https://www.sunstar.com.ph/

---

• Basil: Sharon ug Kiko gikataw-an ang isyu
• Balay-Balay, Tubig-Tubig: Advocacy training alang sa kabataan
• Editoryal: Kisaw sa pulitika
• Lonzon: Derama midayeg sa DILG
• Diputado: Kaguliyang sa PDP-Laban
• Talk to Papa Joe: Gusto lang molapa
• Ex-rebels apil sa mga maabagan
• Naglungotlungot si Donaire nga makabawos sa Japan Monster
• Jazz mitipi sa Grizzlies, 3-1 na sa series; Wizards buhi pa; gipukan ang Sixers sa Game 4
• Northern Cebu, pipila ka dapit sa Visayas ubos sa signal no. 1 sa bagyong Dante
• Espinoza: Mapriso ang kapitan?

Basil: Sharon ug Kiko gikataw-an ang isyu Posted: 01 Jun 2021 05:51 AM PDT Manila--Samtang gisuwat kini, anaa pa si Sharon Cuneta sa US ug siguro nasayod naman tingali kamo nga giintriga ang iyang pag-adto sa US nga nag-inusara. Daghang speculations nga kesyo maong nagpakalayo-layo si Sharon kay gusto niyang magpahilayo sa toxic environment ug gusto niyang molayo una kang Kiko. May mga vloggers pa nga nagkanayon nga maong nilayat si Sharon tungod kay gikulata kuno siya ni Kiko. Nakakalokah! Pero mas daghang vloggers ang mi-conclude nga may katagpo si Sharon sa US nga usa ka batan-ong lalaki. Naghulat daw didto ang iyang leading man nga si Marco Gumabao. Ug ania pa, buros kuno karon si Sharon courtesy of Marco Gumabao. Aware si Kiko ug Sharon sa mga mingtumaw sa vlogs. Sa usa ka video call nila, tawa nang tawa si Sharon ingon man si Kiko sa buros isyu. Hahahahaha. Halatang way alam sa kinabuhi ni Sharon ang mga tampalasang vloggers. Sharon is more than 50. Manganak pa ba na? Moduga pay unas. Maong bisan si Kiko natatawa na lang din. Halata nga sanay na si Sharon sa ingon ani nga matang sa fake news ug sa mga intriga kanila. Ila na lang kining gikataw-an imbes nga masuko. Base sa maong video nga nakita ko, parang way bikil naman ang ilang panag-uban. Way issue sa ilaha tungod kay kung may issue, nungkang mag-video call sila ug magkihaay. Ang mga vloggers lang jud ang masyadong imaginative ug pati ang pagburos ni Sharon ay napag-tripan eh di na nga puwede. Kung puwede lang sana eh di sige go. This posting includes an audio/video/photo media file: Download Now

