Tuesday, July 19, 2022

https://www.sunstar.com.ph/

https://www.sunstar.com.ph/

8 ka menor naluwas

Posted: 13 Jul 2022 06:32 AM PDT

Walo ka mga menor de edad ang naluwas sa hiniusang pwersa sa mga awtoridad nga nironda sa usa ka balay nga gihimong cyber sex den sa Barangay Luz, dakbayan sa Sugbo, pasado alas 5:00 sa hapon sa Miyerkules, Hulyo 13, 2022.Ang mga bata nanag-edad og 17 anyos ug paubos, tulo niini mga babaye, lakip sa upat pa ka buwan nga masuso.Nangulo sa operasyon mao ang mga sakop sa Women and Children Protection Center (WCPC) Visayas Field Unit, inabagan sa Women and Children Protection Desk (WCPD) sa Cebu City Police Office (CCPO), Regional Cyber Crime Unit (RCCU) 7 uban sa pakig-alayon sa Department of Social Welfare and Development (DSWD) 7 ug Department of Justice (DOJ).Ang pagronda sa balay pinasikad sa giluwatan nga search warrant ni Regional Trial Court (RTC) Judge Ramon Daomilas, Jr.Matod ni Police Major Nicole Lawrence Ibo, hepe sa WCPC 7, dugay na nila nga gi-monitor ang cyber porn activities sa suspek nga usa ka inahan, kansang ngan nigawas gikan sa imbestigasyon sa ilang unang mga nadakpan sa nanglabay nga operasyon bahin sa cyber sex.Giingong motanyag ang suspek sa mga menor de edad ngadto sa kustomer nga tua sa gawas sa nasud sa hubo nga hulagway sa mga bata.Nagsugod sa iyang cyber crime activities ang suspek niadtong 2020 apan, nahunong tungod sa pandemiya ug sa milabayng duha ka buwan, mibalik na usab sa iyang kalihokan."Kini siya stemmed from previous nga operation. Sa previous operation, among nahibal-an nag-offer sad siyag minor, mohatag siyag picture sa amoa lang wala mi kahibalo sa mga foreigner," matod ni Ibo ngadto sa mga reporter.Ang mga bata gipang-turnover sa DSWD 7 aron pag-atiman kanila.Mga kasong kalapasan sa Republic Act 9775 kun Anti-Child Pornography Act of 2009, kalapasan sa Republic Act 10175 kun Cybercrime Prevention Act of 2012 ug kalapasan sa Republic Act 10364 Expanded Anti-Trafficking in Persons Act of 2012 ang ipasaka sa kapulisan batok sa suspek.Ang ngan sa suspek gipugnan ning mantalaan aron pagpanalipod sa kabataan.

Profile sa isnatser nga nagsakay og motorsiklo nakuha, gipanid-an

Posted: 13 Jul 2022 06:31 AM PDT

Kapulisan sa siyudad sa Sugbo duna nay profile sa isnatser nga nakamotorsiklo nga giambakan sa iyang gibiktima nga nakuhaan og video sa usa ka sakyanan sa Osmeña Boulevard sa miaging semana nga ga-trending sa social media.Unang nag-viral sa social media ang paggukod sa lalaking biktima sa usa ka nakamotorsiklo sa Osmeña Blvd. human labniha sa drayber niini ang iyang cellphone.Makita sa video nga natumba ang motorsiklo sa isnatser, apan dali kining nibangon, nibasakay sa motorsiklo ug dayong sibat, samtang nakuha og balik sa biktima ang cellular phone.Matod ni Police Lieutenant Colonel Janette Rafter, deputy director for operations sa Cebu City Police Office (CCPO), nagpa-blotter na ang biktima sa Abellana Police Station ug gihatagan na og pagtagad aron mailhan ug masulbad ang krimen.Dugang ni Rafter, aduna na silay profile sa isnatser bisan kon wa pa hingpit mailhi.Dunay nakasaksi sa insidente sanglit sa wala pa ang paglabni, dunay nakakita sa dagway niini dihang gitangtang sa isnatser ang iyang helmet."Wala pa sa pagkakaron pero nakuha ang profile sa suspect base sa kuha sa dash cam ug base pud sa statement sa biktima," matod ni Rafter.Dunay gidudahan ang kapulisan apan ila pang susihon uban sa biktima.Dugang ni Rafter, ang krimen nisaka sa miaging semana, apan sa dihang ilang gi-adjust ang deployment sa PNP personnel, niubos na usab ang kriminalidad.Giangkon ni Rafter nga ning pagbalik na sa pagluag sa restriction sa pandemiya, nibalik usab ang mga kriminal sa pagsuroysuroy sa palibot.

‘Nakuryentihan’

Posted: 13 Jul 2022 06:30 AM PDT

Usa ka lalaki patay nga nagbuy-od sa daplin sa dan sa Don Gil Garcia, Barangay Capitol Site, dakbayan sa Sugbo kagahapon sa kaadlawon, Hulyo 13, 2022.Ang biktima mao si Erwin Capili, 23, taga dan B. Rodriguez, Barangay Sambag 2, siyudad sa Sugbo.Gidudahan nga nikatkat sa kahoy si Capili ug tungod sa kakusog sa pagbundak sa uwan, nadakin-as ug nahulog apan nakakapyot sa wire.Posibleng siya nakuryentihan dihang nahulog base sa kawo nga nahabilin o nasangit sa electrical wire, sumala sa kapulisan.

Nietes gikastigo ni Ioka

Posted: 13 Jul 2022 06:25 AM PDT

Nasugamak sa dominanteng unanimous decision nga kapildihan si Filipino Donnie "Ahas" Nietes sa ilang rematch ni World Boxing Organization (WBO) super flyweight champion Japanese Kazuto Ioka ganina sa Ota-City Gymnasium sa Tokyo, Japan.Si Ioka, kinsa nakabawos sa iyang split decision nga kapildihan sa premiro nilang away ni Nietes niadtong Disyembre 31, 2018, nidominar sa tulo ka scorecards sa judges, 120-108, 118-110, ug 117-111.Sa kinatibuk-ang away, tataw nga naapektuhan na ang abilidad ni Nietes sa iyang pangidaron nga 40.Si Nietes natagak sa 43-2-6, 23KOs nga rekord samtang ang 33 anyos nga si Ioka misaka sa 29-2, 15KOs nga baraha

10K ka antigen test kits gihatag ni Garcia sa DepEd 7

Posted: 13 Jul 2022 04:39 AM PDT

Moabot og 10,000 ka antigen test kits ang gi-turnover sa Kagamhanan sa Probinsya sa Sugbo sa Department of Education (DepEd) Central Visayas aron magamit sa mga magtutudlo nga wala mabakunahi batok sa coronavirus disease 2019 (Covid-19).Gipahibawo kini pinaagi sa Sugbo News, official news portal sa Kapitolyo. Ang antigen kits nadawat sa Kapitolyo isip donasyon gikan sa usa ka pribado nga kompaniya.Gipasalamatan ni Cebu Governor Gwendolyn Garcia ang Limdaqui Trading, Inc. sa paghatag sa test kits.Gipasabot sa gobernador nga aron magamit, gi-turnover sa probinsya ang test kits ngadto sa DepEd alang sa mga magtutudlo nga gikinahanglan nga mopaubos sa pagsulay una makatunga sa eskwelahan.Niluwat og memorandum si Garcia sa mga lokal nga kagamhanan sa probinsya pagsiguro nga dili himuon nga rekisito ang vaccination sa tanang transaksyon sa gobiyerno, lakip na ang pag-hire og mga kawani ug admission sa mga tinun-an sa tunghaan.Si Garcia una nang supak sa paghimong mandatory sa pagpabakuna tungod iyang pagtuo nga anti-poor ang maong polisiya.

DepEd sa Cebu City nangandam sa full F2F classes

Posted: 13 Jul 2022 04:38 AM PDT

Human sa mando sa Department of Education (DepEd) sa pagpahigayon sa full face-to-face (F2F classes sa Nobiyembre 2022, ang DepEd Cebu City nangandam dayon, lakip sa pag-ayo sa mga pasilidad sa mga tunghaan nga nangaguba sa bagyo.Si Melissa Dela Cruz, chairperson sa Local School Board (LSB), nisaysay sa SunStar Cebu kagahapon, Hulyo 13, nga ang mga tunghaan dunay kapasidad sa in-person classes, apan pipila ka mga edipisyo ug lawak-saringan ang kinahanglang ayuhon.Sumala ni Dela Cruz, tungod sa pagharos sa bagyong Odette sa Disyembre 2021, kini niresulta sa P300 milyunes nga danyos sa school infrastructures sa dakbayan.Sa 126 ka public ug private schools sa dakbayan, ang SLB nakadawat og hangyo gikan sa 100 ka mga tunghaan nga sila tabangan, dugang niya.Si Dela Cruz niingon nga ang LSB nitubag sa dul-an 400 ka repair works sa pasilidad, labina sa pag-ayo sa atop.Ang LSB dili makahatag og monetary equivalent o katugbang nga kantidad human ang ilang tabang pulos 'in kind', dason ni Dela Cruz.Dili usab makahatag si Dela Cruz sa pagkakaron sa specific timeline kanus-a mahuman ang tanang pag-ayo, apan nipasalig nga hugot sila nga nakig-alayon sa DepEd.

P2.8M piyansa sa kanhi kawani sa LTO nga nasikop sa CIDG

Posted: 13 Jul 2022 04:36 AM PDT

Mahimong dili na makagawas ang kanhi disbursing officer sa Land Transportation Office (LTO) 7 human laing warrant of arrest sa walo ka mga count sa kasong malversation of public funds ang gi-serve sa Criminal Investigation and Detection Group (CIDG) 7 nga way gitugot nga piyansa ang korte.Giingong siya nakadispalko og mga P6 milyunes.Si Police Colonel Ireneo Dalogdog, hepe sa CIDG 7, niingon nga sa Hulyo 5, 2022, 30 ka warrants of arrest ang ilang gi-serve kang Marissa Veriña sa gipuy-an niini sa Brgy. Bangkal, Lapu-Lapu City.Apan sa Martes, Hulyo 12, 2022, laing 16 ka warrants sa mga kasong falsification of public documents ug usa niini nga warrant adunay walo ka ihap sa kasong malversation of public funds nga walay gitugot nga piyansa samtang laing usa pa gi-serve sa Miyerkules, Hulyo 13, sa kasong falsification.Sa pagkwentada sa CIDG 7, moabot sa kapin P2 milyunes ang piyansa ni Veriña sa lainlaing mga kaso, apan dili gihapon siya makagawas tungod sa laing warrant nga wala siya tugoti nga makapiyansa."All in all, ang bail bond ay umabot ng P2,862,000 kaya lang mayron siyang isang warrant of arrest na non-bailable kahit na mapyansahan nya yung ibang mga warrant. Hindi na sya maaring makalabas dahil sa isang kasong 8 counts of malversation of public funds," matod ni Dalogdog.Gawas ni Veriña, ang iyang kauban gikiha usab sa susamang mga kaso apan wala pa malutsi og warrant of arrest gikan sa korte.Gitug-an ni Dalogdog nga wala nag-inusara ang akusado sa paghimo sa krimen sanglit ang iyang kauban sa opisina giingong nalakip usab, apan wa una nganli samtang wala pay arrest order ang hukmanan.Nagsugod sa trabaho si Veriña sa LTO 7 niadtong Disyembre 1999 hangtod sa Septiyembre 2007 isip clerk, diin siya ang moandam sa suweldo sa tanang mga kawani sa maong buhatan.Siya ang mopagawas sa budget alang sa mga galastohan sa administrative function.Apan sa dihang gipaubos sa audit sa COA ,nakita nila nga adunay mga pundo nga dili na matarong sa pagpasabot ug dili na usab ma-liquidate nga tungod niini, gipadalhan na siya og audit observation memorandum (AOM).Tungod kay dili na niya mapasabot kon asa napunta ang pundo, gikiha na siya sa COA, diin 47 ka mga kaso ang naa na sa korte.Human napasaka ang kaso niadtong 2007, ni-resign sa trabaho si Veriña ug nagta-gotago sa dakbayan sa Lapu-Lapu ug lungsod sa Minglanilla.

