Tuesday, July 19, 2022

https://www.sunstar.com.ph/

https://www.sunstar.com.ph/

Pagkasakmit sa ecstasy gikalipay sa CCPO kay lisod nga sakpon

Posted: 19 Jul 2022 04:07 AM PDT

Gihangop sa kapulisan sa siyudad sa Sugbo ang pagkasakmit sa dul-an sa 3,000 ka tabletas sa ecstasy sa mga sakop sa Philippine Drug Enforcement Agency (PDEA) 7 uban sa Bureau of Customs ug Inter-Agency Drug Interdiction Task Group sa Ninoy Aquino International Airport sa Brgy. Pasil niadtong Lunes sa hapon, Hulyo 18, 2022.Matod ni Police Lieutenant Colonel Wilbert Parilla, deputy director for administration sa Cebu City Police Office (CCPO) nga lisud kaayo dakpon ang mamaligyaay sa maong matang sa illegal nga drugas.Iyang gipasabot nga kasagaran sa mga kustomer sa ecstasy mao kadtong mga arangan ang kahimtang sa kinabuhi, dili susama sa shabu nga bisan kinsa lang ang makapalit.Dugang ni Parilla nga dako og impact ang pagkasakmit sa ecstasy sanglit wala na kini makaabot pa sa merkado."Usually sa mga namaligya ani they will not sell it unless kon kaila gyud sila. Mao na nga lisud sa amoang part to arrest this and it's good nga ang PDEA they have contacts sa source pa lang daan, nadakpan na siya, wala siya ma distribute," matod ni Parilla.Sa ilang monitoring, kasagaran sa pagpayuhot sa ecstasy naa sa high end nga mga imnanan diin kadtong adunahan nga mga batan-on lang ang maka afford.Lakip sa ilang nakuha nga kasayuran mao ang mga party sa mga exclusive nga venue diin kadtong dili nila kaila dili mamahimong makasulod.Tungod niini, maglisud sila sa pagsakmit sa maong matang sa illegal nga drugas.Wala hinuon mohingalan si Parilla kon unsa kini nga bars sa dakbayan sa Sugbo."Usually ari ra sad ni siya sa mga high end bars. Wala na siya sa bisan asa lang nimo makita. Usually anha sa mga parties. We really find it difficult.," dugang ni Parilla.

Pilipinas moangkat og abuno nga ipaagi sa gobyerno sa laing nasod

Posted: 19 Jul 2022 04:04 AM PDT

Si Presidente Ferdinand "Bongbong" Marcos Jr. niingon sa Lunes, Hulyo 18, 2022, nga andam siyang mopadayon sa usa ka government-to-government (G2G) talks aron maundang ang pagsaka sa presyo sa mga abuno.Si Marcos niingon nga kon ang mga abono, nga gikinahanglan samtang ang gobyerno naninguha aron matubag ang mga kabalaka sa seguridad sa pagkaon sa nasud, makuha pinaagi sa mga deal sa G2G, busa mas dunay kalagmitan nga ang mga presyo momubo."Gusto tayong tulungan, gusto tayong lapitan, eh 'di take advantage naman tayo, 'di ba. Sige bigyan niyo kami ng fertilizer na medyo maganda-ganda ang presyo. That's the whole point of G2G," matod niya sa usa ka tigom tali sa mga opisyal sa Department of Agriculture diin siya sab ang nagsilbing kalihim.Si Marcos miingon nga siya nagtan-aw sa pagbukas niini uban sa mga gobyerno sa China, Indonesia, United Arab Emirates, Malaysia ug Russia.Matod niya nga makasuwat siya kanila nga moingon nga adunay tuyo ang Pilipinas sa pagpalit og abono gikan kanila.Gimanduan ni Marcos ang mga opisyal sa agrikultura sa paghatag og datos sa tinubdan ug presyo sa mga abono, ingon man plano sa pag-apod-apod sa departamento sa panahon sa pagpananom. (TPM sa SunStar Philippines)

Korean firm motrabaho sa NCICP sa Consolacion human midaug sa bid

Posted: 19 Jul 2022 04:04 AM PDT

Gipaubos na sa post qualification process ang usa ka Korean firm nga gideklarar sa Bids and Awards Committee (BAC) sa Department of Transportation (DOTr) nga maoy lowest bidder sa P9.96 bilyones nga New Cebu International Container Port (NCICP) nga mahimutang sa Barangay Tayud, lungsod sa Consolacion.Si Mary Knoll Lague-Bolasa, public information officer sa Cebu Port Authority (CPA), nitug-an nga duha ka construction companies gikan sa South Korea ang ning-apil sa ilang technical bid niadtong Mayo 20, 2022.Giablihan ang ilang technical bid niadtong Hunyo 3, 2022 ug ang usa sa duha ka Korean firms gideklarar sa BAC nga lowest bidder para maoy motrabaho sa NCICP.Niadtong Hunyo 10, gipahigayon sa BAC ang bid evaluation aron pagsusi sa ilang mga papel nga giduso ug nasuta nga kompleto sila sa tanang rekisitos.Matod pa ni Bolasa nga wala pa sila katino kon kanus-a mahuman ang nagpadayon nga post qualification sa technical working group hilabi na nga tua nagbase sa South Korea ang lowest bidder.Ang ngalan sa kompaniya dili pa nila mabutyag hangtod nga sila maoy maisyuhan sa notice to proceed para masugdan na ang pagtrabaho sa NCICP.

Helper gipapriso sa amo kay ‘nangawat’ og wedding ring

Posted: 19 Jul 2022 04:02 AM PDT

Babaye nga giingong magpakaaron ingnon nga manarbaho isip helper aron mangawat giunay pagdakop sa iyang magtiayong amo human giingong gikawat ang wedding ring sa bana.Matod sa kapulisan, nasayran sa magtiayon ang background sa suspek nga si Jenlope Ligan, 35, taga Inabanga, Bohol, human giingong gikawat ang wedding ring ni Ed Rufel Molina, 43, taga Soft Touch Subdivision, Minglanilla niadtong Martes sa buntag, Hulyo 19, 2022.Si Staff Sergeant Ritchel Antipuesto, imbestigador sa Minglanilla police station nga nahinabi sa SunStar Cebu, niingon nga si Ligan duha pa lang ka adlaw nga katabang. Matod ni Antipuesto nga niadtong kaadlawon sa Hulyo 18, samtang si Molina naligo uban sa iyang suod nga mga higala sa lungsod sa Moalboal, iyang nabantayan nga wa niya ang iyang wedding ring.Iyang gitawgan ang iyang asawa kalabot sa singsing kay basin iya lang nalimtan diin gibutang, apan wa makit-i. Sa iyang pag-uli nianang hapon sa samang adlaw, ilang gisukitsukit si Ligan kalabot sa singsing, apan nanghimakak kini nga nakakita siya.Nakabantay si Molina nga wa magkadimao ang mga estorya ni Ligan, busa gidakop siya sa magtiayon ug gidala sa police station sa Minglanilla. Matod ni Antipuesto nga sa ilang pag-imbestigar, ang suspek niangkon sa krimen, apan wa siya nitug-an hain na ang wedding ring nga balor og P24,175.Si Antipuesto niingon nga nasayran sa magtiayong Molina nga modus na sa suspek nga mo-apply pagka helper aron makapangawat. Nakahukom ang magtiayon sa pagkiha kang Ligan og pangawat kay di ordinaryo ang iyang gikawat, usa kini ka wedding ring nga dunay sentimental value sa kinabuhi sa magtiayon. (GCD)

Editoryal: Pagsumpo sa krimen

Posted: 19 Jul 2022 04:00 AM PDT

Maayong ipadayon sa kapulisan sa dakbayan sa Sugbo, bisan sa ubang dapit, ang napamatud-ang pamaagi sa pagkontrolar sa kriminalidad, ang presensiya sa awtoridad. Nasayod kita nga kuwang ang pwersa. Ang ilang pagpatrolya sa dapit nga sagad hitaboan ug hilit nga dapit sa dakbayan matag-karon-ug-unya dako og tabang.Si Police Lieutenant Colonel Janette Rafter, deputy city director for operations sa Cebu City Police Office (CCPO), gikutlo sa Martes, Hulyo 19, 2022, bahin sa pagkunhod og 50 porsiyento sa crime volume sa dakbayan kon itandi sa miaging semana tungod sa paghimo og kausaban sa pagpakatap sa kapulisan.Matod ni Rafter, ang motorcyle patrol nisulod sa mga hilit nga lugar ug nibadlong sa mga nag-estambay sa gawas sa lawom nang kagabhion, labi na sa nanag-inom. Ang maong pamaagi una nilang gihimo sa dihang nisaka pag-ayo ang mga kaso sa coronavirus disease 2019 (Covid-19), giilang best practice sa pagpanguna sa Task Force Kasaligan.Gihimo ang maong pamaagi tungod sa namatikdan nga pagsaka sa krimen nunot sa pagluag sa restrictions ubos sa Alert Level 1. Hinahinay mibalik ang normal nga kalihokan. Daghang manuroy sa kagabhion. Apan nunot sa maong kalamboan, ang kriminalidad mibalik usab sa pagsaka sa talaan sa kapulisan sa kaso sa 8 focus crimes - ang homicide, physical injury, robbery, theft, vehicle theft, motorcycle theft, ug rape.Tungod niini, ang CCPO mibalik sa ilang pamaagi sa panahon sa pagtaas sa kaso sa coronavirus disease 2019 (Covid-19) bahin sa subsob nga pagpatrolya ug pagbuyag sa mga nag-estambay sa pagsanta sa posibleng mahitabo nga krimen mugna sa gahom sa bino o kaha gidiling druga. Napamatud-an kini nga epektibo subay sa taho ni Rafter.Atong dasigon ug suportahan uban sa pagdayeg ang paningkamot sa CCPO alang sa pagmintinar sa kahusay ug kalinaw sa dakbayan. Ang krimen dili hingpit mapapas apan mahimo kining makunhoran o hinayhinay mawala.

Talk to Papa Joe: Gustong patagmon

Posted: 19 Jul 2022 03:58 AM PDT

Dear Papa Joe,Tawaga lang ko og Mary, taga Mabolo, 24 years old ko, minyo as in kasado pero ga live in na mi daan ani akong bana for 2 years. Hangtod nga nagka anak mi ug ni decide nga magpakasal. Pero dihang gikasal na hinuon mi, nausab man. Inig away namo kay iya kong dapatan hangtud nga niingon among silingan nga ipabarangay daw. So akong gipa barangay. Mao man gihapon kay nisamot na hinuon kay gipakauwawan daw nako siya.Last week iya kong gikulata mao na nisumbong na gyud ko sa pulis ug napriso na siya karon. Ang akong problema kon ipadayon ba nako ang kaso. Kinsa na man lang ang mobuhi namo? Love man nako siya pero mao lagi iya kong dapatan. Palihug tambagi ko.MARYMary,Sa tinuod way kalainan kon mapriso imong bana ug mamatay siya simbako. Kay ang-ang di na lang mo mabuhi kon simbako wala na siya? Mangita gyud mo og pamaagi. Kon mapriso man siya, sama rang sitwasyona. Usa pa, maghatag ka og leksyon kaniya nga ang babaye di angay pasakitan sa pisikal kay pila ra may kusog nimo.Ipapriso na para motagam kay kon mahal mo niya, di siya motugot nga maguba ang iyang kaminyuon. Magdako inyong anak sa kasamok ana. Pero kon imong pasayluon, wa gyud tay mahimo kay imo man nang desisyon ug love man nimo siya.PAPA JOE(sa inyong tampo ipadala lang sa papajoesuperb@gmail.com)

Barrita: Kabit ubos sa proteksiyon sa Anti-VAWC Act

Posted: 19 Jul 2022 03:56 AM PDT

Bisan ang usa ka babaye nga kabit lamang ubos sa proteksiyon sa Republic Act 9262, ang Anti-Violence Against Women and Their Children (Anti-VAWC) Act of 2004, matod pa sa Korte Suprema sa usa ka desisyon nga gisuwat ni Associate Justice Marvic Leonen sa SC Second Division."The illicitness of a relationship a woman engages in does not diminish her dignity in any way. She will be protected just the same by the law that values her and her children's dignity and guarantees full respect for their human rights," nagkanayon ang desisyon.Matod pa sa Labaw'ng Hukmanan di makamenos sa dignidad sa usa ka babaye ang iyang pagsud sa usa ka illegal nga pakigrelasyon. Proteksiyonan gihapon siya sa balaod nga nigarantiya sa iyang dignidad ug mga tawhanong katungod, ingon man sa iyang mga anak.Ang desisyon nagdason sa Permanent Protection Order (PPO) nga giluwatan ubos sa Anti-VAWC Act batok sa petitioner aron paglikay sa dugang pagdagmal batok sa mga respondent, sa iyang dugay nang kapuyo ug sa iyang mga anak. Ang lalaki 47 anyos ug minyo na sa dihang gikahinagbo niya ang babaye nga 20 anyos pa niadtong tuig 1970.Ang argumento sa petitioner mao nga ang Republic Act 9262 dili makapanalipod sa respondent nga babaye kay usa ra siya ka kabit. Alang kaniya, bisan kon ang balaod nanalipod sa babaye nga iyang gikarelasyon, kinahanglan nga alang kini sa relasyon nga way "legal impediment to marry" o way babag sa pagminyo sa usag'usa. Kay kon di, sama da nga gitugotan sa balaod ang mga "adulterous relationships."Gigamit sa Korte Suprema ang lagda sa statutory construction nga nag-ingon nga "when the law does not make any distinction, neither should the courts." Sayop ang petitioner, matod pa sa Korte Suprema, kay ang balaod naghatag og proteksyon sa mga babaye nga anaa sa usa ka "intimate relationship" ug sa ilang mga anak, lakip na sa respondent ug sa iyang mga anak.Laing argumento sa petitioner mao nga hingkod na ang panuigon sa ilang mga anak sa dihang giluwatan ang PPO, busa di na sila ubos sa proteksiyon sa Anti-VAWC Act nga nagtumbok sa mga bata nga kadtong ubos sa 18 anyos o labaw sa 18 anyos apan di makaatiman sa ilang kaugalingon.Gikutlo sa Korte Suprema ang ilang desisyon sa Estacio vs Estacio, susamang kaso sa violence against women and their children, nga nag-ingon nga ang Republic Act 9262 ingon man ang lagda sa Violence Against Women and Their Children wa mag-ila sa edad sa mga bata nga ibutang ubos sa mga protection orders.Gipatigbabaw sa Korte Suprema ang pagprotehir sa estado sa kababayen-an ug sa ilang mga anak batok sa hulga sa ilang seguridad ug kaluwasan. Di niini sagupon ang interpretasyon sa probisyon sa Republic Act 9262 nga maghimo niini nga way gahom ug way kapuslanan. - edbarrita@gmail.com

Diputado: Kondisyon sa tigsaway

Posted: 19 Jul 2022 03:56 AM PDT

Dunay usa ka tawo nga nagsige og apply og trabaho sa gobiyerno kay matod pa niya, nindot pod iyang credentials. Bisan unsaon niya og apply, kinsa na lang iyang sangpiton, mosangit man iyang application. Di man molusot.In short, wa gyod siya nakasulod og trabaho sa gobiyerno panahon ni kanhi Presidente Rodrigo Roa Duterte (PRRD).Di god pod unta kaayo taas nga ranggo iyang gusto. Commissioner lang god unta pero demalas man. So unsay iyang gihimo? Gilibak na lang niya si PRRD ug nahimo siya nga usa sa mga tigsaway sa pangagamhanan ni PRRD.* * *Tungod kay nagtuo siya nga abilidaran siya kaayo, plus matod pa niya, daghan kaayo ang mamati sa iyang programa sa radyo, dihay raket nga nasulod sa iyang huna-huna.Gusto niyang manguwarta sa usa ka kandidato pagka-gobernador.Unsaon man?Mosugot siya nga inadlawon niya pagbatikos ang kontra nga gobernador. Siya nay mangita og mga isyu batok sa kontra.Plus, siya pod ang molihok sa mga kaso batok sa gobernador. Kon mahimo kuno niya og inadlawon pod ang pagkiha sa gobernador, mao nay iyang buhaton.Siyempre, nalipay kaayo ang kandidato pagka-gobernador.Pero, ubos sa usa ka kondisyon. Matod pa sa tigpamaba sa kandidato pagka-gobernador.* * *Abi god ninyo, ang gobernador dunay offer kaniya nga pahunongon og ataki unya bayran na lang siya aron mohilom na. Pero, sumala sa maong tigsaway (komentarista), dili niya buhaton kay kurakot man siya, gawas pa, ari kuno siya molaban sa taga-diri pod.So, unsa may kondisyon, gibalik ang pangutana sa tigpamaba sa kandidato.Nangayo kini og retainers' fee, gamay ra god, igo-igo ra sa iyang perhuwisyo, apil na ang risgo sa trabaho.Pila man?Ah, mosugot ra siya og P15 milyunes, gikan sa pagsugod sa kampanya hangtod mahuman ang piniliay. Sulit gyod ang iyang gipangayo kay kon sugdan na ang trabaho, matod pa, segurado gyod nga mapildi ang kontra. Pasabot niya, nakaginansiya pa kuno kay tiaw bay P15 milyunes lang unya segurado na ang kadaugan.Wa katingog ang tigpamaba sa kandidato. Hasta ang mga kauban nga mga kontraktor, nganga pod ang mga baba.Ngano man?Wa sila magtuo nga mao kadto ang kondisyon aron lang molaban sa kandidato pagka-gobernador.Ang resulta, wa gyod madayon ang giplanong buhaton. Mahal ra kaayo ang paglaban sa maong tawo.* * *Karon, abtik pas kilat moyawyaw bahin sa ubang mga tawo. Mora og santos na ang iyang pagtan-aw sa iyang kaugalingon nga sayonsayon na lang kaayo mobatikos.Bisan unsaon niya og pagpanaway, nagpabilin lang gihapon siya nga wa gyod madawat sa bisan asa nga iyang gusto trabahoan, kanang susama sa kalidad sa usa ka commissioner.Midawat na lang siya sa usa ka trabaho nga layo ra kaayo sa iyang gusto, ang importante nga naa siyay suweldo.Abtik na pod siya manaway sa pangagamhanan ni BBM. Ngano man? Kay gusto na man pod unta mo-apply pero wa may nidawat.

Balay-Balay, Tubig-Tubig: Gibugawan sa iyang inahan

Posted: 19 Jul 2022 03:54 AM PDT

Dear Atty. Joan,Maayong adlaw, Atty. Ako si Marie, ako nagsulat kaninyo mahitungod sa akong higala ug sa iyahang inahan.Ilado sila sa mga ehekutibo sa usa ka civic organization nga nakaila ani akong higala isip "anak nga babaye ni AAA (ang inahan)," kansang inahan gapangita og koneksyon sa mga impluwensyal nga tawo para sa kuwarta pinaagi sa pagbugaw sa iyang anak.Ako pang mahinumdoman tung nangutana ko sa maong higala nako na dili kuno niya mabasol ang iyang inahan kay nagpuyo sila nga maluho ug busa nanginahanglan ug kuwarta og pag-atiman sa ilang kaugalingon.Dugang pa, iyang gihisgutan nga bisan pa sa tanang nahitabo gihigugma gihapon niya ang iyang inahan nga nag-inusarang ginikanan nga nagsuporta ug nagpadako kanila sukad sa pagbiya sa ilang amahan. Matod pa niya, andam siyang buhaton ang tanan madepensaan lang ang dungog sa iyang inahan ug sa ilang pamilya.Naghunahuna ko kon unsa nga mga kaso ang mahimo nga ipasaka batok sa iyang inahan ug kon ang usa ka outsider sa pamilya mahimo ba nga mopasaka og kaso batok kaniya.Subo palandungon nga naa koy kaila nga ingon ani ang gikadakoan kay kon huna-hunaon, wala gyuy pagduha-duha nga gipahimuslan sa iyang inahan ang iyang batan-ong panghuna-huna nga nasayod lamang sa pagkamaunongon ug gugma sa iyang pamilya bisan sa paaging makapaluya nga moralidad.Gusto nako madungog ang imong hunahuna bahin niini, Atty. Joan. Daghang salamat.Imong magtatampo,MarieDear Marie,Maayong adlaw usab kanimo, Marie. Salamat sa imong pagsunod niining lindog.Kining nahitabo sa imong higala dunay kalabutan sa kalapasan sa pipila ka mga balaod sama sa Anti-Human Trafficking in Persons Act ug Child Abuse.Ang iyang inahan mahimong mag-atubang og mga kaso human gibugaw niya iyang anak nga usa ka porma sa trafficking in persons, usa usab kini ka porma sa pag-abuso sa bata.Mahimo usab kining cybercrime kon gigamit sab sa inahan ang online medium pinaagi sa pag-chat sa mga kliyente aron mabuhat ang transaksyon ug trafficking sa imong higala.Ang balaod nagtumong sa pagpanalipod sa mga bata nga daling maabuso. Busa, walay porma sa pag-uyon gikan sa usa ka menor de edad mahitungod sa sekswal nga mga buhat ang gikonsiderar nga pagtugot nga maalamong gihimo.Dugang pa, adunay katungdanan ang gobyerno sa paghatag og proteksyon sa mga bata sa mga higayon nga parehas sa imong higala. Usa kini nga isyu sa publiko busa bisan kinsa nga naay personal nga kasayuran sa panghitabo, mahimo nga moreport sa mga awtoridad o sa mga ahensiya sa pagpanalipod sa bata sama sa among opisina.Daghang salamat, Marie, sa imong sulat ug hinaut nga nakatabang kanimo ug sa imong higala ang among tambag.Imong alagad,Atty. JoanPara sa mga komento, suhestiyon o kon ganahan mosugyot sa ilang suliran, mahimong mokontrak sa Children's Legal Bureau, Inc. pinaagi sa hotline number 09653804620, pwede pud moadto sa Facebook page ug mo-fill-up sa Legal Assistance Form.

Visayan Electric abli sa kolaborasyon

Posted: 19 Jul 2022 03:51 AM PDT

Kabahin sa pagpahiuli sa mga komunidad nga naapektohan sa super typhoon Odette sa miaging tuig, ang Visayan Electric Co. (Visayan Electric) nipatigbabaw sa opurtunidad sa dugang kolaborasyon.Natumaw kini samtang ang Cebu-based power firm nagpadala og augmentation ug mga kawani sa pagtabang sa pagpahibalik sa linya sa kuyente sa duha ka mga lungsod sa Bohol sulod sa duha ka buwan hangtod sa Hunyo ning tuiga, diin ang mga opisyal sa kompaniya nipasabot sa benepisyo gikan sa panag-abag sa nagkalainlaing sektor."Whether we were on the giving or receiving end of assistance in the aftermath of Odette, one thing was clear. One can go far alone but can go farther with the help of others," matod ni Visayan Electric President ug Chief Operating Officer Raul C. Lucero.Ang Visayan Electric, usa ka AboitizPower subsidiary, nipadala og duha ka mga grupo sa 10 ka linemen sa lungsod sa Buenavista ug Getafe.Kini nga mga lungsod walay tino nga kutay sa kuryente sulod sa dul-an sa lima ka buwan, apan ubang hilit nga dapit sa maong mga lungsod mas taas nga way kuryente.Ang local utilities nipatuman sa power rationing sulod sa maong panahon.Human sa pagtabang sa teams, naayo nila ang 163 kaelectric poles, repositioned sa 15 ka transformers, ug nakatrabaho sa power lines nga dunay gitas-on nga 45 kilometros ug daghang panimalay ang natabangan.Matod ni Lucero, usa kini sa pamaagi sa kompaniya nga makabalos sa tabang gikan sa ubang distribution utilities atol nga sila ang nanginahanglan.Si Bohol 1st District Representative Edgardo M. Chatto nisulti ngadto sa mga representante sa Visayan Electric nga siya "nanglantaw sa dugang partnerships sa umaabot."Nagpasalamat siya sa Aboitiz Group para sa ilang suporta sa pagtabang sa Visayan Electric nga hingpit nga mahibalik ang power sa kabalayan ug mga pamatigayon."We are very thankful to Aboitiz and Visayan Electric for helping us in these difficult times through their quick response in restoring our damaged power lines," matod ni Chatto."Power sufficiency in Bohol will be a game-changer in terms of opportunities for growth," dugang ni Chatto. (PR)

Sagunson nga sports competitions apil sa “Revisitamos Dapitan 1892”

Posted: 19 Jul 2022 03:51 AM PDT

Sunodsunod nga sports competitions ang midugang og kolor sa "Revisitamos Dapitan 1892" festivities sa Zambonga del Norte.Ang kalihukan nagsilbeng paghinumdom sa ika-130 nga anibersaryo sa paghiabot sa bayaning si Jose Rizal sa Dapitan City isip usa ka political exile.Usa man tuod ka historical ug cultural affair ang "Revisitamos Dapitan 1892" apan ang local government sa gitawag og Shrine City pinangulohan nila ni Mayor Seth Frederick "Bullet" Jalosjos ug tourism officer Apple Marie Agolong milakip sa paugnat sa kusog aron mahimo kining mas makapaikag ug alegre.Niadtong Hulyo 16, 2022, gipahigayon ang frisbee competition atol sa pagsugod sa kalihukan.Human sa frisbee event, ang sunod nga nasugdan mao ang mga torneyo sa darts, chess ug tennis unya napahigayon na sab ang Mayor Bullet Jalosjos Invitational Run.Karong Hulyo 22, 2022, sugdan ang amateur mixed martial arts competition unya sundan kini sa night motocross sa Hulyo 23, 2022.Ipahigayon sab karong Hulyo 24, 2022 ang mountainbike cross country ug skate competitions, ang pump boat racing karong Hulyo 28, 2022 unya adunay futsal cup karong Hulyo 30, 2022.Sa pagpahigayon ning grandiyusong kalihukan, ang Dapitan nakigtambayayong sa provincial government sa Zamboanga del Norte nga ubos sa liderato ni Governor Rosalina "Nanay Nene" Jaloslos.Kon buot huna-hunaon, doble kini nga kasaulogan alang sa Dapitanons gumikan kay ipahigayon sab karong Hulyo 25, 2022 ang ilang fiesta nga pahinungod sa ilang mahal nga patron Señor Santiago (Saint James the Greater).

Playoff tinguha sa Rain or Shine

Posted: 19 Jul 2022 03:49 AM PDT

Mga duwa karon3:00 pm- Blackwaterbatok Converge6:00 pm- Magnoliabatok Rain or ShinePahayagon sa Rain or Shine Elasto Painters ang ilang purohan nga makasulod sa quarter-finals sa ilang pagpakigbatok sa Magnolia Manok Timplados Hotshots sa main game karong alas 6:00 sa gabii sa Philippine Basketball Association (PBA) Philippine Cup sa Smart Araneta Coliseum.Ang Elasto Painters kasamtangang naa sa ikawalong puwesto, nga nahimong posible tungod sa tulo nila ka sunodsunod nga mga kadaugan nga nagpasaka sa ilang rekord ngadto sa 4-6.Kon modaog ang Elasto Painters, hayan makaseguro na sila og playoff nga kombati ug aduna pa'y posibilidad nga makaderetso na sila sa quarter-finals, depende sa resulta sa ubang nahabiling mga duwa.Sa ilang bahin, ang Hotshots maoy labing init nga team sa kasamtangan gumikan kay gikan sila sa lima ka sunodsunod nga kadaugan nga nag-alsa kanila sa ikaupat nga luna dala ang 6-3 nga rekord.Sa premirong duwa, magsangka ang Blackwater Bossing ug Converge FiberXers.Ang Bossing naa sa ikalimang dapit dala ang 5-4 nga rekord samtang naa sa ikasiyam ang FiberXers bitbit ang 4-6 nga baraha.

