https://www.sunstar.com.ph/ |
- Barangay kapitan na budol; P130K, alahas, cards nahanaw
- LGBT Cebu misaulog sa Pride Month
- Shimura gituboy ni Mayor Frasco isip pangulo sa LMP-Cebu chapter
- Año mitawag ni Garcia
- Sugilanon: Puyo sa balay
- Na-rescue nga libud-suroy, street dwellers sa dakbayan sa Sugbo papaulion sa ilang dapit
- Rehistrasyon sa SK, barangay elections magsugod sa Hulyo 4
- Tambagi ko Noy Kulas: Sige gihapon sa mga ex
- Binghay: Pulong nga makapasamad sa pagbati ni Adan
- Editoryal: Mapahimuslanon
- Teknolohiya sa pagkaplag og tubig gituki sa water summit
- Pacquiao midasig ni Sotto
- Hero’s welcome naghuwat ni Sotto
- TNT mipukan sa Painters pinaagi sa OT
- Super Busog: Beef Caldereta
- Pagtukod og balik sa nalusnong bodega sa Mandaue gisuspenso
- 22-anyos nasikop sa ronda sa drugas
- PSA 7 padayong nag-imbestigar sa pagkawala sa mga gadget
- Gipatay tungod sa bulilyaso sa drugas
- P3K nga ayuda sa nasunogan sa Barangay Tisa, Punta Prinsesa
- 300 health personnel sa Mandaue makadawat og Covid-19 allowance
- 18 anyos nga lalaki nagmotor, gipaak sa unggoy sa Argao
- Gipatay sa gas station
- Mga batang libud-suroy sa Cebu City, gipang-rescue sa kapulisan
- Editoryal: Suportahi ang drivers, operators
- Rabacal: Adlaw sa pagsudya
- Talk to Papa Joe: Bawiay
- 61 ka mga bata nalipay sa ‘HUG’ sa Carcar PNP
- 20 ka barangay sa Daanbantayan gihatagan og TV set
- Gas pumps sa 3 ka gas stations sa Cebu City nasakpan wa ma-calibrate
- Mayor mimando pagsusi sa hinungdan sa kaso sa tipos sa Barili, info drive gihingosgan
- 39 ka HEI sa CV gitugotan sa F2F classes
- May igong supply sa baboy, manok apan di kini makapakunhod sa presyo
- JO employee sa dakbayan sa Tagbilaran, sikop sa ronda sa druga
- ‘Vegetable basket’ sa Sugbo milambo
- Kawani nakita nga patay na sa waiting shed
- Sugilanon: Ang gasa nga kamatuoran
- Cone gikuha sa Heat isip assistant coach
- Donaire naa pa'y ikabuga
- Beermen, Gin Kings maghinubganay
- Kobe padayong moduwa sa Japan
- Gilungkab ang balay ni Carter
- Kai misalmot sa Pacers training
- Super Suroy: Alto Peak nagbuntaog sa E. Visayas
- Unggoy nakabuhi sa park, nasikop
| Barangay kapitan na budol; P130K, alahas, cards nahanaw Posted: 24 Jun 2022 04:54 PM PDT Usa ka barangay kapitan nangayog abag sa kapulisan human siya nabiktima sa lima ka mga tawo nga sakop sa Budolbudol gang sa alas 10 sa Biyernes sa buntag, Hunyo 24, 2022 sa Brgy. Poblacion, Barili.Ang biktima giilang si Myrna Cebuco Binondo, 48, minyo, negusyante, kapitan sa Brgy. Mayana sa nahisgutang lungsod.Nawala gikan kaniya ang P130,000 cash, mga alahas, nagkadaiyang cards ug mga dokumento.Matod ni Binondo nga dunay lima ka mga kustomer nga nangabot kay mamalit sa iyang sari-sari store.Ang usa nangutana kon tagpila ang mangosteen ug duna say nangutana kon tagpila ang presyo sa saging.Dihang nakalakaw na ang mao nga mga tawo, diha na siya nakabantay nga nahanaw na ang iyang sling bag nga iyang gihigot sa haligi sa tindahan.Nagduda siya nga ang mao nga mga tawo nagkunsabo aron paglipat kaniya. (GPL) |
| LGBT Cebu misaulog sa Pride Month Posted: 24 Jun 2022 05:11 AM PDT Ang Lesbian, Gay, Bisexual, Transgender (LGBT) Federation nisaulog sa Pride Month pinaagi sa pagpahigayon sa mabulukong parada gikan sa Cebu Provincial Capitol subay sa Osmeña Blvd. padulong sa Plaza Independencia kagahapon sa hapon, Hunyo 24, 2022.Ang mga sakop sa LGBT sa tibuok kalibotan nagsaulog matag Hunyo sa paghinumdom sa 1969 Stonewall Uprising sa Manhattan nga sinugdanan sa Gay Liberation Movement sa Estados Unidos nga nikaylap sa tibuok kalibotan sa pagkigbisog bahin sa ilang tawhanong katungod, sumala sa Library of Congress website.Ang kataposang Dominggo sa Hunyo giisip nga "Gay Pride Day", apan magdepende kini sa matag dapit sa ilang pagpahigayon sa kasaulogan sama sa dakbayan sa Sugbo.Gawas sa ilang mga katungod, gituki usab ang pagpakabana bahin sa panglawas nga naghagit sa sektor sama sa HIV/AIDS. (RRM. Amper Campaña) |
| Shimura gituboy ni Mayor Frasco isip pangulo sa LMP-Cebu chapter Posted: 24 Jun 2022 05:10 AM PDT Giendurso ni incoming Tourism Secretary ug incumbent president sa League of Municipalities in the Philippines (LMP)-Cebu Chapter Liloan Mayor Christina Frasco si Daanbantayan Mayor Sun Shimura isip mosunod nga pangulo sa LMP Cebu.Si Frasco nga mao usab ang bise presidente sa LMP national mobiya na sa iyang pwesto subay sa pagkatudlo isip kalihim sa Department of Tourism (DOT) ubos sa administrasyon ni Pres-elect Ferdinand Marcos, Jr."Coming into this next term, I am fully confident that Mayor Sun Shimura will be able to not only continue what we have started but also lead the LMP forward to the same strides of relevance, innovation, effectiveness, and importance that we have been able to give the organization in this term," matod ni Frasco.Gusto ni Frasco nga mapadayon ang mga programa sa LMP Cebu ilabi na ang pakigtambayayong sa nasudnong kagamhanan ingon man sa lalawigan alang sa mas epektibo nga serbisyo ug suporta sa local autonomy sa mga lokal nga kagamhanan.Hinungdan nga napili niini si reelected Daanbantayan Mayor Shimura nga mao usab ang incumbent treasurer sa LMP Cebu.Si Shimura nagkanayon nga inisyal nang nipadayag si Cebu Governor Gwendolyn Garcia sa tinguha niining mangulo ang mayor sa LMP Cebu ug nipadayag siya nga abli sa maong tanyag. |
| Posted: 24 Jun 2022 04:54 AM PDT Nihumok ang posisyon sa gumawasay nga kalihim sa Department of the Interior and Local Government (DILG) nga si Eduardo Año nga nagpugong sa iyang lakang batok sa face mask protocol sa Sugbo.Matod ni Año, nagkasulti na sila ni Cebu Governor Gwendolyn Garcia sa telepono niadtong Huwebes, Hunyo 23, 2022."Maganda naman sa pagkat nag-seek kami ng compromise or common solution for this issue at maganda kasi very much cooperative ang bawat isa, kaya nagpapasalamat din tayo sa Provincial Government and Governor Gwen and we took note on the ordinance by the provincial council," matod ni Año sa pakighinabi sa reporters sa kaulohan."Doon sa Section 4, meron nakalagay doon na magka-craft sila ng IRR bago i-implement 'yung ordinance. So ngayon ay kasalukuyan nagka craft sila ng IRR doon to rationalize the wearing of face mask at aantayin natin 'yung resulta ng IRR bago tayo magbibigay ng panibagong guidance," dugang ni Año.Ang Cebu Provincial Board nipasar sa ordinansa sa pagsul-ob og face masks sa open ug well-ventilated areas sa lalawigan nga optional.Kini gibase sa executive order ni Garcia nga naglibkas sa mandatory face mask rule, diin giisip sa kalihim sa DILG nga nasukwahi sa minimum health protocols nga gilatid sa Inter-Agency Task Force taliwala sa coronavirus disease (Covid-19) pandemic.Sa miaging semana, si Año nihatag sa Cebu Provincial Board og tulo ka adlaw nga ultimatum sa pag-usab sa ilang face mask protocol kay kon di, mag-atubang og legal nga lakang apan wala kini nakapatarog kang Garcia ug sa Hunta sa Lalawigan.AWHAG NI BORGONIANanghinaot si Atty. John Ismael "Jimbo" Borgonia, sakop sa Hunta, nga mosunod na ang mga ahensya nga nagpailawom sa DILG nga respetuhon ang baruganan sa lalawigan bahin sa face mask."Nanawag si Secretary Ano ni Governor Gwen nga nakig-peace unya okay na sila, Civil na sila. No hard feelings ug ni-give-in na siya sa atong ordinance. Naa ko pagpanawag ni Secretary kang Governor. So wala na to ang show cause order," matod ni Borgonia sa Hunyo 24, 2022.Alang kang Borgonia, giisip sa mga bokal nga maoy nipasar sa ordinansa, nga gusto usab og kalinaw si Año ilabi na sa pagpatuman sa lagda."Gi-take namo nga nakig peace si Secretary Año nato, sa mga officials sa Cebu Provincial Government, labi na ni Governor Gwen gyud kay sila man gyud to ang nagka exchange og statement regarding sa pag-use og face mask sa well-ventilated places,"dugang niya.Ang DILG maoy nangulo sa mga buhatan sama sa National Police Commission (Napolcom), Bureau of Fire Protection (BFP), Bureau of Jail Management and Penology (BJMP) ingon man sa mga lokal nga kagamhanan.Matod ni Borgonia, kasamtangang gi-draft na ang Implementing Rules and Regulation (IRR) sa ordinansa subay sa nahiusahan sa DILG ug sa Probinsya sa Sugbo.Apan dili kini magpasabot nga mahimong makadakop ang kapulisan sa mga tawo sa probinsya nga optional ang face mask sa mga hawan ug well-ventilated areas.(ANV, SunStar Philippines) |
| Posted: 24 Jun 2022 04:48 AM PDT OLIVER PEPITO FLORESSogod, Cebu Nalantaw ni Simeon si Kumpare niya Selmo nga biyudo ug naglakaw-lakaw sa lugsungong lugar. Kining balay ni Simeon nahimutang sa bungtod nga dapit ug malantaw niya ang bahin sa ubos. Presko ang hangin sa ilang lugar kay medyo nalayo man kini sa pundok sa mga balay. Daghan sang mga dagkong kahoy sa palibot nga naghatag og kabugnaw sa dapit. Nalayo kini sa lungsod.Samtang naglantaw si Simeon sa iyang kumpare nga usahay mag-shadow fight, naibog kaayo siya. Nagtungtong na sila sa edad nga saysenta, pulos na sila senyor sitisen. Ug kay hubakon man si Simeon maong kanunay lang siyang nagpuyo sa sulod sa ilang balay. Nahadlok siyang makapyotan sa Delta variant nga isog ug bangis. Ubay-ubay na sa ilang lugar ang naospital ug namatay tungod aning maong kagaw."Ikaw, Simeon, kon gusto pa kang motaas ang imong kinabuhi, dinhi ka lang sa atong balay. Ayaw paggawas. Wa ra ba kay bakuna kay hadlok ka sa dagom." Pahimangno ni Carmen, asawa ni Simeon. Bisan nagpanuigon nag singkwenta si Carmen apan nindot pa gihapon kinig lawas. Bus-ok pa gihapog mga suso. Aw, ingon gyud ani ang mahitabo kay wa man silay anak si Simeon sulod sa bayinte ka tuig kapin sa ilang kaminyuon. Manghod ni Simeon si Carmen og napulo ka tuig."Unya ang atong talyer?"Dunay talyer sila si Simeon nga nahimutang dapiln sa karsada nga medyo layo sa ilang balay.Kusog ang kita ani kay wa may laing talyer sa ilang dapit. Ug si Simeon ang nagdumalaani kaniadtong wa pa manghasi ang Covid-19 ug kining bag-ong Delita variant. Apan tungod sa maong mga hulga sa kinabuhi nga dala ani, kanunay na lang nagpuyo sa balay si Simeon. Gawas nga hubakon siya, duna pa gyud siyay deperensiya sa iyang kasingkasing.Delikado sa Covid ug Delta variant ang iyang kinabuhi kon di siya mag-amping."Aw, ako na bitaw nagdumala ani sa pagka karon. Ayaw sab kabalaka kay naa si Pare Selmo nga maoy atong sinaligang mikaniko."Miyangu-yango si Simeon. Nalipay siya sa gisulti sa iyang asawa.Ikid kaayo ang sampot ni Carmen nga mibiya kang Simeon. Igo na lang nga nakapanakla si Simeon kay sukad nga gisugmatan siya sa hubak ug panagsang paglisod sa pagginhawa tungod sa sakit niya sa iyang kasingkasing ug hubak, wa na gyud siya makahatag og kalipay kang Carmen panahon sa kagabhion. Kanunay ra bang magpahumot ang iyang asawa."Patuga-tuga ka man, Simeon!"Nagyawyaw ang iyang asawa usa ka gabii ana nga giromansa niya kini apan naputol ug wa siya katiwas kay mihuot ang iyang duhan ug naglisod siya sa pagginhawa.Nakapanghupaw na lang si Simeon.Unya, usa ka buntag ana, mao na lay namat-an ni Simeon nga wa na ang iyang asawa sa sulod sa ilang balay. Nagbilin kinig suwat kaniya."...Si Pare Selmo kanunay naghatag og kalipay nako. Wa siya magpasagad nako labi na panahon sa kagabhion. Pasayloa ko, Simeon. Miuban ko niya. Nanglakaw mi ug di mo na kami makita pa..."Wa tiwasa pagbasa ni Simeon ang suwat. Mihilak siya. Mao diay nga di siya pagawason ni Carmen sa ilang balay kay nagbuhat diay og milagro ang iyang asawa ug si Kumpare niya Selmo, nakaingon sa hilom si Simeon. Ug mingaab siyag kusog kaayo.(KATAPUSAN) |
| Na-rescue nga libud-suroy, street dwellers sa dakbayan sa Sugbo papaulion sa ilang dapit Posted: 24 Jun 2022 04:20 AM PDT Ang rescue operations batok sa mga batang libud-suroy ug nagpuyo sa aseras o street dwellers lakip sa nagpakilimos sa karsada nagpadayon.Atol sa operasyon sa Huwebes, Hunyo 23, 2022, moabot na sa 50 ka tawo ang nakuha sa kapulisan ug sa Kagamhanan sa Siyudad sa Sugbo nga gitakdang papaulion na sa ilang tagsa-tagsa ka mga lungsod o probinsya.Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), lakip sa na rescue ang usa ka pamilya nga taga dakbayan sa Marawi nga nibakwit dinhi sa siyudad atol sa nahitabong gubat sa ilang lugar apan nagkalisud sa ilang pamuyo nga maoy hinungdan nga midangop na lang sa pagpakilimos daplin sa karsada.Tungod niini, ang Kagamhanan sa Siyudad ug kapulisan mangitag paagi nga mapasakay og barko paingon sa Mindanao ang maong pamilya aron makauli sila sa ilang lugar ug didto magsugod sa ilang kinabuhi."Mao ni sila kadtong ming bakwit dinhi pag gubat didto sa Marawi miuban ni sila adtong daghan ang miari sa Cebu, medyo wala matarong ang ilang pagpuyo dinhi misangpot nga naa na sila sa kadalanan," matod ni Parilla.Sa kasamtangan, una nga gipahimutang ang maong mga bata ug street dwellers sa Noah Complex sa South Road Properties (SRP) diin giatiman sila sa City Social Welfare and Services (CSWS) sa dili pa sila papaulion sa ilang tagsa-tagsa ka dapit sa probinsya sa Sugbo, ubang bahin sa Visayas ug Mindanao.Giangkon ni Parilla nga problema nila karon kining mga bata nga taga siyudad nga bisan iuli sila sa ilang balay mobalik ra usab kini sa mosunod nga mga adlaw.Kadaghanan sa mga na rescue, sigun ni Parilla, mao kini ang unang nakabenepisyo sa Balik Probinsya program sa Kagamhanan sa Dakbayan atol gyud sa pag sulbong sa Covid-19 duha ka tuig na ang nakalabay.Apan giingong mibalik sa ilang naandan nga pwesto sanglit naa na dinhi ang ilang panginabuhi sama sa pagpakilimos ug dili usab sila magutman sanglit adunay institusyon nga mohatag og pagkaon kanila. |
| Rehistrasyon sa SK, barangay elections magsugod sa Hulyo 4 Posted: 24 Jun 2022 04:19 AM PDT Ang Commission on Elections (Comelec) sa dakbayan sa Sugbo nikompirmar nga ang voters registration alang sa Barangay and Sangguniang Kabataan elections (BSKE) magsugod sa Hulyo 4 ug motapos sa Hulyo 23, 2022.Si Marilou Paredes, acting election officer sa Cebu City south district, nibutyag sa SunStar Cebu kagahapon, Hunyo 24, nga nangandam na sila sa registration forms ug nagplano og satellite registrations sa BSKE nga gikatakda sa Disyembre 5, 2022.Base sa Comelec Resolution No. 10798, usa ka Filipino citizen nga mag-edad og 18 anyos sa dili pa o adlaw mismo sa Disyembre 5, 2022, makahimo na sa pagparehistro alang sa BSKE.Dugang sa rekisitos, ang magparehistro, sumala sa Comelec, kinahanglang "resident of the Philippines for at least one year and in the place wherein he/she proposes to vote, for at least six months immediately preceding the December 5, 2022 barangay elections."Samtang, ang resolusyon nagtumbok nga kinahanglang usa ka Filipino citizen nga 15 anyos apan dili molabaw sa 30 anyos ug nagpuyo sa barangay sa dili mominos unom ka buwan atol sa adlaw o dili pa ang Disyembre 5, 2022, ang makaparehistro isip SK voter.Samtang, naglaom ang Comelec Cebu province nga mas daghang mga Sugboanon ang moparehistro karon nga nanghinangat na ang pagbukas sa voters registration sa BSKE.Si Atty. Jerome Brillantes, acting election supervisor sa Comelec Province, niasoy sa Superbalita Cebu nga limitado ang panahon sa pagparehistro tungod sa himuon pa nga pagpangandam sa buhatan alang sa piniliay sa BSKE."Daghan pa man gud og preperation sa incoming election mao na'y one thing ana magsugod ba ron sa August possible (magsugod sa preperasyon) mag composition na pod sa mga EB's(Electoral Board)," matod ni Brillantes sa Superbalita Cebu sa Hunyo 24.Gibutyag ni Brillantes nga duna hinuoy offsite registration nga himuon sa unang semana sa registration, apan magdepende usab kini sa desisyon sa Comelec office sa lokalidad.Gawas sa registration, mahimo usab nga moproseso sa pag transfer sa registration sa laing barangay.Base sa datos sa Comelec sa Nobiyembre 2021, adunay 1,203 ka mga barangays sa tibuok Probinsya lakip na niini ang dakbayan sa Sugbo, Mandaue ug Lapu-Lapu.Sa maong talaan, moabot usab sa 3, 288, 778 ang nakaprehistro na.Bisan pa sa maong datos, naglaom si Brillantes nga magkugi ang mga Sugboanon sa pagparehistro aron makabotar kini sa barangay level."Hopefully nga ang kabalo na ka ang mañana habit pero daghan unta ang magparehistro," matod ni Brillantes. (IRT, ANV) |
| Tambagi ko Noy Kulas: Sige gihapon sa mga ex Posted: 24 Jun 2022 04:00 AM PDT Dear Noy Kulas,Itago lang ko sa ngalan nga Macy, 29 anyos. Ang akong problema mao ang akong boyfriend nga sige gihapon og contact sa iyang mga ex bisan nagplano na ming magpakasal before the end of the year.Wa ko nakahibawo but usa sa iyang mga ex, friend sa akong friend. Didto ko nakahibawo, so, ako siyang gi-confront. Nasuko na hinuon siya kay ngano kunong akong hatagan og dautan nga meaning ang iyang pag continue sa contact sa iyang mga ex. Kana kay ex na gani, wa na gyud na, di ba, Noy Kulas?Ako na siyang gisultihan nga undangon na niya ang ilang mga communication ug dating kay naa na man ko. Ako siyang giingnan nga kon di siya moundang, magbuwag na lang mi. Until now, mga two weeks na siyang wa mo-communicate nako. Di ba diay valid ang akong reklamo? Nganong masuko man siya? Salamat sa imong pagtagad ug advice.MACYMacy,Okay lang unta kon transparent siya nimo apan iya ning gitago gikan nimo. Moingon siya nga basin magselos ka? Natural, magselos gyud ka. Kon siya sab diay ang buhatan sa ingon, di diay siya magselos nimo? Magselos ug masuko. Wa may problema kon sila sa iyang ex remain friends ug ikaw gipaila-ila niya or sa ilaha. But wa man. Samot nang sige sige sila og date. Pastilan, kon ang mga musikero magkita, magtukar ra ba gyud na. Duna bayay cases dinhi nga ing ana ang dagan sa ilang estorya.Kon wa na siya ni contact nimo, let it be. Pasagdahi kay ang lalaking tinuod nga nahigugma kahibawo morespeto sa babaye, di kay magpasulabi kon unsa ang iyang gusto.Magpasalamat ka nga wa pa mo nakasal, imong nahibaw-an ang iyang kalaki. Di baya na maayo ang iyang gibuhat kay bisan unsaon pa nag term, panglimbong man nang iyang gihimo sa imoha. As I've said pasagdahi. Sakit man tuod, apan mas maayong sa sayo pa imo nang nahibaw-an ang iyang kalaki.NOY KULASrojval69@yahoo.com |