Kong. Gullas pabor sa pag-oktaba sa BSKE

Posted: 13 Jul 2022 04:35 AM PDT

Pabor si Cebu 1st district Rep. Rhea Gullas sa pag-oktaba sa Barangay and Sangguniang Kabataan Elections (BSKE) karong Disyembre 5, 2022.Sa pakighinabi sa mga tigbalita sa Martes, Hulyo 12, 2022, ang bag-ong kongresista nipasabot nga ang hukom nga mahinayon o dili ang BSKE magdepende sa desisyon sa mayoriya sa Kongreso."But that's just my opinion. At the end of the day, it's really the Congress who will decide," matod sa magbabalaud.Nagtuo siya nga ang budget nga alang sa BSKE magamit pa sa adminitrasiyon ni Presidente Ferdinand "Bongbong" Marcos, Jr. alang sa ubang mga proyekto.Si Gullas nitataw nga walay tawo gikan sa ehekutibo nga nag-impluwensiya kaniya o nimando kaniya nga suportahan ang pag-oktaba sa BSKE.Samtang ang iyang bana nga si Talisay City Mayor Gerald Anthony 'Samsam' Gullas nagkanayon nga mosanong siya sa desisyon sa mayoriya sa Kongreso.Apan alang kaniya, mas maayong iuswag ang piniliay. "I really believed nga mas maayo lang sa nga ma-postpone, pero that is not my decision to make, that is Congress," pasabot sa mayor.Samtang sa isyu sa divorce, si Kong. Gullas niingon nga supak siya niini sukad pa kaniadto. "I will always say no to divorce, kay para nako, we really have to protect the sacrament of marriage."

'Sige'g joke' gitigbas sa ugangan

Posted: 13 Jul 2022 04:35 AM PDT

Di maayong magsige og pangomedya labina kon di na kauyon ang gikomedyahan.Sama aning mag-uuma nga gitigbas sa iyang ugangan niadtong Martes, Hulyo 12, sa Barangay Bala, lungsod sa Moalboal, Sugbo kay gilangasan sa iyang sige'g komedya.Si Senior Master Sergeant Stewart Bayang, chief investigator sa Moalboal Police Station, niila sa biktima nga si Leodegario Blanca, 41, samtang ang suspek giilang si Expedito Gabutero, 65.Matod ni Bayang sa SunStar Cebu nga alas 9:30 gabii sa naasoy nga adlaw, nakadawat sila og alarma sa pagpanigbas ug sa ilang pagresponde, ilang naabtan si Blanca nga naligo sa dugo. Samtang si Gabutero, matod ni Bayang, naglingkod sa usa ka suok sa balay uban sa ilang kabanay.

Papa gidunggab sa anak, angol

Posted: 13 Jul 2022 04:32 AM PDT

Usa ka 41-anyos nga drayber sa traysikad nga hubog gidakop human gidunggab ang iyang amahan sa Martes sa gabii sa Sitio Guiwanon, Barangay Poblacion, lungsod sa Dalaguete.Si Corporal Jem Vincent Pacaldo, investigating officer sa Dalaguete Police Station, niila sa suspek nga si Cirilo Ocampo, taga Barangay Poblacion, Dalaguete.Matod ni Pacaldo nga alas 10:45 sa gabii, nagpatrolya sila sa dapit ug gipahibawo sa mga tawo bahin sa pagpanunggab.Naabtan sa kapulisan ang amahan nga si Angelo nga samdan sa likod, kamot ug tiyan. Gidala dayon siya sa Argao District Hospital, apan gibahin sa Carcar City District Hospital.Nasayran sa kapulisan nga ang amahan nanirado sa balay aron dili makasud ang anak nga hubog. Apan naabli sa anak ang pultahan ug gidunggab ang amahan.Ang mga silingan nga nakamata sa kasaba ningtaho sa kapulisan. Ang anak gipriso na sa Dalaguete police.

Manny di na angay mobalik

Posted: 13 Jul 2022 04:03 AM PDT

Nanghinaot si Hall of Fame trainer Freddie Roach nga kuhaon siya'g balik ni Filipino boxing legend Manny Pacquiao kon makadesisyon kini nga moaway pagbalik sa usa ka lehitimong sinumbagay ibabaw sa ring.Apan giklaro ni Roach nga kon pangayuan siya og opinyon sa Pambansang Kamao ng Pilipinas kabahin sa pagpakig-away og world champion, iyaha kining tambagan nga magpabilin na lang kining retirado.Gipasabot ni Roach nga wala na'y angay ipamatuod ang 8-division world champion ug dili na kini angay makigharong og batan-on ug dekalibreng kontra ning puntoha sa iyang kinabuhi."I think he's finished with boxing," matod ni Roach sa interbyu sa www.boxingscene.com."I don't think he has anything more to prove. He's done everything he can, I feel. He doesn't owe anything to anybody. If he does wanna come back and fight again, I hope he picks me as his trainer."Si Pacquiao, kinsa miretiro niadtong Septiyembre, 2021, gikatahong mosagubang og usa ka exhibition bout karong Disyembre, 2022 batok kang DK Yoo, usa ka inilang martial artist ug YouTuber sa Korea.Wala man tuod nisulti si Pacquiao apan gituohan nga ang pagpasagubang og exhibition bout usa ka lakang sa fighting senator aron sutaon kon aduna pa ba siyay saktong ikabuga sa edad nga 43."If he's willing to come back, I'd like to help him and wish him the best of luck," pagklaro ni Roach."But his wife and everyone doesn't want him to come back. There's a lot more people that feel he doesn't need to come back. What does he have to prove? He's already been there."Nagkanayon si Roach nga sa iyang nasayran, kasamtangang nagbakasyon si Pacquiao kauban ang iyang pamilya ug wala pa kini mibalik sa training.Si Pacquiao niretiro bawon ang 62-8-2, 39 KOs nga rekord.

1st Cebu Autodealers league gisugdan na

Posted: 13 Jul 2022 04:03 AM PDT

Mihagpat og 12 puntos, unom ka rebounds ug walo ka assists si Clint Alcontin aron pangulohan ang makutas nga kadaugan sa Toyota GR-S batok sa Toyota Mabolo Team 2, 55-53, sa nagpadayon nga Autodealers League basketball tournament ning bag-uhay lang sa Zapatera Elementary School gymnasium, dakbayan sa Sugbo.Ang kadaugan maoy naghatag sa Toyota RS sa solong liderato sa Bracket A nga may 2-0 nga baraha samtang ang Toyota Mabolo Team nahagsa sa 1-1 nga rekord.Sa sayo pa, ang Hyundai yanong nilupig sa Ford, 47-39, ubos sa pagpangulo ni Emmanuel Villaester, kinsa nitali og 11 puntos, pito ka rebounds, tulo ka assists ug usa ka steal.Sa lain pa nga duwa, gilubong sa Drifters ang Toyota Mabolo Team, 59-32.Si Kenneth Laurel maoy mibida sa Drifters Autocentral pinaagi sa iyang 14 puntos, tulo ka rebounds ug usa ka assist.Miabot sa 14 ka teams ang mingsalmot sa torneyo nga maoy unang lega sa autodealers sa Sugbo ubos sa pag-organisar nila ni Orly Rizane ug Michael Sereno.Ganting salapi ang nakahan-ay alang sa mga mananaog sa torneyo kansang katuyoan mao ang pagpahugot sa panaghigalaay sa autodealers nga nagbasehan sa Sugbo.Milangkob sa bracket A mao ang Toyota Mabolo Team 1, Toyota TCB, Nissan Autocentral, Geely Gateway, Toyota GR-S, MG North Chevrolet ug 7 Mitsubishi South samtang sa bracket B mao ang MG & Mitsubishi Gateway, Ford, Autocentral Suzuki SUBARU, TOYOTA Mabolo Team 2, Mitsubishi Mandaue, Hyundai, Suzuki South.

Andam nga mosakripisyo

Posted: 13 Jul 2022 03:57 AM PDT

Gipabuhagay nila ni Malcolm Brogdon ug Danilo Gallinari nga andam silang mosakripisyo alang sa kaayuhan sa bag-o nilang kampo sa National Basketball Association (NBA) nga mao ang Boston Celtics.Si Brogdon, kinsa usa sa mga sinaligan sa Indiana Pacers sa wala pa siya nabalhin sa Celtics, nagkanayon nga andam siyang mohangop isip reserve player sa starting pointguard nga si Marcus Smart.Si Gallinari, kinsa nakuha sa Celtics gikan sa Atlanta Hawks, niingon nga tumanon niya bisan unsa'y ipabuhat sa Boston coaching staff. / AP

Ciar: Music Festival sa Degrees Diner sa Compostela

Posted: 13 Jul 2022 03:47 AM PDT

Usa ka Music Festival ang gitakdang ipahigayon sa Degrees Diner Grill and Resto Bar nunot sa nagsingabot nga kapistahan sa mahal nga patron sa lungsod sa Compostela nga si Sr. Santiago de Apostol.Ang Degrees Diner dunay gilapdon nga 1,057 square meters ug maoy labing kinadak-an nga Resto-Bar ug sentro sa kalingawan karon sa Barangay Canamucan (between Guimbal-Canamucan bridge ug Sea oil gasoline station) nga naa ra gyud daplin sa highway."It will take centerstage on July 23, Saturday, 6 p.m. at the Degrees Diner Parking Grounds dubbed as A Night of Music: Live Band Night with special performances of "Cheap Monks", "One of a Kind", and "Ronald Dumpit and his band," paambit ni Jucil Marie Arciaga nga maoy nagduma sa Degrees Diner Grill and Resto-Bar."The proceeds of the event will be given to the underprivileged children of Compostela. Degrees Diner has been doing feeding program since we had our opening last December as our way of giving back to the community kay mao pud ni ang gina-practice sa owner and his partners sa ilang brotherhood," dugang ni Arciaga sa interbyu sa Superbalita Cebu.Ang tag-iya nga si Alejen Quiño Monte ug ang iyang partners nga silang Jacques Jamito ug Arch. Noah Caoile magbarkada ug mag-brod sa usa ka fraternity. Samtang si Arciaga usa ka pageant enthusiast ug titleholder sa Mrs. Cebu Lumina 2019."Nag-open mi after gyud sa super bagyong Odette pag-December 28 because we know the community needs a good place to unwind during those difficult times so we joined forces to make this happen."Ang Degrees Diner kanunay gipistahan labi na kon Biyernes ug Sabado tungod sa ilang live acoustic bands from 6 p.m. to 10 p.m. ug unli-sugba and buffet ug unli-drinks nga P278 lang."Ang unli-sugba and buffet ug unli-drinks promo is only on weekends but we also have larangan and other Filipino dishes display in front for the commuters and travelers from the North or going south nga in a hurry or those who can't make it for lunch or dinner. We are open everyday from 11 a.m. to 10 p.m.""Actually, two of the owners ga-operate pud sila og milktea which is ang Degrees Milktea. Didto gyud ko nag-start og work sa admin side. Pag-open sa Degrees Diner gibalhin ko nila and it was decided nga ako ang mo-manage. Sir Alejen is a close friend of mine and like a brother to me," asoy ni Arciaga."The word `Degrees' gikan sa ilahang brotherhood while `Diner' stands, of course, for customers who want to experience cheaper yet lamian nga foods. We also accept exclusive reservations for any occasions. We have a big parking lot, very spacious gyud."Ang ilang music festival dunay pulta nga P50 aron sa pagkontrolar sa crowd."Watch out also for our battle of the bands happening this year. All these including the feeding program is our way of saying thank you to all those who continue to patronize Degrees Diner and making us a part of your celebration."

PBA player nga bisaya midagmal sa kanhi uyab?

Posted: 13 Jul 2022 03:47 AM PDT

Mopahigayon og imbestigasyon ang Philippine Basketball Association (PBA) kabahin sa akusasyon nga pagpangabuso ni Blackwater Bossing guard Paul Desiderio ngadto sa iyang kanhi uyab nga si Agatha Uvero.Namahayag ang PBA nga dili paundayunan sa liga ang domestic abuse nga sama niini ug angay kining hatagan og seryusong atensyon.Naglaom ang PBA nga motabang ang Blackwater management sa pagsusi niining maong isyu."The league will conduct an inquiry and hand down its findings and resolution as soon as the facts are clearly established," opisyal nga pamahayag sa PBA."We are confident that Blackwater management will extend its full cooperation and assistance toward ensuring that a just determination is reached."Pinaagi sa post sa iyang Twitter account kagahapon sa buntag, Hulyo 13, 2022, gitagsa-tagsa ni Uvero ang gibuhat nga pagpangdagmal ni Desiderio ngadto kaniya.Sa iyang tweet, gipasabot ni Uvero nga dili unta siya gusto nga mopabuhagay niini apan napugos siya sa pagbuhat sa ingon gumikan kay nahulga na ang iyang kinabuhi."The league will not tolerate any form of domestic abuse. This report deserves serious attention by both the ballclub concerned and the PBA itself," dugang sa PBA.Si Desiderio, kinsa lumad nga taga Liloan, Cebu, gi-draft sa NLEX Road Warriors niadtong 2018 apan gi-trade dayon kini sa Blackwater.