Cellphones, hinagiban sakmit sa Operation Greyhound

Posted: 18 Jul 2022 08:14 PM PDT

GATOSAN ka mga kontrabando nga naglangkob sa mga hinagiban ang nasakmit sa gihimong "Greyhound Operation" sa mga sakop sa Bureau of Jail Management and Penology (BJMP), Philippine National Police ug Philippine Drug Enforcement Agency didto sa Cebu City Jail ug Cebu Provincial Detention and Rehabilitation Center (CPDRC) sa Martes sa buntag, Hulyo 19, 2022.Lakip sa nasakmit nga kahimanan sa mga piniriso ang mga cellphones, screw drivers, gallon sa tubig, baraha, sundang, kutsilyo ug bluetooth speakers.Si Cebu City Jail Warden, Jail Superintendent Jose Rusylvi Abueva, nanghinaut nga mapadali ang paghimo ug ordinansa sa konseho sa dakbayan sa Sugbo kalabot sa "no fly zone" nga magdili sa pagpalupad og drones sulod sa perimeter sa Cebu City Jail ug CPDRC sa may Barangay Kalunasan.Ang drones maoy gituohan nga gamiton sa paghagbong sa mga kontrabando sama sa ilegal nga drugas sa duha ka prisohaon. (BBT, AYB, TPT)

P6.7M nga ecstasy nasakmit sa PDEA

Posted: 18 Jul 2022 06:59 AM PDT

Nadakpan sa mga sakop sa Philippine Drug Enforcement Agency (PDEA) 7, inabagan sa mga personnel sa Bureau of Customs ug Inter-Agency Drug Interdiction Task Group sa Ninoy Aquino International Airport (NAIA), ang usa ka lalaki atol sa gilusad nga controlled delivery operation sa dalan L. Flores, corner Rallos St., Barangay Pasil, Dakbayan sa Sugbo sa ala 1 sa Lunes sa hapon, Hulyo 18, 2022.Ang suspek mao si Lunel Garcia Paden, nagpuyo ra usab sa maong lugar. Nakuha gikan kaniya ang mga pinutos nga ecstasy nga mokabat og 2,977 ka mga tabletas nga gisulod sa grey nga plastic nga gibana-bana nga mobalor tanan og P6.7 million.Matod ni PDEA 7 Director Levi Ortiz nga nakadawat sila og information gikan sa kaulohan nga dunay naabot nga party drugs o naila sa ngalan nga ecstasy gikan sa Netherlands niadtong Hunyo. Ang nakabutang nga ngalan sa gipadad-an mao si Paden.Ang maong kargamento giagi sa NAIA niadtong Hunyo 10, 2022 apan na-detect sa ilang mga kahimanan nga kadudahan ang sulod.Sa dihang gisusi ang sulod, ilang nasuta nga illegal nga drugas hinungdan nga gialerto ang tanang mga ahensya, labi na ang PDEA sa kaulohan.GIPANID-ANGipaubos dayon nila sa surveillance si Paden ug sa dihang nasuta nga nagpaabot sa delivery ang suspek, gilusad dayon nila ang operation.Nakuha usab nila ang ngalan sa nagpadala sa nasud sa Netherlands nga ila nang gi-coordinate sa ilang counterpart sa maong nasud. "Nananghid ta sa atong director general nga mo conduct ta og controlled delivery, ma deliver nato ni sa receiver gyud ug iya gyud nga gidawat ang ecstasy," matod ni Ortiz.Mobalor ang matag usa ka tablet og tag P2,250, diin ang mga arangan lang sa kinabuhi ang makapalit niini.Sigun ni Paden nga gisugo lang siya sa iyang kaila nga naa sa sulod sa bilanggoan nga dawaton ang ipadala nga package gikan sa Netherlands.Gipaubos na nila sa imbestigasyon si Paden alang sa dugang kasayuran sa naabot nga mga tabletas.

Gi-rape samtang 2 anyos nga anak gatan-aw

Posted: 18 Jul 2022 06:50 AM PDT

Usa ka 21 anyos nga inahan gilugos sa ig-agaw sa iyang kapuyo atubangan sa iyang 2-anyos nga anak alas 2 sa Dominggo sa kaadlawon, Hulyo 17, sa Sitio Cubong, Barangay Tubod, lungsod sa Asturias, Sugbo.Si Mercy (tinud nga ngan gipugngan), natulog uban sa iyang 2 anyos nga anak ug usa ka buwan nga masuso dihang nisaka ang suspek nga si Bert (di tinuod nga ngan), 26, nagpuyo sa nahisgutang lugar.Si Police Corporal Jo-ann Pasaylo, sa Women's and Childrens Protection Desk (WCPD) sa Asturias Police Station nga nahinabi sa Superbalita Cebu nagkanayon nga sila si Mercy ug iyang kapuyo ning-report sa kapulisan sa pagka-alas 8:45 sa buntag sa Dominggo.Asoy sa biktima nga samtang natulog siya uban ang duha ka mga bata, nakamata siya dihang si Bert kalit nga nikatkat sa bintana. Dihang nakasulod, gidiretso siya og tuok ug gihulga nga dunay mahitabong dautan kon mosinggit.Si Bert niromansa kaniya ug nanghinol sa pribadong bahin sa iyang lawas hangtud nga nakuha ang iyang pagkababaye atubangan sa duha niya ka mga anak. "Wala makasukol kay nahadlok daw siya nga dunay mahitabo kaniya ingon man sa duha ka mga bata, milampos ang suspek," dugang ni Pasaylo.Human sa kremin nibiya gilayon ang suspek ug nianang pagkabuntag naabot ang iyang kapuyo nga construction worker gikan sa dakbayan sa Sugbo.

PB: Social distancing, barrier sa classrooms di na praktikal

Posted: 18 Jul 2022 05:07 AM PDT

Nanawagan ang Hunta Probinsyal sa Lalawigan sa Sugbo sa Department of Education (DepEd) nga masusi ang karaang mga lagda sa pagpahigayon sa face-to-face classes aron dili mabug-atan ang mga tinun-an ug ginikanan sa pagbalik sa klase karong Agusto.Si Bokal John Ismael "Jimbo" Borgonia nga nangamahan sa resolusyon alang niini nagkanayon nga gikinahanglan nga susihon pag-usab ang mga giya nga sundon sa mga tinun-an sa pagsulod sa klase. Gikinahanglan nga ang lagda nga ipatuman simplified, practicable ug reasonable nga pamaagi.Usa sa gitumbok ni Borgonia ang pagpatuman sa hugot nga social distancing sa mga bata sulod sa classrooms ingon man ang pagbutang sa mga barrier ug pagsul-ob og face shield."Apil na ang sa health and safety protocols nato nga kani lang mask kay nakita man na nato nga ang kanang social distancing, mao nang funny paminawon nga mag social distancing diha sa classroom, lagyo kaayo sila, pero inig gawas sa eskwelahan magtapok, mag-uban ra gihapon magsakay og tricycle, magsakay og sakyanan,"matod ni Borgonia sa interbyu sa Hulyo 18, 2022.Gawas niini, giingong magdugang usab sa gastuhonon ang face shield ug barriers.Dugang niya nga mas maayo nga kon mahuman ang pag-revisit sa guidelines mahatagan sila og update."Usa pa sad na ang kanang mga dagko kaayong glass or plastic barriers nga dili angay nga mao na akong giingon nga makadugang sa gasto, either sa ginikanan or sa mga teacher. Kanang ingon ana hopefully wala na na gi-require sa face-to-face classes kay I think gi-require ni siya sa mga pilot areas so ang update lang gyud sa DepEd, kon kinsay maka qualify for face-to-face classes,"matod ni Borgonia."Mao na akong gi point out exactly nga mga protocol nga dili practical ug realistic with these changing times,"dugang niya.Ang nasudnong kagamhanan nipahibawo nga mobalik na ang face-to-face classes sa Agusto 2022.Gipasabot ni Borgonia nga human sa duha ka tuig nga pagsagubang sa mga Sugboanon ug mga ginikanan sa krisis sa pandemiya, dili na angay pa kining lisudlisuron ug pabug-atan sa rekisitos ug lagda nga magpugong sa mga tinun-an ug mga magtutudlo nga makatungha.

358 ka mga iro, iring nabakunahan atol sa 12th Asong Pinoy Day

Posted: 18 Jul 2022 04:49 AM PDT

Mokabat sa 358 ka mga binuhi nga iro ug iring ang nakapahimulos sa libreng serbisyo gikan sa Cebu City Department of Veterinary Medicine and Fisheries (DVMF) atol sa pagsaulog sa ika-12 nga Asong Pinoy Day niadtong Dominggo, Hulyo 18, 2022.Si DVMF head Dr. Jessica Maribojoc nitug-an sa SunStar Cebu sa Lunes, Hulyo 18, nga ang pagbakuna batok sa rabies, deworming, ug mga bitamina gihatag sa mga binuhing iro ug iring sa Plaza Sugbo.Gawas sa mga serbisyo sa beterinaryo, gitumong usab sa kalihokan ang pagpasiugda sa lokal nga kaliwat sa mga iro nga kasagarang nailhan nga asong Pinoy o "irong Bisaya" sa lumad nga pinulongan."The goal is to encourage people to be responsible pet owners and at the same time raise awareness that aspins are just important as purebred dogs," matod ni Maribojoc.Ang mga duwa sama sa locate your treats gipaila usab sa programa nga giapilan sa mga binuhi ug sa ilang mga tag-iya.Gipakita usab sa DMVF ang pipila ka mga aspin sa venue aron madasig ang mga residente sa pagsagop o pagpadako sa maong kaliwat sa iro.Matod ni Maribojoc, duha na ka mga tawo ang ningpakita og interes sa pagsagop sa mga iro ug nipasalig nga ilang atimanon og maayo.Sa bag-ohay nga mga interbyu, si Maribojoc niingon nga daghang mga tawo ang gusto nga adunay aspin isip ilang mga binuhi tungod kay kini nga mga kaliwat sa mga iro mas resistensyado sa mga sakit sa hayop.Gidayeg usab sa DMVF ang Konseho sa Dakbayan sa paghimo og committee on animal welfare nga magtugot og dugang mga programa alang sa kaayohan ug pagpanalipod sa mga mananap sa siyudad.Ang paghimo og mga animal welfare desk sa matag police station sa dakbayan sa Sugbo gitan-aw usab sa DMVF aron mapalambo ang tubag sa gobyerno sa pag-abandonar ug pag-abuso sa mga mananap.

Krimen sa dakbayan sa Sugbo mikunhod og 50% sa miaging semana

Posted: 18 Jul 2022 04:49 AM PDT

Ang crime volume sa dakbayan sa Sugbo niubos og 50 porsiyento sa miaging semana tungod sa paghimo og kausaban sapagpakatap sa kapulisan.Kini ang gibutyag ni Police Lieutenant Colonel Janette Rafter, deputy city director for operations sa Cebu City Police Office (CCPO) kagahapon, Hulyo 18, 2022.Matod ni Rafter, ang motorcyle patrol gipasulod sa mga hilit nga lugar aron mobadlong sa mga nag-estambay sa gawas bisan sa lawom na nga gabii, labi na kon nag-inom.Ang maong pamaagi una nilang gihimo sa dihang nisaka pag-ayo ang kaso sa coronavirus disease 2019 (Covid-19).Giila kini nga best practice sa nanglabay nga mga buwan uban sa Task Force Kasaligan."During sa pandemic, this is very effective kon makakita mo, wala gyuy crime ato halos. What we did was tanang police nato naa sa sulodsulod nga mga barangay, mga sitios, kana among gi copy karon," matod ni Rafter.Gipasigarbo niya nga niubos og 50 porsiyento ang ilang crime volume sa nilabay pang semana bahin sa 8 focus crimes nga naglakip sa homicide, physical injury, robbery, theft, vehicle theft, motorcycle theft, ug rape.Gibutyag ni Rafter nga gihimo sa CCPO ang innovation sa deployment dihang namatikdan ang pagsaka sa mga krimen nunot sa pagluag sa quarantine restrictions ngadto sa Alert Level 1 status.Daghan nang nanggawas sa kadalanan ug nanumbalik ang normal nga sitwasyon sa libre nga paglihok sa komunidad.Tungod niini, daghang nadakpan sa kapulisan ang nakalapas sa ordinansa sa siyudad ug uban pa nga gipahamtangan og tukmang silot.

PNP giawhag di magdali sa demolisyon sa Apas

Posted: 18 Jul 2022 04:46 AM PDT

Gihangyo sa Cebu City Government ang Philippine National Police (PNP) nga "very circumvent" ug i-verify una ang mga dokumento sa dili pa mohatag og tabang sa demolition o eviction activities sa dakbayan sa Sugbo.Si Acting Mayor Raymond Garcia nisuwat ngadto kang Police Brigadier General Roque Vega sa Lunes, Hulyo 18, 2022, nga nagpahibawo nga ang plano nga demolisyon sa mga balay ug estruktura sa Barangay Apas gikaso pa.Si Garcia niingon nga ang Kagamhanan sa Dakbayan gusto nga mahimong intervenor sa kaso aron "protect the interest of its constituents which it cannot yet suitably relocate."Kinahanglan usab nga susihon sa PNP ang mga hangyo alang sa tabang ug siguraduhon nga ang mga kinahanglanon sa Urban Development and Housing Act (UHDA) natuman, dugang niya.Si Garcia nihisgot nga duna siyay nahibaw-an nga pipila ka mga isyu kalabot sa kaso ug usa niini patay na ang land claimant ug walay nakitang record nga nagpakita sa substitution sa petitioner.Ang Office of the Solicitor General nipatugbaw og usa ka prejudicial nga pangutana, kon ang mga partido nga ginganlan sa Notice to Implement wala ba malambigit sa aktuwal nga kaso, matud niya."Because no ejectment case was filed against them by the lot claimant, Mariano Godinez," tipik sa suwat.Ang proceedings nga nisangko sa pag-isyu sa demolition order nagkinahanglan usab og fact-finding nga ipahigayon sa Konseho sa Dakbayan.Sa kataposan, gitumbok usab ni Garcia nga adunay timailhan sa kapakyas sa pagtuman sa mga lagda ug regulasyon sa Presidential Commission for the Urban Poor, Department of theInterior and Local Government, PNP, ug Cebu City Government pinaagi sa Division for the Welfare sa Urban Poor."It is my hope that your office, in carrying out the mandate of serving and protecting our constituents, we could work together in ensuring that development does not come at the price of leaving the families of our soldiers without home," matod ni Garcia.Ang 4.5 ka ektarya nga Lot 937, giokupar karon sa dul-an sa 200 ka pamilya sa mga retiradong sundawo sa Armed Forces of the Philippines ug nagtukod og asosasyon nga gitawag og Archangels Residents Mergence, Inc. (Armi).Sa interbyu niadtong 2019, si Armi President Anne Martel niingon nga didto na sila nagpuyo sukad pa niadtong 1960 human ang Kagamhanan sa Siyudad nisaad og permanenteng puy-anan sa mga pamilya sa mga sundawo.Ang panagbangi nitumaw niadtong 2010 human si Godinez ni-claim sa propyedad ug nihangyo nga gub-on ang mga estruktura.

Suan: Pagbutang og CR sa floating cottages

Posted: 18 Jul 2022 04:46 AM PDT

Nipasidaan si Cordova town Mayor Cesar "Didoy" Suan sa pagsira sa floating cottages sa lungsod kon mapakyas ang mga tag-iya sa paghatag og igong comfort rooms (CR) sulod ning semanaha.Gipahibawo kini ni Suan atol sa flag-raising ceremony sa municipal hall niadtong Lunes, Hulyo 18, 2022.Hinuon iyang gipasalig sa mga tag-iya nga magpadayon ang ilang operasyon sa kadagatan sa lungsod basta makabutang sila og igong CR sulod sa nahisgutang panahon."Ang walay tarong nga CR, atong ipasira karong semanaha para mapadayon nato ang kalimpyo sa atoang gipanghambog nga atoang kadagatan," matod ni Suan ug nidugang nga siya nakigtagbo na sa mga tag-iya, diin uban kanila di taga Cordova.Matud ni Suan nga maghimo sila og komitiba nga maoy modumala sa floating cottages, lakip na ang fixed cottages, ug layout guidelines nga angay sundon sa mga tag-iya.Namatikdan sa mayor nga ang Department of Environment and Natural Resources (DENR) gikatakdang mobisita ug mosusi sa sitwasyon ug kalimpyo sa floating cottages partikular sa Barangay Poblacion ug Catarman.Kuyogan sila sa Rural Health Unit (RHU), Municipal Disaster Risk Reduction and Management Office (MDRRMO), ug Marine Watch sulod niining semanaha.Niadtong Hulyo 5, si Suan nipagawas sa iyang unang executive order (EO) nga nagdili sa pagtukod og illegal structures sama sa floating cottages, ug uban pa, sa mga legal easement ug sulod sa coastal areas sa lungsod.Kini human siya nakadawat og suwat gikan sa DENR kabahin sa mga floating cottage nga nag-operate sa Barangay Poblacion ug Catarman, nga gikonsiderar nga "no-build zones."Gawas nga iligal nga gitukod sa daplin sa mga easement, si Suan miingon nga kadaghanan sa floating ug fixed cottages gitukod nga walay permit o clearance gikan sa Municipal Government.Sumala sa Administrative Order 2021-07 sa DENR, ang mga legal nga easement "determined to be applied, such that, a three-meter easement zone and a 20-meter easement zone shall be adopted for urban and rural areas, respectively."

Mandaue mogahin og dugang pundo para sa ‘Pasigarbo’

Posted: 18 Jul 2022 04:43 AM PDT

Nagplano ang Dakbayan sa Mandaue nga mogahin og dugang pundo alang sa pagsalmot sa Dakbayan sa umaabot nga "Pasigarbo sa Sugbo," ang kompetisyon sa mga kapistahan sa Sugbo karong Agusto 28, 2022.Si City Councilor Marie Immaline Cortes-Zafra, chairman sa committee on tourism, nitug-an sa mga tigbalita niadtong Lunes, Hulyo 18, 2022, nga nagplano sila nga moisyu og dugang budget alang sa partisipasyon sa Mandaue sa Pasigarbo sa Sugbo gawas sa P1 milyon nga financial assistance nga ihatag sa Kagamhanang Probinsiyal sa mga partisipante.Si Cortes-Zafra dili pa maka-verify kon pila ang budget. Matod niya nga nanawagan usab sila sa Department of Education (DepEd) Region VII nga mohatag og dugang pundo aron makaigo sa panginahanglanon sa pagsalmot niini.Siya niingon nga nagpadala sila og mga imbitasyon sa pipila ka mga choreographer ug nangayo sa ilang pasalig sa pagtabang sa Siyudad sa paghimo og mga plano alang sa maong kalihukan.Dugang niya nga anaa usab sila karon sa proseso sa pagpili og festival queen nga morepresentar sa siyudad.Alang sa mga mananayaw, si Cortes-Zafra niingon nga nagplano sila nga makig-alayon sa DepEd Division of Mandaue aron hangyuon nga mobalik ang mga tinun-an nga nisalmot sa miaging Pasigarbo sa Sugbo nga selebrasyon niadtong 2019 alang sa Mandaue.Gihimug-atan sa konsehal sa dakbayan nga ang pagsalmot og balik sa maong mga tinun-an isip mananayaw makahatag og sayon ​​nga pagpangandam sa dakbayan sanglit nasayod na sila sa dagan sa kalihokan.

P884K nga illegal drugs nasakmit sa buy-bust

Posted: 18 Jul 2022 04:42 AM PDT

Mokabat sa P884,000 nga kantidad sa gituohang shabu ang nasakmit atol sa buy-bust nga gipahigayon sa Mandaue City Police Office (MCPO) ug Philippine Drug Enforcement Agency (PDEA) 7.Giila ang suspek nga si Jude Troyo Tahanlangit, alias "Butsang," 42, taga Upper Lucimba, Poblacion Pardo, dakbayan sa Sugbo.Ang operasyon gihimo niadtong Dominggo, Hulyo 17, 2022, sa Purok Orchids, Brgy. Opao, Mandaue City, nga gipangulohan ni Police Major Philip John Dealagdon Libres ug sa iyang team.Si Pol. Lt. Col. Franco Rudolf Oriol, deputy city director for operations ug spokesperson sa Mandaue City Police Office, nitug-an sa SunStar Cebu sa Lunes, Hulyo 18, nga si Tahanlagit gipaubos sa surveillance sa MCPO sulod sa duha ka mga semana ug giilang usa sa ilang high-value drug personality sa lebel sa siyudad.Ang durugista mahimong ma-tag nga high-value kon makabaligya siya og minimum nga 200 gramos sa bisan unsang drug substances matag semana, matod ni Oriol.Matod niya nga alang kang Tahanlangit, makabaliyga siya og hangtod sa 500 grams nga drugas matag semana sulod sa mga dakbayan sa Mandaue ug Lapu-Lapu ug pipila ka bahin sa Northern Cebu.Nakuha gikan sa suspek ang gibana-banang 130 gramos sa wala matinong iligal nga drugas lakip ang buy-bust money.Si Tahanlangit gitanggong karon sa MCPO Police Station 5 sa Brgy. Opao, samtang ang drug evidence giduso sa Regional Field Unit (RFU) 7 alang sa laboratory analysis.Mag-atubang siya og kaso sa paglapas sa Section 5 ug 11 sa Article 2 sa Republic Act 9165 o Comprehensive Dangerous Drugs Act of 2002.

Pulis sa Samar patay sa engkwentro

Posted: 18 Jul 2022 04:41 AM PDT

Usa ka pulis ang napatay human sa engkwentro sa gidudahang mga miyembro sa mga rebeldeng New People's Army (NPA) sa Samar niadtong Sabado, Hulyo 16, matod sa Philippine National Police (PNP) sa Lunes, Hulyo 18, 2022.Sa report nga nakaabot sa Camp Crame, ang namatay giila nga si Patrolman Mark Monge, 28, kinsa nadestino sa 804th Maneuver Company, Regional Mobile Force Battalion 8.Ang taho nagkanayon nga ang tropa nagpahigayon og combat operations sa boundary sa Barangay San Nicolas sa lungsod sa San Jose De Buan ug Barangay Mabuhay sa Gandara, diin ilang nasugatan ang dul-an sa 10 ka miyembro sa teroristang grupo.Nilungtad og mga lima ka minuto ang engkwentro, diin ang mga miyembro sa NPA nisibog sa lugar.Sa laing taho, ang kapulisan nag-ingon nga ang mga tropa nagpahigayon og "humanitarian activity" sa dihang sila "kalit nga gipabuthan sa mga miyembro sa CTG (communist terrorist group) gikan sa bisan asa.""With the death of Pat Monge, we, in the PNP strongly condemn such treacherous act made by CTG members. We will not cease in chasing the perpetrators. The CTG is one of the roots of poverty in the hinterland areas of Eastern Visayas, and this has to end. We will be more intensified in our campaign against insurgency," matod ni Eastern Visayas Police Chief Brigadier General Bernard Banac.Sa iyang pakigpulong atol sa flag raising ceremony sa Camp Crame niadtong Lunes, si PNP officer-in-charge Lieutenant General Vicente Danao Jr. niingon nga ang mga pulis nag-apod-apod og ayuda (pinansyal nga tabang) dungan sa pagpahigayon og medical mission sa lugar sa dihang sila "gi-ambush."Gikondenar ni Danao ang maong hitabo, kay subli niyang gisupak nga buhion ang peace talks sa rebeldeng grupo, ingon man ang paghatag og amnestiya.Niadtong Biyernes, Hulyo 15, ang National Task Force to End Local Communist Armed Conflict (NTF-Elcac) niingon nga girekomendar ni Presidente Ferdinand "Bongbong" Marcos ang pagtanyag og amnestiya sa mga sakop sa NPA."Nakakaiyak lang. Hindi naman sana anti-criminality operation 'yung ginawa ng mga bata doon. They are there to give assistance to the poorest of the poor pero unfortunately you ambushed them," matod niya. (SunStar Philippines)

Editoryal: Hilom nga misaka

Posted: 18 Jul 2022 04:39 AM PDT

Samtang ang tanan nakatutok sa presyo sa lana ug mga palaliton nga nagpunay og saka, ingon man sa dengue fever nga naghamok sa nasod, hilom usab nga misaka ang mga kaso sa coronavirus disease 2019 (Covid-19).Niadto lang Dominggo, Hulyo 17, ang mga kaso sa Siyudad sa Sugbo nitala og 20 kapin sa usa lang ka adlaw. Hayan labing taas sa nakalabay nga mga buwan sukad nikalma ang kadaghanon sa mga kaso. Wa nahitabo ang surge nga gikahadlukan bisan sa panagtapok sa daghang mga tawo atol sa kampanya. Mao nga ang mga eksperto nanagna nga hayan sa Agusto mobalik ang surge sa mga kaso, labina kay ingon sa miubos og maayo ang kadaghanon sa mga nagpabakuna. Hinuon, ang konsuwelo kay di kini sama ka taas sa nangaging surge, dugang nila.Mas makadaut karon sa ekonomiya kon mahitabo na usab ang laing surge tungod kay ang kalibutan naa karon sa tumang kalisod. Gani, gipanagna nga ang Estados Unidos, labing adunahan ug labing dakong ekonomiya sa kalibutan, mag recession. Kanang ang ekonomiya mohunong sa pagtubo. Tingali, daghan sa mga Pinoy karon, apil na ang mga Sugboanon, kompyansa na tungod sa pagminos sa mga kaso sa Covid-19, di lang dinhi sa nasod, kon di sa tibuok kalibutan. Mao ni hayan ang hinungdan nga daghan ang wa nagpakabana sa pagpabakuna. Naay uban nga wa na lang nagpa booster.Nasuta sa Dept. of Health (DOH) nga ang labing taas nga nakab-ot sa mga lokalidad sa mga nagpa booster shot naa lang sa 50 porsiyento. Kasagaran naa sa ubos kaayo ang gidaghanon. Ang Central Visayas naa lang sa kapin sa 30 porsyento. Hinaut pa nga ang publiko makaamgo nga bisan sa pagminos og maayo sa mga kaso, naa gihapon ang presensya sa kagaw sa Covid-19. Ang padayong pagpanakod nagpakita nga di gihapon angay kompyansahan. Naa gihapon gani nangamatay.Ato gihapong panalipdan kanunay ang atoang kaugalingon pinaagi sa kanunay nga pagsunod sa mga health protocol.

Tubilan: Way eleksyon sa barangay, SK

Posted: 18 Jul 2022 04:39 AM PDT

Mosamot ang pagmug-ot niadtong mga tawo nga nangandam na alang sa piniliay sa barangay ug Sangguniang Kabataan (SK) nga gikatakda na unta karong Disyembre ning tuiga. Dako na usab og gasto ang uban nga buot mokandidato kay daghan na silang mga kalihokan ug programa nga gipahigayon isip pangandam sa eleksyon.Apan daghan nang mga sakop sa Kongreso ang nisang-at og balaudnon dihang misugod ang ilang gimbuhaton niadtong hapon sa Hunyo 30 nga ioktaba lang ang una ang piniliay sa barangay ug SK karong tuiga. Apil si Kong. Rachel Marguerite "Cutie" del Mar sa Cebu City north district sa mga unang kongresista nga ningsang-at og balaudnon nga di lang una ipahigayon ang bugnong lugaynon sa barangay ug SK.Si Senador Francis "Chiz" Escudero nisang-at usab og balaodnon sa Senado nga supak alang sa piniliay sa barangay ug SK. Buot ni Escudero nga sa ikaduhang Lunes sa Mayo sunod tuig na ang piniliay ug di ipahigayon karong Disyembre 5 ning tuiga. Nitataw ang senador nga ang P8.44 bilyones nga pundo nga gigahin niini mas maayong gamiton alang sa problema nga atong gisagubang sa Covid 19 pandemic, pagsaka sa presyo sa petrolyo, inflation ug padayong kakabus.Ang gihisgutan nga pundo ni Escudero dako na kaayo og matabang ning gisagubang nga mga problema karon sa nasod, ilabi na nga nagsangkiig pa ang atong ekonomiya nunot sa nagpadayon pa nga pandemya. Gawas niini, bag-ohay pa usab kitang nabahinbahin sa Mayo 9 nga piniliay. Gani, lab-as pa kaayo sa uban ang ilang nagkaaslom nga relasyon nga hangtod ning higayona wa pa sila magkabalik, ilabi na kadtong usa ra ka pamilya.Mosamot ang kaaslom sa ilang relasyon kon dugangan pa usab sa laing bugnong lugaynon karong Disyembre. Ang eleksyon sa barangay ug SK personal nga bugno nga bisan ang pamilya mag-atbang pa kay lagi lahi man kon naa kay huptan nga gahom ilabi kon naa sa barangay.Sa akong obserbasyon, daghang mga kongresista ug senador ang mosuporta nga di madayon ang eleksyon tungod kay nibalit-ad ang ilang bulsa sa bag-ohay lang natapos nga eleksyon.Asa man sila kuha'g ilang salapi nga mao pa may pagsugod nila sa ilang katungdanan? Gawas niadtong mga pulitiko nga wa magsalig sa panguwarta sa gobyerno kay aduna may negusyo nga kakuhaan og pundo. (josephelvirtubilan@gmail.com)

Tambagi ko Noy Kulas: Sekreto sa manager

Posted: 18 Jul 2022 04:35 AM PDT

Dear Noy Kulas,Tagoa lang ko sa name nga Ella. Nag work ko sa usa ka dako nga company. I am still single bisan hapit na ko mag middle age.Naa may daghang nanguyab pero mahadlok na ko og commitment. Weird lang kay naa koy secret relationship sa among manager nga ambot ma magnet man ko ani niya.Naglibog ko asa ko naigo ani niya. Gipaagi ra niya og text ug call ang sugod sa among relationship until nga naka yes ko niya.Sa office, we look so normal but sa gawas nga kami lang duha in private room, kayo dayon ming duha.Of course, pirme ko nag protect sa akong self nga di ko momabdos.Pero nagkadugay ang among relationship, nakaamgo ko nga palami ra ning iyaha sa akoa kay magkaestorya lang mi if mang check in.Of course sa office pud but work related. Seldom kaayo nako ma share ang akong problems.Lately, mobalibad na ko niya but naa juy time mingawon ko, maka yes na sab ko. Unsa kahay akong buhaton, Noy?Unsaon man nako sa paglikay niya? Tinuod, naay time mingawon ko niya og maayo. Galibog ko sa unsay akong buhaton. Naa kay ikatambag?ELLAEl,Di man sab na diha-diha nga imong mahimo ang paglikay. Sama sa addiction, di diha-diha nga imo dayon nang mabiyaan but sa imo nang giingon, usahay na lang ka matintal. But 'gaano kadalas ang minsan' mao ang pangutana? Until nga one day, makabantay ka lang nga maka resist ka na sa tentasyon.Huna-hunaa lang kanunay kanang imong giingon nga palami ra ang iyang giapas nimo. Sakto kaayo ka. Kay kon di, mohatag na siya og time nimo nga kamo lang duha nga manuroy sa layo nga lugar kay naa man kaha na siyay kaya? Or mang invite og lunch o dinner bisan panagsa. Aron di obvious, kuyog ba ang imong mga kauban sa office. Ing ana lang aron makakita og time uban nimo.But lig-on nimong armas mao ang pag-ampo kanunay sa Ginuo. Kana dali ka maka overcome.NOY KULASrojval69@yahoo.com

600K ka tinun-an hatagan og school supplies sa Kapitolyo

Posted: 18 Jul 2022 04:35 AM PDT

Giandam na sa Kagamhanan sa Lalawigan sa Sugbo ang school supplies nga ipang apod-apud sa 600,000 ka mga tinun-an gikan sa kindergarten hangtod sa grade 12 sa pampublikong mga tunghaan sa probinsya.Gibutyag ni Cebu Governor Gwendolyn Garcia nga subay sa gilaumang pagbukas sa klase sa Agusto, gikompleto na sa Kagamhanan ang mga pad paper, bags, ballpens, crayons alang sa mga tinun-an."Yes, the other items are already ready. We are just finalizing kay ang mga notebooks gikompleto pa, ang mga pad paper, bags, ballpens, crayons for the kindergarten students. Those are already available. Ang notebooks nahangyo na sad namo ang presyo at least August or September lang, we're talking here of 600K from Kinder to K12,"matod ni Garcia.Una na nga nipahibaw ang gobernador nga iyang ibalik ang pag-apod-apud sa naandan na nga school supplies sa mga tinun-an aron maluagluagan ang gastohanan sa mga ginikanan sa gikinahanglan sa ilang mga anak.Subay sa pagsugod sa klase, gustong banhawon ni Garcia ang nutrition program sa mga tunghaan pinaagi sa pagpalapad sa Sugbusog ug Sugbo Negosyo program sa kagamhanan.Gusto ni Garcia nga himuon ang pagpananom sa mga tunghaan diin ang mga ani maoy gamiton sa feeding ug nutrition program.Ning tuiga, gilaraw ni Garcia nga mas palambuon ang mga tunghaan ilabi na nga mao kini ang labing unang higayon nga mahibalik na sa pagtungha sa physical nga paagi ang mga tinun-an sa probinsya sukad sa pagtumaw sa pandemya sa nasud.

CV duna nay dul-an 1K ka mga kaso sa Covid-19

Posted: 18 Jul 2022 04:33 AM PDT

Ang Central Visayas nakatala na og dul-an sa 1,000 ka aktibong mga kaso sa coronavirus disease 2019 (Covid-19) niadtong Dominggo, Hulyo 17, 2022, diin unom ang nangamatay sulod lang sa usa ka semana.Base sa Covid-19 tracker sa Department of Health (DOH) 7, ang rehiyon adunay 923 ka aktibong mga kaso human kini nakatala og 58 ka bag-ong mga kaso niadtong Dominggo.Ang Dakbayan sa Sugbo maoy adunay labing taas nga ihap sa aktibong kaso sa tulo ka highly urbanized cities (HUCs) ug upat ka probinsiya sa rehiyon nga adunay 503, human kini naka-report og 29 ka bag-ong mga kaso.Nakatala usab ang Probinsiya sa Sugbo og 150 ka aktibong kaso sa Covid-19 nga adunay siyam ka bag-ong kaso, gisundan sa Mandaue City nga adunay 78 ka aktibo nga kaso ug tulo niini ang bag-o samtang ang Bohol adunay 74 ka mga aktibo nga kaso ug siyam ang bag-o.Ang Negros Oriental ug Lapu-Lapu City nakatala usab og 66 ka mga kaso sa Covid-19 nga adunay lima ka bag-ong mga kaso ug 51 ka aktibo nga kaso nga adunay tulo ka bag-ong kaso, matag usa.Nakatala usab ang Siquijor og usa ka kaso sa Covid-19 nga aktibo kaniadtong Hulyo 17.570 BAG-OSa report sa DOH 7, mokabat sa 570 ang bag-ong mga kaso sa Covid-19 ug unom ang nangamatay, nga natala sa Central Visayas gikan sa Hulyo 10 hangtod sa Hulyo 16.Ang adlaw-adlaw nga average sa bag-ong mga kaso sulod niining semanaha giingon nga 81, nga 50 porsyento nga mas taas kon itandi sa mga kaso nga natala gikan sa Hulyo 3 hangtod na sa Hulyo 16.Mokabat sa 51 ka mga pasyente sa Covid-19 nga na-admit sa mga ospital ang gikataho nga naa sa kritikal nga kahimtang kaniadtong Hulyo 16.Dugang pa niini nga 10 porsyento sa 113 nga intensive care unit (ICU) nga mga higdaanan nga gitagana alang sa mga pasyente sa Covid-19 ang naokupar ingon man nagamit ang 32.52 porsyento sa 1,360 nga non-ICU Covid-19 nga mga higdaanan sa samang adlaw.Tungod niini, giawhag sa departamento ang publiko nga ipadayon ang pag-obserbar sa minimum nga health protocols, sama sa pagsul-ob og best-fitted face mask ug pagpabilin sa well-ventilated nga mga lugar kutob sa mahimo bisan pa kon sila gibutang ubos sa Alert Level 1 o Alert Level 2.Giawhag usab nila ang publiko nga ilain dayon ang ilang kaugalingon kon adunay mga simtomas sa Covid-19 aron malikayan ang dugang nga transmission.PAGBAKUNASamtang, ang Central Visayas niabot na sa 71.99 porsyento o 4,758,302 ka fully vaccinated nga indibidwal o kadtong nakadawat og duha ka dose sa Covid-19 vaccine o single dose Janssen vaccine sugod niadtong Hulyo 15.Nabakunahan usab sa rehiyon ang 4,979,580 ka mga indibidwal alang sa una nga dose o bakuna nga usa ka dose, nga hapit moabot sa 71.01 porsyento sa target nga populasyon nga 6,572,248.Ang dakbayan sa Mandaue maoy nag-una sa paglusad sa pagbakuna tungod kay nakatala sila sa labing taas nga rate sa fully vaccinated nga mga indibidwal nga adunay 103.44 porsyento o 342,233 ka mga indibidwal sa 330,860 nga target nga populasyon.Gisundan kini sa dakbayan sa Lapu-Lapu nga adunay 101.37 porsyento o 377,431 ka fully vaccinated nga indibidwal sa 372,333 nga target nga populasyon.Hingpit usab nga nabakunahan sa Siquijor ang 92.47 porsyento o 76,048 ka mga indibidwal sa 82,244 nga target nga populasyon samtang ang dakbayan sa Sugbo nakabakuna og 91.19 porsyento o 767,558 ka mga indibidwal sa 841,724 nga target nga mabakunahan.

Taiheiyo Japan mihatag og mga gamit batok sa Covid-19

Posted: 18 Jul 2022 04:20 AM PDT

Nihatag ang Taiheiyo Cement Corp. (TCC) sa Japan og mga kasangkapang medikal ug pagpanalipod ngadto sa kagamhanan sa lungsod sa San Fernando.Tukma ang pag-abot ini sa nasud sa pagkusog sa pagkatap nga Omicron variant sa Covid-19 ug mikidlap sa pagsulbong sa mga positibong kaso sa Sugbo sa sayo pa ni'ng tuiga. Nagamit kini sa hingpit sa lokal nga pangagamhanan.Nangunay sa pagtunol sa donasyon si Yoshihito Izawa, pangulo ug CEO sa Taiheiyo Cement Philippines, Inc. (TCPI) nga sanga sa TCC, ngadto kang Mayor Lakambini Reluya atol sa iyang pagbisita sa wala pa ang piniliay.Gipahibalo ni Izawa ang mayor ug si Bise Mayor Ricci Reluya sa kalamboan sa renewal project sa kompaniya nga mipuhonan ang TCC og P15 bilyones.Niuban ang tagdumala sa planta, Tatsushi Sasao, nga mao sab ang senior vice president (SVP) for operations, ug SVP for administration nga si Takuya Nose sa pagbisita.Gitunol sa mga expats ang 400 ka mga personal protective equipment (PPE) nga naglakip sa mga hazmat (hazardous material) suits nga may linyang asul, malabay nga mga gwantis ug KN95 nga mga face mask.Gipahigayon in Zenith Rubi, tagduma sa human resources and administration division, ang paghatud nga naglakip sab sa 100 ka mga karton sa face masks, 20 ka galon nga 70 porsyentong alkohol ug ibang kagamitan.Gipasalamatan sa inahan ug anak nga nangulo sa lungsod ang TCC ug TCPI sa ilang pag-abag kay nahitsas sa kasangkapan ang mga health frontliners ug emergency responders nga nakapadasig nila nga dili mahadlok sa kagaw.Sa ilang pakighinabi, gipahibalo sa TCPI CEO ang mayor kabahin sa pagbungkag unya sa karaang mga istraktura sulod sa planta sa pagsugod sa proyekto, dayon ang pagpanukod ug pagpahiluna sa bag-ong mga ekipo. (PR)

Bolts sulod sa q-finals

Posted: 18 Jul 2022 04:19 AM PDT

Nakaseguro na og puwesto sa quarter-finals ang Meralco Bolts human nila gipangpukan ang San Miguel Beermen, 89-86, sa main game niadtong Dominggo sa gabii, Hulyo 17, 2022, sa Philippine Basketball Association (PBA) Philippine Cup sa Smart Araneta Coliseum.Ang Bolts ningsaka sa ikalimang dapit bitbit ang 6-4 nga rekord. Naselyo na man tuod sa Bolts ang ilang pagsulod sa quarter-finals apan nagkinahanglan gihapon silang modaog sa katapusan nilang tahas aron makalikay og twice-to-beat nga kontra sa quarter-finals.Ang top two teams mao ang makagunit og twice-to-beat nga bintaha sa quarter-finals batok sa No. 7 ug No. 8 teams samtang ang laing duha ka mga parisan magkombati pinaagi sa best-of-three series.Sa ilang bahin, ang Beermen nakahuman na sa ilang tahas sa elimination round bawon ang 9-2 nga rekord.Ang Beermen maoy No. 1 team bisan pa sa kapildihan.Gipangulohan ni Allein Maliksi ang Bolts pinaagi sa iyang 18 puntos, nihatag og 16 puntos si Chris Newsome samtang niamot og 15 puntos si Aaron Black.Sa ilang bahin, ang Beermen gipangulohan ni JuneMar Fajardo pinaagi sa iyang 21 puntos, nitunol og 14 puntos si CJ Perez samtang ning-amot og 12 puntos matag usa sila si Marcio Lassiter ug Vic Manuel.Sa laing duwa, gipanghubog sa Brgy. Ginebra Gin Kings ang NorthPort Batang Pier, 100-93.Sa kadaugan, ang Gin Kings nakakuha og arang-arang nga luna sa quarter-finals gumikan kay segurado na silang makalikay og twice-to-beat nga kontra.Kasamtangang naa sa ikatulong dapit ang Gin Kings dala ang 7-3 nga rekord samtang ang Batang Pier nag-ung-ong na sa pultahan sa sayong panamilit bitbit ang 3-7 nga baraha.

Gilas gikastigo sa New Zealand

Posted: 18 Jul 2022 04:19 AM PDT

Nasugamak ang Gilas Pilipinas sa dakong kapildihan sa mas tag-as ug mas dagko nga New Zealand cagers, 92-75, niadtong Dominggo sa gabii, Hulyo 17, 2022, sa FIBA Asia Cup sa Istora Senayan sa Jakarta, Indonesia.Ang kapildihan nagtukmod sa Gilas ngadto sa knockout playoff game diin ilang ikaharong ang Japan karong alas 10:00 sa gabii.Ang batan-ong puwersa sa Gilas nakakombati pa og insakto sa 1st half diin ningbangon kini gikan sa 15 puntos nga pagkalubong nga ilaha na lang gihimong lima ka mga puntos, 41-36.Apan pagsugod sa 3rd quarter, gipahimuslan na sab sa New Zealand ang ilang bintaha sa tapad aron inaton pagbalik ang ilang labaw ngadto sa 19 puntos, 65-46.Nagkanayon si Gilas coach Chot Reyes nga sa 1st quarter, nakita na niyang daan ang kapildihan sa iyang puwersa human gidominar sa Kiwis ang rebound department."Well, we lost the game in the first quarter," pasabot ni Reyes. "We got outrebounded by 33 rebounds, so there's no chance and there's no way for us to win a ballgame and getting outrebounded that way."Puntos matag usa:New Zealand (92) - Cameron 18, Murray 16, Perrott-Hunt 12, Smith-Milner 11, Davidson 10, Britt 8, Fahrensohn 7, Hunt 4, Timmins 4, Mennenga 2.Gilas Pilipinas (75) - K. Ravena 17, Quiambao 14, Tamayo 14, Parks 10, T. Ravena 7, Erram 6, Belangel 4, Abando 3, Navarro 0, Lopez 0, Chiu 0, Abarrientos 0.

Cebu Riders naay lisod nga misyon

Posted: 18 Jul 2022 03:37 AM PDT

Adunay siyam ka Pinoy motorcycle riders nga gipangulohan sa Sugboanong si Zandro Fajardo ang mosagubang og usa ka malisod nga misyon sa gawas sa nasod.Ang grupo mobadlas sa OZ Racing Motorcycle Adventure Gear-Riding High Khardung La sa Leh district sa Indian union territory sa Ladakh.Ang kalihukan mosugod karong Agusto 20, 2022 ug mahuman sa Septiyembre 1, 2022.Si Fajardo, kinsa usa ka sportman-businessman sa Sugbo, mipahibalo nga suwayan nila pagsubay ang labing taas nga dalan sa tibuok kalibutan nga maagian ra og motorsiklo.Ning maong tahas, ang grupo mosubay sa hagip-ot nga dalan sa Himalayas sa India nga adunay 1,300 ka mga kilometro ang gitas-on ug 18,380 feet above sea level."If you are a passionate adventure rider and want to go to new heights, literally, this is the journey for you," pamahayag ni Fajardo.Kauban ni Fajardo sa labing unang international motorcycling touring event sa OZ Racing mao sila si Joel Yuga, Jojo Yu, Camilo Bacalso Dacua, Christian Silva Netto, John Jedrick Syren, Wesley Syren, Kenneth Jude Timtim Villagonzalo ug Aristotle Dionisio.Gipasabot ni Fajardo nga tinguha nilang makahatag og dungog sa Pilipinas hinungdan nga dili nila atrasan kining maong malisod nga misyon.Nagsuporta sa grupo ning maong 12 ka mga adlaw nga tahas mao ang Colokal (Explore beyond the usual).

RP women’s football team kampyon sa AFF

Posted: 18 Jul 2022 03:33 AM PDT

Nakakulit na sab og kasaysayan ang Philippine women's football team human nila gipangbuntog ang Thailand, 3-0, nga naghatag kanila og gold medal sa 2022 AFF Women's Championship niadtong Dominggo sa gabii, Hulyo 17, 2022 sa Rizal Memorial Football Stadium sa Manila.Mao kini ang labing unang titulo sa Pinay footballers sa usa ka international event.Pipila na sab ka mga kasaysayan ang nakulit sa team nga nagsugod niadtong Pebrero, 2022 human kini naka-qualify sa labing unang higayon sa FIFA Women's World Cup nga ipahigayon sa sunod tuig."We're so happy to do this for our country, and to do it home. We couldn't be happier to bring this championship here -- the first one ever," matod ni Philippines captain Tahnai Annis nga napatik sa www.abs-cbnnews.com."We're just so proud of everyone, and so happy that we could do it on home soil."

Espinoza: Mga magtutudlo nga wa magpabakuna

Posted: 18 Jul 2022 02:13 AM PDT

NIADTONG hapon sa Dominggo, kalit lang mibunok ang ulan. Sa wala pay usa ka oras nga pag-ulan, daghan na ang mga dapit sa dakbayan sa Sugbo nga nabahaan. Sa Pardo, sa dapit unahan sa luyo sa simbahan, kusog kaayo ang bul-og sa tubig gikan sa kanal nga morag kolor de leche ug kusog mga midagayday padulong sa mga dalan ug sa highway.Gani, nabalita nga didto sa habagatan sa probinsya sa Sugbo, daghan ang mga dalan nga nadaut ug dunay mga dapit nga nidahili ang bukid tungod sa kusog nga ulan. Lahi na gyud ang dagan sa panahon karon kay sa kaniadto.Panahon na sad Cebu City Mayor Mike Rama nga magsugod na og panglimpyo sa mga kanal ang imong tawo sa Department of Public Services (DPS) kay miabot na ang panahon sa ting-uwan aron malikayan ang pagbaha sa kadalan sa dakbayan sama sa miaging mga tuig nga mora og suba ang ubos nga bahin sa Mango Avenue.Ang pagbaha maoy usa sa mga hinungdan sa sakit ug kadaut sa mga komunidad ug kabtangan sa katawhan ug mga negosyo. Maayo unta og di na masundan ang mga panghitabo kaniadto nga dali ran ga bahaan ang dalan Colon.***Motuo mo og sa dili, apan tuo na lang aron ta madali, nga dunay 144 ka mga magtutudlo sa public schools sa dakbayan sa Lapu-Lapu nga hangtud karon wala magpabakuna batok sa Covid-19. Ang mga senior citizen kaduha na nga nahatagan sa ilang booster shoots, apan kining 144 ka magtutudlo hadlok nga matusok sa gamay nga dagum sa injection.Si Lapu-Lapu City Mayor Ahong Chan wala mahimuot sa maong taho nga dunay 144 ka mga magtutudlo sa iyang dakbayan nga hangtud karon wala magpabakuna. Ang wala mabakunahi dili makasulod ug nga motudlo sa klase basi mando sa Department of Education.Matud ni Dr. Wilfreda Bongalos, DepEd Lapu-Lapu City division superintendent, nga dunay kwatro porsento sa 3,672 ka magtutudlo sa mga eskuylahan sa dakbayan sa Lapu-Lapu nga wa magpabakuna hangtud karon. Ngano kaha? Hayahay kaayo ni silang 144 nga wa mabakunahi kay modawat sa sweldo nga di motrabaho kay di man sila makaatubang og tudlo sa estudyante tungod kay dili bakunado batok sa Covid-19.Matud sa DepEd nga moabli ang elementarya ug sekondarya sa face-to-face classes sa Nobyembre 2, 2022 bisag unsa pa unya ang alert status batok sa Covid-19 sa usa ka dapit. Unya, matud ni Bongalos, tungod sa kakuwang sa mga magtutudlo, ang kadtong mga dili bakunado ilang patudloon sa klase.Apan mahimo diay nga mosulod sa klase ang mga estudyante nga wala pa mabakunahi kay, matud pa, wa gidili ni Bise Presidente ug DepEd Secretary Sara Duterte. Hinuon, ipatuman gihapon ang social distancing sa sulod sa classroom. Sa ato pa, mahimo ra sad nga motudlo ang mga magtutudlo nga wa pa mabakunahi.

Footbridge karaan na

Posted: 17 Jul 2022 07:39 AM PDT

Usa ka bahin sa footbridge sa Mananga River nga nagdugtong sa Barangay Lawaan 3 ug Barangay Lagtang sa dakbayan sa Talisay naputol hinungdan sa pagkahulog sa duha ka mga batang babaye ug lalaki nga nagpangidaron og 12 kagahapon sa hapon, Hulyo 17, 2022.Si Patrolman Kimjohn Amolo, desk officer sa Talisay City Police Station, nagkanayon nga ang duha ka mga bata nangaangol human naputol ang kable niini ug natagak sa suba nga nagbaha.Dugang ni Amolo, dali nga gidala ang duha ka mga bata sa mga miresponde nga mga sakop sa Emergency Medical Services (EMS) sa Talisay City Disaster Risk Reduction and Management Personnel.Si Lawaan 3 Barangay Captain Frederick 'Reggie' Marababol nibutyag nga ang babaye nga bata kay apo sa usa sa iyang mga sakop nga Barangay Health Worker (BHW) samtang ang lalaki nga bata kay taga Barangay Lagtang.Matod ni Marababol, ang babaye nga 12 anyos gikan sa ilang barangay dihang misaka ang tubig sa Sityo Cadicay sa Lawaan 3 ug niadto kini aron motan-aw sa sitwasyon apan wala damha nga dunay kable sa taytayan ang naputol.Dugang niya, ang maong footbridge temporaryong gisirad-an tungod sa kasamtangang kondisyon nga gubaon ug usa na lang ka kable ang nagkupot niini.Apan wala mabantayi ang pagtungtong sa mga bata sa footbridge.Si Marababol nidugang nga nagkasinabot na sila sa kapitan sa Barangay Lagtang nga pabantayan og barangay tanod ang matag habig nga agianan nga footbridge.Gikataho nga ang maong footbridge karaan na ug nagpangidaron og dili mominos sa duha ka dekada.Karong adlawa, Hulyo 18, 2022, bisitahan sa mga sakop sa Engineering Department sa Talisay City Hall ang maong naputol nga taytayan aron matrabaho dayon sa labing daling panahon.

Pulis gipaak sa iro, wanted nakasibat

Posted: 17 Jul 2022 07:36 AM PDT

Pulis gipapaak sa iro hinungdan nga wanted nakaeskapo dihang dakpon na unta sa Purok 11, Barangay Bunga, dakbayan sa Toledo, alas 12:30 sa udto sa Dominggo, Hulyo 17, 2022.Si Police Staff Sgt. Benjamin Engaling maoy nagsilbi sa warrant of arrest nga giisyu ni Judge Judelyn Hugo Tapia Menchavez sa Regional Trial Court (RTC) 7 sa Toledo City nga gipetsahan og Hulyo 1, 2022, batok kang Vincent Alegado Espinosa, hingkod, kinsa nag-atubang og kasong kalapasan sa Presidential Decree (PD) 705 o illegal cutting of trees.Si Police Staff Sgt. Franklin Jaranilla sa Toledo Police Station nagkanayon nga si Engaling, uban niya, ug si Police Staff Sgt. Ivan Lloyd Nillas Carvellida nga nag-serve sa warrant arrest apan pag-abot nila sa lugar mga 10 metros gikan sa panimalay ni Espinosa, ang kapuyo nga si Rechie Candilada Secretaria, 30, nising-it nga "dagan kay naay pulis!"Nakadagan si Espinosa ug gigukod sa kapulisan apan ang kapuyo nga si Secretaria nibuhi sa ilang upat ka mga iro nga hiniktan ug agresibong ning-ataki sa mga pulis busa usa kanila ang napaakan sa tuong bagtak samtang, ang wanted kay nakasibat."Isoga, Sir, sa mga iro gihamagan mi, bisaya ra pero grabi manghambat, napaakan gyud si Police Staff Sgt. Engaling. Unya kami, wala nay nahimo pagsikop sa wanted kay nagkuha na lang mig kahoy aron dili makaduol namo ang mga iro," matod ni Jaranilla.Giasoy niini nga nakakupot og kahoy ang iyang kaubang pulis ug kawayan usab iyang gikuptan sa pagbunal sa iro.Ang usa ka iro ang ilang nadakpan ug gihikot pagbalik sa kadena apan ang tulo ka mga iro wala madakpi kay pwerting isuga ug manghambat."Gituyo gyud aning bayhana kay kabalo na siya nga dakpon iyang kapuyo, dali kaayo siya nakabuhi sa iro human misinggit nga naa mi," sumala ni Jaranilla.Si Engaling gipatambalan dayon sa doktor.Si Secretaria, kapuyo sa wanted, way trabaho ug molupyo sa nahisgotang dapit, gipusasan ug mag-atubang og kasong kalapasan sa PD 1829 o obstruction of justice.

Kontrata ni Dr. Loreche gihikay na sa Kapitolyo

Posted: 17 Jul 2022 07:35 AM PDT

Gi-draft na sa kagamhanan sa probinsya sa Sugbo ang kontrata ni Dr. Mary Jean Loreche, ang kasamtangang chief pathologist sa Department of Health (DOH) 7 sa pagpalambo ug pag-monitor sa mga ospital sa probinsya.Gibutyag ni Cebu Governor Gwendolyn Garcia nga subay sa pagsanong ni Loreche sa iyang pagdapit, dunay usa ngadto sa duha ka health officers nga mahimong kaabag niini alang sa pagsusi sa mga ospital ilabi na sa pag-upgrade niini."For hospital upgrading and administration. So we are starting to prepare the draft contract and once it is firmed up, I will call all of our chiefs of hospital that Dr. Loreche will (head) to be helped by one or more (and) will be going around the provincial hospitals and district hospitals in order to assess the situation, the needs, and to propose to me possible enhancements or improvements both in infrastructure personnel and equipment," matod ni Garcia.Ang probinsya sa Sugbo duna kini 12 ka mga district ug upat ka mga provincial hospital. Duha sa maong mga hospital anaa nahimutang sa mga isla sa probinsya.Gusto ni Garcia nga mahimutang usab ang pundo nga magamit niini paglibot sa mga ospital."I told her nga you should justly be renumerated ang iyang tubag nga basta lang naa siya'y fuel and vehicle to go around will try to see kay aron naa sad siyay magamit going around the province... So, we will have to come up with a more just and fair package," matod ni Garcia.Si Loreche dili na bag-o sa pamaagi sa probinsya sanglit nahimo kining usa sa mga consultant sa lalawigan ilabi na kabahin sa panglawas.

Seguridad sa mga turista pahugtan

Posted: 17 Jul 2022 07:33 AM PDT

Namatikdan nga midagsa ang mga lokal ug langyaw nga mga turista sa Central Visayas.Kini hinungdan nga si Police Regional Office (PRO) 7 Director Police Brigadier General Roque Eduardo Vega nimando sa iyang mga city ug provincial police office chief nga pahugtan ang seguridad sa tourist destinations sa ilang mga hurisdiksyon.Sa iyang nabantayan, human natapos ang buwan sa Hunyo, daghan ang nangabot nga mga bisita sa Sugbo."Cebu is known for many popular beaches, islands, and diving spots and one of the most visited tourist destinations in the country. We would like to assure the public of our high-state operational readiness to deter criminal activities and people who might take advantage of the situation," matod ni Vega.Lakip sa iyang mando ang hugot nga pagpatuman sa health protocols sanglit naghulga pa gihapon ang coronavirus.Dugang ni Vega nga naka- alerto ang tanang police personnel ug andam motubag kon nagkinahanglan kanila.Subay niini, giawhag usab ni Vega ang iyang mga pulis nga naka-duty nga ipakita ang pagkamatinahuron ni bisan kinsa ug tumanon ang saktong pagsul-ob sa uniporme."The police are an important part of the destination image. Magtrabaho lang tayo ng tapat, isa puso ang sinumpaang tungkulin at tiyakin ang kaligtasan ng publiko," dugang ni Vega.Si Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO), nagkanayon nga 85 porsiyento sa ilang personnel sa kalungsoran ipakatap sa tourist destinations.Matod ni Sucalit, gawas sa tourist police units sa matag lungsod, gimandoan usab ang ubang personnel nga mogawas sa police stations aron molusad og anti-criminality operations.Iyang gipasabot nga samtang nagpahayahay ang mga turista sa mga resort, manuroy usab kini sa mga tindahan aron mamalit, ug tungod niini, kinahanglan makita usab ang pulis diha sa kadalanan."We will be also intensifying our police presence.." dugang ni Sucalit.Wala na hinuon magkinahanglan og dugang personnel ang mga police station sa kalungsoran, sigon ni Sucalit, sanglit paigo pa ang ilang gidaghanon nga makabantay sa mga bisita.

Gullas: Mall sa Talisay gihimo nga vax center

Posted: 17 Jul 2022 07:32 AM PDT

Usa ka mall sa dakbayan sa Talisay gihimo na usab karon nga dugang Covid -19 vaccination center.Mao kini gipahibalo sa publiko ni Talisay City Mayor Gerald Anthony 'Samsam' Gullas.Apan gipasabot niini nga kutob lang usab sa Hulyo 31 ning tuiga ang vaccination site sa Southtown Centre sa Barangay Bulacao sa dakbayan sa Talisay.Ang maong vaccination center abli gikan sa alas 9:00 sa buntag hangtud na sa alas 3:00 sa hapon.Dugang ni Gullas nga lahi kini nga vaccination site tungod kay mobakuna ni sila sa 12 anyos pataas ug mihatag og higayon ngadto sa mga tawo nga dili makapabakuna sa Lunes hangtud sa Biyernes.Lakip sa ilang eskedyul mao ang Sabado ug Dominggo ug sila mobakuna gikan sa una ug ikaduhang dose samtang mobakuna sab sa una ug ikaduhang booster shots.Ang bakuna nga iturok sa mga tawo mao ang Pfizer ug Moderna vaccines.Giawhag sa mayor ang tanan nga mobisita na sa mall sa Bulacao aron pagbakuna aron kaprotektahan sa maong kagaw labina nga moabli na usab ang tuig nga tingklase karong Agusto.

144 ka magtutudlo sa Lapu-Lapu way bakuna

Posted: 17 Jul 2022 07:31 AM PDT

Dili mominos 144 ka public school teachers sa dakbayan sa Lapu-Lapu ang posibling dili makahimo sa in-person classes sugod karong Agusto kon ang Department of Education (DepEd) mopadayon sa mando sa vaccination requirement aron makatudlo og face-to-face ngadto sa mga tinun-an.Si Dr. Wilfreda Bongalos, schools division superintendent sa DepEd Lapu-Lapu Division, nisulti sa SunStar Cebu nga kwatro porsiyento sa 3,672 ka mga magtutudlo sa 81 public schools sa dakbayan nagpabilin nga unvaccinated batok sa coronavirus disease (Covid-19).Matod ni Bongalos, dili mominos 3,528 o 96 porsiyento sa public school teachers ang nabakunahan na, base sa talaan sa Hulyo 14, 2022.Dugang niya, ang mga magtutudlo nga dili mamahimong mabakunahan tungod sa kondisyon sa panglawas o adunay gihambin nga balatian.Giklaro ni Bongalos nga nagsugod na ang limited face-to-face classes sa Marso sa miaging school year (SY) 2021-2022 ug ang unvaccinated teachers gitugotan nga makatunga, apan nipresentar sila sa ilang negative rapid antigen o negative reverse transcription polymerase chain reaction (RT-PCR) test result matag duha ka semana.Samtang, matod ni Bongalos nga wala pay data kon pila ka mga magtutudlo nga walay bakuna batok sa Covid-19 gikan sa 70 ka private schools sa Lapu-Lapu.Hinuon, 14 lang ka mga tunghaan ang mingpatuman sa limited face-to-face classes sa miaging school year.Ang division superintendent nagkanayon nga nagpaabot siya sa guidelines gikan sa central office bahin sa rekisitos sa pagtudlo nga pisikal sa mga tunghaan sa pagpatuman sa full implementation sa face-to-face classes karong Nobiyembre.Niadtong Hulyo 12, ang DepEd nipahibawo nga ang elementary ug secondary schools sa public ug private schools mohimo na og five-day face-to-face classes sugod sa Nobiyembre 2 ning tuiga, bisan unsa pa ang alert status sa dapit nga nahimutangan ang tunghaan.Si Bise President Sara Duterte, kalihim sa DepEd, nipahayag na nga dili rekisitos sa mga tinun-an ang mabakunahan aron makatungha ug wala siya mohatag og limitasyon sa mga tinun-an sulod sa usa ka lawak tungod sa managlahing sitwasyon sa matag tunghaan sa nasod.Apan hugtanong nimando sa hugot nga pagpatuman sa physical distancing o health protocols.Si Bongalos nibanabana nga moabot og 110,000 ka enrollees sa public schools samtang adunay 107,000 na-enroll nga tinun-an sa miaging school year.Sa private schools, gipaabot nga moabot og 19,000 ang enrollees ning school year itandi sa 18,000 ka enrolless sa miaging school year.

Gwen nanawagan batok sa modified muffler sa motor

Posted: 17 Jul 2022 07:30 AM PDT

Nanawagan si Cebu Governor Gwendolyn Garcia ni Senador Joseph Victor "JV" Ejercito nga hatagan og pagtagad ang paghimo og lagda, pagbadlong sa mga motorista nga mogamit og modified muffler.Tinguha ni Garcia nga masusi ni Ejercito ang paghimo og giya aron dili na modaghan pa ang mga motorsiklo nga nagdala og kasaba sa kadalanan.Si Ejercito nailhan sa aktibong mga programa niini alang sa mga rider."Well I hope then that he will focus on these motorcycle riders (and) see to it that when they pass, they will see to it that the gods of Mount Olympus are passing by, kay mas saba pa na kaysa wangwang and it really destructs everybody more often than not. Kanang wangwang man gud kinahanglanon man gud kaayo at certain times," matod ni Garcia.Dugang ni Garcia nga ang maong mga motor angay nga susihon ilabi na nga nagdala lang kini og kasaba sa kadalanan nga makatugaw sa mga nagpahuway o ba kaha mga masakiton nga anaa sa ilang mga panimalay."Kani man gud mas dili ni ma-justified kay dili man gud ni pwede nga pun-an nimo ang bulhot sa tambutso nga inig agi kurog ta tanan hasta pa atong atuli," dugang sa gobernadora.Nanghinaot si Garcia nga mahatagan og pagtagad ni JV Ejercito, kinsa usa sab ka motorcycle rider, ug magbinantayon sab ang ubang riders ug pagbadlong sa ilang kaubanan.Gikatakda nga mobukas ang 19th Congress sa Hulyo 25, 2022.

Pagsumpo sa dengue, prayoridad sa Talisay

Posted: 17 Jul 2022 07:29 AM PDT

Gihingusgan sa dakbayan sa Talisay ang kampanya batok sa dengue ug maoy usa sa mga top priority sa kagamhanan nga tutokan ang maong suliran sa panglawas.Matod ni Talisay City Vice Mayor Richard Francis "Choy" Aznar, chairman sa committe on health, nga bisan nga adunay pag-ubos sa kaso sa dengue virus sud ning semanaha, apan di angayang kumpiyansahan.Dugang lakang ang ilang ipatuman aron nga hingusgan ang ilang kampanya ilabi na niining panahon sa ting-uwan.Matod ni Aznar, nabaraw ang ilang misting sa miaging adlaw tungod sa kadaghang request gikan sa nagkalainlaing barangay.Hinuon, nabalik ra ang ilang operasyon human nakapalit na og dugang mga kemikal.Gitinguha nga ipadayon ug kanunayon sa mga Talisaynon ang pagpanglimpyo sa ilang palibot.Ang dengue task force padayon nga nagsuroy-suroy sa kabarangayan sa pag-awhag sa katawhan bahin sa pagpanglimpyo."Ang atong barangay ongoing sa pagpanglimpyo pero ang ato dinhi, atong lang i- strengthen and well responsive man sila," dugang ni Aznar.

1 naligsan-patay sa 10-wheeler, 2 angol

Posted: 17 Jul 2022 07:28 AM PDT

Wa na makaabot sa ilang balay ang drayber sa motorsiklo human kini maligsi sa 10-wheeler truck sa national highway sa Barangay Catalina, lungsod sa Sagbayan, Bohol.Si Police Staff Sergeant Eleazar Leyson sa Sagbayan Police Station miila sa namatay nga si Genalyn Lenis, 26, ug taga Barangay San Agustin sa nahisgutang lungsod.Samtang, kritikal sa tambalanan ang duha niya ka mga angkas nga sila si Lhers Rubin, 17, ug Jocelyn Lines, 23, pulos silingan ni Lenis.Base sa imbestigasyon, nasayran nga ang maong mga biktima gikan sa lungsod sa Catigbian ug paingon na unta mamauli sa ilang balay.Samtang, ang drayber sa 10-wheeler nga si Gregorio Veloso, 53, nga taga Canmaya Diot, sakop sa Sagbayan maoy gikasugat sa mga biktima ug pag-abot na sa Barangay San Agustin, nagkabangga.Si Lenis nalatayan sa ligid sa maong trak nga miresulta sa iyang hinanaling kamatayon.Tug-an ni Leyson nga ang mga biktima wa magsul-ob og helmet atol sa hitabo.Si Veloso kasamtangan nga gitanggong sa selda sa kapulisan sa Sagbayan.

1 patay, 1 angol sa bangga sa motorsiklo

Posted: 17 Jul 2022 07:26 AM PDT

Usa ang patay ug usa ang angol sa panagbangga sa duha ka mga motorsiklo sa Barangay Road sa Sityo Cambiohan, Barangay Poblacion, dakbayan sa Danao niadtong Sabado sa kaadlawon, Hulyo 16, 2022.Si Master Sergeant Ronald Gomez, officer sa Traffic Enforcement Unit sa Danao City, niila sa namatay nga si Alden Ariel, 26, taga Poblacion, lungsod sa Compostela, samtang naangol mao si John Lloyd Ramos, 19, taga Lower Binaliw, Danao.Sigon sa imbestigasyon sa kapulisan, ang panagbangga nahitabo sa alas 12:45 sa kaadlawon diin si Ramos nagmaneho sa motorsiklo nga padulhog nga dalan, samtang iyang gikasugat si Ariel nga nagtungas.Ang duha pulos nadala sa Danao City Provincial Hospital apan si Ariel gideklarar nga dead on arrival (DOA).Matod ni Gomez, ang dapit nga nahitaboan kay kurbadahon, gamay ang dalan ug ngitngit."Posible nga nagbangga ni sila sa tungatunga nga bungtod," matod ni Gomez.

Budget officer sa Daanbantayan nalumos

Posted: 17 Jul 2022 07:23 AM PDT

Budget officer sa lungsod sa Daanbantayan, Lalawigan sa Sugbo ang nalumos samtang naluwas ang iyang apo nga menor de edad, atol sa ilang pagpangaligo sa usa ka beach resort sa lungsod sa Medellin, kagahapon, Hulyo 17, 2022.Ang nalumos mao si Marissa Morterde Cruz, 57, minyo, budget officer sa Daanbantayan ug taga Sityo Cang Oyao, Barangay Bitoon, Daanbantayan samtang ang iyang apo nga naluwas mao si Audi Ledesma Arriesgado, 6.Si Patrolman Gabriel Masong sa Medellin Police Station nga nahinabi sa Superbalita Cebu, nagkanayon nga ang mga biktima uban sa ilang mga kabanay, nangaligo sa Villa Edar Beach and Resort sa Sityo Tambo, Barangay Kawit, Medellin. Apan namatikdan nga nahanaw sulod sa 30 minutos.Pwerting pangita sa mga kabanay ug nakit-an na lang si Cruz sa ilawom sa lungag sa dagat nga wala na maglihok, samtang ang apo niini didto na mapalgi sa exit portion sa lungag nga naglingkod ug wa na magtingog. Anaa na kini sa luwas nga kahimtang.Ang mga biktima gidala sa rescuers sa Daanbantayan District Hospital sa maong lungsod apan gideklarar nga dead on arrival (DOA) ang 57 anyos nga kawani sa munisipyo.Sumala ni Patrolman Masong nga adunay manhole duol sa dagat sa maong beach resort ug walay lifeguard ang resort.Gisuta karon sa ilang mga imbestigador kon duna bay permit ug pagtugot sa buhatan sa turismo sa lungsod ang development sa maong area."Wala dayon nakakita nila nga natagak, pag-agi siguro aning namatay uban sa apo nadiretso katidlom, unya ang giali didto sa lungag kay guba nga lantay," dugang ni Patrolman Masong.

Editoryal: Dengue fever dili kakompyansahan

Posted: 17 Jul 2022 07:19 AM PDT

Ang dengue fever, tungod sa pagpaak sa usa ka matang sa lamok nga Aedes aegypti, usa sa mga sakit nga seasonal nga sakit nga sagad motunga ning panahon sa ting-uwan.Ang dengue usa ka viral infection, sama sa coronavirus disease 2021 (Covid-19), hinungdan nga walay tino nga tambal gawas sa pagpalig-on sa immune system.Ang kaisog sa virus dunay iyang kaugalingong cycle nga molurang sulod sa dili mominos pito ka adlaw.Apan kon ubos ang immune system, mohimo og komplikasyon sa panglawas ug dakong risgo sa kamatayon sa matakboyan sa dengue fever busa di kakompiyansahan.Sumala sa Department of Health (DOH) 7, ang kaso sa dengue sa Central Visayas nitubo og 29.5 percent sulod lang sa duha ka semana, dugang sa 1,894 ka mga kaso ang natala lakip sa lima nga nakalas gikan sa Hunyo ngadto sa Hulyo 9, 2022.Ang DOH 7 unang nitaho nga 6,399 ka mga kaso ug 47 niini ang namatay gikan sa Enero 1 ngadto sa Hunyo 18 ning tuiga.Sa upat ka mga lalawigan sa CV, ang Sugbo uban sa tulo ka highly urbanized cities (HUCs) maoy nag-una uban sa 2,938 ka kaso sa dengue cases, lakip sa 19 ka nakalas. Nagsunod ang Bohol, Negros Oriental ug Siqujijor. Nagpadayon ang pagsaka sa kaso tungod sa panahon nga paborable pagsanay sa lamok nga mangitlog sa nagpundong tubigan gikan sa uwan.Busa, gawas sa pagpalig-on sa immune system pinaagi sa pagkaon nga puno sa nutrina ug igong pahuway, importante usab sa pagbatok sa dengue mao ang pagmintinar sa kalimpiyo sa atong palibot labina sa pagyabo sa mga nagpundo nga tubig ug paggamit sa disinfectants nga mopatay sa lamok.Kon nahadlok kita sa pandemiya sa Covid 19, mas kabalak-an ang virus sa dengue nga nikutlo og mas daghang kinabuhi sa kasinatian.Dili kakompiyansahan ang pagtaas ug pagbalikbalik sa hilanat ning panahon. Kini ang nag-unang sayong simptoma sa dengue fever. Kon maatiman dayon, ang dengue sayon sumpuon.

Barrita: Umento sa bayranan sa tubig

Posted: 17 Jul 2022 07:14 AM PDT

Nasakpan sa asawa ang iyang bana nga naligo uban sa ilang maid. Suko kaayo ang asawa. Asawa: "Nasakpan ta gyud mo." Bana: "Kalma lang, Love. Nagdungan mi'g kaligo ni Inday kay nagdaginot mi sa tubig. Basa ra gud sa Superbalita, magpaumento na sab ang MCWD."Mao nay plano sa Metropolitan Cebu Water District (MCWD), matod pa sa ilang board chairman, Jose "Joey" Daluz III. Umentohan ang bayranan sa tubig og 60 porsiyento sa Hulyo sa 2023 ug laing 10 porsyento sa mosunod nga tuig 2024. Balig 70 porsiyento tanan.Apektado niini ang mga konsumidor sa tubig nga gisilbihan sa MCWD sa mga siyudad sa Cebu, Mandaue, Lapu-Lapu ug Talisay ug sa mga lungsod sa Consolacion, Liloan, Compostela ug Cordova. Way apil kadtong hangtod karon wa pay water connection.Kon madayon ang umento sa bayranan sa tubig, gikan sa P15.20 matag cubic meter sa unang napulo ka cubic meter nga makonsumo. Mosaka kini ngadto sa P25.05 kada cubic meter. Ang umento P9.85 matag cubic meter sugod sa Hulyo 2023.Ang average household nga konektado sa MCWD mokonsumo og 21 ka cubic meters matag buwan ug magbayad og P399.80 apan moabot kini og P430.99 pun-an sa P91.19 nga franchise tax, power cost adjustment (PCA) ug purchased water adjustment (PWA).Sa umento, mosaka kini ngadto sa P543.68 ug ngadto sa P561.90 apil ang franchise tax nga P10.87 ug PWA nga P7.35. Ang PCA apil na sa umento. Sa 2024, moabot kini og P617.36. Apan ang water bill sa mokonsumo lang og pito ka cubic meter kada buwan, mosaka ra ngadto sa P250.21 gikan sa P188.17 sa pagkakaron.Gisupak ni Cebu City Mayor Michael Rama ang giplanong umento sa bayranan sa tubig sa MCWD kay 75 porsiyento sa mga konsumidor sa MCWD mga residente sa siyudad sa Sugbo. Matod niya, kalit kini ug di makatarunganon kay wa pa kita hingpit nga makabangon gikan sa epekto sa Covid-19 pandemic ug sa mga katalagman nga niagi.Kon nakahinumdom mo, way agas sa tubig human sa bagyong Odette kay way kuryente. Ang nakanindot sa MCWD kay temprano kaayo sila sa pagpadala og water bill bisan way agas sa gripo. Pakapinan pa og notice of disconnection.

Talk to Papa Joe: Sa laing palad na

Posted: 17 Jul 2022 07:12 AM PDT

Dear Papa Joe,Ako si George, 35 years old. May ka relasyon, may usa ka anak. Live-in ra mi aning akong pares ug bag-o lang ko nauli gikan sa Manila kay didto man ko nanarbaho.Taudtaod ko nga wa kauli tungod sa pandemiya ug kalisud sa kwarta. Mao nadugaydugay gyud.Gidungog nga nakigrelasyon akong pares og laing lalaki samtang wala pa ko. Apan ako siyang gipangutana. Wala man nitubag ug di na motubag.Karon sa pag-uli nako, naabtan pa nako siya sa among gipuy-an apan matod niya, wa na siyay gana sa among relasyon ug magbuwag na lang mi kay ako ra sad daw nagtukmod niya nga makapangita og lain.Ok ra man unta kay naanad na man sad ko nga wala siya, apan ang nakapait, dad-on niya among anak. Pwede diay na nga amo man nang anak? Palihug tambagi ko.GEORGEGeorge,Maayo kay nakasabot ra ka sa imong pares ug naanad na ka. Siguro di sad ka ka blame niya kay may pagkuwang man sab ka.Basin tuod wa nimo hatagi og importansya inyong relasyon ug karon ang gihatagan nimo og kabug-aton ang inyo na lang anak.Sa tinuod lang, iagi nalang na ninyo og sabot kay sa tinuod lang, wa kay laban sa kustodiya kay di mo kasado.Maayo unta og gi-acknowledge nimo ang bata, apan same lang gihapon sa atong Family Code, ang bata adto na sa inahan. Para maklaro nimo ang tanan, dangop sa Department of Social Welfare and Development.PAPA JOE(sa inyong tampo ipadala lang sa papajoesuperb@gmail.com

Marcos mitudlo ni Sabin Aboitiz sa Private Sector Advisory Council

Posted: 17 Jul 2022 07:10 AM PDT

Gihangyo si Presidente Ferdinand 'Bongbong' Marcos, Jr. ang Aboitiz Group CEO nga si Sabin M. Aboitiz sa pag-organisar ug pagpangulo sa Private Sector Advisory Council (PSAC).Ang konseho gilangkoban sa business leaders ug mga batid nga nagsuporta sa kagamhanan atol sa tigom bahin sa tumong sa ekonomikanhong kalihokan sa lima ka main sectoral groups.Ang designated sector leads naglakip nila ni Aileen Uygongco-Ongkauko alang sa Agriculture, Sabin Aboitiz alang sa Build, Build, Build and Tourism, Joey Concepcion alang sa Jabs to Jobs, Henry Aguda alang sa Digital Infrastructure, ug Paolo Borromeo alang sa Healthcare.Samtang ang Aboitiz Group nipatuman sa iyang 'Great Transformation' journey gikan sa legacy conglomerate ngadto sa 'techglomerate' sa umaabot, si Aboitiz nitubag sa panawagan sa Presidente ug nipadayag sa iyang full commitment sa pagsuporta sa tumong sa bag-ong administrasyon alang sa pamatigayon ug ekonomiya sa nasod.Ang bag-ong naestabilisar nga konseho nisaad sa pagtabang sa kagamhanan sa transpormasyon sa ekonomiya sa Pilipinas pinaagi sa pagpatuman sa robust infrastructure program, dugang trabaho, digitizing processes, pagpalambo sa agricultural productivity pinaagi sa recalibration sa micro, small and medium enterprises (MSMEs), ug pagseguro sa equitable, sustainable, ug inclusive business landscape alang sa Filipinos.(Tampo)

Lotilla gitudlo isip secretary sa DOE

Posted: 17 Jul 2022 07:08 AM PDT

Gitudlo ni Presidente Ferdinand 'Bongbong' Marcos si Raphael Perpetuo Lotilla isip kalihim sa Department of Energy (DOE) ubos sa iyang administrasyon, sumala ni Press Secretary Trixie Cruz-Angeles.Apan matod ni Angeles sa miaging semana, ang pagkatudlo ni Lotilla nagpabilin pang nominasyon "pending the clarification of his employment status."Si Lotilla kasamtangang usa ka independent director sa Aboitiz Power ug Enexor.Si Angeles nitumbok sa Section 8 sa Republic Act 7638, o Act Creating the Department of Energy, nga nag-ingon, "no officer, external auditor, accountant, or legal counsel of any private company or enterprise primarily engaged in the energy industry shall be eligible for appointment as secretary within two years from his retirement, resignation, or separation therefrom.""Thus, while the matter is reviewed to determine whether an independent director is considered an officer of the company, Lotilla is considered a nominee," matod ni Angeles.Si Lotilla nakasilbi na isip secretary sa DOE gikan sa 2005 ngadto sa 2007, panahon sa administrasyon ni kanhi Presidente Gloria Macapagal-Arroyo.Nakasilbi usab siya isip presidente sa Power Sector Assets and Liabilities Management Corporation ug usa ka deputy director general sa National Economic Development Authority (Neda).Usa siya ka law professor sa University of the Philippines nga nitapos siya sa iyang law degree. (SunStar Philippines)
at

No comments:

Post a Comment

Subscribe to: Post Comments (Atom)

End of Summer Sale ☀️😎

20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...

  • Last Chance - Win over $1,800 in BLEUSALT
    Elevate your Wardrobe. Offer ends Midnight. ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏ ...
  • Breaking: Aaron Rodgers teases Jets return this season: 'Anything is possible'
    New York Jets quarterback Aaron Rodgers suffered a torn Achilles tendon in Monday's 22-16 overtime win vs. the Buffalo Bills. If you a...
  • End of Summer Sale ☀️😎
    20% OFF Inside!🤯 ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏  ͏...