verification process para ma-ensure that the registration is unique kay ang or PhilSys number kinahanglan way kapareha," padayag ni Coronado.Dugang niya nga kon walay kakulian human sa standard verification process, ang ilang head office moprinta dayon sa ID ug ipadala sa ilang courier nga mao ang Philippine Postal Corporation aron mahatod sa mga tag-iya.Gitug-an ni Coronado nga moabot sa dul-an usa ka tuig ang pagproseso human sa pagparehistro sanglit ang verification process sa PSA maoy makakaon sa ilang panahon.Giawhag usab nila nga kadtong mga nakarehistro na apan wala pa moabot ang ilang mga national ID sa paglugway sa ilang pagpaabot ug likayan ang pagparehistro og balik aron dili magdoble ang ilang ID ug PhilSys number.Si Presidente Rodrigo Duterte niadtong Pebrero 2022, niisyu og Executive Order No. 162 nga nagmando sa tanang institution mapubliko man o pribado sa pagdawat sa national ID isip valid identity para sa ilang mga transaksiyon.

Upat ka Chinese patay

Posted: 30 May 2022 06:49 PM PDT

Upat ka Chinese nationals nga gikatahong midagit sa 70 anyos nga negosyanteng Intsik napatay sa engkwentro sa mga sakop sa PNP Anti-Kidnapping Group Visayas Field Unit ug sa Police Regional Office 7 sa usa ka subdivision sa dakbayan sa Lapu-Lapu sa Martes sa gabii Mayo 30, 2022.Ang mga suspek giila nga sila si Lin Heng, You Yiping, Li Fengqiang, ug Gong Jinming nga nag-abang og balay sud sa usa ka subdivision sa Barangay Bankal, Lapu-Lapu City diin nila gitagoan ang 70 anyos nga negosyanteng Intsik human nila gidagit sa Barangay Lahug, siyudad sa Sugbo niadtong Mayo 25, 2022.Matod ni Police Lieutenant Sozimo Ravanes, deputy chief sa AKG, nga atol sa ilang pagsulod sa vicinity sa balay nga giokupahan sa mga suspek, kalit lang kini nga namusil nga niresulta sa pagka igo ni Police Master Sergeant Jornard Cumahig.Apan maayo nalang nga naka bullet proof vest ang pulis ug wala molapos ang bala sa lawas niini.NAKIGPINUSILAYDinhi na nahitabo ang binawsanay tali sa mga pulis ug sa mga suspetsado nga kidnapper sa sulod sa balay.Sa ilang pagsusi, ang upat ka mga Chinese national nagbuy-od na nga wala nay kinabuhi samtang ang biktima nga si Lyu Xingou, investor sa Mactan Newtown, malampuson nga naluwas sa kapulisan.Nakakuha usab sila sa mga armas sa mga suspek nga gihulagway ni Ravanes nga mga mugbo nga kalibre nga naa na karon sa kustodiya sa PNP Crime laboratory nga maoy nag proseso sa crime scene aron usab masusi.Gisaysay ni Ravanes nga niadtong Mayo 25, 2022 Lunes sa alas 9 sa buntag, gisulod sa mgaChinese national ang balay ni Xingou sa Lahug. Si Xinguo padulong na unta molakaw.Pipila ka oras ang milabay ang mga suspek ningpahibawo sa anak biktima nga atua sa China nga ilang gi kidnap ang iyang amahan ug nangayo silag ransom nga 1 Billion Ren Min Be (RMB) kwarta sa China.Apan nihangyo ang kabanay nga 500,000 RMB lang una ang ilang ihatag nga mobalor sa Philippine peso og P3.9 million.Tungod niini, ang asawa ug mga kauban sa biktima nagpatabang na sa Mabolo police station ug sa dihang nasuta nga kidnapping ang nahitabo, gi-turnover kini sa AKG 7 nga mao na usab ang nihimo sa imbestigasiyon.Mihimo gilayon og back tracking ang kapulisan sa mga CCTV camera gikan sa Brgy. Lahug hangtod nga naabot sila sa subdivison sa Barangay Bangkal sa Siyudad sa Lapu-lapu.NATULTOLANDidto na nakatutok ang ilang imbestigasyon sanglit didto nisulod ang sakyanan sa mga suspek nga tungod niini nakig-alayon sila sa mga security guard sa subdivision.Dako matod pa og natampo ang security guard sa maong subdivision nga nikooperar kini sa kapulisan ug maoy naghatag sa tanang kasayuran labot sa usa ka panimay nga giabangan sa mga Intsik."Usa sa vital nga information nga naka hatag og dako sa atong pag raid ani gikan sa security guard sa subdivision nga high end, ato man gud gisubay ang mga possible place nga ilang gidal-an nag conduct tag interview sa mga tawo, so kining security guard aning subdivision very cooperative niingon sila nga naay Chinese nga nag abang diha, nya atong gi background ang mga Chinese hangtod na found out nato nga naa didto ang ilahang biktima," matod ni Ravanes sa Superbalita Cebu.Kini na ang ikaduhang higayon nga adunay nahitabong kidnapping nga naglambigit sa mga Chinese national diin ang una nahitabo niadtong Mayo 7, 2022 diin nadakpan usab ang mga suspek nga nakabase sa kaulohan.SINDIKATONagtuo ang AKG 7 nga dunay koneksiyon ang nahitabo karon ug niadtong unang kidnapping sanglit ang duha ka mga suspek karon nagbase usab kini sa Manila.Gituohan usab nila nga sakop sa usa ka dakong sindikato sa mga kidnapper ang upat ka Chinese national nga napatay sa engkwentro.Matod ni Ravanes nga ang duha ka mga biktima sa kidnapping pulos mga investor sa Mactan Newtown."Kining duha murag gi import ni sila from Manila, so atong ma-analyze nga grupo gyud ni sila. Duna gyud ni silay mga dagko pa nga miyembro sa ilang kidnap for ransom group nga Manila based, organized ni sila kay fully armed man sila. Dako ni sila nga grupo," matod ni Ravanes.DI ALARMINGSi Lapu-Lapu City Mayor Junard "Ahong" Chan, kinsa nisusi sa crime scene, nisulti sa Superbalita Cebu nga dili alarming sa dakbayan ang sunodsunod nga pagka diskobre sa grupo sa mga Chinese national nga mikidnap sa ilang mga kaubanang Chinese nga nagtago sa dakbayan sa Lapu-Lapu.Unang operation sa hiniusa nga pag rescue sa PNP nga gipangulohan sa AKG 7 uban ang Regional Intelligence Division (RID 7) ug Lapu-Lapu City Police Office sa Barangay Mactan sa nahisgutang Siyudad sayo ning buwana.Nasikop sa kapulisan ang mga suspek samtang ang biktima naluwas sa mga awtoridad.Ang rescue operation niadtong Lunes sa gabii ikaduha na.Matud ni Chan nga nagmalampuson ang rescue operation tungod sa hugot nga pagmonitor sa PNP sa dakbayan ug pakig-alayon niini sa uban pang mga unit aron magpabilin gihapon nga malinawon ang dakbayan.Nanawagan si Chan ngadto sa mga Oponganon nga magmabinantayon ug makig alayon sa PNP kon adunay kadudahan nga mga tawo sa ilang dapit.
at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...