Beermen mosuway pagsulod sa top 2

Posted: 13 Jul 2022 03:46 AM PDT

Mga duwa karon5:15 pm- San Miguelbatok Terrafirma7:15 pm- NorthPortbatok PhoenixSeguradong puwesto sa top two ang tinguha sa league-leader San Miguel Beermen sa ilang pagpakigbatok sa Terrafirma Dyip sa premirong duwa karong alas 5:15 sa hapon sa Philippine Basketball Association (PBA) Philippine Cup sa Araneta Coliseum.Ang Beermen kasamtangang nagsolo sa liderato dala ang 8-1 nga rekord apan nagkinahanglan pa sila og usa ka daog sa nahabilin nilang duha ka mga duwa aron segurado na silang mapaslak sa top two, nga nagtangag og twice-to-beat nga bintaha sa quarter-finals.Ning puntoha, aduna pa'y laing upat ka teams nga kompetensya ang Beermen sa inilugay sa top two."We haven't achieved nothing yet," matod ni San Miguel coach Leo Austria.Sa ilang bahin, ang Dyip adunay 0-8 nga rekord ug wala na'y purohan nga masulod sa quarter-finals.Sa main game, magsangka ang NorthPort Batang Pier ug Phoenix Super LPG Fuel Masters sugod sa alas 7:15 sa gabii.Ang duha ka teams pulos naggunit og 2-6 nga rekord.

Sugilanon: Ang babaye sulod sa barel

Posted: 13 Jul 2022 03:44 AM PDT

ALCEA MANINGOCangyan, Carmen, CebuTuig l995. Sa New Jersey, U.S.A., may napalgang patayng lawas sulod sa barel. Ang barel diha sa basement sa balay nga bag-ong gipuy-an sa bag-ong nakapalit. Mitawag sila og pulis. Duha ka police detective ang niresponde. Sila si James Carbon ug Jack Palace. Gipaeksamin nila sa medico legal ang patayng lawas. Mabdos ang maong babaye nga nag-edad og 25 ngadto sa 30. Lima ngadto sa unom ka bulan ang gisabak. Una ning angay buhaton ug gibuhat kini sa mga pulis ang pag-ila una sa biktima.Naapil sa sulod sa barel ang usa ka itom nga librito nga may mga ngalan ug numero. Gisusi sa mga pulis ang mga record sa opisina sa gobyerno kon kinsa ang mga kanhi tag-iya sa balay. Nakuha nila ang mga ngalan sa tulo ka nag-unang tag-iya. Gipang-dayal sa pulis ang mga numero sa librito. May nitubag nga Immigration Office.Gipangutana nila kon may file ba sila ni Maria Travera, ang ngalan sa librito. Duna ug nakapangayo silag kopya sa Alien Certificate of Registration nga naisyu sa tuig l965.Ilang gihangyo ang higala nilang reporter sa mantalaan nga si Robert Summer. Gimantala ni Robert ang litrato ug may hangyo nga kontakon siya sa nakaila kon kinsa ang naa sa hulagway. Sunod nilang gisusi ang nag-manufacture sa barel. May tatak ang barel sa ngalan sa kompaniya nga naghimo niini. May serial number sab. Ang maong barel gisudlan og kemikal nga gamit sa furniture factory. Base sa serial number, may record pa sila sa pabrika nga gi-deliberan sa barel. Ang tag-iya sa pabrika nga gidiliberan mao si Allan Ladder. Numero uno na siya nga suspek kay siya ang pinakaraang tag-iya sa bilding diin nakit-an ang barel.Giadto sa mga pulis ang pabrika. Gipakita sa trabahante ang litrato ni Maria. May mga senior citizen nga mga trabahante nga nahinumdom ug nakaila pa kang Maria. Nasayran sa mga pulis nga lain na ang tag-iya sa pabrika. Si Allan Ladder retirado na ug lain na og negusyo.Tiguwang na ang hitsura ni Allan Ladder sa pagbisita sa mga pulis. Niangkon siya nga 70 na iyang edad. Maayo siyang manubag sa mga pangutana sa mga pulis. Walay kanga. Niangkon siya nga nakatrabaho sa pabrika niya si Maria. Apan dangtag usa ka tuig nibalhin sa laing kompaniya, matod ni Allan. Nasakpan siyang namakak. "Kon ingnon ka namo nga nakit-an ang iyang patayng lawas sulod sa barel nga gigamit sa imong pabrika ug gitaguan sulod sa imong balay, unsa may imong ikasulti?" ni Jack. "Imposible!" ni Allan. Nangluspad siya ug wala na kaharong og tinutokay sa mga pulis. "May gisabak si Maria. Aron ma-clear ka nga di ka na suspek, mangayo mig sampol sa dugo nimo para DNA test. Ikumparar sa DNA sa bata," ni Jack."Di ko mosugot!" ni Allan nga misingka. "Mosugot kag sa dili, mokuha mig subpoena ug court order aron ang medico legal na ang mokuha og sampol gikan nimo," ni James.Dangtag lima ka adlaw mibalik ang mga pulis sa balay ni Allan. Ang asawa na ni Allan nipahibawo nila nga milakaw si Allan. Miadto kini sa iyang rest house. Wa na hiabti sa mga pulis nga buhi si Allan. Didto sa rest house gium-om niya ang sumbohan sa iyang shotgun ug gipabuto. Patay na siya nga gikuhaan og sampol. Namatud-an gyud nga siya ang amahan sa gisabak ni Maria.Niadtong 1965 immigrant si Maria gikan sa nasod sa El Salvador. Gisubay ni Robert sa El Salvador ang pamilya ni Maria. Pinaagi sa telephone directory sa mga Travera, natultulan niya ang lungsod natawhan ni Maria. Nahimamat ni Robert si Amparo Travera, 93 anyos nga biyuda. Siya ang inahan ni Maria. "Niabot ko ining edara kay naghuwat kog notisya kon unsay nahitabo kang Maria. Nagsige kog damgo nga nahulog siya sa busay ug nalumos. Karon malinawon na kong mamatay sa maong kasayuran," masulub-ong pulong ni Amparo.Sa panabang sa kaparyentehan ni Amparo, ug ni Robert, nahatagan og desenteng paglubong si Maria ug ang iyang gisabak. Dangtag usa ka bulan nasakit si Amparo ug wa na hiulii. Kinsay magdahom nga human sa 30 ka tuig gikan sa hitabo, nasulbad pa ang krimen? (KATAPUSAN)(Tugon sa tagsulat: Kining sugilanon tinuod nga hitabo ug giusab ko lang ang mga ngalan sa lugar ug tawo, gawas sa El Salvador. Gikan ni sa programa sa Cable TV nga nag-ulohan "Buried in the Backyard." Nagmatuod ni nga sagrado gyud ang tawo.)

Balak: Ang kagabhion

Posted: 13 Jul 2022 03:44 AM PDT

ARIANNE JOYCE B. ROMAGUERAEl Pardo, Boljoon, CebuMiabot na pod ang kagabhionUg ang kahayag sa bulan maoy nagdan-agSa mangitngit nga dalan sa akong kagahaponNga di ko na buot balikon pagtaak.Ang sidlak sa mga bituon may gahomNga mituboy sa akong panan-awSa kapunawpunawan naghatag nakogKaisog nga mopadayon sa panawSa akong kinabuhi.Dili ko na lang balihon ang isbaw sa gutomNga mga iro sa gawas sa dalan.Wala silay kaikag sa pagkab-ot sa maayong palad.Apan ang ilang luoy nga agungoy mikulikotSa kinauyokan sa akong kasingkasingNagsilbing diwanag nga ugma damlagMakab-ot ko ra ang akong gipangandoy.

Balak: Musika (Kang Jazzer ug Ziam)

Posted: 13 Jul 2022 03:37 AM PDT

MARCELO T. DANO, JR.Abuno, Pajac, Lapu-Lapu City, Cebu Kon balibaran ang imong mga kamotsa lapis, kambas, ug brutsaang abugong gitaranga anaa sa daplindili gayud modumiliniini.Maghuwat kini sa imong gakosug sa imong gagmayng mga tudlonga maoy mokaskas sa kuwerdasaron pakantahon ang kalibutan.

Lalake napalgan'g patay daplin sa dan

Posted: 12 Jul 2022 08:02 PM PDT

Patay na nga napalgan ang usa ka lalake nga nagbuy-od daplin sa dan Don Gil Garcia, Barangay Capitol Site, siyudad sa Sugbo pasado alas 12 sa tungang gabii sa Miyerkules, Hulyo 13, 2022.Sa pagsusi sa mga kawani sa Emergency Medical Services nga miresponde, wala nay pulso ang biktima nga si Erwin Capili, 23 anyos og taga B. Rodriguez Street, Barangay Sambag 2.Ang kapuyo sa biktima nga si Mary Rose Vitualla, 22, niingon nga alas 7 pa sa gabii nilakaw ang iyang pares aron mangita ug ikapanihapon sa ilang anak apan wala na kini mahibalik.Matud Master Sergeant Jeptha Jumawan, hepe sa Abellana Police Station 2, nga wala gyuy nakabantay mahitungod sa kamatayon sa biktima sa maong lugar gumikan sa bunok sa uwan.Nagtuo ang kapulisan nga nakuryentehan ang biktima tungod sa kalo nga ilang napalgan nga nasangit sa wire sa kuryente nga ilang gituohan nga iya sa biktima.Gidudahan nila ni Jumawan nga nikatkat sa puno-an sa kahoy si Capili nga duol sa linya sa kurente apan nahulog og nasabod sa wire hinungdan nga nakuryentehan. (BBT)

Editoryal: Pag-postpone sa BSKE

Posted: 12 Jul 2022 06:53 AM PDT

Gikataho nga ang kagamhanan nigahin og P8.6 bilyunes alang sa pagpahigayon sa Barangay ug Sangguniang Kabataan Elections (BSKE) karong Disyembre 5, 2022. Ang Commission on Elections (Comelec) nangandam na. Gani, nagpadayon ang ilang rehistrasyon sa mga botante sugod sa Hulyo 4 ngadto sa 23, 2022.Apan pipila ka mga kongresista, usa si Cebu City North District Rep. Rachel Marguerite 'Cutie' del Mar, niduso og petisyon sa pag-oktaba sa piniliay ning tuiga ngadto sa sunod tuig. Ilang komon nga rason mao nga makadaginot ug kini magasto alang sa nagpadayong pandemiya sa Covid-19. Si del Mar nagkanayon nga padayong mabahinbahin ang katawhan tungod sa bag-ong mainit nga nasudnon ug lokal nga piniliay sa Mayo 9, 2022. Dili ba normal kini sa pulitika?Samtang, si Atty. Michael Sarno, election officer sa Cebu City North District, gikutlo sa taho sa SunStar Cebu niadtong Lunes, Hulyo 11, 2022, nga ang kagamhanan dili makadaginot og dakong kantidad pinaagi sa pag-postpone sa BSKE, sukwahi sa gipamahayag o rason sa mga magbabalaud.Matod ni Sarno, ang Comelec nakapagawas na og igong salapi gikan sa pundo sa BSKE sama sa rehistrasyon ug ubang pagpangandam sa ahensiya. Dugang niya, gamay ang madaginot sa pag-oktaba sa eleksiyon, labina kon ang Kongreso dugay mohukom pabor niini.Gawas sa giasoy ni Sarno, daghang opisyal sa barangay ang nalugwayan sa ilang termino human makadaghan kini na-postpone. Nabalda ang eleksiyon sa labing ubos nga ang-ang sa organisayon sa kagamhanan. Ang gikatakdang BSKE sa Disyembre ning tuiga maoy mopahiuli sa normal nga proseso sa ilang termino subay sa Local Government Code.Ang Comelec andam na sa eleksiyon. Pro-active taliwala sa hugonhugon sa pag-oktaba. Dugang pa, ang bag-ong mandato sa mga opisyal mopalig-on sa pagsalig sa katawhan sa kapasidad ug abilidad sa liderato sa barangay.Nganong baldahon ang eleksiyon? May laing motibo kaha?