Balay-Balay, Tubig-Tubig: Advocacy training alang sa kabataan Posted: 01 Jun 2021 05:16 AM PDT Nagmalampuson ang giorganisa sa CLB ug Terre Des Homes (TDH) nga Advocacy Training for Children and Youth sa miaging buwan didto sa lungsod sa Moalboal, Cebu. Pinaagi sa maong training, gitinguha sa organizers nga mahimong epektibo ang mga kabataan sa pagtubag sa mga hagit sa ilang komunidad lakip na ang mga nagkalain-laing porma sa pagpangabuso ug pagpanghimulos sa mga menor de edad. Dunay duha ka batches ang tulo ka adlaw nga training nga gitunga sa North ug South clusters sa Cebu. Ang singkwenta ka participants nga Child Rights Advocates (CRAs) gikan sa mga lungsod sa Consolacion, Compostela, Cordova, Argao ug Balamban, ug mga dakbayan sa Talisay, Naga, ug Lapu-Lapu. Aron masiguro nga walay quarantine protocol nga malapas, gihimo ang minimum public health standards sama sa pagsul-ob og face masks. Lakip sa mga nakat-unan sa participants mao ang mga nagkadaiyang balaud sa Pilipinas nga nagpanalipod sa mga bata sama sa Anti-Trafficking in Persons Act, Anti-Child Pornography Act, Anti-Rape Law, ug ang Child Abuse Law. Gihimug-atan ni Atty. Joan Dymphna Saniel-Amit, executive director sa CLB ug usa sa mga speaker, nga kinahanglan makat-unan kining mga balaod batok commercial sexual exploitation of children (CSEC) aron mahibalo ang participants kon unsay mga katungod sa biktima ug proseso sa pagtabang kabahin sa maong mga krimen. Duna poy diskusyon kabahin sa Criminal Justice System sa Pilipinas isip pag-ila sa mga ahensya ug uban pang buhatan sa gobyerno nga responsable nga matagaan og hustisya ang mga biktima sa pagpangabuso. Dakong bahin sa pagkat-on sa mga participants ang hisgutanan sa adbokasiya kon diin natudloan sila sa mga pamaagi aron mahimong hapsay ang pagpatuman sa ilang mga kalihukan ug proyekto sa ilang dapit. Gitudluan sila unsaon nga mapalanog ang ilang tingog gamit ang "media advocacy" sama sa TV, radyo, pamantalaan, ug social media. Natudloan pod sila kon unsaon pagsulat og mga "official statements" alang sa ilang mga organisasyon. Nakat-on po sila nga mahimo nga ipadayag ang adbokasiya pinaagi sa teatro. Gawas sa mga CRAs, dakong pasalamat sa mga organizers sa mga speaker nga silang Atty. Kristine Laplana, Atty. King Anthony Perez, ug Atty. Divine Marcial-Flores, pulos mga abogado sa CLB, ug Nenita Pacilan, kanhing trustee sa maong organisasyon. Nanghinaot ang CLB nga pinaagi sa maong training, mapatuman sa mga CRAs ang ilang mga maayong plano sa ilang mga komunidad. Padayon ang CLB nga mogiya kanila sa tinguha nga makab-ot ang "just world for all children". [Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc] This posting includes an audio/video/photo media file: Download Now

Editoryal: Kisaw sa pulitika Posted: 01 Jun 2021 05:13 AM PDT Nagkaduol ang nasudnong eleksiyon sa Mayo 2022 busa nagsugod na ang kisaw sa pulitika. Sama sa naandan, maaninaw nang daan ang pagkabungkag sa mga alyansa. Kauban karon, umaabot nang kontra. Ang kanhi kontra kontra dunay posibilidad nga makaabin na. Samtang nag-iyahay na og paniid ang mga alibangbang sa pulitika o balimbing nga politiko kon asa moambak ug mopasilong sa gituohang kusog nga partido. Wala pa gyud mausab ang dagan sa pulitika sa nasod. Mga tradisyonal nga pamilya sa pulitika ug mga politiko naghari gihapon. Ug ang kisaw sa pulitika mas misaba sa kaguliyang mismo sa administrasyon nga Partido Demokratiko Pilipino–Lakas ng Bayan (PDP-Laban) nga nipahigayon og National Council Meeting sa Sugbo niadtong Lunes, Mayo 31, 2021 nga gipatawag sa vice chair sa partido nga si Alfonso Cusi, kinsa niingon nga dunay bendisyon kang Presidente Rodrigo Roa Duterte (PRRD). Nahinayon kini taliwala sa mando sa PDP-Laban chairman Sen. Manny Pacquiao sa mga miyembro sa partido nga dili motambong sa naasoy nga tigom nga iyang gitawag nga 'illegal'. Si Cusi nialegar kang Pacquaio nga buot mataktak siya sa posisyon ug pagsiak sa partido. Dunay hugonhugon ug dunay grupo nga nagduso kang Pacquaio nga mokandidato sa pagka presidente. Atol sa tigom sa Sugbo, si Cusi nangulo sa pangawagan sa pagkandidato ni PRRD sa pagka bise presdente ug ilang pilian nga running mate sila si Davao City Mayor Sara Duterte o Sen. Bong Go sa pagka presidente. Natigaw ang PDP-Laban. Dakong usik sa partido kon mataktak si Pacquiao. Di siya mabaliwala isip inilang kampiyon sa boksing, daghang dumadapig ug dunay igong kasinatian sa putilika gikan posisyon sa lokal nga kagamhanan ngadto sa pagka senador. Ug mosamot ang kisaw sa pulitika sa umaabot nga adlaw kon moarangkada na usab ang oposisyon. Atong nuntan kini. This posting includes an audio/video/photo media file: Download Now

Lonzon: Derama midayeg sa DILG Posted: 01 Jun 2021 05:13 AM PDT Mipadayag sa iyang suporta ug gikalipay ni Boljoon Cebu Mayor Merlou Derama ang lakang sa Department of Interior and Local Government (DILG) nga maabot sa suok nga bahin sa Pilipinas, ang pagpabakona. Atol sa interview sa Agila, niluwat og pamahayag si Derama sa dihang migawas ang balita nga gusto sa DILG pinaagi sa mga mayor maapil sa lista ang mga molupyo ang mga way internet connection. Kay sa bag-ong pamaagi gipaagi sa online ang pagparehistro sa senior ctizens nga gustong mabakunahan. Saludo si Derama sa lakang sa DILG nga himuon ang traditional nga pamaagi pinaagi sa manual nga paglista sa mga pangan pinaagi sa pag-adto sa tagsa tagsa ka panimalay. Matod sa mayor nga dunay senior citizens nga gustong magpabakuna samtang ang uban di sab pabor. Apan di man pinagsunay ug kagustohan lang sa tawo magpabakina ba siya o dili. Apan maayo ang magpabakuna aron dunay protection ang lawas sa tawo batok sa Covid-19. Samtang, subling gipahayag ni Derama nga wa siya nakasuway nga nahimong positive sa Covid-19. Gipatin-aw sa mayor sa Agila nga ang iyang ginagmay nga ubo tungod man sa pag-usab-usab sa panahon. Miingon ang mayor nga duna may tawo nga nagsigi niya og panauot apan wa gani makatabang sa ilang lungsod. Ang gipasabot sa mayor nga nagsigi og panaut pinaagi sa mga post sa Facebook ang usa ka taga Boljoon nga atoa na sa Amerika nga yanong trabahante. Nakakuha og kopya ang Agila sa mga Post nga klaro kaayong foul, libelous ug binuhatan sa tawong way grado. Mapahiubsanong namahayag ang mayor nga demokrasya man kita ug di unta maghimohimo og istorya kay ang mga tawo naman sa Boljoon ang nangasuko. Mapasigarbuhon si Derama sa iyang katapusang termino karon isip mayor iyang naserbisyuhan ang mga molupyo sa 11 ka mga barangay sa sama sa pagpanindot sa kadalanan nga gitabangan sa provincial government sa Sugbo. Wa pa sab sa iyang plano ang pagdagan sa ubos nga katungtadanan karong Mayo 9, 2022 national elections. This posting includes an audio/video/photo media file: Download Now

Diputado: Kaguliyang sa PDP-Laban Posted: 01 Jun 2021 04:20 AM PDT Hilabihang gubota ang PDP-Laban karon. Dunay meeting gipatawag ni Energy Secretary Al Cusi sa miaging Lunes, Mayo 31, nga matod pa, ubos sa kamandoan mismo ni Presidente Rodrigo Roa Duterte (PRRD). Si Senador Manny Pacquiao nga maoy presidente sa PDP-Laban miawhag sa mga miyembro nga dili mosunod sa maong announcement tungod kay supak kini sa Constitution and By-Laws sa PDP-Laban. Bisan sa awhag ni Senador Pacquiao, nadayon gyod ang meeting. * * * Makalibog gyod ang maong panghitabo. Kinsa man sa duha ka mga opisyal ang tuhoan sa mga sakop sa PDP-Laban, si PRRD o si Pacquiao? Kon imong tan-awon ang patad, una nga nahimong sakop sa PDP-Laban si PRRD tungod kay panahon sa iyang paglansad sa 2016, nahimo na man siya nga PDP-Laban. Mas dako pod og rangko si PRRD kay ni Pacquiao. Apan sa mga die-hard nga mga sakop sa PDP-Laban, adunay lagda nga gisunod ang partido. Kinsa sa duha ka grupo ang nahisubay sa constitution and by-laws sa PDP-Laban, ang grupo ni Cusi/PRRD o ang grupo ni Pacquiao? * * * Ang tubag, mismo ang kadagkoan sa PDP-Laban ra gyod ang makatubag ana ug way lain. Tinuod, adunay constitution and by-laws ang maong partido pero sa akong nahibaw-an, mogawas nga morag muryo-moryo ra pod ang pagtuman sa maong Constitution and By-Laws. Ngano man? Dunay grupo sa mga politiko sa Bohol kaniadto nga miapil sa PDP-Laban pinasubay sa maong constitution and by-laws. Adunay gihimo nga seminar dinhi sa Cebu alang sa pagpasakop sa PDP-Laban. Human sa seminar, pormal nga gidawat nga mga sakop sa PDP-Laban ang maong grupo. Adunay giisyu nga membership cards ug dihay registration forms nga gi-fill apan, pagmatuod nga opisyal gyod nga nahitala sa records sa PDP-Laban ang maong grupo. Human sa trainors-training nga gihimo sa pipila ka higayon, gihatagan og kamandoan ang maong grupo nga mag-organize alang sa PDP-Laban sa Bohol. Tuod man, adunay training/seminar nga gihimo sa mga lainlaing kalungsoran sa Bohol og human niini, andam na ang grupo sa tibuok probinsiya sa Bohol alang sa piniliay. Apan naunsang pagkaunsaa nga sa dihang manghatag na og Certificate of Nomination and Acceptance (Cona) alang sa PDP-Laban, kalit lang nahanaw ang maong grupo sa mapa ug napulihan sa laing grupo nga nahimong sakop sa PDP-Laban pinaagi sa gitawag og 'instant' membership ubos sa kamandoan kanhi ni Speaker Pantaleon Alvarez. Kadto mao ang panahon nga wala'g tuo ang pagpanghural ni Alvarez. Gitunobtunoban ug giyatakan lang ang constitution and by-laws sa PDP-Laban niadtong panahona ug walay bisan usa sa mga dagkong opisyal ang mireklamo bahin niini. This posting includes an audio/video/photo media file: Download Now

Talk to Papa Joe: Gusto lang molapa Posted: 01 Jun 2021 04:19 AM PDT Dear Papa Joe, Tawga lang ko og Rubilyn, 24 years old, usa ka maestra. Nagsuwat ko nimo kay gusto unta kong patambag parte sa akong lovelife nga way klaro. Naabot ko aning akong pangedaron karon nga wala gyuy tarong uyab. Ambot ba uy dili man pod unta ko batig nawng, dili pod ko tambok, slim akong body ug sakto pod sa height. Actually, dili man ko mawad-an og mga suitors, kasagaran mga classmate ug kaila nako sa una nga ka Facebook nako karon. Unahon nako si Roger nga abi gyud nako og mao na to, sige na gud kog post-post sa iyang nawng sa akong timeline. Pero dihang nag meet mi, paghuman namog kaon, gusto man siyang manud mig motel oi. Nibalibad ko ug mao tong nasuko siya. Human adto, uga na kaayo siya nako. Niuli ko sa amo nga wala na mi klaro, unya wala na dayon siya mo communicate nako. Mao sad ang nahitabo sa sunod nakong mga suitors. Unang meet pa lang gani namo gusto nang molapa. Dili man gyud ko mosugot kay gi preserve nako akong virginity para ra gyud sa akong mabana. Sayop ba diay ko sa akong prinsipyo? Dili ba gyud diay pwede nga mag-uyab-uyab nga way nilapaay? Please tambagi ko. RUBILYN Dear Rubilyn, Dili sayop ang imong prinsipyo. In fact, I salute you, nga bisan pa sa ka moderno na sa panahon karon, duna pa gihapon kay panglantaw nga sama ana nga you're still very young. Ayaw kahadlok nga mahutdan kag lalake kay ang tinuod nga nahigugma dili mamugos anang pre-marital sex, e respito ka unsay imong gusto. Siguro wala pa gyud nimo matagboi ang lalake nga para gyud nimo. Si Mr. Right mokalit lang na siyag tunga sa imong kinabuhi, in a right place and time. So, paghuwat. Pag-ampo pod sa Ginuo nga kon duna man gani lalake, kanang hinatag gyud niya. Thank you so much. PAPA JOE (Alang sa inyong mga problema, ipadala sa papajoesuperb@gmail.com) This posting includes an audio/video/photo media file: Download Now

Ex-rebels apil sa mga maabagan Posted: 01 Jun 2021 04:15 AM PDT Gibanabanang moabot ngadto sa 5,000 ka mga partisipante, lakip na ang Olympian runner nga si Mary Joy Tabal, ang mosalmot sa Heroes Adventure Challenge, usa ka virtual sporting events nga sugdan karong Hulyo 10 ngadto sa Agusto 9, 2021. Ang kalihukan, nga gitumong aron pag-agni sa mga tawo nga dili kalimtan ang pagpapiskay sa panglawas, gibahin ngadto sa tulo ka mga klase nga paugnat sa kusog. Kini mao ang running, biking ug bike elavated nga langkuban sa managlahing kategoriya. Sa running challenge, ang Starter division motadlas og 21 ka mga kilometro, 42-K alang sa Intermediate, 100-k sa sa Advanced ug 150-k alang usab sa Elite. Sa biking, 50-k alang sa Starter, 200-k sa Intermediate, 500-k sa Advanced ug 1,000-k sa Elite. Samtang sa bike elevated, kini langkuban sa 1,000 meters alang sa Standard, 3,000 meters sa Advanced ug 6,000 meters sa Elite. Ang kalihukan, nga hiniusang giorganisar sa Bikes & Brews, The Active Hub ug giayudahan sa Central Command, AFP pinaagi sa 3rd Civil Relations Group ug CRSAFP, pormal nga gilusad niadtong Mayo 31, 2021 sa Alburs Burger, Pizza and Grill pinaagi sa usa ka press conference. "Sa amo lang community, we're already 2,000. And we're also inviting from other sectors like the AFP, Philippine Navy and some other groups," matod ni Tere Conson sa Active Hub. Si Jerome Calatrava sa Bikes & Brews mipadayag nga dili lang sa Sugbo kon dili abli usab kini sa tibuok nasod. Ang nahisgutang events gitumong isip kabahin sa selebrasyon sa National Heroes Day nga ipahigayon karong Agusto. Tuyo usab niini dili lang kay ang pagdasig sa kapiskay sa panglawas kon dili lakip na usab ang pagsangyaw nga panaghiusa alang sa nasod aron makab-ot ang kalinaw pinaagi sa sports. "Yes, apil ko. Ari ko sa Elite division. Excited ko ani," matod ni Tabal, kinsa mipaambit usab og gamayng giya ngadto sa mga partisipante kalabot kon unsaon paglampos sa ilang tagsatagsa ka tahas. "It is easy to achieve kay dili man ka pressure ani, then you finish it in one month pa gyud," dugang sa giilang Queen of Marathon sa Sugbo. Laing katuyoan sa kalihukan mao ang paggahin og pundo aron mapadayon ang pagtungha niadtong mga bata kansang nga ginikanan gipamusil-patay sa mga New People's Army sa ilaha mismong atubangan. Kini nahitabo sa Sitio Lower Budlasan, Brgy. Trinidad, Guihulngan City niadtong Mayo 14, 2021. Modonar usab sila og medical equipment ug magpa-renovate sa room sa Philippines Medical Facility sulod sa Central Command sa Barangay Apas, Dakbayan sa Sugbo. Laing makabenepisyo mao ang mga kanhi rebelde nga nibalik na sa sabakan sa gobiyerno. Aduna kini sila'y gahin nga gamiton alang sa ilang skills training. Tungod sa nagpadayon nga pandemya, ang mga partisipante pahimangno-an usab sa pagsunod sa mga health and safety protocols. Ang pagpangrehistro sugdan na karong adlawa, Hunyo 1, 2021. This posting includes an audio/video/photo media file: Download Now

Naglungotlungot si Donaire nga makabawos sa Japan Monster Posted: 01 Jun 2021 04:15 AM PDT Ang pagpanimalos maoy misantop karon sa alimpatakan ni Nonito "The Filipino Flash" Donaire batok sa mipildi kaniya duha ka mga tuig ang nakalabay nga si Naoya Inoue, ang boxing superstar sa Japan. Sa post-fight interview human niya hukasi sa World Boxing Council (WBC) ang Frenchman nga si Nordine Oubaali pinaagi sa pag-knockout niini sa fourth round, si Donaire malaumon nga mahan-ay sa iyang mga promoter ang maong away. "That is why I came to fight and win this one because I want to make that happen," matod ni Donaire kinsa naglungot-lungot nga makig-rematch ni Inoue (20-0, 17 KOs). "That's what I want, and I know Richard and my promotion would make that happen." Ang pagpakig-away og balik sa gitawag og "The Monster" maoy usa sa mga lakang nga maagi-an ni Donaire aron sa paghiusa sa tanang bakus sa bantamweight division. Si Inoue, 28, maoy naghupot sa titulo sa International Boxing Federation (IBF) ug World Boxing Association (WBA) sa maong division samtang ang laing Pinoy nga si Johnriel Casimero mao usab ang World Boxing Organization (WBO) bantamweight king. Dako ang pagtuo ni Donaire (47-6, 27 KOs) nga bisan pa sa iyang edad nga 38-anyos, mahimo gihapon niya paghiusa sa mga titulo. "That's right, that's the goal," diretsong tubag ni Donaire kinsa maoy pinaka-edaran nga na-champion sa bantamweight division. Iyang nabuak ang rekord nga nahuptan ni Gerry Penalosa, kinsa na-champion sa maong division sa edad nga 35-anyos. (JBM) This posting includes an audio/video/photo media file: Download Now

Jazz mitipi sa Grizzlies, 3-1 na sa series; Wizards buhi pa; gipukan ang Sixers sa Game 4 Posted: 01 Jun 2021 12:53 AM PDT Gibingat sa top-seeded Utah Jazz ang ilang bintaha, 3-1, sa best-of-seven Western Conference playoffs series pinaagi sa pagpukan na usab sa Memphis Grizzlies, 120-113, sa Game 5, Martes, Hunyo 1, 2021. Ang Jazz mosuway pagtapos sa series sa Game 6 karong Huwebes (Miyerkules sa America) didto na sa ilang korte. Si Donovan Mitchell maoy nanglo sa Utah nga may 30 puntos samtang si Jordan Clarkson mipabuto og upat ka tres ug mitapos sa duwa nga may 24 puntos. Sama sa Game Four, human mabiyai og diyes puntos mipahagsa na usab ang Memphis og rally sa naghinapos nga bahin nga naghatag og hulga sa Utah. Apan nahunong ang rally sa dihag nakuhaan og bola si Ja Morant ni Mike Conley, kanhi sakop sa Grizzlies nga karon anaa na sa Jazz, sa dihang molusot na unta kini. Human makakawat sa bola, mipabuto usab gilayon og tres si Conely ug kadto maoy nag-iwag sa ilang dalan paingon ngadto sa kadaugan. Wala modap-ig ang kagabhion sa Grizzlie tungod kay pipila nila ka itsa gikan sa three-point area wala manulod, samtang nagpungasi ang itsa sa Jazz sa gawas nga bahin. Sa Eastern Conference, nabuhian sa ilang dugo ang Washington Wizards human nila mabuntog ang Philadelphia Sixers, 122-114. Ang pagkawagtang ni Joel Embiid sa Sixers sa first quarter maoy usa sa mga hinungdan sa kapakyas a Sixers nga sa unang higayon sulod sa 36 ka tuig makatilaw na unta sila og 4-0 nga kadaugan sa playoffs. Si Bradley Beal miyagyag og 27 puntos, samtang si Russel Westbrook mitali sa iyang ika-12 nga triple-double sa karon nga season. Usa sa nahimong paagi sa kadaugan sa Wizards mao ang pagsigi og foul ni Ben Simmons kinsa naila sa iyang pagkabanga sa free throw line. Ang Game 5 sa ilang best-of-seven series mobalik didto sa korte sa Philadelphia karong Huwebes. (JBM) This posting includes an audio/video/photo media file: Download Now

Northern Cebu, pipila ka dapit sa Visayas ubos sa signal no. 1 sa bagyong Dante Posted: 31 May 2021 05:52 PM PDT Ubos na sa signal no. 1 ang pipila ka mga lungsod sa amihanang Sugbo samtang nagkaduol ang bagyong Dante sa Kabisay-an. Ang Philippine Atmospheric Geophysicial Astronomical Services Administration (Pagasa) nipaubos sa signal no. 1 sa Catmon, Sogod, Borbon, Tabogon, Dakbayan sa Bogo, Medellin, Daanbantayan, San Remegio, Tabuelan, mga isla sa Bantayan ug mga Isla sa Camotes. Laing mga lugar sa Kabisay-an nga ubos sa signal no. 1 naglakip sa Leyte, Southern Leyte ug Biliran. Sa Mindanao, ubos sa signal no. 1 ang northern portion sa Surigao del Sur (San Agustin, Marihatag, Cagwait, Tandag City, Bayabas, Tago, Cortes, Lanuza, Carmen, Madrin, Cantilan, Carrascal,San Miguel) northen portion sa Agusan del Sur (Sibagat), northen portion sa Agusan del Norte (Cabadbaran City, Santiago, Tubay, Jabonga, Kitcharao), Dinagat Islands ug Surigao del Norte. Pipila ka mga dapit sa Luzon ubos na usab sa signal no. 1. Mga biyahe sa mga barko ning mga lugara gikanselar sa Philippine Coast Guard. Sa ilang labing uwahing bulletin nga gipagawas sa Pagasa Martes sa alas 5 sa buntag, ang bagyong Dante nahimutang sa 310 kilometro amihanan sa Surigao City, Surigao del Norte nga dunay gikusgon sa hangin nga 75 kilometro matag takna ug unos hangtod sa 90 kilometro matag takna. (REV) This posting includes an audio/video/photo media file: Download Now

Espinoza: Mapriso ang kapitan? Posted: 31 May 2021 04:48 PM PDT DI NA masabot ang panahon karon. Sa miaging mga buwan nga ting-init, mokalit lang og uwan unya naa pa gyud bagyo moabot. Karon ang probinsya sa Davao ug Cotabato gibahaan. Sa miaging adlaw ang lungsod sa Bayabas, Surigao del Sur, silingan sa Cagwait, ang akong lungsod nga natawhan, gilinog. Mao na ba ni ang giingon nga "signos sa panahon"? Dili ko matuotuohon ug di sad ni panghadlok apan mao ni ang storya sa gamay pa ko sa akong mga katiguwangan nga ilang gitawag nga "signos sa panahon" nga hapit matapos ang atong kalibutan kon dunay moabot nga nagkalainlain nga kalamidad sama bagyo, linog, unos ug kining pandemya karon sa Covid-19. Niadtong Dominggo didto sa Liloan, Cebu, duha ka tawo ang namatay dihang naigo sa kilat. Kapin na sa usa ka tuig ang pagkuyanap sa Covid-19, nga dili lang ang atong nasud maoy nagrabehan apan lakip na ang mga nasud nga giila nga dagko ug adunahan sama sa America ug sa Europa. Bisan pa sa nagpadayon karon nga pagbakuna sa katawhan batok sa Covid-19, apan nagsige gihapon og saka ang gidaghanon sa mga natakdan sa virus didto sa kaulohan sa atong nasud. Swerte ang mga kalungsoran sa Probinsya sa Sugbo ingon man ang dagko nga mga dakbayan sama sa Cebu, Mandaue ug Lapu-Lapu nga napugngan ug naminosan ang pagkuyanap sa Covid-19 tungod sa kooperasyon sa katawhan ug walay undang nga pagpatuman sa mga health protocols sama sa pagsul-ob sa face mask ug face shield kon mogawas sa panimalay. Apan, mao lagi, duna gihapon mga tawo nga nagduda nga dili tinuod ning pandemya sa Covid-19 tungod sa mga dili mao nga impormasyon nga ilang nabasahan o nadunggan maong' dili motuman sa health protocols. Dunay mga tawo usab nga nagtuo nga kining Covid-19 gimugna ni sa World Health Organization (WHO) ug sa atong Department of Health (DOH) aron makakwarta og maayo ang mga parmasyutika ug ang tigbuhat sa mga tambal. Si Nini Cabaero, akong kauban sa buhat, sa iyang lindog kagahapon nakurat siya sa iyang nakita didto sa kabukiran sa Sugbo, kanang maagian sa Transcentral Highway, nga ang mga tawo didto wala magsul-ob og face mask o face shield. Matud pa ni Ms. Cabaero nga ang gitawag karon nga new normal mao man ang magsul-ob sa face mask ug face shield labina sa mga molakaw ug sa mga naninda. Niadtong Nobembre sa miaging tuig, nga namalit ko og utanon ug lagotmon sa mga naninda sa kilid sa Transcentral Highway nga di sila mosul-ob og face mask, matud pa nila, walay corona virus sa ilang dapit. Nahibulong sad ko nganong wala gipatuman dakbayan sa Sugbo ang pagsul-ob og face mask sa mga barangay sa kabukiran. Karon, tungod sa nagkadaghan pa sa kaso sa Covid-19, labina didto sa kaulohan ug Mindanao (gani ang dakbayan sa Davao naglakdawon na usab), ang Malakanyang nagpagawas og orden nga pasakaan og kaso ang mga kapitan sa barangay nga dili makapatuman sa health protocols. Mga abay, ayaw tawon ipapriso inyong kapitan. This posting includes an audio/video/photo media file: Download Now

You are subscribed to email updates from https://www.sunstar.com.ph/. To stop receiving these emails, you may unsubscribe now.	Email delivery powered by Google
Google, 1600 Amphitheatre Parkway, Mountain View, CA 94043, United States