https://www.sunstar.com.ph/ |
- Fajardo, Beermen kaging sa Terrafirma sa overtime
- Real estate agent 'person of interest' sa kaso sa pagpatay kang Rex Fernandez
- 6 patay, 1 missing sa sunog
- 2 ka mabdos nanganak sa BIC sa Cebu City
- Kapin sa 400K gi-Covid sa Agusto 2021 sa Pilipinas
- Mortuary freezer sa Cebu City magamit na
- 8 ka konsehal sa Lapu-Lapu gimandoan sa pag-isolate
- Mandaue motuon aron vax card di mapeke
- Basil: Maymay Entrata gustong modaug si Kisses sa MUP
- Mahal mipanaw na
- Talk to Papa Joe: Si Bro ug si Hubby
- Diputado: Kanus-a gyud kaha mo-resign si Sec. Duque ?
- Lonzon: Mga suspek sa pagpatay giila daan?
- Opinyon: ‘Ber’ na gyud
- Casimero vs. Inoue madayon?
- Migallen: Magsayo gipikhan ni Tepora; batasan nausab na kuno
- Marcial giyahan sa trainer ni Ugas
- Hidilyn, gihimong balaod
| Fajardo, Beermen kaging sa Terrafirma sa overtime Posted: 01 Sep 2021 03:19 AM PDT GIPAKAGING sa Terrafirma Dyip ang inilog nga San Miguel Beer sa overtime, 110-104, alang sa ilang unang kadaugan sa PBA Philippine Cup sa Don Honiro Ventura State University Gym sa Bacolor, Pampanga, Septiyembre 1, 2021. Si Juami Tiongson kinsa mitali og 28 puntos, nakigkumboya ni Aldrech Ramos nga may 17 puntos aron ihatod ang panag-engkuwentro ngadto sa overtime. Sa extension period sila na si Eric Camson ug Rashwan McCarthy ang mitiwas sa rally pinaagi sa ilang free throws nga maoy mikompleto sa pagpapas sa 16 puntos nga labaw sa Beermen aron pagsiguro sa ilang unang kadaugan human sa upat ka sunodsunod nga pagkapukan. "I just stayed calm and have some fun because at the end of the day, it's just basketball," matod ni Tiongson. Ang Beermen nahagsa sa 3-2 nga baraha. Taliwala sa kapildihan mao usab ang unang paghibalik ni Terrence Romeo kinsa mao pay paghibalik sa duwa tungod sa injury apan mitali kini og 28 puntos. Ang Sugboanong si June Mar Fajardo kinsa padayong naghambin sa kasub-anan sa pagtaliwan sa iyang pinanggang inahan duha ka semana ang milabay, mipugnit og 18 puntos. Mga puntos: Terrafirma (110) - Tiongson 28, Ramos 17, Camson 13, Gabayni 11, McCarthy 10, Cahilig 9, Rosser 7, Celda 6, Batiller 5, Laput 4, Calvo 0. San Miguel (104) - Romeo 28, Fajardo 18, Santos 19, Tautuaa 11, Perez 10, Ross 10, Lassiter 5, Gotladera 3, Gamalinda 0, Zamar 0, Pessumal 0. Quarterscores: 19-16; 42-40; 61-75; 95-95 (reg); 110-104. (JBM)  This posting includes an audio/video/photo media file: Download Now |
| Real estate agent 'person of interest' sa kaso sa pagpatay kang Rex Fernandez Posted: 31 Aug 2021 08:50 PM PDT ANG real estate agent nga kauban ni Atty. Rex Fernandez atol sa pagpamusil sa abogado niadong Agosto 26 gikonsidera na nga person of interest human nga 6 ka adlaw wala mo kooperar sa kapulisan ug midala sa mga gamit sa abogado. Adunay nakahatag og impormasyon sa kapulisan nga si Rosinda Acot, kinsa kauban ni Fernandez, nagdala sa mga gamit sa abogado. Matod ni Police Colonel Josefino Ligan, hepe sa Cebu City Police Office, nga hangtod karon, wala gyud mo duol sa kapulisan sa siyudad nga nag-imbestigar sa kaso sa manlalaban. Panawagan sa kapulisan kang Acot nga mogawas kini ug moduol sa Special Investigation Task Group aron mohatag og katin-awan nganong naa siya sa sakyanan ug mahibaw-an usab kung asa sila gikan. Samtang aduna na usab silay nakuha nga dash camera. (AYB)  This posting includes an audio/video/photo media file: Download Now |
| Posted: 31 Aug 2021 07:02 AM PDT TRAHEDYA ang gidangatan sa usa ka pamilya nga nagpuyo sa compound sa Arlington Pond, Barangay Santa Cruz, Dakbayan sa Sugbo human miigo ang sunog kagahapon, Agosto 31, 2021, sa 2:00 sa hapon. Gibutyag ni FO3 Pulbert Navarro, imbestigador sa Cebu City Fire Department, nga sa inisyal nila nga imbestigasyon nga adunay lima ka lawas sa tawo ang ilang napalgan. Wa magdugay adunay ika-unom nga paig nga lawas ang nakita. Ang unang lima ka lawas nga napalgan giila nga ila ni: Hannah Mae Carvajal, 34, female; Felicity Sachi Carvajal, 12, female; Lyka Carvajal, 16, female; Andre Carvajal, 6, male; Dan Henry Carvajal, 3, male. Saysay ni Navarro nga ang mga lawas nagtapad ra sa usa ka lugar. Sa inisyal nga inpormasyon sa kabomberohan adunay duha ka tawo ang missing nga sila si: Lilian Carvajal, 72, female, ug Ivan Mejia, 58, male usa ka person with disabilities. Atol niining pagsuwat wa pa matino kon si kinsa sa duha ka tawo nga gikatahong missing ang ika-unom nga lawas nga labing uwahi nga napalgan. Pasado 8:00 kagabii gihunong na sa mga sakop sa Bureau of Fire Protection (BFP) Cebu City ang retrieval operation gumikan sa kangitngit na sa lugar. NA-TRAP Nagtuo ang imbestigador nga posible nga naglibog ang mga biktima kon unsaon nila paggawas sa balay gumikan sa bagang aso ug grabeng pag-ulbo sa kayo. "Kining compound usa ray exit ug entrance mao to nangaratol nangatrap sila sa sulod," matod ni Navarro. Gipanag-iya ni Elizabeth Lao ang ancestral house diin daghan ang nagpuyo. Gibana-bana sa kabomberohan nga moabot ngadto sa P11.2 milyones ang danyos sa sunog. Wa pa sab matino kon unsay hinungdan sa pag-ulbo sa sunog. Gawas lang sa saysay sa mga silingan nga nakadungog sila og buto sa balay ni Lilian Carvajal dayon miulbo ang kayo. Wa pa usab masayri kon unsay nibuto. Samtang si Sta. Cruz Barangay Kapitan Jerome Lim niasoy sa Superbalita Cebu nga ang PWD nga si Ivan Mejia naandan nga trangkahan sa iyang giabangan sa higayon nga ang igsuon adunay importante nga lakaw. Apan inatiman kini sa iyang pagkaon ug pangihanglan sa iyang guardian. Gihulagway nga dili makasulti ug dili makalakaw si Mejia. USA RAY GAWSANAN Gibutyag ni Lim nga wa nay agianan sa luyo nga bahin sa compound human nga adunay bikil ang mga tag-iya sa property. Sa imbestigasyon sa kabomberohan ang hitabo nagsugod sa 1:57 sa hapon ug giisa ang sunog sa second alarm. Under control ang kayo sa 2:25 p.m. ug hingpit nga napawong ang kayo sa 3:41 p.m. Gawas sa mga casualty adunay mga nangaangol nga mga sakop sa BFP ug fire volunteer atol sa pakigkumbati sa kayo. Ang mga angol mao sila si: Insp. Eraño Fernandez, 23, adunay paso sa kamot ug tiil; FO1 Terencio Lape, 30, nasamad sa kamot; fire volunteer John Robert Rallos, 22, samad sa pulso. Moabot sa 15 ka balay ang nasunog, 10 niini ang naugdaw samtang lima ang nakan-an. Adunay unom ka pamilya nga gilangkuban sa 30 ka indibiduwal ang apektado sa sunog.  This posting includes an audio/video/photo media file: Download Now |
| 2 ka mabdos nanganak sa BIC sa Cebu City Posted: 31 Aug 2021 06:55 AM PDT DUHA ka mga inahan nga mabdos nga positibo sa Covid-19 nanganak sa barangay isolation center sa Cebu City Central School sa Agusto 30, 2021. Si Emergency Operations Center (EOC) deputy chief implementer Joel Garganera niingon nga usa ka inahan nagbati ug nanganak. Si Garganera niingon nga laing inahan malampusong nanganak og lalakeng masuso bisan kon siya hypertensive. Iyang gipasalamatan ang maayo nga BIC staff, midwife ug uban pa nga maayong nakabuhat sa ilang tahas. Matod ni Garganera nga ang City Central gipuy-an usab sa 20 ka mabdos nga mga babaye ug 17 ka post partum gikan sa nagkadaiyang mga ospital ug clinics. Samtang, ang Dakbayan sa Sugbo nitala og kinatibuk-ang 2,495 ka mga kaso, diin 116 ang bag-o, 245 ka bag-ong recoveries, 299 nga nangamatay, upat niini bag-o. Kini nidala ngadto sa 37, 693 ang kinatibuk-ang kompirmadong mga kaso sa siyudad. Si Garganera niingon nga nalipay siya sa pagminos sa mga kaso sa Covid-19 sa Cebu City apan nagpabilin pa ning di matagna. "Going down, knock on wood nga magpadayon na gyud ni siya og ubos, our daily positivity rate also decreased and we're now below 3,000 active cases from 4,000 plus, but early to tell but we're happy at EOC," nagkanayon si Garganera. Sa Agusto 21-30, ang Brgy. Guadalupe dunay labing taas nga gidaghanon sa mga kaso, diin duna kini 214, gisundan sa Brgy. Lahug (123), Brgy. Tisa (113), Brgy. Talamban (107) ug Brgy. Apas (82). Naa sab sa 69 porsyento ang bed occupancy rate gikan sa 11 ka pribadong mga ospital ug upat ka pampublikong mga ospital sa Siyudad sa Sugbo, diin 672 ang okupado samtang 302 ang bakante. Lima ka mga pasilidad naa sa kritikal level kun 85 porsyento, usa naa sa high risk level kun 70-85 porsyento, upat ka mga pasilidad naa sa 60 to 70 percent ug ang lima safe kay naa lay 60 porsyento nga occupancy rate. (MVE)  This posting includes an audio/video/photo media file: Download Now |
| Kapin sa 400K gi-Covid sa Agusto 2021 sa Pilipinas Posted: 31 Aug 2021 06:55 AM PDT MOKABAT sa kinatibuk-ang 400,892 ka bag-ong mga kaso sa coronavirus disease 2019 (Covid-19) ug 5,559 ang gitaho nga nangamatay sa buwan lang sa Agusto 2021 samtang ang mananakod kaayong Delta variant mikaylap sa nasod. Mao kini ang labing taas nga mga kaso sa Covid-19 statistics sa Pilipinas sukad nagsugod ang pandemic. Ang 400,892 ka mga bag-ong kaso nga natala sa Agusto mas taas og 38 porsyento kay sa 290,172 nga gitaho sa Abril 2021, dihang ang Alpha ug Beta variants nikaylap sa National Capital Region (NCR) ug ubang dapit sa Luzon. Mas taa usab ni og 214.5 porsyento kay sa 127,465 ka mga kaso nga gitaho usa ka tuig na ang nakalabay sa Agosto, dihang sa unang higayon nisulbong ang Covid sa Pilipinas. Ang 5,559 nga nangamatay, sa pikas bahin, mas taas og 41 porsyento kay 3,937 nga nangamatay sa Abril 2021 ug 262 porsyento nga mas taas kay 1,535 nga nangamatay sa Agusto 2020. Si DOH Undersecretary Maria Rosario Vergeire, sa usa ka press conference sa sayo sa Martes, Agosto 31, niingon nga ang Pilipinas wa pa makakita sa tumoy sa epedemya. Matod niya nga ang mga kaso padayonng mosaka samtang ang Delta variant magpadayon sa pagpanakod ug ang local government units mohingusog sa pagpangita sa aktibong mga kaso ug sa contact tracing. Sa Agusto 31, ang Department of Health (DOH) nitaho og 13,827 bag-ong mga kaso, grabeng pagtibusok human sa labing taas nga record nga 22,366 sa Lunes, Agusto 30, samtang nitidlom usab ang testing output. "The relatively low number of cases today is due to lower laboratory output last Sunday. Lower number of samples from disease reporting units or LGUs are also being observed during Sundays," matod sa DOH case bulletin. Ang gidaghanon sa mga kaso sagad ubos sa Martes kay kini gibase sa testing output sa Dominggo dihang daghang mga laboratoryo ang sirado sa weekend. Sa Agusto 29, walo ka mga laboratoryo wa mo-submit sa ilang testing output sa Covid-19 Document Repository System, hinungdan nga niminos ang mga test nga gihimo og 32 porsyento ngadto sa 49,187 gikan sa 65,237 sa Agusto 28. Ang positivity rate niminos og gamay apan nagpabilin sa taas nga 25.4 porsyento, nga nagpasabot nga usa sa matag tawo nga gi-test sa Agusto 29 nagpositibo sa Sars-CoV-2. Ang bag-ong mga kaso nidala sa kinatibuk-ang gidaghanon sa mga kaso sa Pilipinas ngadto sa 1,989, 857. Dunay 172 nga nagdoble nga gitangtang gikan sa tally. Ang The DOH nitaho og dugang 118 ka dugang nangamatay, lakip sa 37 ka mga kaso nga gi-reclassify og recoveries. Kini nidala sa kinatibuk-ang nangamatay sa Covid-19 ngadto sa 33,448. Duna nay 1,810,847 ang nangaalim na sa infection, lakip na ang 16,759 nga gitaho sa Agosto 31. Dunay nahabilin nga 145,562 ka aktibong mga kaso nga gitaho sa Martes, diin 0.6 percent ang kritikal, 1.1 porsyento severe, 0.99 porsyento ang moderate, 95.9 percent ang mild ug 1.4 porsyento ang asymptomatic.59 reported on Tuesday. (MVI, Sunstar Philippines)  This posting includes an audio/video/photo media file: Download Now |
| Mortuary freezer sa Cebu City magamit na Posted: 31 Aug 2021 06:55 AM PDT MAGAMIT na ang mortuary freezer sa Cebu City Government para maoy pundohan sa mga minatay nga dili dayon malubong. Si Konsehal Dave Tumulak sa interview sa Agusto 31, 2021, nagkanayon nga hingpit nang nakumpleto ang pag-istalar sa storage facility nga gipahuwam sa Alin Group of Companies aron adunay magamit ang City Governmnet niining panahon sa pandemya. Ang konsehal niingon nga adunay 24 ka patay ang masulod sa cadaver van nga gihulagway ni Tumulak nga dakong tabang sanglit dili na magbayad og storage fee ngadto sa funeral home ang pamilya nga namatyan. Samtang ang Mandaue Eagles Club, Alsa Bisaya, Four D Ventures ug Nautilux Mining Corp. maoy nagtinabangay aron matukod ang 80 ka mga nitso aron malubngan sa mga makalas sa Covid-19 ug ubang mga sakit. Si Cebu City Councilor Jerry Guardo maoy nagpasiugda sa kalihukan samtang nagpaabot pa sa gikinahanglang materyales ug manpower gikan sa City Hall. Sa higayon nga mapirmahan na ni Mayor Edgardo Labella ug Archbishop Jose Palma sa Archdiocese of Cebu ang memorandum of agreement may labot sa pagtukod sa 290 ka nitso nga ipahiluna sa sam-ang sa Calamba, Carreta, Talamban ug Luz, mahimo nang makapagawas og pundo ang City Government aron masugdan na kini og tukod. (PAC)  This posting includes an audio/video/photo media file: Download Now |
| 8 ka konsehal sa Lapu-Lapu gimandoan sa pag-isolate Posted: 31 Aug 2021 06:55 AM PDT WALO ka mga konsehal ug mga sakop sa Sangguniang Panglungsod (SP) secretariat sa Dakbayan sa Lapu-Lapu gimandoan sa health officials sa pag-isolate sa kaugalingon ug mopailawom sa swab test human ang usa sa mga reporter nga ning-cover sa session sa Huwebes, Agosto 26, nagpositibo sa Covid-19. Ang Lapu-Lapu City Health Office niluwat og mga kamandoan kanila ni City Councilors Rico Amores, Flaviano "Bobit" Hiyas, Gregorio Paquibot, Rudy Potot, Michael Dignos, Rex Mangubat, Junrey Gestopa ug Eduardo Cuizon, Association of Barangay Council (ABC) president, pagpa swab test alang sa coronavirus disease 2019 (Covid-19). Gawas sa walo ka mga konsehal, ang personnel nga gipangulohan ni SP secretary Franco Limpangog ug lokal nga journalists nga ningtambong sa session gi-swab ug gimandoan sa pag-isolate usab kay ningtambong sila sa "session" sa Marian Seaview restaurant sa Barangay Ibo. Ang walo ka mga konsehal, nga kaalyado ni kanhi mayor ug Lapu-Lapu City Congresswoman Paz Radaza, ningsupak sa mando nga giluwatan ni Vice Mayor Celedonio Sitoy sa di pagpahigayon og physical sessions human ang 15 ka mga kawani sa City Hall napalgang positibo sa Sars-CoV-2, kagaw nga nagdala sa Covid-19. Ang walo ka mga konsehal nipasiugda sa face-to-face session sa Marina Seaview sa Huwebes aron pagtuki sa duha ka mga resolusyon, usa niini nag-awhag sa Department of Environment and Natural Resources (DENR) sa paghatag og area clearance alang sa 400-hektaryang Mactan North Reclamation Project sa Ibo. Ang proyekto, nga giaprobahan sa 2015 atol sa termino ni Radaza, wa mahatagi og area clearance tungod sa kaso sa korte tali sa mga contractor sa proyekto. Matod ni Sitoy nga ang tigbalita nga nitambong nakasinati na og mga simtomas sa Covid-19 dihang siya nitambong sa session. Si Mayor Junard Chan pasiunang nimando sa temporaryong pagsirado sa City Hall gikan sa Agosto 26 ngadto sa 30 human ang 15 ka mga kawani nagpositibo sa Covid-19. Sila si Sitoy ug city councilors Janvi Dela Serna, Nelson Yap, Efren Herrera, Queennie Malingin Amman ug Sangguniang Kabataan (SK) Federation President Laika Tampus wa makatambong. Apan sa interview, si Chan nisulti sa Superbalita nga duha sa iyang nga nakatambong sa session nipahibawo sa SP secretary nga si Sitoy ug lima ka mga konsehal gustong moapil sa pagtuki sa walo ka mga konsehal apan virtual. Si Sitoy di usab pisikal nga makatambong sa session kay siya nag-isolate human ang iyang asawa nagpositibo sa Covid-19. Apan matod ni Chan nga si Limpangog wa maminaw kang Sitoy ug sa lima ka mga konsehal sa di pagtambong. Nakugang usab si Chan sa presensya ni Limpangog bisan kon siya ug iyang personnel gimandoan sa pag-isolate kay giisip silang mga close contact ni Sitoy dihang ang asawa sa bise mayor nagpositibo sa Covid-19. "Their motives were very suspicious when they conducted a physical session even though they were ordered by Vice Mayor Sitoy to just hold virtual sessions. Why are they in a hurry to approve that measure even though the proposed reclamation project is still being settled in court?" sulti ni Chan sa Superbalita Cebu. Sa usa ka hiniusang pamahayag, nga giduso ngadto sa SunStar Cebu, ang walo ka mga konsehal nga girepresentahan ni Dignos niingon nga ang session dunay pagtugot kang Sitoy. "The notice of the Vice Mayor for the SP members to proceed to Marina Seaview for the session or if others could not attend may join via Zoom but due to the internal rules of the City Council providing for a physical session, the Zoom session could not be made unless the internal rules is amended," matod nila. (JKV, FVQ, GCM)  This posting includes an audio/video/photo media file: Download Now |
| Mandaue motuon aron vax card di mapeke Posted: 31 Aug 2021 05:17 AM PDT MANDAUE City Mayor Jonas Cortes nga makigtagbo ngadto sa mga committee nga nag-atiman sa pagpamakuna sa dakbayan, aron hisgutan ang mga pamaagi nga kalikayan nga kopyahon o i-peke ang vaccination card. Samtang dili magduha-duha sa pagpasaka og kaso si Cortes batok sa mga naghimo og peke nga vaccination card ingon man ngadto sa mga nagpahimo niini. Kini human nga adunay nasikop ang Carbon Police Station sa Dakbayan sa Sugbo nga manghimo-ay og fake vaccination card pinaagi sa entrapment operation. Nasayran ni Cortes nga ang nakumpiskar nga fake vaccination card susama sa dakbayan sa Mandaue. Tungod niini, dili siya magpanuko og sang-at og kaso batok niini. Wala masabti ni Cortes nganong nakuha pa niining mga suspek nga maghimo og peke nga vaccination card kung mamahimo ra kini nilang makuha nga libre pinaagi sa pagpabakuna. Matod ni Cortes nga simple ra sab ang proseso sa pagpabakuna kinahanglan lang sila nga magparehistro, motunga sa gikatakda nga skedyul sa pagpabakuna ug ila nang makuha ang vaccination card nga libre. Protektado na sab sila batok sa Covid-19. "Di ko kakuha sa logic nga naa man untay programa sa gobyerno nga wala gyuy bayad nya makaayo ni para nila kaysa sila mubayad sa fake documents," saysay ni Cortes. Aron masiguro kon ang usa ka vaccination card sa dakbayan sa Mandaue peke ba o dili, gikinahanglan kining ipakompirma ang inpormasyon sa sistema ngadto sa Mandaue City vaccination operations Center (VOC). Sigon niya nga mamahimo rang makapanawag ang bisan kinsa ngadto sa ilang VOC aron ipakompirmar ang maong vaccination card. Ang Mandaue VOC adunay hotline number nga (032) 230-4500 loc. 1120 o 1121. Giawhag sab ni Cortes ang publiko nga mosumbong sa Mandaue VOC o ngadto sa duol nga police station kon aduna silay mahibaw-an nga nagpeke og vaccination cards. (KFD)  This posting includes an audio/video/photo media file: Download Now |
| Basil: Maymay Entrata gustong modaug si Kisses sa MUP Posted: 31 Aug 2021 05:17 AM PDT MANILA--Nagka-close sila si Maymay Entrata ug Kisses Delavin sa dihang pareho silang housemate sa Bahay ni Kuya. Si Maymay ang mingdaog sa babaye, ambot nakalimutan ko na sa lalaki. Haha. Aware si Maymay nga sa kasamtangan usa si Kisses sa paboritong kandidata sa Miss Universe Philippines 2021. In fact, usa sa nag-top si Kisses sa Runway Challenge. Gusto ni Maymay nga si Kisses ang modaug kay nasayod siya nga may K kini nga modaug tungod kay utukan ug maanyag. Dili active sa iyang social media karon si Kisses, ang mga kugihan nga mag-post mao ang iyang mga supporters which is okey para di niya mabasa ang mga bash sa iyaha although naglabi naman ang gustong-gusto siya. Sa dihang gipangutana si Maymay kung mosalmot ba siya sa dinagkong beauty pageants like MUP, grabe ang pagtanggi ni Maymay. "Kulang na kulang ako nito," nguso niya sa iyang boobs sa dihang gi-interview siya sa pipila ka movie press. Hanggang sa pagmo-modelong ug pag-artista lang jud kuno siya. Pero sa gipahigayong Interview Challenge diin ang nag-interview sa mga kandidata mao ang gikaintapan nga si Voltaire Tayag, wala mahaapil ang pangan ni Kisses sa Top 7. Okey naman ang iyang tubag ug in passing, naisingit ni Kisses nga usa siya ka miracle baby tungod kay kaniadtong bata pa siya, muntikan na siyang mamatay. Actually, ang mga misod sa top 7 sa Interview Challenge dili masyadong popular candidates like: 1. Victoria Velasquez Vincent of Cavite, 2. Maria Ingrid Teresita Santamaria of Paranaque, 3. Rousanne Marie Bernos of San Juan City, 4. Isabel De Los Santos of Makati, 5.Megan Julia Roa Digal of Bukidnon, 6.Beatrice Luigi Gomez of Cebu City ug 7. Simone Nadine Bornilla of Marinduque in that order. Happy ako tungod kay nakasud si Simone Nadine Bornilla tungod kay dark horse siya sa competition. She's gaining attention hilabi na sa dihang nahibaw-an nga gipadako siya sa usa ka gay couple of hilabi na siguro karon nga nakauban siya sa Top 7, sana modaghan ang suporta kaniya ug sana mas mapansin pa siya.  This posting includes an audio/video/photo media file: Download Now |
| Posted: 31 Aug 2021 04:43 AM PDT ANG komedyante nga si Mahal, o Noeme Tesorero sa tinuod kinabuhi, mipanaw na ganinang hapon, Agosto 31. Mao kini ang gikompirmar sa igsuon sa komedyante nga si Irene Tesorero. Wala'y gihatag nga detalye unsay gikamatyan niini ug wala pa usa'y detalye sa haya niini tungod sa Covid-19 restrictions. (HBL)  This posting includes an audio/video/photo media file: Download Now |
| Talk to Papa Joe: Si Bro ug si Hubby Posted: 31 Aug 2021 04:42 AM PDT Dear Papa Joe, Tagoa lang ko sa name nga Superwoman, Paps. Minyo ko but buwag sa akong bana. Mga 3 years na ming buwag ug na complicated ang akong life tungod ani. Ang akong problema about sa sitwasyon sa akong lovelife. Human nibiya nako ang akong bana, akong nadakdakan sa akong kasakit ang iyang manghod. Until nagka close mi but secret mi magkita kita kay galikay mi sa mga story sa mga tawo nga maayo momugna og mga story. After a year, nagkauyab ming duha nga way bisan usa sa among family nga nakahibawo. Single siya ug ready siya nga mogasto sa annulment ug unya na namo ipahibawo kon ma annulled mi sa akong bana ug magminyo. But problema dako kaayo kay ang akong bana makig uli nako ug ready siya mobiya sa iyang live-in. Ang among mga anak maoy iyang gihimong bridge. Noy, naglibog unsa ang akong buhaton. Di ko mo deny love pa nako akong hubby but iyang bro naa nay part sa akong heart. Makalibog, Paps? SUPERWOMAN Superwoman, Ang ako no kanang mobalik ka gikan sa diin gikan ang imong lovelife kay mas makaayo ug advantage nimo kay di ilegal ba ang relationship. Angkon man ka nga love pa nimo si Mister. Kanang iyang igsuon makasabot ra na kon tinuod kang love niya. Kon nagkauyab ug basin nagka esmiringhoy mo, inyo na lang nang duha ug maingon tang punga nga secret na ninyong duha. Anyway, kamo ra man ang nakahibawo, wa may laing tawo. Basta, balik asa ka gikan. Pasayloa ang imong bana kon naka realize na siya sa iyang sala. PAPA JOE (Kon kamo dunay problema, ipadala sa papajoecebu@gmail.com)  This posting includes an audio/video/photo media file: Download Now |
| Diputado: Kanus-a gyud kaha mo-resign si Sec. Duque ? Posted: 31 Aug 2021 04:42 AM PDT UNSA kahay racket anang grupo sa mga batan-on nga magdaladala og bag unya mangayo og hinabang, apil pagkaon? Pero kon imong mabantayan, nagsakay na sila og van unya i-drop sa usa ka lugar sa di pa mosugod sa ilang duol-duol sa mga tawo unya mangayo og hinabang. Ang uban mag-Binisaya, ang uban sab mag-Tinagalog. Kasagaran, duha o tulo na sila mag-uban sa usa ka grupo. Nihit man rong panahona tungod ni Covid, ug daghan sa mga tawo naglisod og kwarta kay daghan ang nawad-an og trabaho, dili unta ta angay matingala kon daghan ang mangayo og pagkaon o kwarta. Pero kon mogawas nga mora'g racket na ang gihimo tungod sa ilang modus, di ba angay nga matingala kita kon tinuod ba kaha ni o dunay sindikato nga nagpaluyo aning tanan? Bibo ning nahitabo sa PDP-Laban karon. Nagubot ang partido kay gitangtang ang grupo ni Senador Manny Pacquiao ug Koko Pimentel og gipulihan sa grupo ni Energy Secretary Al Cusi. Wa pod magdugay, gitangtang pod sa grupo ni Pacquiao ang mga opisyal sa grupo ni Cusi. Bawos-bawos og tangtang sila. Di pa mahibaw-an og asa nga tangtang ang pinasubay sa balaod. Unya, gidawat ni Presidente Rodrigo Duterte (PRRD) ang nomination sa PDP-Laban sa pagka-bise presidente pero gisalindot ni Senador Bong Go ang nomination sa pagka-presidente. Makalibog ning pagdawat ni PRRD kay kadaghan na niya balikbalika og sulti nga inig kahuman sa termino sa 2022, mopahuway na siya sa Davao. Ang nahitabo, nahimong duha ka grupo ang PDP-Laban, grupo ni Pacquiao ug grupo ni Cusi. Unsa nga grupo man ang tinuod nga PDP-Laban? Bugtong ang Comelec o Supreme Court ra ang makatubag ana. Sa pagka-karon, nabuak ang PDP-Laban. Kon buak ang usa ka partido, lig-on ba ang maong partido? Buyno, malipay ang ubang partido pod, labi na ang kontra. Kanus-a kaha ni si Health Secretary Francisco Duque mo-resign noh? Sa dihang gibatikos siya og maayo unya gisultian nga mo-resign na lang, misulti siya nga he serves at the pleasure of the president. Karon nga misulti na man si PRRD nga dawaton niya kon mo-resign si Duque, mipalain na sab og tuno si Duque. Mo-resign kuno siya if the time comes. Susmaryusep, kanus-a pa intawon. Siya ra diay ang magbuot kon kanus-a siya mo-resign bisan klaro na nga gibuhian na siya ni PRRD? Nagtuo tingali si Duque nga kon mawala sa DOH, maparalisar ang tanang kalihokan sa departamento. Nagtuo tingali siya nga siya raang makahimo og kaayohan sa DOH.  This posting includes an audio/video/photo media file: Download Now |
| Lonzon: Mga suspek sa pagpatay giila daan? Posted: 31 Aug 2021 04:42 AM PDT SA wala pa gibanhigan- patay si Atty. Rex Fernandez niadtong Huwebes, Agusto 26, sa Sitio Banawa, Brgy. Guadalupe, Dakbayan sa Sugbo, gi-post nang daan niya sa iyang Facebook ang mga suspek nga nagtinguha sa pagkutlo sa iyang kinabuhi. Apan naglisod pa gihapon sa pag-ila ang mga imbestigador sa kapulisan kon si kinsa ang mastermind. Ato lang paabuton nga madakpan ang killer subay sa pagkolekta og CCTV camera footage sa mga lugar nga ilang giagian hilabi na karon miapil na ang National Bureau of Investigation (NBI) 7. Kutob lang kita sa panghinaot kay hangtod sab karon, wa pay suspek sa kamatayon sa radio commentator nga si Rey Cortes. VENDORS Sayon ra unta sabton sa grupo sa vendors nga misupak sa katukoran sa modernong Carbon Public Market nga di alkanse ang Cebu City Government sa pagsud og kontrata kauban tali sa Megawide Construction Corp. Abogado ug kanhi gud na Ombudsman si Cebu City Mayor Edgardo Labella, di na mosud og kahiwian sa dakong proyekto aron maisyu ug mapasakaan og kaso ngadto sa Ombudsman. Sa karon nga panahon, gikinahanglan ang modernong merkado sa usa ka dakong siyudad aron mapahimuslan sa vendors. Misiaw og balik ang pagprotesta sa grupo sa vendors ug midangop pa ngadto sa korte aron babagan ang proyekto. Samtang di sab na magpakauwaw ang Megawide sa kadako sa ilang kompaniya ug daghan na sila og malampusong proyekto ug unya mamintaha sila batok sa gobiyerno. Gani sa pagtrabaho karon sa modernong Carbon, daghan ang nakatrabaho nga nagpuyo sa Dakbayan sa Sugbo. Akong baruganan na-pabor sa development. Daghan ang makatrabaho ilabi na karon sa pandemya ug mokita pa ang local government unit (LGU ) pinaagi sa mga buhis. (efrenlonzon71@gmail.com o text sa 09235562777)  This posting includes an audio/video/photo media file: Download Now |
| Posted: 31 Aug 2021 03:29 AM PDT BASTA mosud na gani ang buwan sa tuig nga nagtapos og "bre" o "ber" sa Iningles, magsugod na sa pagpanimaho ang espiritu sa Pasko ug kaalegre sa palibot sa Pilipinas, nailang dunay labing taas nga kasaulogan sa Pasko nga magsugod karon, Septiyembre 1. Mga awit sa radyo ug dayandayan sa Pasko sa malls magsugod na. Sadya kaha ang kasaulogan sa Pasko ning tuiga? Sa miaging tuig, medyo nakibhangan ang mga kalihokan sa Pasko tungod sa pagtumaw sa coronavirus disease 2019 (Covid-19). Gidili ang panagtapok. Naisyu ang relihiyusong kalihokan nga gitumok nga usa sa hinungdan sa pagdaghan sa kaso sa Covid-19 niadtong panahona. Sa pagkakaron, ang kaso sa Covid-19 sa Sugbo misaka og balik. Gipaubos og balik sa modified enhanced community quarantine (MECQ). Tungod sa lockdowns, daghang naapektohang negosyo. Dunay nanira. Uban nanaktak og trabahante. Ang resulta, daghang nawad-an og trabaho. Hinuon, ang programa sa kagamhanan sa pagpabakuna nagpadayon sa paningkamot nga makab-ot ang herd immuntiy nga komunidad. Dugang dili maayong balita, sumala sa Department of Health (DOH), ang pagsulod sa nasod, labi na sa Sugbo, sa Delta ug Lambda variants sa Sars-CoV-2, ang virus nga hinungdan sa Covid-19. Ug ikaduhang tuig na karon sa pakigbisog batok sa Covid-19. Hinaut nga nakakuha na kita og leksiyon sa kasinatian. Dili magpadaug sa virus nga magpadayong hulga sa taas pang katuigan. Gibanabana sa mga batid sa panglawas nga dili hingpit mapapas, apan mahimong kabahin sa atong kinabuhi sama sa ubang komon nga sakit. Ang ato na lang, mosunod sa minimum health protocol ug modayon sa panginabuhi. Uban sa pag-ampo, magsadya gihapon ning nagsingabot nga Pasko ubos sa bag-ong normal. Maayong Pasko sa tanan!  This posting includes an audio/video/photo media file: Download Now |
| Posted: 31 Aug 2021 03:29 AM PDT GIANUNSYO ni World Boxing Organization (WBO) bantamweight champion Filipino Johnriel "Quadro Alas" Casimero nga mahinayon na ang usa sa gipangandoy niyang mga away. Sa usa ka video nga iyang gi-post sa YouTube, nagkanayon si Casimero nga ikaharong niya sa usa ka unification bout si Japanese Naoya "Monster" Inoue karong Disyembre 11, 2021. "Next laban natin, magandang laban 'to. Naoya Inoue, December 11," matod sa lumad nga taga Ormoc City, Leyte. Nakatakda na unta kining away sa miaging tuig pa apan gumikan sa pagkuyanap sa Covid-19, hayan wala kini nadayon ug nakig-away na lang og managlahing kontra ang duha ka mga boksidor nga pareho nilang nalampos. Apan taliwala niini, wala'y undang sa paghagit si Casimero kang Naoya, kinsa iyang gihulagway nga nahadlok kaniya. Human sa labing ulahing away ni Casimero diin nadepensaan niya ang iyang korona batok kang Cuban Guillermo Rigondeaux pinaagi sa split decision, maisugong gihagit na sab ni Casimero si Inoue. Wala pa man tuod kontrata nga napirmahan apan ang bag-ong pamahayag ni Casimero sa social media nagsilbeng usa ka senyales nga mahinayon na ang ilang away ni Inoue. Si Casimero naggunit og 31-4, 21KOs nga rekord samtang si Inoue naghupot og 21-0, 18KOs nga baraha. (ESL)  This posting includes an audio/video/photo media file: Download Now |
| Migallen: Magsayo gipikhan ni Tepora; batasan nausab na kuno Posted: 31 Aug 2021 03:29 AM PDT NAHIMONG trending kining kalit nga pag-eksena ni Jhack "El Kapitan" Tepora taliwala sa impresibong kadaugan ni Mark Magsayo batok sa Mexicanong si Julio Ceja sa undercard sa Manny Pacquiao-Yordenis Ugas title fight niadtong Agusto 22, 2021 sa Las Vegas, Nevada. Migintang lang og pipila ka mga adlaw gikan sa maong kadaugan, pinaagi sa iyang Youtube channel ug sa mga media interviews, si Tepora, kanhi world champion, maisugon kaayo nga mihagit ni Magsayo nga daw og dunay nagpahipi nga kalagot. Sa akong sports program interview sa Radio One Cebu 90.1 FM uban ni Kuya Rechel Angel Cabanero niadtong Dominggo, wa itago ni Tepora ang iyang kasuko ni Magsayo gumikan sa dakong pagkausab sa tinagdan ug batasan niini. "Katong dili pa siya champion, dili pa siya sikat kunohay sa una, sigi mi'g chat chat ana niya, pangumusta. Karon nga nakapuyo na'g US, mura man og nabag-ohan. Di na managad unya human chatan di na mo reply," matod ni Tepora, kinsa mipasabot nga wa kini niya buhata niadtong world champion pa siya. Midugang pagsaysay si Tepora nga gani ang pipila ka kauban ni Magsayo sa ALA Boxing kaniadto wa na sab ganahi niya kay di na sab kuno managad. Sa pagkatinuod lang, di kini bag-o alang kanato. Duna na tay nadunggan nga pasumbingay batok ni Magsayo nga susama niining gipadayag sa kanhi world champion nga si Tepora. Gani dunay nagkanayon nga di na kuno makamaong motan-aw si Magsayo sa iyang gigikanan kon diin ug kinsa ang nakadiskubre kaniya. Di kuno makamaong mo-appreciate sa mga effort kon nganong naingon siya niini karon. Kon tinuod man gani ni, posibling batasan gyud siguro ni sa lumad nga taga Tagbilaran City? O kaha dunay nag-instruct o nagsugo kaniya nga mao ni iyang buhaton. Basin feel sa kampo ni Magsayo nga kinahanglan sa iyang status karon selective sila kon kinsa ilang tagdon aron dili ma-distruct ang nagkalambo nga boxing career sa 26-anyos nga knockout artist (23-0, 16KOs). Gani nahitabo usab kini nako. Pipila na ka higayon nga misuway ta og interview pinaagi sa pagpadangat sa atong message ngadto sa iyang messenger apan kaluoy sa Diyos wala na man ta tagda. Wa na mo-reply. Dako kining sukwahi kaniadto sa dihang dili pa siya ingon ani ka inila. Nausab na ang dagan. Taodtaod na man ta ning atong trabaho pero karon pa ko kasugat og ingon ani. Akong nabantayan nga active man siya nga mo-reply sa mga comment sa iyang gipang-post. Basin gilakip ta sa iyang mga gipang-reject. Pero sa gihapon, atong respetohan ang ilang desisyon ug bisan pa man niini atong ihangad sa Kahitas-an nga makab-ot gihapon ang iyang damgo nga mamahimong world champion ug makahatag og igong dungog sa nasod. Ako sayod nga hataas pa kini siya og maabtan sa iyang boxing career pero ako manghinaot nga mobalik-lantaw usab siya sa iyang gigikanan. Goodluck, Mark. (jun.migallen22@gmail.com)  This posting includes an audio/video/photo media file: Download Now |
| Marcial giyahan sa trainer ni Ugas Posted: 31 Aug 2021 02:37 AM PDT HUMAN sa iyang kampanya sa miaging Tokyo Olympics, nagtutok na karon si Eumir Marcial alang sa iyang pagbalik sa professional rank. Karong Oktubre, 2021, manuglarga na og balik si Marcial sa Amerika aron mag-training og sugod alang sa sunod niyang tahas isip professional boxer. Nagkanayon si MP Promotions president Sean Gibbons nga gikuha niya ang kanhi trainer ni Mexican trainer si Angel "Memo" Heredia aron maoy mogiya kang Marcial. Kinsa si Heredia? Si Heredia maoy trainer ni World Boxing Association (WBA) welterweight champion Cuban Yordenis Ugas, kinsa nipakurat sa kalibutan sa boksing pinaagi sa pagposte og unanimous decision nga kadaugan batok kang Filipino boxing icon Manny Pacquiao niadtong Agusto 21, 2021 sa Las Vegas. Si Heredia mao sab ang kanhi trainer ni Mexican great Juan Manuel Marquez, kinsa brutal nga mi-knockout kang Pacquiao sa ikaupat nilang engkuwentro kaniadto. "If Eumir will be booked for a fight in December, then he'll be expected here in the US by October," asoy ni Gibbons nga napatik sa www.businessmirror.com. Giangkon ni Heredia nga wala pa siya nakasuweto sa abilidad ni Marcial apan basi sa iyang mga nasayran, dako ang potensyal sa Tokyo Olympics bronze medalist. "I have never met him [Marcial], but I'll be working with him soon," asoy ni Heredia. "I like him, in my opinion, he is a strong guy with decent punching power and with a good chin." Sa labing unang away ni Marcial sa professional rank niadtong Hulyo, 2020, midaog siya pinaagi sa unanimous decision batok kang American Andrew Whitfield. (ESL)  This posting includes an audio/video/photo media file: Download Now |
| Posted: 31 Aug 2021 02:37 AM PDT GIAPRUBAHAN kagahapon, Agusto 31, 2021, ang ikatulong pagbasa sa gipasakang balaod nga naglatid nga dili kolektahan og tax ang mga bunos ug donasyon nga madawat sa tanang mga atleta sa Pilipinas. Gitawag kini og House Bill No. 9990 o Hidilyn Diaz Law nga gipahinungod kang weightlifter Hidilyn Diaz, kinsa maoy naghatag sa makasaysayon ug labing unang Olympic gold medal sa Pilipinas. Kining maong balaod gihimo aron mausab ang Republic Act No. 10699 o National Athletes and Coaches Benefits and Incentives Act. Ning maong bag-ong balaod, ang tanang pahalipay, bonuses ug uban pang madawat sa national athletes ug hasta sa coaches nga mokombati sa international competitions dili kuhaan og tax ug uban pang mga bayranan. Nagkanayon si Speaker Lord Allan Velasco nga nagsilbe kining rekognasyon sa mga atleta nga makahatag og dungog sa nasod. "This is our way of giving back to our exceptional national athletes, a well-deserved reward for their perseverance and hard work," batbat ni Velasco nga napatik sa www.gmanews.tv. "With additional support and financial incentives such as those provided in HB 9990, we hope to encourage more local athletes to push themselves further and continue to bring honor to the Philippines." Sa iyang paglangkat og gold medal sa miaging Tokyo Olympics, gibanabanang moabot sa P50 million ang nadawat ni Diaz nga mga pahalipay , wala pa'y labot niini ang ubang mga kabtangan. (ESL)  This posting includes an audio/video/photo media file: Download Now |
| You are subscribed to email updates from https://www.sunstar.com.ph/. To stop receiving these emails, you may unsubscribe now. | Email delivery powered by Google |
| Google, 1600 Amphitheatre Parkway, Mountain View, CA 94043, United States | |
No comments:
Post a Comment