Diputado: Ang plastic nga kwarta

Posted: 12 Jul 2022 06:53 AM PDT

Sugod sa Abril ning tuiga, nagpagawas ang Bangko Sentral ng Pilipinas (BSP) og plastic o polymer nga kwarta nga tag-P1,000.Unsa man kining polymer nga kwarta? Ang polymer usa ka tin-aw ug nipis nga plastic nga mas lig-on pa sa papel.Kini, matod pa, mas lig-on pa sa papel, maoy nag-una sa mga hinungdan ngano nga migamit ang BSP sa polymer para sa bag-o nga papel-de-bangko.Pero dunay daghang mga problema ang plastic nga kwarta.* * *Sumala sa mga basehan sa pag-amping sa maong kwarta gikan sa BSP, migawas nga hilabihan ka delikado ang maong kwarta.Daghang mga gidili ang maong kwarta, sukwahi sa kwarta nga papel. Daghan ka og mahimong buhaton sa kwarta nga papel nga dili nimo mahimong buhaton sa kwarta nga plastic.Pananglit, dili mahimo nga ipilo ang plastic nga kwarta. Dili pwede mahugawan, dili mahimo nga dunay mga kunotkunot ug uban pa.Makalibog kaayo kini kay imbes giingon nga mas lig-on ang polymer nga kwarta, hilabihan man pod diay ka delikado ug mas delikado pa kay sa kwarta nga hinimo sa papel.* * *Kon tumanon ang mga lagda sa BSP sa pag-amping sa plastic nga kwarta, mogawas nga hilabihan kini ka lisod buhaton.Nganong lisudlisoron man gyod sa BSP ang mga mogamit sa plastic nga kwarta?Wala ba diay nila kini tun-i og maayo kon unsa ang epekto sa paggamit sa maong kwarta, ilabi na sa yanong mga tawo nga wala maanad og gamit sa dako nga pitaka, labi na kadtong naanad lang og gamit sa inirola o karaang bag?Di ba kataw-anan ang silot nga ipahamtang sa mga tawo nga mopilo sa maong kwarta?Kinsa may mohukom kon pwede pa magamit o dili na pwede magamit ang plastic nga kwarta ilabi na kon daghan na ang migunit niini?Kon ingon ana ka delikado ang maong kwarta, kinsa pa may ganahan mohupot, mogamit o modawat sa maong kwarta?Di ba kaha molikay na lang ang mga tawo sa pagdawat sa maong kwarta ug mopili na lang sila sa tag P500 nga kwartang papel?Kon mahitabo kini sa tibuok nasod ug dyotay na lang sa mga katawhan ang mogamit sa plastic nga kwarta, dili ba dakong usik-usik kini sa kwarta sa katawhan?Ang nakapait ra ba kay nagplano na sab ang BSP nga gamiton na ang polymer sa ubang mga kantidad sama sa P500, P100, P50 ug P20.Di ba kaha makadugang lang sa kagubot sa tanang transaksiyon kon buhaton gyod kini sa BSP?Nganong dili man mohimo ang BSP og dugang pagtuon kon husto ba gyod nga pulihan ang papel nga kwarta ngadto sa plastic nga kwarta?* * *Mas maayo pod unta nga iapil sa pagtuon ang epekto sa mga transaksiyon gamit ang polymer nga kwarta sa aktuwal gyod nga panghitabo sama sa mga transaksiyon didto sa merkado nga nagbaligya og isda, karne ug utanon.Lisod kaayo kini kay di na pwede dawaton ang plastic nga kwarta sa basa og kamot. Magsigi na lang og panarapo ang nagbaligya kada dawat sa kwarta? Di ba langan kaayo kini alang kanila? Kon dili dawaton sa mga malls o department store ang kwarta, unsa may angay buhaton?

Barrita: Paglugway sa termino sa mga opisyal

Posted: 12 Jul 2022 06:52 AM PDT

Ubos sa 1987 Constitution, ang presidente sa Pilipinas gihatagan og usa lang ka termino nga unom ka tuig. Way reelection. Sama sa presidente, ang bise presidente adunay unom ka tuig nga termino. Apan dunay reelection sa bise presidente alang sa laing unom ka tuig.Subay kini sa Section 4, Article VII nga nagkanayon, "The President and the Vice-President shall be elected by direct vote of the people for a term of six years which shall begin at noon on the thirtieth day of June next following the day of the election and shall end at noon of the same date, six years thereafter. The President shall not be eligible for any re-election. No person who has succeeded as President and has served as such for more than four years shall be qualified for election to the same office at any time. No Vice-President shall serve for more than two successive terms."Ang 24 ka mga senador adunay unom ka tuig nga termino ug mahimo silang magpasubli. Apan ulhos-ulhos kay 12 ra man ka senador ang pilion sa matag tulo ka tuig. Samtang magpili kita sa 12 ka mga senador, dunay laing 12 ka senador nga may nahabilin pang tulo ka tuig sa ilang termino.Ang mga kongresista ug ubang mga lokal nga opisyal adunay termino nga tulo ka tuig sa tulo ka sunodsunod nga termino. Apan mausab kini kon matuman ang resolusyon nga gipasaka ni Pampanga Rep. Aurelio 'Dong' Gonzales Jr. nga mag-amendar sa Konstitusyon aron lugwayan ang termino sa mga piniling opisyal.Ubos sa giproponer nga House Resolution No. 1 ni Gonzales, paubsan ang termino sa presidente ug bise presidente gikan sa unom ngadto sa lima ka tuig apan dunay usa ka reelection sa laing lima ka tuig. Gikan sa unom ka tuig, mahimo nang napulo.Giduso usab ni Gonzales ang paglugway sa termino sa mga kongresista ug lokal nga mga opisyal, way labot ang mga opisyales sa barangay. Imbis tulo ka tuig nga termino sa tulo ka sunodsunod nga termino, himuon kining lima ka tuig nga termino sa duha ka sunodsunod nga termino. Gikan sa siyam, gihimong napulo ka tuig.Ang pangutana mao nga makapahimulos ba niini ang mga incumbent nga mga opisyal sama ni Presidente Ferdinand 'Bongbong' Marcos Jr.? Si Gonzales miingon nga bisan kon maaprobahan ang iyang resolusyon ug maamendahan ang konstitusyon, di na makabenepisyo ang Presidente.Di sab makapahimus ang mga incumbent nga mga kongresista ug mga lokal nga opisyales nga anaa na sa ikatulo ug katapusang termino. Kini tungod kay gisukip ang usa ka probisyon nga magdili sa incumbent ug kanhi presidente sa pagpasubli ug bisan sa pagdagan sa laing puwesto.Apan kon masugdan na ang pag-amendar sa Batakang Balaod, kinsay nasayod kon unsay buhaton sa atong mga magbabalaod nga gustong mopilit ug magpabilin sa gahom ug puwesto? - edbarrita@gmail.com

Talk to Papa Joe: Gustong magminyo

Posted: 12 Jul 2022 06:45 AM PDT

Dear Papa Joe,Ako diay si Christy, taga Bohol, pero naa ko karon sa Cebu nag work sa panimalay. 18 anyos na ko ug mag 19 na next month.Ang akong suliran kabahin sa akong uyab. Mga six months na mi ani niya ug karon nanghagad siya nga magminyo na daw mi kay naa man sad siya trabaho sa construction. Mao ni siya akong patambagan kon angay ba ko mosanong niya or dili? Palihug tambagi ko.CHRISTYChristy,Para nako, Day, sayo pa kaayo ug sa akong pagpanambag kasagaran nga problema sa relasyon kay kanang sayo kaayo nisulod ana nga di diay andam, labi na sa gastuhon kon magkaanak na. Di man sa ubos nga panglantaw pero tigumi sa ninyo para makapundar mo og laing pangitaan og income. Di lalim karon kay grabe ang pagsaka sa presyo sa mga palaliton ug pandemic pa nga pwede maka apektar sa trabaho nga di regular.Pero di man tanan nuon nga nagminyo og sayo magka problema. Naa man say successful pero kasagaran mosangko sa di panagsabot ug buwag.PAPA JOE(sa inyong tampo ipadala lang sa papajoesuperb@gmail.com)

Lapu-Lapu adunay ‘Libreng Sakay’

Posted: 12 Jul 2022 06:45 AM PDT

Si Lapu-Lapu City Mayor Junard Chan nipasiugda og 'Libreng Sakay' alang sa mga commuter sa dakbayan.Kini gihimo sa katuyoan nga makadaginot ang mga pasahero sa ilang plitehan ilabi na sa nagpadayong pagsaka sa presyo sa gasolina.Nasabtan ni Chan nga adunay mga commuter nga mosakripisyo nga dili na mo-adto sa dapit diin aduna silay tuyo aron lang makadaginot sa gasto o plete sakay sa public utility vehicles.Ang kagamhanan nipadagan og lima ka mga coaster bus alang sa maong 'Libreng Sakay' nga magbiyahian sa kadalanan sa Lapu-Lapu City."Way gipili nga pasakyon sa maong buses. Apan gikinahanglan nga dili mag-overloading ang matag bus," post sa mayor sa Junard 'Ahong Chan Facebook page.Gipahibawo ang mga commuter nga mag-atang lang sa kalsada kay magbahasbahas ra sa kadalanan ang maong mga bus. (FVQ, Facebook ni Junard 'Ahong' Chan)

Metro Cebu Expressway gipasiguro sa DPWH

Posted: 12 Jul 2022 06:42 AM PDT

Ang Metro Cebu Expressway (MCE) usa sa mga prayoridad sa Department of Public Works and Highways (DPWH) ubos sa administrasyon ni Presidente Ferdinand Marcos Jr. nga ipaubos sa public-private-partnership (PPP).Kini base sa bulletin nga napatik sa website sa DPWH ubos sa pagdumala ni Secretary Manuel Bonoan kauban ang laing 12 ka mga infrastructure project sa tibuok nasod nga maoy giplanohan nga ipatuman sa bag-ong administrasyon.Una niini, si kanhi DPWH 7 Regional Director Edgar Tabacon niadtong Mayo nipadayag nga aron mapaspasan ang katukoran sa 72 kilometros nga expressway nga magsumpay sa City of Naga sa south ug Danao City sa north, kinahanglan nga mosulod ang pribadong sector o pundo gikan sa langyaw nga nasod.Matod sa kanhi DPWH-7 regional director nga kon ang orihinal nga sistema maoy subayon, maabtan pa og 17 ka mga tuig una pa mahuman ang segment three sa MCE gumikan sa langay nga pagpagawas sa pundo.Ang MCE gibahin sa tulo ka segments. Ang segment 1 ug 2 nanukad gikan sa Danao paingon sa Talisay City ug ang segment 3 nga kasamtangang gitrabaho sa pagkakaron, molahos sa dakbayan sa Naga.Ang segment 3 nga adunay 17.15 kilometros ang gilay-on, mogasto og P4.5 bilyones gikan sa National Government apan P1.3 bilyones pa ang na-release sa nakalabay nga lima ka tuig kun P260 milyones matag tuig.Ang kinatibuk-ang MCE mogasto og P28 bilyones alang sa 73 kilometros nga kalsada, diin mapamub-an ang oras sa biyahe sa mga sakyanan gikan sa tulo ka oras ngadto na lang sa usa ka oras.

CCLEX pabutangan og ‘Bisita Center’

Posted: 12 Jul 2022 06:42 AM PDT

Good news alang niadtong mahiligon og selfie o groufie sa nabantog nga Cebu-Cordova Link Expressway (CCLEX), butangan kini og 'Bisita Center' sa dili pa matapos ang tuig.Kini maoy pahibawo sa presidente ug general manager sa CCLEX Corporation Allan Alfon sa tinguhang mobutang og 'bisita center' o vista points."It is already on the drawing table for the possible location of the bisita centers... A nice platform where good photo angles can be taken towards Cebu City and Cordova," matod pa ni Alfon.Sayod sila nga aduna gihapoy mga motorista nga tuyo mohunong sa emergency parking sa maong tulay aron lang nga mokuha og hulagway.Giklaro ni Alfon nga wa nila gitugotan ang mga motorista sa paghunong tungod sa 'safety reason' hinungdan nga ila kining badlungon ug way pagpanakop ang ilang gihimo.Gipahibawo sa opisyal nga ang CCLEX management nagpaabot sa ilang patrol officers nga hingpit ma-deputized sa Land Transportation Office aron nga ilang mapatuman ang traffic rules diha sa tulay.ABLIHANLakip sa gipahibawo ni Alfon ang pag-abli sa Pilipog-Gabi Coastal Road project sa Lungsod sa Cordova nga gikatakda karong hinapos nga bahin sa buwan sa Hulyo.Sa maong paagi kalugakan ang trapiko sa maong area nga gihulagway nga 'choke points' nga nagsilbing exit sa CCLEX.Butangan sab og closed-circuit television camera sa matag dos kilometro nga gilay-on sa expressway alang sa security ug monitoring.Samtang ang CCLEX patrol officers magbantay sud sa 24 oras matag adlaw aron pagsiguro sa kaluwasan sa mga motorista.CASHLESS PAYMENTGibutyag sab ni Alfon nga moabot na ngadto sa 90,000 ka mga motorista ang nakaparehistro sa radio frequency identification (RFID) system alang sa cash-less nga transaksiyon sa higayon nga mogamit sa CCLEX.Sa 90,000 nga nakaparehistro, 70,000 niini ang nataoran na og RFID stickers sa ilang mga sakyanan.Nanghinaot si Alfon nga madugangan pa ang mga motorista nga mokuha sa RFID system alang sa mas sayon ug paspas sa higayon nga mogamit sa CCLEX.Anaa pa sa soft opening status ang 8.9-kilometro nga expressway diin aduna pay lanes nga kasamtangan sirado tungod sa nagpadayon nga pag-ayo nini.Gipanglantawan nga moabot sa 30,000 ngadto na sa 40,000 ka mga sakyanan nga mosubay sa expressway matag adlaw sa higayon nga kini fully operational. (Dugang taho ni FVQ)

Dumanjug motukod og ‘Pablo Garcia govt. center’

Posted: 12 Jul 2022 06:42 AM PDT

Government center tukoron sa Lungsod sa Dumanjug, Sugbo agi og pasidungog ngadto sa kanhi gobernador ug kongresista nga si Pablo 'Pabling' Garcia.Gipahibawo ni Dumanjug Mayor Efren "Gungun" Gica sa mga tigbalita nga nakakuha na sila og approval sa Kagamhanan sa Probinsya sa Sugbo alang sa pundo nga magamit sa bag-ong government center sa lungsod.Ang maong government center magsilbing one-stop-shop alang sa tanang government transactions, lakip na ang ubang buhatan sa munisipyo ug concerned government agencies.Matod ni Gica nga pasiunang gipakita ug gipahibawo niya ang inisyal nga mga detalye sa maong proposal ngadto kang Cebu Governor Gwendolyn Garcia atol sa tigum niadtong sa Hulyo 11, 2022."Ang lungsod maoy nagplano maghimo unya si Governor Gwen maoy... sa akong pagsabot siya maoy mogasto o mo-fund sa maong building," asoy ni Gica sa Hulyo 12, 2022 atol sa pakighinabi sa mga tigbalita.Kon magsugod na ang pagpabarog sa maong edipisyo, nganlan kini og Pablo Paras Garcia Building, pasidungog sa Dumanjuganong kanhi gobernador sa Sugbo."This is in honor of our late congressman and former governor, Pabling," matod ni Gica.Giingong niadto pang 2017 kini giplanong tukuron apan na realign ang pundo nga gigahin sa maong katuyoan gumikan sa nasinating krisis ug kalamidad sa Sugbo."But tungod every year, mag allocate ta og funds pero marealign tungod sa mga circumstances... Mao nang nidoul ko (sa Capitol) kay apiki sa budget ang Dumanjug tungod sa mga pagsuway - Odette ug sa pandemic, di kaya sa lungsod," sigun pa ni Gica.Ang maong proyekto gilantaw nga tukoron sa Barangay Poblacion, duol sa Dumanjug Police Station.Gipanglantawan nga mahimo kining tulo ka andana nga may gilapdon nga 1,800 square meters ang matag andana.Gipasabot ni Gica nga padayon pa niining gisusi ang kantidad sa pundo nga igahin alang sa maong proyekto."Nag coordinate pa mi sa Provincial Engineering para sa paghimo ug pag-finalize sa plano. Ang among gi present (kang Gov. Garcia), was only a perspective and floor plan," dugang niya.

Pagbuak sa 1st district usa sa mga prayoridad nga balaudnon ni Kong. Gullas

Posted: 12 Jul 2022 06:38 AM PDT

Ang pagbuak ngadto sa duha ka mga distrito sa 1st district sa lalawigan sa Sugbo usa sa mga prayoridad ni Rep. Rhea Gullas ning iyang unang termino.Ang pagbuak sa distrito usa sa walo ka mga balaudnon nga iyang giduso ngadto sa Kongreso.Naglaraw ang bag-ong kongresista sa unang distrito nga sa iyang unang termino matuman ang pagbuak ngadto sa duha sa distrito.Una nang ni-file si kanhi Kongresista Eduardo Gullas niadtong Oktubre 14, 2021 sa House Bill 10385 alang sa pagbuak sa first district, apan wa na kini natuki sa Ubos Balay Balauranan kay wa nay panahon.Kon mabuak ang unang distrito, mag-uban ang Talisay City ug Minglanilla samtang laing distrito sab ang dakbayan sa Naga, dakbayan sa Carcar, San Fernando ug Sibonga.Ang kanhi kongresista nitumbok sa 809,335 nga populasiyon sa first district nga dako na kaayo busa wa kaayo marepresentahi.Ang unang distrito maoy labing dako nga distrito sa Probinsiya sa Sugbo.Matud ni Kong. Rhea nga mas sayon sa usa ka kongresista ang paghatag og serbisyo sa katawhan kon duha na ang distrito.Gipasabot sa bag-ong kongresista nga dili nila biyaan ang lahi nga distrito bisan kon mabuak na, inay sila magtambayayong sa pagdumala.Samtang ang iyang bana nga si Talisay City Mayor Gerald Anthony "Samsam" Gullas nipadayag usab sa iyang suporta sa balaudnon.Nipasabot ang mayor nga dihang siya pa ang representante sa unang distrito, iyang nakita ang kalapad sa iyang giserbisyuhan.Dinhi iyang nakita ang panginahanglan sa pagbuak na sa first district.Kini nga lakang gisuportahan niadto pa ni City of Naga Mayor Valdemar Chiong.

Mga komitiba gibahig sa Konseho sa Talisay

Posted: 12 Jul 2022 05:22 AM PDT

Sa inaugural ug unang sesyon sa Konseho sa dakbayan sa Talisay sa Martes, Hulyo 12, 2022, nga gipangulohan ni Bise Mayor Richard Francis "Choy" Aznar, gibahig gilayon sa mga konsehal ang mga komitiba.Ang ikawalo nga Sangguniang Panlungsod nipili kang Konsehal Gail Restauro nga majority floor leader ug chairman sa committee on peace and order.Samtang ila usab nga gipangpili ang mga mohupot sa nagkalainlaing committee chairmanships.Si Konsehal Eduardo Gullas III maoy chairman sa committee on education ug trade, commerce and industry; Konsehal Manuel Cabriana maoy chairman sa committee on market and slaughter house ug good governance and public ethics; Konsehal Roduflo Cabigas maoy chairman sa committee on infrastructure ; Konsehal Arlito Bacaltos maoy chairman sa committee on environment; ug si Konsehal Ofelia Ylanan mao usab ang mangu sa committee on women and children.Samtang si Konsehal Danny Caballero maoy chairman sa committee on traffic ug disaster resilience; Konsehal Ferdie Rabaya maoy chairman sa committee on sanitation ug ways and means; Konsehal Rocky Bas maoy moduma sa committee on laws samtang si Konsehal Lester Daan maoy chairman sa committee on culture and arts.Si Aznar, sa iyang mensahe, niingon nga silang tanan maningkamot nga ang ilang mga resolusyon ug ordinansa mahaom sa mga programa sa executive department.Samtang si Mayor Gerald Anthony "Samsam" Gullas, kinsa niatubang sa Konseho, niingon nga lisod alang kaniya ang pagpatuman sa mga programa sa Siyudad kon way suporta sa Konseho.Iyang gikalipay nga ang mga konsehal iyang mga kaalyado.Nauyonan sa mga konsehal ang pagpasar sa resolusyon alang sa paghatag og libreng hospitalization hangtud sa ayuda sa paglubong sa mga Talisaynon."We will show the Talisaynon that we are worthy of their votes. We are worthy of their trust and let's make everyday count, let's make every session count," matod ni Gullas sa iyang mensahe atubangan sa Konseho.

Kapin sa 41K nakaparehistro na alang sa SK, barangay elections sa Sugbo

Posted: 12 Jul 2022 05:20 AM PDT

Moabot sa 41, 421 na ang nalista sa Commission on ElectionS (Comelec) Province nga nakaparehistro sa unang semana sa voters registration gikan sa Hulyo 4 hangtod sa Hulyo 9, 2022.Sa datos sa Comelec, 1,975 niini gikan sa dakbayan sa Lapu-Lapu samtang 7, 562 sa dakbayan sa Sugbo.Gipahibawo sa buhatan nga 21, 578 ka mga babaye ang kompletong nakaparehistro samtang 19, 843 usab sa mga lalaki.Ang Comelec Cebu Province nibukas sa mga satellite registration areas sa 16 ka mga lokalidad sa Lalawigan sa Sugbo.Tuyo niini nga makaparehistro ang mga batan-on alang sa gipaabot nga Disyembre 5 nga barangay ug Sangguniang Kabataan (SK) elections.Nanghinaot ang Comelec nga dili na mohuwat pa ang mga Sugboanon sa Hulyo 23 nga maoy deadline sa pagparehistro aron makabotar sa umaabot nga eleksyon.Hinuon, dunay mga balaudnon karon nga giduso ngadto sa Ubos Balay Balauranan alang sa pag-uswag sa barangay elections tungod kay giingong dako kini og galastuhan samtang bag-o pa nahuman ang nasudnong piniliay.Usa sa niduso mao si Cebu City north dist. Rep. Rachel Marguerite del Mar.

Habalhabal drayber napasok sa trak; DOA sa tambalanan

Posted: 12 Jul 2022 05:17 AM PDT

Habalhabal driver namatay human napasok ilawom sa truck dihang nadasmagan alas 10:25 sa buntag sa Martes, Hulyo 12, 2022 sa national highway sa Brgy. Linao-Lipata, lungsod sa Minglanilla, habagatang Sugbo.Ang biktima giilang si Jose Remar Libre, 33, dunay kapuyo, taga Sitio Abuno, Brgy. Tunghaan, Minglanilla. Si Libre dead on arrival (DOA) sa tambalanan tungod sa grabeng kadaut sa iyang lawas.Gitanggong si Roger Labaya Unabia, 38, minyo, taga Brgy. Tunghaan, Minglanilla, driver sa bulk truck (NAJ 1412).Si Police Staff Sgt. Junyl Ater, sa Minglanilla Police Station nga nahinabi sa Superbalita Cebu, nagkanayon nga ang bulk truck paingon sa dakbayan sa Sugbo nga gisundan ni Libre, kinsa nagmaneho sa iyang 125 Mio.Kalit lang niyang nadasmagan si Libre, kinsa matod niya wa niya makit-i.Ang biktima uban sa iyang motorsiklo napasok sa atubangan sa bulk truck hinungdan sa hinalaling kamatayon.Matod ni Ater nga nangatarungan si Unabia nga lugapak ra ang iyang nadunggan kay wa siya nakakita kang Libre.Ang ubang mga motorista mao nay nipahibawo nga dunay tawo ug motorsiklo nga napasok sa ilawom sa iyang sakyanan.Nagtuo si Unabia nga nisuway paglusot si Libre, apan nasangit kini sa iyang gimanehong trak.Si Unabia nibutyag nga padulong sila sa dakbayan sa Danao maghatud sa mga abo sa carbon.Siya boluntaryong nitahan sa kapulisan human sa hitabo.Giandam na ang kasong reckless imprudence resulting to homicide and damage to property batok kang Unabia.Sa pagsuwat ning taho, wa pa nipatim-aw sa Minglanilla police ang pamilya ni Libre.

Talisay labing taas og mga kaso sa dengue sa lalawigan sa Sugbo

Posted: 12 Jul 2022 05:17 AM PDT

Dakbayan sa Talisay nagpabilin nga nag-una sa labing daghan og mga kaso sa dengue sa tibuok probinsiya sa Sugbo.Apan bisan pa niini, ang pangu sa City Healh Office Dr. Lino Alanzado nibutyag nga di na alarming ang mga kaso karong semanaha.Matud niya nga ningkunhod o menos na ang aktibong mga kaso sa dengue.Giklaro lang ni Alanzado nga nikunhod man ang mga kaso sa dengue, apan di pa angay nga molugak sa kampanya batok sa makamatay nga sakit nga dala sa mga lamok.Matud pa ni Alanzado nga padayon lang gihapon ang ilang misting sa mga barangay.Sa listahan sa Talisay City Health Office sugod sa Enero hangtud sa Hulyo 2 ning tuiga, dunay natala ang Talisay nga 394 ka mga kaso sa dengue, upat niini nangamatay.Gisundan ang Talisay sa lungsod sa Minglanilla nga adunay 253 ka mga kaso, upat usab ang nangamatay.Samtang ang dakbayan sa Danao maoy ikatulo nga adunay 238 ka mga kaso, duha ang natala nga nangamatay.Ang dakbayan sa Naga maoy nabutang sa top 7, adunay natala nga 128, duha ang nangamatay.Human sa pagminos sa mga kaso sa coronavirus disease 2019 (Covid-19), ang hulga sa dengue fever mao ang mipuli tungod sa pagsulbong sa daghang mga kaso, diin ang ubang mga dapit nakasinati og sobra sa 100 porsyento nga pagsaka.Ang mga local government unit nangu sa kampanya batok sa dengue nga dala sa lamok.

Kapulisan gimandoan sa pakig-alayon sa mga mayor

Posted: 12 Jul 2022 05:14 AM PDT

Camp Crame nimando sa tanang police offices sa paghingusog sa kampanya batok sa illegal nga drugas ug aron taas ang conviction rate sa mga gipangkiha sa korte, kinahanglan makig alayon sila sa local chief executives aron makatabang sa pagpirma sa inventory.Si Police Major General Valeriano de Leon, hepe sa Directorate for Operations sa Camp Crame, niingon nga gikinahanglan kini aron mapalig-on pa ang ilang kampanya batok sa illegal drugs.Gitinguha nila nga lig-on ang kaso nga ilang isang-at sa korte batok sa mga madakpan nga drug personalities pinaagi sa abag sa local officials.Matod ni de Leon nga ilang sundon ang gihimo sa siyudad sa Mandaluyong diin taas ang conviction rate tungod kay adunay mga city official nga gitahasan sa mayor nga mouban gyud sa anti-illegal drug operation."We have to replicate what our Secretary of the Interior and Local Government, Atty. Benjamin "Benhur" Abalos, mentioned about the high conviction rate in the City of Mandaluyong," matod ni de Leon.Si Police Lieutenant Colonel Maria Theresa Macatangay, information officer sa Cebu City Police Office (CCPO), nagkanayon nga wa pa silay datus nga gihuptan sa pagkakaron kon pila ka porsiento ang conviction rate sa ilang gipangkiha sanglit ang korte lang ang adunay record niini.Apan iyang gipasigarbo nga ning tuiga, 976 ka drug personalities ang napasakaan og kaso sa piskaliya ug way bisan usa nga gi dismiss sa pikal sanglit malampuson kini nga nasang-at sa korte.Iyang gipasabot nga nag-amping ang mga personnel sa CCPO nga dili masangit sa prosecutor's office ang kaso.Kasagaran sa ma dismiss mao kadtong wala masunod ang proseso ug tungod niini, mamahimong makiha ang mga pulis nga nidakop sa drug suspect."If we are to find that the concerned investigator is negligent on his part to follow the procedure laid down by the rules and the law ,naa gyud nay pre charge nga ma file against sa iyaha, " matod ni Macatangay.Maayo usab ang relasyon sa mga opisyal sa barangay sanglit sa panahon sa ilang anti-illegal drug operations, naa kini kanunay mosuporta kanila sama sa pagpirma sa inventory sa nakuha nga mga ebedensya uban sa mga sakop sa media.Gipasabot ni Macatangay nga dako og papel sa pagtuman sa procedure ang presensya sa barangay officials ug media sanglit sila ang mokompirmar nga tinuod ang nakuha nila nga mga ebedensya."The law requires especially during the conduct of operations mahitungod sa illegal drugs nga mag witness ang mga local government official sa inventory nga pagabuhaton, whatever nga ma-confiscate na illegal drugs in any particular place of operation," dugang ni Macatangay.

Balay-Balay, Tubig-Tubig: Paspas, barato nga proseso sa adoption

Posted: 12 Jul 2022 04:54 AM PDT

Dear Atty. JoanMaayong adlaw. Ako si Louie, 18. Gisagop ako sa usa ka magtiayon sa Barangay San Antonio sa Cebu City sukad niadtong nag-edad pa ko og 10 anyos.Bisan hagbay ra nga giplanuhan ang pagproseso sa akong adoption papers, nalangay kini tungod sa kalisod ug gasto usab sa tambal ni mama. Nasuwertehan lang nga nakalugar mi sa miaging 2019 ug naka-file sa petisyon alang sa akong adoption.Apan niabot ang pandemiya sa Covid-19 sa 2020, nadunggan namo ning bag-o nga Adoption Law.Attorney, kung unsa bay maayong buhaton para mapasayon ang proseso sa akong adoption.Daghang salamat!Imong magtatampo,LouieDear Louie,Maayong adlaw sad kanimo, Louie, ug salamat sa imong pangutana.Dunay bag-ong balaud nga mopasayon sa proseso sa adoption nga dili na kinahanglan og korte. Kini ang Republic Act 11642 o ang Domestic Administrative Adoption and Alternative Care Act nga nagtumong nga mopa-simple ug mopabarato sa adoption proceedings nga adto na sa Regional Alternative Child Care Office (RACCO) ubos sa Department of Social Welfare and Development (DSWD).Ubos sa bag-o nga balaud sa adoption, kadtong mga pending nga kaso sa korte mahimo na nga bakwion (withdraw) ang ingon, aron adto iproseso na sa RACCO.Ang mga dokumentong gilakip sa miagi nga petisyon kay maayo ra gamiton usab sama sa child care plan, kasulatan sa pagtugot angay sa adoption, dokumento para sa pinansyal nga kapasidad ug uban pa.Ania kita karon sa transisyon sa pagpatuman sa maong balaud, apan mahimo na nga duolon ang maong opisina aron maproseso ang imong adoption.Gi-target sa mao nga balaud nga momubo ug mahimong mas paspas na ang proseso sa adoption.Pwede ninyo nga konsultahon ang inyong abogado sa adoption sa korte aron sa inyong posible nga kapilian nga mahitabo sa imong pending nga adoption.Daghang salamat Louie ug hinaut nga nakatabang kami kanimo nga mapadali ang imong adoption process.Imong alagad,Atty. Joan

Aboitiz Group milusad og programa alang sa livelihood

Posted: 12 Jul 2022 04:51 AM PDT

Ang corporate social responsibility arm sa Aboitiz Group, Aboitiz Foundation, uban sa Visayan Electric ug RAFI Micro-finance, Inc. (RAFI MFI) nagtanyag og dugang livelihood opportunities alang sa pagpapaspas sa kalamboan sa agro-entrepreneurs nga naghimo sa backyard farming isip kabahin sa kampanya sa grupo nga #RebuildCebu.Ang Livelihood Recovery Program gitumong sa pagsugod sa operasyon sa ilang negosyo ug pagpahiuli gikan sa pagkaalkanse tungod sa pagkuso-kuso sa bagyong Odette niadtong Disyembre 16, 2021. Halapad ang kadaut sa mga umahan human gipangharos sa bagyo ang dakong bahin sa Kabisay-an ug Mindanao.Ang proyekto mohatag sa agro-entrepreneurs o mag-uuma sa pag-ayuda sa ilang kita, pagdugang sa kapasidad sa micro, small and medium enterprises (MSMEs) pinaagi sa pagbansay ug suporta nga teknikal aron makakuha sa tabang pinansiyal o puhonan."These commitments are anchored on our belief that the advancement of business and communities is integral to the development of our society and our country. Together with our business units, Aboitiz Foundation will accelerate our efforts and resources to drive change for a better world by co-creating communities that are resilient, empowered, and sustainable," matod ni Aboitiz Foundation President ug COO Maribeth Marasigan.Samtang, ang Visayan Electric mosuporta, mopahiluna ug mopatuman sa mga programa nga nasabotan aron pagpataas sa panginabuhi sa ilang kliyente ug mga benepisaryo nga organisasyon."The livelihood projects that we are giving to cooperatives and organizations are fitting because it is our way of showing them that while we care about the business of keeping the lights on, we also care about giving them the opportunity to rebuild their lives. Truly, this is advancing business and communities in action," matod ni Visayan Electric President Engr. Raul Lucero.Ang RAFI MFI nalambigit sa komprehensibo nga pinansiyal ug non-financial nga serbisyo sa Micro and Small Entrepreneurs. Kini dunay operasyon sa lalawigan sa Sugbo, Bohol, Leyte, Southern Leyte, Biliran, Northern Samar, Western Samar, Negros Oriental, Negros Occidental, Siquijor, Panay, Sorsogon, Camarines, CARAGA region, Misamis Oriental ug Bukidnon nga nagsilbi sa kapin sa 500,000 ka kliyente."We're happy to partner with the Aboitiz Foundation in the implementation of the Pilmico program. There are great opportunities in nurturing and fostering agro-entrepreneurs, particularly in backyard livestock and we look forward to seeing their businesses grow through this partnership..." matod ni RAFI MFI Chief Operating Officer Jonar B. Dorado.Ang Aboitiz Foundation uban sa Cebu-based Aboitiz business units sama sa AboitizLand, Inc. ug Visayan Electric, nilagda og kasabotan uban sa local government units sa Liloan ug Talisay City sa probisyon sa 60 kamotorized fishing boats alang sa 60 ka piniling mangingisda nga nagpuyo sa coastal areas .Ang Aboitiz nakig-alayon usab sa Wilfred and Bonnie Uytengsu Foundation sa pag-ayo sa 43 Odette-damaged classrooms sa lima ka public schools sa dakbayan sa Lapu-Lapu ug lungsod sa Liloan, Cebu. Pagpangdanam kini sa pagsugod sa limited face-to-face classes ning tuiga. (PR)

Knockout tinguha ni Nietes

Posted: 12 Jul 2022 04:51 AM PDT

Knockout nga kadaugan maoy tinguha ni Filipino Donnie "Ahas" Nietes sa iyang pagsuway og ilog sa korona ni World Boxing Organization (WBO) super flyweight champion Japanese Kazuto Ioka karong gabii, Hulyo 13, 2022 sa Ota-City Gymnasium sa Tokyo, Japan.Ang bag-ong boxing promotional outfit nga mao ang Probellum nag-post og hulagway ni Nietes sa social media nga adunay pakapin nga quote sa kanhi 4-division world champion nga nag-ingon, "This fight may be in Ioka's hometown, but my plan is knock him out."Nag-edad na man tuod og 40 si Nietes apan grabe ka dako ang pagsalig niini nga mausban niya paglupig si Ioka hilabi na ning higayuna nga wala na'y world champion ang Pilipinas human sa desisyon nga kapildihan ni Mark Magsayo batok kang Mexican Rey Vargas sa ilang World Boxing Council (WBC) featherweight title bout niadtong Dominggo, Hulyo 10, 2022.Sa premiro nilang away niadtong Disyembre 31, 2018 sa Macao, nidaog si Nietes pinaagi sa split decision.Si Nietes, kinsa maoy naggunit sa rekord isip longest reigning Filipino world champion, nipasabot nga nakakuha siya og dugang kadasig human sa kapildihan ni Magsayo, kinsa iyang kanhi stablemate sa nabungkag nga ALA Boxing Stable.Gipas-an karon ni Nietes ang dakong tahas nga bangunon pagbalik ang nalumpag nga dungog sa Philippine boxing apan taliwala niini, matod sa lumad nga taga Murcia, Negros Occidental nga wala siya nibati og bisan gamay nga pressure.Sa official weigh-in kagahapon, ang duha ka mga boksidor pulos yanong nakalusot sa weight limit nga 115 lbs., timaan sa ilang kaandam alang ning awaya.Si Nietes nitimbang og 114.6 lbs. samtang si Ioka, kinsa usa sa legendary fighters sa Japan, nitali og 114.86 lbs.Naggunit si Nietes og 43-1-6, 23KOs nga rekord samtang ang 33 anyos nga si Ioka adunay 28-2, 15KOs nga baraha.

‘Nag-ihap na’g piso bisan wa pa mapusa ang itlog’

Posted: 12 Jul 2022 04:49 AM PDT

Daw nag-ihap na og piso bisan wala pa mapusa ang itlog ang kampo ni Filipino Donnie "Ahas" Nietes kabahin sa rematch batok kang World Boxing Organization (WBO) super flyweight champion Kazuto Ioka karong gabii, Hulyo 13, 2022, sa Ota-City Gymnasium sa Osaka, Japan.Wala pa gani nahuman ang away apan nagkanayon si Probellum president Richard Schaefer kagahapon nga nagplano na siya og mayorihiyang unification fights alang kang Nietes, kinsa kanhi four-division world champion.Niini, tataw ang dakong pagsalig ni Schaefer nga maangkon pagbalik ni Nietes ang korona nga iyang gibuhian kaniadto. Si Nietes dili pa lang dugay nakapirma og kontrata sa Probellum, nga maoy labing bag-ong boxing promotional outfit sa kalibutan.Kon mosubay ang mga mahitabo sa plano ni Schaefer, hayan ang posibleng sunod nga makontra ni Nietes naa ra nila ni Jesse 'Bam' Rodriguez o Juan Francisco Estrada, duha sa world champions sa super flyweight division.Bisan nag-edad na si Nietes og 40, gipadayag ni Schaefer nga wala nakibhangan bisan gamay ang iyang dakong pagsalig sa lumad nga taga Murcia, Negros Occidental."Boxing is like an addiction and it's very difficult for fighters to let go," pasabot ni Schaefer."And when you do become world champion again at age 40, who is going to stop you? Who is going to tell you that you cannot go and try to pursue a unification fight?"

16th WEKAF sa Mandaue, Hulyo 17-21

Posted: 12 Jul 2022 04:37 AM PDT

Mokuha na sab og dakong atensyon ang Sugbo sa kalibutan sa arnis sa pagpahigayon sa 16th World Eskrima Kali Arnis Federation (WEKAF) Championships karong Hulyo 17-21, 2022 sa Mandaue City Cultural and Sports Complex.Mao kini ang labing unang higayon nga mapahigayon ang matag duha ka mga tuig nga kompetisyon sukad sa pagpanaw ni Supreme Grandmaster Dionisio "Diony" Cañete, WEKAF founder ug chairman emeritus."This event is one of SGM Diony's enduring legacies that is why we have to continue it," opisyal nga pamahayag ni United States-based SGM Arnulfo "Dong" Cuesta, kinsa maoy nipuli kang Cañete isip presidente sa Doce Pares global federation.Nagkanayon si Philippine Eskrima Kali Arnis Federation (PEKAF) Executive Vice President Master Gerald Cañete nga kapin sa 400 ka arnisadors gikan sa 12 ka mga nasod ang gilaumang magkombati ning pretihiyusong kompetisyon.Lakip sa mga nasod nga adunay mga representante mao ang United States, Switzerland, Portugal, Germany, Brazil, Iran, Korea, ug India.Gipasabot ni Cañete nga malipayon sila nga daghan gihapon ang nangapil bisan padayon pang nagsagubang ang kalibutan sa pandemya."The most important thing is that we're back. And WEKAF is here to stay no matter what," matod ni Cañete.Nahan-ay ang pagpahigayon sa kompetisyon tungod sa suporta nila ni PEKAF President Sen. Juan Miguel "Migs" Zubiri, Cebu Governor Gwen Garcia, Cebu City mayor Mike Rama ug Mandaue City mayor Jonas.Adunay duha ka mga adlaw nga pre-qualifying event karong Hulyo 17-18, 2022.

Ginebra magpaduol sa top 2

Posted: 12 Jul 2022 04:36 AM PDT

Mga duwa karon (Hulyo 13, 2022) 3:00 pm- Blackwater batok Rain or Shine 6:00 pm- Ginebra batok Meralco Paamagon og suway sa Brgy. Ginebra Gin Kings ang ilang paglaom alang sa inilugay sa top two spots sa ilang pagpakigbatok sa Meralco Bolts sa main game karong alas 6:00 sa gabii sa Philippine Basketball Association (PBA) Philippine Cup sa Smart Aranera Coliseum.Ang Gin Kings kasamtangang naglingkod sa ikaduhang luna dala ang 6-2 nga rekord sunod sa league-leader San Miguel Beermen, nga adunay 8-1 nga baraha.Mahinungdanon ang pagsulod sa top two gumikan kay aduna kini pakapin nga twice-to-beat nga bintaha alang sa quarter-finals.Ang Bolts nagbitay sa ikaunom nga luna bitbit ang 4-3 nga rekord apan aduna pa sila'y gamayng poruhan nga makasulod sa top two kon makasagunson sila'g upat ka mga daog gikan karon.Sa premirong duwa, makigsangka ang nagkakuyaw nga Blackwater Bossing sa Rain or Shine Elasto Painters sugod karong alas 3:00 sa hapon.Ang Bossing adunay 5-2 nga rekord samtang ang Painters adunay 2-6 nga baraha.

NBA No. 1 pick gipapahuway

Posted: 12 Jul 2022 04:36 AM PDT

Human sa duha ka mga duwa ni Paolo Banchero sa Summer League sa National Basketball Association (NBA), nakadesisyon ang Orlando Magic nga papahuwayon na nila ang ilang gipiling No. 1 pick sa miaging rookie draft.Si Banchero nakapamatuod na nga angay siyang mahimong No. 1 pick pinaagi sa pagposte og 20 puntos nga average sa SL.Gipasabot ni Magic coach Jamahl Mosley nga gusto niyang hatagan og kahigayunan ang uban nilang mga sakop nga makapakita og sakto sa ilang abilidad hinungdan nga iya unang gipapahuway si Banchero. / AP

No. 2 pick mibida na sab sa OKC

Posted: 12 Jul 2022 04:34 AM PDT

Nagpakatap og 16 puntos ug 10 rebounds ang No. 2 overall pick nga si Chet Holmgren aron pangulohan ang kadaugan sa Oklahoma City Thunder batok sa Orlando Magic, 84-81, sa Summer League sa National Basketball Association (NBA) kagahapon, Hulyo 12, 2022 (RP time) sa Las Vegas.Si Holmgren, kinsa 7-footer nga produkto sa Gonzaga, mitali og 7-of-10 shooting nga nagpakita sa iyang dakong potensyal nga makakulit og dakong pangalan sa NBA.Taliwala sa iyang gitas-on, gipakita ni Holmgren ning duwaa nga kaya niyang buhaton ang tanan lakip na ang obligasyon sa usa ka pointguard. / AP

‘Most wanted’ nga kanhi kawani sa LTO nasikop

Posted: 11 Jul 2022 09:00 PM PDT

Ang kanhi disbursing officer sa Land Transportation Office (LTO)-7 nga nag-atubang og mga kaso sa korte ug anaa sa talaan nga 'number 1 most wanted' person sa Probinsiya sa Sugbo nadakpan sa katapusan sa Criminal Investigation and Detection Group Cebu Provincial Field Unit.Ang akusado giila nga si Marissa Abear Veriña, kinsa adunay kinatibuk-ang 46 ka warrants of arrest gikan sa korte.Siya dunay kasong kalapasan sa Anti-Graft and Corrupt Practices Act, Malversation of Public Funds, Falsification of Public Documents ug uban pa nga adunay tag-P30,000 nga piyansa sa matag kaso.'MIGAMIT SA POSISYON'Base sa imbestigasyon sa CIDG, ang akusado kawani kaniadto sa LTO 7 gikan niadtong Disyembre 1999 hangtod na sa Septiyembre 2007 diin una siya nga gidestino isip clerk.Lakip sa iyang trabaho mao ang pag-isyu og check payroll alang sa tanang mga empleyado sa ahensiya sa tibuok Rehiyon 7.Apil sab sa iyang trabaho ang pag-disburse sa budget nga magamit alang sa administrative ug operational nga katuyoan.Apan giingong gigamit ni Veriña ang iyang posisyon sa pag-isyu og multiple checks nga gisuportahan og gimao-mao nga mga dokumento nga wala nasubay sa hustong guidelines sa Commission on Audit (COA).Tungod sa mga kalapasan, gipasakaan og nagkadaiyang mga kaso si Veriña ngadto sa korte nga niluwat og warrants.MISIBATSukad nasayod si Veriña, nagtago-tago siya ngadto sa Shanwi, China human siya ni-resign sa iyang katungdanan sa LTO.Apan wa siya nagdugay sa China, nipauli siya sa Pilipinas human sa pipila ka semana sa iyang pagtago-tago sa maong nasud.Gikatahong nagpuyo sa Lapu-Lapu City si Veriña ug nagbalhinbalhin siya og puyo sa Lungsod sa Minglanilla.WARRANTSHuman nigawas ang naunang 30 ka warrants of arrest niadtong Hulyo 5, 2022, gi-serve dayon kini ngadto sa gipuy-an ni Veriña sa Barangay Bangkal, Lapu-Lapu City.Malinawon siya nga nikuyog sa CIDG uban sa mga sakop sa 2nd Provincial Mobile Force Company ug Cebu City Police Office.Laing 16 ka warrants ang giapas og serve kaniya sa CIDG.Si Police Colonel Ireneo Dalogdog, hepe sa CIDG 7, nagkanayon nga ilang gipalapdan ang ilang operation batok sa wanted persons nunot sa mando sa ilang labaw nga si Police Major General Eliseo DC Cruz.Daghan pa nga mga most wanted person ang target sa CIDG 7 sa mosunod nga mga adlaw ang gitinguha nga madakpan. /

Editoryal: Presyo sa lana ayaw ibasol sa gobyerno

Posted: 11 Jul 2022 07:17 AM PDT

Mimahal og maayo ang presyo sa mga produktong petrolyo sukad sa pagsugod sa 2022. Ning tuiga, niabot na og P42 ang pagsaka sa presyo matag litro sa diesel samtang P30 sa gasolina.Dako na kaayo ni og epekto sa nagkadaiyang mga industriya tungod kay tagsa ra man ang wa maggamit og fuel. Kon wa maggamit, nagsalig usab kini sa serbisyo sa mga kompaniya nga nagsalig usab sa fuel.Mahibung ka nga bisan ang palaliton nga batakan mimahal. Kini tungod sa transportasiyon nga gisaligan sa paglihok niini kada adlaw. Adto kini ipatong sa presyo sa produkto hinungdan nga momahal ang palaliton.Ang Pilipinas nag-import sa mga produktong petrolyo. Kay misaka man ang presyo sa lana sa world market, natural nga mopasaka usab sila sa presyo sa produktong petrolyo sa Pilipinas.Bisan gani ang Estados Unidos nga labing dako ug labing adunahan nga nasod sa kalibutan apektado sa presyo sa produktong petrolyo. Samot na ang gagmay nga mga nasod sama sa Pilipinas.Ang nakapakomplikado pa sa sitwasyon mao ang dollar-peso exchange rate. Huyang ang peso batok dolyar, mas dako nga kantidad ang magasto sa pagpalit sa lana sa Pilipinas. Sa ato pa, momahal usab ang baligya dinhi.Busa di maayo nga ibasol na lang ang tanan ngadto sa kagamhanan ang pagsaka sa presyo sa lana kay di kini kontrolado sa gobyerno. Ang tanan nagdepende sa dagan sa world market.Di maayong itandi ang nangaging administrasyon karon ug sa nangagi kay di man kini tungod sa kapakyas sa kagamhanan.Ang mahimo sa gobiyerno mao lang ang pagpaminos sa impact ngadto sa yanong mga tawo sama sa libreng sakay, fuel subsidy ug uban pang mga lakang.Kay bisan unsaon pa, ang presyo sa produktong petrolyo di kontrolado sa gobyerno. Gadiktar niini mao ang world market.

Nangilog og mike sa videoke, giatsa

Posted: 11 Jul 2022 07:07 AM PDT

Samdan ang usa ka construction worker human gihapsan og atsa ang ulo ug abaga niini sa iyang silingan tungod sa giingong kanunay nga pagpangilog og microphone atol sa videoke sa usa ka birthday party sa Purok 2, Sitio Bayong, Barangay Cadulawan, lungsod sa Minglanilla, alas 7:20 sa gabii sa Dominggo, Hulyo 10, 2022.Si Romel Alcansado Cansana, 32, ulitawo, construction worker, lumolupyo sa nahisgutang lugar, samdan sa walang bahin sa agtang ug abaga.Ang suspek giilang mao si Joseph Cuda Espinosa, 35, alyas 'Kasag', drayber sa habalhabal, kapuyo sa ig-agaw sa biktima. Si Espinosa nasikop sa follow-up operation sa kapulisan.Si Cansana nisaysay sa kapulisan nga niuwang siya sa ilang uyoan nga si Eugenio Alcansado ug Espinosa nga nagkalalis tungod sa microphone.Dugang ni Cansana nga si Espinosa nipauli apan nibalik nga dala na ang atsa ug gihapsan si Alcansado, apan wala kini naigo ug nakadagan.Kay nakadagan ang iyang uyoan, siya maoy gipahimungtan ni Espinosa, giatsa ang iyang abaga ug agtang.GIKULATA?Apan ang suspek nga nahinabi sa Superbalita Cebu nialegar nga gitabangan siya pagkulata nila ni Alcansado ug Cansana, kinsa ig-agaw sa iyang kapuyo.Gibutyag niya nga nitambong siya sa birthday sa iyang ig-agaw nga si Mario Cuda, 37, drayber sa habalhabal, nagpuyo sa naasoy nga dapit.Nagtagay sila og ilimnong makahubog ug nag-videoke. Matod ni Espinosa nga taliwala sa ilang kasadya, nagmaoy sa kahubog si Alcansado.Nagpabadlong kini human usa sa mga bisita iyang gihan-an og sumbag samtang nalingaw og videoke."Samukan kaayo ni sila. Mangilog og microphone sa bisita. Nindot kaayog kanta nga 'Bakit Ba' sa Cueshé, ganahan kaayo ko maminaw apan ilang barawon," dugang sa suspek.Matod ni Espinosa nauwaw siya kay sila si Cansana ug Alcansado dili mopatuo, nangilog gihapon sa microphone hinungdan sa ilang panaglalis. Nahitabo ang karambola nga nakabungkag sa party.Nialegar ang suspek nga nabun-og siya human gitabangan sa pagkulata nila ni Cansana ug uyoan niini. Mao kini hinungdan nga niuli siya sa ilang balay aron pagkuha og atsa ug nibalik, dayon niataki sa duha.Si Police Staff Sgt. Allan Villasorda sa Minglanilla Police Station nga nahinabi sa Superbalita Cebu nagkanayon nga giandam na nila ang kasong attempted murder batok kang Espinosa.

Dakong fuel price rollback ipatuman

Posted: 11 Jul 2022 07:07 AM PDT

Maayong balita alang sa mga motorista.Ang pump prices gipaabot nga dunay pag-ubos ngadto sa dili mominus P5 matag litro, sumala sa pagbana-bana sa mga dagkong kompaniya sa industriya.Sa ilang fuel forecast alang sa Hulyo 12 ngadto sa 18, 2022, ang Unioil Philippines nagkanayon nga ang diesel gipaabot nga moubos og P5.90 ngadto sa P6 matag litro.Ang gasolina gibana-bana nga moubos og P5.50 ngadto sa P5.70 matag litro.Samtang, ang Department of Energy (DOE) nikompirmar nga dunay big-time price rollback sa tanang fuel products ning semanaha.Ang mga kompaniya sa lana sagad mopahibawo sa price adjustments matag Lunes, apan mapatuman kini sa sunod adlaw (posible karon, Hulyo 12 apan wa pay kompirmasyon atol ning pagsuwat).Kahinumdoman, niadtong Martes, Hulyo 5, ang mga kompaniya sa lana nipatuman sa price reduction sa diesel og P3 matag litro, apan wala nilihok ang presyo sa gasolina.Ug kini nihatod sa year-to-date adjustments ngadto sa net increase nga P42.90 matag litro sa diesel ug P30 matag litro sa gasolina. (SunStar Philippines)

Mga LGU nangandam sa Pasigarbo sa Sugbo

Posted: 11 Jul 2022 07:07 AM PDT

Nagsugod na sa pagpangandam ug pag-recruit og dancers ang pipila ka mga lungsod sa Probinsya sa Sugbo alang sa mga contingent sa Pasigarbo sa Sugbo 2022.Ang lungsod sa Samboan nianunsyo nga nanginahanglan ang lungsod og dancers ug propsmen aron morepresentar sa lokal nga Dagayday Festival.Subay niini, giawhag ang mga karaan nga propsmen ug dancers sa Pasigarbo sa Sugbo 2019 nga moapil og balik sa maong kalihukan.Si Barili Mayor John-John Garcia nianunsyo usab sa mga gusto moapil isip mananayaw sa Panumod Festival. Niadtong Hulyo 10-11, nipahigayon na sa pasiunang screening ang LGU alang sa mga dancer sa RVA Sports Complex.Samtang ang lungsod sa Alegria nipahigayon na usab og screening sa mga gusto nga mahimong dancers alang sa Kawayan Festival sa lungsod.Ang screening nagsugod niadto pang Hulyo 8 hangtod Hulyo 10 sa Barangay Poblacion, Legaspi, Madridejos ug Sta. Filomeno.Gawas sa maong mga lungsod, gisugdan na usab sa dakbayan sa Naga nga mopasundayag sa Dagitab Festival. Nangita na usab sila og Festival Queen.Nasayran nga moabot sa 50 ka mga LGU ang moapil sa Pasigarbo sa Sugbo karong tuiga.

2K ka kilo nga basura nakuha sa Mahiga Creek

Posted: 11 Jul 2022 07:03 AM PDT

Dili mominos duha ka tonilada nga basura, ug dul-an sa 56 kilos niini ang recyclable polyethylene terephthalate (PET) bottles, ang nakuha sa clean-up drive sa Mahiga Creek sa habig sa Barangay Subangkadaku, dakbayan sa Mandaue niadtong Sabado, Hulyo 9, 2022.Ang usa ka tonelada katugbang sa 1,000 ka kilo.Ang mga basura nagbara sa sapa dihang naanod sa pagbaha atol sa pagbundak sa kusog nga uwan sa Metro Cebu niadtong Biyernes, Hulyo 8, 2022.Sa Dominggo, Hulyo 10, si Ernie Manatad, pangulo sa Barangay Subangdaku, nisaysay sa SunStar Cebu nga mohimo sila og clean-up drive sa Mahiga River matag weekend.Si Manatad nibutyag nga sagad usa ngadto sa tulo ka dump trucks nga puno sa basura, katugbang sa unom ka tonilada nga basura ug dul-an sa 50 ngadto sa 150 kilos sa recyclables ang ilang makuha sa sapa matag semana.Sa sayo pa, si Mandaue City Mayor Jonas Cortes nipadayag sa iyang inaugural address nga usa sa iyang top priorities sa bag-ong termino mao ang rehabilitasyon sa Mahiga Creek ug Butuanon River.Ang Mahiga Creek giila nga major flood contributor usab sa dakbayan sa Sugbo ug Mandaue.Ang rehabilitasyon niini pangulohan sa City Planning ug Chamber of Commerce and Industry Development Office nga molungtad sa 2015.Alang sa Mahiga Creek, si Cortes nagkanayon nga ang Mandaue City government mopadayon sa pag-establisar sa usa ka water waste drainage system nga gitumong sa pagwala sa basura gikan sa bukirang dapit ug kapatagan sa dakbayan nga nakaapekto sa agos o bul-og sa tubig sa suba ug sapa.Matod niya, iyang ibalhin ang mga nagpuyo duol sa suba o sapa, giila nga danger zones, ngadto sa mas luwas nga dapit ug mapanalipdan sab ang suba ug sapa.Dugang ni Cortes, makig-alayon siya kang Cebu City Mayor Michael "Mike" Rama sa paglimpiyo ug pagpalambo sa Mahiga Creek nga kabahin sa utlanan sa duha ka mga dakbayan."I had always advocated for environmental sustainability. We in Mandaue City remain firm with our commitment to rehabilitate our rivers. Remember that the key to resiliency is our mindset," matod ni Cortes.

Dole 7 building sa Gorordo ave. temporaryong sirado

Posted: 11 Jul 2022 07:03 AM PDT

Temporaryong gitak-opan ang edipisyo sa Department of Labor and Employment (Dole) 7 ug ubang ahensiya sa gobyerno nga nag-okupar niini sugod kagahapon, Hulyo 11, 2022.Ang Overseas Workers Welfare Administration (Owwa) office nga usa sa nag-okupar sa edipisyo nasunog niadtong Sabado, Hulyo 9, nga nakaapekto sa ubang mga buhatan.Gibana-bana nga tulo ngadto sa lima ka adlaw ang pagsirado sa Dole 7 building nga nahimutang sa eskina dalan Gorordo ug Gen. Maxilom Ave. sa dakbayan sa Sugbo.Lakip sa mga attached agencies nga sirado mao ang Philippine Overseas Employment Administration (POEA), Owwa, National Labor Relations Commission (NLRC) 7th Dvision, National Conciliation and Mediation Board (NCMB), Regional Tripartite Wages and Productivity Board (RTWPB) ug Occupational Safety and Health Commission (OSHC).Ang Dole ug attached agenies ningpatuman sa work-from-home ug skeletal force aron pagpadayon sa serbisyo sa publiko.Sa official press statement gikan sa Dole 7 nga gipangulohan ni Officer-In-Charge Lilia Estillore nga padayon gihapon ang ilang serbisyo apan sa limitado nga paagi sanglit aduna silay make-shift office nga gihimo sa parking lot sa maong buhatan."This is to ensure the safety not only of the concemed offices' officials and employees but also of their respective customers and stakeholders," tipik sa pamahayag sa Dole-7.Ang nahisgutang mga opisina nga nag-okupar sa Dole 7 building, adunay gidestino nga mga personnel sa ilang social media pages ug motubag sa mga pangutana sa publiko samtang sirado pa ang ilang opisina tungod sa pagsusi sa kaluwasan niini.

P200M shabu nasakmit sud sa 2 ka semana

Posted: 11 Jul 2022 05:02 AM PDT

Sulod lang sa duha ka mga semana, ang Police Regional Office (PRO) 7 nakasakmit og kapin sa P200 milyunes nga balor sa gituohang shabu, timaan sa kalamposan sa ilang kampanya.Sa miaging semana lang, ang PRO 7 nakasakmit og kapin sa P100 million nga balor sa illegal nga drugas sa usa ka adlaw nga Simultaneous Anti-Criminality and Law Enforcement Operation (Sacleo).Labing daghan niini nakuha sa Lapu-Lapu City Police Office (LCPO) nga nakasakmit atol sa buy-bust og 15 ka kilo sa gituohang shabu balor og P102 milyunes base sa street drug price (SDP).Ang nakuhaan mao ang usa ka babayeng kanhi Overseas Filipino Worker (OFW).Niadtong Hunyo 25, 2022, laing 15 ka kilo sa gituohang shabu nasakmit usab sa LCPO gikan sa duha ka mga lalaki atol sa buy-bust.Nagsugod ang ilang operation sa Hulyo 9, 2022 sa alas 12:01 sa kaadlawon ug natapos sa Hulyo 10, 2022 sa susamang oras.Sa data nga gipagawas sa PRO 7, nakalusad sila og 165 ka anti illegal drug operations nga niresulta sa pagkasikop sa 199 ka drug personalities nga gikonsiderar nga high value individual.Kapin sa 16 kilos sa gituohang shabu ang ilang nakuha sa tibuok nga operation nga mobalor ang tanan og P111.4 milyunes.Nakasikop usab silag 266 ka tawo sa kaso sa illegal nga sugal diin nakasakmit sila og 204 ka gambling paraphernalia ug cash nga P20,812.Sa kampanya batok sa loose firearms, nakasakmit sila og 221 ka mga armas nga walay lisensya nga niresulta usab sa pagka sikop sa 22 ka mga tawo atol sa 134 ka operations.Matod ni Police Lieutenant Colonel Mary Crystal Peralta, tigpamababa ni Police Brigadier General Roque Eduardo Vega, ang daghang drugas nga nasakmit sa kapulisan sa Central Visayas tungod kini sa ilang walay hunong nga kampanya ug gipanghingusgan pa sa kapulisan."Actually ito po ay pina aigting pa natin ito sa pamamagitan ng ating intelligence operations sa ating pakikipag coordinate sa ating PDEA at sa lower units na kung saan maganda po ang epekto nito na ibig sabihin po malaki po ang tulong nito sa ating komunidad. Kung hindi dahil sa kanila ay hindi natin ito magagawa," matod ni Peralta.Sa nakuha nga impormasyon sa kapulisan, sigun ni Peralta nga ang daghang gidudahang shabu sa Lapu-Lapu City imported gikan sa China agi sa kaulohan base sa packaging niini nga mao Chinese tea bag.Wala silay impormasyon nga gihimo dinhi sa Sugbo ang shabu sanglit ang tanang nasakmit nila nga supply itudlo man ang kaulohan nga maoy tinubdan."Usually sa mga ganyang Chinese tea bag ito po yung tinatawag natin na tea bag with Chinese character o Guanyinwang. Ito po ay imported, pag mga ganito po kasi ito ay galing ng China," dugang ni Peralta.Atol sa flag raising ceremony sa Camp Crame, gidasig ni Department of the Interior and Local Government (DILG) Secretary Benhur Abalos ang kapulisan sa tibuok Pilipinas nga ipadayon ang gubat batok sa illegal nga drugas.Nakita nila ang kamahinungdanon sa kampanya batok sa illegal nga drugas sanglit usa kini sa mga hinungdan sa krimen busa angay hatagan og igong pagtagad.
at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...
  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...