https://www.sunstar.com.ph/

---

P4M danyos sa sunog sa Alcoy; lungsod way bombero Posted: 05 Jun 2021 07:32 AM PDT MOKABAT sa P4 milyones ang danyos sa sunog sa merkado publiko sa Alcoy sa alas 7:25 sa gabii sa Biyernes, Hunyo 4, 2021 sa Barangay Poblacion sa habagatang Sugbo. Si SFO1 Dexter Gilbolingo, fire investigator sa BFP sa lungsod sa Dalaguete nga nahinabi sa Superbalita Cebu, nagkanayon nga ang kayo niigo sa ikaduhang andana sa merkado nga dunay 17 ka stalls. Matod niya nga ang sunog ilang giisa sa second alarm ug nakontrolar sa alas 8:30 sa gabii ug hingpit nga napawong alas 9:30 na sa gabii. Gibutyag ni Gilbolingo nga sa ilang initial nga nakuhang impormasyon, dunay nibuto sa usa ka kan-anan nga nahimutang sa second floor. Wa pa nila masuta kon unsay nibuto samtang ang kayo daling nikatap tungod kay sagad sa stalls nagtinda og mga RTW. Gipasabot niya nga nagpadayon pa gihapon ang ilang imbestigasyon. Gibutyag ni Gilbolingo nga way firetruck ang lungsod sa Alcoy hinungdan nga silang mga bombero sa Dalaguete, Argao ug Sibonga, ang nagtinabangay sa pagpawong sa kayo. Samtang mipadala sab og duha ka tanker sa tubig ang usa ka pribadong kompaniya sa Alcoy. Wala sila magproblema sa supply sa tubig sanglit duna may fire hydrant sa dapit. Apan tungod kay layo sab kaayo gikan sa ilang lungsod ang sunog, nakakatap gyud ang kayo sa ilang pag-abot. Dugang ni Gilbolingo nga 80 porsento nga nasunog ang merkado publiko. Wa hinuoy naangol sa sunog sanglit gisiguro sa kapulisan ug ubang fire volunteers luwas ang mga naa sa merkado. POULTRY FARM Samtang mokabat sab sa P1 milyon ang danyos human naigo sa sunog ang usa ka poultry farm alas 7 sa gabii sa Biyernes sa Brgy Doldol, lungsod sa Dumanjug. Si Police Master Sgt. Samuel Casipong sa Dumanjug Police Station nga nahinabi sa Superbalita Cebu nagkanayon nga ang usa ka building sa Acacia Farm maoy nasunog. Sumala ni Casipong nga ang tag-iya nga si Jennifer Legaspi maoy mi-report nila hinungdan nga dali silang mirespondi uban sa mga bombero. Nasuta nga ang building wa nay sulod nga mga manok kay bag-uhay lang kining gi-disinfect aron sudlan napud og bag-ong mga manok. This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States