| Binghay: Pulong nga makapasamad sa pagbati ni Adan Posted: 24 Jun 2022 03:59 AM PDT Matag karon ug unya, makapangutana ta kon nganong naa pa may nagbuwag nga dugay naman unta nag-ipon, o dagko na ang mga bata o haruhay na ang pagkabutang.Daghang rason ang nakaingon sa bikil, usa ini ang miscommunication.Sa akong nabasa nga artikulo gikan sa Femina, kining mga mosunod nga mahait nga mga pulong ang angay likayan sa paglitok aron di makasamad sa pagbati ni Adan (bana o uyab).Una, pagkomparar sa imong kanhing X niya. Dako kining 'no-no' kay kada usa nato lahi-lahi man o unique. Kon imo kining buhaton di na kini siya ma komportabli kay napriso pa man ka sa imong kagahapon. Boy-i nato ang sa una unya move on na para maka-focus ka sa imong bag-ong ka relasyon.'Mas macho o hot ang iyang amigo kaysa niya'. Sa iyang huna-huna gud nag-inusara siya sa imong kasingkasing ug huna-huna. Ang pagtandi sa pisikal o pamustura maka pa-insecure sa pares labi na kon maghisgot og pamarog, gitas-on o buhok.'Mabuang ko sa imong ginikanan'. Ang relasyon sa mga ginikanan ngadto sa ilang mga anak kasagaran komplikado apan bisan pa man og di maayo ilang relasyon, ayaw pagdapig ni bisan asa nila. Pabiling neutral sa imong huna-huna ug pulong. Unya kon maayo sab ilang relasyon, paninguhaa hinuon nga imo kining mapalambo og samot.'Tambok o dako ka og tiyan!' Ikaw mismo di ganahan nga ang imong pares mas mabdos pa tan-awon nimo maong sakitan ni sila kon mangunay ka og panaway. Sayod si Adan nga midako o mitambok na siya maong kon ang pagpanaway nagagikan ni Eba mas masakitan kini. Pangita hinuon og laing paagi nga makapadasig niya pagpagamay sama sa pagdungan og ehersisyo, jogging o luto-i og mga preskong pagkaon nga mas masustansiya .'Magpaka-lalaki ka kay wa kay klarong baruganan unya huyang magdesisyon'. Kon imo kining ihungit nga mga pulong sa iyang baba, mopalayo na hinuon imong bana o uyab kay maka-paluya man kini sa pagbati labi na kay ang iyang Eba mismo way pagsalig ug suporta niya. |
| Posted: 24 Jun 2022 03:58 AM PDT Matawag nato nga mapahimuslanon ang tulo ka mga gasoline station sa dakbayan sa Sugbo nga nasakpan sa awtoridad nga wala ma-calibrate ang ilang gas pumps taliwala sa kamahal karon sa presyo sa lana. Nagpasabot kini nga posibling dili insakto ang takos sa matag litro sa pagpatubil sa naasoy nga mga gasolinahan.Si Cebu City Mayor Michael Rama nimando sa Cebu City Police Office (CCPO) ug sa Prevention, Restoration, Order, Beautification and Enhancement (Probe) team ug City Environmental Sanitation and Enforcement (Ceset) ubos sa pagpangulo ni Raquel Arce sa paghimo og kalit nga pagsusi sa mga gasolinahan sa siyudad.Ang mando ni Rama nunot sa halos pagtungtong na sa P100 matag litro alang sa diesel nga naandan nga mas barato kon itandi sa gasolina human sa sunodsunod nga umento sa presyo matag semana. Ang mga kompaniya sa lana ningtumbok nga epekto kini sa kagubot tali sa Ukraine ug Russia sa silangang Uropa.Samtang si Police Lieutenant Colonel Wilbert Parilla, deputy city director for administration sa Cebu City Police Office (CCPO), nibutyag nga wala pahamtangi og silot o multa ang tagdumala sa maong mga gas station ug gihatagan una og warning uban sa pagmando nga motuman sa saktong lagda sa negosyo.Ingon lang ini kasayon? Pila na kaha ka mga drayber ug motorista ang nabiktima sa ilang pagpatubil? Makapaduda, sakto ba kaha nga kapulisan ug Probe team ang ninghimo og kinalit nga inspeksiyon sa gas station? Hain ang Energy Regulatory Board (ERB) ug Department of Energy (DOE)?Dalaygon ang pagpakabana ni Rama human dili kasandigan sa katawhan ang DOE batok adunahang multi-national corporations. Apan mas maayong nakauban ang insaktong ahensya kagamhanan aron lig-ong ang pagpatuman sa balaud ug mapahamtang ang katugbang nga silot sa nagpahimulos sa higayon. Dakong krimen ang ilang gihimo. Takos sa ngipon sa balaud. Gisamotan nila ang nag-ilaid na sa kalisod nga Sugbuanon. |
| Teknolohiya sa pagkaplag og tubig gituki sa water summit Posted: 24 Jun 2022 03:56 AM PDT Ang Department of Science and Technology (DOST) 7 nilusad sa ilang ikaduhang hugna sa Water and Science &Technology Tools and Technologies aron makadiskobre og bag-ong tinubdan sa tubig gamit ang bag-ong teknolohiya.Ang summit gipahigayon sa Golden Prince Hotel, Cebu City niadtong Huwebes, Hunyo 23, 2022.Ang OIC-Assistant Regional Director (ARD) for Technical Operation sa DOST -7 nga si Brian Ybañez nagkanayon nga gituyo ang pagpahigayon og Water Summit aron mapaabot ang mga solusiyon sa pagsulbad sa problema sa tubig dinhi sa Kabisay-an."Usa ni ka importante nga event knowing Cebu nga usa sa atong hagit is the water availability and water quality ug gihisgotan dinhi ang mga nagkadaiyang technologies nga motabang pagsulbad sa atong problema," matod ni Ybañez.Ang OIC-ARD sa DOST 7 nagkanayon nga daan nang nagkuwang og tubig ang Cebu ug gipun-an pa kini sa paglambo sa ekonomiya ug pagsaka sa gidaghanon sa mga tawo hinungdan nga niusbaw og maayo ang dugang panginahanglan sa tubig, labi na ang mainom."Diri sa Cebu, gawas nga kulang tag tubig karon nisaka ang commerciaization and industrialization unya daghan na kaayo ang mogamit. Dili ingon niana ka paspas ang availability sa sources tubig nisaka ang population," dugang ni Ybañez.Dinhi sa Metro Cebu nga maoy franchise area sa Metro Cebu Water District (MCWD), nagkinahangkan sila og kapin o kulang 400,000 cubic meters matag adlaw aron maserbisyohan ang tanang mga nanginahanglan apan ang nahatag nga tubig sa water district kapin o kulang 250,000 cubic meters matag adlaw ra hinungdan nga nakigtambayayong sila sa private water suppliers.Dugang ni Ybañez nga nahisgotan usab nila ang paggamit sa desalination plant, paggamit sa tubig uwan gamit ang mga water catchment nga maoy pipila sa mga pamaagi aron makadugang og tubig gamit ang mga new technology.Personal nga nitambong mao si DOST Secretary Fortunato Dela Peña, Assistant Secretary Roderick Plabta sa National Economic and Development Authority (NEDA) ug ang 13 ka mga eksperto sa tubig nga maoy namulong atubangan sa di mominos 100 ka partisipante gikan sa Central Visayas. / |
| Posted: 24 Jun 2022 03:55 AM PDT Nagpagawas og makapadasig nga mensahe si Filipino boxing legend Manny Pacquiao alang sa batan-ong Pinoy nga higante nga si Kai Sotto human kini wala napili sa 2022 National Basketball Association (NBA) 2022 Draft kagahapon, Hunyo 24, 2022 (RP time) sa Barclays Center sa Brooklyn, New York.Pinaagi sa iyang Twitter account, miawhag si Pacquiao kang Sotto nga ipadayon lang ang paningkamot hangtod nga matuman ang pangandoy niini nga mahimong labing unang lumad nga Pinoy nga makaduwa sa NBA.Gipasabot sa kanhi 8-division world champion nga nagsuporta sa 20 anyos ug 7'3" nga magduduwa ang tibuok Pilipinas hinungdan nga dili kini angay mawagtangan og paglaom."The dream is not over. Laban lang!! We support you!" tweet ni Pacquiao nga adunay pakapin nga hastags nga Philippine flag emojis ug #PinoyPride hashtag.Sa kaugalingon niyang tweet, si Sotto nipasalig nga dili siya mohunong sa paggukod sa iyang pangandoy."I won't stop pursuing the dream of being in the NBA.....this is not the end," tweet ni Sotto.Giklaro ni Sotto nga sukwahi sa tweet sa iyang agent, nagplano siyang makaduwa sa NBA Summer League sa sunod buwan sa Las Vegas sa pamasin nga adunay NBA team nga mobira kaniya isip undrafted player. |
| Hero’s welcome naghuwat ni Sotto Posted: 24 Jun 2022 03:54 AM PDT Naglaom si Samahang Basketbol ng Pilipinas (SBP) executive Ricky Vargas nga sugaton gihapon og hero's welcome si Kai Sotto sa iyang pagbalik sa nasod bisan wala kini napili sa 2022 National Basketball Association (NBA) Draft kagahapon, Hunyo 24, 2022 (RP time) sa Barclays Center sa Brooklyn, New York.Si Vargas, kinsa mao sab ang Philippine Basketball Association (PBA) chairman, usa lang sa minilyon nga mga Pinoy nga naghandom nga mahimo si Sotto nga labing unang lumad nga Pinoy nga makaduwa sa NBA.Nagkanayon si Vargas nga andam ang Gilas Pilipinas sa paghangop kang Sotto alang sa pagpangandam sa national team sa 2023 FIBA World Cup."Not only Gilas, but the whole nation awaits and welcomes Kai with open arms to play for the Philippine team," mensahe ni Vargas ngadto sa GMA News Online. "Dito muna siya hanggang World Cup 2023 and I assure he will be better and (it's) worth his while," dugang ni Vargas. |
| TNT mipukan sa Painters pinaagi sa OT Posted: 24 Jun 2022 03:54 AM PDT Mga duwa karon:5:15 pm- Blackwaterbatok Terrafirma7:15 pm- NLEXbatok MeralcoGisugat sa TNT Tropang Giga ang pagbalik sa ilang pambatong sophomore nga si Micky Williams pinaagi sa makutas nga overtime nga kadaugan batok sa Rain or Shine Elasto Painters, 89-85, niadtong Hunyo 23, 2022 sa gabii sa Philippine Basketball Association (PBA) Philippine Cup sa Ynares Center sa Antipolo City.Ang Tropang Giga, nga ningsaka sa 4-2 nga rekord, nagkinahanglang pang mobangon sa 16 puntos nga pagkalubong una nila nadispatsar sa hingpit ang Elasto Painters.Ang beteranong si Jayson Castro maoy niluwas sa Tropang Giga sa delikado nga sitwasyon sa regulation period unya gitiwas ni Poy Erram ang trabaho sa overtime.Gipangulohan ni Troy Rosario ang kadaugan pinaagi sa iyang 19 puntos, nidugang og 15 puntos si Williams, nihatag og 13 puntos si Erram samtang ning-amot og 12 puntos matag usa sila si Roger Pogoy ug Castro."The players never gave up. And as we're able to take shots, we gave ourselves a chance. We ground it out," asoy ni TNT coach Chot Reyes.Ang Elasto Painters, nga nahagbong sa 1-4 nga rekord, gipangulohan ni Mike Nieto pinaagi sa iyang 19 puntos, nitampo og 18 puntos si Gian Mamuyac, nihatag og 17 puntos si Leonard Santillan samtang nitunol og 16 puntos si Rey Nambatac (16).Sa laing duwa, gipangmakmak sa Meralco Bolts ang NorthPort Batang Pier, 97-87.Ang Bolts misaka sa 3-1 nga rekord samtang nahagsa sa 2-3 ang Batang Pier. |
| Posted: 24 Jun 2022 03:38 AM PDT Mga sagol:Set A:1 ka kutsara nga mantika1 ka buok sibuyas bombay, gihiwa2 ka lusok sa ahos, gipusa1/2 kg. sa unod sa baka1 ka tasa nga tubiggamay nga lata sa liver spreadSet B:1/4 tasa sa soy sauce1 pc. nga patatas, gihiwa1 ka tasa sa green peas1 pc. sa red bell pepper, gihiwa og pina-cubes2 ka tasa sa tomato sauce1 ka tasa sa tonu sa lubiUnsay buhaton:A. Inita ang mantika sa kaha. Gisala ang ahos ug sibuyas bombay. Ilunod ang baka, tubig ug liver spread. Pabukala, unya pahinayi ang kainit ngadto sa low ug pabukala hangtod mohumok ang baka.B. Iyabo ang soy sauce. Isagol ang patatas ug lutoa hangtod mohumok, unya idugang ang green peas ug bell pepper.C. Isagol ang tomato sauce ug tonu sa lubi. Pabukala og mga 10 minutos.Sunda ko sa akong social media accounts.Facebook: facebook.com/lutongsimpolYouTube: youtube.com/c/SimpolSimpolInstagram: @lutongsimpol |
| Pagtukod og balik sa nalusnong bodega sa Mandaue gisuspenso Posted: 24 Jun 2022 03:36 AM PDT Ang Office of the City Engineer sa dakbayan sa Mandaue niluwat og suspension order sa pagpadayon sa pagtukod sa nalusno nga bodega sa dalan V. Albaño sa Sitio Sugar Valley, Barangay Maguikay niadtong Miyerkules sa buntag, Hunyo 22, 2022.Si Engr. Crystal C. Comon, acting building official sa Mandaue, nibutyag nga ang pagsuspenso sa trabaho sa bodega nga epektibo dayon kagahapon, Hunyo 24, 2022.Gikomendar sa building official mao ang pagdemolis ug pagtukod og balik sa bahin nga naguba o tibuok building nga wala makapasar sa Philippine building standards alang sa kaluwasan.Ang demolisyon gimando nga himuon dayon sa pagdawat sa suspension notice human ang pipila ka bahin sa edispiyo naa sa dalan nga nakababag sa dagan sa trapiko.Si Comon nisalikway sa alegasyon nga substandard materials ang gigamit sa pagtukod sa bodega, hinungdan sa pagkalusno sa tulo ka bahin sa bongbong.Dunay permiso ang pagtukod sa warehouse-type building nga gihatag sa Hulyo 2021, dugang ni Comon.Apan gikompirmar niya nga base sa ilang imbestigasyon, ang pagbunok sa uwan ug faulty construction methodology mao ang pipila ka mga hinungdan sa pagkahugno sa bodega."It was a blessing in disguise that the collapse headed inwards. If it could have been outwards, bigger damages, even casualties might have happened," matod Comon.Apan si Comon wala mongalan sa engineers ug contractor sa bodega human wala pa kini ningtunga atol sa ilang inspeksiyon sa dapit.Ang tag-iya sa building nikontak na sa ilang buhatan ug nisaad sa paglimpiyo sa dapit. |
| 22-anyos nasikop sa ronda sa drugas Posted: 24 Jun 2022 03:36 AM PDT Usa ka 22-anyos nga lalaki nasikop sa buy-bust sa gidiling drugas sa mga sakop sa City Intelligence Unit (CIU) sa Cebu City Police Office (CCPO) sa Villalon Drive, Barangay Capitol Site, dakbayan sa Sugbo pasado alas 9:00 sa gabii sa Huwebes, Hunyo 23,2022.Si Police Lieutenant Colonel Wilbert Parilla, deputy director for administration sa CCPO, niila sa dinakpan nga si Vincent Sison Gabucan, alyas Sisoy, 22, taga Barangay Kalunasan.Si Gabucan nakuhaan og 50 gramos nga shabu nga gibana-bana nga mobalor og P340,000.Matod ni Parilla, si Gabucan gipanid-an sa kapulisan sud sa kapin sa usa ka semana.Nasayran nga si Gabucan makahurot og duha ka kilo, apan dili magpareha ang mga adlaw kon kanus-a mahurot ang iyang drugas sanglit ang tibuok Sugbo maoy iyang hagbunganan. Ang dinakpan kasamtangang napriso sa Cebu City Jail. |
| PSA 7 padayong nag-imbestigar sa pagkawala sa mga gadget Posted: 24 Jun 2022 03:34 AM PDT Ang Philippine Statistics Authority (PSA) 7 nagpadayon pa sa ilang imbestigasyon may labot sa pagkawala sa ilang mga gadget nga gigamit alang sa National ID sulod sa dakong mall sa dakbayan sa Sugbo niadtong Hunyo 20, 2022.Gipahibawo na usab nila ang PSA Central Office labot sa insidente ug gipahibalo ang ubang registration centers nga isiguro nga dili makawat ang ilang mga gadget nga gigamit.Kini ang gipadayag ni PSA Information Officer Claire Coronado human sa insidente nga naka-blotter sa police station ilawom sa pagdumala sa Cebu City Police Office.Base sa blotter, wala nasuwat kon unsa ang nawala apan kasaligang tinubdan niining pamantalaan nagkanayon nga usa ka laptop ang nawala gumikan sa lungkab.Si Coronado niingon nga dili angay mabalaka ang publiko sanglit protektado ang mga data sanglit ang ilang computer dunay system nga maoy mag-encrypt sa data ug dili kini maabli ni bisan kinsa ug ang laptop nga nawala gigamit ra alang sa national ID. |
| Gipatay tungod sa bulilyaso sa drugas Posted: 24 Jun 2022 03:33 AM PDT Ang kapulisan sa siyudad sa Sugbo dunay suspek sa nipusil-patay sa 30 anyos nga lalaki nga padung unta nga magpatubil sa usa ka gasolinahan sa dalan Tres de Abril, Barangay San Nicolas Proper sa Huwebes sa hapon, Hunyo 23, 2022.Bulilyaso sa illegal nga drugas ang usa sa gitan-aw nga motibo sa krimen.Si Gabriel Raffinan, 30, taga sitio Lower Obca, Barangay Quiot, siyudad sa Sugbo, namatay diha-diha human pusila.Matod ni Police Lieutenant Colonel Wilbert Parilla, deputy director for administration sa Cebu City Police Office (CCPO), nga kaila sila si Raffinan ug ang gunman sanglit nag-estorya pa sila sa wala pa mahitabo ang pagpamusil."Kining biktima ug suspect is managkaila, base didto sa conversation didto sa iyang cell phone nga na-recover. Gitawag ang biktima sa suspect kay mobayad og five thousand (P5,000), duna siyay bayranan base sa text mobayad siya.." matod ni Parilla.Ang gitumbok nga gunman gitug-an ni Parilla nga usa usab ka drug personality nga giingong hitman sa amo sa biktima nga iyang nautangan og dakong kantidad.Giingong adunay lima ka down line nga mga drug player si Raffinan nga pulos na nadakpan sa Mambaling police station sa nanglabay nga mga illegal drug operation.Iya matod pa nga itug-an sa amo niini nga hasta ang kwarta nakuha usab.Dinhi na nagsugod ang dili maayo nga relasiyon nila ni Rafffinan ug sa iyang amo nga naa sa sulod sa bilanggoan nga wala lang una nganli ni Parilla."Murag duna ni silay grudges sa iyang amo. Ang iyang amo still naa sa sulod sa jail nga accordingly everytime nga madakpan ang iyang mga downline, iyang itug-an nga nadakpan tanan hasta ang kwarta," dugang ni Parilla.Si Raffinan unang nadakpan sa Mambaling Police Station niadtong Enero 2017 sa kaso sa illegal nga drugas apan nabuhian tungod sa plea bargain.Nadakpan na sab siya pagka Hunyo 2017 tungod gihapon sa illegal nga drugas ug nakagawas gumikan sa plea bargain sa gobyerno.Gihulagway nila nga nidako pa ang iyang negosyo nga gawas sa iyang pagka drug dealer, aduna usab siyay mga tawo nga maoy mo-dispose sa iyang supply sa illegal nga drugas. |
| P3K nga ayuda sa nasunogan sa Barangay Tisa, Punta Prinsesa Posted: 24 Jun 2022 03:32 AM PDT Mikabat og P2.5 milyunes ang gipang-apud-apud nga ayuda ngadto sa 837 ka mga benepesyaryo sa mga nangasunogan sa Barangay Tisa ug Punta Princessa, dakbayan sa Sugbo, diin matag usa nakadawat og P3,000 gikan ni Senador Imee Marcos.Kini ang gipahibawo ni Jeff Go, political officer sa Central Visayas ni Senador Marcos. Ang maong pundo nagagikan sa panudlanan niini nga gihatag pinaagi sa Department of Social Welfare and Developement (DSWD) nga maoy mihimo sa pagpang-apud-apud sa kwarta nga tipik sa programa nga halad sa senadora sa publiko.Matod ni Go nga dunay 805 ka mga benefeciaries gikan sa Barangay Punta Princesa, diin ang mga lumolupyo sa lima ka sityo nga nasunogan bag-ohay pa lang samtang sa hapon sa samang adlaw, Hunyo 24, 2022 gipahigayon usab ang pag apud-apud sa 35 ka benefeciaries sa laing mga nasunogan sa Barangay Tisa.Dugang ni Go nga gawas sa financial assistance nga nadawat sa mga benepisaryo, duna usay gipang hatag nila nga mga utanon sama sa sayute, kalabasa ug opo gikan sa buhatan sa Department of Agriculture (DA) lakip na ang mga sabon humot ug mga face mask nga mga hinatag sa mga higala sa senador.Ang programa ni Senador Marcos nga gitawag og "Imeesolusyon" magpadayon pa sa nagkadaiya nga mga dapit nga dunay nanginahanglan. |
| 300 health personnel sa Mandaue makadawat og Covid-19 allowance Posted: 24 Jun 2022 03:32 AM PDT Dili mominos 300 ka health workers ang gitumbok sa Mandaue City Health Office (MCHO) nga makadawat og Covid-19 allowance.Si Dr. Ligaya Lakambini Dargantes, Emergency Operations Center (EOC) deputy chief ug assistant city health officer sa Mandaue, nibutyag niini nga kasayoran kagahapon, Hunyo 24, atubangan sa mga reporter.Matod ni Dr. Dargantes nga nakasumiter na sila sa listahan sa mga benepisaryo ngadto sa Department of Health (DOH) 7.Ang mga benepisaryo naglakip sa EOC workers, health care personnel (public ug private), barangay personnel nga nadistino sa Covid-related operations, ug midwives.Ang benepisaryo mopaubos og evaluation ug screening sa DOH 7, sama sa pagtandi sa ilang ngalan sa Philhealth numbers, dason ni Dargantes, kinsa wa pa nibutyag sa saktong petsa nga mahatag. |
| 18 anyos nga lalaki nagmotor, gipaak sa unggoy sa Argao Posted: 23 Jun 2022 06:40 AM PDT Usa ka lalaking nagmotorsiklo gipaak sa usa ka unggoy sa mga alas 6:45 sa gabii, Hunyo 22, 2022 sa Don Gil Garcia St., Brgy. Lamacan, Argao, habagatang Sugbo.Ang biktima giila ni Police Major Andy Michael Roque, hepe sa Argao Police Station, nga si Judel Daudaug Argawanon, 18, ulitawo, taga sityo Canduran, Brgy. Tulic sa mao nga lungsod.Ang nitaho sa nahitabo sa biktima mao si Geraldine Puerto, minyo, maguwang ni Argawanon.Asoy ni Puerto sa kapulisan nga ang iyang igsuon nagmotorsiklo dihang giambakan sa usa ka unggoy ug gipaak ang iyang bitiis hinungdan sa mga samad.Gitambalan dayon si Argawanon sa mga emergency responder sa lungsod una pa siya nidangop sa Isidro C. Kintanar Memorial Hospital sa Brgy. Bogo, Argao.Matod ni Roque nga ilang nasayran nga ang unggoy nakabuhi gikan sa tangkal sa Argao Nature's Park. |
| Posted: 23 Jun 2022 05:54 AM PDT Usa ka lalaki nga nagpaabot nga tubilan ang iyang motorsiklo sa usa ka gasoline station sa dalan Tres de Abril, Barangay San Nicolas Proper, siyudad sa Sugbo ang gipusil sa wala pa mailhing mamumuno, pasado alas 12:00 sa udto kagahapon, Hunyo 23, 2022.Si Police Senior Master Sergeant Diosdado Pareja, Jr. sa Sawang Calero Police Station sa Cebu City Police Office (CCPO), niila sa biktima nga si Gabriel Raffiñan, 30, taga Sityo Lower Obca sa Barangay Quiot, siyudad sa Sugbo.Sa ilang imbestigasyon, matod ni Pareja, ang biktima paingon na unta magtubil sa nahisgutan nga gasolinahan, apan usa ka lalaki ang niabot ug gitawag ang biktima.Sumala sa mga saksi, ang duha nag-istoryahanay pa apan pipila ka minuto, ilang nabati ang sipa nga buto sa armas dungan sa pagkahagba sa biktima ug ang mamumuno daling nisibat.Samtang si Rodel Arado, ang gwardiya sa gasolinahan, nagkanayon nga nakita niya nga gitawag ang biktima ug wala siya nanghilabot sa pagtuo nga kaila kini o usa ka operasyon sa kapulisan.Ang kapulisan sa Sawang Calero misusi karon sa motibo nga posibleng bahin sa drugas sanglit ilang nasubay nga ang background sa biktima nga kanhi nadakpan niadtong 2017 sa kaso sa gidiling druga sa Punta Princesa Police.Apan si Pareja nagkanayon nga ilang subayon pa ang ubang anggulo nga posibling hinungdan sa krimen samtang nagpalawom sa pag-imbestigar sa pagpamusil sa dayag nga dapit ug kahayag sa palibot sa udtong tutok. |
| Mga batang libud-suroy sa Cebu City, gipang-rescue sa kapulisan Posted: 23 Jun 2022 05:54 AM PDT Gisugdan na sa pag-rescue sa kapulisan sa siyudad sa Sugbo ang ang mga batang libud-suroy nga manglimos sa kadalanan ug kasamtangan sila nga gipahimutang sa Noah complex sa South Road Properties (SRP) ug gitakdang ipapauli sa ilang panimalay sa probinsya.Uban sa kapulisan mao ang Prevention, Restoration, Order, Beautification and Enhancemen (Probe) ug City Environmental Sanitation and Enforcement (Ceset) teams sa dakbayan.Sugod sa Miyerkules, Hunyo 22, 2022, gipang-rescue na ang mga batang libud-suroy nga naa lang sa daplin sa mga nag-unang karsada sa siyudad nga manuktok sa mga sakyanan aron manglimos.Matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO), human sila makadawat og kamandoan ni Mayor Michael Rama, gihimo dayon ang rescue operations.Gawas sa mga bata, ilang giapil ang mga hamtong na nga naa lang sa sidewalk nangatulog ug gidala sila sa Noah complex aron ipaubos sa profiling sa kagamhanan sa dakbayan una sila ihatod sa ilang pinuy-anan kon asa sila namuyo.Giangkon ni Parilla nga kasagaran sa mga bata nga na-rescue ug street dwellers nga gipangkuha mao kini ang unang gipapauli sa probinsya apan mibalik gihapon dinhi sa dakbayan aron manglimos.Magpaabot una sila kon unsay plano sa siyudad kanila apan sa pagkakaron, nakig- alayon sila sa mga barangay diin nahimutang ang mga panimay sa maong street dwellers aron katabangan sila sa ilang panginabuhian.Sunod nga target sa kapulisan ug kagamhanan sa dakbayan mao kadtong namuyo ilawom sa mga taytayan lakip na ang mga menor de edad nga padayong nagsuroy-suroy sa lawom nang gabii sanglit padayon pa nga gipatuman ang ordinansa sa curfew. |
| Editoryal: Suportahi ang drivers, operators Posted: 23 Jun 2022 05:17 AM PDT Nipadayag ang pipila ka mga grupo sa drivers ug operators sa public utility vehicles (PUV) sa ilang pagsupak sa pagpahamtang og umento sa pletihan sa pampublikong mga sakyanan taliwa sa pagsige og saka sa mga presyo sa produktong petrolyo.Di sila gusto og umento kay sila nasayod nga grabe na ang gipas-an nga kalisod sa yanong mga lumolupyo. Kinsa bay wa magsangkiig sa kalisod sukad niigo ang Covid-19 pandemic sa nasod? Tanan apektado, bisan gani ang duna pay mga trabaho. Gawas pa, kon mopaumento sa pleti, mopaumento sa abangan ang operators. Tabla ra. Naglisod na man gani og abang karon, mosamot kon magpaumento sa abang. Daghan ang drivers nga mangundang sa pagpamasahero.Ang dakong pahat sa suweldo sa yanong mga mamumuo mahipunta baya sa inadlaw nga pletihan. Dako ang makuha niini kon kwentahon ang gasto sa pleti. Mao bitaw nang dunay ubang mga mamumuo nga nag bike to work aron makadaginot sa pleti nga ilang magamit sa laing katuyoan, aron makadala og mas daghang pagkaon sa lamesa.Mas makatabang ang kagamhanan sa pagpagaan sa gipas-an karon sa drivers ug operators sa kataas sa mga presyo sa lana. Ang gibuhat karon sa Dakbayan sa Sugbo sa paghatag og discount cards sa mga driver sa pampublikong mga sakyanan dako na kaayo og ikatabang.Maayo gani kay nakahuna-huna si Mayor Michael Rama sa pagpalapad pa ning mao nga programa pinaagi sa pag-release og dugang cards. Hayan manguha pa sila og dugang oil suppliers nga mosalmot sa programa sa Siyudad.Hinaut nga ang ubang lokal nga mga kagamhanan, sama sa Mandaue, Lapu-Lapu ug Talisay mosundog aning programa sa Cebu City aron mas daghan ang makabenipisyo nga mga PUV driver. Mao ni ang usa sa mga maanindot nga paagi nga magaanan sa galastuhan ang nag-ilaid na sa kalisod nga PUV drivers ug operators. Gikinahanglan ang pagpanginlabot sa kagamhanan sa krisis karon nga gipas-an sa transport sector. |
| Posted: 23 Jun 2022 05:17 AM PDT Karong udto sa Hunyo 30, gitawag og adlaw sa pagpanudya tungod kay kinahanglang manubag na ang mga empliyado sa gobiyerno kon unsa ang ilang performance sa trabaho ug si kinsay ilang gidapigan nga kandidato sa milabay nga piniliay.Ang mga empliyado sa napilding mga kandidato maoy kinahanglang mamutos na daan kay mas siguro silang matangtang labi na ang contractual ug job order (JO) workers.Ang permanent employees dili man tingali madali sa pagtangtang apan mahimo silang idestino og lagyo ug inayran nga pwesto hangtud nga mo-resign na lang sila.Apan lahi ang palisiya sa bag-ong napili nga mayor sa lungsod sa Cordova, Cebu kay iyang ibilin sa pwesto ang department heads bisan kon mga dumadapig kini sa iyang kaatbang.Gawas nga makaayo kini sa mopuling administrasyon kay sinati na man sila sa ilang trabaho, ako nagtuo nga sila karon adto na magpaluyo sa ilang bag-ong mayor.Talagsaon ra hinuon kining ingon niini kay mapugos man gayud ang bag-ong mamunoan sa pag-empliyo sa mga tawo nga mitabang kaniya sa milabay nga kampanya.Lain usab ang palisiya ni President-elect Ferdinand Marcos, Jr. kun PBBM kay wa siya magbutang og suod lamang nga mga opisyal sa iyang gabinete apan iyang gipili ang iyang gituhoan nga mga eksperto nga makatabang kaniya pagsulbad sa mga problema sa nasod.Gani siya mismo maoy mangulo sa agriculture department aron iyang matul-id ang pagpadagan sa maong buhatan.Makapaabot kita nga dili lamang papason niya o kaha ipunon ang pipila ka mga ahensiya apan iyang lutoson ang mga smuggler sulod sa maong departamento, apil na ang sa Bureau of Customs ug ubang mga buhatan diin naghitak ang kurapsiyon.Ako nagtuo nga buot ni PBBM nga bawion ang mga dautang imahen nga gibato ngadto kanila pinaagi sa pagpaninguha nga molampus kining iyang administrasyon.* * *Daghang mga dagko ug gamhanang pamilya sa pulitika ang nabuntog niadtong milabay nga eleksiyon dinhi sa Sugbo.Ang dungog kaayo mao ang pagkahagba sa liderato sa mga Radaza nga gipildi sa magtiayong Mayor Ahong ug Kong. Cindy Chan sa Lapu-Lapu City.Mao usab ang nahitabo sa pamilyang Sitoy nga naghupot sa pangagamhanan sa lungsod sa Cordova sud sa 50 ka tuig nga gibuntog ni Konsehal Cesar Suan.A ng mga Osmeña nga girepresentahan ni Margot nga kapikas ni kanhi mayor Tomas napildi ni Mayor Mike Rama.Ang mga Quisumbing sa Mandaue City wa na gayud makabangon sukad gipildi si Mayor Luigi ni Mayor Jonas Cortes.Wa na usab makig-atbang kang Jonas ang mga Ouano. Ang mga Durano sa Danao City na lamang midaug apan napildi gihapon ni Kong. Duke Frasco sa tibuok 5th District. (mannyrabacal1144@gmail.com) |
| Posted: 23 Jun 2022 05:14 AM PDT Dear Papa Joe,Tawaga lang ko sa name nga Carl, 25 years old, taga Bohol, apan naa ko karon sa Cebu nag-work. Maski taga probinsya ko pero di gyud mailhan kay mestiso ko nga pagkalalaki. Tungod ani dinhi ko nakaproblema.Bag-o pa lang ko dinhi, naglisod ko asa ko mangita og kapuy-an ug mao to sa siging lakawlakaw, nahimamat nako kining usa ka mahuyang nga arangan pagkabutang kay naay kaugalingong negosyo. Di lang nako isulti unsang negosyuha para sad pagprotektar niya.Siyempre laki, di malikayan nga mahigugma sa opposite sex ug nakigbuwag ko aning akong uyab karon nga bayot. Ang problema lang kay karon gusto niyang bawion ang cellphone na iyang gihatag nako ug alahas kay kon dili daw nako iuli, kasohan ko niya. Naa ba koy tulubagon ani? Tambagi ko.CarlCarl,Kon imong sabton, wala kay sala kay wa man na nimo kawata. Wa sad na nimo gisabot daan nga kon magbuwag iuli. Kay kon mao na, di na ihatag kon di ka paggamit. Mao naman gud nay uso ron.Dangop sa usa ka show sa TV nya matribukar imong pagka tawo ug mapugos ka na lang og uli kay na-pressure na man ka. Buot hunahunaon, mutual ra man mo kay sa panahon nga nihatag siya ana nimo, naa man sad kay nahatag nga kalipay, apan di sa porma sa material. Lain man sad kaayo kon imo siyang ingnon nga mamawi sad ka sa iyang napahimuslan nimo, di ba? Kon ikiha ka, huwat sa kaso kay basin bluff ra nang iyaha para di ka ka let go.PAPA JOE(sa inyong tampo ipadala lang sa papajoesuperb@gmail.com) |
| 61 ka mga bata nalipay sa ‘HUG’ sa Carcar PNP Posted: 23 Jun 2022 05:14 AM PDT Walay kabutangan sa kalipay sa kabataan atol sa programa nga Hatag Ubanan og Gugma (HUG) sa Carcar City Police Station.Si Police Lt. Col. Ardioleto Cabagnot, hepe sa Carcar Police Station, maoy nangulo sa kalihukan sa personnel sa Carcar Police uban sa pribadong sektor.Mokabat sa 61 ka mga bata ang nahataga'g duwaan, school supplies, mga sinina, tsinelas, pagkaon ug uban pa atol sa kalihukan sa Martes sa hapon, Hunyo 21, sa Sitio Cadayon, Barangay Guadalupe, dakbayan sa Carcar.Si Cabagnot nga nahinabi sa Superbalita Cebu, nagkanayon nga ang kalihukan kabahin sa programa sa Philippine National Police (PNP) nga maduol sila sa kabataan.Sa samang kalamboan, mosalig ang kabataan sa kapulisan nga magsilbi nilang ate ug kuya.Si Cabagnot niingon nga ang mga beneficiary sa outreach program sa PNP mao kadtong mga less privilege nga kabataan.Mapasalamaton sila sa ilang kaabag nga private sector, sa komunidad ug volunteers nga nisalig sa ilang programa.Ang mga ginikanan sa mga bata niduyog sab sa ilang kalipay nga natigayon ang kalihukan.Gipadayag ni Cabagnot nga ilang paningkamotan uban sa private sector nga makahatag sila sa ubang mga bata sa ubang mga lugar sa Carcar. |
| 20 ka barangay sa Daanbantayan gihatagan og TV set Posted: 23 Jun 2022 05:13 AM PDT Moabot sa 149 ka mga purok sa 20 ka mga barangay sa lungsod sa Daanbantayan ang giapuran og mga TV set sa lokal nga kagamhanan.Kini maoy gipahibawo sa lungsod aron adunay magamit ang mga purok sa pagtabang sa mga residente sa ilang Information Education and Communication campaigns nga paagi nga mahibaw-an ang mga impormasyon kalabot sa kalamidad, panglawas, kalikopan, edukasyon ug kahapsay sa palibot.Napili ni Daanbantayan Mayor Sun Shimura ang maong mga purok tungod kay giingong nakita niyang aktibo kini ug well-organized.Gisugdan ang pag apud-apod atol sa gihimong orientation sa Municipal Disaster Risk Reduction and Management Office (MDRRMO) kabahin sa pre-disaster risk assessment, rapid damage assessment & needs analysis, ug post disaster needs assessment.Nagtuo ang kagamhanan nga pinaagi sa maong kahimanan mas mapalapdan pa ang kahibalo sa katawhan aron makab-ot usab ang tinguha niining mahimong empowered citizens ang mga namuyo sa lugar. |
| Gas pumps sa 3 ka gas stations sa Cebu City nasakpan wa ma-calibrate Posted: 23 Jun 2022 04:47 AM PDT Dili sakto ang sukod matag litro?Tulo ka gasolinahan sa dakbayan sa Sugbo nasakpan nga wala ma-calibrate ang ilang gas pumps atol sa kinalit nga inspeksyon sa kapulisan ug sa kagamhanan sa siyudad nunot sa kamandoan ni Cebu City Mayor Michael Rama.Human misulbong pag-ayo ang balor sa gasolina ug krudo nga halos mag-usa ka gatus na ang matag litro, ang kapulisan ug ang Prevention, Restoration, Order, Beautification and Enhancement (Probe) ug City Environmental Sanitation and Enforcement (Ceset) teams sa pagpangulo ni Raquel Arce, kalit nga gipangsusi ang mga gasolinahan sa siyudad.Atol sa inspeksyon, adunay tulo ka gasolinahan nga wala masakto ang sukod sa ilang gas pumps nga tungod niini gipang-lock una kini ug gimandoan sa pagpa-calibrate."Dunay tulo ka gasoline stations sa south nasuta nga adunay depekto sa ilang calibration nga wala mainsakto sa sukod ang mogawas sa mga gas pumps," matod ni Police Lieutenant Colonel Wilbert Parilla, deputy city director for administration sa Cebu City Police Office (CCPO)Dugang ni Parilla, gi-warning lang una ang maong mga gasoline station ug gimandoan nga ipatuman ang tanang rekisitos aron mapaubos sa calibration ang ilang gas pumps.Gitinguha sa kagamhanan sa siyudad ug sa kapulisan nga walay mopahimulos sa higayon sanglit ang direktang maapektohan sa pagsaka sa presyo sa krudo mao man ang mga kabus.Awhag nila sa mga kompanya sa gasoline station sa siyudad nga tumanon ang kamandoan aron dili kini makasugat og problema sa ilang negosyo.Ang ngalan sa tulo ka gas stations gipugngan ning mantalaan samtang wala pa makuha ang ilang habig.Nag-monitor usab ang CCPO sa mga namaligya og gasolina nga gipangsud sa botilya sa softdrinks nga gipang-display diha sa kilid sa karsada. |
| Mayor mimando pagsusi sa hinungdan sa kaso sa tipos sa Barili, info drive gihingosgan Posted: 23 Jun 2022 04:47 AM PDT Gimandoan ni Barili Mayor Julieto Flores ang water distribution utilities sa lungsod nga monitoron ug mopahigayon og pagsusi sa mga tubo niini kon duna ba'y posibleng liki nga mahimong hinungdan sa posibleng contamination.Matod ni Flores, subay sa tigom sa municipal health officers, sanitary inspectors, waterworks heads, mga opisyal sa Kapitolyo ug sakop sa lokal nga kagamhanan, nauyonan ang pagpahigayon og chlorination sa tubig nunot sa nakitang pagsaka sa mga kaso sa typhoid fever o tipos sa lungsod sa Barili.Ang typhoid fever usa ka bacterial infection nga makuha gikan sa pagkaon o contaminated nga tubig.Base sa datos sa lungsod, nakatala kini og 30 ka mga kaso sa tipos sukad niadtong Mayo. Sa kasamtangan, 16 na lang kini ka kaso nga anaa sa tambalanan, apan duha na ang natala nga namatay.Bisan pa niini, nagtuo si Flores nga dili kini alarming tungod giingong manageable ang maong kaso.Tungod niini, gisugdan na sa local health office sa pagpahibalo sa mga namuyo sa matag barangay sa paagi sa manual chlorination sanglit wala pa'y chlorinator nga ekipo ang lungsod.Nag-unang paagi niini mao ang pag-andam og stock solution sa usa ka litro. Butangan kini og usa ka kutsarita nga chlorine powder.Human sa pito ka adlaw, mahimong magkuha og duha ka kutsarita gikan sa stock solution ug isagol kini sa lima ka galon o 20 ka litrong tubig, tambag sa RHU.Samtang, ayuhon kini sa pagkutaw ug pasagdan nga molugdang ang chlorine sulod sa 30 minutos.Ayaw kalimot pag-abli sa tabon aron makahungaw ang baho.Pataodtauri una imnon ang tubig. |
| 39 ka HEI sa CV gitugotan sa F2F classes Posted: 23 Jun 2022 04:37 AM PDT Ang Commission on Higher Education (CHED) 7 nihatag na kagahapon, Hunyo 23, 2022, og acknowledgement sa 39 gikan sa 181 ka Higher Education Institution (HEI) alang sa limitadong face-to-face classes.Si Dr. Johnny Yao, ang alternate focal person sa limited face-to-face classes sa CHED 7, nagkanayon nga padayon usab ang ilang pagpanawat sa mga aplikasyon sa mga colleges ug universities alang sa ilang pagbalik didto sa ilang tagsatagsa ka mga tunghaan.Gikinahanglan para sa ilang pagbalik sa limited F2F mao ang assessment checklist uban sa clearance gikan sa ilang mga local government unit diin sila nahimutang sa Centralk Visayas (CV) sanglit gusto sa CHED-7 nga mabalanse ang kalidad sa edukasyon ug ang seguridad sa kabataan."Kon gusto nila (colleges ug universities) accomplish nalang nila ang assessment checklist kay para ra man sab nila nila kon ready na ba. Kay dili raman ni para sa eskwelahan but para ra ni sa safety sa student and the community in general. Kon wala pa lang ang pandemic, wala ra man gyuy problem," pasabot ni Yao.Gipasabot niya nga matawag gihapon og limited F2F sanglit adunay mga HEI kansang kurso ipaagi sa F2F samtang, adunay uban pabilin sa online depende sa ilang gusto sanglit ang aplikasyon dili matag eskwelahan apan matag kurso maoy nga gitanyag sa HEI maoy ilang apply-an para sa F2F.Matod niya, sa miaging tuig pa sa sila nanawat og aplikasyon apan niadtong tungora, kadto rang mga kursong medical ug allied courses sanglit lisod ang maong mga kurso kon ipaagi sa online diin istrikto pa ang quarantine classification. |
| May igong supply sa baboy, manok apan di kini makapakunhod sa presyo Posted: 23 Jun 2022 04:14 AM PDT Ang supply sa poultry ug baboy sa Central Visayas igo na apan dili paigo aron moubos ang nagkataas nga presyo sa merkado. Ang mga tawo kinahanglan nga magsugod na sa pagtanom og mga utanon sa ilang kaugalingon alang sa pagkaon.Mao kini ang giingon ni Joel Elumba, officer-in-charge ug director sa Department of Agriculture (DA) VII, sa Lunes, Hunyo 20, 2022.Si Elumba niingon nga ang pagsaka sa presyo sa mga palaliton sa merkado, ilabi na sa mga produkto sa baboy ug manok, nag-una tungod sa mga pagdili sa Central Visayas tungod sa hulga sa Avian Influenza (AI) o ang bird flu virus ug African Swine Fever (ASF) sa mga baboy.Ang AI virus nagsugod sa pagkatap sa mga manok ug mga langgam sa pipila ka mga lugar sa Luzon, Mindanao, ug uban pang mga nasod niadtong Abril, samtang niigo ang ASF sa pipila ka mga lugar sa National Capital Region (NCR) sukad sa 2019.Kini maoy hinungdan nga nipagawas si Cebu Governor Gwendolyn "Gwen" Garcia og Executive Order (EO) nos. 8 ug 9 nga nagdili sa mga produkto sa karne ug manok gikan sa Luzon, Mindanao, ug uban pang mga lugar nga naapektuhan sa AI ug ASF sa Sugbo nga sa ulahi, gipalapad ug gipahaom nila ni Cebu City Mayor Michael Rama ug Mayor Jonas Cortes.Gipatuman sab sa Bohol ug Negros ang estrikto nga mga lakang batok sa AI ug ASF.Si Elumba niingon nga tungod sa maong mga limitasyon, naglisod na sa pagpadala sa ilang mga produkto ang mga dagkong manokan ug baboy gikan sa ubang rehiyon ug lugar sa Central Visayas."There are added requirements in shipping poultry and pig products because of these limitations, such as the chicks need to undergo a blood test first and other examinations to ensure its safety from the Avian virus," matod ni Elumba."Because of these, there is a delay in delivery, causing the scarcity. We must remember that without the chicks, there would be no chicken to butcher. It is the same thing for pigs," dugang niya.Gitumbok usab ni Elumba ang nagpadayong gubat tali sa Ukraine ug Russia, nga maoy hinungdan sa dili maayo nga presyo sa gasolina, isip laing hinungdan sa pagtaas sa presyo sa mga produkto sa manok ug baboy.Ang datus sa DA VII nagbutyag nga ang presyo sa naandang poultry products nga gipalit sa mga konsumidor, sama sa dressed chicken, adunay usbaw nga di mominus P50 nga dunay average karon nga P220 kon itandi sa P170 sa wala pa ang EOs. |
| JO employee sa dakbayan sa Tagbilaran, sikop sa ronda sa druga Posted: 23 Jun 2022 04:10 AM PDT Nasikop sa buy-bust sa Philippine Drug Enforcement Agency (PDEA) 7 ang usa ka job order (JO) employee sa dakbayan sa Tagbilaran, Probinsiya sa Bohol, alas 6:55 sa buntag kagahapon, Hunyo 24, sa Purok 6, Sityo Doldol, Barangay Ubujan, Tagbilaran, Bohol.Si Leia Alcantara, tigpamaba sa PDEA 7, niila sa dinakpan nga si Ciilo V. Pitos, 45, molupyo sa dapit.Atol sa buy-bust, nasakmitan si Pitos og shabu nga mobalor og P40,800.Matod ni Alcantara nga si Pitos, usa ka electrician ug drayber sa slaughterhouse sa Tagbilaran. |
| ‘Vegetable basket’ sa Sugbo milambo Posted: 23 Jun 2022 04:10 AM PDT Hinayhinay nang mabalik ang panginabuhian sa mga mag-uuma sa lungsod sa Dalaguete sa habagatan sa lalawigan sa Sugbo human naapektohan ang ilang kita sa panahon sa kaestrikto sa protocol sa pandemiya sa coronavirus disease 2019 (Covid-19).Kini ang taho sa Department of Agriculture (DA) 7 nga nagsubay sa pagpalambo sa dakong tinubdan sa mga utanon ug lagutmon o nailang vegetable basket sa lalawigan sa Sugbo.Si Joel Elumba, officer-in-charge ug director sa DA 7, nibutyag sa SunStar Cebu niadtong Lunes, Hunyo 20, 2022, ang produksiyon sa mga utanon sa Dalaguete karon estabilisado na human wala nay estriktong babag batok sa Covid-19 sa mga utlanan sa lalawigan.Sa 2020, dili mominos nikunhod og 60 porsiyento sa pagtumod sa mga utanon gikan sa lungsod tungod sa kaestrikto sa mga utlanan padung sa siyudad sa Sugbo.Tungod sa daghang quarantine checkpoints, ang toneladang mga utanon ang natanggong ug gibaligya na lang sa ubos nga presyo sama sa repolyo nga tag P5 matag kilo gikan sa tag P65, tungod sa overproduction.Si Elumba nagkanayon nga ang presyo sa mga utanon sa lungsod nabalik na sa normal sa matag kilo human ang alert level sa Cebu province gipaluagan sa alert level 2.Mas sayon na ang pagtumod sa mga mag-uuma sa ilang produkto sa Cebu City sama sa Carbon ug uban pa.Kon mahitabo og balik ang pag-estrikto sa protocol sa Covid-19, si Elumba niingon nga ang DA nipalig-on sa ilang technology transfer, labi na sa Barangay Mantalongon, nag-unang vegetable producer sa Dalaguete.Usa ka technology transfer motabang sa pagpaumento sa agricultural productivity, cut production costs, ug pagpaubos sa consumer prices.Ang mga mag-uuma gitudloan sa pag-obserbar sa good agricultural practices (GAP), Integrated Pest Management (IPM), lakip sa Integrated Pest Control (IPC), ug paggamit sa maayong liso.Ang mga mag-uuma gidasig sa farming consolidation, diin ang mga produkto sa umahan mahiusa, busa dako ang pagbiyahe inay mag-iya-iya.Samtang, si Elumba nagkanayon nga ang ikaduhang hugna sa rice farmers' cash subsidy nga balor og P5,000 gikatakda nga ihatag sa unang semana sa Hulyo, sukwahi sa unang pahibalo nga ning buwan sa Hunyo. |
| Kawani nakita nga patay na sa waiting shed Posted: 23 Jun 2022 04:04 AM PDT Usa ka 46-anyos nga con-struction worker napalgang patay sa waiting shed sa Sitio Kabaloy, Brgy. Pajac, dakbayan sa Lapu-Lapu sa Huwebes, Hunyo 23.Ang patay giila nga si Peter Acero, lumad nga taga Cambete Sogod, Southern Leyte.Si Police Master Sergeant Kenneth Demorillon sa Lapu-Lapu City Police Station, nibutyag sa SunStar Cebu nga si Acero nagpuyo sa Barangay Looc sa dakbayan ug nagtrabaho isip construction worker sa Sitio Bukid-bukid sa Barangay Pajac.Sa pasiunang imbestigasyon, nagbutyag nga si Acero dunay samad dinunggaban sa walang bahin sa lawas nga posibling hinungdan sa iyang kamatayon. |
| Sugilanon: Ang gasa nga kamatuoran Posted: 23 Jun 2022 03:49 AM PDT JESSABELE G. BENTAZALSouth Granada, Boljoon, CebuHappy Halloween, Mama!""Ay, Abat nga dako! Pastilan pod nimo, Karen, uy! Hubaghubagan man pod ta anang imong kalaki?" Nahilumpayat si Fely, inahan ni Karen, samtang nanghugas og plato. "Naunsa god intawon kang bataa ka? Nangulahi uroy. Human na intawon ang Halloween, Inday.Gikalag ka man tingali! Nakalimot ka, hapit na man gani Pasko?""Gituyo man nako, Ma. Wala man gud ko nakasul-ob niini niadtong Palasibo. Wala man ni nako hikaplagi. Nindot, Ma, sa?" ni Karen nga nahimuot ang panagway luyo sa maskara.Alangag dili makuratan si Fely nga labaw pa man sa abat ang pamustora ni Karen. Makuyapan gyud seguro ka sa kalisang kon ikaw pa ang diha sa lugar ni Fely. Samot na kon dili ka sangpiton og "Mama." Nagsul-ob man gud si Karen og itom nga sotana, gipakapinan pa gyug maskara. Nahisama hinuon sa kang Valak ang iyang hitsura, kadtong madreng gisaniban og dautang espiritu."Nindot ba uroy! Nangukay na pod kas gamayng kaban, no? Kapila na tika giingnan nga ayaw lagi tog kuhila. Pag-ilis didto. Maypag butangan nimog dekorasyon ang atong Christmas tree," yawyaw ni Fely nga nagtutok sa sotana.Giukoy gyud ni Fely kon giuli ba ni Karen sa gamayng kaban ang sotana. Dayon iya kining gikuha ug gisang-at sa tago didto sa pulangki sa balay. Ang karaang sotana kini ni Nang Pingping. Sotana nga naglimin og daghang misteryo sa wala pa siya mitaliwan. Dose na ka tuig ang milabay sukad sa iyang pagpanaw. Dili unta buot si Fely nga ukayon pa ang kasaysayan tungod kay Pasko na hapit ug buot niyang hikalimtan na ang tanang kasakit sa kagahapon. Si Fely, anak sa pagka dalaga ni Nang Pingping, sa wala pa kini manerbisyo sa simbahan. Unya dihay panahon nga si Nang Pingping nagserbisyo sa simbahan sa wala pa siya motaliwan.Bisperas sa Pasko nianang gabhiona."Maayong Pasko, Mama!" ni Karen nga nagngislit. "Unsay imong ihatag nga pinaskohan nako karon, Ma?"Simpol apan lamiang mga pagkaon ang gidalit sa ilang talad-kan-anan nianang Noche Buena. Nagsibaw ang musika nga mabati sa kasilinganan, mga awit nga paskohanon.Natuk-an si Fely sa pangutana ni Karen."K-Kuan, Day. Inigka human natog kaon, ihatag ko kini kanimo," tubag ni Fely.Dugay na nga nagplano si Fely kon unsay iyang ihatag kang Karen. Naglisod lang siyag pahigayon kay nabalaka siya kon unsa unyay mahimong epekto niini sa bata. Ug nahadlok pod siya kay tingali unyag dili kini dawaton ni Karen."Nakagusto ka ba sa akong regalo nimo, Ma? Ang imo gyud nang gidumtang sandal. Unsa may imong ihatag nako, Ma?" Miusab pagpangutana si Karen. Naghinamhinam siya sa gasa nga ihatag ni Mama niya karong Paskoha.Human sila mangaon may gikuha si Fely sa iyang lawak."Ablihi kini, Day," ni Fely samtang nagtunol sa iyang gasa kang Karen."Gamay nga kaban? Hahaha! Kahibalo na ko kon unsay sulod ini, Ma!" ni Karen."Nasayop ka, Day. Naa diha ang dugay na kaayo nakong gustong ihatag nimo sa daghan nang Pasko nga nanglabay. Basaha kanang 'Diary.' Naa diha tanan lakip ang ngalan sa matuod nimong inahan. Ug gaksa sab kini..." ni Fely nga mitunol sa sotana kang Karen. "Mao kini ang gisul-ob sa 'atong' inahan sa dihang naporma ka sa iyang sabakan bunga sa pagpanamastamas sa usa ka sakristan." Mibanos ang tumang kahilom tali kanilang duha. (KATAPUSAN)" |
| Cone gikuha sa Heat isip assistant coach Posted: 23 Jun 2022 03:26 AM PDT Nakadawat og imbitasiyon si Brgy. Ginebra Gin Kings coach Tim Cone gikan sa Miami Heat aron moapil sa ilang coaching staff alang sa National Basketball Association (NBA) Summer League.Hinuon, giklaro ni Cone nga dili siya mo-coach sa mismong puwersa sa Miami Heat kauban ang head coach niini nga si Fil-Am Erik Spoelstra.Matod ni Cone, patabangon lang siya ni Malik Allen, usa sa mga assistant ni Spoelstra, aron paghashas sa abilidad sa makuhang rookies sa Heat sa umaabot nga NBA draft."They think it's me going and coaching the Miami Heat. You know, Butler, Jimmy Butler, and Tyler Herro and all of that. No, it's not that at all," pasabot ni Cone nga napatik sa Spin.ph."Erik Spoelstra will not be coaching, at all, through the whole Summer League. The coach of the team is gonna be Malik Allen... and I'm gonna assist him in any way I can."Alang ni Cone, kinsa 24-time champion coach sa Philippine Basketball Association (PBA), katumanan kini sa iyang taudtaod na nga damgo."So it's a dream come true. It's a bucket list for me. No. 1 in that bucket list," dugang ni Cone."Did I say I was excited? I'm excited. I'm excited to do it. So we'll see."Gipasalig ni Cone nga inig ka human sa NBA Summer League, mobalik na siya sa Ginebra. |
| Posted: 23 Jun 2022 03:26 AM PDT Aduna pa'y saktong ikabuga si kanhi 5-division world champion Nonito "Filipino Flash" Donaire ug kaya pa niining molupig og dekalidad nga mga boksidor kon makadesisyon kining mokanaog og timbang.Mao kini ang gibatbat ni Donaire Sr., amahan sa usa sa labing maayong Pinoy nga mga boksidor.Si Donaire, kinsa nag-edad na og 39, taudtaod na sab nagkampanya sa bantamweight division diin sa katapusan niyang away, nasugamak siya sa 2nd round TKO nga kapildihan batok kang Japanese Naoya "Monster" Inoue sa ilang world unification bout.Nagtinguha si Donaire nga mahimong 5-division world champion ug nagplano kining mokanaog sa super flyweight alang ning maong katuyoan."It depends if he can make 115 [pounds], he can still beat the likes of Chocolatito Roman Gonzalez," matod ni Donaire Sr. sa interbyu sa Sparring Sessions LIVE."That is what he likes, an inside fighter who does not run. If he can make weight, why not? But that three pounds is going to be a big deal in professional boxing."Hinuon, nagkanayon si Donaire Sr. nga kon siya lang ang matuman, gusto niyang moretiro na lang ang umaabot niyang Hall of Famer nga anak."What does he need? What if he gets into an accident? That is my question," batbat ni Donaire Sr."He has money now, he can support his family. He can manage or train instead so he would still be in boxing." |
| Beermen, Gin Kings maghinubganay Posted: 23 Jun 2022 03:25 AM PDT Mga duwa karon:3:00 pm- Phoenixbatok Magnolia6:00 pm- Ginebrabatok San MiguelMaghinubganay ang gikahadlukang magsuong puwersa nga mao ang San Miguel Beermen ug Brgy. Ginebra Gin Kings sa main game karong alas 6:00 sa gabii, Hunyo 24, 2022, sa Philippine Basketball Association (PBA) 2022 Philippine Cup sa Mall of Asia Arena sa Pasay City.Ang Beermen kasamtangang naggunit sa liderato bitbit ang 3-0 nga rekord nga nagagikan sa ilang kadaugan batok sa Phoenix Super LPG Fuel Masters, 108-100, NLEX Road Warriors, 100-92, ug Magnolia Chicken Timplados, 87-81.Gipasabot ni San Miguel coach Leo Austria tinguha nilang masumpayan ang ilang sunodsunod nga kadaugan aron dili magkagidlay sa pagsulod sa playoffs."We want a strong start. Ayaw na namin laging naghahabol at minsan nga pasang awa lang ang pasok sa playoffs," matod ni Austria nga napatik sa www.pba.ph.Sa ilang bahin, ang Gin Kings maayo sab og gipakita ug aduna kini 2-1 nga rekord.Hinuon aduna dakong tapakanan ang Gin Kings gumikan kay naangol na sab ang ilang pambatong pointguard nga si Stanley Pringle.Sa premirong duwa, makigsangka ang Timplados batok sa Fuel Masters sugod karong alas 3:00 sa hapon.Ang Timplados adunay 2-3 nga rekord samtang ang Fuel Masters naggunit og 2-2 nga baraha. |
| Posted: 23 Jun 2022 03:25 AM PDT Padayong moduwa sa Japan B.League si Kobe Paras ug mipirma kini og usa ka season nga kontrata sa Division 2 squad Altiri Chiba.Opisyal nga gianunsyo sa Chiba kagahapon, Hunyo 23, 2022 ang pagpirma og kontrata sa anak sa basketball legend Benjie Paras, kinsa maoy bugtong dungan nga nakabira sa MVP ug Rookie of the Year awards niadtong 1989."He is a player of exeptional physical ability and has extensive experience playing in the B1 level," pamahayag ni Altiri director Yoshihide Arai kabahin kang Paras."We are excited to see Altiri Chiba basketball evolve with his talent on this team."Sa miaging season, si Paras nagduwa sa Niigata Albirex BB diin nag-average siya og 8.2 puntos, 2.1 rebounds, and 1.2 assists sulod sa 49 ka mga duwa. |
| Posted: 23 Jun 2022 03:25 AM PDT Mokabat ngadto sa $100,000 (mga P5.4 million) nga cash ang nakuha sa mga kawatan nga ninglungkab sa panimalay ni kanhi National Basketball Association (NBA) star nga si Vince Carter sa Atlanta.Basi sa incident report sa Atlanta Police, duha ka mga pusil ug $16,000 ang na-recover sa kapulisan sa gawas sa 900-square meter nga balay sa kanhi slamdunk champion.Nahigmata ang asawa ni Carter nga si Sondi ug ilang duha ka mga anak dihang nakadungog sila og saba mga alas 11:50 sa gabii. Daling nitawag og 911 si Sondi. / AP |
| Kai misalmot sa Pacers training Posted: 23 Jun 2022 03:21 AM PDT Niapil ang batan-ong Pinoy nga higante nga si Kai Sotto sa training sa Indiana Pacers alang sa iyang tinguha nga mahimong labing unang lumad nga Pinoy nga makaduwa sa National Basketball Association (NBA).Pipila na sab nga training sa teams sa NBA ang naapilan ni Sotto ug ang Pacers maoy labing ulahi sa dili pa ang NBA Draft nga gikatakda karong adlawa, Hunyo 24, 2022 (RP time) sa Brooklyn, New York.Si Sotto niduwa og usa ka season sa National Basketball League (NBL) sa Australia isip tipik sa iyang pagpangandam alang sa NBA. / ESL |
| Super Suroy: Alto Peak nagbuntaog sa E. Visayas Posted: 23 Jun 2022 03:07 AM PDT Sa mga mahiligon og kulbahinam nga adventure ilabi na sa mga mahiligon mokatkat og bukid, ang Mount Aminduen kon mas nailhan nga Alto Peak, ang maghatag kaninyo sa maong experience.Ang Alto Peak giila nga labing taas nga bukid sa Eastern Visayas nga adunay gihabugon nga 1,332 MASL (meters above sea level) nga nahimutang sa Jaro, Leyte.TIPSSa higayon nagplano mo og pagpanuroy, mas bintaha kon adunay igong preparasyon ilabi na ang pagsusi sa kahimtang sa panahon.Maayo na lang kay ang nangulo sa among trekking nga si Sir Jay, plantsado ang tanan aron nga ma-enjoy sa grupo ang among kalihokan.Importante nga buhaton mao ang pakig-alayon ngadto sa local ug certified guides sa Barangay Cabintan, Ormoc.Sa mga interesado, mamahimong makontak si Ramil Morales sa mobile number nga 09217243042.ANGAYANG BUHATONHuman nga nakakuha mi og slot sa maong trip, booked og ticket sa barko o fast craft paingon sa Ormoc.Sa maong higayon, mamahimong makapangita na og van for hire, diin moabag ang guide nga maoy mokuha gikan sa pantalan sa Ormoc ngadto na sa jump-off point, Barangay Cabintan Tourism Office, nga molanat ngadto sa kapin sa usa ka oras ngadto na sa duha ka oras.Siguroha nga mi-fill up sa ilang records samtang nagpaabot sa trail master.Sud sa Tourism Office, gipakita sa grupo ang mapa paingon sa Alto Peak lakip na sa side trips sama sa Lake Janagdan, Sulfatara ug Mount Malingatong diin agdon ang guests sa ilang mapilian nga side trips nga ilang mauyonan.ADVENTURENapilian namo ang trail paingon sa Alto Peak subay sa Sulfatara / Mount Malingatong nga alang namo, mas sayon, itandi sa laing direksiyon.Mount Malingatong – maoy una namong gihunongan nga usa sa mga taas nga bukid sa Cabintan, Ormoc City nga adunay gitas-on nga 1,205 MASL. Usa sa mga nakalahi sa maong dapit kay ang maong trail adunay puti ug kolor yellow nga bato nga gilibotan sa mga tanom nga nangasunog, kon mahimo isul-ob ang face mask tungod sa hait nga baho sa sulfur deposit sa maong lugar.Sulfatara – adunay gihabugon nga 1,000 MASL, adunay mas baga nga sulfur deposit diin makita na sab sa maong dapit ang Mount Aminduen.Rubas hot spring – haom maong tubod nga maka-relax gikan sa kakapoy og baktas aron nga maka-recharge ug maka-refresh. Adunay cottages ang lugar diin kami mipahiluna sa among pagpaniudto.TUNGASONGisugdan namo ang among pagkatkat sa tiilan sa Alto Peak sa alas 4:00 sa kaadlawon diin tumang pag-amping aron paglikay sa disgrasya. Sud sa tunga sa oras ang among pagbaktas sa patag nga agianan, gisundan sa tulo ka oras nga pagtungas saka sa ibabaw sa maong bukid.Sa alas 7:45 na sa buntag, among naabot ang ibabaw nga bahin sa Alto Peak diin nisugat sa among panan-aw ang katahom sa kinaiyahan human nga anam nga niiway ang bagang panganod.Usa ka talagsaong experience ang among nasinati nga naghupay sa among kakapoy ug kalisdanan sa among pagtaak. |
| Unggoy nakabuhi sa park, nasikop Posted: 22 Jun 2022 08:03 PM PDT Nadakpan na sa Disaster Risk Reduction and Management Office (DRRMO) sa lungsod sa Argao ang unggoy nga nakabuhi gikan sa Natures Park sa naasoyng lungsod.Kini maoy gipahibalo ni Kent Rizon, pangulo sa DRRMO Argao sa Superbalita Cebu sa Hunyo 23, 2022.Ang maong unggoy giingong nakapaak og duha ka mga indibiduwal.Matod ni Rizon, dunay upat ka mga unggoy sulod sa maong park.Gawas kanila, may mga langgam ug rabbit usab nga kalingawan paglantaw sa mga bata sa dihang bukas pa kini.Gipahibawo usab niini nga natambalan na ang duha ka mga indibiduwal nga gipaak sa maong hayop. |
| You are subscribed to email updates from SUNSTAR. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment