https://www.sunstar.com.ph/ |
- Pagpalapad sa franchise areas sa DLPC makatabang sa turismo sa Igacos - Uy
- Komunidad gihangyo tabang sa pagbantay sa palibot
- Oplan DDS gipatuman sa DCPO
- Frasco miabiso sa publiko vs magpailang representante ni VP Sara
- Pagpatay sa pulis, gisusi
- 'Burger' sa pakals sa birthday ni VP Sara himuong handumanan
- Davao City, DavOr ubos sa Alert Level 1
- Principal gipusil tungod nagselos sa posisyon?
- Seguridad sa borders gihugtan
- Hubog gitigbas sa kainom
- 3 magsuon nanumod og shabu nasignit
- Pork products gidid-an nang dalhon sa Mount Apo
- Roldan: Bataan Nuclear Plant paandaron
| Pagpalapad sa franchise areas sa DLPC makatabang sa turismo sa Igacos - Uy Posted: 01 Jun 2022 03:37 AM PDT GIKANAYON ni Island Garden City of Samal (Igacos) Mayor Al David Uy nga ang pagpalabang sa balaudnon nga nagpalapad franchise area sa AboitizPower subsidiary Davao Light and Power Company (DLPC) ngado sa Davao del Norte makatabang sa turismo sa isla."This is the turning point in the history of Samal Island when we can now start fully realizing our potential as a tourism and investment destination," matud ni Uy sa iyang Facebook post niadtong Martes, Mayo 31, 2022.Gisulti sa mayor nga ang di maayong suplay sa sugang dagitabnon ug inprastraktura nakaapekto sa Samalenyos sa miaging mga panahon."Our poor power supply and poor power infrastructure have held us back and caused a lot of suffering to our people," pagtataw niya.Matud ni Uy nga mahimo na silang "to look forward to a brighter future" ug ang lokal nga panggamhanan andam nga makigtrabaho sa DLPC sa paghatag og stable power supply.Ang balay balauranan nagpalabang sa ikaduhang pagbasa sa House Bill (HB) 10554 (Committee Report No. 609) o ang "act expanding the franchise area" sa DLPC sa AboitizPower subsidiary nga naglakip sa Igacos, Tagum City, Asuncion, Kapalong, New Corella, San Isidro, ug Talaingod sa Davao del Norte. Kini nga mga lugar kasamtangang ilawom sa Northern Davao Electric Cooperative (Nordeco).Ang HB 10554 gipangamahan ni Palawan Representative Franz Alvarez, Committee on Legislative Franchises chairperson, uban sa mga Mindanawon Representatives nga naglakip nila Davao del Norte Representative Pantaleon Alvarez, PBA Partylist Representative Jericho Nograles, ug Camiguin Representative Xavier Romualdo. Giisponsoran sab ni Manila Fourth District Representative Edward Maceda ang maong balaudnon.Sa Senado, ang HB 10554 giisponsoran ni Senadora Grace Poe samtang si Senador Ralph Recto nagsilbi isip co-sponsor."We thank our representatives in Congress for fighting for us. We thank our fellow local government leaders who stood beside us and fought with us in securing better service and cheaper electricity for our people," matud niya.Ang mayor tataw sa iyang mga pagkadismaya sa kakuwang og aksiyon sa Nordeco sa pagtubag sa ratational brouwnout sa isla.Samtang ang Nordeco sa ilang opisyal nga pahayag nga giisyu niadtong Martes sa gabii, Hunyo 1, nagsulti nga ang ilang kooperatiba magpadayon sa pag-operate bisan pa sa paglabang sa balaudnon kay ang ilang prangkisa mapupos sa 2028 pa alang sa Davao del Norte, samtang sa 2033 sab alang sa Igacos."[It] shall continue to operate as the distribution utility under its franchise coverage area and shall continue to operate as the distribution utility under its franchise coverage area and shall continue to implement projects and programs to avoid unnecessary disruption of power supply and services in the Provinces of Davao de Oro and Davao del Norte," matud sa electric cooperative.Sa panapos nga pahayag, ang Nordeco mihangyo sa suporta sa ilang member-consumer-owners.Gisulayan sa SunStar Davao og kuha ang bahin sa DLPC bahin sa maong balaudnon, apan wala pa sila mohatag og opisyal nga pahayag. (RGL) |
| Komunidad gihangyo tabang sa pagbantay sa palibot Posted: 01 Jun 2022 03:36 AM PDT SUBAY sa sunod-sunod nga pagpangawat ug pagpanglungkab nga nahitabo sa Davao City, giawhag sa kapulisan ang mga residente sa siyudad nga motabang sa pagbantay alang sa ilang personal nga seguridad.Atol sa AFP-PNP press conference kagahapong adlawa sa The Royal Mandaya Hotel, gibutyag ni DCPO spokesperson Police Major Ma. Theresita Plaza-Gaspan nga ang pagbantay sa krimen dili kini mabuhat sa kapulisan nga sila lamang diin kinahanglan ang komunidad.Tungod sa kadako sa area sa Davao City, pipila lang sa mga kapulisan ang ma-deploy sa lugar. Busa nanghinaut sila nga tabangan sa katawhan.Giingon ni Gaspan nga ang paglikay sa krimen kinahanglan pakiglambigitan sa tanan."Please help us. Crime prevention is not only trabaho sa pulis ug sa mga kasundalohan, kon dili it is everybody's concern," ingon ni Major Gaspan.Dugang sa opisyal nga padayong magmabinantayon ug dili angay nga magkompiyansa sa palibot."Dili magbutang og kuwarta ug mga mahalon nga butang sulod sa sakyanan. Isarado kini og maayo aron dili kini malungkab," sulti sa opisyal.Gidasig usab sa opisyal ang mga business establishments sa pagbutang og closed-circuit Television (CCTV) o mga surveillance cameras sulod ug gawas sa ilang mga tindahan.Ang pag-install og CCTV sa mga business establishments, dako gyud og tabang sa pagsubay kung kinsa ang posible nga mihimo sa pagpanglungkab diin gihangyo sa opisyal nga kinahanglan naga-function ang mga CCTV cameras.Sa pagkakaron, ginabahin na ang deployment sa kapulisan, diin ang mga lugar nga daghan og tawo gibutangan na og mobile patrol, naka-standby usab ang mga pulis ug aduna sab nagatuyok nga pulis sa palibot aron maseguro ang kahapsay sa lugar sa Davao City. (JPC/Jessel T. Gepiga, Davao del Norte State College, Intern) |
| Posted: 01 Jun 2022 03:36 AM PDT ALANG sa kaluwasan sa tanang Dabawenyo, mas gihingusgan pa karon ang seguridad diin ang kapulisan sa Davao City Police Office (DCPO) okupado sa pagpa-implementar sa Oplan DDS o Davao Defend System.Ang Oplan DDS usa ka programa sa awtoridad ning siyudad nga mag-seguro sa doble ug mas luwas nga seguridad sa Dabawenyo ug sa kinatibuk-ang siyudad sa Davao.Atol sa AFP-PNP press conference kagahapong adlawa sa The Royal Mandaya Hotel, gibutyag ni DCPO spokesperson Police Major Ma. Theresita Plaza-Gaspan nga luyo sa panghitabo nga pagpamomba sa silingang dapit sa siyudad, samot nga giigmat sa kapulisan ang ilang pagbantay sa palibot."Isa nga atong ginatutokan karon is kaning sunod-sunod nga bombing sa atong mga neighboring regions nga adunay hulga sa terorismo... that's why ang Davao City Police Office busy kaayo ta sa pag-implementar gyud ug intervention ani," tipik sa gisulti ni Major Gaspan.Subay sa Oplan DDS, mas hugtan pa sa kapulisan ang mga border control points sa Davao City diin masinati ang hugot nga seguridad 24 oras.Sumala ni Gaspan nga nunot sa maong pagpatuman sa hugot nga seguridad, dili malikayan nga masinati ang hinay ngadto na sa kasarangan nga dagan sa trapiko."Dili siya simultaneous pero duha hangtud upat ka oras mag checkpoint ang isa ka station then another station napud, pero dili gyud na siya ma-undang, dire-diretso gyud na siya, so masinati pud nato ang traffic tungod sa maong checkpoints," dugang ni Major Gaspan.Giingon sab ni Gaspan nga daghan sab mga pulis ang nagalibot sa palibot sa siyudad aron nga malikayan ang mga panagtapok.Luyo niini, mipasalig si Major Gaspan nga walay hulga nga nasinati ang Davao City, apan dili gihapon angay nga magkompyansa. (JPC/Jessa Mae T. Castillon, Davao del Norte State College, Intern) |
| Frasco miabiso sa publiko vs magpailang representante ni VP Sara Posted: 01 Jun 2022 03:34 AM PDT NAGPASIDAAN ang kampo ni Vice President-elect Sara Z. Duterte-Carpio ngadto sa publiko niadtong Miyerkules, Hunyo 1, 2022 batok sa mga indibiduwal nga nagpaila sa ilang kaugalingon isip iyang representante aron sa giingong mangolekta og "advance payments" alang sa mga proyekto sa Department of Education (DepEd).Si Liloan, Cebu Mayor Christina Frasco, tigpamaba ni Duterte-Carpio, miingon nga nagtarget ang mga contractors ug suppliers sa DepEd."The incoming Secretary of Education [Duterte-Carpio] has not nor will never designate anyone to talk to or negotiate with contractors and suppliers to engage in corrupt activities — smearing her reputation and tarnishing the image of the entire DepEd and the thousands of people working hard under the organization," pagtin-aw ni Frasco.Tungod niini, mga contractors, suppliers, ug ang publiko giawhag nga magbantay batok niining mga indibiduwal o grupo nga magrepresenta kang Vice President-elect ug umaabot nga DepEd Secretary.Gisulti niini nga mahimo nilang itaho kining "suspicious activities" ngadto sa mga awtoridad.Si Duterte-Carpio, kinsa bag-ohay lang giproklamar isip mananaug sa 2022 vice presidential race, gitudlo ni President Ferdinand Marcos, Jr. isip DepEd Secretary.Sa pikas bahin, si Frasco mobiya sa iyang posisyon isip mayor sa lungsod sa Liloan human gidawat ang posisyon isip Tourism Secretary.Samtang ang outgoing Davao City mayor nagsugod na sa pagpakig-istorya sa kampo ni outgoing Education Secretary Leonor Briones ug outgoing Vice President Leni Robredo alang sa transition process sa duha ka mga buhatan. |
| Posted: 31 May 2022 03:01 AM PDT MATANAO, Davao del Sur -- Usa ka makuti nga imbestigasyon ang gihimo karon sa Matanao Municipal Police Station sa pagpusil-patay sa usa ka pulis pasado alas 6 sa buntag kagahapon, Martes, Mayo 31, 2022.Sa report nga gikan sa Police Regional Office (PRO) Davao Region, ang nasampit nga biktima mao si Patrolman Hariz Jhun M. Adayo, 26-anyos, minyo ug kasamtangan nadestino sa Don Marcelino Municipal Police Station ug nagpuyo sa Cadena De Amor St., Poblacion 1, Bansalan, Davao del Sur.Si Patrolman Adayo sakay sa iyang motorsiklo paingon sa munisipalidad sa Hagonoy.Dihang pag-abot niini sa Barangay New Visayas, Matanao, Davao del Sur kalit kining gitaparan sa nakamotor nga mamumuno.Ang biktima gipusil sa makadaghang higayon tumong sa iyang lawas hinungdan nga nahagba kini ug nakabsan sa kinabuhi.Sumala sa mga testigo, walay plaka ang motorsiklo nga gisakyan sa mamumuno kinsa human sa pagpamusil mipaturatoy kini og padagan paingon sa Poblacion sa Hagonoy.Samtang gikondena sa Police Regional Office-Davao Region (PRO-Davao) ang pagpatay sa biktima.Gipasalig ni PRO-Davao Director Brigadier General Benjamin Silo Jr. nga maangkon ang hustisya sa pamilya sa biktima.Padayon ang kapulisan sa Matanao MPS sa paglusad sa imbestigasyon sa krimen aron maila ug masikop ang mga responsable sa hitabo. (Uban sa taho ni Ralph G. Llemit) |
| 'Burger' sa pakals sa birthday ni VP Sara himuong handumanan Posted: 31 May 2022 02:59 AM PDT KAHINAM ang gibati sa mga taga Bankerohan Davao City ug alang sa pipila ka mga residente, inay kan-on, ila nalang tago-an ang burger nga gipanghatag atol sa adlaw'ng natawhan ni Vice President-elect Sara Duterte-Carpio, kagahapon, Martes, Mayo 31, 2022.Kini ang nag-trending nga mga green burger nga gipanghatag ni Davao City Barangay 5-A Kapitan Edgar Ibuyan Sr, ug sa iyang anak nga si 1st District Councilor Edgar Ibuyan Jr., kuyog ilang mga pamilya, kagahapong adlawa.Sumala ni Kapitan Ibuyan nga moihap lang sa 500 ka mga green burger ang ilang napanghatag sa mga residente sa Brgy. 5-A Bankerohan.Giingon ni Kapitan Ibuyan nga pamaagi kini sa iyang inisyatibo nga mapasalamatan ang mga nagsuporta kang VP-elect Duterte-Carpio gikan sa iyang gialagaran nga barangay.Ika-44 katuig nga adlaw'ng natawhan kagahapon ni VP-elect Duterte-Carpio.Sa Official Facebook ni VP-elect Duterte-Carpio iyang gipasalamatan ang mga nagtimbaya kaniya."Salamat po sa mga greetings! Mahal ko kayo! Mahalin natin ang DepEd! Mahalin natin ang Pilipinas!" tipik sa post sa umaabot nga DepEd secretary.Sa mosunod nga mga adlaw, gikatakda na sab ang laing hugna sa pagpang-apud-apod og green burger nga pangunahan sa mag-amahang Ibuyan. |
| Davao City, DavOr ubos sa Alert Level 1 Posted: 31 May 2022 02:58 AM PDT MAGPABILIN nga ubos sa Alert Level 1 ang Davao City samtang gi-downgrade na ubos sa maong alert level ang Davao Oriental subay sa gipagula sa Inter-Agency Task Force for Management of Emerging Infectious Diseases (IATF-MEID) nga Resolution Number 168-A pinetsahan Mayo 26, 2022.Base sa alert classification, magpabilin lang gihapon sa Alert Level 2 ang Davao del Norte, Davao del Sur, Davao de Oro ug Davao Occidental sugod karong adlawa, Hunyo 1, 2022 hangtud Hunyo 15, 2022.Ang Department of Health (DOH) Davao Region nagpahinumdom sa publiko nga ubos sa Alert Level 1, ginatugutan na ang intrazonal ug interzonal nga travel gawas pa man sa imong edad ug comorbidities.Ginatugtan na sab ang pag-abli ug pag-operate sa tanang mga establisemento, personahe, aktibidad, trabaho ug ang full on-site capacity.Kinahanglan lang nga sundon ang ginapatumang minimum public health protocols.Samtang ang face-to-face classes alang sa basic education nanginahanglan pa og approval gikan sa Office of the President.Ubos sa ALert Level 2, mamahimo nang magpatuman og maximum capacity ang pipila ka gambalay ug negosyo ngadto sa 50% sa indoor venues, alang sa mga fully vaccinated ug sa mga nag-edad og 18-anyos paubos bisan pa man dili pa sila bakunado.Gitugtan sab ang 70% nga kapasidad alang sa outdoor venues, apan segurohon lamang nga ang mga empleyado sa maong gamabalay o negosyo, tanan bakunado.Subay niini, adunay usa ka barangay sa Davao City ang nabutang ubos sa Low Risk Category batok Covid-19 base sa gipagawas nga barangay classification sa City Government of Davao gikan May 30, 2022 hangtud Hunyo 4, 2022.Kini ang Barangay 76-A Bucana samtang wala nay natalang barangay ubos sa Critical Risk, High Risk ug Moderate Risk.Samtang padayon nga nag-awhag ang City Government of Davao nga magpabakuna batok Covid-19 ug pagpaturok og booster shots.Dungan niini, gipahimangnoan ang tanan nga padayon sa paggamit og face mask, paglikay sa mga lugar nga may kaso sa Covid-19 gawas na lamang og ang rason may kalabutan sa trabaho, negosyo ug emerhensiya. (Jeepy P. Compio, Cheche Diabordo, KMN) |
| Principal gipusil tungod nagselos sa posisyon? Posted: 31 May 2022 02:58 AM PDT COTABATO CITY -- Gituohang selos sa posisyon ang motibo nga gilantaw sa mga awtoridad sa pagpamusil sa school principal alas 3:40 sa hapon, Lunes, Mayo 30, sa Pandag, Maguindanao Province.Giila ang biktima nga si Baimon Ambalgan, 58, principal-in-charge sa Campo Elementary School sa Paglat District Maguindanao 1 Division ug nagpuyo sa Tacurong City.Gibutyag ni Maguindanao Provincial Police Office Director Colonel Christopher Panapan nga sakay ang biktima sa iyang gimaneho nga sakyanan gikan sa eskuwelahan ug pauli na unta sa iyang pinuy-anan.Apan pag-abot sa maestra sa Pandag, kalit lang gitaparan sa riding in tandem suspects ug gipusil gamit ang kalibre .45 nga pistola.Nabangga ang gisakyan nga sakyanan sa biktima sa road railing ug nagkadugo samtang mga suspek daling misibat paingon sa direksiyon sa Tacurong City.Daling gisapupo si Ambalgan sa mga nakasaksi nga molupyo sa Pandag ug gidala ngadto sa balay tambalanan sa dakbayan sa Tacurong.Padayon pa ang pagsubay sa kapulisan sa Pandag Municipal Police Station sa maong hitabo. |
| Posted: 30 May 2022 07:44 AM PDT ANG Task Force (TF) Davao nagpataas sa mga lakang sa seguridad sa mga border control points sulod ug gawas sa siyudad human sa duha ka bus-related blasts sa mga siyudad sa Tacurong ug Koronadal.Tungod niini, girekomenda usab sa TF Davao ang temporaryo nga pagsuspenso sa pagkarga sa mga pasahero sa mga natudlong bus loading/unloading zones sa siyudad.Dugang pa nga giawhag sa TF Davao ang mga pasahero nga sa Davao City Overland Transport Terminal (DCOTT) lamang mosakay.Sa usa ka interbyu atol sa Madayaw Davao, si TF Davao Commander Colonel Darren Comia miingon nga ang maong lakang sa mga kontrol sa utlanan ug pag-inspeksiyon usa ka seguridad sa mga pasahero, butang nga gipaneguro alang sa pagpatunhay sa kahapsay ug kalinaw."Nag-recommend na tayo na 'wag na munang magpasakay doon sa mag designated bus loading and unloading zones dito sa downtown Davao City. Dahil ito sa nangyari last week doon sa Tacurong and Koronadal ng South Cotabato," ingon ni Comia.Dugang pa, "Ginagawa lang naman natin ito nang sa ganun lahat ng mga pasaherong sasakay palabas ng Davao City kinahangaln gyod ma-check, ug kinahanglan gyud didto sila mosakay sa DCOTT sa may Ecoland. Because, didto ma-check gyud tanan pasareho labi na ilahang mga butang para safety tayo."Ang TF Davao nipasalig sa mga Dabawenyo nga temporaryo lang kini. (Uban sa taho sa CIO) |
| Posted: 30 May 2022 07:44 AM PDT DAGHANG samad ang nahiagoman sa usa ka hubog human gitigbas sa iyang silingan nga katagay ra sab niini niadtong Sabado, Mayo 28, 2022, didto sa Purok 17, Lower Barangay Tibolo, Sta. Cruz, Davao del Sur.Ang biktima nailhang si alyas Joey, 29-, samtang ang suspek usa ka 32-anyos nga usa ka alyas Marlon, pulos nagpuyo sa dapit.Una niini, hapon niadtong Sabado, perteng tagay sa biktima ug suspek, apan dihang nangahubog na, nagkainitay na kini sa ilang mga pulong, hinungdan sa kasamok.Giingon nga miuli ang suspek kinsa pagbalik niini, nagdala na kini'g sundang ug gilayong gitigbas ang biktima tumong sa kalawasan.Human sa hitabo, daling misibat ang suspek apan nasikop kini sa usa sa mga kagawad sa nasampit nga barangay.Sa pagkakaron, anaa na sa luwas nga kahimtang ang biktima samtang gikasohan na ang suspek didto sa korte. |
| 3 magsuon nanumod og shabu nasignit Posted: 30 May 2022 07:42 AM PDT NAPUHAG sa hiniusang puwersa sa Davao del Norte Provincial Office sa Philippine Drug Enforcement Agency (PDEA) Davao Region ug Sto. Tomas Municipal Police Station ang giingon drug den sa Santo Tomas, Davao del Norte.Usa ka 31-anyos nga si alyas Bibi ang subject person sa awtoridad kinsa Municipal Target Listed Drug Personality Number 10 ang nadakpan.Atol sa ronda alas 11:40 sa gabii niadtong Dominggo, Mayo 29, didto sa Purok 1, Barangay New Katipunan, Sto. Tomas, Davao del Norte, naaktuhan sab ang duha niya ka igsuon nga nag-pot session.Ang duha ka igsuon sa suspek pulos niini maguwang diin nakuha sa ilang posisyon ang mga pakite nga dunay residue sa gituohang shabu atol sa ilang paghithit.Usa sab ka gramo sa gituohang shabu ang nakuha sa posisyon sa target person nga dunay street value nga P9,000 mga assorted drug paraphernalia, buy-bust marked money ug boodle money.Sumala sa PDEA-Davao nga dili gayod sila mohunong sa ilang pagpahugot sa operasyon hangtud nga dili mamahimong drug free ang mga lugar sa Davao Region. |
| Pork products gidid-an nang dalhon sa Mount Apo Posted: 30 May 2022 07:42 AM PDT HUGOT nga gidili sa lokal nga panggamhanan sa Kidapawan ang pagdala og mga produkto sa baboy sa mga mokatkat sa Mount Apo.Tumong niini aron nga malikayan ang posibleng pagkuyanap sa African Swine Fever (ASF) sa taas sa bulkan kon diin dunay bag-ong nadeparahan nga baboy ihalas (warty pig) nga vulnerable species nga hapit na mapuo.Mga baboy ihalas puwedeng mokaon sa mga produkto sa baboy nga kontaminado sa ASF ug moresulta sa pagpasa sa ubang susama nga mga mananap nga giisip nga endemic sa maong lugar.Kini mismo ang gipahibawo ni City Tourism Supervising Officer Gillian Lonzaga, diin ang iyang buhatan ug ang Office of City Veterinarian magtinabangay aron nga mapatuman ang sumbanan pinaagi sa hugot nga pagbantay sa mga mosaka sa Mount Apo diha pa lang daan sa Kidapawan trail.Kompiskahon sa City Government ang mga produkto ug bayran ang katugbang nga silot sa bisan kinsa nga makalapas sa regulasyon nga nagdili sa pagdala sa mga karne nga gikan sa baboy.Matud usab ni Lonzaga nga gawas sa ilang dapit, ipatuman sab kini sa mga lungsod nga dunay mga trail paingon sa bulkan.Kahinumdoman nga nadiskobrehan sa Department of Environment and Natural Resources (DENR) Region 11 nga dunay presensiya sa Philippine warty pig nga dunay scientific name nga Sus philippinensis nga endemic sa lugar atol sa Mount Apo Summer Climb. Taliwala sa lagmit nga pagkapuo sa matang sa baboy, positibo ang DENR nga ang presensiya sa warty pig sa Pilipinas pamatuod lang nga mibalik ang kanhi kalagsik sa kinaiyahan sa Bukid Apo. |
| Roldan: Bataan Nuclear Plant paandaron Posted: 30 May 2022 07:40 AM PDT USA na lang ka bulan ug molingkod na isip ika-17 nga presidente si Ferdinand R. Marcos, Jr., o mas naila sa dagnay nga Bongbong Marcos (BBM). Gitawag siya nga "Tigre sa Luzon" samtang "Agila sa Mindanao" sab si Mayor Sara Duterte nga iyang bise-presidente. Dili mabangbang ang ilang nakuha nga boto niadtong Mayo 9 nga eleksiyon.Bisan kung nagpadayon ang protesta sa pikas kampo, giproklama sila sa National Board of Canvassers didto sa hawanan sa Kongreso niadtong Mayo 25, 2022. Aana sa kiliran ni BBM ang iyang inahan nga si kanhi First Lady Imelda R. Marcos, mga igsuong si Senador Maria Imelda Josefa "Imee" Marcos ug Irene Marcos-Araneta, iyang asawa nga si Atty. Louise "Liza" Araneta-Marcos, ug anak nga si Joseph Simon Marcos.Aduna nay mga pangalan nga nigawas sa iyang gabinete. Siyempre anaa si Atty. Victor Rodriguez nga iyang "campaign spokesperson" isip Executive Secretary o gitawag nga "little president". Nigawas sab ang pangalan ni Arsenio Balicasa isip secretary sa National Economic and Development Authority, si Rep. Jesus Crispin Remulla isip secretary sa Department of Justice, Metro Manila Development Authority chairman ug kanhi Mandaluyong Mayor Benhur Abalos sa Department of Interior and Local Government. Posibleng mobalik usab sa iyang kanhi puwesto sa Department of Labor and Employment si Bienvenido Laguesma ug si "Migrant Workers Advocate" Susan Ople sa bag-o pa lang natukod nga Department of Migrant Workers.Nibalik sab pagka-secretary sa Department of Finance Secretary si Benjamin Diokno nga mopuli kang Secretary Carlos Dominguez III ug si University of the Philippines Prof. Clarita Carlos isip secretary sa Department of Foreign Affairs. Gidawat na pud ni Vice President-elect Sara Duterte ang hanyag ni BBM nga mahimong secretary sa Department of Education. Sa mosunod nga semana mogawas pa ang daghang pangalan sa mga puwesto sa hataas nga ang-ang sa gobyerno.Dili sayon ang papel sa presidente kay gawas nga himbisan niya ang mga tawo nga iyang pagapilion sa gabinete, atubangon sab niya ang naglinya nga mga bisita gikan sa lainlaing nasud. Sa niaging semana iyang gikahinabi si South Korean Ambassador Kim Inchul nga nihanyag nga motabang sa pagbuhi sa naoktaba nga Bataan Nuclear Plant. Sa niaging semana, gipahayag ni Presidente Rody nga buot niyang iapil ang "nuke power" isip lakip sa planong pang-enerhiya sa nasud. Para kanako panahon na nga langtawon nato ang mga modernong teknolohiya sa pagtubag sa atong pangihananglan sa enerhiya ilabi na sa atong gihandom nga mahimong "industrializing nation" sa kalibutan.Nibisita usab kang BBM sila si Japan Ambassador Koshikasa Kazuhiko, Ambassador sa India nga si Shambu Kumaran ug US Charge d' Affaires Heater Variava. Busa bisan wala pa siya nakalingkod, atoa nang makita nga hinay-hinay apan kanunay na ang pagdawat sa mga langyaw'ng nasud sa resulta sa eleksiyon niadtong Mayo 9. Bisan ang kampo ni Vice President Leni Robredo nga nidagan batok kang BBM kay nidawat na sa ilang kaparutan. Busa good luck na lang ninyo mga Sirs ug Ma'ams. Naa sa inyong mga kamot ang atong kaugmaon! |
| You are subscribed to email updates from SUNSTAR. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment